(1)

Sabiex jiġi evitat piż żejjed fuq awtoritajiet u persuni fiżiċi jew ġuridiċi minħabba x-xogħol li jirriżulta mir-reġistrazzjoni tas-sustanzi li kienu diġà fis-suq intern meta r-Regolament (KE) Nru 1907/2006 daħal fis-seħħ, l-Artikolu 23 ta’ dak ir-Regolament stabbilixxa reġim tranżizzjonali għas-sustanzi ta’ introduzzjoni gradwali. Konsegwentement, ġew stabbiliti diversi skadenzi tranżizzjonali differenti għar-reġistrazzjoni ta’ sustanzi bħal dawn. Skont l-Artikolu 23(3) ta’ dak ir-Regolament id-data finali għar-reġistrazzjoni f’dak ir-reġim tranżizzjonali skadiet fl-1 ta’ Ġunju 2018.

(2)

Sabiex tiġi żgurata l-ugwaljanza bejn l-operaturi tas-suq li jimmanifatturaw jew li jqiegħdu fis-suq sustanzi ta’ introduzzjoni gradwali u dawk li mhumiex ta’ introduzzjoni gradwali, jeħtieġ li tiġi speċifikata l-applikabbiltà, wara l-iskadenza tar-reġim tranżizzjonali, tad-dispożizzjonijiet li stabbilixxew kundizzjonijiet favorevoli għar-reġistrazzjoni tas-sustanzi ta’ introduzzjoni gradwali. Għalhekk, għal dawk id-dispożizzjonijiet, jenħtieġ li jiġi stabbilit limitu xieraq, raġonevoli u ċar, u mbagħad jenħtieġ li dawk id-dispożizzjonijiet ma jibqgħux japplikaw jew japplikaw biss f’ċirkostanzi speċifiċi.

(3)

L-Artikolu 3(30) tar-Regolament (KE) Nru 1907/2006 jistabbilixxi l-kundizzjonijiet għall-kalkolu tal-kwantitajiet fis-sena tas-sustanzi ta’ introduzzjoni gradwali bbażati fuq il-volumi medji ta’ produzzjoni jew ta’ importazzjoni għat-tliet snin kalendarji preċedenti. Sabiex jiġi żgurat li l-operaturi tas-suq ikollhom biżżejjed żmien biex jagħmlu l-aġġustamenti meħtieġa fil-metodi tal-kalkolu tagħhom, jenħtieġ li, bħala l-ewwel miżura, dawk il-kundizzjonijiet jibqgħu japplikaw sad-data tal-iskadenza speċifikata. Sabiex titqies id-definizzjoni ta’ “kull sena” fl-Artikolu 3(30) tar-Regolament (KE) Nru 1907/2006, huwa xieraq li tiġi stabbilita d-data limitu fi tmiem din is-sena kalendarja (il-31 ta’ Diċembru 2019).

(4)

F’konformità mal-intenzjoni tal-leġiżlatur li jitnaqqas l-impatt possibbli tal-obbligi tar-reġistrazzjoni fuq sustanzi ta’ volum baxx, l-Artikolu 12(1)(b) tar-Regolament (KE) Nru 1907/2006 jistabbilixxi rekwiżiti ta’ informazzjoni inqas stretti għar-reġistrazzjoni ta’ ċerti sustanzi ta’ introduzzjoni gradwali b’volum baxx, dment li ma jissodisfawx il-kriterji fl-Anness III tar-Regolament (KE) Nru 1907/2006. Skont l-Artikolu 23(3) ta’ dak ir-Regolament, dawk is-sustanzi ta’ introduzzjoni gradwali b’volum baxx kellhom jiġu rreġistrati sad-data finali għar-reġistrazzjoni fl-1 ta’ Ġunju 2018. Madankollu, wara din id-data finali, biex jiġi żgurat it-trattament ugwali għar-reġistranti li jingħaqdu ma’ reġistrazzjoni jew jaġġornaw id-dossiers tagħhom skont l-Artikolu 12(1)(b), jenħtieġ li dik id-dispożizzjoni, bħala t-tieni miżura, tkompli tapplika wara l-1 ta’ Ġunju 2018.

(5)

Fl-1 ta’ Ġunju 2018, waqaf l-operat formali tal-fora ta’ skambju ta’ informazzjoni dwar sustanzi (SIEFs). Madankollu, bħala t-tielet miżura, jenħtieġ li jissaħħu l-obbligi tal-kondiviżjoni tad-data tar-reġistranti, u jenħtieġ li r-reġistranti jiġu mħeġġa jużaw pjattaformi ta’ komunikazzjoni informali simili sabiex ikunu jistgħu jissodisfaw l-obbligi tagħhom tar-reġistrazzjoni u tal-kondiviżjoni tad-data kontinwi kemm skont ir-Regolament (KE) Nru 1907/2006 kif ukoll skont ir-Regolament ta’ Implimentazzjoni tal-Kummissjoni (UE) 2016/9 (2).

(6)

Bħala r-raba’ miżura, huwa xieraq li tiġi stabbilita, li reġistrant potenzjali li jkun irreġistra minn qabel sustanza ta’ introduzzjoni gradwali f’konformità mal-Artikolu 28 tar-Regolament (KE) Nru 1907/2006, sad-data limitu speċifikata, ma jkunx meħtieġ isegwi l-proċess ta’ inkjesta stabbilit fl-Artikolu 26 ta’ dak ir-Regolament għaliex l-għan tal-proċess ta’ inkjesta diġà jkun ġie ssodisfat permezz tar-reġistrazzjoni minn qabel.

(7)

Jeħtieġ li jiġi żgurat li l-proċessi tat-tilwim dwar il-kondiviżjoni tad-data jkunu identifikabbli b’mod ċar. Għalhekk jenħtieġ li r-regoli tal-kondiviżjoni tad-data stabbiliti fl-Artikolu 30 tar-Regolament (KE) Nru 1907/2006 jkomplu japplikaw sad-data limitu speċifikata. Wara dik id-data limitu, jenħtieġ li japplikaw biss ir-regoli tal-kondiviżjoni tad-data fl-Artikoli 26 u 27 ta’ dak ir-Regolament.

(8)

Il-miżuri previsti f’dan ir-Regolament huma skont l-opinjoni tal-Kumitat stabbilit skont l-Artikolu 133 tar-Regolament (KE) Nru 1907/2006,