(1)

F’konformità mal-Artikolu 12 tad-Direttiva 2014/34/UE tal-Parlament Ewropew u tal-Kunsill (2), il-prodotti li jkunu konformi ma’ standards armonizzati jew ma’ partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, iridu jkunu preżunti konformi mar-rekwiżiti essenzjali tas-saħħa u tas-sikurezza stabbiliti fl-Anness II ta’ dik id-Direttiva koperti minn dawk l-istandards jew minn partijiet minnhom.

(2)

Bl-ittra BC/CEN/46-92 – BC/CLC/05-92 tat-12 ta’ Diċembru 1994, il-Kummissjoni għamlet talba lill-Kumitat Ewropew għall-Istandardizzazzjoni (CEN) u lill-Kumitat Ewropew għall-Istandardizzazzjoni Elettroteknika (CENELEC) għat-tfassil u għar-reviżjoni tal-istandards armonizzati b’appoġġ tad-Direttiva 94/9/KE tal-Parlament Ewropew u tal-Kunsill (3). Dik id-Direttiva ġiet sostitwita bid-Direttiva 2014/34/UE mingħajr ma nbidlu r-rekwiżiti essenzjali tas-saħħa u tas-sikurezza stabbiliti fl-Anness II tad-Direttiva 94/9/KE.

(3)

B’mod partikolari, is-CEN u s-CENELEC intalbu jfasslu standard dwar id-disinn u l-ittestjar ta’ tagħmir għall-użu f’atmosferi potenzjalment esplużivi kif indikat fil-Kapitolu I tal-programm ta’ standardizzazzjoni maqbul bejn is-CEN u s-CENELEC u l-Kummissjoni u mehmuża mat-talba BC/CEN/46-92 – BC/CLC/05-92. Is-CEN u s-CENELEC intalbu wkoll jirrevedu l-istandards eżistenti bl-għan li jallinjawhom mar-rekwiżiti essenzjali tas-saħħa u tas-sikurezza tad-Direttiva 94/9/KE.

(4)

Abbażi tat-talba BC/CEN/46-92 – BC/CLC/05-92, is-CEN irreveda l-istandard “EN 1127-1:2011, Atmosferi esplussivi – Prevenzjoni tal-isplużjonijiet u protezzjoni minnhom - il-Parti 1: Kunċetti bażiċi u metodoloġija”. B’riżultat ta’ dik ir-reviżjoni, is-CEN ippreżenta lill-Kummissjoni l-istandard “EN 1127-1:2019, Prevenzjoni tal-isplużjonijiet u protezzjoni minnhom - il-Parti 1: Kunċetti bażiċi u metodoloġija”.

(5)

Il-Kummissjoni flimkien mas-CENELEC ivvalutat jekk l-istandard “EN IEC 1127-1:2019” imfassal mis-CEN huwiex konformi mat-talba BC/CEN/46-92 – BC/CLC/05-92.

(6)

L-istandard “EN 1127-1:2019” jissodisfa r-rekwiżiti li għandu l-għan li jkopri u li huma stabbiliti fl-Anness II tad-Direttiva 2014/34/UE. Għalhekk, huwa xieraq li tiġi ppubblikata r-referenza ta’ dak l-istandard f’Il-Ġurnal Uffiċjali tal-Unjoni Ewropea.

(7)

L-istandard “EN 1127-1:2019” jissostitwixxi l-istandard “EN 1127-1:2011”. Għalhekk, jeħtieġ li r-referenza tal-istandard “EN 1127-1:2011” tiġi rtirata minn Il-Ġurnal Uffiċjali tal-Unjoni Ewropea. Sabiex il-manifatturi jkollhom biżżejjed żmien biex iħejju għall-applikazzjoni tal-istandard rivedut, jeħtieġ li l-irtirar tar-referenza tal-istandard “EN 1127-1:2011” jiġi diferit.

(8)

Ir-referenzi tal-istandards armonizzati mfassla b’appoġġ tad-Direttiva 2014/34/UE huma ppubblikati fid-Deċiżjoni ta’ Implimentazzjoni tal-Kummissjoni (UE) 2019/1202 (4). Id-Deċiżjoni ta’ Implimentazzjoni (UE) 2019/1202 ppubblikat biss referenza waħda tal-istandard armonizzat, “EN IEC 60079–0: 2018, Atmosferi esplussivi — Parti 0: Apparat — Rekwiżiti ġenerali (IEC 60079–0: 2017)”, li jikkonferixxi preżunzjoni ta’ konformità mar-rekwiżiti essenzjali korrispondenti stabbiliti fid-Direttiva 2014/34/UE mit-12 ta’ Lulju 2019. Ipprovdiet ukoll għall-irtirar tar-referenza tal-istandard preċedenti “EN IEC 60079–0: 2018. Sabiex jiġi żgurat li r-referenzi tal-istandards armonizzati mfassla b’appoġġ tad-Direttiva 2014/34/UE jiġu elenkati f’att wieħed, ir-referenza tal-istandards “EN 1127-1:2019” u “EN 1127-1:2011” jenħtieġ li jiġu inklużi fl-Annessi li għandhom jiżdiedu ma’ dik id-Deċiżjoni ta’ Implimentazzjoni flimkien mar-referenzi tal-istandards 60079-0:2018 u EN 60079-0:2012 + A11:2013.

(9)

Għaldaqstant, jenħtieġ li d-Deċiżjoni ta’ Implimentazzjoni (UE) 2019/1202 tiġi emendata skont dan.

(10)

Il-konformità ma’ standard armonizzat tikkonferixxi preżunzjoni ta’ konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha,

(1)

L-Artikoli 1 u 2 jiġu sostitwiti b’dan li ġej:

(2)

L-Annessi I u II huma emendati kif stabbilit fl-Anness ta’ din id-Deċiżjoni.