Trasparenza u reklamar politiku fil-mira

SOMMARJU TA’:

Ir-Regolament (UE) 2024/900 dwar trasparenza u reklamar politiku fil-mira

X’INHU L-GĦAN TAR-REGOLAMENT?

Ir-Regolament (UE) 2024/900 għandu l-għan li jikkontribwixxi għall-funzjonament korrett tas-suq intern għal reklamar politiku u biex jappoġġja dibattitu miftuħ u ġust politiku. Ir-Regolament jindirizza t-tħassib relatat mal-manipulazzjoni tal-informazzjoni u l-interferenza barranija f’elezzjonijiet, flimkien mal-ipproċessar ta’ data personali għal skopijiet ta’ reklamar politiku.

PUNTI EWLENIN

Objettivi

Ir-regolament hu maħsub biex jassikura li ċ-ċittadini tal-Unjoni Ewropea (UE) jkunu ppustjati aħjar biex jagħmlu għażliet infurmati f’elezzjonijiet billi:
- jagħmliha iktar faċli għalihom biex jagħrfu reklamar politiku;
- jgħinhom jifhmu min hu warajh;
- jħallihom jkunu jafu jekk ikunu rċievu reklam immirat.
Hu ser jassikura wkoll li reklamar politiku jirrispetta d-dritt għall-protezzjoni tad-data personali u ser jipproteġi l-libertà ta' opinjoni u libertà tad-diskors, skont il-Karta tad-Drittijiet Fundamentali tal-UE.

Ir-regolament jibni fuq il-liġi eżistenti tal-UE, partikolarment ir-Regolament (UE) 2016/679 (ir-regolament dwar il-protezzjoni ġenerali tad-data) (ara s-sommarju u r-Regolament (UE) 2022/2065 (l-Att dwar is-Servizzi Diġitali) (ara s-sommarju).

Kamp ta’ applikazzjoni

Ir-regoli jkopru t-trasparenza u r-reklamar politiku fil-mira minn, jew f’isem attur politiku. Huma jkopru wkoll kull reklamar bħal dan li hu responsabbli u maħsub biex jinfluwenza l-eżitu ta’ elezzjoni jew referendum, imġiba ta’ vot jew proċess leġiżlattiv jew regolatorju. Dawn ir-regoli huma applikabbli fil-livelli tal-UE, nazzjonali, reġjonali u lokali.
L-obbligi ma jaffettwawx il-kontenut ta’ reklami politiċi u lanqas aspetti oħra ta’ reklamar politiku, bħall-iżvolġiment ta’ kampanji politiċi, li huma regolati minn regoli nazzjonal.
Kontenut taħt responsabbiltà editorjali u veduti espressi f’kapaċità personali mhumiex koperti.

Elementi prinċipali

Reklamar politiku jrid ikun ittikkettat b’mod ċar bħala tali u jinkludi informazzjoni dwar min ikun ħallsu, għal liema elezzjoni, referendum, proċess leġiżlattiv jew regolatorju hu marbut miegħu u jekk jimmirax jew liema tekniki tat-twassil tar-reklami jkunu ntużaw.
Informazzjoni addizzjonali li tipprovdi kuntest usa’ għar-reklamar politiku, bħal informazzjoni dwar ammonti aggregati jew l-oriġini tagħhom, hi pprovduta fl-avviż ta’ trasparenza li trid tkun inkluża f’kull reklamar politiku jew li tista’ tkun miġbura faċilment minnu.
Immirar jew twassil ta’ reklami ta’ reklamar politiku online hu permess biss taħt kundizzjonijiet stretti.
- id-data trid tinġabar mis-suġġett ta’ data;
- id-data tista’ tintuża biss jekk is-suġġetti ta’ data jkun ta kunsens espliċitu u separat għall-użu tagħhom għal reklamar politiku;
- id-data personali dwar minuri ma tistax tintuża;
- kategoriji speċjali ta’ data personali, bħal data li tikxef oriġini razzjali jew etnika jew opinjonijiet politiċi, ma tistax tintuża għal tfassil ta’ profil;
- l-użu ta’ data personali li tappartjeni għal suġġett ta’ data li jkollu tal-inqas sena taħt l-età tal-vot stabbilita minn regoli nazzjonal hu pprojbit.
Kull reklam online ser ikun disponibbli f’repożitorju Ewropew online.
Hemm projbizzjoni fuq reklamar politiku li jkun ġej minn sponsor minn barra l-UE fit-3 xhur ta’ qabel elezzjoni jew referendum.

MINN META BEDA JAPPLIKA R-REGOLAMENT?

B’ċerti eċċezzjonijiet, ir-regolament ser japplika mill-10 ta’ Ottubru 2025.

SFOND

Għal aktar informazzjoni, ara:

Demokrazija u drittijiet elettorali (il-Kummissjoni Ewropea).

DOKUMENT PRINĊIPALI

Ir-Regolament (UE) 2024/900 tal-Parlament Ewropew u tal-Kunsill tat-13 ta’ Marzu 2024 dwar it-trasparenza u l-immirar tar-reklamar politiku (ĠU L., 2024/900, 20.3.2024).

DOKUMENTI RELATATI

Sentenza tal-Qorti (Awla Manja) tal-4 ta’ Lulju 2023 Meta Platforms Inc u Oħrajn v Bundeskartellamt. Talba għal deċiżjoni preliminarja minn Oberlandesgericht Düsseldorf. Rinviju għal deċiżjoni preliminari — Il-Protezzjoni ta’ persuni fiżiċi fir-rigward tal-ipproċessar ta’ data personali — Regolament (UE) 2016/679 — Networks soċjali — Abbuż minn pożizzjoni dominanti mill-operatur ta’ tali network — Abbuż li jikkonsisti fl-ipproċessar ta’ data personali tal-utenti ta’ dak in-network previst fil-kundizzjonijiet ġenerali għall-użu tiegħu — Kompetenzi ta’ awtorità tal-kompetizzjoni ta’ Stat Membru sabiex tikkonstata n-nuqqas ta’ konformità ta’ dan l-ipproċessar ma’ dan ir-regolament — Rabta mal-kompetenzi tal-awtoritajiet nazzjonali inkarigati mis-superviżjoni tal-protezzjoni tad-data personali — Artikolu 4(3) TUE — Prinċipju ta’ kooperazzjoni leali — Il-punti (a) sa (f) tal-ewwel subparagrafu tal-Artikolu 6(1) tar-Regolament 2016/679 — Legalità tal-ipproċessar — Artikolu 9(1) u (2) — Ipproċessar ta’ kategoriji speċjali ta’ data personali — Il-punt 11 tal-Artikolu 4 — Kunċett ta’ “kunsens” Każ C-252/21.

Ir-Regolament (UE) 2022/2065 tal-Parlament Ewropew u tal-Kunsill tad-19 ta’ Ottubru 2022 dwar is-Servizzi Diġitali tas-Suq Uniku u li jemenda d-Direttiva 2000/31/KE (L-Att dwar is-Servizzi Diġitali) (ĠU L 277, 27.10.2022, pp. 1-102).

Kodiċi tal-Prattika dwar id-Diżinformazzjoni.

Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, pp. 39-98).

Ir-Regolament (UE) 2016/679 tal-Parlament Ewropew u tal-Kunsill tas-27 ta' April 2016 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1-88).

L-emendi suċċessivi għar-Regolament (UE) 2016/679 ġew inkorporati fit-test oriġinali. Din il-verżjoni konsolidata għandha valur dokumentarju biss.

Verzjoni konsolidata tat-Trattat dwar l-Unjoni Ewropea — Titolu I — Dispożizzjonijiet komuni — Artikolu 2 (ĠU L 202, 7.6.2016, p. 17).

Verzjoni konsolidata tat-Trattat dwar l-Unjoni Ewropea — Titolu I — Dispożizzjonijiet komuni — Artikolu 10 (ĠU L 202, 7.6.2016, p. 20).

Verżjoni konsolidata tat-Trattat dwar il-Funzjonament ta' l-Unjoni Ewropea — L-Ewwel Parti — Prinċipji — Titolu II — Dispożizzjonijiet ta’' applikazzjoni ġenerali — Artikolu 16 (ex Artikolu 286 TKE) (ĠU L 202, 7.6.2016, p. 55).

Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politiki u Azzjonijiet Interni tal-Unjoni — Titolu VII — Regoli komuni fuq il-kompetizzjoni, fuq it-tassazzjoni u fuq l-approssimazzjoni tal-liġijiet — Kapitolu 3 — Approssimazzjoni tal-liġijiet — Artikolu 114 (ex Artikolu 95 TKE) (ĠU L 202, 7.6.2016, pp. 94-95).

Il-Karta tad-Drittijiet Fundamentali tal-Unjoni Ewropea (ĠU L 202, 7.6.2016, pp. 389-405).

l-aħħar aġġornament 18.11.2024

Top

Choose the experimental features you want to try