L-Att Uniku Ewropew

PUNTI EWLENIN

Objettivi

• In-negozjati intergovernattivi li wasslu għas-SEA kellhom mandat doppju biex jikkonkludu:
  • Trattat dwar il-politika estera u ta’ sigurtà komuni, u
  • att li jemenda t-Trattat tal-KEE, b’mod partikolari fir-rigward ta’:
    • il-proċedura ta’ teħid ta’ deċiżjonijiet fi ħdan il-Kunsill;
    • is-setgħat tal-Kummissjoni Ewropea;
    • is-setgħat tal-Parlament Ewropew;
    • l-estensjoni tal-Komunità Ekonomika Ewropea u r-responsabbiltajiet tal-Komunità Ewropea tal-Enerġija Atomika.

Struttura

• Is-SEA jikkonsisti minn preambolu u 4 titoli u jinkludi serje ta’ dikjarazzjonijiet adottati mill-konferenza.
• Il-preambolu jiddikjara l-miri fundamentali tat-trattat u jesprimi d-determinazzjoni tal-firmatarji biex jittrasformaw ir-relazzjonijiet tagħhom b’mod ġenerali bil-għan li tinħoloq Unjoni Ewropea. Il-preambolu jistabbilixxi wkoll il-karattru uniku tal-att, li jiġbor flimkien ir-regoli komuni fir-rigward tal-kooperazzjoni fil-qasam tal-politika barranija u l-Komunitajiet Ewropej. Fl-aħħar nett, jiffoka fuq iż-żewġ objettivi tar-reviżjoni tat-trattati, jiġifieri “li tittejjeb is-sitwazzjoni ekonomika u soċjali billi testendi politiki komuni u ssegwi għanijiet ġodda” u “li jiġi żgurat funzjonament bla xkiel tal-Komunitajiet”.
  • Titolu I fih regoli komuni għall-kooperazzjoni politika u l-Komunità Ewropea.
  • Titolu II huwa ddedikat għall-emendi tat-trattati li jistabbilixxu l-Komunitajiet Ewropej.
  • Titolu III jikkonċerna l-kooperazzjoni Ewropea fil-qasam tal-politika barranija.
  • Titolu IV jikkonċerna r-regoli ġenerali u finali.

Bidliet istituzzjonali

• Sabiex jippermetti l-ħolqien tas-suq uniku sal-1993, is-SEA introduċa numru akbar ta’ każijiet fejn il-Kunsill jista’ jieħu deċiżjonijiet b’maġġoranza kwalifikata aktar milli b’unanimità. Dan it-teħid ta’ deċiżjonijiet issimplifikat ifisser li d-dewmien frekwenti inerenti għat-tfittxija għal ftehim unanimu fost it-12-il pajjiż membru f’dak iż-żmien jista’ jiġi evitat. L-unanimità ma tkunx aktar meħtieġa għal liġijiet maħsuba biex jistabbilixxu s-suq uniku, bl-eċċezzjoni ta’ miżuri li jikkonċernaw it-tassazzjoni, il-moviment liberu tal-persuni u d-drittijiet u l-interessi tal-persuni impjegati.
• Is-SEA stabbilixxa l-Kunsill Ewropew, li fformalizza l-konferenzi jew summits tal-Kapijiet ta’ Stat jew Gvern, għalkemm il-kompetenzi ta’ dan il-korp ma ġewx speċifikati sa aktar tard fl-Artikolu 15 tat-Trattat dwar l-Unjoni Ewropea (TUE).
• Is-setgħat tal-Parlament ġew imsaħħa billi inkludew ir-rekwiżit għall-kunsens tiegħu meta ġew konklużi ftehimiet ta’ tkabbir u assoċjazzjoni. Is-SEA introduċa l-proċedura ta’ kooperazzjoni, li saħħet il-pożizzjoni tal-Parlament fid-djalogu interistituzzjonali u tatha l-possibbiltà ta’ żewġ qari ta’ abbozzi ta’ liġijiet proposti taħt għadd limitat ta’ bażijiet legali — b’hekk twittiet it-triq lejn ir-rwol futur tal-Parlament bħala koleġiżlatur mal-Kunsill.
• Is-SEA ċċara ċerti regoli dwar is-setgħat ta’ implimentazzjoni. L-Artikolu 10 ppermetta lill-Kunsill, bħala regola ġenerali, li jagħti lill-Kummissjoni poteri ta’ implimentazzjoni għar-regoli li l-Kunsill stabbilixxa. Il-Kunsill jista’ jirriżerva biss id-dritt li jeżerċita setgħat ta’ implimentazzjoni diretta f’każijiet speċifiċi. Is-SEA ħoloq ukoll il-pedamenti għall-Qorti tal-Prim’Istanza (QPI) — issa l-Qorti Ġenerali.

Oqsma ta’ politika

• Taħt is-SEA, il-votazzjoni b’maġġoranza kwalifikata saret in-norma l-ġdida f’erba’ oqsma eżistenti koperti mit-trattati:
  • it-tariffa doganali komuni;
  • il-moviment ħieles tal-kapital;
  • il-moviment liberu tas-servizzi; u
  • it-trasport marittimu u bl-ajru.
• Is-SEA introduċa diversi oqsma ta’ politika ġodda fejn id-deċiżjonijiet jittieħdu b’maġġoranza kwalifikata. Dawn jinkludu:
  • is-suq intern;
  • il-koeżjoni ekonomika u soċjali — biex jikkontrobilanċjaw l-effetti tat-tlestija tas-suq intern fuq ir-reġjuni anqas żviluppati;
  • politika soċjali — 2 aspetti ġodda ta’ din il-politika, saħħa u sigurtà fuq ix-xogħol u djalogu soċjali bejn it-trade unions u min iħaddem;
  • riċerka u żvilupp;
  • ambjent — l-introduzzjoni tal-prinċipju tas-sussidjarjetà (jiġifieri jittieħdu biss miżuri fil-livell Ewropew fejn huma aktar effettivi milli fil-livell ta’ pajjiż individwali); u
  • politika barranija komuni — bil-presidenza tal-Kunsill responsabbli biex tibda azzjoni u tikkoordina l-pożizzjonijiet tal-pajjiżi membri.