L-infrastruttura tal-portijiet: titjib tas-sigurtà fil-portijiet

PUNTI EWLENIN

Kamp ta’ applikazzjoni

Id-Direttiva tapplika għan-nies, l-infrastruttura u t-tagħmir (inklużi l-mezzi tat-trasport) fil-portijiet u ż-żoni li jmissu magħhom.

L-awtorità tas-sigurtà tal-port u l-pjanijiet ta’ sigurtà

• Il-pajjiżi tal-UE għandhom jaħtru awtorità għas-sigurtà tal-port għal kull port. L-awtorità għas-sigurtà tal-port tista’ tinħatar għal aktar minn port wieħed. Din l-awtorità hija responsabbli għall-identifikazzjoni u t-teħid tal-miżuri meħtieġa tas-sigurtà tal-port f’konformità mal-valutazzjonijiet u l-pjanijiet tas-sigurtà tal-port.
• Il-pajjiżi tal-UE għandhom jiżguraw li l-pjanijiet tas-sigurtà tal-portijiet jiġu żviluppati, jinżammu u jiġu aġġornati, b’deskrizzjoni dettaljata tal-miżuri meħuda biex tittejjeb is-sigurtà tal-portijiet (bħall-kundizzjonijiet tal-aċċess għall-portijiet jew il-miżuri applikabbli għall-bagalji u l-merkanzija). Il-pajjiżi tal-UE għandhom ukoll jimmonitorjaw il-pjanijiet ta’ sigurtà u l-implimentazzjoni tagħhom, u jispeċifikaw il-penali għan-nuqqas ta’ konformità.

Il-livelli ta’ sigurtà

• Livelli differenti ta’ sigurtà huma stabbiliti skont ir-riskju pperċeput (normali, għoli jew imminenti), jiġifieri:
  • livell ta’ sigurtà 1: il-livell li għalih għandhom jinżammu l-miżuri minimi protettivi ta’ sigurtà f’kull ħin;
  • livell ta’ sigurtà 2: il-livell li għalih miżuri ta’ sigurtà protettivi addizzjonali xierqa għandhom jinżammu għal perjodu ta’ żmien bħala riżultat ta’ riskju akbar ta’ inċident ta’ sigurtà;
  • livell ta’ sigurtà 3: il-livell li għalih għandhom jinżammu aktar miżuri ta’ sigurtà protettivi speċifiċi għal perjodu limitat ta’ żmien meta jkun probabbli inċident ta’ sigurtà, għalkemm jista’ ma jkunx possibbli li tiġi identifikata l-mira speċifika.
• Il-pajjiżi tal-UE għandhom jinnotifikaw il-livell ta’ sigurtà fis-seħħ għal kull port u kwalunkwe tibdil fil-livell ta’ sigurtà.

Uffiċjal tas-sigurtà tal-port

Il-pajjiżi tal-UE għandhom japprovaw uffiċjal tas-sigurtà f’kull port.

Fejn possibbli kull port għandu jkollu uffiċjal tas-sigurtà tal-port differenti. Madankollu, jekk ikun meħtieġ, diversi portijiet jistgħu jaqsmu uffiċjal tas-sigurtà.

Dawn l-uffiċjali jaġixxu bħala l-punt ta’ kuntatt għal kwistjonijiet relatati ma’ kwistjonijiet ta’ sigurtà tal-port u għandu jkollhom awtorità u għarfien lokali suffiċjenti biex jiżguraw u jikkoordinaw b’mod adegwat l-istabbiliment, l-aġġornament u s-segwitu tal-valutazzjonijiet tas-sigurtà tal-port u l-pjanijiet tas-sigurtà tal-port.

Rieżamijiet

Il-pajjiżi tal-UE għandhom jiżguraw li l-valutazzjonijiet tas-sigurtà tal-portijiet u l-pjanijiet tas-sigurtà tal-portijiet jiġu riveduti kull darba li jseħħu bidliet rilevanti għas-sigurtà, u mill-inqas kull 5 snin.