Rekwiżiti minimi għall-użu mill-ġdid tal-ilma

PUNTI EWLENIN

Ir-regolament jistabbilixxi rekwiżiti minimi għall-kwalità u l-minotiraġġ tal-ilma flimkien ma’ regoli dwar il-ġestjoni tar-riskju, l-użu sikur tal-ilma reklamat għat-tisqija agrikola fil-kuntest tal-ġestjoni integrata tal-ilma.

Dan jibni fuq żewġ komunikazzjonijiet tal-Kummissjoni Ewropea:

• il-Blueprint tal-2012 għas-Salvagwardja tar-Rizorsi tal-Ilma tal-Ewropa (ara s-sommarju); u
• il-pjan ta’ azzjoni tal-UE għall-ekonomija cirkolarital-2015, li impenja ruħu ghal sensiela ta’ miżuri biex jippromwovi l-użu tal-ilma mormi trattat u għal proposta legali li tistabbilixxi rekwiżiti minimi għall-użu mill-ġdid tal-ilma.

Kamp ta’ applikazzjoni

• Ir-regolament japplika kull meta l-ilma mormi urban itrattat jerġa’ jintuża, skont l-Artikolu 12 (1) tad-Direttiva 91/271/KEE dwar l-ilma urban mormi, għat-tisqija agrikola (ara s-sommarju).
• Stat Membru tal-UE jista’ jiddeċiedi li mhuwiex xieraq li jerġa’ juża l-ilma għal tisqija agrikola f’wieħed jew aktar mid-distretti tal-baċin tax-xmara tiegħu jew f’partijiet minnhom, abbażi ta’ kriterji speċifiċi:
  • il-kundizzjonijiet ġeografiċi u klimatiċi tad-distrett jew partijiet minnu;
  • il-pressjonijiet fuq riżorsi oħra tal-ilma u l-istatus tagħhom;
  • il-pressjonijiet fuq il-korpi tal-ilma tal-wiċċ li fihom jintrema l-ilma urban mormi ttrattat u l-istatus tagħhom;
  • l-ispejjeż f’termini ambjentali u tar-riżorsi tal-ilma reklamat u ta’ riżorsi oħra tal-ilma.
• Din id-deċiżjoni trid tkun debitament iġġustifikata u riveduta b’mod regolari biex tqis iċ-ċirkostanzi li qed jinbidlu, bħall-projezzjonijiet tat-tibdil fil-klima u l-istrateġiji nazzjonali għall-adattament għat-tibdil fil-klima, flimkien mal-pjanijiet ta’ ġestjoni tal-baċir tax-xmara mfassla skont id-Direttiva Qafas dwar l-Ilma (Direttiva 2000/60/KE — ara s-sommarju).
• Ir-regolament jippermetti eżenzjonijiet limitati fiż-żmien mir-regoli għar-riċerka jew proġetti pilota, soġġetti għal ċerti kundizzjonijiet.

Il-kwalità tal-ilma reklamat

L-operatur tal-faċilità ta’ reklamazzjoni jrid jiżgura li l-ilma reklamat maħsub għall-irrigazzjoni agrikola jkun konformi ma’:

• ir-rekwiżiti minimi għall-kwalità tal-ilma stabbiliti fl-Anness 1 tar-regolament, li jkopru elementi mikrobijoloġiċi (bħal-livelli tal-batterji Enzilo coli) u r-rekwiżiti għall-monitoraġġ ta’ rutina u ta’ validazzjoni;
• kwalunkwe kundizzjoni addizzjonali li tikkonċerna l-kwalità tal-ilma stabbilita mill-awtorità rilevanti fil-permess rilevanti maħruġ.

Il-ġestjoni tar-riskju

• L-awtorità nazzjonali rilevanti trid tiżgura li jitfassal pjan għall-ġestjoni tar-riskju tal-użu mill-ġdid tal-ilma għall-produzzjoni, il-provvista u l-użu tal-ilma reklamat.
• Il-pjan għall-ġestjoni tar-riskju tal-użu tal-ilma jista’ jitfassal mill-operatur tal-faċilità ta’ reklamazzjoni, minn partijiet oħra fil-proġett tal-użu mill-ġdid tal-ilma jew mill-utenti finali, kif xieraq, u jrid jidentifika r-responsabbiltajiet tal-ġestjoni tar-riskju tal-partijiet kollha fil-proġett tal-użu mill-ġdid tal-ilma.
• Din trid, b’mod partikolari, tistabbilixxi kwalunkwe rekwiżit addizzjonali dwar il-kwalità tal-ilma, tidentifika miżuri preventivi u/jew korrettivi xierqa u tidentifika kwalunkwe ostaklu jew miżura addizzjonali biex tiġi żgurata s-sikurezza tas-sistema.

L-obbligi rigward il-permess

• Il-produzzjoni u l-provvista ta’ ilma reklamat għat-tisqija agrikola jirrikjedu permess.
• Il-partijiet ikkonċernati jridu jressqu applikazzjoni lill-awtorità nazzjonali rilevanti.
• Il-permess jistabbilixxi l-obbligi tal-operatur tal-faċilità ta’ reklamazzjoni u, fejn rilevanti, ta’ partijiet oħra involuti fis-sistema tal-użu mill-ġdid tal-ilma, li huma bbażati fuq il-pjan għall-ġestjoni tar-riskju. Huma jridu jispeċifikaw għadd ta’ elementi, li jinkludu:
  • il-klassi jew klassijiet ta’ kwalità tal-ilma reklamat u l-użu agrikolu li għalih huwa permess l-ilma reklamat, il-post tal-użu, il-faċilitajiet ta’ reklamazzjoni u l-volum stmat ta’ kull sena tal-ilma reklamat li għandu jiġi prodott;
  • il-kundizzjonijiet relatati mar-rekwiżiti minimi għall-kwalità u l-monitoraġġ tal-ilma;
  • il-kundizzjonijiet relatati mar-rekwiżiti addizzjonali għall-operatur tal-faċilità ta’ reklamazzjoni, stabbiliti fil-pjan għall-ġestjoni tar-riskju tal-użu mill-ġdid tal-ilma;
  • kwalunkwe kundizzjoni oħra meħtieġa biex jiġi eliminat kwalunkwe riskju inaċċettabbli għall-ambjent u għas-saħħa tal-bniedem u tal-annimali;
  • il-perjodu ta’ validità tal-permess;
  • il-punt ta’ konformità.
• Il-permessi jridu jiġu riveduti u aġġornati b’mod regolari fejn meħtieġ, u tal-anqas meta jkun hemm bidliet sinifikanti fil-processi ta’ trattament jew fil-kundizzjonijiet tas-sit.

Kontrolli tal-konformità

• L-awtorità nazzjonali rilevanti trid tivverifika l-konformità mal-kundizzjonijiet stabbiliti fil-permess. Dan jista’ jsir billi:
  • jitwettqu kontrolli fuq il-post;
  • Iseħħ monitoraġġ tad-data miksuba, b’mod partikolari skont dan ir-regolament;
  • kwalunkwe mezz adegwat ieħor.
• Ir-regolament jistabbilixxi wkoll il-miżuri li għandhom jittieħdu fil-każ ta’ nuqqas ta’ konformità.
• L-awtorità nazzjonali rilevanti trid ukoll tivverifika b’mod regolari l-konformità mal-pjanijiet tal-ġestjoni tar-riskju.

It-trasparenza u l-kondiviżjoni tal-informazzjoni

• Iridu jiġu stabbiliti punti ta’ kuntatt nazzjonali biex fejn meħtieġ jiffaċilitaw il-koordinazzjoni transfruntiera.
• Sabiex tiġi żgurata t-trasparenza, ir-regolament jistabbilixxi wkoll regoli dwar:
  • is-sensibilizzazzjoni;
  • l-informazzjoni li għandha tiġi pprovduta lill-pubbliku;
  • l-informazzjoni dwar il-monitoraġġ tal-implimentazzjoni.
• Il-Kummissjoni se tagħmel evalwazzjoni tar-regolament sas-26 ta’ Ġunju 2028.

Linji Gwida

Il-Kummissjoni ppubblikat linji gwida biex tgħin lill-Istati Membri u lill-partijiet interessati japplikaw ir-regoli dwar l-użu mill-ġdid tal-ilma. Il-linji gwida huma kkomplementati minn diversi eżempji prattiċi biex jiffaċilitaw l-applikazzjoni tar-regoli.