Sustanzi kimiċi perikolużi — regoli dwar l-esportazzjoni u l-importazzjoni

PUNTI EWLENIN

Kamp ta’ applikazzjoni

• Dan ir-regolament japplika għal:
  • għas-sustanzi kimiċi perikolużi mniżżla taħt il-Konvenzjoni ta’ Rotterdam;
  • sustanzi kimiċi li huma pprojbiti jew imrażżna strettament fl-UE;
  • sustanzi kimiċi li jiġu esportati.
• Hu ma jkoprix:
  • narkotiċi;
  • materjali radjuattivi;
  • skart;
  • armi kimiċi;
  • ikel u addittivi tal-ikel;
  • għalf;
  • organiżmi ġenetikament modifikati u xi mediċini;
  • sustanzi kimiċi esportati għar-riċerka jew l-analiżi fi kwantitajiet li mhux probabbli li jaffettwaw is-saħħa tal-bniedem jew l-ambjent.
• Ir-Regolament jirrikjedi li s-sustanzi kimiċi jkollhom tikkettar u imballaġġ xieraq meta jiġu esportati minn Stat Membru tal-UE.
• L-Anness I fih il-listi ta’ sustanzi kimiċi (pestiċidi u sustanzi kimiċi industrijali) li huma soġġetti għal ċerti obbligi meta jiġu esportati.
• Sustanzi kimiċi perikolużi jistgħu jew jiġu esportati waħedhom jew jitħalltu f’taħlita jew f’oġġett.
• Dan ir-Regolament ifassal mill-ġdid u jissostitwixxi r-Regolament (KE) Nru 689/2008 u jaġġorna xi proċeduri u terminoloġija li kien meħtieġ li jsiru konformi ma’ regoli oħra tal-UE.
• Dan jinvolvi l-Aġenzija Ewropea għas-Sustanzi Kimiċi stabbilita mir-Regolament (KE) Nru 1907/2006 (ara s-sommarju) fl-implimentazzjoni tar-rekwiżiti legali.

Kif jaħdem

• Ir-Regolament jimplimenta ż-żewġ proċeduri ewlenin tal-konvenzjoni, jiġifieri l-proċedura ta’ kunsens infurmat minn qabel u l-iskambju ta’ Informazzjoni. Dan jinkludi notifika ta’ esportazzjoni sabiex jinforma lill-pajjiżi dwar il-kummerċ ta’ ċerti sustanzi kimiċi, iżda jagħmel pass oltre mill-konvenzjoni, pereżempju, billi japplika l-proċeduri għall-esportazzjonijiet fil-pajjiżi kollha, irrispettivament minn jekk ikunux partijiet għall-konvenzjoni.
• Il-proċedura ta’ kunsens infurmat minn qabel tippermetti lill-partijiet importaturi għall-konvenzjoni li jinformaw lill-partijiet esportaturi dwar jekk jaqblux mal-importazzjonijiet tas-sustanzi kimiċi elenkati fil-konvenzjoni. Ir-Regolament jirrikjedi l-kunsens espliċitu tal-pajjiż importatur għal aktar sustanzi kimiċi minn dawk elenkati fil-konvenzjoni.
• Kull sustanza kimika elenkata fil-konvenzjoni għandha dokument ta’ gwida għat-teħid tad-deċiżjonijiet biex jgħin lill-gvernijiet jieħdu deċiżjoni aktar informatan. Il-partijiet kollha huma meħtieġa jieħdu deċiżjoni dwar jekk jippermettux l-importazzjonijiet — magħrufa bħala — reazzjoni dwar l-importazzjoni — u r-regolament jiżgura li r-reazzjonijiet dwar l-importazzjoni jiġu rispettati għal esportazzjonijiet tal-UE.
• Skont il-mekkaniżmu tal-iskambju ta’ informazzjoni, kull parti għandha tinnotifika lis-Segretarjat tal-konvenzjoni meta tipprojbixxi sustanza kimika, u għandha tinnotifika lill-partijiet importaturi meta din tiġi esportata. Ir-Regolament jistabbilixxi l-proċedura ta’ notifika ta’ esportazzjoni għal esportazzjonijiet tal-UE ta’ tali sustanzi kimiċi lill-pajjiżi importaturi kollha.
• Meta jiġu esportati, is-sustanzi kimiċi kollha għandhom ikunu ttikkettati u ippakkjati skont ċerti standards u akkumpanjati minn informazzjoni bażika dwar is-sigurtà fuq skeda tad-data ta’ sigurtà.
• Kull Stat Membru għandu jistabbilixxi awtorità nazzjonali deżinjata biex tkun responsabbli mill-implimentazzjoni tar-Regolament.
• Il-Kummissjoni Ewropea u l-Istari Membri jikkondividu r-responsabbiltà fil-konvenzjoni, b’mod partikolari fir-rigward ta’:
  • l-assistenza teknika;
  • il-kondiviżjoni tal-informazzjoni;
  • kwistjonijiet relatati ma’ soluzzjoni ta’ tilwim.

Ir-Regolament ta’ Implimentazzjoni (UE) Nru 649/2012

Fl-2018, il-Kummissjoni ppubblikat rapport u dokument ta’ ħidma tal-persunal dwar l-operat tar-Regolament (UE) Nru 649/2012. Ir-rapport ikkonkluda li l-proċeduri stabbiliti mir-regolament kienu ħadmu tajjeb u kkontribwew biex jintlaħqu l-objettivi tiegħu.