Ir-regoli tal-UE dwar il-produzzjoni u t-tikkettar ta’ prodotti organiċi (mill-2022)

PUNTI EWLENIN

• Ir-regolament jibni fuq u jwessa’ l-kamp ta’ applikazzjoni tal-leġiżlazzjoni tal-UE dwar il-produzzjoni u t-tikkettar ta’ prodotti organiċi biex ikopri wkoll prodotti marbuta mill-qrib mal-agrikoltura, bħal ħmira, melħ, żjut essenzjali, u qoton u suf (mhux imqardxa jew mimxuta).
• Dan jarmonizza r-regoli applikabbli għall-operaturi organiċi fl-Istati Membri tal-UE u f’pajjiżi terzi permezz tal-introduzzjoni tas-sistema ta’ konformità.
• Dan jissimplifika l-aċċess għall-iskema għall-operaturi ż-żgħar.
• Dan jirrevedi r-regoli dwar il-produzzjoni organika tal-bhejjem u jintroduċi regoli għal speċijiet ġodda, bħall-fniek.

Prinċipji

Il-produzzjoni organika għandha:

• tirrispetta s-sistemi u ċ-ċikli naturali;
• iżżomm u ttejjeb il-kundizzjoni tal-ħamrija, tal-ilma u tal-arja, tas-saħħa tal-pjanti u tal-annimali, u tal-bilanċ bejniethom;
• tippreserva l-elementi ta’ pajżaġġi naturali;
• tuża l-enerġija u r-riżorsi naturali b’mod responsabbli;
• tipproduċi varjetà kbira ta’ prodotti ta’ kwalità għolja li jissodisfaw id-domanda tal-konsumaturi;
• tiżgura l-integrità tal-produzzjoni organika fl-istadji kollha tal-produzzjoni, l-ipproċessar u d-distribuzzjoni tal-ikel u l-għalf;
• teskludi l-użu ta’ organiżmi ġenetikament modifikati (GMOs) u prodotti prodotti minn jew permezz ta’ GMOs¹, minbarra mediċini veterinarji;
• tirrestrinġi l-użu ta’ inputs esterni;
• tfassal u timmaniġġja proċessi bijoloġiċi permezz ta’ metodi bbażati fuq il-valutazzjoni tar-riskju u l-użu ta’ miżuri ta’ prekawzjoni u ta’ prevenzjoni;
• teskludi l-klonazzjoni tal-annimali;
• tiżgura livell għoli ta’ benessri tal-annimali.

Rekwiżiti

Fost affarijiet oħra, il-biedja organika għandha:

• iżżomm u ttejjeb il-ħajja tal-ħamrija u l-fertilità naturali tagħha, l-istabbiltà tal-ħamrija u l-kapaċità tagħha li żżomm l-ilma, u l-bijodiversità;
• tuża żrieragħ u annimali bi brad għoli ta’ diversità ġenetika, reżistenza għall-mard u lonġevità;
• tagħżel varjetajiet ta’ pjanti — b’kont meħud tal-karatteristiċi ta’ sistemi speċifiċi tal-produzzjoni organika, b’enfasi fuq il-prestazzjoni agronomika u r-reżistenza għall-mard;
• tagħżel razez ta’ annimali filwaqt li tqis livell għoli ta’ diversità ġenetika, valur tat-tnissil, adattament, lonġevità, vitalità u reżistenza għall-mard u problemi tas-saħħa;
• tipprattika l-produzzjoni tal-bhejjem adattata għas-sit u relatata mal-art.

Produzzjoni

Biex jiġu evitati effetti ħżiena fuq l-ambjent u fuq is-saħħa tal-annimali u tal-pjanti, il-produtturi għandhom:

• jieħdu miżuri xierqa biex:
  • jippreservaw il-bijodiversità u l-fertilità tal-ħamrija,
  • jipprevjenu l-okkorrenza ta’ pesti u ta’ mard,
  • jikkontribwixxu għal livell għoli ta’ benesseri tal-annimali u għal ambjent mhux tossiku;
• jieħdu miżuri proporzjonati u prekawzjonarji f’kull stadju tal-produzzjoni, preparazzjoni u distribuzzjoni sabiex jevitaw il-kontaminazzjoni ma’ prodotti jew sustanzi mhux awtorizzati għall-użu fil-produzzjoni organika.

Perjodu ta’ konverżjoni

• Meta azjenda agrikola tkun tixtieq timxi għall-produzzjoni ta’ prodotti organiċi, għandha tgħaddi minn perjodu ta’ konverżjoni li matulu l-azjenda kollha trid tiġi ġestita skont ir-regoli tal-produzzjoni organika, għalkemm il-prodotti tagħha f’dan l-istadju mhumiex meqjusa bħala organiċi. Ikun jista’ biss iqiegħed il-prodotti tiegħu fis-suq bħala prodotti organiċi ladarba jintemm dan il-perjodu ta’ konverżjoni u jkun ġie ċċekkjat.
• Barra minn hekk, il-prodotti tal-ikel u tal-għalf li joriġinaw mill-pjanti li fihom ingredjent wieħed biss tal-għelejjel agrikoli jistgħu jiġu kkummerċjalizzati bħala prodotti fil-fażi tal-konverżjoni, dment li jkun hemm perjodu ta’ konverżjoni ta’ 12-il xahar qabel il-ħsad. Din ir-regola issa tapplika wkoll għall-materjal riproduttiv tal-pjanti (inklużi ż-żrieragħ u l-pjanti fi kwalunkwe stadju ta’ tkabbir użat għall-produzzjoni ta’ pjanti sħaħ).
• Wara l-perjodu ta’ konverżjoni, kwalunkwe azjenda agrikola tal-UE li tkun tixtieq tgħaddi għall-produzzjoni organika għandha tiġi ġestita għalkollox f’konformità mar-rekwiżiti tal-produzzjoni organika.
• Ir-regolament jippermetti wkoll lill-azjendi agrikoli li jkollhom produzzjoni kemm organika kif ukoll mhux organika, bil-kundizzjoni li l-attivitajiet tagħhom ikunu separati f’termini ta’ unitajiet ta’ produzzjoni (mhux organiċi, waqt konverżjoni u organiċi), li jridu jkunu separati b’mod ċar u ġenwin.

Ċertifikazzjoni

• L-operaturi (jiġifieri l-produtturi, il-proċessuri u d-distributuri) għandhom jinnotifikaw l-attivitajiet tagħhom lill-awtoritajiet kompetenti sabiex l-awtoritajiet ikunu jistgħu jiċċertifikaw uffiċjalment li jikkonformaw mar-regoli dwar il-produzzjoni organika u t-tikkettar.
• Ir-regolament jintroduċi sistema ġdida ta’ ċertifikazzjoni tal-grupp² għall-bdiewa żgħar, li tagħmilha aktar faċli għalihom li jaqilbu għall-biedja organika.

Kontrolli uffiċjali u tikkettar

• Is-sistema ta’ kontrolli hija msaħħa permezz ta’ miżuri ta’ prekawzjoni aktar stretti u kontrolli sodi bbażati fuq ir-riskju tal-katina ta’ provvista. Fil-prinċipju, kontrolli fuq il-post isiru fuq l-operaturi darba fis-sena. Madankollu, dan jista’ jiġi estiż sa sentejn fejn kontrolli preċedenti ma wrew l-ebda każ ta’ nuqqas ta’ konformità matul it-tliet snin preċedenti u l-operaturi kkonċernati jippreżentaw riskju baxx ta’ nuqqas ta’ konformità.
• Jekk korp ta’ kontroll jissuspetta li operatur qed jipprova jqiegħed prodott mhux awtorizzat fis-suq bħala organiku, għandu jinvestiga formalment u jipprojbixxi temporanjament it-tqegħid fis-suq ta’ dak il-prodott sakemm joħroġ ir-riżultat tal-investigazzjoni. F’każ ta’ ksur serju u ripetut, l-operaturi jistgħu jiġu pprojbiti milli jbiegħu prodotti deskritti bħala organiċi għal perjodu speċifiku jew iċ-ċertifikat tagħhom jista’ jiġi rtirat.
• Il-kontrolli speċifiċi fuq il-biedja organika huma kkomplementati mir-regoli ġenerali tal-UE dwar il-kontrolli uffiċjali tul il-katina agroalimentari (Ir-Regolament (UE) 2017/625 — ara s-sommarju).

L-importazzjonijiet

Prodott jista’ jiġi importat minn pajjiż li mhuwiex fl-UE sabiex jinbiegħ fl-UE bħala prodott organiku jekk ċerti kundizzjonijiet ikunu ssodisfati. Il- prodott għandu:

• jikkonforma mar-regoli ta’ produzzjoni u ta’ kontroll tal-pajjiż li mhuwiex fl-UE li huma rikonoxxuti taħt ftehim internazzjonali bħala ekwivalenti għal dawk fl-UE;
• ikollu ċertifikat maħruġ mill-awtoritajiet ta’ kontroll jew korpi ta’ kontroll rilevanti fil-pajjiż mhux tal-UE li jikkonferma li l-prodott jikkonforma mal-istandards tal-UE.

Ikel organiku għall-annimali domestiċi

Ir-Regolament (UE) 2023/2419 jistabbilixxi rekwiżiti speċifiċi ta’ tikkettar għal ikel għall-annimali domestiċi prodott skont ir-regoli dwar il-produzzjoni organika tal-għalf stipulati fir-Regolament (UE) 2018/848. L-ikel għall-annimali domestiċi, b’mod partikolari għall-qtates u l-klieb, jista’ jkollu l-logo tal-produzzjoni organika tal-UE. Il-logo tal-produzzjoni organika se jkun obbligatorju għal ikel għall-annimali domestiċi ippakkjat minn qabel ittikkettat bħala organiku.

Atti ta’ implimentazzjoni

Il-Kummissjoni Ewropea adottat l-atti legali li ġejjin.

• Ir-Regolament ta’ Implimentazzjoni (UE) 2020/464, li jistabbilixxi regoli għall-applikazzjoni tar-Regolament (UE) 2018/848 fir-rigward ta’:
  • id-dokumenti meħtieġa għar-rikonoxximent retroattiv tal-perjodi għall-fini ta’ konverżjoni;
  • il-produzzjoni ta’ prodotti organiċi;
  • l-informazzjoni li l-Istati Membri jeħtieġ li jipprovdu lill-Kummissjoni.
• Ir-Regolament ta’ Implimentazzjoni (UE) 2021/279, li jistabbilixxi regoli għal:
  • investigazzjonijiet uffiċjali f’każijiet ta’ suspett ta’ nuqqas ta’ konformità;
  • id-daqs tal-gruppi ta’ operaturi u d-dokumentazzjoni tas-sistema ta’ kontrolli interni tagħhom;
  • rekwiżiti minimi ta’ kontroll;
  • katalgi nazzjonali ta’ miżuri għal każijiet ta’ nuqqas ta’ konformità;
  • l-iskambju ta’ informazzjoni bejn l-Istati Membri u l-Kummissjoni.
• Ir-Regolament ta’ Implimentazzjoni (UE) 2021/1165, li jawtorizza u jelenka ċerti prodotti u sustanzi għall-użu fil-produzzjoni organika, li wara ġie korrett u emendat bir-Regolament ta’ Implimentazzjoni (UE) 2023/121.
• Ir-Regolament ta’ Implimentazzjoni (UE) 2021/1378, li jipprovdi regoli għaċ-ċertifikat maħruġ lill-operaturi, gruppi ta’ operaturi u esportaturi f’pajjiżi mhux tal-UE involuti fl-importazzjonijiet ta’ prodotti organiċi u fil-konverżjoni fl-UE, u biex jistabbilixxi lista ta’ awtoritajiet ta’ kontroll rikonoxxuti u korpi ta’ kontroll f’pajjiżi mhux tal-UE.
• Ir-Regolament ta’ Implimentazzjoni (UE) 2021/1935 li jemenda r-Regolament ta’ Implimentazzjoni (UE) 2019/723, li jipprovdi għall-użu tas-sistema ta’ informazzjoni dwar il-biedja organika għas-sottomissjoni ta’ informazzjoni u data dwar il-produzzjoni organika u t-tikkettar ta’ prodotti organiċi li għandhom jiġu sottomessi permezz tal-formola mudell standard li għandha tintuża fir-rapporti annwali mressqa mill-Istati Membri fir-rigward tar-Regolament (UE) 2017/625.
• Ir-Regolament ta’ Implimentazzjoni (UE) 2021/2119, li jipprovdi regoli dettaljati għal ċerti rekords u dikjarazzjonijiet meħtieġa mill-operaturi u mill-gruppi ta’ operaturi u dwar il-mezzi tekniċi għall-ħruġ taċ-ċertifikati, u li jintroduċi emendi għar-Regolament ta’ Implimentazzjoni (UE) 2021/1378 fir-rigward tal-ħruġ taċ-ċertifikati għall-operaturi, għall-gruppi ta’ operaturi u għall-esportaturi f’pajjiżi terzi.
• Ir-Regolament ta’ Implimentazzjoni (UE) 2021/2307, li jipprovdi regoli għad-dokumenti u n-notifiki meħtieġa għall-prodotti organiċi u fil-fażi tal-konverżjoni maħsuba għall-importazzjoni fl-UE.
• Ir-Regolament ta’ Implimentazzjoni (UE) 2021/2325, li jistabbilixxi l-lista ta’ pajjiżi terzi u l-lista ta’ awtoritajiet ta’ kontroll u korpi ta’ kontroll rikonoxxuti skont ir-Regolament (KE) Nru 834/2007 għall-fini tal-importazzjoni ta’ prodotti organiċi fl-UE.
• Ir-Regolament ta’ Implimentazzjoni tal-Kummissjoni (UE) 2023/1195 li jistabbilixxi r-regoli għad-dettalji u l-format tal-informazzjoni li għandha ssir disponibbli mill-Istati Membri dwar ir-riżultati ta’ investigazzjonijiet uffiċjali li jikkonċernaw każijiet ta’ kontaminazzjoni bi prodotti jew sustanzi mhux awtorizzati għall-użu fil-produzzjoni organika.

Atti delegati

Il-Kummissjoni adottat diversi atti delegati li jemendaw ir-Regolament (UE) 2018/848 jew l-annessi tiegħu.

• Ir-Regolament Delegat (UE) 2020/427 jemenda l-Anness II tar-Regolament (UE) 2018/848 fir-rigward ta’ ċerti regoli dettaljati tal-produzzjoni għall-prodotti organiċi. Dan, min-naħa tiegħu, kien emendat mir-Regolament Delegat (UE) 2021/269.
• Ir-Regolament Delegat (UE) 2020/1794 jemenda l-Parti I tal-Anness II tar-Regolament (UE) 2018/848 fir-rigward tal-użu ta’ materjal riproduttiv tal-pjanti fil-konverżjoni u mhux organiku.
• Ir-Regolament Delegat (UE) 2021/642 jemenda l-Anness III tar-Regolament (UE) 2018/848 fir-rigward ta’ ċerta informazzjoni li għandha tingħata fuq it-tikkettar ta’ prodotti organiċi.
• Ir-Regolament Delegat (UE) 2021/715 jemenda r-Regolament (UE) 2018/848 fir-rigward tar-rekwiżiti għal gruppi ta’ operaturi.
• Ir-Regolament Delegat (UE) 2021/716 jemenda l-Anness II tar-Regolament (UE) 2018/848 fir-rigward tar-regoli tal-produzzjoni organika dwar iż-żrieragħ bin-nebbieta u l-irjus taċ-ċikwejra, dwar l-għalf għal ċerti annimali tal-akkwakultura u dwar it-trattamenti tal-parassiti tal-akkwakultura.
• Ir-Regolament Delegat (UE) 2021/1006 jemenda r-Regolament (UE) 2018/848 fir-rigward tal-mudell taċ-ċertifikat li jattesta l-konformità mar-regoli dwar il-produzzjoni organika.
• Ir-Regolament Delegat (UE) 2021/1691 li jemenda l-Anness II tar-Regolament (UE) 2018/848 fir-rigward tar-rekwiżiti għaż-żamma tar-rekords għall-operaturi fil-produzzjoni organika.
• Ir-Regolament Delegat (UE) 2021/1697 jemenda r-Regolament (UE) 2018/848 fir-rigward tal-kriterji għar-rikonoxximent ta’ awtoritajiet ta’ kontroll u korpi ta’ kontroll li huma kompetenti biex iwettqu kontrolli fuq prodotti organiċi f’pajjiżi terzi, u għall-irtirar tar-rikonoxximent tagħhom.
• Ir-Regolament Delegat (UE) 2023/207 li jemenda r-Regolament (UE) 2018/848 billi jissostitwixxi l-Anness VI tiegħu (il-mudell taċ-ċertifikat li jattesta l-konformità mar-regoli dwar il-produzzjoni organika).

Barra minn hekk, regolamenti delegati oħrajn jissupplimentaw ir-Regolament (UE) 2018/848.

• Ir-Regolament Delegat (UE) 2019/2123 fir-rigward tar-regoli għall-każijiet meta l-verifiki identitarji u l-verifiki fiżiċi fuq ċerti oġġetti jistgħu jitwettqu f’punti ta’ kontroll u l-verifiki dokumentarji jistgħu jitwettqu ’l bogħod mill-postijiet ta’ kontroll fuq il-fruntieri u l-kundizzjonijiet li bihom isiru dawn il-verifiki, emendat aktar tard bir-Regolament Delegat (UE) 2021/2305.
• Ir-Regolament Delegat (UE) 2019/2124 rigward ir-regoli għall-kontrolli uffiċjali ta’ kunsinni ta’ annimali u ta’ oġġetti fit-tranżitu, fit-trasbord u fit-tkomplija tat-trasport fl-Unjoni, emendat aktar tard bir-Regolamenti Delegati (UE) 2020/2190 u 2021/2305.
• Ir-Regolament Delegat (UE) 2020/2146 fir-rigward ta’ regoli ta’ produzzjoni eċċezzjonali fil-produzzjoni organika.
• Ir-Regolament Delegat (UE) 2021/771 li jistabbilixxi kriterji u kundizzjonijiet speċifiċi għall-verifiki tal-kontijiet dokumentarji fil-qafas tal-kontrolli uffiċjali fil-produzzjoni organika u l-kontrolli uffiċjali tal-gruppi ta’ operaturi.
• Ir-Regolament Delegat 2021/1189 fir-rigward tal-produzzjoni u l-kummerċjalizzazzjoni ta’ materjal riproduttiv tal-pjanti ta’ materjal organiku eteroġenu ta’ ġeneri jew speċijiet partikolari.
• Ir-Regolament Delegat (UE) 2021/1342 dwar ir-regoli dwar l-informazzjoni li għandha tintbagħat mill-pajjiżi terzi u mill-awtoritajiet ta’ kontroll u mill-korpi ta’ kontroll għall-finijiet tas-superviżjoni tar-rikonoxximent tagħhom skont ir-Regolament (KE) Nru 834/2007 għall-prodotti organiċi importati u l-miżuri li għandhom jittieħdu fl-eżerċizzju ta’ dik is-superviżjoni.
• Ir-Regolament Delegat (UE) 2021/1698 dwar ir-rekwiżiti proċedurali għar-rikonoxximent tal-awtoritajiet ta’ kontroll u l-korpi ta’ kontroll li huma kompetenti biex iwettqu l-kontrolli fuq operaturi u gruppi ta’ operaturi ċċertifikati organiċi u fuq il-prodotti organiċi f’pajjiżi terzi u bir-regoli dwar is-superviżjoni u l-kontrolli tagħhom u azzjonijiet oħra li għandhom jitwettqu minn dawk l-awtoritajiet ta’ kontroll u l-korpi ta’ kontroll, emendat aktar tard bir-Regolament Delegat (UE) 2023/1686.
• Regolament Delegat (UE) 2021/2304 dwar ir-regoli dwar il-ħruġ ta’ ċertifikati komplementari li jiċċertifikaw in-nuqqas ta’ użu ta’ antibijotiċi fil-produzzjoni organika ta’ prodotti tal-annimali għall-fini ta’ esportazzjoni.
• Ir-Regolament Delegat (UE) 2021/2305 dwar ir-regoli dwar il-każijiet meta u l-kundizzjonijiet li fihom il-prodotti organiċi u l-prodotti fil-fażi ta’ konverżjoni huma eżentati mill-kontrolli uffiċjali fil-postijiet ta’ kontroll fuq il-fruntiera, fil-post tal-kontrolli uffiċjali għal tali prodotti.
• Ir-Regolament Delegat (UE) 2021/2306 dwar ir-regoli dwar il-kontrolli uffiċjali fir-rigward tal-konsenji ta’ prodotti organiċi u prodotti fil-fażi tal-konverżjoni maħsuba għall-importazzjoni fl-Unjoni u dwar iċ-ċertifikat ta’ spezzjoni.
• Ir-Regolament Delegat (UE) 2022/1450 fir-rigward tal-użu tal-għalf tal-proteini mhux organiku għall-produzzjoni tal-bhejjem organiċi minħabba l-invażjoni tar-Russja fl-Ukrajna.