Il-kwalità tal-ilma għall-għawm

PUNTI EWLENIN

• L-Unjoni Ewropea (UE) hija impenjata biex tipproteġi l-kwalità tal-ambjent u s-saħħa tal-bniedem. Għalhekk, din id-Direttiva ssaħħaħ ir-regoli li jiggarantixxu l-kwalità tal-ilma għall-għawm. Din tissupplimenta d-Direttiva 2000/60/KE (ara s-sommarju) dwar il-protezzjoni u l-immaniġġjar tal-ilma.
• Id-Direttiva ma tapplikax għall-pixxini jew għall-pixxini tal-ispas, jew għall-ilmijiet magħluqa, maħluqa b’mod artifiċjali, li jiġu soġġetti għal trattamenti jew li jintużaw għal għanijiet terapewtiċi.

Il-monitoraġġ tal-ilma għall-għawm

• Kull sena, il-pajjiżi tal-UE għandhom jidentifikaw l-ilmijiet għall-għawm fit-territorju tagħhom u jiddefinixxu t-tul tal-istaġun tal-għawm.
• Dawn għandhom jistabbilixxu l-monitoraġġ tal-post li l-aktar jintuża mill-għawwiema jew fejn hemm l-akbar riskju ta’ tniġġis. Il-monitoraġġ għandu jsir permezz ta’ kampjunar:
  • tal-inqas 4 kampjuni, inkluż 1 qabel il-bidu tal-istaġun tal-għawm;
  • 3 kampjuni biss jekk l-istaġun tal-għawm ma jaqbiżx 8 ġimgħat jew jekk ir-reġjun ikun soġġett għal restrizzjonijiet ġeografiċi speċjali biss.
• Il-pajjiżi tal-UE għandhom jikkomunikaw ir-riżultati tal-monitoraġġ tagħhom lill-Kummissjoni Ewropea b’deskrizzjoni tal-miżuri tal-immaniġġjar tal-kwalità tal-ilma. Il-monitoraġġ jista’ jiġi sospiż b’mod eċċezzjonali ladarba l-Kummissjoni tkun ġiet infurmata.

Id-determinazzjoni tal-kwalità tal-ilma għall-għawm

• Il-kwalità tal-ilma tiġi vvalutata abbażi ta’ data mikrobijoloġika definita f’konformità mal-parametri stabbiliti fl-Anness I tad-Direttiva. Il-klassifikazzjoni tal-ilmijiet ta’ kwalità ħażina, suffiċjenti, tajba jew eċċellenti tiġi stabbilita f’konformità mal-kriterji stabbiliti fl-Anness II tad-Direttiva.
• Skont id-Direttiva, sal-aħħar tal-istaġun tal-għawm tal-2015, l-ilmijiet għall-għawm kollha fl-UE kellhom ikunu tal-inqas ta’ kwalità suffiċjenti. Barra minn hekk, il-pajjiżi tal-UE għandhom jieħdu l-miżuri neċessarji biex itejbu n-numru ta’ ilmijiet għall-għawm ta’ kwalità tajba jew eċċellenti.
• Jekk il-kwalità tkun ħażina, il-pajjiżi tal-UE għandhom jadottaw il-miżuri neċessarji biex jimmaniġġjaw u jeliminaw it-tniġġis, u biex jipproteġu u jinfurmaw lill-għawwiema.

Il-profil tal-ilma għall-għawm

• Id-Direttiva tipprevedi profili għal kull ilma għall-għawm. Dawn jistgħu jkopru sit individwali wieħed jew aktar minn ilma għall-għawm wieħed kontigwu. B’mod partikolari, dawn jinkludu valutazzjoni ta’:
  • il-karatteristiċi fiżiċi, ġeografiċi u idroloġiċi tal-ilma għall-għawm u ta’ ilmijiet oħra tal-wiċċ fil-magħqad tal-ilma;
  • it-tniġġis u s-sorsi tiegħu;
  • il-miżuri ta’ mmaniġġjar.
• Il-profili tal-ilma għall-għawm għandom jiġu rieżaminati u aġġornati skont kif previst fl-Anness III tad-Direttiva.

Miżuri eċċezzjonali

• Il-pajjiżi tal-UE għandom jadottaw miżuri eċċezzjonali jekk sitwazzjonijiet mhux mistennija jiddeterjoraw il-kwalità tal-ilmijiet jew jirrappreżentaw riskju għas-saħħa tal-għawwiema.
• Għandu jiġi implimentat ukoll monitoraġġ xieraq jekk ikun hemm riskju ta’ proliferazzjoni tal-alka. Għalhekk, l-awtoritajiet responsabbli għandhom:
  • jieħdu miżuri ta’ mmaniġġjar u jipprovdu informazzjoni immedjatament jekk ikun hemm proliferazzjoni ta’ ċjanobatterji (jew “alka kaħlanija”);
  • jivvalutaw ir-riskji tas-saħħa jekk ikun hemm proliferazzjoni ta’ makroalga u/jew fitoplankton tal-baħar.

Ilmijiet transkonfinali

Jekk baċin tax-xmara jkun jestendi fuq diversi territorji, il-pajjiżi tal-UE għandhom jiskambjaw informazzjoni u jieħdu azzjoni konġunta.

Informazzjoni lill-pubbliku

• L-awtoritajiet nazzjonali għandhom iħallu lill-pubbliku jikseb informazzjoni u jipparteċipa fl-immaniġġjar tal-kwalità tal-ilma. Għalhekk, iċ-ċittadini jistgħu jgħaddu suġġerimenti, kummenti jew ilmenti. Dawn jistgħu wkoll jipparteċipaw fl-istabbiliment, fir-rieżami u fl-aġġornament ta’ listi tal-kwalità tal-ilma.
• Barra minn hekk, il-pajjiżi tal-UE għandhom jiżguraw li l-informazzjoni adegwata tinxtered b’mod attiv u li din tkun disponibbli faċilment matul l-istaġun tal-għawm. B’mod partikolari, dan jittratta:
  • il-klassifikazzjoni tal-ilma, projbizzjonijiet jew pariri kontra l-għawm;
  • deskrizzjoni ġenerali tal-ilma b’lingwaġġ mhux tekniku;
  • deskrizzjoni tan-natura u durata tat-tniġġis.
• Id-Direttiva 2013/64/UE temenda d-Direttiva 2006/7/KE wara l-emendar tal-istatus ta’ Mayotte fir-rigward tal-UE. Franza hija l-unika destinatarja.
• Id-Direttiva 2006/7/KE ħassret u ssostitwiet id-Direttiva 76/160/KEE fil-31 ta’ Diċembru 2014.