Il-bijodiversità;

Tqassir taż-żewġ kelmiet “bijoloġika” u “diversità”, il-bijodiversità tirreferi għall-varjetà ta’ ħajja fid-dinja b’mod ġenerali, jew il-varjetà ta’ organiżmi ħajjin f’ekosistema jew reġjun speċifiku. Hija tkopri l-organiżmi ħajjin kollha, mill-batterji, pjanti u annimali, sal-bnedmin.

Il-bijodiversità għandha rwol importanti fis-servizzi tal-ekosistema, li huma servizzi li tissupplixxi n-natura. Dawn jinkludu l-pollinazzjoni, ir-regolament tal-klima, il-produzzjoni kontra l-għargħar, il-fertilità tal-ħamrija u l-produzzjoni tal-ikel, il-fjuwil, il-fibra u l-mediċini.

Mill-elfejnijiet, l-UE adottat serje ta’ pjanijiet ta’ azzjoni u strateġiji dwar il-bijodiversità, l-aktar waħda reċenti hija l-istrateġija tal-bijodiversità 2030, maħsuba biex tqiegħed il-bijodiversità tal-Ewropa lura fuq il-mogħdija ta’ rkupru sal-2030. L-istrateġija, parti mill-Patt Ekoloġiku Ewropew, fiha miri u impenji biex jindirizzaw il-kawżi ewlenin tat-telf tal-bijodiversità:

• il-bidliet fl-użu tal-art u tal-baħar,
• l-isfruttar żejjed ta’ riżorsi bijoloġiċi,
• il-bidla fil-klima,
• it-tniġġis,
• l-ispeċi aljeni invażivi.

Il-leġiżlazzjoni tal-UE relatata mal-bijodiversità tinkludi:

• id-direttiva tal-għasafar (Direttiva 2009/147/KE), li tipprovdi protezzjoni komprensiva għall-ispeċi kollha tal-għasafar selvaġġi li jseħħu b’mod naturali fl-UE;
• id-direttiva tal-ħabitats (Direttiva 92/43/KEE), li tgħin iżżomm il-bijodiversità billi tipproteġi aktar minn 1 000 speċi ta’ annimali u pjanti u aktar minn 200 tip ta’ ħabitat;
• id-direttiva qafas dwar ll-ilma (Direttiva 2000/60/KE), li tipprovdi qafas għall-azzjoni tal-UE fil-qasam tal-politika tal-ilma;
• id-direttiva kwadru dwar l-istrateġija marina (Direttiva 2008/56/KE), li tipprovdi qafas għall-azzjoni tal-UE fil-qasam tal-politika tal-ambjent marin;
• speċi aljeni invażivi — annimali u pjanti introdotti b’mod aċċidentali jew apposta f’ambjent naturali fejn normalment ma jinstabux, b’konsegwenzi negattivi serji għall-ambjent il-ġdid tagħhom (Regolament (UE) Nru 1143/2014);
• regoli dwar il-kummerċ tal-ħajja selvaġġa (Regolament (KE) Nru 338/97 li jimplimentaw il-Konvenzjoni dwar il-Kummerċ Internazzjonali tal-Ispeċi fil-Periklu tal-Fawna u l-Flora Selvaġġi, u jmorru lil hinn mill-ħtiġijiet tal-konvenzjoni, ir-Regolament (KE) Nru 1007/2009 dwar il-kummerċ fil-prodotti tal-foki u r-Regolament (KEE) Nru 3254/91 dwar l-istandards tal-insib b’mod uman).