Clár an Mhargaidh Aonair

PRÍOMHPHOINTÍ

Is iad seo a leanas na haidhmeanna ginearálta leis an gclár:

• feabhas a chur ar fheidhmiú an mhargaidh inmheánaigh, go háirithe chun an pobal, tomhaltóirí agus gnóthais, go háirithe FBManna, a chosaint agus a chumhachtú trí
  • dlí AE a fhorfheidhmiú, rochtain ar an margadh a éascú agus caighdeáin a leagan síos
  • sláinte an duine, ainmhithe agus plandaí agus leas ainmhithe a chur chun cinn
  • forbairt inbhuanaithe a urramú agus leibhéal ard cosanta do thomhaltóirí a áirithiú
  • comhar a fheabhsú idir údaráis náisiúnta, an Coimisiún Eorpach agus gníomhaireachtaí díláraithe AE;
• staidreamh Eorpach ardchaighdeáin, inchomparáide, tráthúla agus iontaofa a fhorbairt, a tháirgeadh agus a scaipeadh chun
  • taca a chur faoi dhearadh, faoi fhaireachán agus faoi mheastóireacht bheartais AE
  • cuidiú leis an bpobal, lucht déanta beartas, údaráis, gnólachtaí, an saol acadúil agus na meáin cinntí feasacha a dhéanamh
  • cuidiú leis na grúpaí thuas páirt ghníomhach a ghlacadh sa phróiseas daonlathach.

Baintear na haidhmeanna foriomlána sin amach trí na cuspóirí sonracha seo a leanas:

• an margadh inmheánach a dhéanamh níos éifeachtaí, go háirithe maidir leis an aistriú digiteach, bacainní neamhdhleathacha (EUR 452 mhilliún thar an tréimhse 7 mbliana) a chosc agus a bhaint agus a áirithiú nach féidir ach táirgí sábháilte agus comhlíontacha a thairiscint lena ndíol (EUR 106 mhilliún);
• iomaíochas agus inbhuanaitheacht FBManna a neartú, lena n–áirítear cineálacha éagsúla tacaíochta, deiseanna nua gnó a chur chun cinn agus luachshlabhraí tionsclaíocha a fhorbairt (EUR 1 bhilliún);
• feidhmiú éifeachtach an mhargaidh inmheánaigh a áirithiú trí chaighdeáin ardchaighdeáin Eorpacha agus idirnáisiúnta (EUR 221 mhilliún);
• leasanna tomhaltóirí agus ardleibhéal cosanta do thomhaltóirí agus sábháilteacht táirgí a chur chun cinn, lena n–áirítear i seirbhísí airgeadais (EUR 200 mhilliún);
• cur le hardleibhéal sláinte agus sábháilteachta do dhaoine, d’ainmhithe agus do phlandaí ar fud an bhiashlabhra, lena n–áirítear galair ainmhithe agus lotnaidí plandaí a dhíothú, frithsheasmhacht in aghaidh ábhair fhrithmhiocróbacha a chomhrac agus táirgeadh agus tomhaltas bia inbhuanaithe a fhorbairt (EUR 1.7 billiún);
• staidreamh Eorpach ar ardchaighdeán a fhorbairt, a tháirgeadh, a scaipeadh agus a chur in iúl (EUR 552 mhilliún).

Is é EUR 4 208 041 000 milliún (praghsanna reatha) an buiséad 7 mbliana chun an clár a chur chun feidhme. Féadfar suas le 5 % den bhuiséad a úsáid chun críocha teicniúla agus riaracháin éagsúla, amhail ullmhú, faireachán, rialú, iniúchadh, meastóireacht agus úsáid líonraí teicneolaíochta faisnéise.

Féadfaidh tíortha nach tíortha den Aontas Eorpach iad páirt a ghlacadh sa chlár faoi réir coinníollacha áirithe. Áirítear leo sin ceart na hOifige Eorpaí Frith–Chalaoise (OLAF) chun imscrúduithe a dhéanamh, lena n–áirítear seiceálacha agus cigireachtaí ar an láthair, chun airgeadas an Aontais Eorpaigh a chosaint.

In Airteagal 8 agus Iarscríbhinn I (plandaí, ainmhithe, bia agus beatha) agus Iarscríbhinn II (staidreamh Eorpach) leagtar amach an iliomad gníomhaíochtaí atá incháilithe i leith maoinithe faoi chuspóirí ginearálta agus sonracha an chláir.

Eintitis dhlítheanacha¹ beidh siad incháilithe do mhaoiniú má tá an méid seo a leanas fíor ina leith:

• tá siad bunaithe i mBallstát AE nó tá siad nasctha le tír nó críoch thar lear, nó i dtír nach tír den Aontas Eorpach í a bhaineann leis an gclár;
• cruthaíodh iad faoi dhlí AE nó is eagraíocht idirnáisiúnta iad;
• tá siad bunaithe i dtír nach tír den Aontas Eorpach í nach mbaineann leis an gclár, ach a bhfuil gníomhaíochtaí i gcomhréir lena chuspóirí.

In Airteagal 10 leagtar amach na heintitis a fhéadfaidh deontas a fháil gan gairm ar thograí. Tá a réimse idir údaráis náisiúnta faireachais margaidh agus an Grúpa Comhairleach Eorpach um Thuairisciú Airgeadais agus Bureau Européen des Unions de Consommateurs.

Sonraítear an méid seo a leanas i rialacha um chómhaoiniú:

• i gcúinsí áirithe féadfar suas le 100 % de na costais incháilithe a chlúdach faoin gclár. I gcásanna eile, tá an raon idir 50 % agus 95 %;
• féadfar maoiniú a fháil i gcomhair gníomhaíochtaí ó chlár an mhargaidh aonair agus ó chistí eile AE ar an gcoinníoll nach gclúdaíonn na ranníocaíochtaí na costais chéanna.

Maidir leis an gCoimisiún:

• leagann sé amach cláir oibre faoin 30 Aibreán don bhliain dar gcionn;
• déanann sé faireachán agus tuairisciú ar dhul chun cinn an chláir i dtreo a chuspóirí sonracha a bhaint amach, ag baint úsáid as táscairí in Iarscríbhinn IV;
• ullmhaíonn sé tuarascáil bhliantúil do Pharlaimint na hEorpa agus don Chomhairle maidir le gníomhaíocht Fhondúireacht na gCaighdeán Idirnáisiúnta um Thuairisciú Airgeadais;
• soláthraíonn sé meastóireacht eatramhach ar an gclár tráth nach déanaí na 4 bliana i ndiaidh a sheolta agus soláthraíonn sé meastóireacht deiridh tráth a chríochnaithe;
• cuireann sé an dá mheastóireacht os comhair Pharlaimint na hEorpa, na Comhairle, Choiste Eacnamaíoch agus Sóisialta na hEorpa agus Choiste na Réigiún agus cuireann sé ar fáil go poiblí iad;
• téann sé i gcomhairle leis an gCoiste um an gCóras Staidrimh Eorpach agus leis an gCoiste Comhairleach Staitistiúil Eorpach agus na meastóireachtaí á n–ullmhú;
• cuireann sé gníomhaíochtaí faisnéise agus cumarsáide soláimhsithe chun feidhme chun feasacht a mhúscailt i measc an phobail, gnólachtaí agus lucht riaracháin poiblí faoi airgeadas atá ar fáil faoin gclár;
• féadfaidh sé gníomhartha éagsúla cur chun feidhme agus tarmligthe a ghlacadh.

Aisghairtear leis an reachtaíocht Rialachán (AE) Uimh. 99/2013, Rialachán (AE) Uimh. 1287/2013, Rialachán (AE) Uimh. 254/2014 agus Rialachán (AE) Uimh. 652/2014 ón 31 Nollaig 2020.