Soláthar poiblí i réimsí na cosanta agus na slándála

PRÍOMHPHOINTÍ

Raon feidhme

• Tá feidhm ag an treoir, i bprionsabal, maidir leis na conarthaí uile do sholáthar trealaimh, oibreacha agus seirbhísí míleata agus do na ceannacháin íogaire uile a bhfuil feidhm slándála acu agus a mbaineann faisnéis rúnaicmithe leo.
• Tá an ceart ag na Ballstáit faoi Airteagal 346 den Chonradh ar Fheidhmiú an Aontais Eorpaigh le conarthaí áirithe a dhíolmhú ón treoir seo nuair a bhíonn géarghá leis chun a mbunleasa slándála a chosaint.
• I gcomhréir le cásdlí a réitíodh sa Chúirt Bhreithiúnais, tá an díolúine a cheadaítear faoi Airteagal 346 CFAE teoranta do chásanna eisceachtúla atá sainithe go sonrach. Ní mór a thaispeáint, bunaithe ar mheasúnú cás ar chás, go gcomhlíontar na coinníollacha lena chur i bhfeidhm.

Nósanna imeachta athbhreithnithe

Leis an treoir ceadaítear nósanna imeachta athbhreithnithe (i.e. féidearthacht le haghaidh tairgeora¹ le dámhachtain conartha do thairgeoir eile a cheistiú) a bhfuil sé mar aidhm leis cosaint dhlíthiúil a sholáthar do na tairgeoirí lena mbaineann. Spreagtar leis na nósanna imeachta freisin trédhearcacht agus neamh–idirdhealú i ndámhachtain conarthaí gan baint den ghá atá ag Ballstáit AE le rúndacht.

Táirgí a bhaineann le cosaint

Glacadh Treoir 2009/81/CE mar chuid de shraith a raibh Treoir 2009/43/CE maidir le haistrithe táirgí a bhaineann le cosaint laistigh den Aontas Eorpach (féach an achoimre) mar chuid de. Tá na haistrithe simplithe de tháirgí a bhaineann leis an gcosaint idir Ballstáit mar a leagtar amach i dTreoir 2009/43/CE tábhachtach le haghaidh feidhmiú cuí tairiscintí trasteorann.

Tuarascáil mheastóireachta

Thángthas ar an gconclúid i dtuarascáil de chuid an Choimisiúin a foilsíodh in 2016 agus ina ndearnadh measúnú ar chur chun feidhme Threoir 2009/81/CE gur chuidigh an treoir leis an margadh inmheánach le haghaidh cosanta a oscailt ach go bhféadfaí dul chun cinn a dhéanamh ann fós.

Plean gníomhaíochta cosanta, an Ciste Eorpach Cosanta agus soláthar comhoibríoch

Chun tacú le caiteachas níos éifeachtúla ag Ballstáit ar chomhchumais chosanta agus chun cur le bonn tionsclaíoch iomaíoch agus nuálach earnáil cosantaAE, sheol an Coimisiún an plean gníomhaíochta cosanta ag deireadh 2016. Mar ghné ríthábhachtach leis an bplean cruthaíodh an Ciste Eorpach Cosanta (CEC) chun tacú le hinfheistíocht i dtaighde chomhpháirteach agus i gcomhfhorbairt trealaimh agus teicneolaíochtaí cosanta (féach an achoimre).

In 2019, d’fhoilsigh an Coimisiún fógra inar tugadh treoir ar fhéidearthachtaí éagsúla a bhaineann le soláthar comhoibríoch i réimse na cosanta agus na slándála. Soláthraítear faisnéis úsáideach san fhógra freisin ar ghnéithe ábhartha chun tabhairt faoi thionscadail atá maoinithe faoi CEC.

I mí Feabhra 2022, d’fhoilsigh an Coimisiún teachtaireacht ar ranníocaíocht an Choimisiúin le cosaint Eorpach, a bhfuil roinnt tograí chun soláthar comhpháirteach cumas cosanta a forbraíodh ar bhealach comhoibríoch in AE a spreagadh.

Cur leis an ról atá ag Fiontair bheaga agus mheánmhéide (FBManna)

I moladh ón gCoimisiún in 2018 maidir le rochtain ar an margadh trasteorann le haghaidh fosholáthróirí agus FBManna, moltar bearta chun suíomh FBManna i slabhraí soláthair cosanta a fheabhsú.

Leasuithe ar Threoir 2009/81/CE

Leasaíodh an treoir roinnt uaireanta maidir le tairsí cur i bhfeidhm (luachanna nach bhfuil feidhm ag an treoir faoina mbun) le haghaidh nósanna imeachta dámhachtana conartha. Rinneadh an leasú is deanaí le Rialachán Tarmligthe (AE) 2021/1950 ón gCoimisiún a tháinig i bhfeidhm ar an 1 Nollaig 2021.