Ceanglais maidir le sábháilteacht innealra

PRÍOMHPHOINTÍ

Raon feidhme

Cuimsítear leis an rialachán seo innealra agus na táirgí gaolmhara seo a leanas:

• innealra idirmhalartaithe,
• comhpháirteanna sábháilteachta,
• gabhálais ardaithe,
• slabhraí, téada agus caolrabhaisc,
• gléasanna inbhainte traiseolta mheicniúil.

Gairtear “innealra nó táirgí gaolmhara” ar an méid thuas anseo feasta.

Tá feidhm aige freisin maidir le hinnealra atá críochnaithe go páirteach.

Níl feidhm ag an rialachán maidir le réimsí éagsúla, lena n–áirítear modhanna aeriompair, iompair d’uisce agus iompair d’iarnród, ach amháin i gcás innealra atá suite ar na modhanna iompair sin.

Oibleagáidí na n–oibreoirí eacnamaíocha

Cuimsítear leis an rialachán liosta d’oibleagáidí monaróirí, allmhaireoirí agus dáileoirí.

Ceanglais riachtanacha sláinte agus sábháilteachta agus toimhde na comhréireachta

• Agus innealra nó táirgí gaolmhara a chumhdaítear leis an rialachán á gcur ar an margadh nó á gcur i seirbhís, ní mór do mhonaróirí a áirithiú go ndearnadh iad a dhearadh agus a thógáil i gcomhréir leis na ceanglais riachtanacha sláinte agus sábháilteachta atá leagtha amach in Iarscríbhinn III a ghabhann leis an Rialachán.
• Agus innealra atá críochnaithe go páirteach a chumhdaítear leis an rialachán á chur ar an margadh, ní mór do mhonaróirí a áirithiú go ndearnadh é a dhearadh agus a thógáil i gcomhréir leis na ceanglais sláinte agus sábháilteachta riachtanacha ábhartha atá leagtha amach in Iarscríbhinn III a ghabhann leis an Rialachán.
• Le caighdeáin chomhchuibhithe dheonacha (atá luaite in Iris Oifigiúil an Aontais Eorpaigh)) nó sonraíochtaí comhchoiteanna (atá foilsithe san Iris Oifigiúil), foráiltear, má chuirtear i bhfeidhm iad, toimhde na comhréireachta do na ceanglais fhíor–riachtanacha chomhfhreagracha.
• Féadfaidh an Coimisiún Eorpach sonraíochtaí comhchoiteanna a bhunú, trí ghníomhartha cur chun feidhme, i gcás inar comhlíonadh coinníollacha áirithe.

Nósanna imeachta um measúnú comhréireachta

• Leis an rialachán, féadfar an nós imeachta um rialú táirgthe inmheánach (féinmheasúnú) a chur i bhfeidhm chun comhréireacht leis na ceanglais fhíor–riachtanacha is infheidhme maidir le formhór na dtáirgí a léiriú (cé is moite do na cinn atá liostaithe i gCuid A d’Iarscríbhinn I).
• Go sonrach, maidir leis na táirgí atá liostaithe in Iarscríbhinn I, ní mór cloí le nós imeachta um measúnú comhréireachta² lena mbaineann comhlacht faoina dtugtar fógra; i gcás táirgí atá liostaithe i gCuid B den iarscríbhinn sin; féadfar cloí leis an nós imeachta um rialú táirgthe inmheánach (“féinmheasúnú”), áfach, i gcás ina ndéantar na táirgí a dhearadh agus a thógáil i gcomhréir leis na caighdeáin chomhchuibhithe ábhartha (atá luaite san Iris Oifigiúil) nó leis na sonraíochtaí comhchoiteanna ábhartha (atá foilsithe san Iris Oifigiúil), má bhaineann siad go sonrach leis an gcatagóir táirge sin agus má chumhdaítear leo na ceanglais fhíor–riachtanacha ábhartha go léir.
• Féadfaidh an Coimisiún liosta na gcatagóirí in Iarscríbhinn I a mhodhnú trí ghníomhartha tarmligthe a ghlacadh, i ndiaidh measúnú a dhéanamh ar shonraí agus ar fhaisnéis ábhartha.

Marcáil CE, dearbhú comhréireachta AE, faisnéis sábháilteachta agus treoracha sábháilteachta: innealra nó táirgí gaolmhara

• I gcás inar léiríodh go gcomhlíonann innealra nó táirgí gaolmhara a chumhdaítear faoin rialachán na ceanglais is infheidhme, ní mór don mhonaróirí dearbhú comhréireachta AE³ a dhréachtú ansin agus marcáil CE a ghreamú de (faoi Chinneadh Uimh. 768/2008/EC).
• Ní mór dearbhú comhréireachta AE agus treoracha maidir le húsáid (ina gcuimsítear an fhaisnéis sábháilteachta freisin) a chur ar fáil do gach innealra nó táirge gaolmhar. Féadfar dearbhú comhréireachta AE agus treoracha úsáide (ina gcuimsítear an fhaisnéis sábháilteachta freisin) a sholáthar i bhformáid dhigiteach. Má sholáthraítear iad i bhformáid dhigiteach, ní mór don mhonaróir oibleagáidí sonracha a chomhlíonadh. Maidir le hinnealra nó táirgí gaolmhara le haghaidh úsáid neamhthráchtála, ní mór an fhaisnéis sábháilteachta atá riachtanach chun é a chur i seirbhís agus chun é a úsáid ar bhealach sábháilte a sholáthar i bhformáid páipéir, áfach. Beidh custaiméirí fós ábalta a iarraidh go soláthrófar na treoracha úsáide dóibh i bhformáid pháipéir saor in aisce.

Dearbhú AE um ionchorprú agus treoracha cóimeála: innealra atá críochnaithe go páirteach

• I gcás ina léireofar go bhfuil na ceanglais fhíor–riachtanacha ábhartha á gcomhlíonadh ag innealra atá críochnaithe go páirteach agus a chumhdaítear leis an rialachán, ní mór do na monaróirí dearbhú AE um ionchorprú a dhréachtú.
• Ní mór an dearbhú AE um ionchorprú agus na treoracha cóimeála, a fhéadfar a sholáthar i bhformáid dhigiteach, a sholáthar le gach cineál innealra atá críochnaithe go páirteach a chumhdaítear leis an rialachán. Má sholáthraítear iad i bhformáid dhigiteach, ní mór don mhonaróir oibleagáidí sonracha a chomhlíonadh. Beidh an duine a ionchorpróidh an t–innealra atá críochnaithe go páirteach fós ábalta a iarraidh go gcuirfear treoracha cóimeála i bhformáid páipéir ar fáil dó nó di saor in aisce.

Modh éigeandála an mhargaidh inmheánaigh

Le Rialachán leasaitheach (AE) 2024/2748, féachtar le cur isteach ar an margadh inmheánach a sheachaint i gcás éigeandála (amhail paindéim nó tubaiste nádúrtha) trína áirithiú, a luaithe is a dhéanfar modh éigeandála an mhargaidh inmheánaigh, mar atá leagtha amach i Rialachán (AE) 2024/2747 (an Gníomh um Éigeandáil agus Athléimneacht an Mhargaidh Inmheánaigh), a ghníomhachtú trí ghníomh cur chun feidhme arna ghlacadh ag Comhairle an Aontais Eorpaigh, gur féidir earraí agus seirbhísí ainmnithe atá ábhartha i gcás géarchéime⁴ a chur ar an margadh chomh tapa agus is féidir.

Le Rialachán leasaitheach (AE) 2024/2748, cuirtear caibidil le Rialachán (AE) 2023/1230 ina sonraítear an dóigh a mbeadh feidhm ag na nósanna imeachta éigeandála sin. Leis an gcaibidil nua:

• ceanglaítear ar chomhlachtaí um measúnú comhréireachta tús áite a thabhairt d'iarratais ar chomhréireacht táirgí atá ábhartha don chosaint thar na cinn maidir le táirgí nach bhfuil;
• ceadaítear do Bhallstáit AE, ar bhonn eisceachtúil agus i gcás ina bhfuil iarratas a bhfuil údar leis ann, táirgí gaolmhara agus innealra atá críochnaithe go páirteach chur ar an margadh a údarú go sealadach gan na gnáth–nósanna imeachta um measúnú comhréireachta a chur i gcrích, i gcás go bhfuil rannpháirtíocht comhlachta dá dtugtar fógra éigeantach agus go bhféadfaidh siad a áirithiú go gcomhlíonfar gach ceanglas riachtanach;
• ceadaítear d’údaráis inniúla na mBallstát glacadh leis go gcloíonn innealra, táirgí gaolmhara agus innealra atá críochnaithe go páirteach a mhonaraítear i gcomhréir le caighdeáin AE, le caighdeáin náisiúnta ábhartha is infheidhme nó le caighdeáin idirnáisiúnta ábhartha is infheidhme arna bhforbairt ag comhlacht creidiúnaithe idirnáisiúnta um chaighdeánú, atá aitheanta ag an gCoimisiún Eorpach mar a bheith oiriúnach chun comhréireacht a bhaint amach agus leibhéal cosanta atá comhionann leis an gcosaint a chuirtear ar fáil leis na caighdeáin chomhchuibhithe a áirithiú, leis na ceanglais riachtanacha ábhartha;
• tugtar an deis don Choimisiún leo sonraíochtaí comhchoiteanna a ghlacadh, ar a bhféadfaidh na monaróirí brath chun leas a bhaint as toimhde na comhréireachta leis na ceanglais riachtanacha is infheidhme (beidh gníomhartha cur chun feidhme lena leagtar síos na sonraíochtaí comhchoiteanna sin fós infheidhme ar feadh thréimshe mhód éigeandála an mhargaidh inmheánaigh).