Saoráid do dhídeanaithe sa Tuirc

PRÍOMHPHOINTÍ CHINNEADH 2015

• Chun cuidiú leis an Tuirc tabhairt faoi riachtanais dhaonnúla agus forbartha láithreach na ndídeanaithe, a bpobal óstach, na n–údarás náisiúnta agus áitiúla déantar meicníocht chomhordúcháin a bhunú: an tSaoráid do Dhídeanaithe.
• Is é cuspóir na Saoráide chun a chinntiú go ndéantar gníomhaíochtaí arna maoiniú le ranníocaíochtaí airgeadais ó thíortha AE agus ó bhuiséad ginearálta an AE a chomhordú agus a shruthlíniú go ceart.
• Is ionann an buiséad atá socraithe don tSaoráid agus €3 bhilliún, lena gcuimsítear:
  • €0.5 billiún ó bhuiséad ginearálta an AE; agus
  • €2.5 billiún i bhfoirm ranníocaíochtaí ó thíortha AE mar ioncam sannta seachtrach.², de réir an mhiondealaithe atá leagtha amach san iarscríbhinn leis an gcinneadh agus bunaithe ar an Eochair Ollioncaim Náisiúnta³.
• Déanann an Coimisiún Eorpach an tSaoráid a chomhordú trí thosaíochtaí a shocrú le haghaidh acmhainní a leithdháileadh.
• Tá an tSaoráid faoi cheannas coiste stiúrtha a sholáthraíonn treoir straitéiseach Tá an coiste sin comhdhéanta de bheirt ionadaí ón gCoimisiún agus ionadaí ó gach tír AE, chomh maith le hionadaí na Tuirce mar chomhairleoir. Tá an Coimisiún ina chathaoirleach ar an gcoiste agus soláthraíonn sé an rúnaíocht dá chuid.
• Tá an Coimisiún freagrach as an tSaoráid a bhainistiú i gcomhréir leis an reachtaíocht AE ábhartha lena soláthraítear an bunús dlí leis na gníomhaíochtaí faoi seach agus a bhfeidhmiú.

Leasuithe in 2016, 2017 agus 2018

Leasaíodh an cinneadh in 2016 le Cinneadh C/2016/855:

• Athainmnítear an mheicníocht “an tSaoráid do Dhídeanaithe sa Tuirc”.
• Soiléirítear na cineálacha beart do dhídeanaithe leis a d’fhéadfadh a bheith comhordaithe tríd an tSaoráid. Áirítear leo sin:
  • cabhair dhaonnúil;
  • oideachas;
  • an tsláinte,
  • tacaíocht shocheacnamaíoch;
  • bainistíocht imirce; agus
  • bonneagar bardasach.

• Déantar ról agus feidhmiú an choiste stiúrtha a mhionsonrú a thuilleadh.
• Déantar buiséad na Saoráide a athbhreithniú mar a leanas:
  • laistigh den bhuiséad €3 bhilliún, déantar cion na ranníocaíochta ó bhuiséad ginearálta an AE a mhéadú go haon trian;
  • déantar cion na dtíortha AE a laghdú go €2 bhilliún;
  • tá miondealú na ranníocaíochtaí idir tíortha AE bunaithe ar an Eochair Ollioncaim Náisiúnta a úsáideadh do bhuiséad 2015 (rinneadh an iarscríbhinn a scriosadh).

Ós rud é go ndearnadh tagairt sa chinneadh fós do Rialachán (AE, Euratom) Uimh. 966/2012 maidir leis na rialacha airgeadais is infheidhme le buiséad ginearálta an AE, leasaíodh an cinneadh don dara huair in 2017 le Cinneadh C(2017) 2293. Soiléirítear an méid a leanas leis:

• Is ranníocaíochtaí deonacha iad ranníocaíochtaí na dtíortha AE agus, neamhchosúil le cás acmhainní féin an AE (.i. príomhfhoinsí ioncaim bhuiséad an AE), níl siad comhfhreagrach d’oibleagáid réamhbheitheach;
• mar eisceacht ó na rialacha airgeadais is infheidhme le buiséad ginearálta an AE, níl aon ús dlite as íocaíocht mhall ag tír AE maidir le ranníocaíocht leis an tSaoráid.

In 2018, leasaíodh an cinneadh arís mar thoradh ar thiomantas ón AE i ráiteas AE-na Tuirce 2016 chun €3 bhilliún bhreise a shlógadh faoin tSaoráid do Dhídeanaithe, faoi choinníollacha áirithe, mar bhíothas ar tí an €3 bhilliún a leithdháileadh ar dtús a úsáid ina iomláine. Leanfaí an patrún dáilte céanna leis an dara tráinse sin — chun leanúnachas obair na Saoráide a chinntiú don tréimhse 2018-2019 — (.i. €2 bhilliún ó thíortha AE agus €1 bhilliún ó bhuiséad an AE).

Tuarascálacha

Foilsíonn an Coimisiún tuarascálacha maidir le hoibríochtaí na Saoráide.