Rialacha AE lena n–áirithítear go bhfuil uirlisí tomhais cruinn

PRÍOMHPHOINTÍ

Leis an treoir tugtar reachtaíocht um uirlisí tomhais i gcomhréir le “creat reachtach nua” AE. Tá 2 théacs chomhlántacha sa chreat seo:

• Rialachán (CE) Uimh. 765/2008 maidir le creidiúnú agus maidir le faireachas margaidh; agus
• Cinneadh Uimh. 768/2008/CE maidir le coinníollacha aonfhoirmeacha i leith margú táirgí sábháilte san Aontas Eorpach (marcáil comhréireachta).

Raon feidhme

Baintear úsáid as uirlisí tomhais atá rialaithe ó thaobh an dlí de do thascanna tomhais éagsúla i réimsí na sláinte agus na sábháilteachta poiblí chomh maith le réimse na cóirthrádála. Tá feidhm ag an treoir maidir le:

• méadair fóntais (méadair uisce, méadair gháis agus gléasanna um thiontú toirte¹, méadair fuinnimh leictreachais ghníomhaigh agus méadair fuinnimh theirmigh);
• córais tomhais le haghaidh tomhas leanúnach agus dinimiciúil ar mhéideanna leachtanna seachas uisce (e.g. caidéil pheitril);
• meá–innill uathoibríocha (e.g. droichid meáite iarnróid nó línte uathphacáistithe);
• tacsaiméadair;
• tomhais ábhair agus uirlisí toiseacha tomhais (e.g. do mhiotalóireacht nó d’adhmadóireacht); agus
• anailíseoirí gáis sceite (e.g. chun feidhmíocht innill a sheiceáil).

Tá feidhm ag an treoir maidir le gach uirlis tomhais atá nua ar mhargadh AE nuair a chuirtear ar an margadh sin iad nó nuair a chuirtear in úsáid iad, is é sin gurb é atá i gceist leo:

• gur uirlisí tomhais nua iad arna ndéanamh ag monaróir atá bunaithe in AE; nó
• gur uirlisí tomhais iad arna n–allmhairiú ó thír neamh–AE, bídís ina n–uirlisí tomhais nua nó athláimhe.

Tá feidhm ag an treoir maidir le gach cineál soláthair uirlisí tomhais, lena n–áirítear ciandíol.

Freagrachtaí monaróirí, allmhaireoirí agus dáileoirí

Ní mór do mhonaróirí a áirithiú:

• go bhfuil marcáil comhréireachta ar gach uirlis tomhais atá ar díol san Aontas Eorpach ar a bhfuil an mharcáil comhréireachta Eorpach (CE) mar aon leis an gcomhartha méadreolaíochta forlíontach (M), leis an dá dhigit dheireanacha den bhliain a greamaíodh í agus uimhir (uimhreacha) an chomhlachta creidiúnaithe dá dtugtar fógra², ar a léirítear go gcomhlíonann siad ceanglais riachtanacha uile reachtaíocht AE (atá leagtha amach in Iarscríbhinn I den treoir agus sna hiarscríbhinní ábhartha a bhaineann go sonrach le huirlisí);
• go ndéanann siad measúnú riosca agus comhréireachta agus go ndréachtaíonn siad doiciméadúchán teicniúil maidir leis an uirlis tomhais sula ngreamaíonn siad na marcálacha CE + M (féach Iarscríbhinn II a ghabhann leis an treoir);
• go gcoimeádann siad (agus má cheapann siad ionadaí údaraithe³) an doiciméadúchán teicniúil agus dearbhú comhréireachta AE (mar atá leagtha amach in Iarscríbhinn II a ghabhann leis an treoir) ar feadh 10 mbliana i ndiaidh an uirlis tomhais a chur ar an margadh;
• go léiríonn siad a n–ainm, a dtrádainm cláraithe nó a dtrádmharc cláraithe agus an seoladh poist ar an uirlis tomhais lenar féidir teagmháil a dhéanamh leo chun inrianaitheacht a áirithiú;
• sa chás go gcreideann siad, maidir le huirlisí tomhais a chur siad ar an margadh, nach bhfuil siad comhlíontach, go nglacann siad bearta ceartaitheacha chun iad a dhéanamh comhlíontach, iad a tharraingt siar nó iad a aisghairm;
• go bhfuil treoracha agus faisnéis a ghabhann leis an uirlis tomhais scríofa i dteanga is féidir le húsáideoirí deiridh a thuiscint go héasca agus go bhfuil siad, chomh maith le haon lipéadú, soiléir agus intuigthe.

Ní mór d’allmhaireoirí a áirithiú:

• go bhfuil uirlisí tomhais a chuireann siad ar an margadh i gcomhréir leis na ceanglais fhíor–riachtanacha;
• go ndearna monaróirí measúnuithe comhréireachta i gceart agus go gcuireann siad an t–údarás um fhaireachas margaidh ar an eolas má mheasann siad nach bhfuil na huirlisí tomhais comhlíontach;
• go léiríonn siad a n–ainm, a dtrádainm cláraithe nó a dtrádmharc cláraithe agus an seoladh poist ar an uirlis tomhais lenar féidir teagmháil a dhéanamh leo;
• go bhfuil marcáil uirlisí tomhais agus doiciméadúchán arna dhréachtú ag monaróirí ar fáil lena n–iniúchadh ag na húdaráis inniúla.

Ní mór do dháileoirí a áirithiú:

• i gcás uirlisí tomhais atá faoina gcúram, nó dálaí stórála nó dálaí iompair na n–uirlisí tomhais, nach gcuirfidh siad i mbaol comhlíonadh na n–uirlisí maidir leis na ceanglais fhíor–riachtanacha;
• go bhfuil na marcálacha riachtanacha ar uirlisí tomhais;
• sa chás go gcreideann siad, maidir le huirlisí tomhais a chuir siad ar an margadh, nach bhfuil comhlíontach, go nglacfaidh siad bearta ceartaitheacha chun iad a dhéanamh comhlíontach, iad a tharraingt siar nó iad a aisghairm.

Ina theannta sin, leis an treoir:

• tugtar isteach léi ceanglais d’údaráis a thugann fógra agus na nósanna imeachta maidir le fógra a thabhairt do chomhlachtaí um measúnú comhréireachta;
• sonraítear inti conas nach mór d’údaráis náisiúnta um fhaireachas margaidh díolachán uirlisí tomhais a mbaineann riosca leo do ghnéithe de chosaint an leasa phoiblí a shainaithint agus a chosc, lena n–áirítear a n–allmhairiú ó thíortha neamh–AE;
• folaítear rialacha maidir le pionóis i leith sáruithe arna ndéanamh ag monaróirí, allmhaireoirí agus dáileoirí a bhféadfadh pionóis choiriúla a áireamh i gcásanna tromchúiseacha.