Conarthaí lamháltais san Aontas Eorpach

PRÍOMHPHOINTÍ

• Is conarthaí íocaíochta iad lamháltais trína gcuireann údaráis chonarthacha nó eintitis chonarthacha amháin nó níos mó oibreacha nó soláthar agus bainistiú seirbhísí de chúram ar chuideachta amháin nó níos mó:
  • Is iad údaráis chonarthacha (mar a shainmhínítear in Airteagal 6) údaráis nó comhlachtaí náisiúnta, réigiúnacha nó áitiúla faoi rialú an dlí phoiblí;
  • is éard atá in eintitis chonarthacha (mar a shainmhínítear in Airteagal 7) údaráis nó oibreoirí in earnáil na bhfóntas a bhfuil ceann de na gníomhaíochtaí ábhartha ar bun acu agus a dhámhann lamháltas lena gcur i gcrích.
• Is éard atá i ndámhachtain na n–oibreacha nó na seirbhísí an ceart chun leas a bhaint astú, nó an ceart sin mar aon le híocaíocht. Tugtar le tuiscint leis an gceart chun leas a bhaint astu an riosca oibriúcháin eacnamaíoch a aistriú chuig sealbhóir an lamháltais, a bhaineann, go háirithe, leis an bhféidearthacht go bhféadfadh sé nach ndéanfaidh sealbhóir an lamháltais na hinfheistíochtaí a rinneadh a aisghabháil.
• Féachtar leis na rialacha maidir le lamháltais a dhámhachtain cur chuige dlíthiúil soiléir a leagan amach. Tá sé mar aidhm acu freisin rochtain éifeachtach ar mhargadh na lamháltas a ráthú do gach gnólacht Eorpach, lena n–áirítear fiontair bheaga agus mheánmhéide, agus deiseanna a thabhairt dóibh infheistíocht a dhéanamh i mórsheirbhísí poiblí amach anseo.
• Is cuid de phacáiste gníomhartha dlíthiúla an treoir seo, pacáiste arna dhearadh chun rialacha soláthair phoiblí ar fud AE a nuachóiriú. Cuirfidh na hathchóirithe ar chumas na n-údarás poiblí an leas a bhaintear as soláthar poiblí a bharrfheabhsú. Tá luach thart ar €420 billiún ar chonarthaí poiblí atá cumhdaithe ag treoracha AE, rud a fhágann gur príomhthiomántóir do gheilleagar an Aontais iad.
• Mar atá leagtha amach in Airteagal 8, tá feidhm ag an treoir maidir le lamháltais ar fiú €5,538,000 nó níos mó iad. Déantar an tairseach sin a athbhreithniú gach 2 bliana, mar atá leagtha amach in Airteagal 9.