Acmhainní dílse

Is iad acmhainní dílse AE na príomhfhoinsí ioncaim le haghaidh bhuiséad AE. Ní féidir lena chaiteachas bliantúil dul thar a ioncam (i.e. feidhmíonn sé buiséad comhardaithe).

Tá 4 chineál acmhainne dílse ann:

• Ceann traidisiúnta. Cuimsítear sa chineál seo go príomha dleachtanna custam ar allmhairí chuig an Aontas Eorpach. Amhail an 1 Eanáir 2021 amach, coinneoidh tíortha 25% de na dleachtanna a bhailítear chun a gcostais um bailiúchán a chumhdach.
• Bunaithe ar cháin bhreisluacha (CBL). Tá ráta 0.3% i bhfeidhm ar bhonn comhchuibhithe CBL gach tíre de chuid an Aontais Eorpaigh, lena gcuirtear uasteorainn 50% dá ollioncam náisiúnta (OIN), agus aistrítear na fáltais ar fad chuig an Aontas Eorpach.
• Bunaithe ar OIN Aistríonn gach tír AE céatadán aonfhoirmeach dá OIN chuig an Aontas Eorpach. Déantar an céatadán a choigeartú ionas go dtiocfaidh an t–ioncam foriomlán leis an leibhéal comhaontaithe íocaíochtaí. Is é sin foinse ioncaim is mó an Aontais Eorpaigh.
• Ceann nua. Ón 1 Eanáir 2021 ar aghaidh, beidh ranníocaíocht ó thíortha AE ar bhonn chainníocht na dramhaíola ó phacáistíocht phlaisteach neamh–athchúrsáilte ina hacmhainn dhílis nua AE.

Le himeacht ama, tugadh isteach sásraí chun ranníocaíochtaí a aithníodh mar ranníocaíochtaí iomarcacha ó thíortha áirithe a cheartú. Amhail an 2021, bainfidh an Danmhairg, an Ghearmáin, an Ísiltír, an Ostair agus an tSualainn taribhe as na ceartúcháin sin.

Mar chuid de ghlacadh an chreata airgeadais Ilbhliantúil le haghaidh 2021-2027 agus an phacáiste téarnaimh, ghlac an Chomhairle cinneadh maidir le hacmhainní dílse nua (Cinneadh (AE, Euratom) 2020/2053) i mí na Nollag 2020. Leis sin ardófar an t–uasmhéid acmhainní ar féidir iad a iarraidh ó thíortha AE in aon bhliain ar leith chun caiteachas AE a mhaoiniú — uasteorainn na n–acmhainní dílse — ó 1.20% go 1.40% de shuim OIN d’AE-27. Tagann sé sin le comhtháthú Chiste Forbraíochta na hEorpa i mbuiséad AE, agus tugann sé aghaidh ar tharraingt siar na Ríochta Aontaithe, glan-ranníocóir sa bhuiséad roimhe seo, ón Aontas Eorpach.

Le Cinneadh (AE, Euratom) 2020/2053 chomh maith tugtar údarás don Choimisiún, ar bhonn eisceachtúil, suas le €750 billiún i bpraghsanna 2018 ar na margaí caipitil a fháil ar iasacht ar bhonn sealadach chun dul i ngleic le hiarmhairtí na géarchéime COVID-19. Ag an am céanna, déanfar méadú eisceachtúil agus sealadach ar uasteorainn na n–acmhainní dílse de 0.6 pointe céatadáin breise le dliteanais uile an Aontais Eorpaigh mar thoradh ar an iasacht sin a chlúdach go dtí go mbeidh na cistí ar fad a fuarthas ar iasacht íoctha ar ais.

Chun go dtiocfaidh sé i bhfeidhm, ní mór do 27 tír uile an Aontais Eorpaigh an cinneadh a fhaomhadh i gcomhréir lena gceanglais bhunreachtúla.