Kooperazzjoni xjentifika u teknoloġika bejn l-UE u l-Istati Uniti tal-Amerka

SOMMARJU TA’:

Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka

Deċiżjoni 98/591/KE — konklużjoni ta’ ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka

Deċiżjoni tal-Kunsill 2009/306/KE — l-estensjoni u l-modifikazzjoni tal-ftehim għal kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka

Deċiżjoni tal-Kunsill 2014/240/UE — l-estensjoni tal-ftehim dwar kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka

Deċiżjoni (UE) 2018/1578 — l-estensjoni tal-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka

X’INHU L-GĦAN TAL-FTEHIM U D-DEĊIŻJONIJIET?

Il-ftehim jistabbilixxi qafas formali għall-kooperazzjoni, bil-għan li jħeġġeġ, jiżviluppa u jiffaċilita attivitajiet fl-oqsma tax-xjenza u tat-teknoloġija.

Permezz tad-Deċiżjoni 98/591/KE, il-Kunsill approva l-konklużjoni tal-ftehim f’isem il-Komunità Ewropea (issa l-UE).

Il-Kunsill approva estensjonijiet suċċessivi fl-2004 (Deċiżjoni 2004/756/KE), fl-2009 (Deċiżjoni 2009/306/KE — inkluża emenda għall-Ftehim), fl-2014 (Deċiżjoni 2014/240/UE) u fl-2018 (Deċiżjoni (UE) 2018/1578).

PUNTI EWLENIN

Attivitajiet imwettqa skont il-ftehim huma bbażati fuq il-prinċipji li ġejjin:

benefiċċju reċiproku;
opportunitajiet reċiproċi għall-parteċipazzjoni f’attivitajiet ta’ kooperazzjoni;
trattament ekwitabbli u ġust;
skambju f’waqtu ta’ informazzjoni.

Kooperazzjoni

L-oqsma tal-attivitajiet koperattivi huma:

l-ambjent (inkluż ir-riċerka dwar il-klima);
il-bijomediċina u s-saħħa (inkluż l-AIDS, il-mard infettiv u l-abbuż mid-droga);
l-agrikoltura;
ix-xjenza tas-sajd;
ir-riċerka fl-inġinerija;
l-enerġija mhux nukleari;
ir-riżorsi naturali;
ix-xjenzi tal-materjali (inkluż in-nanoteknoloġija) u l-metroloġija;
teknoloġiji tal-informazzjoni u l-komunikazzjoni;
it-telematika;
il-bijoteknoloġija;
ix-xjenzi u t-teknoloġiji marittimi;
ir-riċerka dwar ix-xjenzi soċjali;
it-trasport;
ir-riċerka dwar is-sigurtà;
ir-riċerka dwar l-ispazju;
il-politika dwar ix-xjenza u t-teknoloġija, l-immaniġġjar, it-taħriġ u l-mobbiltà tax-xjenzjati.

Attivitajiet

Attivitajiet koperattivi jistgħu jinkludu:

proġetti ta’ riċerka kkoordinati u proġetti ta’ riċerka konġunti;
task forces konġunti;
studji konġunti;
organizzazzjoni konġunta ta’ seminars xjentifiċi, konferenzi, simpożji u workshops;
taħriġ ta’ xjenzati u esperti tekniċi;
skambju jew qsim ta’ tagħmir u materjali;
żjarat u skambji ta’ xjenzati, inġiniera jew persunal ieħor kif xieraq;
skambju ta’ informazzjoni xjentifika u teknoloġika kif ukoll informazzjoni dwar prattiki, liġijiet, regolamenti u programmi rilevanti għall-kooperazzjoni skont dan il-Ftehim.

DATA TAD-DĦUL FIS-SEĦĦ

Il-ftehim daħal fis-seħħ fl-14 ta’ Ottubru 1998 għal perjodu inizjali ta’ ħames snin u jista’ jiġi estiż b’emendi possibbli għal perjodi addizzjonali ta’ ħames snin.

Il-ftehim ġie estiż erba’ darbiet, l-aħħar darba fl-2018, għal perjodu addizzjonali ta’ ħames snin kull darba. It-tieni estensjoni kienet tinkludi emenda — li żiedet ir-riċerka dwar is-sigurtà u l-ispazju mal-lista ta’ setturi għall-attivitajiet koperattivi.

SFOND

Għal aktar informazzjoni, ara:

L-Istati Uniti u l-UE (Servizz Ewropew għall-Azzjoni Esterna)

Għal aktar informazzjoni dwar il-kooperazzjoni mal-Istati Uniti fl-oqsma tar-Riċerka u l-Innovazzjoni (R&I), ara:

Kooperazzjoni internazzjonali fl-oqsma tar-Riċerka u l-Innovazzjoni — l-Istati Uniti (il-Kummissjoni Ewropea)
Pjan direzzjonali għall-kooperazzjoni xjentifika u teknoloġika bejn l-UE u l-Istati Uniti (il-Kummissjoni Ewropea).

DOKUMENTI EWLENIN

Deċiżjoni tal-Kunsill (UE) 2018/1578 tat-18 ta’ Settembru 2018 dwar l-estensjoni tal-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerka (ĠU L 263, 22.10.2018, pp. 1-2)

Id-Deċiżjoni tal-Kunsill 2014/240/UE tal-14 ta’ April 2014 li tikkonċerna l-estensjoni tal-Ftehim dwar kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerika (ĠU L 128, 30.4.2014, pp. 43-44)

Id-Deċiżjoni tal-Kunsill 2009/306/KE tat-30 ta’ Marzu 2009 dwar l-estensjoni u l-modifikazzjoni tal-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerika (ĠU L 90, 2.4.2009, pp. 20-21)

Id-Deċiżjoni tal-Kunsill 98/591/KE tat-13 ta’ Ottubru 1998 dwar il-konklużjoni ta’ ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerika (ĠU L 284, 22.10.1998, pp. 35-36)

Ftehim dwar kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerika (ĠU L 284, 22.10.1998, pp. 37-44)

DOKUMENTI RELATATI

Ftehim ta’ Implimentazzjoni bejn il-Kummissjoni Ewropea u l-Gvern tal-Istati Uniti tal-Amerka għall-kooperazzjoni bejn riċerkaturi ffinanzjati b’mod separat mill-Programmi ta’ Qafas tal-Unjoni Ewropea u tal-Istati Uniti dwar ir-riċerka u l-innovazzjoni, 17 ta’ Ottubru 2016.

l-aħħar aġġornament 20.05.2020