Aġenziji ta’ klassifikazzjoni tal-kreditu

SOMMARJU TA’:

Regolament (KE) Nru 1060/2009 dwar aġenziji ta’ klassifikazzjoni tal-kreditu

X’INHU L-GĦAN TAR-REGOLAMENT?

Huwa jfittex li jirregola l-attività tal-aġenziji li jiggradaw il-kreditu bl-intenzjoni li jipproteġi lill-investituri u lis-swieq finanzjarji Ewropej mir-riskju ta’ prassi ħżiena.
L-għan tiegħu huwa li tiġi ggarantita l-indipendenza u l-integrità tal-proċess tal-klassifikazzjoni tal-kreditu u li jttejjeb il-kwalità tal-klassifikazzjonijiet maħruġa.
Huwa jistipula kundizzjonijiet għall-ħruġ ta’ klassifikazzjonijiet tal-kreditu u regoli dwar l-organizzazzjoni u l-kondotta tal-aġenziji ta’ klassifikazzjoni tal-kreditu, inkluż il-partijiet interessati u l-membri tagħhom, biex jippromwovu:
- l-indipendenza tal-aġenziji ta’ klassifikazzjoni tal-kreditu;
- l-evitar ta’ kunflitti ta’ interess; u
- protezzjoni aħjar tal-konsumaturi u l-investituri.
Minn meta r-regolament ġie emendat mir-Regolament (UE) 2017/2402 (Titolizzazzjoni aktar sempliċi, trasparenti u standardizzata) dwar regoli komuni għat-titolizzazzjoni*, huwa jistabbilixxi wkoll obbligi għall-emittenti u partijiet terzi relatati stabiliti fl-UE rigward strumenti ta’ titolizzazzjoni. Ir-Regolament (UE) 2017/2402 jissostitwixxi l-kliem oriġinali “strumenti strutturati” minn “strumenti ta’ titolizzazzjoni”.

PUNTI EWLENIN

Reġistrazzjoni, regoli ta’ kondotta u superviżjoni

Biex tkun irreġistrat fl-UE, aġenziji ta’ klassifikazzjoni tal-kreditu għandhom:

jevitaw il-kunflitti ta’ interess: pereżempju, l-analisti tal-klassifikazzjoni tal-kreditu m’għandhomx jikklassifikaw entità li fiha huma għandhom parteċipazzjoni;
jiżguraw il-kwalità tal-klassifikazzjonijiet u l-metodi tal-klassifikazzjonijiet tagħhom;
jiżguraw livell għoli ta’ trasparenza: pereżempju, billi jippubblikaw rapport annwali dwar it-trasparenza.

Minn Lulju 2011, l-Awtorità Ewropea tat-Titoli u s-Swieq (ESMA) hija responsabbli biex tirreġistra l-aġenziji tal-klassifikazzjoni tal-kreditu u għandha setgħat superviżorji esklussivi fir-rigward ta’ dawn l-aġenziji.

Dipendenza eċċessiva fuq klassifikazzjonijiet tal-kreditu

Id-Direttiva 2013/14/UE emendat ir-regolament li jeħtieġ ;-istituzzjonijiet finanzjarji u l-investituri jwettqu l-valutazzjoni tagħhom stess tar-riskji tal-kreditu u m’għandhomx jiddependu esklussivament jew awtomatikament fuq klassifikazzjonijiet esterni biex jivvalutaw l-affidabilità kreditizja ta’ entità jew strument finanzjarju.

Klassifikazzjonijiet tad-dejn sovran tal-pajjiżi tal-UE

L-aġenziji tal-klassifikazzjoni tal-kreditu għandhom jistabbilixxu skeda li tindika d-dati meta huma ser jikklassifikaw lill-pajjiżi tal-UE; il-pajjiżi ser jiġu kklassifikati mill-inqas darba kull sitt xhur.
Biex jiġi evitat it-tfixkil fis-suq, il-klassifikazzjonijiet jistgħu jiġu ppubblikati biss ladarba jagħlqu l-boroż tal-UE, u mill-inqas siegħa qabel jerġgħu jinfetħu.
L-investituri u l-pajjiżi tal-UE għandhom jiġu infurmati bil-fatti u s-suppożizzjonijiet wara kull klassifikazzjoni.

Ir-responsabbiltà tal-aġenziji ta’ klassifikazzjoni tal-kreditu

Aġenzija tal-klassifikazzjoni tal-kreditu tista’ tinżamm responsabbli jekk tikser ir-regolament, kemm intenzjonalment jew minħabba negliġenza serja, u b’hekk tikkawża ħsara lil investitur jew lil emittent.

Indipendenza u l-prevenzjoni ta’ kunflitti ta’ interess

Regola ta’ rotazzjoni teħtieġ li l-emittenti ta’ strumenti titolizzati jibdlu l-aġenzija kull erba’ snin.
L-aġenziji tal-klassifikazzjoni tal-kreditu għandhom jiżvelaw sitwazzjonijiet fejn azzjonist ikollu 5 % jew aktar tal-kapital jew tad-drittijiet tal-vot tal-aġenzija u 5 % jew aktar ta’ organizzazzjoni kklassifikata minn dik l-aġenzija. Jekk dawn iż-żewġ impriżi jilħqu jew jaqbżu l-10%, l-aġenzija ta’ klassifikazzjoni tal-kreditu ma tkunx intitolata biex tikklassifika l-entità.
Hija pprojbita ż-żamma ta’ 5% jew aktar tal-kapital jew tad-drittijiet tal-vot ta’ aktar minn aġenzija ta’ klassifikazzjoni tal-kreditu waħda, sakemm dawn l-aġenziji ma jkunux jappartjenu għall-istess grupp.

Il-klassifikazzjonijiet kollha huma ppubblikati fuq pjattaforma Ewropea ta’ klassifikazzjoni minn ESMA.

MINN META JAPPLIKA R-REGOLAMENT?

Dan ilu japplika mis-7 ta’ Diċembru 2009, bl-eċċezzjoni ta’ regoli dwar:

referenzi għar-rata ta’ klassifikazzjoni tal-kreditu fil-prospetti (l-Artikolu 4(1)) li ilhom japplikaw mis-7 ta’ Diċembru 2010; u
aġenzija ta’ klassifikazzjoni tal-kreditu stabbilita f’pajjiżi mhux tal-UE (l-Artikolu 4(3) punti (f), (g) u (h) li ilhom japplikaw mis-7 ta’ Ġunju 2011.

SFOND

Ir-regolament tal-UE dwar l-aġenziji ta’ klassifikazzjoni tal-kreditu jagħmel parti mill-inizjattivi mwettqa mill-UE b’rispons għall-impenji magħmula fis- Summit ta’ Washington G2f’Novembru 2008.

Għal aktar informazzjoni, ara:

Aġenziji ta’ klassifikazzjoni tal-kreditu (Awtorità Ewropea tat-Titoli u s-Swieq)
Regolamentazzjoni tal-aġenziji ta’ klassifikazzjoni tal-kreditu (il-Kummissjoni Ewropea).

TERMINI EWLENIN

Titolizzazzjoni: tranżazzjonijiet li jippermettu lil sellief jew oriġinatur ieħor tal-assi — pereżempju, istituzzjoni ta’ kreditu — jerġa’ jiffinanzja sett ta’ self jew assi (eż. ipoteki, kirjiet ta’ karozzi, self lil-konsumaturi, karti tal-kreditu) billi jikkonvertihom f’titoli. Is-sellief jew oriġinatur jorganizza poratfoll tas-self tiegħu f’kategoriji ta’ riskji differenti, ippersonalizzati għar-riskju kontra r-rekwiżiti tal-premjijiet tal-investituri. Ir-redditi lill-investituri huma ġġenerati mill-fluss tal-flus fuq is-self sottostanti.

DOKUMENT EWLIENI

Ir-Regolament (KE) Nru 1060/2009 tal-Parlament Ewropew u tal-Kunsill tas-16 ta’ Settembru 2009 dwar l-aġenziji ta’ klassifikazzjoni tal-kreditu (ĠU L 302, 17.11.2009, pp. 1-31)

Emendi suċċessivi għar-Regolament (KE) Nru 1060/2009 ġew inkorporati fid-dokument oriġinali. Din il-verżjoni konsolidata hija ta’ valur dokumentarju biss.

DOKUMENTI RELATATI

Rapport mill-Kummissjoni lill-Parlament Ewropew u l-Kunsill dwar għodod alternattivi għal klassifikazzjonijiet tal-kreditu esterni, l-istat tas-swieq ta’ klassifikazzjoni tal-kreditu, il-kompetizzjoni u l-governanza fl-industrija tal-klassifikazzjoni tal-kreditu, l-istat tas-suq tal-istrumenti finanzjarji strutturati u l-vijabbiltà ta’ Aġenziji ta’ Klassifikazzjoni tal-Kreditu Ewropea (COM(2016) 664 final, 19.10.2016)

Regolament Delegat tal-Kummissjoni (UE) 2015/1 tat-30 ta’ Settembru 2014 li jissupplimenta r-Regolament (UE) Nru 1060/2009 tal-Parlament Ewropew u tal-Kunsill fir-rigward tal-istandards tekniċi regolatorji għar-rappurtar perjodiku fuq tariffi ċċarġjati mill-aġenziji ta’ klassifikazzjoni tal-kreditu għall-għan ta’ superviżjoni għaddejja mill-Awtorità Ewropea tat-Titoli u s-Swieq (ĠU L 2, 6.1.2015, pp. 1-23)

Regolament ta’ Delega tal-Kummissjoni (UE) 2015/2 tat-30 ta’ Settembru 2014 li jissupplimenta r-Regolament (KE) Nru 1060/2009 tal-Parlament Ewropew u tal-Kunsill fir-rigward tal-istandards tekniċi regolatorji għall-preżentazzjoni tal-informazzjoni li l-aġenziji ta’ klassifikazzjoni tal-kreditu għandhom jagħmlu disponibbli lil;-Awtorità Ewropea tat-Titoli u s-Swieq (ĠU L 2, 6.1.2015, pp. 24-56)

Rapport tal-Kummissjoni lill-Kunsill u lill-Parlament Ewropew dwar il-fattibilità ta’ netwerk ta’ aġenziji iżgħar ta’ klassifikazzjoni tal-kreditu (COM(2014) 248 final, 5.5.2014)

Direttiva 2013/14/EU tal-Parlament Ewropew u tal-Kunsill tal-21 ta’ Mejju 2013 li temenda d-Direttiva2003/41/KE dwar l-attivitajiet u s-superviżjoni ta’ istituzzjonijiet għall-provvista ta’ rtirar okkupazzjonali, id-Direttiva 2009/65/KE dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS) u d-Direttiva 2011/61/UE dwar Maniġers ta’ Fondi ta’ Investiment Alternattivi fir-rigward tad-dipendenza żejda fuq il-gradazzjonijiet tal-kreditu (ĠU L 145, 31.05.2013, pp. 1-3)

Ara l-verżjoni konsolidata.

Regolament ta’ Delega tal-Kummissjoni (UE) Nru 946/2012 tat-12 ta’ Lulju 2012 li jissupplimenta r-Regolament (KE) Nru 1060/2009 tal-Parlament Ewropew u tal-Kunsill fir-rigward tar-regoli ta’ proċedura dwar multi imposti fuq l-aġenziji tal-klassifikazzjoni tal-kreditu mill-Awtorità Ewropea tat-Titoli u s-Swieq inklużi regoli dwar id-dritt tad-difiża u dispożizzjonijiet temporali (ĠU L 282, 16.10.2012, pp. 23-26)

Regolament ta’ Delega tal-Kummissjoni (UE) Nru 447/2012 tal-21 ta’ Marzu 2012 li jissupplimenta r-Regolament (KE) Nru 1060/2009 tal-Parlament Ewropew u tal-Kunsill dwar aġenziji li jiggradaw il-kreditu billi jistabbilixxi standards tekniċi regolatorji għall-valutazzjoni tal-konformità tal-metodoloġiji tal-klassifikazzjoni tal-kreditu (ĠU L 140, 30.5.2012, pp. 14-16)

Regolament ta’ Delega tal-Kummissjoni (UE) Nru 449/2012 tal-21 ta’ Marzu 2012 li jissupplimenta r-Regolament (KE) Nru 1060/2009 tal-Parlament Ewropew u tal-Kunsill dwar aġenziji li jiggradaw il-kreditu billi jistabbilixxi standards tekniċi regolatorji għar-reġistrazzjoni u ċ-ċertifikazzjoni ta’ aġenziji tal-klassifikazzjoni tal-kreditu (ĠU L 140, 30.5.2012, pp. 32-52)

Regolament ta’ Delega tal-Kummissjoni (UE) Nru 272/2012 tas-7 ta’ Frar 2012 li jissupplimenta r-Regolament (KE) Nru 1060/2009 tal-Parlament Ewropew u tal-Kunsill rigward it-tariffi mitluba mill-Awtorità Ewropea tat-Titoli u s-Swieq lill-aġenziji ta’ klassifikazzjoni tal-kreditu (ĠU L 90, 28.3.2012, pp. 6-10)

l-aħħar aġġornament 09.04.2019