Armi ħfief u ta' kalibru żgħir: il-ġlieda kontra l-akkumulazzjoni tagħhom

SOMMARJU TAD-DOKUMENT:

L-istrateġija tal-UE kontra l-akkumulazzjoni u t-traffikar illeċiti ta' armi u munizzjon ta' kalibru żgħir

X'INHU L-GĦAN TA' DIN L-ISTRATEĠIJA?

Din tipprovdi pjan ta' azzjoni għall-ġlieda kontra t-theddida assoċjata mal-akkumulazzjoni u t-traffikar illegali ta' armi ħfief u ta' kalibru żgħir (SALW)* u l-munizzjon tagħhom, filwaqt li jittieħed vantaġġ mill-firxa wiesgħa ta' mekkaniżmi disponibbli għall-UE.

PUNTI EWLENIN

L-Istrateġija tal-SALW tiġbor flimkien il-kapaċitajiet ċivili u militari tal-pajjiżi tal-UE, l-istrumenti tal-Politika Estera u ta' Sigurtà Komuni (PESK) u l-Politika ta' Sigurtà u ta' Difiża Komuni (PSDK), u l-azzjoni tal-pulizija, tad-dwana u ġudizzjarja fl-UE biex jgħinuha tilħaq l-għanijiet tagħha.
Huwa meħtieġ multilateraliżmu effettiv sabiex jiġu żviluppati mekkaniżmi internazzjonali, reġjonali u nazzjonali.
Fil-livell internazzjonali, tingħata prijorità
- lill-implimentazzjoni tal-programm ta' azzjoni tan-Nazzjonijiet Uniti dwar l-SALW;
- it-traċċar tal-SALW permezz ta' mekkaniżmu ta' rapportar globali (iTrace II); u
- ir-ratifikazzjoni tal-Protokoll kontra l-Manifattura u t-Traffikar Illeċiti ta' Armi tan-Nar.
L-UE ser tfittex ukoll li tipperswadi pajjiżi mhux tal-UE li huma esportaturi tal-SALW biex jikkonformaw ma' dan t'hawn fuq.
Fil-livell reġjonali, l-UE tipprovdi appoġġ finanzjarju lil programmi konkreti li għandhom l-għan li jindirizzaw theddid għas-sigurtà relatat mal-SALW illegali fil-Libja, l-Ewropa tax-Xlokk u ż-żona tal-Organizzazzjoni għas-Sigurtà u l-Kooperazzjoni fl-Ewropa.
L-istrateġija hija avvanzata wkoll permezz tal-Istrument li jikkontribwixxi għall-istabbiltà u l-paċi, li jgħin jipprevjeni u jwieġeb għal kriżijiet, u li joħloq ambjent sikur u stabbli madwar id-dinja.
Il-Kunsill tal-UE jimmonitorja kontinwament l-implimentazzjoni tal-Istrateġija tal-SALW tal-UE. Kull 6 xhur, is-Servizz Ewropew għall-Azzjoni Esterna jippreżenta rapport dwar il-progress lill-Kunsill għall-approvazzjoni tiegħu.

SFOND

Il-konsegwenzi ta' akkumulazzjoni eċċessiva u tifrix mingħajr kontroll tal-SALW huma ċentrali għal 4 mill-5 sfidi (it-terroriżmu, il-proliferazzjoni ta' armi ta' qerda massiva, il-kunflitti reġjonali, il-falliment tal-istati u l-kriminalità organizzata) identifikati fl-Istrateġija Ewropea ta' Sigurtà .

Għal aktar tagħrif, ara:

“Il-ġlieda kontra l-akkumulazzjoni eċċessiva u t-traffikar illeċiti ta’ SALW u l-munizzjon tagħhom” fuq il-websajt tas-Servizz Ewropew għall-Azzjoni Esterna.

* TERMINI EWLENIN

Armi ħfief u ta' kalibru żgħir (SALW): kull arma letali li tinġarr minn bniedem. Armi żgħar jinkludu armi tal-id, snieter, xkubetti tal-attakk u maxin gans ħfief. Armamenti ħfief jinkludu maxin gans tqal, armi li jillanċjaw il-granati u armi kontra t-tankijiet.

DOKUMENT EWLIENI

L-Istrateġija tal-UE għall-ġlieda kontra l-akkumulazzjoni u t-traffikar illeċiti tal-SALW u l-munizzjon tagħhom, il-Kunsill tal-Unjoni Ewropea, Brussell, 13 ta' Jannar 2006

ATTI RELATATI

Ir-Regolament (KE) Nru 230/2014 tal-Parlament Ewropew u tal-Kunsill tal-11 ta' Marzu 2014 li jistabbilixxi strument li jikkontribwixxi għall-istabbiltà u l-paċi (ĠU L 77, 15.3.2014, pp. 1-10)

Id-Deċiżjoni tal-Kunsill (PESK) 2015/1908 tat-22 ta' Otturbu 2015 b'appoġġ għal mekkaniżmu globali ta' rappurtar dwar armi ħfief u ta' kalibru żgħir illeċiti u armi konvenzjonali oħrajn u munizzjon illeċiti biex jitnaqqas ir-riskju tal-kummerċ illeċitu tagħhom (“iTrace II”) (ĠU L 278, 23.10.2015, pp. 15-25)

l-aħħar aġġornament 04.07.2016