Format tal-UE għal permessi ta’ residenza

SOMMARJU TA’:

Regolament (KE) Nru 1030/2002 — format uniformi għall-permessi ta’ residenza għaċ-ċittadini ta’ pajjiż mhux tal-UE

X’INHU L-GĦAN TAR-REGOLAMENT?

Dan jistabbilixxi format uniformi għall-permessi ta’ residenza, u l-informazzjoni li għandhom jinkludu, għal ċittadini ta’ pajjiżi mhux tal-UE li jgħixu legalment fl-UE.

PUNTI EWLENIN

• Il-permessi jridu jkunu dokument waħdinin fl-għamla ta’ karta (għall-ewwel jistgħu jkunu wkoll stikers imwaħħla ma’ karta uffiċjali oħra).
• Ir-regolament jispeċifika l-forma u l-kontenut tal-informazzjoni viżibbli kollha li għandha tingħata fuq id-dokument, bħall-kunjom u l-isem ta’ individwu (f’dik l-ordni), u l-bidu u t-tmiem tal-validità ta’ permess.
• L-ispeċifikazzjonijiet tekniċi jkopru l-kulur, il-proċess tal-istampar u t-tekniki, u l-materjal li għandhu jintuża għall-permessi.
• L-ispeċifikazzjonijiet jinkludu aspetti ta’ sigurtà biex tiġi evitata frodi u falsifikazzjoni. Dawn jinżammu sigrieti u jiġu kkomunikati biss lill-awtoritajiet nazzjonali responsabbli għall-istampar tal-permessi.
• Jekk ikunu jixtiequ, il-pajjiżi tal-UE jistgħu jżidu aspetti oħrajn ta’ sigurtà nazzjonali b’konformità mal-lista fl-anness għar-regolament, sakemm ma jbiddlux l-apparenza uniformi tal-karta.
• Ir-regolament ma japplikax għal:
  • familji ta’ ċittadini Ewropej li jeżerċitaw id-dritt tagħhom li jgħixu f’pajjiż ieħor tal-UE;
  • detenturi ta’ viża; jew
  • dawk iċ-ċittadini mhux tal-UE li jistgħu jibqgħu sa tliet (3) xhur mingħajr il-ħtieġa ta’ viża.

Ir-Regolament (KE) Nru 380/2008 jemenda r-Regolament (KE) Nru 1030/2002 fir-rigward tal-integrazzjoni tal-identifikaturi bijometriċi* f’format uniformi għall-permessi ta’ residenza.

• L-identifikaturi bijometriċi jintużaw biex jivverifikaw l-awtentiċità tal-identità tad-detentur. Dawn jikkonsistu minn ritratt reċenti tal-applikant u żewġ (2) marki tas-swaba’.
• Il-proċedura biex jittieħdu dawn l-identifikaturi trid tosserva l-leġiżlazzjoni nazzjonali u s-salvagwardji li jinsabu fil-konvenzjonijiet dwar id-drittijiet tal-bniedem u d-drittijiet tat-tfal tan-Nazzjonijiet Uniti.
• Id-data mill-identifikaturi bijometriċi trid tinħażen u tiġi protetta sabiex jiġu ggarantiti l-integrità, l-awtentiċità u l-kunfidenzjalità tagħhom.

Minħabba li l-format attwali għal permessi ta’ residenza ilu jintuża għal aktar minn 20 sena, ir-Regolament (UE) 2017/1954 ġie adottat.

Huwa jintroduċi mudell uniformi ġdid għal permessi b’karatteristiċi ta’ sigurtà ġodda sabiex tiġi evitata il-falsifikazzjoni. L-immaġni u l-ispeċifikazzjonijiet tat-test li jinsabu fl-anness għar-Regolament (UE) 2017/1954, jissostitwixxu dawk fl-anness għar-regolament oriġinali tal-2002. Il-pajjiżi tal-UE għandhom perjodu ta’ transizzjoni ta’ sitt (6) xhur biex jużaw il-ħażniet eżistenti ta’ permessi ta’ residenza.

MINN META JAPPLIKA R-REGOLAMENT?

Ir-Regolament (KE) Nru 1030/2002 ilu japplika mill-15 ta’ Ġunju 2002.

Ir-Regolament (UE) 2017/1954 jibda japplika mhux aktar tard minn 15-il xahar wara li l-Kummissjoni Ewropea tadotta speċifikazzjonijiet tekniċi addizzjonali ġodda għal permessi ta’ residenza.

SFOND

Għal aktar informazzjoni, ara:

• Sigurtà tad-dokumenti (Kummissjoni Ewropea).

TERMINI EWLENIN

DOKUMENT EWLIENI

Ir-Regolament tal-Kunsill (KE) Nru 1030/2002 tat-13 ta’ Ġunju 2002 li jippreskrivi format uniformi għall-permessi ta’ residenza għaċ-ċittadini ta’ pajjiz terz (ĠU L 157, 15.6.2002, pp. 1-7)

L-emendi suċċessivi għar-Regolament (KE) Nru 1030/2002 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-deċiżjoni tal-Kummissjoni (UE) 2020/1730 tat-18 ta’ Novembru 2020 li tikkonferma l-parteċipazzjoni tal-Irlanda fir-Regolament (UE) 2017/1954 tal-Parlament Ewropew u tal-Kunsill li jemenda r-Regolament tal-Kunsill (KE) Nru 1030/2002 li jippreskrivi format uniformi għall-permessi ta’ residenza għaċ-ċittadini ta’ pajjiżi terzi (ĠU L 387, 19.11.2020, p. 22)

Ir-Regolament (UE) 2018/1806 tal-Parlament Ewropew u tal-Kunsill tal-14 ta’ Novembru 2018 li jelenka l-pajjiżi terzi li ċ-ċittadini tagħhom għandhom ikollhom viża fil-pussess tagħhom meta jaqsmu l-fruntieri esterni u dawk li ċ-ċittadini tagħhom huma eżenti minn dik il-ħtieġa (ĠU L 303, 28.11.2018, pp. 39-58)

l-aħħar aġġornament 27.11.2020