Strateġija għall-ambjent tal-baħar

SOMMARJU TA’:

Id-Direttiva 2008/56/KE – l-azzjoni tal-UE fil-qasam tal-politika tal-ambjent marin

X’INHU L-GĦAN TAD-DIRETTIVA?

Id-Direttiva Kwadru dwar l-Istrateġija Marina (MSFD) tistabbilixxi approċċ u objettivi komuni tal-Unjoni Ewropea (UE) għall-prevenzjoni, għall-protezzjoni u għall-konservazzjoni tal-ambjent marin fid-dawl tal-pressjonijiet u tal-impatti ta’ attivitajiet tal-bniedem dannużi, filwaqt li tippermetti l-użu sostenibbli tiegħu, permezz ta’ approċċ ibbażat fuq l-ekosistema.

PUNTI EWLENIN

L-MSFD teħtieġ li l-Istati Membri tal-UE jagħmlu dan li ġej.

• L-iżvilupp ta’ strateġiji biex jinkiseb “status ambjentali tajjeb (GES)”* sal-2020. L-istrateġiji, li jkopru ċikli ta’ 6 snin, jeħtieġ li jinkludu miżuri li jipproteġu l-ekosistema marina u li jiżguraw li l-attivitajiet ekonomiċi marbuta mal-ambjent marin ikunu sostenibbli.
• Jinkludu fi ħdan l-istrateġiji tagħhom:
  • valutazzjoni dettaljata tal-istat tal-ambjent marin u l-impatt tal-attivitajiet tal-bniedem (inkluża analiżi soċjoekonomika);
  • definizzjoni ta’ GES ibbażata fuq lista ta’ 11-il deskrittur tal-istatus ambjentali li għalihom irid jinkiseb GES sal-2020 (stabbiliti fl-Anness I tad-direttiva u speċifikati fid-Deċiżjoni (UE) 2017/848, li fih sett ta’ kriterji dettaljati u standards metodoloġiċi biex jgħinu lill-Istati Membri jimplimentaw l-MSFD, b’mod partikolari biex jiddeterminaw il-GES); u
  • miri ambjentali ċari.
• It-tfassil u l-implimentazzjoni ta’ programmi ta’ miżuri biex jinkiseb il-GES. Dawn il-programmi jolqtu diversi oqfsa ta’ politika u attivitajiet tal-bniedem fil-prevenzjoni jew fil-mitigazzjoni tal-impatti tagħhom fuq l-ambjent marin.
• It-tfassil ta’ programm ta’ monitoraġġ biex jitkejjel u jiġi vvalutat il-progress li sar lejn l-ilħuq tal-objettivi u l-miri tagħhom.
• Jiġi żgurat li l-Kummissjoni Ewropea tivvaluta jekk l-istrateġiji tal-baħar jikkostitwixxux qafas xieraq biex jiġu ssodisfati r-rekwiżiti tad-direttiva, u tipprovdi gwida kif xieraq. Jekk ċerti objettivi ma jintlaħqux, Stat Membru jrid jispjega għaliex. Jekk ikun meħtieġ, huwa possibbli li Stat Membru japplika ċerti eċċezzjonijiet.

Id-direttiva tagħmel ukoll dan li ġej.

• Hija tenfasizza l-bżonn li l-Istati Membri jikkooperaw mal-ġirien tagħhom fl-erba’ reġjuni marini (l-Atlantiku tal-Grigal, il-Baltiku, il-Mediterran u l-Baħar l-Iswed), meta jfasslu u jimplimentaw l-istrateġiji marini tagħhom. Xi wħud minn dawn ir-reġjuni huma maqsuma ulterjorment f’subreġjuni. L-użu tal-istrutturi ta’ governanza reġjonali eżistenti, bħal Konvenzjonijiet dwar l-Ibħra Reġjonali, huwa għalhekk element importanti li għandu jiġi kkunsidrat mill-Istati Membri.
• Hija tirrikonoxxi l-importanza ta’ miżuri ta’ protezzjoni spazjali għall-ambjent marin, b’hekk tkun qed tikkontribiwixxi għall-ħolqien ta’ netwerk ta’ żoni marini protetti.

Rieżami

Rieżami tal-MSFD irid issir sal-2023, wara evalwazzjoni u valutazzjoni tal-impatt. L-emendi jistgħu mbagħad jiġu proposti, fejn xieraq.

Emendi għall-MSFD

Id-Direttiva (UE) 2017/845 temenda l-MSFD, u tissostitwixxi l-Anness III tagħha dwar il-listi indikattivi ta’ elementi li jridu jitqiesu għat-tħejjija ta’ strateġiji tal-baħar. L-għan tal-emenda huwa li torbot aħjar il-komponenti tal-ekosistema, il-pressjonijiet antropoġeniċi* u l-impatti fuq l-ambjent tal-baħar bil-11-il deskrittur tal-MSFD u bid-Deċiżjoni tal-Kummissjoni (UE) 2017/848 dwar il-GES tal-ilmijiet tal-baħar (imsemmija hawn fuq).

Kif l-MSFD hija relatata ma’ leġiżlazzjoni oħra tal-UE

L-MSFD tibni fuq il-leġiżlazzjoni eżistenti tal-UE u tkopri elementi speċifiċi tal-ambjent marin mhux indirizzati f’politiki oħrajn, bħad-direttiva qafas dwar l-ilma (id-Direttiva 2000/60/KE — ara s-sommarju), id-direttiva dwar il-ħabitats (id-Direttiva 92/43/KEE — ara s-sommarju), id-direttiva dwar l-għasafar (id-Direttiva 2009/147/KE — ara s-sommarju) u, fl-aħħar nett, ir-Regolament (UE) Nru 1380/2013 dwar il-politika komuni tas-sajd (ara s-sommarju), li wieħed mill-objettivi legali tiegħu huwa li jikkontribwixxi għall-kisba tal-GES skont l-MSFD.

ŻVILUPPI RIĊENTI

• F’Lulju 2021, il-Kummissjoni nediet konsultazzjoni pubblika biex tiġbor informazzjoni u l-fehmiet u l-ideat tal-partijiet involuti fl-MSFD u affettwati minnha. Il-konsultazzjoni hija miftuħa sal-21 ta’ Ottubru 2021.
• Fl-2020, il-Kummissjoni adottat rapport dwar l-ewwel ċiklu ta’ implimentazzjoni tal-MSFD. Għalkemm is-sistema tal-UE għall-protezzjoni tal-ambjent marin hija waħda mill-aktar sofistikati f’termini globali, ir-rapport jikkonkludi li jeħtieġ li din tissaħħaħ biex jiġi żgurat li din tkun tista’ tindirizza kwistjonijiet bħas-sajd eċċessiv u l-prattiki tas-sajd mhux sostenibbli, l-iskart tal-plastik, in-nutrijenti żejda, l-istorbju taħt l-ilma u tipi oħra ta’ tniġġis.
• L-esperjenza tal-UE fl-iżvilupp ta’ approċċ sostenibbli għall-ġestjoni tal-oċeani permezz tal-MSFD kienet tidher bħala kontribut importanti għall-viżjoni tal-Kummissjoni Ewropea tal-2016 dwar il-governanza tal-oċeani.
• Fl-2015, il-Kummissjoni rrapportat progress sinifikanti fl-istabbiliment ta’ żoni marini protetti fl-ibħra tal-UE, b’benefiċċji għall-ekonomija u għall-ambjent. Skont il-Konvenzjoni tan-NU dwar id-Diversità Bijoloġika, l-UE impenjat ruħha biex sal-2020, tiżgura l-konservazzjoni ta’ 10% taż-żoni kostali u marini tagħha.
• Fl-2014, fl-2017 u fl-2018, il-Kummissjoni rrieżaminat il-passi meħuda mill-Istati Membri fl-implimentazzjoni tad-direttiva matul l-ewwel ċikli ta’ implimentazzjoni.
• L-MSFD tipprovdi gwida għall-implimentazzjoni tad-Direttiva 2014/89/UE dwar l-ippjanar tal-ispazju marittimu (ara s-sommarju) adottata fl-2014. Din tal-aħħar hija parti mill-politika marittima integrata, li timmira l-implimentazzjoni ta’ ġestjoni ottimali tal-oċeani u governanza marittima.

MINN META TAPPLIKA D-DIRETTIVA?

Din ilha tapplika mill-15 ta’ Lulju 2008 u kellha ssir liġi fl-Istati Membri sal-15 ta’ Lulju 2010.

SFOND

Għal aktar informazzjoni, ara:

• L-oċeani, l-ibħra u l-kosti tagħna (Il-Kummissjoni Ewropea).

TERMINI EWLENIN

DOKUMENT EWLIENI

Id-Direttiva 2008/56/KE tal-Parlament Ewropew u tal-Kunsill tas-17 ta’ Ġunju 2008 li tistabbilixxi Qafas għal Azzjoni Komunitarja fil-qasam tal-Politika tal-Ambjent Marin (Direttiva Kwadru dwar l-Istrateġija Marina) (ĠU L 164, 25.6.2008, pp. 19-40)

L-emendi suċċessivi għad-Direttiva 2008/56/KE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Rapport tal-Kummissjoni lill-Parlament Ewropew u lill-Kunsill dwar l-implimentazzjoni tad-Direttiva Kwadru dwar l-Istrateġija Marina (id-Direttiva 2008/56/KE) (COM(2020) 259 final, 25.6.2020).

Rapport tal-Kummissjoni lill-Parlament Ewropew u lill-Kunsill li jivvaluta l-programmi ta’ miżuri tal-Istati Membri skont id-Direttiva Kwadru dwar l-Istrateġija Marina (COM(2018) 562 final, 31.7.2018).

Id-Deċiżjoni tal-Kummissjoni (UE) 2017/848 tas-17 ta’ Mejju 2017 li tistabbilixxi kriterji u standards metodoloġiċi ta’ status ambjentali tajjeb tal-ilmijiet tal-baħar, kif ukoll speċifikazzjonijiet u metodi standardizzati għall-monitoraġġ u l-valutazzjoni, u li tħassar id-Deċiżjoni 2010/477/UE (ĠU L 125, 18.5.2017, pp. 43-74)

Rapport tal-Kummissjoni lill-Parlament Ewropew u lill-Kunsill li jevalwa l-programmi ta’ monitoraġġ tal-Istati Membri skont id-Direttiva Kwadru dwar l-Istrateġija Marina (COM(2017) 3 final, 16.1.2017).

Komunikazzjoni Konġunta lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-governanza internazzjonali tal-oċeani: aġenda għall-futur tal-oċeani tagħna (JOIN(2016) 49 final, 10.11.2016)

Rapport tal-Kummissjoni lill-Parlament Ewropew u lill-Kunsill dwar il-progress fit-twaqqif ta’ żoni protetti tal-baħar (kif mitlub mill-Artikolu 21 tad-Direttiva Kwadru dwar l-Istrateġija Marina (id-Direttiva 2008/56/KE) (COM(2015) 481 final, 1.10.2015).

Direttiva 2014/89/UE tal-Parlament Ewropew u tal-Kunsill tat-23 ta’ Lulju 2014 li tistabbilixxi qafas għal ippjanar tal-ispazju marittimu (ĠU L 257, 28.8.2014, pp. 135–145)

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - L-innovazzjoni fl-Ekonomija Blu: inwettqu l-potenzjal tal-ibħra u l-oċeani tagħna għall-impjiegi u t-tkabbir (COM(2014) 254 final/2 13.5.2014).

Rapport mill-Kummissjoni lill-Kunsill u lill-Parlament Ewropew: L-ewwel fażi ta’ implimentazzjoni tad-Direttiva Kwadru dwar l-Istrateġija Marina (2008/56/KE) — Il-valutazzjoni u l-gwida tal-Kummissjoni Ewropea (COM(2014) 97 final, 20.2.2014)

Ir-Regolament (UE) Nru 1380/2013 tal-Parlament Ewropew u tal-Kunsill tal-11 ta’ Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, pp. 22-61)

Ara l-verżjoni konsolidata.

l-aħħar aġġornament 27.10.2021