L-ilma tax-xorb — standards essenzali tal-kwalità (sal-2023)
SOMMARJU TA’:
Direttiva 98/83/KE — kwalità tal-ilma maħsub għall-konsum mill-bniedem
X’INHU L-GĦAN TAD-DIRETTIVA?
- Hija tistabbilixxi standards għall-ilma tax-xorb.
- Għandha l-għan li tipproteġi s-saħħa pubblika mill-effetti ħżiena ta’ kwalunkwe kontaminazzjoni billi tiżgura li l-ilma huwa għall-konsum mill-bniedem* huwa tajjeb għas-saħħa u nadif.
PUNTI EWLENIN
- Il-pajjiżi tal-UE għandhom:
- jieħdu l-miżuri neċessarji biex jiżguraw li l-ilma ma jkunx fih konċentrazzjonijiet ta’ mikroorganiżmi, parassiti jew sustanzi ta’ ħsara li jistgħu jkunu ta’ periklu għas-saħħa tal-bniedem, u jilħaq l-istandard mikrobijoloġiċi u kimiċi minimi;
- jiżguraw li l-istandards jintlaħqu meta l-ilma joħroġ mill-vit jew minn tanker;
- jikkontrollaw l-ilma regolarment f’punti miftiehma li minnhom jittieħdu l-kampjuni sabiex jiċċekkjaw li l-valuri mikrobijoloġiċi, kimiki u indikattivi jintlaħqu;
- jinvestigaw immedjatament meta l-istandards ma jintlaħqux u jieħdu l-azzjonijiet korrettivi meħtieġa;
- jipprojbixxu jew jirrestrinġu l-provvista tal-ilma jekk ikun ikkunsidrat bħala theddida potenzjali għas-saħħa pubblika;
- jinformaw lill-pubbliku meta tittieħed azzjoni korrettiva;
- jippubblikaw rapport kull tliet snin dwar il-kwalità tal-ilma tax-xorb. Din l-informazzjoni għall-pubbliku hija mibgħuta lill-Kummissjoni Ewropea.
- Il-Kummissjoni:
- tippubblika kull tliet snin rapport li jiddeskrivi fil-qosor id-data nazzjonali fuq il-kwalità tal-ilma tax-xorb;
- tirrevedi kull ħames snin il-parametri mikrobijoloġiċi, kimiki u indikattivi u l-ispeċifikazzjonijiet tal-kontroll, filwaqt li tikkunsidra l-progress xjentifiku u teknoloġiku. Hija tista’ tipproponi li dawn jiġu aġġustati.
- Din id-Direttiva ma għandhiex tapplika għal ilmijiet minerali naturali jew ilmijiet li huma kkunsidrati prodotti mediċinali.
- Il-pajjiżi tal-UE jistgħu jeżentaw mil-leġiżlazzjoni tagħhom provvista tal-ilma privata, mhux kummerċjali, li sservi inqas minn 50 persuna.
- Fl-2015, il-Kummissjoni adottat id-Direttiva (UE) 2015/1787 li tintroduċi regoli ġodda tal-UE biex ittejjeb il-monitoraġġ tal-ilma tax-xorb. Id-direttiva tagħti lill-pajjiżi tal-UE aktar flessibilità dwar kif l-ilma tax-xorb huwa kkontrollat madwar l-UE.
Żvilupp relatat
- Fil-bidu tal-2014, l-ewwel Inizjattiva taċ-Ċittadini Ewropej (ECI), wara l-kampanja Right2Water, talbet għal leġiżlazzjoni tal-UE biex tiggarantixxi d-dritt għall-ilma u s-sanitazzjoni.
- L-ECI ġiet introdotta mill-Artikolu 11(4) tat-Trattat dwar l-Unjoni Ewropea. Hija tippermetti lill-pubbliku jitlob lill-Kummissjoni taġixxi f’oqsma li hija responsabbli għalihom, sakemm il-petizzjoni jkollha mill-inqas miljun firma f’mill-inqas seba’ pajjiżi tal-UE.
Revoka
Id-Direttiva 98/83/KE hija revokata mid-Direttiva (UE) 2020/2184 (ara s-sommarju) mit-12 ta’ Jannar 2023.
MINN META TAPPLIKA D-DIRETTIVA?
Ilha tapplika mill-25 ta’ Diċembru 1998. Din kellha ssir liġi fil-pajjiżi tal-UE sal-25 ta’ Diċembru 2000.
SFOND
Għal aktar informazzjoni, ara:
TERMINI EWLENIN
Ilma għall-konsum mill-bniedem: ilma fl-istat oriġinali tiegħu jew wara li jkun sarlu trattament, maħsub għax-xorb, it-tisjir, it-tħejjija tal-ikel u skopijiet oħra domestiċi. Huwa jista’ jiġi fornut minn vit, tanker, flixkun jew kontenitur.
DOKUMENT EWLIENI
Id-Direttiva tal-Kunsill 98/83/KE tat-3 ta’ Novembru 1998 dwar il-kwalità tal-ilma maħsub għall-konsum mill-bniedem (ĠU L 330, 5.12.1998, pp. 32-54)
L-emendi suċċessivi għad-Direttiva 98/83/KE ġew inkorporati fit-test oriġinali. Din il-verżjoni kkonsolidata għandha valur dokumentarju biss.
DOKUMENTI RELATATI
Id-Direttiva (UE) 2020/2184 tal-Parlament Ewropew u tal-Kunsill tas-16 ta’ Diċembru 2020 dwar il-kwalità tal-ilma maħsub għall-konsum mill-bniedem (riformulazzjoni) (ĠU L 435, 23.12.2020, pp. 1-62)
l-aħħar aġġornament 12.02.2021