Sigurtà marittima: Kodiċi Internazzjonali dwar l-Amministrazzjoni tas-Sigurtà (ISM) għat-tbaħħir

SOMMARJU TAD-DOKUMENT:

Regolament (KE) Nru 336/2006 dwar l-implimentazzjoni tal-Kodiċi Internazzjonali dwar l-Amministrazzjoni tas-Sigurtà fi ħdan l-UE

SOMMARJU

X’JAGĦMEL IR-REGOLAMENT?

• Dan jinkorpora l-“kodiċi internazzjonali għall-amministrazzjoni għas-sigurtà fl-operat tal-vapuri u għall-prevenzjoni tat-tniġġis” ( Kodiċi ISM) fl-UE.
• B’mod partikolari, l-għan tiegħu huwa li jiżgura li l-kumpanniji tat-tbaħħir jikkonformaw mal-Kodiċi ISM permezz ta’:
  • l-istabbiliment, l-implimentazzjoni u l-manutenzjoni xierqa tas-sistemi ta’ amministrazzjoni tas-sigurtà fuq il-vapuri u fuq l-art u
  • il-kontroll mill-amministrazzjonijiet tal-istat tal-bandiera (jiġifieri l-pajjiż fejn bastiment ikun irreġistrat) u l-istat tal-port (jiġifieri l-pajjiż li fil-port tiegħu jieqaf jew jankra bastiment)

PUNTI EWLENIN

Kamp ta’ applikazzjoni

Ir-regolament japplika għat-tipi ta’ vapuri li ġejjin u għall-kumpaniji li joperawhom:

• vapuri tal-merkanzija u vapuri tal-passiġġieri, li jtajru l-bandiera ta’ pajjiż tal-UE, impenjati fuq vjaġġi internazzjonali;
• vapuri tal-merkanzija u vapuri tal-passiġġieri impenjati esklużivament fuq vjaġġi domestiċi, irrispettivament mill-bandiera tagħhom;
• vapuri tal-merkanzija u vapuri tal-passiġġieri li joperaw minn jew lejn portijiet tal-UE, fuq servizz regolari ta’ tbaħħir, irrispettivament mill-bandiera tagħhom;
• unitajiet mobbli għat-tħaffir fuq il-baħar li joperaw taħt l-awtorità ta’ pajjiż tal-UE.

Huwa ma japplikax għal:

• vapuri tal-gwerra u dawk ta’ truppi u vapuri oħra li huma proprjetà ta’ jew operati minn pajjiż tal-UE u li jintużaw biss fuq servizz mhux kummerċjali tal-gvern;
• vapuri mhux imħaddma b’mezzi mekkaniċi, vapuri tal-injam ta’ għamla primittiva, jottijiet u inġenji tad-divertiment, ħlief jekk dawn ikunu jew ser ikunu ekwipaġġati u jġorru aktar minn 12-il passiġġier għal skopijiet kummerċjali;
• bastimenti tas-sajd;
• vapuri tal-merkanzija u unitajiet mobbli għat-tħaffir fuq il-baħar ta’ tunnellaġġ gross ta’ inqas minn 500;
• vapuri tal-passiġġieri, minbarra vapuri tal-passiġġieri ro-ro (roll-on/roll-off), f’ċerti żoni ta’ baħar kif definit fl-Artikolu 4 tad-Direttiva 2009/45/KE.

Ċertifikazzjoni u verifika

Il-pajjiżi tal-UE jridu jikkonformaw mal-Parti B tal-Kodiċi ISM.

Eżenzjonijiet

Jekk pajjiż tal-UE jqis li huwa diffiċli fil-prattika għal xi kumpanniji biex jikkonformaw ma’ ċerti regoli tal-Kodiċi ISM għal vapuri speċifiċi impenjati esklużivament fuq vjaġġi domestiċi, dan jista’ jeżentahom minn dawk ir-regoli billi jimponi miżuri ekwivalenti.

F’każ bħal dan, il-pajjiż tal-UE għandu jinnotifika lill-Kummissjoni Ewropea skont dan. Jekk l-eżenzjoni proposta ma tkunx ġustifikata, il-pajjiż irid jemenda jew joqgħod lura milli jadotta dawn il-miżuri.

Pieni

Il-pajjiżi tal-UE jridu jistabbilixxu sistema ta’ pieni effettivi, proporzjonati u dissważivi għan-nuqqas ta’ konformità mar-regolament.

Rapporti

Il-pajjiżi tal-UE għandhom jirrapportaw lill-Kummissjoni kull sentejn dwar l-implimentazzjoni tal-Kodiċi ISM. Fuq il-bażi ta' dan ir-rapport biennali, il-Kummissjoni tħejji rapport konsolidat għall-Parlament Ewropew u l-Kunsill.

META JAPPLIKA R-REGOLAMENT?

Dan japplika mill-24 ta’ Marzu 2006.

ATT

Regolament (KE) Nru 336/2006 tal-Parlament Ewropew u tal-Kunsill tal-15 ta’ Frar 2006 dwar l-implimentazzjoni tal-Kodiċi Internazzjonali dwar l-Amministrazzjoni tas-Sigurtà fi ħdan il-Komunità u li jħassar ir-Regolament tal-Kunsill (KE) Nru 3051/95 (ĠU L 64, 4.3.2006, p. 1-36)

L-emendi suċċessivi għar-Regolament (KE) Nru 336/2006 ġew inkorporati fit-test oriġinali. Din il-verżjoni konsolidata għandha biss valur dokumentarju.

ATTI RELATATI

Ir-Regolament (KE) Nru 2099/2002 tal-Parlament Ewropew u tal-Kunsill tal-5 ta’ Novembru 2002 li jistabbilixxi Kumitat dwar l-Ibħra Protetti u l-Prevenzjoni ta’ Tniġġis minn Bastimenti (COSS) u li jemenda r-Regolamenti dwar is-sigurtà marittima u l-prevenzjoni ta’ tniġġis minn bastimenti (ĠU L 324, 29.11.2002, p. 1). Ara l-verżjoni konsolidata.

Direttiva 2009/15/KE tal-Parlament Ewropew u tal-Kunsill tat-23 ta’ April 2009 dwar ir-regoli u l-istandards komuni għall-organizzazzjonijiet għall-ispezzjoni u l-perizji tal-vapuri u għall-attivitajiet rilevanti tal-amministrazzjonijiet marittimi (ĠU L 131, 28.5.2009, p. 47–56). Ara l-verżjoni konsolidata.

Direttiva 2009/16/KE tal-Parlament Ewropew u tal-Kunsill tat-23 ta’ April 2009 dwar il-kontroll tal-Istat tal-Port (ĠU L 131, 28.5.2009, p. 57–100). Ara l-verżjoni konsolidata.

Direttiva 2009/45/KE tal-Parlament Ewropew u tal-Kunsill tas-6 ta’ Mejju 2009 dwar regoli u standards ta’ sigurtà għal vapuri tal-passiġġieri (Tfassil mill-ġdid) (ĠU L 163, 25.6.2009, p. 1–140). Ara l-verżjoni konsolidata.

l-aħħar aġġornament 14.03.2016