Id-direttivi dwar is-suq uniku tal-UE — inkorporazzjoni fil-liġi nazzjonali

SOMMARJU TAD-DOKUMENT:

Rakkomandazzjoni tal-Kummissjoni 2005/309/KE — it-traspożizzjoni fil-liġi nazzjonali ta’ Direttivi tas-suq intern

X’INHU L-GĦAN TA' DIN IR-RAKKOMANDAZZJONI?

Din tistabbilixxi kif il-pajjiżi tal-Unjoni Ewropea (UE) jistgħu jinkorporaw aħjar id-direttivi dwar is-suq uniku fil-liġi nazzjonali.

PUNTI EWLENIN

• Direttivi huma miżuri li jorbtu lill-pajjiżi tal-UE f’termini tar-riżultati li għandhom jinkisbu. Il-pajjiżi tal-UE jistgħu:
  • jagħżlu l-forma u l-mezzi kif jinkiseb dan ir-riżultat, iżda
  • iridu jittrasponu d-direttiva sa skadenza stabbilita.
• Fil-każ tas-Suq Uniku, it-traspożizzjoni* korretta u f’waqtha tad-direttivi f’dak il-qasam hija essenzjali għall-operazzjoni mingħajr xkiel. It-traspożizzjoni tardiva jew inkorretta tad-direttivi tista’ toħloq ostakoli u tagħmel lill-ekonomija Ewropea inqas kompetittiva.

Traspożizzjoni tardiva jew inkorretta

Il-pajjiżi tal-UE huma soġġetti għal monitoraġġ u jistgħu jiġu ssanzjonati għat-traspożizzjoni tardiva jew inkorretta permezz ta’:

• il-pubblikazzjoni regolari tar-rekords tat-traspożizzjoni tal-pajjiżi tal-UE fit-Tabella ta’ Valutazzjoni tas-Suq Intern,
• proċedimenti ta’ ksur li fil-kuntest tagħhom il-Kummissjoni Ewropea tista’ tieħu azzjoni legali kontra l-pajjiżi tal-UE quddiem il-Qorti tal-Ġustizzja tal-Unjoni Ewropea.

Prattika aħjar

• Sabiex tiġi żgurata t-traspożizzjoni tajba u f’waqtha, il-Kummissjoni Ewropea tirrakkomanda li l-pajjiżi tal-UE jadottaw prattiki aħjar ibbażati fuq eżempji mogħtija minn ċerti pajjiżi. Hija tirrakkomanda li ssir enfasi fuq il-proċeduri u l-prattiki nazzjonali tagħhom, b’mod partikolari:
  • li jiġu indirizzati l-kawżi sottostanti għat-traspożizzjoni inkorretta jew tardiva;
  • li jintgħażlu l-aktar proċeduri u prattiki li huma mfassla tajba u li huma l-aktar effettivi għal kull pajjiż tal-UE;
  • li jitħejjew tabelli li juru l-korrelazzjoni bejn id-direttivi u l-miżuri ta’ traspożizzjoni;
  • li joqogħdu lura milli jżidu kundizzjonijiet jew rekwiżiti mal-leġiżlazzjoni ta’ implimentazzjoni nazzjonali li mhumiex neċessarji jew li jagħmluha aktar diffiċli li jintlaħqu l-objettivi tad-direttiva.
• L-Anness għar-Rakkomandazzjoni jipprovdi dettalji dwar il-prattiki tajbin li għandhom jiġu segwiti, inkluż:
  • li traspożizzjoni tajba u f’waqtha ssir prijorità politika u operazzjonali permanenti;
  • li jkun żgurat li t-tħejjijiet għat-traspożizzjoni jsiru fi stadju bikri sabiex id-direttivi tal-UE jiġu inkorporati korrettament fil-liġi nazzjonali sal-iskadenzi miftiehma;
  • il-ħidma mill-qrib ma’ Parlamenti nazzjonali, reġjonali u devoluti (jiġifieri ta’ livell aktar baxx minn dawk nazzjonali) li jkunu involuti fit-traspożizzjoni tad-direttivi tas-suq intern;
  • li tittieħed azzjoni malajr, b’mod viżibbli u effettiv, biex isseħħ it-traspożizzjoni tad-direttivi li t-traspożizzjoni tagħhom tkun tard (eż. jingħata aktar ħin parlamentari għad-dibattitu u l-adozzjoni f’waqtha tal-liġijiet nazzjonali meħtieġa - jew emendi għal liġijiet).
• Barra minn hekk, bħala parti mill-proċedura ta’ traspożizzjoni, meta l-pajjiżi tal-UE jippreżentaw abbozzi ta’ liġijiet ta’ implimentazzjoni lill-parlamenti nazzjonali tagħhom, u meta dawn jiġu nnotifikati lill-Kummissjoni, dawn għandhom ikunu akkumpanjati minn:
  • dikjarazzjoni dwar il-konformità tagħhom mal-liġi tal-UE;
  • informazzjoni dwar liema partijiet tad-direttiva ġew trasposti b’mod effettiv.

SFOND

Għal aktar informazzjoni, ara:

• “Is-Suq Uniku Ewropew” fuq is-sit elettroniku tal-Kummissjoni Ewropea.

* TERMINI EWLENIN

DOKUMENT EWLIENI

Rakkomandazzjoni tal-Kummissjoni tat-12 ta’ Lulju 2004 dwar it-traspożizzjoni fil-liġi nazzjonali ta’ Direttivi li jolqtu s-suq intern (ĠU L 98, 16.4.2005, p. 47–52)

l-aħħar aġġornament 08.03.2017