Il-promozzjoni tal-multilingwiżmu fl-UE

SOMMARJU TAD-DOKUMENT:

Kommunikazzjoni (COM(2005) 596 finali) — Strateġija ta’ Qafas Ġdida għall-Multilingwiżmu

X’INHU L-GĦAN TAL-KOMUNIKAZZJONI?

Il-komunikazzjoni tiddeskrivi l-istrateġija tal-Kummissjoni Ewropea għall-promozzjoni tal-multilingwiżmu fl-Unjoni Ewropea (UE) u tipproponi għadd ta’ azzjonijiet speċifiċi.

PUNTI EWLENIN

Il-multilingwiżmu jirreferi kemm għall-abbiltà ta’ persuna li tuża diversi lingwi kif ukoll għall-koeżistenza ta’ komunitajiet ta’ lingwi differenti f’żona ġeografika waħda.

Il-politika tal-multilingwiżmu tal-Kummissjoni għandha 3 għanijiet:

• li tinkoraġġixxi t-tagħlim tal-lingwi u tippromwovi d-diversità lingwistika fis-soċjetà;
• li tippromwovi ekonomija multilingwi;
• li tagħti aċċess liċ-ċittadini għall-informazzjoni tal-UE bil-lingwi tagħhom stess.

Din il-komunikazzjoni tistabbilixxi diversi modi biex tippromwovi t-tagħlim tal-lingwi u d-diversità lingwistika, li jinkludu:

• il-programmi Lingua, Socrates u Leonardo (issa kollha huma parti minn Erasmus+);
• Ġemellaġġ bejn l-Ibliet (issa parti mill-Programm “L-Ewropa għaċ-ċittadini”);
• l-appoġġ finanzjarju min-netwerk ta’ universitajiet Mercator;
• programm ta’ riċerka biex jingħelbu l-ostakoli lingwistiċi permezz ta’ teknoloġiji ta’ informazzjoni ġodda;
• l-implimentazzjoni ta’ L-Indikatur Ewropew tal-Kompetenza Lingwistika;
• l-aġġornament tat-taħriġ tal-għalliema tal-lingwi;
• studju tal-aħjar prattiċi fit-tagħlim ta’ lingwa minn kmieni;
• il-ħolqien ta’ sedi akkademiċi fil-multilingwiżmu u l-interkulturaliżmu; u
• it-tisħiħ tal-element tar-riċerka fis-7 Programm Qafas għar-Riċerka (issa Orizzonat 2020).

Il-Kummissjoni tħeġġeġ lill-pajjiżi tal-UE biex:

• jistabbilixxu pjanijiet għall-promozzjoni tal-multilingwiżmu;
• jirrevedu t-taħriġ għall-għalliema ta’ lingwi barranin;
• jirrevedu t-tagħlim ta’ lingwa minn kmieni bbażat fuq l-aħjar prattiki;
• jimplimentaw il-konklużjonijiet tal-Presidenza tal-Lussemburgu dwar Tagħlim Integrat tal-Kontenut u l-Lingwa (ara: Rapport dwar l-implimentazzjoni tal-Pjan ta’ Azzjoni “Il-Promozzjoni tat-tagħlim tal-lingwi u d-diversità lingwistika”).

Ekonomija multilingwi

Il-Kummissjoni tipproponi dan li ġej għall-iżvilupp tal-ekonomija multilingwi:

• l-istudju tal-impatt tan-nuqqas ta’ ħiliet lingwistiċi fuq l-ekonomija tal-UE;
• l-istudju tal-potenzjal għal użu akbar tas-sottotitli għal vidjows għall-promozzjoni tat-tagħlim tal-lingwi;
• il-promozzjoni tal-bażi ta’ data tat-Terminoloġija Interattiva għall-Ewropa (IATE, Inter-Agency Terminology Exchange) tat-termini tal-UE;
• l-organizzazzjoni ta’ konfererenzi universitarji dwar it-taħriġ għat-tradutturi;
• it-teħid tal-inizjattiva biex sorsi multimedjali jsiru aktar faċli biex jintużaw;
• il-koordinazzjoni tax-xogħol tar-riċerkaturi f’teknoloġiji tal-lingwa umana, traduzzjoni awtomatika u riżorsi ta’ dizzjunarji.

It-traduzzjoni u l-interpretar

• L-użu dejjem akbar tat-traduzzjoni awtomatika jenfasizza l-importanza tal-element uman biex jiġu pprovduti kemm traduzzjoni ta' kwalità kif ukoll żviluppi fit-traduzzjonijiet bħall-Istandard Ewropew ta’ Kwalità għas-Servizzi ta’ Traduzzjoni.
• Id-domanda għall-interpreti qiegħda tiżdied, b'mod partikolari f’organizzazzjonijiet internazzjonali. Bl-appoġġ tal-komunitajiet ta’ immigranti f’negozjati uffiċjali, huma jikkontribwixxu wkoll biex jissalvagwardjaw id-drittijiet tal-bniedem u d-drittijiet demokratiċi.

Il-Multilingwiżmu u ċ-Ċittadini tal-UE

Il-Kummissjoni għandha għadd ta’ inizjattivi multilingwi biex tgħin liċ-ċittadini jifhmu d-drittijiet tagħhom u kif il-leġiżlazzjoni Ewropea taffettwahom. Il-Kummissjoni tipproponi li:

• tiżgura li d-departimenti tagħha kollha japplikaw il-politika tal-multilingwiżmu b’mod koerenti;
• tkompli trawwem il-multilingwiżmu fil-portal web (Europa) u fil-pubblikazzjonijiet tagħha;
• tniedi Languages portal on Europa; (Portal tal-lingwi fuq Europa)
• torganizza seminars dwar il-multilingwiżmu;
• tkompli toffri għotjiet u assistenza għat-tagħlim lill-universitajiet għall-interpretar fil-konferenzi, għodod ta’ tagħlim mill-bogħod, boroż ta’ studju u żjarat;
• tappoġġja l-programmi Masters Ewropej fl-Interpretar u l-Maniġment tal-Konferenzi;
• ikompli jkollha rwol attiv fil-Laqgħa Annwali Internazzjonali dwar l-Arranġamenti tal-Lingwi, id-Dokumentazzjoni u l-Pubblikazzjoni;
• tkompli tappoġġja programmi universitarji Masters fit-traduzzjoni;
• torganizza kompetizzjoni tat-traduzzjoni għal skejjel internazzjonali biex tippromwovi l-għarfien tal-lingwi u l-professjonijiet fil-lingwi.

Il-Kummissjoni waqqfet Grupp ta’ Livell Għoli dwar il-Multilingwiżmu magħmul minn esperti indipendenti, li pproduċa r-rapport finali tiegħu fl- 2007. Fil-bidu tal-2008, saret konferenza ministerjali dwar il-multilingwiżmu li ppermettiet lill-pajjiżi tal-UE biex jirrappurtaw fuq il-progress u jippjanaw xogħol futur. Iktar tard fl-istess sena, il-Kummissjoni ppreżentat komunikazzjoni oħra li tipproponi approċċ komprensiv għal multilingwiżmu fl-UE.

SFOND

Għal aktar tagħrif, ara:

• “Multilingwiżmu” fuq is-sit web tal-Kummissjoni Ewropea.

DOKUMENT EWLIENI

Komunikazzjoni mill-Kummissjoni lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija ta’ Qafas Ġdida għall-Multilingwiżmu (COM(2005) 596 finali, 22.11.2005)

DOKUMENTI RELATATI

Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - Multilingwiżmu: vantaġġ għall-Ewropa u impenn komuni (COM(2008) 566 final, 18.9.2008)

l-aħħar aġġornament 14.11.2016