Il-protezzjoni tal-ħaddiema nisa tqal u tal-ommijiet ġodda
SOMMARJU TA’:
Id-Direttiva 92/85/KEE dwar l-introduzzjoni ta’ miżuri biex jinkoraġġixxu t-titjib fis-saħħa u s-sigurtà fuq il-post tax-xogħol għall-ħaddiema nisa tqal, li welldu reċentement, jew li qed ireddgħu
X’INHU L-GĦAN TAD-DIRETTIVA?
Din għandha l-għan li tipproteġi s-saħħa u s-sigurtà tan-nisa fuq il-post tax-xogħol meta jkunu tqal* jew wara li jkunu welldu reċentement*, u nisa li qed ireddgħu*.
PUNTI EWLENIN
- L-Istati Membri tal-UE iridu jgħarrfu lil dawk li jħaddmu u lill-ħaddiema nisa dwar il-linji gwida tal-Kummissjoni Ewropea rigward ir-riskji għas-saħħa u s-sigurtà fuq il-post tax-xogħol ikkawżati minn sustanzi perikolużi u proċessi industrijali.
- Meta jiġu identifikati riskji, dawk li jħaddmu jridu jieħdu azzjoni biex jipproteġu lill-ħaddiema nisa kkonċernati, eż. billi jpoġġuhom f’pożizzjoni oħra jew jagħtuhom il-liv.
- Meta jingħata l-liv, min iħaddem għandu jiggarantixxi d-drittijiet tal-impjieg u l-ħlas ta’ allowance adegwata sabiex jikkumpensa għal kwalunkwe telf ta’ introjtu.
- Il-ħaddiema nisa tqal mhumiex obbligati li jaħdmu xiftijiet bil-lejl, soġġetti għas-sottomissjoni ta’ ċertifikat mediku.
- Il-ħaddiema nisa tqal jistgħu jsirulhom eżaminazzjonijiet mediċi ta’ qabel it-twelid matul is-sigħat tax-xogħol mingħajr ma jitilfu mill-paga tagħhom.
- Id-Direttiva tipprevedi 14-il ġimgħa ta’ liv tal-maternità, li ġimagħtejn minnhom iridu jittieħdu qabel it-twelid.
- In-nisa ma għandhomx jitkeċċew mix-xogħol minħabba t-tqala u l-maternità tagħhom.
- L-emendar tar-Regolament (UE) 2019/1243 jagħti lill-Kummissjoni s-setgħa li tadotta atti delegati biex tagħmel emendi strettament tekniċi għall-Anness I, sabiex tqis il-progress tekniku, il-bidliet fir-regolamenti jew fl-ispeċifikazzjonijiet internazzjonali u sejbiet ġodda.
- L-Anness I fih lista mhux eżawrjenti ta’ aġenti fiżiċi, bijoloġiċi u kimiċi u l-kundizzjonijiet tax-xogħol imsemmija fl-Artikolu 4 tad-Direttiva (valutazzjoni u informazzjoni).
- L-Anness II fih lista mhux eżawrjenti ta’ aġenti u kundizzjonijiet tax-xogħol imsemmija fl-Artikolu 6 tad-Drettiva (każijiet li fihom l-espożizzjoni hija pprojbita).
MINN META BDIET TAPPLIKA D-DIRETTIVA?
Ilha tapplika mill-24 ta’ Novembru 1992 u kellha ssir liġi fl-Istati Membri sal-24 ta’ Novembru 1994.
SFOND
- L-Artikolu 153 tat-Trattat dwar il-Funzjonament tal-Unjoni Ewropea jagħti lill-UE l-awtorità li tadotta leġiżlazzjoni fil-qasam tas-sigurtà u s-saħħa fuq il-post tax-xogħol, sabiex tappoġġa u tikkomplementa l-attivitajiet tal-Istati Membri.
- Id-Direttiva 92/85/KEE hija waħda minn bosta “direttivi derivati” adottati skont id-Direttiva Qafas 89/391/KEE dwar is-saħħa u s-sigurtà tal-ħaddiema fuq ix-xogħol (ara s-sommarju).
- Il-prinċipju 10 tal-Pilastru Ewropew tad-Drittijiet Soċjali jiddikjara li l-ħaddiema għandhom id-dritt għal livell għoli ta’ protezzjoni tas-saħħa u s-sigurtà tagħhom fuq il-post tax-xogħol.
- Għal aktar informazzjoni, ara:
TERMINI EWLENIN
Ħaddiema tqila: mara tqila li tgħarraf lil min iħaddimha dwar il-kundizzjoni tagħha, f’konformità mal-leġiżlazzjoni nazzjonali u/jew prattika nazzjonali.
Ħaddiema li welldet reċentement: mara li welldet reċentement skont it-tifsira tal-leġiżlazzjoni nazzjonali u/jew prattika nazzjonali u li tgħarraf lil min iħaddimha dwar il-kundizzjoni tagħha, f’konformità ma’ dik il-leġiżlazzjoni u/jew prattika.
Ħaddiema li qiegħda tredda’: mara li qiegħda tredda’ skont it-tifsira tal-leġiżlazzjoni nazzjonali u/jew prattika nazzjonali u li tgħarraf lil min iħaddimha dwar il-kundizzjoni tagħha, f’konformità ma’ dik il-leġiżlazzjoni u/jew prattika.
DOKUMENT EWLIENI
Id-Direttiva tal-Kunsill 92/85/KEE tad-19 ta’ Ottubru 1992 dwar l-introduzzjoni ta’ mizuri biex jinkoraġġixxu t-titjib fis-saħħa u s-sigurtà fuq il-post tax-xogħol għall-ħaddiema nisa tqal u ħaddiema li welldu reċentement, jew li qed ireddgħu (l-għaxar Direttiva partikolari fis-sens tal-Artikolu 16(1) tad-Direttiva 89/391/KEE) (ĠU L 348, 28.11.1992, pp. 1-7)
Emendi suċċessivi tad-Direttiva 92/85/KEE ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Verżjoni kkonsolidata tat-Trattat dwar il-Funzjonament tal-Unjoni Ewropea — Parti 3 — Politiki u azzjonijiet interni tal-Unjoni — Titolu X — Il-Politika Soċjali — Artikolu 153 (ex Artikolu 137 TEC) (ĠU C 202, 7.6.2016, pp. 114-116)
Id-Direttiva tal-Kunsill 89/391/KEE tat-12 ta’ Ġunju 1989 dwar l-introduzzjoni ta’ miżuri sabiex jinkoraġġixxu titjib fis-sigurtà u s-saħħa tal-ħaddiema fuq ix-xogħol (ĠU L 183, 29.6.1989, pp. 1-8)
Ara l-verżjoni konsolidata.
l-aħħar aġġornament 02.08.2021