Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà

SOMMARJU TA’:

L-Artikolu 18 tat-Trattat dwar l-Unjoni Ewropea

L-Artikolu 36 tat-Trattat dwar l-Unjoni Ewropea

X’JAGĦMEL IR-RAPPREŻENTANT GĦOLI TAL-UNJONI GĦALL-AFFARIJIET BARRANIN U L-POLITIKA TA’ SIGURTÀ?

Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-Rappreżentant Għoli) huwa inkarigat mill-koordinazzjoni u t-twettiq tal-Politika Estera u ta’ Sigurtà Komuni tal-UE (PESK), kif ukoll tal-Politika Komuni ta’ Sigurtà u Difiża (PSDK). Ir-Rappreżentant Għoli huwa fl-istess ħin wieħed mill-Viċi Presidenti tal-Kummissjoni Ewropea u b’hekk jiżgura li l-azzjoni esterna ġenerali tal-UE hija konsistenti.

PUNTI EWLENIN

Il-Ħatra

• Ir-Rappreżentant Għoli huwa maħtur għal perjodu ta’ ħames snin mill-Kunsill Ewropew b’vot ta’ maġġoranza kwalifikata (bi qbil mal-President tal-Kummissjoni Ewropea). Il-ħatra tar-Rappreżentant Għoli hija wkoll suġġetta għal vot ta’ kunsens mill-Parlament Ewropew inkonformità mal-Artikolu 17 tat-Trattat dwar l-Unjoni Ewropea. Dan għaliex ir-Rappreżentant Għoli huwa wkoll wieħed mill-Viċi Presidenti tal-Kummissjoni Ewropea u l-ħatra tal-Kummissjoni Ewropea kollha kemm hi teħtieġ il-kunsens tal-Parlament Ewropew.

Responsabbiltajiet

• Ir-Rappreżentant Għoli jikkontribwixxi għall-iżvilupp tal-PESK billi jissottometti l-proposti lill-Kunsill tal-UE u lill-Kunsill Ewropew.
• Ir-Rappreżentant Għoli mbagħad jiżgura l-implimentazzjoni tad-deċiżjonijiet li jiġu adottati.
• Bħala Viċi President tal-Kummissjoni, ir-Rappreżentant Għoli jiżgura li l-azzjoni esterna ġenerali tal-UE fl-oqsma tal-għajnuna għall-iżvilupp, il-kummerċ, l-għajnuna umanitarja u r-rispons għall-kriżijiet tkun konsistenti u effettiva.
• Ir-Rappreżentant Għoli jippresjedi l-laqgħa tal-ministri għall-Affarijiet Barranin fil-Kunsill tal-UE.
• Ir-Rappreżentant Għoli jirrappreżenta wkoll lill-UE fi kwistjonijiet relatati mal-PESK.
• Dmirijiet oħra jinkludu t-tmexxija tal-Aġenzija Ewropea għad-Difiża u l-Istitut tal-UE għall-Istudji tas-Sigurtà.
• Ir-Rappreżentant Għoli għandu jikkonsulta u jqis b’mod regolari l-fehmiet tal-Parlament Ewropew dwar l-aspetti u l-għażliet ewlenin tal-PESK u tal-PSDK.

Is-Servizz Ewropew għall-Azzjoni Esterna

• Ir-Rappreżentant Għoli huwa megħjun fit-twettiq tad-dmirijiet tiegħu jew tagħha mis-Servizz Ewropew għall-Azzjoni Esterna (SEAE). Is-SEAE ġie stabbilit mit-Trattat ta’ Lisbona u huwa bbażat fuq l-Artikolu 27 tat-Trattat dwar l-Unjoni Ewropea. Huwa magħmul minn uffiċjali tas-Segretarjat Ġenerali tal-Kunsill u tal-Kummissjoni, kif ukoll minn persunal issekondat mis-servizzi diplomatiċi tal-pajjiżi tal-UE.

SFOND

Il-pożizzjoni tar-Rappreżentant Għoli hija bbażata fuq l-Artikoli 18 u 27 tat-Trattat dwar l-Unjoni Ewropea. It-Trattat ta’ Amsterdam tal-1999 ħoloq il-pożizzjoni, għalkemm ir-responsabbiltajiet fi kwistjonijiet ta’ politiki esterni kienu maqsuma mal-Kummissarju Ewropew għar-Relazzjonijiet Esterni. It-Trattat ta’ Lisbona tal-2009 estenda r-responsabbiltajiet tar-Rappreżentant Għoli u għamel lid-detentur ta’ kariga Viċi President tal-Kummissjoni, biex jippermetti lir-Rappreżentant Għoli jirrappreżenta aħjar lill-UE fl-objettivi tal-politika estera tagħha.

• Rappreżentant Għoli / Viċi President (Servizz Ewropew għall-Azzjoni Esterna)

DOKUMENTI EWLENIN

Verżjoni konsolidata tat-Trattat dwar l-Unjoni Ewropea — Titolu III — Dispożizzjonijiet dwar l-istituzzjonijiet — l-Artikolu 18 (ĠU C 202, 7.6.2016, pp. 26-27)

Verżjoni konsolidata tat-Trattat dwar l-Unjoni Ewropea — Titolu V — Dispożizzjonijiet ġenerali dwar l-Azzjoni Esterna tal-Unjoni u dispożizzjonijiet speċifiċi dwar il-Politika Estera u ta’ Sigurtà Komuni — Kapitolu 2 — Dispożizzjonijiet speċifiċi dwar il-Politika Estera u ta’ Sigurtà Komuni — Taqsima 1 — Dispożizzjonijiet komuni - l-Artikolu 36 (ĠU C 202, 7.6.2016, pp. 35-36)

l-aħħar aġġornament 09.01.2020