3.11.2006

MT

Il-Ġurnal Uffiċjali ta’ l-Unjoni Ewropea

1

---

DEĊIŻJONI Nru 1622/2006/KE TAL-PARLAMENT EWROPEW U TAL-KUNSILL

ta’ l-24 ta’ Ottubru 2006

li tistabbilixxi azzjoni Komunitarja għall-avveniment tal-Kapitali Ewropea tal-Kultura għas-snin mill-2007 sa l-2019

IL-PARLAMENT EWROPEW U L-KUNSILL TA’ L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 151 tiegħu,

Wara li kkunsidraw il-proposta mill-Kummissjoni,

Wara li kkunsidraw l-opinjoni tal-Kumitat tar-Reġjuni (1),

Filwaqt li jaġixxu skond il-proċedura stipulata fl-Artikolu 251 tat-Trattat (2),

Billi

(1)	Id-Deċiżjoni Nru 1419/1999/KE tal-Parlament Ewropew u tal-Kunsill (3) stabbilixxiet azzjoni Komunitarja għall-avveniment tal-Kapitali Ewropea tal-Kultura għas-snin 2007 sa l-2019.

(2)

Minn studju li sar fuq ir-riżultati miksuba mill-avveniment tal-Belt Ewropea tal-Kultura sa l-2004 jidher li dan l-avveniment kellu impatt pożittiv f'dak li huwa l-effett mill-mezzi tax-xandir, l-iżvilupp tal-kultura u tat-turiżmu u l-għarfien, mill-abitanti, ta’ l-importanza tan-nomina tal-belt tagħhom; madankollu, l-azzjoni teħtieġ li tittejjeb, b'mod partikolari fir-rigward ta’ l-effett tagħha fit-tul fuq l-iżvilupp kulturali tal-belt u tar-reġjun konċernati.

(3)	Fejn l-ibliet jiġu megħjuna jinvolvu r-reġjun ta’ madwarhom, inklużi kwalunkwe gżejjer, ikun jista' jintlaħaq pubbliku akbar u l-impatt ta’ l-avveniment ikun jista' jiġi amplifikat.

(4)

Il-partijiet interessati fl-avveniment enfażizzaw il-problemi fil-proċess ta’ l-għażla stabbilit bid-Deċiżjoni Nru 1419/1999/KE u rrakkomandaw il-monitoraġġ tal-proposti, b'mod partikolari sabiex itejbu d-dimensjoni Ewropea tagħhom, itejbu l-kompetizzjoni u jagħtu definizzjoni mill-ġdid ta’ l-irwol tal-bord.

(5)

L-importanza u l-impatt tal-Kapitali Ewropea tal-Kultura jitolbu l-ħolqien ta’ proċess ta’ għażla mħallta, li jinvolvi livelli nazzjonali u Ewropej, u l-introduzzjoni ta’ element qawwi ta’ monitoraġġ u ta’ konsultazzjoni, sabiex ikun inkorporat komponent nazzjonali u sabiex tissaħħaħ id-dimensjoni Ewropea.

(6)	Il-fażi ta’ tħejjija ta’ l-avveniment hija ta’ importanza kruċjali sabiex jinkiseb suċċess skond l-għanijiet ta’ l-azzjoni.

(7)	Sabiex jiġi garantit il-valur miżjud Ewropew ta’ l-azzjoni, tinħtieġ fażi ta’ monitoraġġ wara n-nomina, li fiha, qabel kollox, tingħata attenzjoni sabiex jiġu sodisfatti l-kriterji stipulati għall-programm kulturali, u t-tieni li jkunu provduti pariri u assistenza minn esperti.

(8)

Għandu jitwaqqaf bord ta’ sitt esperti nazzjonali u seba' esperti Ewropej; il-bord kollu, magħmul minn tlettax-il espert (il-“bord ta’ l-għażla”) għandu jissorvelja l-fażi ta’ l-għażla sa meta tiġi nominata l-belt; is-seba' esperti Ewropej biss fuq il-bord (il-“bord ta’ monitoraġġ u ta’ konsultazzjoni”) għandhom jissorveljaw il-proċess ta’ monitoraġġ u jagħtu gwida lill-Kapitali Ewropej tal-Kultura matul il-fażi ta’ monitoraġġ sakemm iseħħ l-avveniment.

(9)	Bħala appoġġ u assistenza, kemm għall-ibliet applikanti kif ukoll għall-ibliet nominati, għandha tinħoloq website li tkun miżmuma kostantement u aġġornata regolarment mill-Kummissjoni, dwar is-suġġett ta’ Kapitali Ewropej tal-Kultura (applikazzjoni, għażla, implementazzjoni u konnessjonijiet).

(10)

Huwa importanti li jkun imħeġġeġ it-tixrid ta’ prattika tajba, speċjalment sabiex ikun garantit il-valur miżjud Ewropew ta’ l-azzjoni. Għalhekk, għandhom ikunu mħeġġa networks tal-Kapitali Ewropej tal-Kultura uffiċjali preċedenti sabiex jassumu rwol kostruttiv fl-iskambju ta’ l-esperjenzi u ta’ l-aħjar prattika tagħhom mal-Kapitali Ewropej tal-Kultura tal-ġejjieni, l-aktar fuq il-bażi ta’ skambji matul il-fażi ta’ preparazzjoni.

(11)	Huwa importanti li tiġi premjata l-kwalità tal-programm f'termini ta’ l-għanijiet u l-kriterji ta’ l-azzjoni u b'mod partikolari l-valur miżjud Ewropew bl-għoti ta’ premju fi flus.

(12)	Sabiex ikun salvagwardat l-effett fit-tul ta’ l-avveniment tal-Kapitali Ewropea tal-Kultura ikun mixtieq li jiġu użati l-inizjattiva, u l-istrutturi u l-kapaċitajiet li hija toħloq, bħala l-bażi għal strateġija dewwiema ta’ żvilupp kulturali għall-ibliet konċernati.

(13)	Għandu jiġi esplorat ix-Xahar Kulturali Ewropew (4), jew tiġi esplorata inizjattiva komparabbli, sabiex pajjiżi terzi ikunu jistgħu jieħdu sehem f'inizjattivi kulturali Ewropej.

(14)	Il-proċess tan-nomina stabbilit f'din id-Deċiżjoni jeħtieġ perjodu ta’ sitt snin sabiex jiġi implementat; dan il-perjodu ta’ sitt snin ma jistax jiġi garantit għas-snin 2011 u 2012 ladarba din id-Deċiżjoni tidħol fis-seħħ fl-2007. Għaldaqstant, għal dawn is-snin huwa previst proċess ta’ nomina.

(15)	Fl-interessi tal-kjarezza, id-Deċiżjoni Nru 1419/1999/KE għandha tiġi mħassra u sostitwita b'din id-Deċiżjoni,

IDDEĊIDEW KIF ĠEJ:

Artikolu 1

Suġġett

Hija b'dan stabbilita azzjoni Komunitarja msejħa “Kapitali Ewropea tal-Kultura” sabiex tiġi enfażizzata r-rikkezza u d-diversità tal-kulturi Ewropej u l-karatteristiċi komuni tagħhom, kif ukoll sabiex tippromwovi konoxxenza reċiproka akbar bejn iċ-ċittadini Ewropej.

Artikolu 2

Aċċess għall-azzjoni

1.   Il-bliet fl-Istati Membri u fil-pajjiżi li sejrin jaderixxu ma’ l-Unjoni Ewropea wara l-31 ta’ Diċembru 2006 għandhom ikollhom id-dritt li jiġu nominati bħala Kapitali Ewropej tal-Kultura għal perjodu ta’ sena, fl-ordni stabbilita fl-Anness.

2.   In-nomina għandha tapplika għal belt waħda f'kull wieħed mill-Istati Membri li jidhru fil-lista fl-Anness.

L-ordni kronoloġika stabbilita f'dik il-lista tista' tinbidel bi ftehim reċiproku bejn l-Istati Membri konċernati.

Artikolu 3

Applikazzjonijiet

1.   Kull applikazzjoni għandha tinkludi programm kulturali b'dimensjoni Ewropea, ibbażat prinċipalment fuq il-koperazzjoni kulturali, skond l-għanijiet u l-azzjoni previsti fl-Artikolu 151 tat-Trattat.

2.   Il-programm kulturali ta’ l-avveniment għandu jinħoloq b'mod speċifiku għas-sena tal-Kapitali Ewropea tal-Kultura billi jenfażizza l-valur miżjud Ewropew skond il-kriterji stabbiliti fl-Artikolu 4.

3.   Il-programm għandu jkun konsistenti ma’ kwalunkwe strateġija kulturali nazzjonali jew mal-politika ta’ l-Istat Membru relevanti jew, fejn ikun applikabbli skond arranġamenti istituzzjonali ta’ l-Istat Membru, ma’ kwalunkwe strateġija kulturali reġjonali, sakemm kwalunkwe strateġija jew politika bħal din ma jkollhiex l-għan li tillimita n-numru ta’ bliet li jistgħu jiġu kkunsidrati għan-nomina ta’ Kapitali Ewropej tal-Kultura taħt din id-Deċiżjoni.

4.   Il-programm għandu jdum sena. F'każijiet ġustifikati kif dovut l-ibliet nominati jistgħu jiddeċiedu li jagħżlu perjodu iqsar.

5.   Għandha ssir konnessjoni bejn il-programmi ta’ l-ibliet nominati ta’ l-istess sena.

6.   L-ibliet jistgħu jagħżlu li jinvolvu r-reġjuni ta’ madwarhom fil-programmi tagħhom.

Artikolu 4

Kriterji għall-programm kulturali

Il-programm kulturali għandu jissodisfa l-kriterji li ġejjin, li huma maqsuma f'żewġ kategoriji, “Dimensjoni Ewropea” u “Belt u Ċittadini”:

1)

Fir-rigward tal-kriterji “Dimensjoni Ewropea”, il-programm għandu: (a) irawwem koperazzjoni bejn l-operaturi kulturali, l-artisti u l-ibliet mill-Istati Membri relevanti u minn Stati Membri oħra fi kwalunkwe settur kulturali, (b) jenfasizza r-rikezza tad-diversita kulturali fl-Ewropa, (ċ) jagħti prominenza lill-aspetti komuni tal-kulturi Ewropej.

2)

Fir-rigward tal-kriterji “Belt u Ċittadini”, il-programm għandu: (a) irawwem il-parteċipazzjoni taċ-ċittadini li jgħixu fil-belt u fil-viċinanzi tagħha u jżid l-interess tagħhom kif ukoll l-interess taċ-ċittadini minn barra l-pajjiż, (b) ikun sostenibbli u jkun parti integrali mill-iżvilupp kulturali u soċjali tal-belt fuq medda twila ta’ żmien.

Artikolu 5

Preżentazzjoni ta’ l-applikazzjonijiet

1.   Għandha tiġi pubblikata sejħa sabiex jiġu preżentati applikazzjonijiet minn kull wieħed mill-Istati Membri konċernati mhux aktar tard minn sitt snin qabel ma jkollu jingħata bidu l-avveniment imsemmi.

Kull sejħa għall-preżentazzjoni ta’ applikazzjonijiet, immirata lejn l-ibliet kandidati għat-titlu, għandha ssemmi l-kriterji stabbiliti fl-Artikolu 4 u l-gwida disponibbli fil-website tal-Kummissjoni.

L-iskadenza sabiex jiġu ppreżentati applikazzjonijiet taħt kull sejħa għall-preżentazzjoni ta’ applikazzjonijiet għandha tkun skedata mhux aktar tard minn għaxar xhur wara li tiġi pubblikata.

Applikazzjoni ppreżentata fuq sejħa għall-preżentazzjoni ta’ applikazzjonijiet għandha tippreżenta l-linja ġenerali tal-programm li l-belt kandidata tippjana li twettaq għas-sena partikolari.

2.   L-applikazzjonijiet għandhom jiġu notifikati lill-Kummissjoni mill-Istat Membru konċernat.

Artikolu 6

Il-bord ta’ l-għażla

1.   Għandu jiġi stabbilit għal kull Stat Membru konċernat bord ta’ l-għażla sabiex jiġu valutati l-applikazzjonijiet ta’ l-ibliet kandidati. Kull bord għandu jirrakkomanda n-nomina ta’ belt waħda mill-Istat Membru konċernat.

2.   Kull bord ta’ l-għażla għandu jikkonsisti minn tlettax-il membru. Seba' minnhom għandhom ikunu l-persuni nominati mill-istituzzjonijiet Ewropej, kif imsemmi fil-paragrafu 4. Is-sitt membri li jifdal għandhom jiġu nominati mill-Istat Membru konċernat b'konsultazzjoni mal-Kummissjoni. L-Istat Membru konċernat għandu mbagħad jaħtar il-bord ta’ l-għażla. Il-bord għandu jaħtar il-president tiegħu minn fost il-persuni nominati mill-Parlament Ewropew, mill-Kunsill, mill-Kummissjoni u mill-Kumitat tar-Reġjuni.

3.   Il-membri tal-bord ta’ l-għażla għandhom ikunu esperti indipendenti li ma jkollhomx konflitti ta’ interess fir-rigward ta’ l-ibliet li jkunu wieġbu għas-sejħa għall-applikazzjonijiet, u b'esperjenza sostanzjali u kompetenza fis-settur kulturali, fl-iżvilupp kulturali ta’ l-ibliet jew fl-organizzazzjoni ta’ Kapitali Ewropea tal-Kultura.

4.   L-istituzzjonijiet Ewropej għandhom jinnominaw il-membri tal-bordijiet ta’ l-għażla għal tliet snin kif ġej: żewġ membri għandhom ikunu nominati mill-Parlament Ewropew, tnejn mill-Kunsill, tnejn mill-Kummissjoni, u wieħed mill-Kumitat tar-Reġjuni. Bħala eċċezzjoni, fl-ewwel sena li li matulha tkun daħlet fis-seħħ din id-Deċiżjoni, żewġ esperti għandhom ikunu nominati mill-Kummissjoni għal sena, tnejn mill-Parlament Ewropew għal sentejn, tnejn mill-Kunsill għal tliet snin u wieħed mill-Kumitat tar-Reġjuni għal tliet snin.

Artikolu 7

Għażla preliminari

1.   Kull wieħed mill-Istati Membri konċernati għandu jlaqqa' l-bord ta’ l-għażla relevanti msemmi fl-Artikolu 6 għal laqgħa ta’ qabel l-għażla mhux aktar tard minn ħames snin qabel ma jkun wasal sabiex jibda l-avveniment.

2.   Il-bord ta’ l-għażla għandu jivvaluta l-applikazzjonijiet ta’ l-ibliet li wieġbu għas-sejħa għall-preżentazzjoni ta’ applikazzjonijiet skond il-kriterji stabbiliti fl-Artikolu 4.

Għandu jilħaq ftehim dwar lista mqassra ta’ bliet kandidati li għandhom ikomplu jiġu kunsidrati u joħroġ rapport dwar l-applikazzjonijiet ta’ l-ibliet kandidati u jagħmel rakkomandazzjonijiet lill-ibliet kandidati mqiegħda fil-lista mqassra.

3.   Kull wieħed mill-Istati Membri konċernati għandu japprova formalment il-lista mqassra bbażata fuq ir-rapport tal-bord ta’ l-għażla.

Artikolu 8

L-għażla finali

1.   L-ibliet kandidati fil-lista mqassra għandhom ilestu l-applikazzjonijiet tagħhom u jibagħtuhom lill-Istati Membri konċernati, li għandhom imbgħad jgħadduhom lill-Kummissjoni.

2.   Kull wieħed mill-Istati Membri konċernati għandu jlaqqa' l-bord ta’ l-għażla relevanti, għall-għażla finali, disa' xhur wara l-laqgħa ta’ l-għażla preliminari.

3.   Il-bord ta’ l-għażla għandu jivvaluta l-programmi emendati ta’ l-ibliet kandidati imqiegħda fil-lista mqassra skond il-kriterji ta’ din l-azzjoni u r-rakkomandazzjonijiet maħruġa mill-bord matul il-laqgħa ta’ qabel l-għażla.

4.   Il-bord ta’ l-għażla għandu joħroġ rapport dwar il-programmi ta’ l-ibliet kandidati imqiegħda fil-lista mqassra flimkien ma’ rakkomandazzjoni għan-nomina ta’ belt waħda fl-Istat Membru konċernat bħala l-Kapitali Ewropea tal-Kultura.

Ir-rapport għandu jinkludi wkoll rakkomandazzjonijiet lill-belt nominata dwar il-progress u l-arranġamenti li għandhom isiru sas-sena konċernata, jekk tiġi nominata bħala Kapitali Ewropea tal-Kultura mill-Kunsill.

Ir-rapport għandu jiġi preżentat lill-Istat Membru konċernat u lill-Kummissjoni. Għandu jiġi pubblikat fil-website tal-Kummissjoni.

Artikolu 9

In-nomina

1.   Kull wieħed mill-Istati Membri konċernati għandu jinnomina belt waħda sabiex issir Kapitali Ewropea tal-Kultura u jinnotifika b'dan lill-Parlament Ewropew, lill-Kunsill, lill-Kummissjoni u lill-Kumitat tar-Reġjuni, mhux aktar tard minn erba' snin qabel ma’ jkun se jibda l-avveniment.

In-notifika għandha tkun akkumpanjata minn ġustifikazzjoni għan-nomina bbażata fuq ir-rapporti tal-bord ta’ l-għażla.

In-nomina għandha tieħu kont tar-rakkomandazzjonijiet maħruġa mill-bord ta’ l-għażla.

2.   Il-Parlament Ewropew jista' jgħaddi opinjoni lill-Kummissjoni mhux aktar tard minn tliet xhur wara li jaslu n-nomini ta’ l-Istati Membri konċernati.

3.   Il-Kunsill, billi jaġixxi fuq rakkomandazzjoni mill-Kummissjoni magħmula fid-dawl ta’ l-opinjoni tal-Parlament Ewropew u l-ġustifikazzjonijiet ibbażati fuq ir-rapporti tal-bordijiet ta’ l-għażla, għandu jaħtar uffiċjalment l-ibliet in kwistjoni bħala Kapitali Ewropej tal-Kultura għas-sena li għaliha ġew nominati.

Artikolu 10

Il-bord ta’ monitoraġġ u ta’ konsultazzjoni

1.   Għandu jiġi mwaqqaf bord ta’ monitoraġġ u ta’ konsultazzjoni sabiex jimmonitorja l-implementazzjoni ta’ l-għanijiet u tal-kriterji ta’ l-azzjoni u sabiex jipprovdi lill-Kapitali Ewropej tal-Kultura b'appoġġ u gwida minn meta jiġu nominati sal-bidu ta’ l-avveniment tal-Kapitali Ewropea tal-Kultura.

2.   Il-bord għandu jikkonsisti mis-seba' esperti nominati mill-Parlament Ewropew, mill-Kunsill, mill-Kummissjoni u mill-Kumitat tar-Reġjuni kif imsemmi fl-Artikolu 6(4). Barra minn hekk, l-Istat Membru konċernat jista' jinnomina osservatur fuq dan il-bord.

3.   Il-bliet konċernati għandhom jipprovdu rapporti dwar il-progress lill-Kummissjoni mhux aktar tard minn tliet xhur qabel il-laqgħat tal-bord.

4.   Il-Kummissjoni għandha tlaqqa' lill-bord u lir-rappreżentanti tal-belt konċernata. Il-bord għandu jiltaqa' f'żewġ okkażjonijiet sabiex jagħti pariri u jieħu rendikont fir-rigward tal-preparazzjonijiet għall-avveniment bil-ħsieb li jgħin lill-ibliet sabiex jiżviluppaw programm ta’ kwalita għolja b'dimensjoni Ewropea qawwija. L-ewwel laqgħa tiegħu għandha sseħħ mhux iktar tard minn sentejn qabel l-avveniment; it-tieni laqgħa tiegħu għandha sseħħ mhux iktar tard minn tmien xhur qabel l-avveniment.

5.   Wara kull laqgħa, il-bord għandu joħroġ rapport dwar l-istat tal-preparazzjonijiet għall-avveniment u dwar kwalunkwe passi li jkollhom jittieħdu. Ir-rapporti għandhom jagħtu kaz partikolari tal-valur miżjud Ewropew ta’ l-avveniment skond il-kriterji stipulati fl-Artikolu 4 u r-rakkomandazzjonijiet stabbiliti fir-rapporti tal-bordijiet ta’ l-għażla u tal-bordijiet ta’ monitoraġġ u konsultazzjoni.

6.   Ir-rapporti għandhom jintbagħtu lill-Kummissjoni u lill-ibliet u lill-Istati Membri konċernati. Għandhom jiġu pubblikati wkoll fil-website tal-Kummissjoni.

Artikolu 11

Premju

Fuq il-bażi tar-rapport maħruġ mill-bord ta’ monitoraġġ u ta’ konsultazzjoni wara t-tieni laqgħa tiegħu kif imsemmi fl-Artikolu 10(4), għandu jingħata premju fi flus f'ġieh Melina Mercouri lill-ibliet nominati mill-Kummissjoni sakemm dawn ikunu ssodisfaw il-kriterji stabbiliti fl-Artikolu 4 u jkunu implementaw ir-rakkomandazzjonijiet magħmula mill-bordijiet ta’ l-għażla u ta’ monitoraġġ u konsultazzjoni. Il-premju għandu jingħata kompletament mhux iktar tard minn tliet xhur qabel il-bidu tas-sena relevanti.

Artikolu 12

Valutazzjoni

Kull sena l-Kummissjoni għandha tiżgura l-valutazzjoni esterna u indipendenti tar-riżultati ta’ l-avveniment tal-Kapitali Ewropea tal-Kultura tas-sena ta’ qabel skond l-għanijiet u l-kriterji ta’ l-azzjoni stipulati f'din id-Deċiżjoni.

Għandu jitressaq mill-Kummissjoni rapport dwar dik il-valutazzjoni lill-Parlament Ewropew, lill-Kunsill u lill-Kumitat tar-Reġjuni sa mhux aktar tard mit-tmiem tas-sena wara l-avveniment tal-Kapitali Ewropea tal-Kultura.

Artikolu 13

Tħassir

Id-Deċiżjoni Nru 1419/1999/KE hija b'dan imħassra. Madankollu, dik id-Deċiżjoni għandha tkompli tapplika fil-każ ta’ bliet li ġew nominati Kapitali Ewropej tal-Kultura għall-2007, 2008 u 2009.

Artikolu 14

Disposizzjonijiet tranżizzjonali

1.   Il-bliet nominati bħala Kapitali Ewropej tal-Kultura għall-2010 fuq il-bażi tad-Deċiżjoni Nru 1419/1999/KE għandhom ikunu suġġetti għall-proċess ta’ monitoraġġ stabbilit fl-Artikolu 10 ta’ din id-Deċiżjoni. Il-Kummissjoni għandha tagħti premju lill-ibliet nominati fuq il-bażi ta’ l-Artikolu 11 ta’ din id-Deċiżjoni.

2.   B'deroga mill-Artikoli 3 sa 9, in-nomini għal bliet Kapitali Ewropej tal-Kultura li jirrigwardaw is-snin 2011 u 2012 għandhom jiġu regolati mill-proċedura deċiżjonali li ġejja:

1)	L-ibliet fl-Istati Membri għandhom jiġu nominati Kapitali Ewropej tal-Kultura kif stabbilit fl-Anness;

2)	Kull Stat Membru għandu jippreżenta, kif stabbilit fl-Anness, in-nomina tiegħu ta’ belt waħda jew aktar lill-Parlament Ewropew, lill-Kunsill, lill-Kummissjoni u lill-Kumitat tar-Reġjuni;

3)	Nomina għandha tiġi preżentata mhux aktar tard minn erba' snin qabel il-ftuħ ta’ l-avveniment konċernat u tista' tkun akkumpanjata minn rakkomandazzjoni mill-Istat Membru konċernat.

4)	Il-Kummissjoni għandha kull sena tifforma bord ta’ l-għażla li għandu joħroġ rapport dwar in-nomina jew nomini li jkunu ġew iġġudikati vis-à-vis l-għanijiet u l-karatteristiċi ta’ din l-azzjoni.

5)	Il-bord ta’ l-għażla għandu jkun magħmul minn seba' personalitajiet indipendenti prominenti li jkunu esperti fis-settur kulturali, tnejn minnhom maħtura mill-Parlament Ewropew, tnejn mill-Kunsill, tnejn mill-Kummissjoni u wieħed mill-Kumitat tar-Reġjuni.

6)	Il-bord ta’ l-għażla għandu jippreżenta r-rapport tiegħu lill-Kummissjoni, lill-Parlament Ewropew u lill-Kunsill.

7)	Il-Parlament Ewropew jista' jgħaddi opinjoni lill-Kummissjoni dwar in-nomina jew nomini mhux aktar tard minn tliet xhur wara li jirċievi r-rapport.

8)	Il-Kunsill, billi jaġixxi fuq rakkomandazzjoni mill-Kummissjoni magħmula fid-dawl ta’ l-opinjoni tal-Parlament Ewropew u tar-rapport tal-bord ta’ l-għażla, għandu uffiċjalment jinnomina l-belt konċernata bħala Kapitali Ewropea tal-Kultura għas-sena li għaliha tkun ġiet nominata.

3.   B'deroga mill-Artikolu 4, il-kriterji stabbiliti fl-Artikolu 3 u fl-Anness II mad-Deċiżjoni Nru 1419/1999/KE għandhom japplikaw fil-każ tal-Kapitali Ewropej tal-Kultura għall-2010, 2011 u 2012, sakemm il-belt konċernata ma tiddeċidix li tibbaża l-programm tagħha fuq il-kriterji stipulati fl-Artikolu 4 ta’ din id-Deċiżjoni.

Artikolu 15

Dħul fis-seħħ

Din id-Deċiżjoni għandha tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali ta’ l-Unjoni Ewropea.

Għandha tapplika mill-1 ta’ Jannar 2007, bl-eċċezzjoni ta’ l-Artikolu 5, li għandu japplika mit-23 ta’ Novembru 2006.

---

(1)  ĠU C 115, 16.5.2006, p. 56.

(2)  Opinjoni tal-Parlament Ewropew tal-5 ta’ April 2006 (għadha mhijiex pubblikata fil-Ġurnal Uffiċjali) u Deċiżjoni tal-Kunsill tal-25 ta’ Settembru 2006.

(3)  ĠU L 166, 1.7.1999, p. 1. Deċiżjoni kif emendata bid-Deċiżjoni Nru 649/2005/KE (ĠU L 117, 4.5.2005, p. 20).

(4)  Konklużjonijiet tal-laqgħa tal-Ministri tal-Kultura fil-Kunsill tat-18 ta’ Mejju 1990 dwar l-eliġibbilta futura għal “Kapitali Ewropea tal-Kultura” u dwar avveniment speċjali ta’ Xahar Kulturali Ewropew (ĠU C 162, 3.7.1990, p. 1).

---

---