26.3.2014   

MT

Il-Ġurnal Uffiċjali tal-Unjoni Ewropea

L 90/1

(1)

Fid-19 ta’ Jannar 2012, ir-Renju tad-Danimarka ressaq quddiem l-Aġenzija Ewropea għas-Sustanzi Kimiċi (minn hawn ’il quddiem “l-Aġenzija”) dossier skont l-Artikolu 69(4) tar-Regolament (KE) Nru 1907/2006, sabiex jinbeda l-proċess tar-restrizzjonijiet skont l-Artikoli minn 69 sa 73 ta’ dak ir-Regolament (minn hawn’ il quddiem “id-dossier tal-Anness XV”). F’dak id-dossier, intwera li l-esponiment għall-kromju VI, meta jkun jinsab f’oġġetti tal-ġild jew partijiet ta’ oġġetti tal-ġild li jiġu f’kuntatt mal-ġilda, hu ta’ riskju għas-saħħa tal-bniedem. Il-komposti tal-kromju VI jistgħu jinizjalaw każijiet ġodda ta’ sensitizzazzjoni u jeliċitaw reazzjoni allerġika. Id-dossier juri li hija meħtieġa azzjoni fil-livell tal-Unjoni.

(2)

Il-komposti tal-kromju VI jafu jiffurmaw fil-ġild permezz ta’ ossidazzjoni ta’ komposti tal-kromju III, li jiġu miżjuda f’xi proċessi tal-ikkonzar bħala cross-links għas-sottounitajiet ta’ kollaġen sabiex tiżdied l-istabbiltà dimensjonali tal-ġild kif ukoll ir-reżistenza tagħha għall-azzjoni mekkanika u s-sħana. Skont id-dossier tal-Anness XV, il-mekkaniżmi u l-kondizzjonijiet li taħthom il-kromju VI jiġi ffurmat huma magħrufa u l-maġġorparti tal-konzeriji fl-Unjoni diġà żviluppaw u implimentaw miżuri sabiex jikkontrollaw u jnaqqsu l-formazzjoni tiegħu.

(3)

Fit-28 ta’ Novembru 2012 il-Kumitat għall-Istima tar-Riskji (minn hawn’ il quddiem “RAC”) adotta b’kunsens l-opinjoni dwar ir-restrizzjoni proposta fid-dossier tal-Anness XV. Skont l-opinjoni tar-RAC, ir-restrizzjoni hija l-aktar miżura xierqa madwar l-Unjoni biex jiġu indirizzati r-riskji identifikati maħluqa minn komposti tal-kromju VI fil-ġild, kemm f’termini ta’ effikaċja u ta’ prattikabilità. Madankollu, fl-opinjoni tiegħu r-RAC propona li tkun modifikata r-restrizzjoni billi jitħassar il-kunċett ta’ kuntatt dirett u prolongat mal-ġilda, kif oriġinarjament inklużi fid-dossier tal-Anness XV.

(4)

Ir-restrizzjoni proposta tiffoka fuq ir-riskju ta’ induzzjoni ta’ sensitizzazzjoni tal-ġilda relatata ma’ kuntatt tal-ġilda b’mod dirett jew indirett ma’ oġġetti tal-ġild jew partijiet ta’ oġġetti tal-ġild li fihom il-kromju VI. Fil-persuni li huma diġà sensitizzati, kuntatti bħal dawn jistgħu wkoll jeliċitaw reazzjoni allerġika f’konċentrazzjonijiet aktar baxxi minn dawk meħtieġa għal induzzjoni ta’ sensitizzazzjoni.

(5)

Ir-restrizzjoni proposta għandha tkopri oġġetti tal-ġild u oġġetti li jkunu fihom partijiet tal-ġild użati mill-konsumaturi jew il-ħaddiema, li taħt kondizzjonijiet ta’ użu normali jew raġonevolment previdibbli, jiġu f’kuntatt mal-ġilda.

(6)

Il-metodu tal-istandard EN ISO 17075 huwa l-uniku metodu analitiku rikonoxxut internazzjonalment attwalment disponibbli biex jinstab l-kromju VI fil-ġild, inkluż il-ġild fl-oġġetti. Il-limitu ta’ determinazzjoni tal-metodu standard EN ISO 17075 huwa ta’ 3 mg/kg (0,0003 % skont il-piż) ta’ kromju VI kontenut f’piż niexef totali ta’ ġild. L-iffissar ta’ limitu bħal dan għar-restrizzjoni tat-tqegħid fis-suq ta’ oġġetti tal-ġild jew oġġetti li fihom partijiet tal-ġild huwa għaldaqstant iġġustifikat għal finijiet ta’ sorveljanza u inforzabbiltà.

(7)

Skont l-opinjoni tar-RAC, il-limitu ta’ 3 mg/kg (0,0003 % skont il-piż) ta’ kromju VI kontenut f’piż niexef totali tal-ġild jikkorrispondi għal skoperturi ogħla mil-Livell tal-Anqas Livell Effettiv Negattiv Osservat għall-eliċitazzjoni. Skont l-opinjoni tar-RAC, dak il-limitu huwa mistenni li jkollu effettività ta’ 80 % biex inaqqas l-okkorrenza ta’ każijiet ġodda ta’ dermatite allerġika konnessa mal-kromju VI minħabba l-kromju VI f’oġġetti tal-ġild.

(8)

L-effettività tar-restrizzjoni fuq in-numru ta’ każijiet ta’ allerġija għall-kromju tista’ tiġi determinata billi jsir monitoraġġ ta’ każijiet ta’ dermatite allerġika konnessa mal-kromju VI. Jekk il-prevalenza ta’ allerġija ma tonqosx, jew jekk xi metodu analitiku għad-detezzjoni ta’ kontenut aktar baxx ta’ kromju VI jsir disponibbli u jkun rikonoxxuti bħala affidabbli, din ir-restrizzjoni tiġi riveduta.

(9)

Fis-6 ta’ Marzu 2013, il-Kumitat għall-Analiżi Soċjoekonomika (minn hawn ’il quddiem “SEAC”) adotta b’kunsens l-opinjoni dwar ir-restrizzjoni proposta fid-dossier tal-Anness XV. Skont l-opinjoni tas-SEAC, ir-restrizzjoni, kif immodifikata mir-RAC, hija l-aktar miżura xierqa madwar l-Unjoni biex jiġu indirizzati r-riskji identifikati f’termini tal-proporzjonalità tal-benefiċċji soċjoekonomiċi tagħha meta mqabblin mal-ispejjeż soċjoekonomiċi.

(10)

Il-Forum għall-Ikambju tal-Informazzjoni dwar l-Infurzar ġie kkonsultat waqt l-proċess ta’ restrizzjonijiet.

(11)

Fit-8 ta’ April 2013 l-Aġenzija ppreżentat lill-Kummissjoni l-opinjonijiet tal-RAC u s-SEAC li abbażi tagħhom il-Kummissjoni kkonkludiet li jeżisti riskju inaċċettabbli għas-saħħa tal-bniedem li nħolqu fejn il-komposti tal-kromju VI kienu preżenti f’oġġetti tal-ġild u oġġetti li jkunu fihom partijiet tal-ġild, u li jiġu f’kuntatt mal-ġilda, u li jeħtieġ jiġi indirizzat fuq bażi mifruxa mal-Unjoni kollha. L-impatti soċjoekonomiċi ta’ din ir-restrizzjoni, inkluża d-disponibbiltà ta’ alternattivi, ġew ikkunsidrati.

(12)

Ir-restrizzjoni fuq it-tqegħid fis-suq ta’ oġġetti użati timponi piż sproporzjonat fuq il-konsumaturi li jbiegħu mill-ġdid dawn l-oġġetti. Barra minn hekk, minħabba n-natura ta’ dawk it-tranżazzjonijiet, it-tali restrizzjoni tkun diffiċli li tiġi infurzata. Għalhekk, din ir-restrizzjoni ma għandhiex tapplika għal oġġetti tal-ġild jew oġġetti li fihom partijiet tal-ġild li kienu diġà involuti f’użu aħħari fl-Unjoni qabel ma’ dan ir-Regolament jibda japplika.

(13)

Huwa xieraq li jkun hemm dispożizzjoni għal perjodu ta’ 12-il xahar wara d-dħul fis-seħħ ta’ dan ir-Regolament biex il-partijiet interessati kkonċernati jadottaw miżuri li huma konformi ma’ dan ir-Regolament, inkluż l-indirizzar ta’ oġġetti li huma diġà fil-katina tal-forniment, inkluż fil-ħażniet.

(14)

Ir-Regolament (KE) Nru 1907/2006 għandu għalhekk jiġi emendat skont dan.

(15)

Il-miżuri stipulati f’dan ir-Regolament huma skont l-opinjoni tal-Kumitat stabbilit bl-Artikolu 133 tar-Regolament (KE) Nru 1907/2006,