ANNESS GĦAR-RAKKOMANDAZZJONI DWAR L-GĦANIJIET INTERMEDJI U L-ISTRUMENTI TAL-POLITIKA MAKROPRUDENZJALI

1.   Daħla

L-awtoritajiet makroprudenzjali ġew stabbiliti, jew qegħdin jiġu stabbiliti, fil-biċċa l-kbira tal-Istati Membri tal-Unjoni Ewropea. Il-pass li jmiss biex il-politika makroprudenzjali ssir operattiva huwa l-għażla ta’ strumenti effettivi u effiċjenti tal-politika makroprudenzjali li jevitaw jew itaffu r-riskji sistemiċi fis-sistema finanzjarja kollha kemm hi. Dan l-Anness jippreżenta qafas għal din l-għażla.

Ir-Rakkomandazzjoni tal-Bord Ewropew dwar ir-Riskju Sistemiku (BERS) dwar il-mandat makroprudenzjali tal-awtoritajiet nazzjonali (1) tirreferi għall-identifikazzjoni ta’ għanijiet intermedji tal-politika bħala “speċifikazzjonijiet operattivi tal-għan aħħari”. L-identifikazzjoni tal-għanijiet intermedji tagħmel il-politika makroprudenzjali aktar operattiva, aktar trasparenti u aktar ġustifikabbli, u tipprovdi bażi ekonomika għall-għażla tal-istrumenti. Il-qafas ippreżentat f’dan l-Anness għalhekk huwa bbażat fuq sett ta’ għanijiet intermedji li ġew identifikati minn qabel u li għandhom firxa wiesgħa. Il-qafas ifisser bid-dettalji kif strumenti indikattivi jistgħu jgħinu biex jintlaħqu dawk l-għanijiet intermedji u liema indikaturi jkunu sinjal biex dawn jiġu attivati jew ma jibqgħux attivati. L-Anness fih ukoll tagħrif dwar il-bażi legali tal-istrumenti individwali. Fil-ġejjieni, il-leġiżlazzjoni tal-Unjoni Ewropea hija mistennija tipprovdi bażi legali komuni għal uħud minn dawn l-istrumenti.

Meta japplikaw il-qafas, l-awtoritajiet makroprudenzjali għandhom jieħdu bħala l-punt tat-tluq ir-riskji għall-istabbiltà finanzjarja fil-livell nazzjonali. Dawn ir-riskji jistgħu jkunu differenti minn pajjiż għall-ieħor minħabba l-karatteristiċi differenti tas-sistemi finanzjarji u taċ-ċikli finanzjarji fil-pajjiżi tal-Unjoni Ewropea. Minħabba f’dan u minħabba l-fatt li l-politika makroprudenzjali tinsab f’fażi bikrija ta’ żvilupp, jistgħu jintgħażlu strumenti differenti fi Stati Membri differenti. Fl-istess ħin, il-fatt li s-swieq finanzjarji fl-Unjoni Ewropea huma integrati ferm ukoll jitlob approċċ koordinat. Il-koordinazzjoni tista’ ssaħħaħ l-effikaċja u l-effiċjenza tal-politika makroprudenzjali billi tillimita l-firxa tal-arbitraġġ u t-tixrid negattiv. Hija essenzjali wkoll biex jiġi internalizzat it-tixrid pożittiv u negattiv lejn is-sistemi finanzjarji u l-ekonomiji ta’ Stati Membri oħra u biex jitħares il-funzjonament tas-suq uniku. Filwaqt li maż-żmien wieħed jistenna li jkun hemm konverġenza akbar fl-Unjoni Ewropea kollha dwar l-istrumenti makroprudenzjali, jeħtieġ li l-applikazzjoni tal-istrumenti titfassal għal ċikli finanzjarji diverġenti u riskji eteroġenji.

Dan l-Anness huwa mfassal kif jidher hawn taħt:

—	Taqsima 2 tidentifika l-għanijiet intermedji tal-politika makroprudenzjali u torbothom man-nuqqasijiet bażiċi tas-swieq li jitqiesu l-aktar rilevanti għall-politika makroprudenzjali.

—	Taqsima 3 tissuġġerixxi l-kriterji għall-għażla tal-istrumenti makroprudenzjali u tipprovdi ħarsa ġenerali lejn l-għanijiet intermedji u l-istrumenti makroprudenzjali indikattivi.

—	Żieda 1 tipprovdi analiżi tal-istrumenti makroprudenzjali individwali u Żieda 2 fiha diskussjoni dwar l-elementi makroprudenzjali tal-assigurazzjoni.

2.   Identifikazzjoni tal-għanijiet intermedji

Ir-Rakkomandazzjoni tal-BERS dwar il-mandat makroprudenzjali tal-awtoritajiet nazzjonali titlob lill-Istati Membri “jispeċifikaw illi l-għan aħħari tal-politika makroprudenzjali huwa li jikkontribwixxi għall-ħarsien tal-istabbiltà tas-sistema finanzjarja kollha, inkluż billi tissaħħaħ ir-reżistenza tas-sistema finanzjarja u titnaqqas l-akkumulazzjoni ta’ riskji sistemiċi, biex b’hekk jiġi żgurat kontribut sostenibbli tas-settur finanzjarju lit-tkabbir tal-ekonomija”.

L-istudji rilevanti jikklassifikaw ir-riskju sistemiku f’żewġ dimensjonijiet: strutturali u ċikliku. Id-dimensjoni strutturali għandha x’taqsam mad-distribuzzjoni tar-riskju fis-sistema finanzjarja kollha. Id-dimensjoni ċiklika għandha x’taqsam mat-tendenza tal-banek li jassumu riskju eċċessiv fi żmien tajjeb u juru biża’ eċċessiv mir-riskju fi żmien ħażin. Filwaqt li huwa utli li jitqiesu d-dimensjonijiet strutturali u ċikliċi għall-iskop ta’ identifikazzjoni ta’ xi jwassal għar-riskju sistemiku u l-istrumenti korrispondenti, huwa diffiċli tagħmel distinzjoni ċara bejn iż-żewġ dimensjonijiet minħabba li huma marbutin mill-qrib.

L-identifikazzjoni tal-għanijiet intermedji skont in-nuqqasijiet speċifiċi tas-swieq dokumentati fil-pubblikazzjonijiet tista’ tippermetti klassifikazzjoni aktar ċara tal-istrumenti makroprudenzjali, tiżgura bażi ekonomika għall-kalibrazzjoni u l-użu ta’ dawn l-istrumenti u ssaħħaħ ir-responsabbiltà tal-awtoritajiet makroprudenzjali. Fil-prattika, l-istrumenti makroprudenzjali diġà sikwit jintrabtu mal-għanijiet intermedji. Hekk, il-bafer kontroċikliku għandu l-għan li jtaffi r-riskju sistemiku marbut ma’ żieda eċċessiva fil-kreditu. Biex jifforma opinjoni sħiħa dwar l-għanijiet intermedji, dan l-Anness juża l-pubblikazzjonijiet għall-identifikazzjoni tan-nuqqasijiet tas-swieq li huma rilevanti għall-politika makroprudenzjali u mbagħad jgħaqqadhom mal-għanijiet individwali (ara Tabella 1) (2).

L-ewwel għan intermedju huwa l-mitigazzjoni u l-prevenzjoni ta’ żieda eċċessiva fil-kreditu u l-leverage . Iż-żieda eċċessiva fil-kreditu ġiet identifikata bħala waħda mill-kawżi ewlenin tal-kriżijiet finanzjarji, fejn il-leverage jaġixxi bħala mezz ta’ amplifikazzjoni. Il-kuntrast bejn l-impatt tal-kollass tal-bużżieqa “dot-com”, li kienet iffinanzjata fil-biċċa l-kbira mill-ekwitajiet, u t-tifqigħ tal-bużżieqa tal-ipoteki subprime, ikkawżata mill-kreditu, turi ċar l-importanza tal-leverage. F’dan ir-rigward, tista’ ssir distinzjoni bejn il-leverage fi ħdan is-sistema finanzjarja u dak bejn l-istituzzjonijiet finanzjarji u s-selliefa tal-ekonomija reali (i.e. bl-innettjar tal-klejms fi ħdan is-sistema finanzjarja). Il-politika makroprudenzjali tista’ tindirizza t-teħid eċċessiv tar-riskji fi żmien tajjeb billi tissikka r-rekwiżiti tal-kapital u l-kollateral. Il-bafers maħluqa fi żmien tajjeb jistgħu jiġu rilaxxati fi żmien ħażin biex jassorbu t-telf, itaffu l-ħtieġa ta’ deleveraging u jevitaw l-azzjonijiet fuq il-banek, filwaqt li jsostnu l-estensjoni tal-kreditu għas-sostenn tat-tkabbir ekonomiku.

Tabella 1

Għanijiet intermedji tal-politika makroprudenzjali u n-nuqqasijiet relatati tas-swieq

Għan intermedju	Nuqqasijiet bażiċi tas-swieq
Mitigazzjoni u prevenzjoni ta’ żieda eċċessiva fil-kreditu u l-leverage	Esternalitajiet tal-kriżi tal-kreditu: Issikkar f’daqqa tal-kundizzjonijiet meħtieġa biex jinkiseb self, li jwassal għal tnaqqis fid-disponibbiltà tal-kreditu għas-settur mhux finanzjarju. It-teħid endoġenu tar-riskji: Inċentivi li waqt boom jiġġeneraw it-teħid eċċessiv ta’ riskji u, fil-każ tal-banek, deterjorament fl-istandards tal-għoti ta’ self. Tifsiriet għal dan jinkludu l-kompetenza dwar is-sinjali, il-pressjonijiet fis-suq biex jiżdiedu r-redditi jew l-interazzjoni strateġika bejn l-istituzzjonijiet. Illużjoni tar-riskji: Kalkoli ħżiena kollettivi tar-riskji marbuta ma’ memorja qasira u n-nuqqas ta’ frekwenza tal-kriżijiet finanzjarji. Azzjonijiet fuq il-banek: L-irtirar ta’ finanzjament bl-ingrossa jew bl-imnut fil-każ ta’ insolvenza attwali jew perċepita. Esternalitajiet tal-interkonnettività: Konsegwenzi kuntaġjużi tal-inċertezza dwar ġrajjiet marbuta ma’ istituzzjoni jew fi ħdan suq.
Mitigazzjoni u prevenzjoni ta’ diskrepanza eċċessiva fil-maturità u ta’ nuqqas ta’ likwidità fis-swieq	Esternalitajiet ta’ fire sales: Dawn jiġu mill-bejgħ sfurzat tal-assi minħabba d-diskrepanzi eċċessivi bejn l-assi u l-obbligazzjonijiet. Dan jista’ jwassal għal spirall tal-likwidità fejn il-prezzijiet tal-assi li jkunu qegħdin jonqsu jġibu magħhom aktar bejgħ, deleveraging u tixrid lejn istituzzjonijiet finanzjarji li jkollhom kategoriji simili ta’ assi. Azzjonijiet fuq il-banek Nuqqas ta’ likwidità fis-swieq: L-ixxuttar tas-swieq interbankarji jew kapitali minħabba t-telf ġenerali ta’ fiduċja jew aspettattivi pessimisti ferm.
Limitazzjoni tal-konċentrazzjonijiet ta’ skoperturi diretti u indiretti	Esternalitajiet tal-interkonnettività Esternalitajiet ta’ fire sales: (hawnhekk) jiġu mill-bejgħ sfurzat tal-assi bi prezz ħażin minħabba d-distribuzzjoni tal-iskoperturi fis-sistema finanzjarja.
Limitazzjoni tal-impatt sistemiku ta’ inċentivi ħżiena biex jitnaqqas il-periklu morali	Periklu morali u “il-kbir ma jistax ifalli”: It-teħid eċċessiv ta’ riskji marbut mal-aspettattivi ta’ salvataġġ (bail-out) minħabba r-rilevanza perċepita tas-sistema min-naħa ta’ istituzzjoni individwali.
Tisħiħ tar-reżistenza tal-infrastrutturi finanzjarji	Esternalitajiet tal-interkonnettività Esternalitajiet ta’ fire sales Illużjoni tar-riskji Kuntratti mhux kompleti: Strutturi ta’ kumpens li jipprovdu inċentivi għal imġiba riskjuża.

It-tieni għan intermedju għandu x’jaqsam mad-diskrepanza eċċessiva fil-maturità, i.e. kemm l-assi għal żmien fit-tul huma finanzjati b’obbligazzjonijiet għal żmien qasir. L-esperjenza turi li ċ-ċikli tal-kreditu jidentifikaw ruħhom ma’ żieda fid-dipendenza minn finanzjament għal żmien qasir. Dan iżid ir-riskji għall-istabbiltà finanzjarja minħabba li tikber in-nuqqas ta’ likwidità u jiżdiedu l-fire sales u l-kontaġju. Dan l-għan intermedju jiffoka fuq il-likwidità tal-assi fis-swieq u fuq id-dipendenza mill-finanzjament għal żmien qasir, kif ukoll fuq l-asimmetriji fl-informazzjoni li jistgħu jorbtu l-kwistjonijiet ta’ finanzjament mal-prezzijiet tal-assi. Biex tindirizza d-diskrepanzi fil-maturutà, il-politika makroprudenzjali tista’ titlob lill-banek jiffinanzjaw l-assi mhux likwidi tagħhom b’finanzjament stabbli u jkollhom assi likwidi ta’ kwalità tajba ħafna li jiggarantixxu r-rifinanzjament tal-fondi għal żmien qasir. Dawn il-miżuri għandhom l-għan li jħarsu l-banek minn nuqqas ta’ likwidità fis-swieq u mill-pressjoni marbuta mal-fire sales kif ukoll minn azzjonijiet min-naħa tad-depożitanti u istituzzjonijiet finanzjarji oħra.

It-tielet għan intermedju huwa l-limitazzjoni tal-konċentrazzjonijiet ta’ koperturi diretti u indiretti, filwaqt li jitqies il-livell tar-riskju tagħhom. Ir-riskju dirett ta’ konċentrazzjoni jiġi minn skoperturi kbar għas-setturi mhux finanzjarji (e.g. is-suq tad-djar, l-istati) kif ukoll bejn is-setturi finanzjarji u/jew l-entitajiet finanzjarji. Barra dan, l-iskoperturi indiretti jibdew fi ħdan is-sistema minħabba l-interkonnettività tal-istituzzjonijiet finanzjarji u l-konsegwenzi kuntaġjużi mill-iskoperturi komuni. L-iskoperturi kbar jistgħu jiġu limitati billi jiġu stabbiliti limiti għal setturi finanzjarji speċifiċi u (gruppi ta’) kontropartijiet jew billi jiġu introdotti circuit-breakers, bħall-kontropartijiet ċentrali (CCP), li jgħinu biex inaqqsu l-effetti li jistgħu jseħħu f’sensiela (e.g. kontaġju u fire sales) minħabba inadempjenza mhux mistennija jew skoperturi komuni fl-istituzzjonijiet finanzjarji kollha.

Ir-raba’ għan intermedju jipprova jillimita l-impatt sistemiku ta’ inċentivi ħżiena sabiex jitnaqqas il-periklu morali. Dan jinvolvi t-tisħiħ ta’ istituzzjonijiet li huma sistemikament importanti, filwaqt li jiġu kontrobilanċjati l-effetti negattivi ta’ garanzija impliċita min-naħa tal-gvern. Arranġamenti kredibbli għal likwidazzjoni u riżoluzzjoni ordinati huma wkoll fundamentali biex jiġi indirizzat il-periklu morali. Fl-aħħar, jistgħu jiġu applikati miżuri oħra, fosthom li l-parteċipanti fis-swieq jintalbu jużaw flushom biex jixtru stokks fil-kumpaniji li jkunu qegħdin imexxu (“keep skin in the game”) jew miżuri marbuta mar-rimunerazzjoni tal-amministrazzjoni.

Il-ħames għan intermedju huwa t-tisħiħ tal-infrastrutturi finanzjarji. Dan jista’ jintlaħaq b’żewġ modi ewlenin: bl-indirizzar tal-esternalitajiet fi ħdan l-infrastruttura tas-sistema finanzjarja (3) u bil-korrezzjoni tal-effetti tal-periklu morali li jistgħu joħorġu mill-organizzazzjoni tal-istituzzjoni. Fost dawn jista’ jkun hemm is-sistemi legali, l-aġenziji ta’ klassifikazzjoni tal-kreditu, l-iskemi ta’ garanzija tad-depożiti u l-prattiki tas-suq.

3.   Għażla tal-istrumenti makroprudenzjali

Wara li jiġu stabbiliti l-għanijiet intermedji tal-politika makroprudenzjali, il-pass li jmiss huwa l-għażla tal-istrumenti li jistgħu jintużaw biex jintlaħqu dawn l-għanijiet. L-istrumenti għandhom jintgħażlu skont l-effikaċja u l-effiċjenza tagħhom biex jilħqu l-għanijiet intermedji u finali.

L-effikaċja tikkonċerna sa liema grad jistgħu jiġu indirizzati n-nuqqasijiet tas-swieq u jintlaħqu l-għanijiet intermedji u finali. Bħala minimu, jinħtieġ mill-inqas strument effikaċi wieħed għal kull għan intermedju (“ir-regola Tinbergen”). Fil-prattika, l-użu ta’ numru ta’ strumenti komplementari jista’ jiġi ġustifikat, l-aktar jekk dan irażżan l-impatt tal-arbitraġġ regolatorju u l-inċertezza dwar il-mekkaniżmu ta’ trażmissjoni.

Konsiderazzjoni rilevanti f’dan ir-rigward hija kif il-koordinazzjoni tista’ tintuza biex tevita l-arbitraġġ tal-linja politika: filwaqt li xi strumenti huma effikaċi meta jiġu applikati fil-livell tal-pajjiżi (e.g. limiti loan-to-value u loan-to-income), oħrajn jitolbu għall-inqas applikazzjoni fil-livell tal-Unjoni Ewropea (e.g. rekwiżiti tal-margins u l-haircuts, rekwiżit tal-ikklerjar mis-CCP). Filwaqt li l-biċċa l-kbira tal-istrumenti jkollhom xi effetti pożittivi meta jiġu applikati fil-livell tal-pajjiżi, xorta waħda jibbenefikaw mill-koordinazzjoni fl-Unjoni Ewropea kollha. Il-koordinazzjoni mhux biss ittejjeb l-effikaċja tal-istrumenti iżda wkoll tqis it-tixrid pożittiv u negattiv fis-sistemi finanzjarji ta’ Stati Membri oħra kif ukoll tħares il-funzjonament xieraq tas-suq uniku.

L-effiċjenza għandha x’taqsam mal-kisba tal-għanijiet bl-inqas spiża possibbli. Kwistjoni ewlenija hija l-kompromess bejn ir-reżistenza u t-tkabbir, billi t-tisħiħ tar-reżistenza jinvolvi spiża. Dan ifisser li jiġu preferuti strumenti li jsostnu t-tkabbir fit-tul filwaqt li jillimitaw ir-riskju sistemiku, u strumenti li jkollhom anqas impatt fuq strumenti oħra tal-politika.

Tabella 2 turi lista ta’ strumenti makroprudenzjali indikattivi skont l-għanijiet intermedji (4). Barra mill-istrumenti li jidhru f’Tabella 2, l-Istati Membri jistgħu jkunu jridu jagħżlu strumenti li jindirizzaw bl-aħjar mod riskji speċifiċi għall-istabbiltà finanzjarja fil-livell nazzjonali. Barra dan, il-qafas tal-għanijiet u l-istrumenti għandu jkun suġġett għal evalwazzjoni minn żmien għal żmien u jirrifletti l-avvanzi fl-istat tal-għarfien dwar il-politika makroprudenzjali kif ukoll l-iżvilupp ta’ sorsi ġodda ta’ riskju sistemiku.

Tabella 2

Għanijiet intermedji u strumenti makroprudenzjali indikattivi

1.   Mitigazzjoni u prevenzjoni ta’ żieda eċċessiva fil-kreditu u l-leverage

—	Bafer kontroċikliku tal-kapital

—	Rekwiżiti settorjali tal-kapital (inkluż fi ħdan is-sistema finanzjarja)

—	Proporzjon tal-leverage makroprudenzjali

—	Rekwiżiti loan-to-value (LTV)

—	Rekwiżiti loan-to-income/debt (service)-to-income (LTI)

2.   Mitigazzjoni u prevenzjoni ta’ diskrepanza eċċessiva fil-maturità u ta’ nuqqas ta’ likwidità fis-swieq

—	Aġġustament makroprudenzjali għall-proporzjon ta’ likwidità (e.g. proporzjon ta’ kopertura tal-likwidità)

—	Restrizzjonijiet makroprudenzjali fuq is-sorsi ta’ finanzjament (e.g. proporzjon nett ta’ finanzjament stabbli)

—	Limitu makroprudenzjali mhux ippeżat għal finanzjament inqas stabbli (e.g. proporzjon loan-to-deposit)

—	Rekwiżiti ta’ margins u haircuts

3.   Limitazzjoni tal-konċentrazzjonijiet ta’ skoperturi diretti u indiretti

—	Restrizzjonijiet fuq skoperturi kbar

—	Rekwiżit tal-ikklerjar mis-CCP

4.   Limitazzjoni tal-impatt sistemiku ta’ inċentivi ħżiena biex jitnaqqas il-periklu morali

—	Soprataxxa fuq il-kapital tal-istituzzjonijiet finanzjarji sistemikament importanti (SIFI)

5.   Tisħiħ tar-reżistenza tal-infrastrutturi finanzjarji

—	Rekwiżiti ta’ margins u haircuts dwar l-ikklerjar mis-CCP

—	Titjib fid-divulgazzjoni

—	Bafer strutturali għar-riskju sistemiku

L-użu limitat tal-istrumenti makroprudenzjali jimpedixxi analiżi kwantitattiva b’saħħitha tal-effikaċja u l-effiċjenza tagħhom. Kollox ma’ kollox l-evidenza miġbura mill-esperjenza fil-livell nazzjonali hija limitata. Madankollu l-analiżi tat-trażmissjoni u l-applikazzjoni prattika tal-istrumenti preżentata f’Żieda 1 tindika li l-għarfien huwa aktar avvanzat fir-rigward ta’ ċerti strumenti (e.g. strumenti bbażati fuq il-kapital, limiti għal skoperturi kbar, limiti LTV/LTI) milli fir-rigward ta’ oħrajn (e.g. rekwiżiti ta’ margins u haircuts, rekwiżit tal-ikklerjar mis-CCP). Il-mezzi ta’ trażmissjoni differenti u l-ambitu tal-applikazzjoni tal-istrumenti jsostnu l-possibbiltà ta’ komplementarjetajiet. Hekk, l-istrumenti bbażati fuq il-kapital (li jaffettwaw il-prezzijiet tal-assi) u l-limiti LTV/LTI (li jillimitaw il-kwantità ta’ servizzi finanzjarji) jistgħu jintużaw b’mod parallel biex jillimitaw żieda eċċessiva fil-kreditu. Ir-restrizzjonijiet fuq skoperturi kbar u r-rekwiżiti tal-ikklerjar mis-CCP jistgħu wkoll jiġu applikati kontemporanjament, billi l-għan tagħhom huwa li jikkontrollaw ir-riskju tal-kontroparti f’tipi differenti ta’ tranżazzjonijiet. Barra l-istrumenti li jidhru f’Tabella 2, l-awtoritajiet makroprudenzjali għandhom ikunu involuti fit-tfassil u l-implimentazzjoni tal-pjanijiet ta’ rkupru u riżoluzzjoni u l-iskemi ta’ garanziji tad-depożiti, minħabba l-implikazzjonijiet tagħhom biex is-sistema finanzjarja tiffunzjona tajjeb. Filwaqt li xi strumenti speċifiċi mniżżla f’Tabella 2 tfasslu l-aktar għas-settur bankarju, dawn jistgħu jiġu applikati għal setturi oħra. F’Żieda 2 hemm diskussjoni dwar is-sehem li jista’ jkollha l-politika makroprudenzjali fl-assigurazzjoni.

Fl-aħħar, fir-rigward tal-bażi legali tal-istrumenti, ir-Regolament u d-Direttiva li jmiss dwar ir-Rekwiżiti tal-Kapital (CRR u CRD IV) għall-banek u l-kumpaniji kbar tal-investiment huma mistennija jipprovdu l-flessibbiltà biex tonqos il-kalibrazzjoni ta’ xi strumenti preżentati f’Tabella 2 f’ċerti kundizzjonijiet. Dan huwa konformi mal-ittra tal-BERS dwar il-prinċipji għall-politika makroprudenzjali fil-leġiżlazzjoni tal-Unjoni Ewropea dwar is-settur bankarju (5). L-istrumenti li mhumiex inkorporati fil-leġiżlazzjoni tal-Unjoni Ewropea (6) jistgħu jiġu implimentati fil-livell nazzjonali jekk ikollhom bażi legali xierqa (7). Madankollu, in-nuqqas ta’ regoli dettaljati fil-livell tal-Unjoni Ewropea ma jfissirx li l-Istati Membri se jkunu ħielsa għalkollox li jimponu regoli nazzjonali, billi xi prinċipji tal-liġi tal-Unjoni Ewropea, bħall-projbizzjoni tad-dħul ta’ restrizzjonijiet fuq il-moviment ħieles tal-kapital, jistgħu jimponu limiti għad-diskrezzjoni nazzjonali.

Żieda 1

Strumenti makroprudenzjali analizzati mill-BERS

Din iż-żieda tipprovdi sommarju tal-fehmiet dwar l-istrumenti makroprudenzjali analizzati mill-BERS, maqsuma skont l-għanijiet intermedji. Tiġbor fil-qosor kif huwa definit kull strument, kif jaħdem (i.e. x’nafu dwar il-mekkaniżmu ta’ trażmissjoni), it-tipi ta’ indikaturi li flimkien mal-ġudizzju tal-esperti jistgħu jiggwidaw deċiżjoni dwar jekk l-istrument għandux jiġi attivat jew diżattivat, u kif jista’ jikkomplementa strumenti oħra. Filwaqt li l-analiżi kunċettwali diġà tinsab f'fażi avvanzata fil-każ ta' bosta strumenti, l-esperjenza fl-użu tal-biċċa l-kbira ta’ dawn l-istrumenti hija limitata fl-Unjoni Ewropea (għalkemm ċerti strumenti, bħal-limiti LTV/LTI, diġà ġew applikati). It-tkomplija tal-analiżi dwar l-impatt, l-indikaturi u l-ambitu li jista’ jkollhom fir-rigward tal-komplementarjetà se tkun ta’ importanza kbira.

1.   Mitigazzjoni u prevenzjoni ta’ żieda eċċessiva fil-kreditu u l-leverage

Bafer kontroċikliku tal-kapital

Il-bafer kontroċikliku tal-kapital huwa aġġunt mal-kapital tal-bafer ta’ konservazzjoni. L-aġġunt mal-kapital jista' jiżdied jew jonqos b’mod kontroċikliku skont il-varjazzjonijiet maż-żmien fir-riskju sistemiku, b’mod partikolari dawk ikkawżati miċ-ċiklu tal-kreditu. L-għan tal-bafer kontroċikliku tal-kapital huwa li jħares is-sistema bankarja mit-telf li jista’ jkollha meta żieda eċċessiva fil-kreditu tiġi assoċjata ma’ żieda fir-riskju għas-sistema kollha kemm hi. L-istrument għandu effett dirett fuq ir-reżistenza: il-bafers tal-kapital jinbnew fil-perjodi meta jiżdiedu r-riskji għas-sistema kollha u jistgħu jintużaw meta dawn ir-riskji jibdew jonqsu.

Wieħed mill-effetti indiretti possibbli tal-bafer kontroċikliku tal-kapital huwa li jista’ jgħin biex ipatti għall-fażi espansjonistika taċ-ċiklu tal-kreditu billi jnaqqas il-provvista tal-kreditu jew iżid il-kost tal-kreditu. Il-provvista tal-kreditu tista’ tonqos jekk il-banek iżidu l-proporzjon tal-kapital billi jnaqqsu l-assi ppeżati bir-riskju. Il-kost tal-kreditu jista’ jiżdied minħabba żieda fil-kost totali tal-kapital, li l-banek jgħaddu fuq il-klijenti billi jgħollu r-rati tas-self. Iż-żewġ mezzi ta’ trażmissjoni jistgħu jagħtu kontribut biex tonqos il-kwantità tal-kreditu, u dan jgħin biex tiġi evitata l-akkumulazzjoni ta’ riskju għas-sistema kollha kemm hi. Bl-istess mod, rilaxx tal-bafer jista’ jnaqqas ir-riskju li l-provvista tal-kreditu tiġi ristretta mir-rekwiżiti regolatorji tal-kapital meta jdur iċ-ċiklu tal-kreditu. L-inċertezza dwar l-effett indirett hija ogħla milli dwar l-effett dirett u tinħtieġ aktar riċerka f’dan il-qasam. It-trażżin possibbli ta’ żieda fil-kreditu waqt iż-żmien tajjeb taċ-ċiklu tal-kreditu iktar għandu jitqies bħala effett sekondarju li jista’ jkun pożittiv milli għan tar-reġim tal-bafer kontroċikliku tal-kapital.

Min ifassal il-politika dwar il-bafer ċentrali tal-kapital jista’ jiġi ggwidat fil-ġudizzju tiegħu mid-devjazzjoni tal-proporzjon credit-to-GDP imqabbla max-xejra fit-tul kif ukoll minn indikaturi rilevanti oħra. Id-diskussjoni empirika s’issa fil-biċċa l-kbira ffukat fuq il-karatteristiċi tad-differenza fil-credit-to-GDP. Id-differenza tirrappreżenta d-devjazzjoni tal-proporzjon credit-to-GDP imqabbla max-xejra fit-tul, fejn differenza pożittiva titqies bħala sinjal ta’ żieda eċċessiva fil-kreditu. Studji li saru mill-Bank għas-Saldi Internazzjonali (BIS) dwar il-pajjiżi jenfasizzaw il-prestazzjoni storika tajba min-naħa tad-differenza credit-to-GDP bħala indikazzjoni ta’ kriżijiet finanzjarji. Fl-istess ħin, l-esperjenza fil-livell nazzjonali turi li d-differenza mhux dejjem tat l-indikazzjoni ġusta għall-attivazzjoni tal-bafer jew mhux dejjem ħadmet tajjeb biex tindika l-fażi tar-rilaxx. Twaqqaf grupp ta’ esperti tal-BERS biex jipprovdi gwida supplimentari dwar l-iffissar tal-bafer, b’mod partikolari billi jkompli jagħmel analiżi skont il-pajjiżi dwar indikaturi oħra possibbli għall-Istati Membri tal-Unjoni Ewropea.

Fl-abbozz tas-CRD IV hemm provediment għall-bafer kontroċikliku tal-kapital u għalhekk dan irid jiġi implimentat fil-leġiżlazzjoni nazzjonali. L-abbozz tar-reġim tal-bafer kontroċikliku tal-kapital jippermetti flessibbiltà biex l-awtoritajiet makroprudenzjali jkunu jistgħu jiffissaw il-bafer skont il-prinċipji u l-gwida dwar l-indikaturi (8) u b’hekk jipprovdi għal livell ta’ reċiproċità.

Rekwiżiti settorjali tal-kapital (fosthom rekwiżiti għall-iskoperturi fi ħdan is-sistema finanzjarja)

Rekwiżiti tal-kapital aggregati bħall-bafer kontroċikliku tal-kapital jistgħu jkunu strumenti x’aktarx goffi meta jittrattaw l-eżuberanza f’setturi partikolari. F’każijiet bħal dawn, ir-rekwiżiti settorjali tal-kapital (9) jistgħu jkunu strument aktar preċiż jekk ir-riskju sistemiku ma jinqabadx b’mod adegwat mir-rekwiżiti mikroprudenzjali. Jistgħu jiġu applikati billi (a) ir-rekwiżiti mikroprudenzjali tal-kapital marbuta ma’ settur jew kategorija ta’ assi partikolari jiġu skalati permezz ta’ multiplikant jew billi (b) tiġi imposta soprataxxa jew tariffa fuq il-kapital mal-iskoperturi ta’ bank għal settur jew kategorija ta’ assi partikolari ppeżati bir-riskju. Jistgħu jiġu stabbiliti wkoll limiti minimi għall-piż tar-riskju.

Il-mekkaniżmu ta’ trażmissjoni jixbah lil dak tal-bafer kontroċikliku tal-kapital, b’żewġ differenzi. L-ewwel, żieda fir-rekwiżiti tal-kapital għal settur partikolari tibdel il-prezzijiet relattivi u hekk jonqos is-self għal dak is-settur partikolari billi x’aktarx jiżdiedu l-kostijiet marġinali relattivi tal-finanzjament għal dak is-settur. It-tieni, il-banek ikollhom it-tendenza li x’aktarx inaqqsu l-iskopertura milli li jżidu l-ekwità jekk settur jiġi identifikat bħala li jkun partikolarment ta’ riskju.

Dan l-istrument għandu jintuża meta jibda jidher li jkun qiegħed jakkumula riskju sistemiku f’settur jew kategorija ta’ assi partikolari. Indikatur minnhom ta’ akkumulazzjoni bħal din tista’ tkun dejta dwar il-kreditu skont is-settur li tista’ tiġi kkalkulata bħala differenza settorjali credit-to-GDP. Id-dejta komplementari, bħall-ammonti ta’ self b’ipoteka jew il-prezzijiet tal-proprjetà għas-settur tal-proprjetà, ukoll tista’ tkun sinifikattiva biex tindika l-akkumulazzjoni tar-riskju.

L-abbozz tas-CRR jipprevedi l-possibbiltà ta’ aġġustament tar-rekwiżiti tal-kapital għall-proprjetà residenzjali u kummerċjali kif ukoll l-iskoperturi fi ħdan is-sistema finanzjarja għal raġunijiet makroprudenzjali jew ta’ riskju sistemiku, suġġett għal proċedura fil-livell tal-Unjoni Ewropea.

Proporzjon tal-leverage makroprudenzjali

Il-proporzjon tal-leverage huwa definit bħala l-proporzjon tal-ekwitajiet ta’ bank mit-total (mhux aġġustat għar-riskju) tal-assi. Għall-iskopijiet makroprudenzjali, ir-rekwiżit tal-proporzjon tal-leverage jista’ jiġi applikat għall-banek kollha bħala aġġunt u possibilment b’mod li jvarja biż-żmien. B’mod partikolari, fejn jiġu applikati rekwiżiti tal-kapital makroprudenzjali ppeżati bir-riskju b’mod li jvarja fiż-żmien, ir-rekwiżit tal-proporzjon tal-leverage jista’ wkoll jinbidel maż-żmien biex iżomm il-funzjoni tiegħu ta’ sostenn. Bħala strument makroprudenzjali, ir-rekwiżit tal-proporzjon tal-leverage għandu l-vantaġġ li huwa relattivament sempliċi u trasparenti.

Il-mekkaniżmu ta’ trażmissjoni għar-rekwiżit tal-proporzjon tal-leverage jixbah lil dak tar-rekwiżiti tal-kapital ippeżati bir-riskju. Meta l-proporzjon tal-leverage ikun aktar ristrettiv mir-rekwiżiti ppeżati bir-riskju, il-banek jistgħu jżidu l-ekwitajiet, iżommu l-qligħ jew inaqqsu l-assi biex jagħmlu tajjeb għaż-żieda fir-rekwiżiti (10). Il-prezz tal-kreditu x’aktarx li jkollu jiżdied u l-kwantità tal-kreditu miżjuda tista’ tonqos (11).

Il-proporzjon tal-leverage kultant jitqies bħala indikatur tar-riskju sistemiku. Hekk, studju tal-Kumitat ta' Basel dwar is-Superviżjoni Bankarja (BCBS) sab li l-banek li kellhom bżonn is-sostenn tas-settur pubbliku fil-kriżi finanzjarja reċenti setgħu jiġu identifikati bis-saħħa tal-proporzjon tal-leverage  (12). Barra dan, indikaturi oħra li potenzjalment huma rilevanti wkoll għall-bafer kontroċikliku tal-kapital jistgħu jintużaw biex jiggwidaw id-deċiżjonijiet dwar il-proporzjon tal-leverage.

Meta jiġi adottat bħala strument vinkolanti dettaljat wara perjodu ta’ osservazzjoni skont is-CRR li ġejja, ir-rekwiżit tal-proporzjon tal-leverage jista’ jiġi ristrett għal skopijiet makroprudenzjali, suġġett għal proċedura fil-livell tal-Unjoni Ewropea. Qabel jiġi armonizzat fl-Unjoni Ewropea kollha, huwa maħsuba li l-proporzjon tal-leverage jintuża fil-livell nazzjonali.

Rekwiżiti loan-to-value (LTV) u loan-to-income/debt (service)-to-income (LTI)

Ir-rekwiżit LTV huwa limitu fuq il-valur ta’ self marbut mal-kollateral bażiku (e.g. proprjetà residenzjali). Ir-rekwiżit LTI huwa limitu fuq il-kostijiet tas-servizz tad-dejn marbut mad-dħul disponibbli. Il-punt ta’ referenza jvarja minn dak tal-istrumenti li ġew diskussi s’issa: huwa l-kuntratt bejn il-klijent u l-istituzzjoni finanzjarja, iktar milli l-istituzzjoni nnifisha.

L-iskop makroprudenzjali tal-limiti LTV u LTI huwa li jrażżnu ċ-ċiklu tal-kreditu u jkabbru r-reżistenza tal-istituzzjonijiet finanzjarji. L-effett fuq l-estensjoni taċ-ċiklu tal-kreditu joħroġ mill-impatt mitigatorju li jħallu proporzjonijiet LTV aktar ibsin fuq il-mekkaniżmu tal-“aċċelleratur finanzjarju”: meta mewġa pożittiva ta’ introjtu twassal għal żieda fil-prezzijiet tad-djar, iż-żieda fil-ħruġ ta’ self aktarx tkun inqas fil-pajjiżi li jkollhom proporzjonijiet LTV aktar baxxi. (13) Barra dan, limiti LTV aktar baxxi jistgħu jżidu r-reżistenza tas-sistema bankarja bis-saħħa ta’ inadempjenza aktar baxxa marbuta ma’ telf, filwaqt li limiti LTI aktar baxxi jistgħu jnaqqsu l-probabbiltà ta’ inadempjenza. Il-limiti LTV u LTI ġeneralment jitqiesu bħala strumenti komplementari. Billi l-introjtu huwa aktar stabbli mill-prezzijiet tad-djar, il-limiti LTV jistgħu jsiru aktar restrittivi meta l-prezzijiet tad-djar jibdew jogħlew. Għalkemm fil-prattika l-limiti LTV u LTI ntużaw tipikament bħala limiti statiċi, jistgħu jintużaw ukoll b’mod li jvarja maż-żmien. Madankollu, l-aspettattivi jistgħu jkunu destabilizzanti. Jekk l-individwi jistennew li l-limiti jkunu se jonqsu, jistgħu jgħaġġlu biex joħorġu self bi proporzjonijiet LTV/LTI għoljin.

Għalkemm il-limiti LTV jew LTI ġew applikati f’bosta pajjiżi tal-Unjoni Ewropea, mhumiex applikati b’mod armonizzat fl-Unjoni Ewropea kollha. Minħabba n-nuqqas ta’ definizjonijiet jew linji gwida armonizzati għal dawn l-istrumenti fil-livell tal-Unjoni Ewropea, ikun siewi li l-BERS jagħmel evalwazzjoni bir-reqqa bil-ħsieb li jipprovdi gwida għall-awtoritajiet makroprudenzjali.

Komplementarjetà

Il-bafer kontroċikliku tal-kapital, ir-rekwiżiti settorjali tal-kapital u r-rekwiżit tal-proporzjon tal-leverage jikkomplementaw lil xulxin fil-fokus tagħhom (min b’mod ġenerali u min b’mod partikolari), fis-sensittività għar-riskju u fl-implimentazzjoni (uħud jindirizzaw manifestazzjonijiet ċikliċi, oħrajn strutturali tar-riskju sistemiku). Xi drabi l-limiti LTV/LTI jitqiesu bħala sostituti tar-rekwiżiti settorjali tal-kapital fir-rigward tas-suq tad-djar. Madankollu, jistgħu jitqiesu bħala komplementari għal strumenti bbażati fuq il-kapital għal għadd ta’ raġunijiet. L-ewwel, filwaqt li l-istrumenti bbażati fuq il-kapital jista’ jkollhom impatt l-aktar fuq il-provvista tal-kreditu, il-limiti LTV/LTI jolqtu l-aktar in-naħa tad-domanda, i.e. il-klijenti tal-banek li joħorġu self. It-tieni, jekk ir-riskju ma jinqabadx biżżejjed, e.g. permezz tar-rekwiżiti settorjali tal-kapital fil-każ tas-suq tad-djar, il-limiti LTV/LTI jistgħu jaġixxu bħala sostenn neċessarju. Fl-aħħar, l-effikaċja tal-istrumenti bbażati fuq il-kapital tista’ tintlaqat mill-ħtieġa ta’ koordinazzjoni bejn l-Istati Membri. Dan ma jgħoddx fil-każ tal-limiti LTV/LTI billi l-punt ta' referenza tagħhom huwa l-kuntratt bejn il-klijent u l-istituzzjoni finanzjarja, iktar milli l-istituzzjoni nnifisha. Għalhekk, huma esposti anqas għall-arbitraġġ regolatorju li jċaqlaq in-negozju għal pajjiżi oħra jew għas-sistema bankarja parallela (shadow banking) (14).

2.   Mitigazzjoni u prevenzjoni ta’ diskrepanza eċċessiva fil-maturità u ta’ nuqqas ta’ likwidità fis-swieq

Aġġustament makroprudenzjali għall-proporzjon tal-likwidità (e.g. proporzjon ta’ kopertura tal-likwidità – LCR) u restrizzjonijiet makroprudenzjali fuq is-sorsi ta’ finanzjament (e.g. proporzjon nett tal-finanzjament stabbli – NSFR)

Il-proporzjon LCR (il-proporzjon tal-assi likwidi ta’ kwalità tajba mit-total tal-ħruġ nett ta’ likwidità fit-30 jum ta’ wara) ikejjel il-kapaċità tal-banek li jifilħu għal perjodu qasir definit minn qabel ta’ tensjoni fil-likwidità u jiżgura li l-assi likwidi tal-banek jistgħu jikkontrobilanċjaw it-tensjoni tal-ħruġ ta’ likwidità għal żmien qasir. Il-kumitat ta’ Basel qabel dwar id-definizzjoni tal-proporzjon LCR. Il-proporzjon NSFR (il-proporzjon tal-ammont disponibbli mill-ammont meħtieġ ta’ finanzjament stabbli) ifittex li jiffissa limitu minimu fuq l-ammont ta’ finanzjament għat-tul li jkollhom il-banek vis-à-vis assi inqas likwidi, iżda l-kumitat ta’ Basel għadu ma qabilx fuq definizzjoni preċiża. L-azzjoni tal-politika makroprudenzjali tista’ tieħu s-sura ta’ suppliment jew xi aġġustament makroprudenzjali ieħor għal-livelli regolatorji fil-każ taż-żewġ strumenti. Ikun possibbli li jintlaqtu biss gruppi speċifiċi ta’ banek (e.g. banek sistemikament importanti) iktar milli s-settur bankarju kollu kemm hu.

L-għan intermedju ewlieni ta’ dawn l-istrumenti huwa li jtaffu d-diskrepanza eċċessiva fil-maturità u r-riskju marbut mal-finanzjament (15). Barra dan, jistgħu jkabbru r-reżistenza tas-sistema għall-kreditu eċċessiv u l-leverage  (16). Il-banek jistgħu jissodisfaw dawn ir-rekwiżiti ta’ likwidità billi jtawlu l-maturità tal-finanzjament jew jinvestu f’assi likwidi (jew it-tnejn). Biex jevitaw il-proċikliċità, il-banek għandhom jitħallew jużaw il-bafers tagħhom fi żminijiet ta’ tensjoni fil-likwidità.

Fost l-indikaturi li jillimitaw dawn ir-rekwiżiti hemm id-dejta fil-karti tal-bilanċ tal-banek, l-indikaturi ekonomiċi u d-dejta tas-swieq (ekwitajiet, swaps ta’ inadempjenza tal-kreditu – CDS). Indikaturi bħal tibdil qawwi fl-ammonti u r-rati interbankarji, l-użu tal-faċilitajiet permanenti tal-BĊE, l-użu u d-disponibblità tal-kollateral u sinjali ta’ azzjonijiet fuq il-banek (e.g. ġbid ta’ flus jew pagamenti urġenti) jistgħu jgħinu biex jiġi deċiż meta jkun xieraq li jintreħew il-limiti (17). Xi indikaturi jistgħu jikkoinċidu ma’ dawk relatati mal-istrumenti bbażati fuq il-kapital li jvarjaw maż-żmien.

Il-proporzjon LCR u l-proporzjon NSFR huma mistennija jidħlu bħala rekwiżiti vinkolanti dettaljati permezz tas-CRR mhux qabel perjodi rispettivi ta’ osservazzjoni. Qabel l-armonizzazzjoni tal-istrumenti fil-livell tal-Unjoni Ewropea, l-Istati Membri huma mistennija jkollhom il-possibbiltà japplikaw rekwiżiti nazzjonali għal-likwidità jew piżijiet prudenzjali billi jqisu għadd ta’ kunsiderazzjonijiet, fosthom ir-riskju sistemiku marbut mal-likwidità. Barra dan, l-abbozz tal-leġiżlazzjoni tal-Unjoni Ewropea jipprevedi l-possibbiltà li l-istrumenti tal-likwidità jiġu aġġustati għal skopijiet makroprudenzjali, suġġett għal proċedura fil-livell tal-Unjoni Ewropea.

Limitu makroprudenzjali mhux ippeżat għal finanzjament inqas stabbli (e.g. proporzjon loan-to-deposit)

F’xi pajjiżi ġie applikat limitu mhux ippeżat tal-likwidità għal finanzjament inqas stabbli, bħall-proporzjon loan-to-deposit, bil-ħsieb li jillimita d-dipendenza eċċessiva minn sorsi ta’ finanzjament inqas stabbli. Id-depożiti tal-klijenti ġeneralment jitqiesu bħala sors stabbli ta’ finanzjament, li jfisser li l-proporzjon LTD (jew verżjonijiet estiżi tiegħu) jista’ jintuża biex jillimita d-dipendenza strutturali eċċessiva mill-finanzjament inqas stabbli tas-suq. Madankollu, l-istrument ma jqisx l-istruttura tal-maturitajiet tal-finanzjament tas-suq u l-impatt tiegħu jvarja fost il-banek b’mudelli differenti ta’ negozju. Il-proporzjon tal-finanzjament bażiku (core funding ratio) u dak tal-finanzjament bl-ingrossa (wholesale funding ratio) huma miżuri relatati.

Ir-rekwiżit tal-LTD jista’ jiġi sodisfatt jew billi jonqos is-self jew billi jiżdiedu d-depożiti. L-esperjenza tal-aħħar kriżi wriet li fi żmien ħażin id-depożiti jrendu skont is-self f’xi każijiet billi tal-ewwel jibqgħu stabbli jekk mhux ukoll jiżdiedu (minħabba ċ-ċaqliq minn tipi oħra ta’ tfaddil) filwaqt li d-domanda għal tal-aħħar tonqos minħabba li tonqos l-attività ekonomika. Hekk, il-proporzjon LTD aktarx jimxi maċ-ċiklu u r-rekwiżit relatat ikun restrittiv fi żminijiet ta’ boom ekonomiku u ma jkunx restrittiv fi żmien ħażin. Jista’ jkun hemm inċentivi għal arbitraġġ regolatorju jekk is-self u d-depożiti ma jiġux definiti kif jixraq. Il-banek jistgħu jistabbilixxu strutturi finanzjarji ġodda b’titoli tad-dejn biex ma jiġux inklużi fin-numeratur.

Fejn ikun meħtieġ, il-proporzjon LTD jista’ jintuża biex jindirizza leverage jew kreditu eċċessivi (skont ma juri l-proporzjon credit-to-GDP jew l-iżvilupp tiegħu) u jtejjeb il-pożizzjoni tal-likwidità strutturali tal-banek.

Rekwiżiti ta’ margins u haircuts

Il-haircuts u l-margins inizjali jiddeterminaw il-livell ta’ kollateralizzazzjoni fil-finanzjament assigurat u t-tranżazzjonijiet ta’ derivati. B’mod ġenerali, fit-tranżazzjonijiet b’finanzjament assigurat, il-livell ta’ kollateralizzazzjoni jiġi determinat mill-haircut li tkun ġiet applikata lit-titoli li jkunu daħlu bħala kollateral. Fit-tranżazzjonijiet bid-derivati, il-livell ta’ kollateralizzazzjoni jiddependi primarjament mir-rekwiżit tal-margin inizjali (li jħares il-parteċipanti fis-swieq minn tibdil li jista’ jkun hemm fil-valur tal-pożizzjoni tagħhom fil-każ li l-kontroparti tagħhom tkun inadempjenti) kif ukoll mill-haircut applikata lit-titoli li jintużaw biex jissodisfaw ir-rekwiżit. Il-haircuts u l-margins imposti mill-awtoritajiet superviżorji jistgħu jrażżnu l-booms tal-finanzjament u jikkontrollaw it-tnaqqis tal-finanzjament assigurat fi żmien ħażin, i.e. inaqqsu l-proċikliċità tal-likwidità fis-swieq u potenzjalment itaffu l-ħżin ta’ likwidtà u l-fire sales. Jistgħu jgħinu wkoll biex jillimitaw żieda eċċessiva fil-kreditu u l-leverage.

Jekk jintuża l-metodu through-the-cycle (permezz ta’ settijiet storiċi twal ta’ dejta li jinkludu kundizzjonijiet instabbli u stabbli tas-swieq) dan ifisser li l-margins u l-haircuts ikunu anqas dipendenti mill-kundizzjonijiet attwali tas-swieq. Dan jista’ jiġi komplementat minn suppliment kontroċikliku diskrezzjonali li jirregola l-finanzjament assigurat meta jkun hemm bżonn, u dan jiżgura li r-riskji jiġu pprezzati b’mod aktar realistiku u li tonqos l-eżuberanza. Madankollu, meta r-rekwiżiti jiġu ssikkati, b’mod partikolari fl-aktar perjodu attiv taċ-ċiklu finanzjarju, dan jista’ jiddestabbilizza s-swieq minħabba li jimponi piżijiet fuq il-finanzjament. Minħabba f’hekk il-prezzijiet tal-assi jistgħu jonqsu u dan iżid il-haircuts u l-margins u jista’ jwassal għal spirall negattiv (18).

Il-leġiżlazzjoni attwali ma tipprovdix sehem lill-awtoritajiet makroprudenzjali f’dan il-qasam. Għad-derivati over-the counter (OTC), dan jista’ jiġi kkunsidrat fl-ewwel reviżjoni tar-Regolament dwar l-Infrastruttura tas-Swieq Ewropej (EMIR). Aktar minn hekk, billi l-margins u l-haircuts huma strumenti li jolqtu t-tranżazzjonijiet tas-swieq, se jkunu suġġetti għal arbitraġġ regolatorju u jibbenefikaw minn applikazzjoni globali.

Komplementarjetà

Jista’ jkun hemm komplementarjetà bejn ir-rekwiżiti LCR, NSFR u LTD l-aktar minħabba d-differenzi fil-maturità, fl-ambitu u fis-sensittività tagħhom għar-riskju. L-istrumenti tal-likwidità jistgħu jikkomplementaw ukoll strumenti tas-solvenza, bħall-bafer kontroċikliku tal-kapital, biex jonqos il-leverage u tiżdied ir-reżistenza. Barra dan, ir-rekwiżiti tal-margins u l-haircuts jikkomplementaw il-miżuri speċifiċi għall-banek (l-aktar l-NSFR u l-LTD) billi jista’ jkollhom impatt fuq il-likwidità aggregata tas-swieq u l-istabbiltà tal-finanzjament.

3.   Limitazzjoni tal-konċentrazzjonijiet ta’ skoperturi diretti u indiretti

Restrizzjonijiet fuq skoperturi kbar

Is-CRD tiddefinixxi skopertura kbira bħala “skopertura għal klijent jew grupp ta’ klijenti marbutin … fejn il-valur tagħha huwa daqs jew jaqbeż 10 % tal-fondi tagħha stess”. L-istituzzjonijiet ta’ kreditu u l-kumpaniji ta’ investiment ma jistax ikollhom skopertura ta’ aktar minn 25 % tal-fondi (kapital) tagħhom għal xi klijent jew grupp ta’ klijenti. Is-CRD tipprevedi wkoll li l-Istati Membri għandu jkollhom diskrezzjoni meta jittrattaw ċerti tipi ta’ skoperturi (e.g. għal setturi li jkunu rilevanti sistemikament) minħabba r-riskju tagħhom, li jista’ jagħti lok għal intervent makroprudenzjali. Jekk l-iskoperturi kbar jiġu ristretti, dan jista’ jtaffi r-riskju ta’ konċentrazzjoni u jnaqqas ir-riskju tal-kontroparti u l-possibbiltà ta’ kontaġju (anki għas-settur bankarju parallel) (19). Jillimitaw ukoll is-sensittività tal-istituzzjonijiet finanzjarji għal skossi komuni jew settorjali.

Billi tistabbilixxi limiti fuq l-iskoperturi għal kontropartijiet jew setturi speċifiċi (e.g. il-proprjetà jew istituzzjonijiet finanzjarji oħra) ir-restrizzjoni fuq l-iskoperturi kbar tiffavorixxi direttament li r-riskju jitqassam fis-sistema (20). Ittejjeb ukoll il-profondità tas-suq interbankarju u tiddiversifika l-finanzjament għall-istituzzjonijiet finanzjarji u mhux finanzjarji. Barra dan, il-limiti fuq l-iskoperturi jnaqqsu l-impatt li jista’ jkun hemm minħabba l-inadempjenza ta’ waħda mill-kontropartijiet. Bħal fil-każ tal-biċċa l-kbira tal-istrumenti makroprudenzjali, jista’ jkun hemm proċikliċità: żieda fil-kapital waqt l-booms ekonomiċi tista’ żżid il-limitu fuq l-iskoperturi filwaqt li l-limitu jsir aktar restrittiv meta jonqos il-kapital fi żmien ħażin. Barra dan, ir-restrizzjoni tista’ tfixkel it-tkabbir jew ma tħallix lill-istituzzjonijiet jibbenefikaw mill-kompetenza f’ċerti setturi.

Skont is-CRD, l-istituzzjonijiet finanzjarji huma mitluba jirrappurtaw skoperturi li jaqbżu 10 % tal-kapital. L-analiżi min-netwerks tista’ tuża dan it-tagħrif biex tiddetermina jekk restrizzjonijiet makroprudenzjali jkunux xierqa. Jekk ikun meħtieġ, il-limitu ta’ rappurtar jista’ jonqos biex jinkorpora l-istituzzjonijiet globali sistemikament rilevanti li jkollhom bażi kbira ta’ kapital. L-abbozz tas-CRR jipprevedi l-possibbiltà li r-rekwiżiti tal-iskoperturi kbar jiġu ssikkati fil-livell nazzjonali għal skopijiet makroprudenzjali, skont proċedura fil-livell tal-Unjoni Ewropea.

Rekwiżit tal-ikklerjar mill-kontropartijiet ċentrali (CCP)

Ir-regolaturi jistgħu jitolbu li ċerti tranżazzjonijiet ta’ istituzzjonijiet finanzjarji jiġu kklerjati permezz ta’ kontropartijiet ċentrali (CCP). Is-sostituzzjoni ta’ netwerk ta’ skoperturi bilaterali bi struttura fejn kull parteċipant ikollu skopertura waħda għas-CCP tista’ tqassam mill-ġdid ir-riskju tal-kontroparti u tiċċentralizza l-kontroll tar-riskju u l-ġestjoni tal-inadempjenzi. Dan jista’ jgħin biex it-tixrid jiġi kkontrollat u biex tinżamm l-istabbiltà tas-suq interbankarju.

Madankollu, din il-miżura ġġib magħha wkoll l-ispejjeż tat-tranżazzjonijiet u żżid il-potenzjal ta’ arbitraġġ regolatorju, e.g. billi tħajjar tranżazzjonijiet li ma jkunux suġġetti għall-ikklerjar minn CCP. Barra dan, l-importanza sistemika tas-CCP tiżdied billi dawn jikkonċentraw ir-riskju tal-kontroparti, u dan jista’ jwassal għal poter eċċessiv fis-swieq, periklu morali jew riskju sistemiku (minn inadempjenzi) (21). Barra dan, il-kapaċità tas-CCP fil-ġestjoni tar-riskji u fl-assorbiment tar-riskji fil-biċċa l-kbira tal-każijiet ma ġietx ittestjata, l-aktar fil-livell ta’ tranżazzjonijiet li jista’ jkun ferm ogħla. Għalhekk tkun teħtieġ regolamentazzjoni stretta fir-rigward tas-CCP, inkluż l-iżvilupp ta’ pjanijiet xierqa ta’ riżoluzzjoni u rkupru għas-CCP. Għandu jkun hemm attenzjoni wkoll meta ssir l-għażla ta’ prodotti li jitolbu l-ikklerjar min-naħa tas-CCP.

Fost l-indikaturi xierqa tal-għażla biex jiġi deċiż liema kuntratti għandhom ikunu suġġetti għar-rekwiżit tal-ikklerjar minn CCP hemm il-karatteristiċi ta’ standardizzazzjoni, likwidità, kumplessità u riskju, kif ukoll it-tnaqqis potenzjali tar-riskju sistemiku u l-possibbiltà ta’ armonizzazzjoni internazzjonali.

Qegħdin isiru sforzi globali biex ikun jista’ jsir l-ikklerjar ċentrali ta’ derivati OTC standardizzati. Fl-Unjoni Ewropea dan se jsir permezz tar-regolament EMIR. Madankollu, tinħtieġ aktar riċerka dwar l-effetti tal-implimentazzjoni tiegħu qabel ma jkun jista’ jiddaħħal mal-istrumenti makroprudenzjali. Barra dan, ir-rekwiżit irid jiġi implimentat fl-Unjoni Ewropea kollha kemm hi biex ikun effettiv, jekk mhux ukoll globalment.

Komplementarjetà

Iż-żewġ miżuri msemmijin hawn fuq huma komplementari billi t-tnejn jistgħu jtaffu l-effetti sistemiċi tar-riskju tal-kontroparti fost tipi differenti ta’ tranżazzjonijiet. Filwaqt li r-restrizzjoni fuq l-iskoperturi kbar tnaqqas il-konċentrazzjoni tar-riskju f’kontroparti waħda jew settur wieħed, ir-rekwiżit tal-ikklerjar minn CCP inaqqas it-tixrid tal-inadempjenzi min-naħa tal-kontroparti billi jimmaniġġa r-riskju f’post wieħed fejn ikun jista’ jiġi kkontrollat. Restrizzjonijiet aktar ibsin fuq skoperturi kbar jistgħu jiffunzjonaw ukoll mar-rekwiżiti settorjali tal-kapital jew mal-limiti LTV u l-bafers strutturali biex tissaħħaħ l-istruttura finanzjarja. Fl-aħħar, l-ikklerjar ċentrali għandu jiġi supplimentat bir-rekwiżiti tal-margins u l-haircuts għas-CCP biex isiru reżistenti għar-riskju tal-kontroparti. Dawn għandhom jikkonformaw mar-rekwiżiti tat-tranżazzjonijiet li ma jiġux ikklerjati ċentralment.

4.   Limitazzjoni tal-impatt sistemiku ta’ inċentivi ħżiena biex jonqos il-periklu morali

Soprataxxa fuq il-kapital tas-SIFI

L-istituzzjonijiet finanzjarji sistemikament importanti (SIFI) jistgħu jkunu suġġetti għal rekwiżit ta’ bafer supplimentari tal-kapital. L-għan tas-soprataxxa huwa li jtejjeb il-kapaċità tas-SIFI biex jassorbu t-telf. Dan inaqqas il-probabbiltà ta’ ġrajjiet ta’ tensjoni u l-impatt li jista’ jkollhom. Il-bafer tal-kapital jista’ jiġi applikat għall-banek sistemikament importanti, iżda jista’ jiġi estiż għal istituzzjonijiet oħra li jkunu sistemikament importanti.

Il-bafer jista’ jikkoreġi wkoll sussidji potenzjali ta’ finanzjament lis-SIFI b’garanzija impliċita min-naħa tal-gvern. Hekk, jinżammu l-istess kundizzjonijiet għal banek żgħar u ta' daqs medju (mhux sistemiċi) u s-SIFI jkunu mgħammrin aħjar biex jifilħu għall-iskossi. Fuq in-naħa negattiva, is-soprataxxa tista’ tnaffar l-attivitajiet lejn is-settur bankarju parallel u l-istatus tas-SIFI jsir espliċitu, u b’hekk jiġi attivat is-sussidju impliċitu ta’ finanzjament u jkun hemm distorsjoni fil-kompetizzjoni. Kollox ma’ kollox, il-Grupp għall-Evalwazzjoni Makroekonomika (MAG) ikkonkluda li l-benefiċċji tal-istabbiltà finanzjarja marbuta mas-soprataxxa fuq is-SIFI huma akbar mill-ispiża ekonomika (li tidher bħala tnaqqis temporanju fil-PDG).

In-natura sistemika tal-banek (u ta’ istituzzjoniiet oħra) tiġi determinata billi jitqabblu l-indikaturi fil-kategoriji li ġejjin: daqs, interkonnettività, sostitwibbiltà u komplessità. Fil-każ tal-banek, huwa ppjanat li r-rekwiżiti jidħlu b’mod parallel mal-bafers għall-konservazzjoni tal-kapital u mal-bafers kontroċikliċi ta’ Basel III. Is-soprataxxi fuq il-kapital tas-SIFI huma mistennija jidħlu f’xi sura jew oħra fil-livell tal-Unjoni Ewropea bis-CRD IV li ġejja.

Reġimi ta’ rkupru u riżoluzzjoni

L-awtoritajiet regolatorji jeħtieġu strumenti biex jevitaw il-kriżijiet finanzjarji u jtaffu l-effetti tagħhom fil-każ li jinqalgħu. Il-prevenzjoni u l-mitigazzjoni jeħtieġu pjanijiet ta’ rkupru (li jsiru mill-banek) u pjanijiet ta’ riżoluzzjoni (li jsiru mill-awtoritajiet). Is-setgħat ta’ intervent bikri jippermettu lill-awtoritajiet jaġixxu biex jevitaw il-falliment ta’ bank jekk l-azzjonijiet ta’ rkupru li jieħu l-bank ma jkunux biżżejjed. Is-setgħat ta’ riżoluzzjoni jippermettulhom jieħdu l-kontroll ta’ bank li jkun sejjer ħażin jekk il-miżuri preventivi li jieħu l-bank jew l-awtoritajiet ifallu. Din is-sistema, kif proposta fl-abbozz tad-Direttiva dwar l-Irkupru u r-Riżoluzzjoni tal-Banek (BRRD) għandha l-għan li tnaqqas kemm jista’ jkun l-impatt sistemiku tal-problemi u l-falliment tal-banek billi tiżgura li l-banek ikomplu jiffunzjonaw, billi jiġi kkontrollat l-impatt tal-falliment u jitnaqqas it-telf għal dawk li jħallsu t-taxxi billi l-banek jiġu allokati lil partijiet interessati (e.g. permezz ta’ bail-in jew billi jitħallew lura fi proċedura tal-amministrazzjoni filwaqt li l-funzjonijiet kruċjali jiġu trasferiti lil “bank pont” (bridge bank) jew lil xerrej terza parti. Mill-perspettiva makroprudenzjali, il-BRRD tgħin biex jonqsu kemm jista’ jkun l-implikazzjonijiet ta’ konċentrazzjonijiet tal-iskoperturi, jitjieb l-għarfien tal-konnettività u jittaffa l-impatt tal-esternalitajiet tal-kriżi.

It-trażmissjoni tiffunzjona permezz ta’ żewġ mezzi ewlenin. L-ewwel, tillimita l-periklu morali f’banek sistemikament importanti u s-sussidju impliċitu li jistgħu jgawdu minnu billi tgħin biex jiġi żgurat li l-kredituri, iktar milli terzi partijiet bħall-gvernijiet nazzjonali, iġarrbu t-telf fil-każ tal-falliment ta’ bank. It-tieni, ir-riżoluzzjoni effettiva ttaffi l-impatt ta’ tixrid dirett jew indirett mill-falliment ta’ bank individwali (kontaġju). Tista’ wkoll issaħħaħ il-fiduċja tal-pubbliku fl-istituzzjonijiet finanzjarji. Wieħed jistenna li t-tneħħija tal-garanziji impliċiti min-naħa tal-Istat tikkawża żieda fl-ispejjeż ta’ finanzjament tal-bank u tnaqqis fl-ispejjeż ta’ finanzjament tal-Istat, bejn wieħed u ieħor bl-istess ammonti. Madankollu, l-ispejjeż ta’ finanzjament tal-bank ikunu ħafna ogħla jekk l-unika alternattiva għal salvataġġ (bail-out) min-naħa tal-gvern ikun proċess ta’ falliment diżordinat li jista’ jieħu fit-tul u jqum ħafna flus. Għalhekk, is-sistemi ġenerali għal riżoluzzjoni effettiva għandhom jgħinu biex jitjieb l-aċċess għall-kreditu min-naħa tal-ekonomija reali fi żmien bejn medju u twil.

It-trattament effikaċi tal-banek li jfallu jista’ jiddgħajjef minn nuqqas ta’ setgħat u strumenti ta’ riżoluzzjoni, kredibbiltà insuffiċjenti biex dawn jiġu applikati u finanzjament temporanju baxx wisq biex jipprovdi l-likwidità meħtieġa għas-sostenn tal-miżuri ta’ riżoluzzjoni. Dawn in-nuqqasijiet għandhom jitqiesu u jiġu evitati meta jiġu stabbiliti s-sistemi ta’ riżoluzzjoni.

Komplementarjetà

Is-soprataxxa fuq is-SIFI u s-sistemi ta’ riżoluzzjoni jikkomplementaw lil xulxin biex inaqqsu s-sussidji impliċiti ta’ salvataġġ, id-distorsjonijiet fil-kompetizzjoni u l-impatt sistemiku tal-inadempjenzi. Is-soprataxxa tista’ titqies bħala komplement ex ante għas-sistemi ex post ta’ riżoluzzjoni (22). Din is-soprataxxa għandha titqies bħala parti minn pakkett ta’ tariffi fuq il-kapital, fosthom il-bafer għall-konservazzjoni tal-kapital, il-bafer kontroċikliku u l-bafer strutturali.

5.   Tisħiħ tar-reżistenza tal-infrastrutturi finanzjarji

Skemi ta’ garanzija tad-depożiti

Fil-każ tal-falliment ta’ bank, skema ta’ garanzija tad-depożiti taġixxi bħala xibka ta’ sigurtà għal dawk li jkollhom kontijiet mal-bank billi tirrimborżahom sa ċertu ammont ta’ kopertura. Skema ta’ garanzija tad-depożiti għalhekk ittejjeb ir-reżistenza tal-infrastrutturi finanzjarji billi tgħin biex ma jsirux azzjonijiet kontra l-banek u ssaħħaħ il-fiduċja fis-sistema finanzjarja. Tissalvagwarda wkoll l-istabbiltà tas-sistemi ta’ pagament billi d-depożiti huma parti integrali minnhom.

Billi d-depożiti tal-banek huma garantiti, id-depożitanti ma jkollhomx inċentivi biex jiġbdu d-depożiti tagħhom fil-każ ta’ problemi fil-banek. Dan jevita l-azzjonijiet kontra l-banek u l-implikazzjonijiet sistemiċi li jmorru magħhom. Fi kliem ieħor, meta l-iskemi ta’ garanzija tad-depożiti jaġixxu bħal xibka ta’ sigurtà, ikunu qegħdin itejbu l-effiċjenza tas-sistema finanzjarja billi jsaħħu l-fiduċja fiha. L-effikaċja tal-iskemi ta’ garanzija tad-depożiti tiddependi mill-kredibbiltà tagħhom li hija marbuta ma’ arranġamenti adegwati ta’ finanzjament. Il-finanzjament ex ante tal-iskemi ta’ garanzija tad-depożiti, ibbażat fuq ir-riskju bankarju, huwa kontroċikliku u għalhekk jista’ jkollu effetti diretti fuq l-istabbiltà makroprudenzjali (23).

Meta l-kopertura tkun kbira ħafna, ma tkunx limitata jew ma tkunx definita tajjeb, jew meta l-finanzjament ma jkunx ibbażat fuq ir-riskju, jistgħu jinqalgħu effetti ta’ inċentivi negattivi. Id-depożitanti jistgħu ma jissorveljawx il-banek mill-qrib u dan iwassal għal periklu morali. Barra dan, skemi ta’ garanzija tad-depożiti li ma jkunux iffinanzjati jistgħu jitolbu pagamenti mingħand il-banek fi żmien ħażin, u dan iwassal għal effetti proċikliċi negattivi. Fl-aħħar, in-nuqqas ta’ koordinazzjoni transkonfinali jista’ jwassal għal kompetizzjoni mhux mixtieqa fost l-iskemi ta’ garanzija tad-depożiti. Għalhekk huwa importanti li l-Unjoni Ewropea tkompli bl-isforzi tagħha biex tarmonizza l-istruttura tal-iskemi ta’ garanzija tad-depożiti, anki fil-kuntest tal-abbozz ta’ riformulazzjoni tad-direttiva dwar l-iskemi ta’ garanzija tad-depożiti li qiegħed jiġi propost mill-Kummissjoni Ewropea. L-awtoritajiet makroprudenzjali għandhom isegwu mill-qrib u jieħdu sehem fit-tfassil u l-implimentazzjoni tal-iskemi ta’ garanzija tad-depożiti, b’mod partikolari fejn jidħlu l-kopertura u l-arranġamenti tal-finanzjament.

Rekwiżiti ta’ margins u haircuts dwar l-ikklerjar mis-CCP

Bħal fil-każ tan-negozju li jiġi kklerjat b’mod bilaterali, ir-rekwiżiti tal-margins u l-haircuts tan-negozju li jiġi kklerjat ċentralment jista’ jkollhom implikazzjonijiet sistemiċi. Meta jistabbilixxu haircuts u margins inizjali xierqa, is-CCP għandhom iqisu l-likwidità tas-swieq, l-effetti proċikliċi u r-riskji sistemiċi. B’mod partikolari, il-perjodu ta’ look-back (il-perjodu ta’ żmien użat fil-kalkolu tal-volatilità storika) għandu jiġi stabbilit b’mod li jevita l-proċikliċità eċċessiva. Dan jillimita t-tibdil fir-rekwiżiti tal-margins, li jġib miegħu taqlib, u jistabbilixxi proċeduri trasparenti u prevedibbli għall-aġġustament tar-rekwiżiti. Barra dan, CCP għandha tillimita d-dipendenza mill-klassifikazzjoni kummerċjali tal-kreditu meta tikkalkula l-margins u l-haircuts. Dawn iż-żewġ rekwiżiti jinqabdu fl-abbozz tal-istandards tekniċi li jsostnu l-EMIR.

Meta japplikaw dawn ir-rekwiżiti, is-CCP għandhom jibqgħu flessibbli u responsabbli u jsibu bilanċ bejn il-ħtieġa li jħarsu lilhom infushom u x-xewqa li jiggarantixxu l-istabbiltà sistemika. Billi s-sehem u l-importanza sistemika tas-CCP fis-sistema finanzjarja x’aktarx jiżdiedu fil-ġejjieni, ir-regolamentazzjoni xierqa tas-CCP se ssir aktar importanti, u dan huwa rikonoxxut għal skopijiet mikroprudenzjali fl-EMIR. Għalkemm l-EMIR s’issa mhijiex tipprovdi sehem għall-awtoritajiet makroprudenzjali meta jiġu stabbiliti r-rekwiżiti fuq l-ammont ta’ margins miżmuma mis-CCP, dan jista’ jerġa’ jiġi kkunsidrat fl-ewwel reviżjonijiet programmati.

Titjib fid-divulgazzjoni

Mad-divulgazzjoni għal raġunijiet mikroprudenzjali, l-awtoritajiet makroprudenzjali jistgħu jintroduċu rekwiżiti oħra ta’ divulgazzjoni minħabba r-riskju sistemiku strutturali jew ċikliku. It-trasparenza tippermetti li l-forzi tas-suq jaġixxu bħala mekkaniżmu ta’ dixxiplina għall-imġiba tal-istituzzjonijiet individwali u tippermetti li r-riskju jiġi pprezzat b’aktar preċiżjoni fi ħdan is-sistema finanzjarja. Id-divulgazzjoni għandha l-potenzjal ukoll li tillimita t-tifrix tat-tensjoni fis-sistema finanzjarja billi tnaqqas l-inċertezza dwar id-daqs u l-pożizzjoni ta’ ċerti skoperturi u tar-rabtiet fi ħdan is-sistemi.

Meta jiġi żvelat tagħrif aktar ċar, l-għarfien tar-riskju jista’ jitħeġġeġ u d-dixxiplina tas-suq tista’ titjieb. Dan isaħħaħ il-fiduċja fis-swieq u jissalvagwarda l-istabbiltà finanzjarja, biex hekk jiġu evitati fallimenti tas-swieq bħal dak tas-suq interbankarju wara l-kollass ta’ Lehman Brothers. Min-naħa l-oħra, ir-rekwiżiti tad-divulgazzjoni makroprudenzjali u mikroprudenzjali mhux dejjem ikunu konformi. Titjib aggregat fid-divulgazzjoni jista’, ngħidu aħna, jikxef banek batuti u dan iwassal għal fallimenti individwali mingħajr effetti sistemiċi. B’mod ġenerali, l-evidenza empirika disponibbli ssostni t-titjib fid-divulgazzjoni (24). Għal dik li hija l-implimentazjoni legali, l-abbozz tas-CRR jipprevedi l-possibbiltà ta’ titjib fir-rekwiżiti tad-divulgazzjoni fil-livell nazzjonali għal skopijiet makroprudenzjali permezz ta’ proċedura fil-livell tal-Unjoni Ewropea.

Bafer strutturali għar-riskju sistemiku

Is-CRD IV li ġejja hija mistennija tintroduċi bafer għar-riskju sistemiku biex jiġi evitat u jittaffa r-riskju strutturali (minn hawn ’il quddiem “il-bafer strutturali”) permezz ta’ proċedura fil-livell tal-Unjoni Ewropea. Il-bafer strutturali jista’ jintuża biex isaħħaħ ir-reżistenza tas-sistema bankarja, jew tas-subgruppi tagħha, għall-iskossi li jistgħu jiġu mir-riskju sistemiku strutturali. Dan ir-riskju jista’ jinħoloq minn tibdil fil-leġiżlazzjoni jew fl-istandards tal-kontabilità, minn tixrid ċikliku mill-ekonomija reali, minn sistema finanzjarja kbira għad-daqs tal-PDG jew mill-innovazzjoni finanzjarja li żżid il-komplessità.

Il-bafer strutturali jżid ir-reżistenza billi jżid il-kapaċità tal-assorbiment tat-telf. Jgħaddi r-riskju b’xejra ta’ tnaqqis fuq id-detenturi tal-ekwitajiet u jżid is-solvenza biex hekk inaqqas il-probabbiltà li jseħħ riskju strutturali. Fost l-effetti negattivi li jista’ jkollu bafer strutturali hemm it-telf tal-istess kundizzjonijiet fil-livell transkonfinali, tnaqqis fil-kapital volontarju tal-banek u l-għoti ta' tagħrif kunfidenzjali lis-sistema bankarja parallela. Madankollu, bafers strutturali kbar jillimitaw il-leverage u t-teħid ta’ riskji wkoll.

Huwa diffiċli tidentifika indikaturi għall-applikazzjoni tal-bafer strutturali. Id-dgħufijiet strutturali msemmija aktar ’il fuq jistgħu jservu ta’ gwida. Meta tiżdied l-esperjenza fl-applikazzjoni tal-bafer strutturali, għandha ssir analiżi tal-kapaċitajiet tiegħu biex jindirizza r-riskji strutturali.

Komplementarjetà

Billi l-miżuri msemmija aktar ’il fuq għandhom l-għan li jsaħħu r-reżistenza ġenerali tal-infrastruttura finanzjarja, huma jinteraġixxu ma’ bosta strumenti oħra. Hekk, l-iskemi ta’ garanzija tad-depożiti jistgħu jikkomplementaw l-istrumenti tal-likwidità billi jiggarantixxu bażi stabbli ta’ depożiti għall-finanzjament. Jistgħu jikkomplementaw ukoll il-bafer strutturali (u strumenti oħra bbażati fuq il-kapital) billi jnaqqsu l-impatt tal-fallimenti. Ir-rekwiżiti tal-margins u l-haircuts għas-CCP u għat-tranżazzjonijiet li ma jiġux ikklerjati ċentralment għandhom jiġu allinjati biex jiġu żgurati l-istess kundizzjonijiet. Barra dan, ir-rekwiżiti tal-margins u l-haircuts (kemm għas-CCP kif ukoll għal tranżazzjonijiet oħra) jistgħu jikkomplementaw il-proporzjonijiet tal-leverage billi jnaqqsu l-leverage eċċessiv. Billi d-divulgazzjoni tnaqqas l-asimmetriji tal-informazzjoni, tista’ ttejjeb il-fiduċja fis-swieq u żżid il-likwidità fis-suq.

L-effett tal-bafer strutturali jista’ jinteraġixxi mal-effetti ta’ strumenti oħra bbażati fuq il-kapital, bħall-bafers kontroċikliċi. Għalhekk tinħtieġ il-koordinazzjoni meta jittieħdu deċiżjonijiet dwar il-livell aggregat xieraq tar-rekwiżiti tal-kapital.

Żieda 2

L-għanijiet intermedji tal-politika makroprudenzjali fl-assigurazzjoni

Il-kunsiderazzjonijiet makroprudenzjali fil-qasam tal-assigurazzjoni għadhom fil-fażi tal-bidu. Hemm għadd ta’ raġunijiet għal dan:

—	Il-biċċa l-kbira tal-kumpaniji tal-assigurazzjoni ħarġu mill-kriżi relattivament mingħajr konsegwenzi;

—	Ir-riskju sistemiku baxx tal-attivitajiet tradizzjonali tal-assigurazzjoni, li huma kkaratterizzati minn strateġija ta’ investiment li hija predominantement misjuqa mill-obbligazzjonijiet, livell għoli ta’ sostitwibbiltà, u probabbiltà żgħira ta’ azzjonijiet negattivi;

—	In-nuqqas ta’ standard internazzjonali dwar is-superviżjoni tal-assigurazzjoni, għalkemm l-introduzzjoni tal-qafas Solvenza II għandha tistabbilixxi standard komuni għall-Unjoni Ewropea.

Madankollu, xi kumpaniji tal-assigurazzjoni wessgħu l-operazzjonijiet tagħhom għal attivitajiet li għandhom probabbiltà akbar li jikkontribwixxu għar-riskju sistemiku, jew li jamplifikawh. B’mod partikolari, l-attivitajiet mhux tradizzjonali tal-assigurazzjoni u l-attivitajiet mhux assigurattivi jistgħu jwasslu għal skoperturi komuni korelatati maċ-ċiklu finanzjarju jew tan-negozju. Dan huwa l-każ, ngħidu aħna, tat-tranżazzjonijiet swap ta’ inadempjenza tal-kreditu (CDS) mhux għal skopijiet ta’ hedging  (25).

L-attivitajiet mhux tradizzjonali tal-assigurazzjoni jista’ jkollhom implikazzjonijiet akbar għas-sistema finanzjarja u l-ekonomija, bħal fil-każ ta’ garanziji finanzjarji użati qabel il-kriżi biex itejbu l-klassifikazzjoni ta’ prodotti strutturati kumplessi. L-attivitajiet mhux assigurattivi (e.g. is-self ta’ titoli) u strutturi ta’ gruppi (e.g. il-“bancassurance”) jistgħu wkoll iżidu l-interkonnettività fis-sistema finanzjarja. Dawn it-tipi ta’ attivitajiet jitqiesu wkoll bħala li jkollhom rilevanza sistemika akbar min-naħa tal-Assoċjazzjoni Internazzjonali tas-Superviżuri tal-Assigurazzjoni (IAIS) li tużahom biex tidentifika assiguraturi globali sistemikament importanti.

L-impożizzjoni ta’ miżuri fuq attivitajiet assigurattivi mhux tradizzjonali u attivitajiet mhux assigurattivi kif definiti mill-IAIS hija diffiċli. Dan għaliex m’hemmx separazzjoni distinta u l-istess attivitajiet sikwit jiġu klassifikati b’mod differenti mis-superviżuri (e.g. il-ġestjoni tal-assi minn terzi partijiet). Għalhekk, tinħtieġ analiżi “substance over form” biex jiġi determinat ir-riskju ta’ prodott jew servizz speċifiku.

Barra l-kunsiderazzjonijiet strutturali msemmija hawn fuq, ir-riskju sistemiku fis-settur tal-assigurazzjoni għandu dimensjoni ċiklika, billi l-assiguraturi huma investituri importanti u jistgħu jidħlu għal assi x’aktarx ta’ riskju. Fl-Unjoni Ewropea, il-qafas Solvenza II introduċa l-valutazzjoni tal-karti tal-bilanċ tal-assiguraturi b’konsistenza mas-suq. Dan jinvolvi l-valutazzjoni tal-attiv skont is-suq, filwaqt li l-passiv jiġi valutat permezz ta’ skont fuq il-likwidità bl-użu ta’ rati tal-imgħax mingħajr riskju. Dan iwassal għal karti tal-bilanċ u livelli ta’ kapital varjabbli għall-assiguraturi li jbigħu prodotti għat-tul. Dan jista’ jħarrax l-iżviluppi proċikliċi fi ħdan is-settur u fis-sistema finanzjarja kollha. Fi żmien tajjeb, l-eżuberanza fil-prezzijiet tal-assi b’riskju tista’ testendi l-kapital b’konsistenza mas-suq, relattiv għar-rekwiżiti regolatorji tal-kapital, filwaqt li l-kapital jonqos fi żmien ħażin. Dan jista’ jiġġenera l-kapaċità għat-teħid eċċessiv ta’ riskji fi żmien tajjeb u pressjoni biex jitwarrbu assi b’riskju fi żmien ħażin. Għalhekk, Solvenza II bħalissa fiha mekkaniżmi kontroċikliċi, fosthom id-“dampener” tal-ekwitajiet għar-riskji tal-ekwitajiet, il-possibbiltà ta’ perjodu ta’ rkupru estiż u l-estrapolazzjoni tal-kurva tar-rati tal-imgħax mingħajr riskji għal rata fissa ultimate forward. Barra dan, għaddejjin diskussjonijiet dwar l-inklużjoni tal-“primjum kontroċikliku” u l-“aġġustamenti abbinati”, li t-tnejn għandhom l-għan li jikkoreġu l-livelli tal-kapital billi jqisu l-volatilità eċċessiva. Mingħajr tfassil b’attenzjoni, uħud minn dawn il-mekkaniżmi li qegħdin jiġu proposti jistgħu joħolqu konsegwenzi mhux mixtieqa kemm għall-assiguraturi kif ukoll għas-sistema kollha kemm hi. Huwa importanti li dawn il-mekkaniżmi jkunu trasparenti u jħeġġu, fi żmien tajjeb, l-akkumulazzjoni ta’ bafers li jistgħu jintużaw fi żmien ħażin.

Kollox ma’ kollox, wieħed jista’ jargumenta li d-dimensjoni strutturali tar-riskju sistemiku għandha x’taqsam l-aktar mal-attivitajiet mhux tradizzjonali u mhux assigurattivi. Dawn huma l-attivitajiet li x’aktarx jifirxu r-riskji fis-sistema finanzjarja u jistgħu jiġu inkwadrati fit-termini tal-għanijiet u l-istrumenti intermedji mfissra f'dan id-dokument. Minħabba li dawn l-attivitajiet jikkostitwixxu kriterji rilevanti għall-identifikazzjoni ta’ assiguraturi sistemikament importanti, huma jidħlu fl-għan intermedju li jillimita l-impatt sistemiku ta’ inċentivi ħżiena bil-ħsieb li jonqos il-periklu morali. Ta’ min jinnota li, madankollu, din is-sitwazzjoni seħħet anqas sikwit fil-każ tal-assiguraturi milli fil-każ tal-banek. Id-dimensjoni strutturali tintrabat ukoll mal-interkonnettività tal-assigurazzjoni u entitajiet oħra tas-settur finanzjarju kif ukoll mal-potenzjal ta' kontaġju mir-riskju li dan iġib miegħu. Dan jidħol fl-għan intermedju tal-limitazzjoni tal-konċentrazzjonijiet ta’ skoperturi diretti u indiretti. Fl-aħħar, id-dimensjoni ċiklika tintrabat mill-qrib mat-teħid endoġenu tar-riskji u mal-fire sales.

---

(1)  BERS/2011/3, http://www.esrb.europa.eu/pub/pdf/recommendations/2011/ESRB_2011_3.mt.pdf

(2)  Il-materjal huwa kbir wisq biex jinġabar hawn fil-qosor. Ara, pereżempju, Brunnermeier, M., Crockett, A., Goodhart, C., Persaud, A. u Shin, H. (2009), “The Fundamental Principles of Financial Regulation”, Geneva Report on the World Economy 11, ICBM, Ġinevra, u CEPR, Londra; Gorton, G. u He, P. (2008), “Bank Credit Cycles”, Review of Economic Studies 75(4), pp. 1181-1214, Blackwell Publishing; Bank of England (2009), “The Role of Macro-prudential Policy”, A Discussion Paper; Bank of England, (2011), “Instruments of macroprudential policy”, A Discussion Paper; Hellwig, M. (1995), “Systemic aspects of risk management in banking and finance”, Schweizerische Zeitschrift für Volkswirtschaft und Statistik, 131, pp. 723-737; Acharya, V.V. (2009), “A Theory of Systemic Risk and Design of Prudential Bank Regulation”, Journal of Financial Stability, 5(3), pp. 224-255; Hanson, S., Kashyap, A. u Stein, J. (2011), “A Macro-prudential Approach to Financial Regulation”, Journal of Economic Perspectives 25, pp. 3-28; Longworth, D. (2011), “A Survey of Macro-prudential Policy Issues”, Mimeo, Carleton University.

(3)  Id-dmir ta’ sorveljanza tal-banek ċentrali normalment jitqies element integrali tal-funzjoni tagħhom għall-garanzija tal-istabbiltà finanzjarja. Irrispettivament mill-arranġamenti istituzzjonali, l-awtorità makroprudenzjali għandha taħdem b’kooperazzjoni mill-qrib mal-awtorità inkarigata mis-sorveljanza tal-infrastruttura biex jintlaħaq dan l-għan intermedju.

(4)  L-istrumenti jintgħażlu minn “lista twila” tal-istrumenti potenzjali kollha abbażi ta’ analiżi tal-“gap” minn fuq għal isfel u ta’ stħarriġ fost membri tal-Grupp ta’ Ħidma tal-BERS dwar l-Istrumenti skont il-kriterji tal-għażla msemmija hawn fuq.

(5)  BERS, Principles for macro-prudential policies in EU legislation on the banking sector, 2 April 2012, http://www.esrb.europa.eu/news/pr/2012/html/pr120402.en.html

(6)  Xi strumenti li mhumiex inklużi f’Tabella 2 huma previsti fil-leġiżlazzjoni tal-UE (e.g. il-projbizzjoni fuq short-selling).

(7)  Inventarju tal-BERS dwar l-istrumenti li mhuwiex inkorporat fil-liġi tal-UE jindika li: il-limiti LTV huma disponibbli fil-qafas prudenzjali nazzjonali ta’ 16-il Stat Membru, iżda sebgħa biss minnhom jistgħu jużawhom għal skopijiet makroprudenzjali; il-limiti LTI jinsabu fil-qafas prudenzjali nazzjonali ta’ 12-il Stat Membru, iżda tnejn biss minnhom jistgħu jużawhom għal skopijiet makroprudenzjali; il-proporzjon mhux ippeżat tal-likwidità jinsab fil-qafas prudenzjali nazzjonali ta’ tliet Stati Membri u jista’ jintuża wkoll għal skopijiet makroprudenzjali; ir-reġimi/il-pjanijiet ta’ rkupru u riżoluzzjoni jinsabu fil-qafas prudenzjali nazzjonali ta’ 11-il Stat Membru, u tmienja minnhom jistgħu jużawhom għal skopijiet makroprudenzjali. F’sitt Stati Membri, ittieħdu xi passi biex jiġi implimentat reġim simili. F’erbgħa minn dawn il-pajjiżi, il-pjanijiet ta’ rkupru jew riżoluzzjoni huma mistennija jkunu disponibbli għal skopijiet makroprudenzjali.

(8)  Il-prinċipju ta’ “constrained discretion” jinvolvi gwida min-naħa tal-BERS, l-iffissar ta’ punt ta’ referenza ma’ varjant makroekonomiku, komunikazzjoni u trasparenza.

(9)  Ir-rekwiżiti settorjali tal-kapital ikopru kemm il-piżijiet tar-riskju kif ukoll il-kalibrazzjoni ta’ mudelli bbażati fuq klassifikazzjoni interna (Internal Ratings Based Models) għal setturi speċifiċi jew kategoriji ta’ assi.

(10)  Ara d-diskussjoni dwar il-mekkaniżmu ta’ trażmissjoni għal strumenti tal-kapital ippeżati b’riskju.

(11)  Il-maqlub għandu jgħodd meta jintreħew ir-rekwiżiti. Il-pressjonijiet tas-suq jistgħu, madankollu, jimplikaw li l-banek ma jkunux jistgħu jbaxxu l-proporzjon tagħhom tal-leverage (jew tal-kapital ippeżat b’riskju) bl-ammont sħiħ, u dan inaqqas mill-effikaċja tal-istrumenti fi żmien ħażin.

(12)  Ara BCBS (2010), “Calibrating regulatory minimum capital requirements and capital buffers: a top-down approach”. Barra dan, xi studji oħra sabu li l-leverage huwa indikatur b’saħħtu tar-riskju sistemiku – pereżempju Barrell, Davis u Liadze (2010), “Calibrating Macro-prudential Policy”; Kato, Kobayashi u Sita (2010), “Calibrating the level of capital: the way we see it”; Adrian u Shin (2010), “Liquidity and Leverage”; u Papanikolaou u Wolff (2010), “Leverage and risk in US commercial banking in the light of the current financial crisis”.

(13)  Almeida, H., Campello, M. u Liu, C. (2006), “The financial accelerator: evidence from international housing markets”, Review of Finance 10, pp. 1-32.

(14)  Madankollu, il-limiti LTV jistgħu jkunu suġġetti għas-suriet tagħhom ta’ ċirkonvenzjoni, billi jirrikorru għal self mhux kollateralizzat. Sakemm il-banek ikollhom id-diskrezzjoni biex jiġġudikaw il-valur tal-kollateral (e.g. meta parti mis-self jintuża biex titjieb il-kwalità tad-dar) jista’ jkollhom inċentiv biex jagħtu valutazzjonijiet ottimistiċi żżejjed sabiex itaffu l-impatt ta’ limitazzjoni fl-LTV.

(15)  L-evidenza dwar l-effikaċja tal-istrumenti makroprudenzjali bbażati fuq il-likwidità hija rari. Xi studji juru li l-applikazzjoni kontroċiklika tal-LCR jew l-NSFR hija ta’ benefiċċju biex tindirizza t-tensjoni fil-likwidità. Ara, pereżempju, Giordana u Schumacher, “The impact of the Basel III liquidity regulations on the bank lending channel: A Luxembourg case study”, Working Paper No. 61, Ġunju 2011; Bloor, Craigie u Munro, “The macroeconomic effects of a stable funding requirement”, Reserve Bank of New Zealand Discussion Paper Series DP 2012/05, Awwissu 2012; jew Van den End u Kruidhof, “Modelling the liquidity ratio as a macro-prudential instrument”, DNB Working Paper No 342, April 2012.

(16)  Ara l-Grupp ta’ Ħidma CGFS dwar Selection and Application of Macro-prudential instruments (SAM), “Transmission Mechanisms of Macro-prudential Instruments”, rapport interim ta’ Workstream 4, Marzu 2012.

(17)  Heijmans u Heuver, “Is this bank ill? The diagnosis of doctor Target 2”, DNB Working Paper No. 316, Awwissu 2011.

(18)  Ara, e.g. Brunnermeier, M. u Pedersen, L. (2009), “Market Liquidity and Funding Liquidity,”Review of Financial Studies, Society for Financial Studies, vol. 22(6), pp. 2201-2238, u Gorton, G. u Metrick, A. (2012), “Securitized banking and the run on repo,”Journal of Financial Economics, Elsevier, vol. 104(3), pp. 425-451.

(19)  L-evidenza empirika speċifika hija rari, iżda l-esperjenza storika turi li l-konċentrazzjoni f’ċerti setturi (sikwit il-proprjetà) tinsab fl-epiċentru tan-nuqqas ta’ stabbiltà finanzjarja.

(20)  Ta’ min jinnota li l-iskoperturi għad-dejn sovran bħalissa huma eżentati mir-restrizzjonijiet fuq skoperturi kbar.

(21)  Għal aktar diskussjoni dwar dawn l-effetti negattivi ara, pereżempju, Pirrong, C, (2011), “The economics of central clearing: theory and practice”, International Swaps and Derivatives Association Discussion Paper No 1 u Singh, M., (2011), “Making OTC Derivatives Safe — A Fresh Look”, IMF Working Paper 11/66.

(22)  Ara, pereżempju, Claessens, Herring u Schoenmaker, 2010, “A Safer World Financial System: Improving the Resolution of Systemic Institutions”, Geneva Reports on the World Economy (Londra, Renju Unit: CEPR), u Claessens et al, “Crisis Management and Resolution: Early Lessons from the Financial Crisis”, IMF Staff Discussion Note 11/05, 9 ta’ Marzu 2011.

(23)  Ara, pereżempju, Acharya, Santos u Yorulmazer: “Systemic Risk and Deposit Insurance Premiums”, FRBNY Economic Policy Review, Awwissu 2010.

(24)  Hirtle, B., 2007, “Public disclosure, risk, and performance at bank holding companies”, Staff Report no. 293, Federal Reserve Bank of New York; Goldstein, M. A., Hotchkiss, E. S., Sirri, E. R., 2007, “Transparency and liquidity: A controlled experiment on corporate bonds”, The Review of Financial Studies 20(2), 235-273; Botosan, C. A., 1997, “Disclosure Level and the Cost of Equity Capital”, The Accounting Review, Vol. 72, No 3, pp. 323-349.

(25)  Assoċjazzjoni Internazzjonali tas-Superviżuri tal-Assigurazzjoni (IAIS), 2011, “Insurance and Financial Stability”.

ANNESS I

Id-Deċiżjoni tal-Kunsill 2009/470/KE tal-25 ta’ Mejju 2009 dwar in-nefqa fil-kamp veterinarju, u b’mod partikolari l-Artikoli 16, 19, 20, 21, 23 u 27 tagħha – Programm ta' Ħidma għall-2013

I.1.   DAĦLA

Dan il-programm fih 7 suġġetti ewlenin għas-sena 2013. Abbażi tal-għanijiet mogħtija fid-Deċiżjoni 2009/470/KE tal-25 ta Mejju 2009 id-distribuzzjoni tal-baġit u l-azzjonijiet ewlenin huma dawn li ġejjin:

(a)

għall-għotjiet implimentati b'ġestjoni konġunta (il-punt I.2): (i) sa massimu ta' EUR 540 000 lill-OIE (il-punt I.2.1) għall-organizzazzjoni ta': — konferenza dinjija dwar il-bijosigurtà; — seminars reġjonali dwar l-organiżmi slavaġ, in-notifika tal-mard tal-annimali u s-sigurtà tal-prodotti ġejjin mill-annimali u — laqgħat/konferenzi reġjonali dwar it-trattament xieraq tal-annimali, dwar id-direzzjoni tal-kontroll progressiv tal-marda tal-ilsien u d-dwiefer u dwar il-kumitat konġunt permanenti tan-netwerk Mediterranju dwar is-saħħa tal-annimali, u dwar is-saħħa tal-annimali akwatiċi; (ii) sa massimu ta' EUR 4 000 000 lill-FAO (il-punt I.2.2) għal għajnuna lill-kampanja kontra l-marda tal-ilsien u d-dwiefer barra mill-Unjoni;

(b)

għal akkwisti (implimentati f’amministrazzjoni ċentralizzata diretta) (il-punt I.3): (i) L-użu ta' sejħa għall-offerti fuq kontribuzzjoni li tippermetti l-aċċess għall-bażi tad-dejta tal-leġiżlazzjoni veterinarja għall-amministraturi fl-Istati Membri: EUR 150 000 (point I.3.1); (ii) Kontribuzzjoni lejn il-komunikazzjoni orizzontali marbuta mal-attivitajiet li għandhom x'jaqsmu mas-saħħa tal-annimali: EUR 112 700 (il-punt I.3.2); (iii) Avvenimenti ta' appoġġ għall-politika kurrenti dwar it-trattament xieraq tal-annimali u l-manutenzjoni tal-għodod ta' komunikazzjoni eżistenti EUR 782 000 (il-punt I.3.3); (iv) Pubblikazzjonijiet u tixrid ta’ tagħrif biex jippromwovu kwistjonijiet tas-saħħa tal-annimali u l-prinċipji tal-Istrateġija dwar is-Saħħa tal-Annimali EUR 1 030 000 (il-punt I.3.4); (v) Prevalutazzjoni esterna tal-programmi għall-eradikazzjoni/għas-sorveljanza tal-2013: EUR 150 000 (il-punt I.3.5).

I.2.   L-AZZJONI TAĦT AMMINISTRAZZJONI KONĠUNTA

I.2.1.   L-ORGANIZZAZZJONI DINJIJA GĦAS-SAĦĦA TAL-ANNIMALI (OIE)

Konferenza dinjija dwar il-bijosigurtà, seminars reġjonali għall Punti fil-Mira tal-Ewropa għall-organiżmi slavaġ, tal-OIE għan-notifika tal-mard tal-annimali u għas-sigurtà fl-ikel prodott mill-annimali; laqgħat reġjonali tal-Grupp ta' Tmexxija tal-Pjattaforma tat-Trattament Xieraq tal-Annimali għall-Ewropa; konferenza reġjonali dwar l-implimentazzjoni tad-direzzjoni tal-kontroll progressiv tal-FMD fl-Asja Ċentrali; laqgħat reġjonali tal-Kumitat Konġunt Permanenti tan-Netwerk Mediterranju dwar is-Saħħa tal-Annimali (REMESA); aġġustament tal-istrument tal-klassifikazzjoni u tal-prijoritizzazzjoni fl-istudju tal-OIE u l-elenkar u l-klassifika tal-mard tal-annimali prijoritarju, inkluż dak li jista' jittieħed mill-bniedem, biex dan jista' jintuża wkoll għall-mard tal-annimali akwatiċi.

IL-BAŻI LEGALI

L-Artikolu 23 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Ftehim ta' kontribuzzjoni waħda għall-2013-2014

ENTITÀ TA' IMPLIMENTAZZJONI

L-Organizzazzjoni Dinjija għas-Saħħa tal-Annimali (OIE) hija organizzazzjoni intergovernattiva responsabbli għat-titjib tas-saħħa tal-annimali madwar id-dinja. L-OIE tippubblika l-istandards tas-saħħa tal-annimali għall-kummerċ internazzjonali fl-annimali ħajjin u l-prodotti tagħhom li huma rikonoxxuti mill-Organizzazzjoni Dinjija tal-Kummerċ bħala r-regoli sanitarji internazzjonali ta' referenza.

Biex:

—	tittejjeb is-saħħa tal-annimali mad-dinja kollha u għaldaqstant jitnaqqas ir-riskju ta' mard tal-annimali fl-UE,

—	jiġu promossi l-politika u l-istandards tal-Unjoni dwar is-saħħa u t-trattament xieraq tal-annimali u

—	b'dan il-mod ikunu ffaċilitati l-esportazzjonijiet tal-UE,

jeħtieġ li l-approċċ tal-UE lejn is-saħħa u t-trattament xieraq tal-annimali jkun imqassam mal-pajjiżi kollha li huma membri tal-OIE u li l-UE tappoġġa b'mod attiv il-konferenzi u s-seminars ta' taħriġ organizzati mill-OIE.

Fis-7 ta' Ġunju 2010 l-Kummissjoni u l-OIE ffirmaw Ftehim Qafas li jistipula l-arranġamenti amministrattivi u finanzjarji għall-kooperazzjoni tagħhom (mehmuża hawnhekk), fejn il-“Ftehim ta' Kontribuzzjoni tal-Unjoni Ewropea mal-Organizzazzjoni Internazzjonali” (il-“Ftehim ta' Kontribuzzjoni Standard” jew “SCA”) japplika għall-programmi globali, reġjonali jew nazzjonali u l-azzjonijiet amministrati mill-OIE u ffinanzjati jew ikkofinanzjati mill-Unjoni Ewropea.

Kienet diġà saret valutazzjoni bir-reqqa u sħiħa tal-OIE permezz ta' “valutazzjoni b’erba' pilastri” li stabbilixxiet li fil-proċeduri ta' kontabilità, ta’ verifika, tal-kontroll u tal-akkwisti tagħha, l-OIE applikat standards li joffru garanziji ekwivalenti għall-istandards aċċettati internazzjonalment.

L-GĦANIJIET LI JRIDU JIĠU SODISFATTI U R-RIŻULTATI PREVISTI

Li l-approċċ tal-UE lejn is-saħħa u t-trattament xieraq tal-annimali jkun ikkomunikat mal-membri kollha tal-OIE permezz tal-promozzjoni tal-politika tas-saħħa u t-trattament xieraq tal-annimali tal-Unjoni fl-okkażjoni tal-konferenzi u s-seminars ta' taħriġ organizzati mill-OIE. Li eventwalment jittejbu l-istatus tas-saħħa, tat-trattament xieraq u tas-saħħa pubblika veterinarja madwar id-dinja kollha, jitnaqqas ir-riskju fl-UE u jiġu ffaċilitati l-esportazzjonijiet tal-UE.

Li jintemm l-istudju dwar l-Elenkar u l-Klassifikazzjoni tal-Mard tal-Annimali Prijoritarju, inkluż dak li jittieħed mill-bniedem u li jiġi aġġustat l-istrument għall-klassifikazzjoni u l-prijoritazzjoni tal-mard żviluppat f'dak il-qafas, biex jintuża wkoll għall-mard tal-annimali akwatiċi. Huwa meħtieġ li ssir din it-temma biex jiġi elenkat il-mard skont il-Liġi ġdida tal-UE dwar is-Saħħa tal-Annimali. Dan iwassal għal prijoritazzjoni aħjar tal-azzjonijiet tal-UE u użu aħjar tar-riżorsi.

DESKRIZZJONI U GĦANIJIET TAL-MIŻURA TA’ IMPLIMENTAZZJONI

Ħarsa ġenerali lejn l-azzjonijiet differenti li jridu jiġu ffinanzjati taħt dan il-punt jinstabu fit-tabella ta' hawn taħt.

L-IMPLIMENTAZZJONI

Ġestjoni konġunta

IL PERJODU TA’ ŻMIEN INDIKATTIV GĦALL-KONKLUŻJONI TAL-FTEHIM TA' KONTRIBUZZJONI

It-tielet kwart tal-2013.

L-AMMONT MASSIMU U R-RATA MASSIMA TAL-KONTRIBUZZJONI

EUR 540 000.

Taqsira tal-attivitajiet li jridu jiġu organizzati mill-OIE fl-2013-2014:

—	konferenza dinjija waħda dwar il-bijosigurtà (EUR 100 000),

—	sitt konferenzi/seminars reġjonali (EUR 360 000) u

—	studju wieħed dwar il-klassifikazzjoni tal-mard (EUR 80 000).

I.2.2.   KONTRIBUZZJONI FINANZJARJA GĦALL-FOND FIDUĊJARJU TAL-ĠLIEDA KONTRA L-MARDA TAL-ILSIEN U D-DWIEFER TAL-UE (EuFMD) 911100MTF/INT/003/KEE MIŻMUM MILL-ORGANIZZAZZJONI TAL-IKEL U L-AGRIKOLTURA (FAO)

L-għan huwa l-għajnuna tal-kampanja kontra l-marda tal-ilsien u d-dwiefer (FMD) barra mill-Unjoni. Għalhekk l-EuFMD stabbilixxa pjan strateġiku għall-2013-2017 li fih erba' pilastri.

L-ewwel pilastru għandu l-għan li tittejjeb it-tlestija għat-tmexxija ta' kriżijiet marbutin mal-marda tal-ilsien u d-dwiefer permezz ta' taħriġ fil-ħin reali, appoġġ għall-ippjanar ta' kontinġenza, l-iżvilupp ta' għodda għas-sostenn tad-deċiżjonijiet għal min imexxi l-kontroll tal-marda u programm għall-iżvilupp ta' sistema ta' twissija bikrija u ta' tmexxija tal-marda fir-reġjun tal-Balkani.

It-tieni pilastru għandu l-mira li jitnaqqas ir-riskju għall-pajjiżi membri minħabba s-sitwazzjoni tal-marda tal-ilsien u d-dwiefer fil-viċinat Ewropew permezz tal-kontroll progressiv tal-marda tal-ilsien u d-dwiefer fir-reġjuni tal-viċinat, primarjament iż-żoni mal-fruntiera tat-Turkija u tal-Iżrael, iżda wkoll il-pajjiżi fit-Tramuntana tal-Afrika.

It-tielet pilastru għandu l-għan li jippromwovi l-istrateġija dinjija tal-kontroll progressiv tal-marda tal-ilsien u d-dwiefer permezz ta' appoġġ espert għall-attivitajiet miftehmin tal-FAO u tal-OIE.

Ir-raba' pilastru jinkludi mekkaniżmu għar-rispons għall-emerġenza ta' kriżi tal-marda tal-ilsien u d-dwiefer fil-viċinat tal-Ewropa, li jista jinkludi l-provvista ta' vaċċini ta' emerġenza lil reġjuni li jkunu ta' riskju għal pajjiżi membri.

IL-BAŻI LEGALI

L-Artikolu 16 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TAL-KONTRIBUZZJONI

Ftehim ta' kontribuzzjoni waħda għall-2013-2015 li tiġi implimentata kif jidher hawn taħt:

(1)	Il-bilanċ tal-Fond Fiduċjarju 911100MTF/INT/003/KEE kif ikun fil-31 ta' Awwissu 2013.

(2)	Il-kontribuzzjoni finanzjarja mill-Komunità għall-Fond Fiduċjarju għandha tiġi stabbilita għal massimu ta' EUR 4 000 000 għal perjodu ta' 24 xahar mill-1 ta' Settembru 2013.

(3)	L-ewwel pagament tal-ammont imsemmi fil-paragrafu 2 għas-sena 2013 għandu jkun magħmul: (a) mill-bilanċ imsemmi fil-paragrafu 1, (b) minn kontribuzzjoni tal-Unjoni tal-ammont meħtieġ biex l-ammont totali tal-Fond Fiduċjarju jilħaq l-ekwivalenti ta' EUR 2 000 000 f'USD.

(4)

L-infiq mill-Fond Fiduċjarju bejn l-1 ta' Settembru 2013 u l-31 ta' Awwissu 2015 għandu jintradd lura fil-Fond permezz ta' kontribuzzjonijiet annwali tal-Unjoni li jkunu pagabbli fl-2014 u l-2015 rispettivament. Madankollu, il-ħlas ta' dawn il-kontribuzzjonijiet għandhom ikunu soġġetti għall-eżistenza ta' fondi disponibbli fil-baġit tal-Unjoni.

(5)

Il-kontribuzzjonijiet annwali tal-Unjoni msemmija fil-paragrafu 4 għandhom ikunu msejsa fuq ir-rapport finanzjarju ppreżentat mill-Kummissjoni Ewropea għall-Kontroll tal-Marda tal-Ilsien u d-Dwiefer (EuFMD) jew lis-Sessjoni Annwali tal-Kumitat Eżekuttiv jew inkella lis-Sessjoni Ġenerali Biennali tal-EuFMD, appoġġati b'dokumentazzjoni ddettaljata skont ir-regoli tal-Organizzazzjoni tal-Ikel u l-Agrikoltura (FAO) u l-Ftehim dwar il-Qafas Finanzjarju u Amministrattiv għall-finanzjament mill-Unjoni ta' attivitajiet tal-FAO.

(6)	Għandu jiġi konkluż ftehim ta' Implimentazzjoni dwar l-użu u t-tħaddim tal-Fond Fiduċjarju bejn il-Kummissjoni u l-FAO għall-perjodu ta' 24 xahar, li jibda mill-1 ta' Settembru 2013.

(7)	Il-Fond Fiduċjarju għandu jitħaddem b'mod konġunt mill-Kummissjoni u mill-EuFMD skont il-Ftehim ta' Implimentazzjoni msemmi fil-paragrafu 6.

L-AMMONT MASSIMU U R-RATA MASSIMA TAL-KONTRIBUZZJONI

EUR 4 000 000.

I.3.   L-AKKWIST

L-ammont baġitarju globali riżervat għall-kuntratti tal-akkwist fl-2013 jammonta għal EUR 2 224 700.

I.3.1.   ID-DISPONIBBILTÀ TAL-LEĠIŻLAZZJONI VETERINARJA F'BAŻI TAD-DEJTA INTERATTIVA GĦALL-AMMINISTRAZZJONIJIET TAL-ISTATI MEMBRI

IL-BAŻI LEGALI

L-Artikolu 20 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Kuntratt ta’ servizz wieħed.

IS-SUĠĠETT TAL-KUNTRATTI PREVISTI (FEJN POSSIBBLI)

Il-leġiżlazzjoni veterinarja fiha ħafna elementi li għalihom ikun utli li din il-leġiżlazzjoni tkun disponibbli b'mod interattiv għall-amministraturi tal-Istati Membri. Il-bażi tad-dejta għandha tinżamm aġġornata billi tiġi aġġornata fi żmien 24 siegħa mill-publikazzjoni ta' leġiżlazzjoni ġdida u għandu jkun fiha l-verżjonijiet ikkonsolidati tal-leġiżlazzjoni kkonċernata. Għandu jkun fiha wkoll sommarji ġenerali faċli għall-użu ta' dejta relatata, li jkunu importanti għax-xogħol ta' kuljum tal-awtoritajiet veterinarji tal-Istati Membri.

Il-kontribuzzjoni prevista se tippermetti li l-leġiżlazzjoni veterinarja u d-dejta relatata tkun disponibbli għall-amministraturi fl-Istati membri b'mod interattiv u aċċessibbli faċilment għas-snin 2014 u 2015.

L-IMPLIMENTAZZJONI

Ċentralizzata diretta

IL PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

It-tielet kwart tal-2013.

AMMONT INDIKATTIV TAS-SEJĦA GĦALL-OFFERTI

EUR 150 000

I.3.2.   KONTRIBUZZJONI ORIZZONTALI LEJN IL-KOMUNIKAZZJONI MARBUTA MAL-ATTIVITAJIET LI GĦANDHOM X'JAQSMU MAS-SAĦĦA TAL-ANNIMALI:

IL-BAŻI LEGALI

L-Artikolu 20 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Madwar 10 kuntratti speċifiċi li jużaw bosta kuntratti qafas.

IS-SUĠĠETT TAL-KUNTRATTI PREVISTI (FEJN POSSIBBLI)

Kontribuzzjoni orizzontali lejn il-komunikazzjoni marbuta mal-attivitajiet li għandhom x'jaqsmu mas-saħħa tal-annimali:

L-IMPLIMENTAZZJONI

Ċentralizzata diretta

IL PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

Tul l-2013.

AMMONT INDIKATTIV TAS-SEJĦA GĦALL-OFFERTI

EUR 112 700

I.3.3.   AVVENIMENTI TA' APPOĠĠ GĦALL-POLITIKA KURRENTI DWAR IT-TRATTAMENT XIERAQ TAL-ANNIMALI U L-MANUTENZJONI TAL-GĦODOD TA' KOMUNIKAZZJONI EŻISTENTI

IL-BAŻI LEGALI

L-Artikoli 20 u 23 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Madwar sitt kuntratti speċifiċi li jużaw bosta kuntratti qafas.

IS-SUĠĠETT TAL-KUNTRATTI PREVISTI (FEJN POSSIBBLI)

(a)	Il-produzzjoni ta' pubblikazzjonijiet miktubin dwar it-trattament xieraq tal-annimali (EUR 30 000)

(b)	Attivitajiet li jappoġġaw l-edukazzjoni tat-tfal dwar it-trattament xieraq tal-annimali (EUR 162 000)

(c)	L-organizzazzjoni ta' żewġ workshops reġjonali għat-tobba veterinarji (EUR 120 000)

(d)	Studju għall-preparazzjoni ta' rapport dwar l-impatt ta' attivitajiet marbuta mat-trattament xieraq tal-annimali fuq il-kompetittività tal-bdiewa Ewropej li jrabbu l-bhejjem f'dinja globalizzata (EUR 100 000)

(e)	Studju dwar it-trattament xieraq tal-klieb u l-qtates (li jinkludi workshop dwar il-kummerċ tagħhom) (EUR 200 000)

(f)	L-organizzazzjoni ta' taħriġ dwar il-ġbir tad-dejta dwar il-brojlers (EUR 170 000).

L-IMPLIMENTAZZJONI

Ċentralizzata diretta

IL PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

Mit-tieni kwart lejn it-tielet kwart tal-2013.

AMMONT INDIKATTIV TAS-SEJĦA GĦALL-OFFERTI

EUR 782 000

I.3.4.   PUBBLIKAZZJONIJIET U TIXRID TA’ TAGĦRIF BIEX JIPPROMWOVU KWISTJONIJIET TAS-SAĦĦA TAL-ANNIMALI U L-PRINĊIPJI TAL-ISTRATEĠIJA TAS-SAĦĦA TAL-ANNIMALI

IL-BAŻI LEGALI

L-Artikolu 20 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Il-konklużjoni ta' mill-inqas 10 kuntratti ta' servizz speċifiċi permezz ta' kuntratt qafas.

IS-SUĠĠETT TAL-KUNTRATTI PREVISTI (FEJN POSSIBBLI)

(a)	konferenza veterinarja fi Brussell fl-2013 dwar il-Liġi l-Ġdida dwar is-Saħħa tal-Annimali biex tippromwovi qafas leġiżlattiv modern, flessibbli u ssimplifikat (EUR 100 000)

(b)	seminar għall-istudenti veterinarji fid-dawl tar-rinfurzar tal-messaġġ mir-razzett għall-furketta (EUR 75 000)

(c)

il-parteċipazzjoni f'avvenimenti internazzjonali biex jiġi promoss l-approċċ integrat għas-sikurezza fl-ikel “mir-razzett għall-furketta” permezz ta' żewġ fieri ewlenin (EUR 300 000) u tliet fieri iżgħar (EUR 300 000). Il-mira tal-parteċipazzjoni f'dawn il-fieri hija li jintlaħqu madwar żewġ miljun ċittadini, bl-għan li dawn isiru jafu bil-valur miżjud u l-benefiċċji għall-ħajja ta' kuljum tal-politika tagħna.

(d)	l-appoġġ għal għadd ta' attivitajiet ta' komunikazzjoni marbutin mas-sistema komputerizzata veterinarja integrata, it-Trade Control and Expert System (TRACES) li jinkludu websajt, rapport annwali, fuljett u avveniment għall-midja (EUR 55 000)

(e)

il-produzzjoni ta' pubblikazzjoni u ta' materjal promozzjonali dwar is-saħħa tal-annimali (EUR 200 000). Dawn se jservu biex jirrinfurzaw il-messaġġi tagħna dwar il-benefiċċji tas-saħħa tal-annimali għaċ-ċittadini (billi huma marbutin mas-sikurezza fl-ikel, mas-saħħa tal-bniedem u mal-ekonomija), u biex isostnu l-attivitajiet li jippromwovu dawn il-messaġġi f'livell lokali.

L-IMPLIMENTAZZJONI

Ċentralizzata diretta

IL PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

Tul l-2013.

AMMONT INDIKATTIV TAS-SEJĦA GĦALL-OFFERTI

EUR 1 030 000

I.3.5.   VALUTAZZJONI ESTERNA MINN QABEL TAL-PROGRAMMI TA' ERADIKAZZJONI/TA' SORVELJANZA TAL-2014

IL-BAŻI LEGALI

L-Artikolu 27 tad-Deċiżjoni 2009/470/KE

IL-LINJA BAĠITARJA

17 04 02 01

IN-NUMRU INDIKATTIV U T-TIP TA’ KUNTRATTI PREVISTI

Il-konklużjoni ta' mill-inqas 30 kuntratt ma' esperti esterni li se jintgħażlu permezz ta' sejħa għall-espressjoni ta' interess (Appel à Manifestation d'Intérêt – A. M. I.).

IS-SUĠĠETT TAL-KUNTRATTI PREVISTI (FEJN POSSIBBLI)

Skont l-Artikolu 27 tad-Deċiżjoni 2009/470/KE, il-Kummissjoni se tivvaluta l-programmi li tressqu għall-2014. Jistgħu jitressqu programmi għal 11-il marda. L-għan hu li jkun hemm prevalutazzjoni ta' dawn il-programmi minn żewġ assistenti tekniċi għal kull marda.

L-IMPLIMENTAZZJONI

Ċentralizzata diretta

IL PERJODU TA’ ŻMIEN INDIKATTIV GĦAT-TNEDIJA TAL-PROĊEDURA

Ġunju-Lulju 2013

AMMONT INDIKATTIV TAL-AZZJONI

EUR 150 000

ANNESS II

Il-programm ta’ ħidma għall-2013

Il-leġiżlazzjoni dwar il-pestiċidi

II.1.   DAĦLA

Dan il-programm jinkludi tmien miżuri ta’ implimentazzjoni għas-sena 2013.

II.2.   L-AKKWIST

STUDJU DWAR IL-PESTIĊIDI ILLEGALI U FOLOZ LI JIPPROVDI EVALWAZZJONI ĠENERALI TAL-ATTIVITAJIET TA' KONTROLL MILL-AWTORITAJIET TAL-ISTATI MEMBRI, U INFORMAZZJONI DWAR IL-KUMMERĊ TA' PESTIĊIDI ILLEGALI U FFALSIFIKATI

IL-BAŻI LEGALI

L-Artikolu 76(1) tar-Regolament (KE) Nru 1107/2009

IL-LINJA BAĠITARJA

17 04 04 01

IN-NUMRU INDIKATTIV U T-TIP TA’ KUNTRATTI PREVISTI

Kuntratt wieħed.

IS-SUĠĠETT TAL-KUNTRATTI PREVISTI (FEJN POSSIBBLI)

—	li ssir evalwazzjoni tal-miżuri ta' kontroll eżistenti fuq il-prodotti għall-protezzjoni tal-pjanti u fuq sustanzi attivi u sustanzi oħra li jkun fihom il-prodotti għall-protezzjoni tal-pjanti, li qed jitwettqu mill-awtoritajiet tal-Istati Membri;

—	li tinġabar l-informazzjoni dwar il-kummerċ ta' pestiċidi foloz u illegali, u

—	li ssir valutazzjoni dwar l-effikaċja tal-qafas regolatorju u tal-miżuri u jingħataw suġġerimenti biex dan jittejjeb jew biex jitwettqu l-aħjar prattiki.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

It-tielet kwart tal-2013.

AMMONT INDIKATTIV TAS-SEJĦA GĦALL-OFFERTI

EUR 100 000

ANNESS III

Il-programm ta’ ħidma għall-2013

Ir-Regolament (KE) Nru 882/2004

III.1.   DAĦLA

Dan il-programm jinkludi tliet miżuri ta’ implimentazzjoni għas-sena 2013. Abbażi tal-Artikolu 66(1)(c) tar-Regolament (KE) Nru 882/2004 dwar is-sostenn finanzjarju, mill-Unjoni, tal-miżuri meħtieġa biex tkun żgurata l-applikazzjoni tar-Regolament, it-tqassim tal-baġit u l-azzjonijiet ewlenin huma kif ġej:

Għall-akkwist:

—	Verifika tal-validità tal-metodu ta' detezzjoni CEN, En 1785:2003 għall-ikel ittrattat b'jonizzant: EUR 60 000 (il-punt III.2.1);

—	studju ekonomiku dwar ir-reżistenza kontra l-mikrobi, li għandu jiġi żviluppat mill-OECD: EUR 50 000 (il-punt III.2.2);

—	kontribuzzjoni orizzontali lejn il-komunikazzjoni marbuta mal-kontroll fuq l-ikel u l-għalf, b'mod partikolari għall-aġġornament tal-partijiet rilevanti tal-websajts, u għat-tfassil u l-ħolqien ta' materjal awdjoviżiv u stampat: EUR 203 582 (il-punt III.2.3);

—	komunikazzjoni dwar l-ispezzjonijiet tal-Uffiċċju Alimentari u Veterinarju (FVO): EUR 150 000 (il-punt III.2.4);

—	valutazzjoni tal-impatti dwar il-ħtieġa li jsiru dispożizzjonijiet tal-UE dwar skemi volontarji ta' tikkettar li juri prodotti li ma jkollhomx OĠM: EUR 100 000 (il-punt III.2.5);

—	żvilupp ta' metodoloġija komuni għall-ġbir mill-Istati Membri ta' informazzjoni dwar il-konsum u l-użu ta' addittivi tal-ikel u tal-aromatizzanti fl-Unjoni Ewropea: EUR 150 000 (il-punt III.2.6);

—	valutazzjoni esterna minn qabel tal-programmi ppreżentati mil-laboratorji ta' referenza tal-UE: EUR 75 000 (il-punt III.2.7);

—	studju biex tinġabar id-dejta eżistenti u dejta ġdida biex jiġi vvalutat l-impatt fuq is-suq intern kif ukoll fuq l-għalf, fuq il-bhejjem u fuq l-operaturi meta jiġi implimentat ir-Regolament tal-Kummissjoni (UE) Nru 619/2011: EUR 100 000 (il-punt III.2.8).

III.2.   L-AKKWIST

L-ammont baġitarju globali riżervat għall-kuntratti tal-akkwisti fl-2013 jammonta għal EUR 694 000.

III.2.1.   VERIFIKA TAL-VALIDITÀ TAL-METODU TA' DETEZZJONI CEN, EN 1785:2003 GĦALL-IKEL ITTRATTAT B'JONIZZANT:

IL-BAŻI LEGALI

L-Artikolu 66(1)(c) tar-Regolament (KE) Nru 882/2004.

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Arranġament amministrattiv wieħed

IS-SUĠĠETT TAL-KUNTRATTI PREVISTI (FEJN POSSIBBLI)

Testijiet tal-affidabbiltà tal-metodi disponibbli għad-detezzjoni tas-sinjali ta' radjazzjoni, imwettqin miċ-Ċentru Konġunt tar-Riċerka.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

L-ewwel sitt xhur tal-2013

AMMONT INDIKATTIV TAS-SEJĦA GĦALL-OFFERTI

EUR 60 000

III.2.2.   STUDJU EKONOMIKU DWAR IR-REŻISTENZA KONTRA L-MIKROBI, LI GĦANDU JIĠI ŻVILUPPAT MILL-OECD

IL-BAŻI LEGALI

L-Artikolu 66(1)(c) tar-Regolament (KE) Nru 882/2004

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Kuntratt wieħed

IS-SUĠĠETT TAL-KUNTRATTI PREVISTI (FEJN POSSIBBLI)

L-inizjattiva politika kurrenti tal-Kummissjoni dwar ir-reżistenza kontra l-mikrobi għandha tiġi appoġġjata b'analiżi ekonomika li turi l-impatt tar-reżistenza kontra l-mikrobi.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

L-aħħar sitt xhur tal-2013

AMMONT INDIKATTIV TAS-SEJĦA GĦALL-OFFERTI

EUR 50 000

III.2.3.   KONTRIBUZZJONI ORIZZONTALI LEJN IL-KOMUNIKAZZJONI MARBUTA MAL-KONTROLL FUQ L-IKEL U L-GĦALF, B'MOD PARTIKOLARI GĦALL-AĠĠORNAMENT TAL-PARTIJIET RILEVANTI TAL-WEBSAJTS, U GĦAT-TFASSIL U L-ĦOLQIEN TA' MATERJAL AWDJOVIŻIV U STAMPAT

IL-BAŻI LEGALI

L-Artikolu 66(1)(c) tar-Regolament (KE) Nru 882/2004

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Madwar 10 kuntratti ta' servizz li jużaw bosta kuntratti qafas

IS-SUĠĠETT TAL-KUNTRATTI PREVISTI (FEJN POSSIBBLI)

Kontribuzzjoni orizzontali lejn il-komunikazzjoni marbuta mal-kontroll fuq l-ikel u l-għalf, b'mod partikolari għall-aġġornament tal-partijiet rilevanti tal-websajts, u għat-tfassil u l-ħolqien ta' materjal awdjoviżiv u stampat.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

Matul l-2013.

AMMONT INDIKATTIV TAS-SEJĦA GĦALL-OFFERTI

EUR 203 582

III.2.4.   KOMUNIKAZZJONI DWAR L-ISPEZZJONIJIET TAL-UFFIĊĊJU ALIMENTARI U VETERINARJU (FVO):

IL-BAŻI LEGALI

L-Artikolu 66(1)(c) tar-Regolament (KE) Nru 882/2004.

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Madwar ħames kuntratti speċifiċi li jużaw bosta kuntratti qafas

SUĠĠETT TAL-KUNTRATTI PREVISTI

Il-produzzjoni ta' materjal ippubblikat u promozzjonali marbut mal-attivitajiet ta' spezzjoni.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

Tul l-2013

AMMONT INDIKATTIV TAS-SEJĦA GĦALL-OFFERTI

EUR 150 000

III.2.5.   VALUTAZZJONI TAL-IMPATTI DWAR IL-ĦTIEĠA LI JSIRU DISPOŻIZZJONIJIET TAL-UE DWAR SKEMI VOLONTARJI TA' TIKKETTAR LI JURI PRODOTTI LI MA JKOLLHOMX OĠM

IL-BAŻI LEGALI

L-Artikolu 66(1)(c) tar-Regolament (KE) Nru 882/2004

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Kuntratt wieħed jew għadd ta' kuntratti, skont ir-riżultat tal-istudju kurrenti li bdiet il-Kummissjoni.

IS-SUĠĠETT TAL-KUNTRATTI PREVISTI (FEJN POSSIBBLI)

Il-ġbir ta' dejta u l-valutazzjoni tal-għażliet għall-appoġġ tal-valutazzjoni tal-impatt tal-approċċi tal-UE għall-armonizzazzjoni fil-livell tal-UE ta' regoli dwar skemi ta' tikkettar volontarju fuq prodotti li ma fihomx OĠM.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

L-aħħar sitt xhur tal-2013

AMMONT INDIKATTIV TAS-SEJĦA GĦALL-OFFERTI

EUR 100 000

III.2.6.   ŻVILUPP TA' METODOLOĠIJA KOMUNI GĦALL-ĠBIR MILL-ISTATI MEMBRI TA' INFORMAZZJONI DWAR IL-KONSUM U L-UŻU TAL-ADDITTIVI U L-AROMATIZZANTI TAL-IKEL FL-UNJONI EWROPEA

IL-BAŻI LEGALI

L-Artikolu 29 tar-Regolament (KE) Nru 1333/2008 u l-Artikolu 23 tar-Regolament (KE) Nru 1334/2008.

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Kuntratt wieħed jew aktar

IS-SUĠĠETT TAL-KUNTRATTI PREVISTI (FEJN POSSIBBLI)

—	Il-ġbir ta' informazzjoni dwar is-sistemi kurrenti ta' monitoraġġ tal-addittivi u l-aromatizzanti tal-ikel

—	L-identifikazzjoni tal-ħtiġijiet speċifiċi tal-Awtorità Ewropea għas-Sikurezza fl-Ikel

—	Linji gwida ta' rakkomandazzjoni ta' approċċ mal-UE kollha lejn il-monitoraġġ tal-addittivi u l-aromatizzanti tal-ikel

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWISTI

L-aħħar sitt xhur tal-2013

AMMONT INDIKATTIV TAS-SEJĦA GĦALL-OFFERTI

EUR 150 000

III.2.7.   VALUTAZZJONI ESTERNA MINN QABEL TAL-PROGRAMMI GĦALL-2014 IPPREŻENTATI MIL-LABORATORJI TA' REFERENZA TAL-UE

IL-BAŻI LEGALI

L-Artikolu 66(1)(c) tar-Regolament (KE) Nru 882/2004

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Il-konklużjoni ta' mill-inqas 15-il kuntratt ma' esperti esterni li se jintgħażlu permezz ta' sejħa għall-espressjoni ta' interess (Appel à Manifestation d'Intérêt — A.M.I.).

IS-SUĠĠETT TAL-KUNTRATTI PREVISTI (FEJN POSSIBBLI)

Il-laboratorji ta' referenza tal-UE għandhom jippreżentaw il-programm ta' ħidma għall-2014 sal-aħħar ta' Settembru 2013. Hija l-Kummissjoni li se tivvaluta lil dawn il-programmi. Jistgħu jitressqu programmi għal 44 suġġett. L-għan hu t-tiftix ta' prevalutazzjoni minn esperti esterni ta' wħud mill-programmi.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA

Ħarifa 2013

AMMONT INDIKATTIV TAL-AZZJONI

EUR 75 000

III.2.8.   STUDJU BIEX TINĠABAR ID-DEJTA EŻISTENTI U DEJTA ĠDIDA BIEX JIĠI VVALUTAT L-IMPATT FUQ IS-SUQ INTERN KIF UKOLL FUQ L-GĦALF, FUQ IL-BHEJJEM U FUQ L-OPERATURI META JIĠI IMPLIMENTAT IR-REGOLAMENT TAL-KUMMISSJONI (UE) Nru 619/2011.

IL-BAŻI LEGALI

L-Artikolu 66(1)(c) tar-Regolament (KE) Nru 882/2004

IL-LINJA BAĠITARJA

17 04 07 01

IN-NUMRU INDIKATTIV U T-TIP TA’ KUNTRATTI PREVISTI

Il-konklużjoni ta' mill-inqas kuntratt wieħed ta' servizz speċifiku.

IS-SUĠĠETT TAL-KUNTRATT PREVIST (FEJN POSSIBBLI)

Il-ġbir u l-analiżi ta' dejta mingħand il-partijiet interessati kollha kkonċernati dwar l-impatt probabbli tat-twessigħ jew in-nuqqas ta' twessigħ tal-kamp ta' applikazzjoni tar-Regolament tal-Kummissjoni (UE) Nru 619/2011 biex jinkludi l-ikel, bi tħejjija għal valutazzjoni tal-impatti.

L-IMPLIMENTAZZJONI

Ċentralizzata diretta

IL-PERJODU TA’ ŻMIEN INDIKATTIV GĦAT-TNEDIJA TAL-PROĊEDURA

Ħarifa 2013

AMMONT INDIKATTIV TAL-AZZJONI

EUR 100 000

ANNESS

Il-programm ta' ħidma 2013 għat-taħriġ fil-qasam tas-sikurezza tal-ikel u tal-għalf, is-saħħa u t-trattament xieraq tal-annimali u s-saħħa tal-pjanti fil-qafas tal-Programm ta' Taħriġ Aħjar għal Aktar Sikurezza fl-Ikel

1.1.   Introduzzjoni

Dan il-programm ta’ ħidma fih tliet miżuri ta' implimentazzjoni għall-2013. Id-distribuzzjoni tal-baġit u l-azzjonijiet ewlenin skont l-għanijiet stipulati fir-Regolament (KE) Nru 882/2004 u d-Direttiva 2000/29/KE, huma kif ġej:

1.2.    Għall-akkwist (implimentat f’ġestjoni ċentralizzata diretta):
1.2.1. Taħriġ: kuntratti esterni għat-twettiq tal-programm ta’ taħriġ	EUR 14 800 000
1.2.2. Taħriġ: Tagħmir tal-IT, għodod u appoġġ, materjal promozzjonali, tagħrif u appoġġ fil-komunikazzjoni u konferenzi	EUR 200 000
1.3. Azzjonijiet oħra: Sussidju operattiv għall-Aġenzija Eżekuttiva dwar is-Saħħa u l-Konsumaturi	EUR 1 170 000
TOTAL	EUR 16 170 000

1.2.   Akkwisti

L-ammont baġitarju globali riżervat għall-kuntratti tal-akkwisti fl-2013 jammonta għal EUR 15 000 000.

1.2.1.   Taħriġ: Kuntratt estern għat-twettiq tal-programm ta’ taħriġ

IL-BAŻI LEGALI

Ir-Regolament (KE) Nru 882/2004, l-Artikolu 51 u l-Artikolu 66(1)b

Id-Direttiva 2000/29/KE, l-Artikolu 2(1)(i)

IL-LINJA BAĠITARJA

Il-linji baġitarji: 17 04 07 01 u 17 04 04 01

IN-NUMRU INDIKATTIV U T-TIP TA’ KUNTRATTI PREVISTI

Għal kull waħda mill-kwistjonijiet tekniċi msemmija hawn taħt, se jiġi ffirmat kuntratt ta’ servizz speċifiku wieħed jew aktar. Huwa stmat li se jiġu ffirmati madwar 15-il kuntratt ta’ servizz. Il-kuntratturi esterni huma involuti l-aktar fl-aspetti organizzattivi u loġistiċi tal-attivitajiet ta’ taħriġ.

IS-SUĠĠETT TAL-KUNTRATTI PREVISTI (JEKK POSSIBBLI)

Għall-2013, l-azzjoni ta’ taħriġ fl-Istati Membri se tkun dwar is-suġġetti li ġejjin:

L-attivitajiet	L-ammont f'EUR
L-HACCP	1 930 000
Is-Saħħa tal-Annimali (naħal u annimali eżotiċi)	1 240 000
Il-kontroll tal-addittivi tal-ikel	1 085 000
Il-kontroll ta’ Residwi ta’ Prodotti Mediċinali Veterinarji	855 000
Il-valutazzjoni tar-riskju	880 000
L-ippjanar ta' kontinġenza u l-kontroll tal-mard	1 090 000
Il-kontroll tal-Enċefalopatiji Sponġiformi Trażmissibbli	515 000
Is-sorveljanza tar-riskji ġodda u emerġenti għas-saħħa tal-pjanti	600 000
L-appoġġ għal verifiki ġenerali tal-Unjoni	855 000
Il-Prodotti għall-Protezzjoni tal-Pjanti (awtorizzazzjoni u l-użu sostenibbli)	1 165 000
L-iġjene tal-ikel u l-kontrolli fil-produzzjoni primarja	975 000
L-iġjene tal-ikel u l-flessibbiltà	1 165 000
Tekniki ġodda tal-invetsigazzjoni tal-ikel	615 000
RASFF	600 000
Il-kontroll tas-semen u l-produzzjoni tal-embrijuni	640 000
Kwistjonijiet oħra dwar is-saħħa u t-trattament xieraq tal-annimali, is-saħħa tal-pjanti u s-sikurezza tal-ikel u studji, konferenzi, għajnuna, għodod ta' tagħlim u valutazzjonijiet	590 000
TOTAL	14 800 000

IMPLIMENTAZZJONI

EUR 14 620 000 (finanzjament ta’ miżuri tas-sikurezza fl-ikel skont ir-Regolament (KE) Nru 882/2004 u d-Direttiva 2000/29/KE) se jiġu ġestiti u implimentati mill-Aġenzija Eżekuttiva għas-Saħħa u l-Konsumaturi (id-Deċiżjoni tal-Kummissjoni 2008/544/KE). Il-EUR 180 000 li jifdal se jintużaw mill-Kummissjoni biex tkopri l-istudji, il-konferenzi u l-valutazzjonijiet.

PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWIST

Bejn wieħed u ieħor minn Mejju sa Settembru biex il-kuntratti jiġu ffirmati fl-2013.

AMMONT INDIKATTIV TAS-SEJĦA GĦALL-OFFERTI

EUR 14 800 000.

1.2.2.   Taħriġ: Tagħmir tal-IT, għodod u appoġġ, materjal promozzjonali, tagħrif u appoġġ fil-komunikazzjoni u konferenzi

IL-BAŻI LEGALI

Ir-Regolament (KE) Nru 882/2004, l-Artikolu 66(1)(c)

IL-LINJA BAĠITARJA

Il-linja baġitarja: 17 01 04 05

IN-NUMRU INDIKATTIV U T-TIP TA’ KUNTRATTI PREVISTI

Huwa stmat li madwar 2 kuntratti speċifiċi se jiġu ffirmati dwar il-kuntratti tal-qafas eżistenti.

IS-SUĠĠETT TAL-KUNTRATTI PREVISTI (JEKK POSSIBBLI)

L-azzjonijiet li se jkunu ffinanzjati minn dan il-baġit huma maħsuba għall-organizzazzjoni tal-programmi ta’ taħriġ, għall-IT u t-tagħmir tat-tagħlim elettroniku, għall-għodod u l-appoġġ, għall-materjal promozzjonali, għat-tagħrif u l-appoġġ fil-komunikazzjoni kif ukoll għall-konferenzi.

IMPLIMENTAZZJONI

Din l-azzjoni se tkun implimentata direttament mid-DĠ għas-Saħħa u l-Konsumaturi.

PERJODU TA’ ŻMIEN INDIKATTIV GĦAT-TNEDIJA TAL-PROĊEDURA TAL-AKKWIST

Bejn wieħed u ieħor minn Mejju sa Ottubru.

AMMONT INDIKATTIV TAS-SEJĦA GĦALL-OFFERTI

EUR 200 000.

1.3.   Azzjonijiet oħra: Sussidju operattiv għall-Aġenzija Eżekuttiva dwar is-Saħħa u l-Konsumaturi

IL-BAŻI LEGALI

Ir-Regolament tal-Kunsill (KE) Nru 58/2003, b'mod partikolari l-Artikolu 12(3).

IL-LINJA BAĠITARJA

Il-linja baġitarja: 17 01 04 31

L-AMMONT

EUR 1 170 000

ID-DESKRIZZJONI U L-GĦAN TAL-MIŻURA IMPLIMENTATTIVA

Dan il-baġit jiffinanzja s-sussidju operattiv tal-Aġenzija għas-sena 2013 marbut mal-programmi skont l-“FP Intestatura 2”. Il-linja baġitarja 17 01 04 31 tiffinanzja s-sussidju operattiv tal-Aġenzija għall-2013 għall-parti marbuta mal-programm Taħriġ Aħjar għal Aktar Sikurezza fl-Ikel. Skont l-Artikolu 12(3) tar-Regolament tal-Kunsill (KE) Nru 58/2003, is-sussidju operattiv għandu jittieħed mill-allokazzjoni finanzjarja għall-programmi tal-Unjoni mmexxija mill-Aġenzija. Fil-baġit tal-2013 inħolqu żewġ linji baġitarji separati għas-sussidju li jrid jitħallas lill-Aġenzija, wieħed għall-programmi skont l-intestatura 2 u ieħor għal programmi skont l-intestatura 3b tal-Perspettivi Finanzjarji.