Hija tistabbilixxi r-regoli u l-kondizzjonijiet li taħthom pajjiż tal-Unjoni Ewropea (UE) bħala stat tal-bandiera, jista’ jawtorizza organizzazzjoni rikonoxxuta* biex twettaq spezzjonijiet statutorji u ċertifikazzjonijiet f’isimha.
Awtorizzazzjoni ta’ organizzazzjonijiet rikonoxxuti
Il-pajjiżi tal-UE għandhom jiżguraw li l-amministrazzjonijiet tagħhom jimplimentaw il-konvenzjonijiet internazzjonali* rilevanti dwar l-ispezzjoni u ċ-ċertifikazzjoni ta’ vapuri li jtajru l-bandiera tagħhom.
Pajjiż tal-UE jista’ jawtorizza organizzazzjonijiet biex iwettqu bis-sħiħ jew parzjalment l-ispezzjonijiet u l-istħarriġ relatati mal-ħruġ jew it-tiġdid taċ-ċertifikati statutorji* tal-vapuri. Dan jista’ jafda dawn id-dmirijiet biss lil organizzazzjonijiet rikonoxxuti.
Id-dmirijiet relatati mal-ħruġ ta’ ċertifikati tar-radju tas-sikurezza tal-vapuri tal-merkanzija jistgħu, madankollu, jiġu assenjati lil korpi privati approvati b’kompetenza suffiċjenti u persunal kwalifikat.
Pajjiż tal-UE ma għandux jirrifjuta li jawtorizza l-organizzazzjonijiet rikonoxxuti. Madankollu, huwa jista’ jiddeċiedi li jillimita l-għadd ta’ organizzazzjonijiet li jiġu awtorizzati fuq il-bażi ta’ kriterji oġġettivi u mhux diskriminatorji.
L-organizzazzjonijiet li jinsabu f’pajjiżi mhux tal-UE jistgħu jiġu rikonoxxuti fil-livell tal-UE u sussegwentement jiġu awtorizzati mill-amministrazzjonijiet tal-pajjiżi tal-UE. F’dawn il-każijiet, jistgħu jintalbu arranġamenti ta’ awtorizzazzjoni reċiproka.
Relazzjonijiet ta’ ħidma
Meta pajjiż tal-UE jawtorizza organizzazzjoni rikonoxxuta, huwa jistabbilixxi “relazzjoni ta’ ħidma” magħha. Dan huwa rregolat minn ftehim, li fih klawżoli relatati mar-responsabbiltà finanzjarja, il-verifika perjodika ta’ dmirijiet, spezzjonijiet każwali u dettaljati ta’ vapuri u r-rappurtar obbligatorju ta’ informazzjoni relatata mal-klassi (“klassi” ta’ vapuri hija grupp ta’ vapuri bl-istess disinn). L-organizzazzjonijiet awtorizzati jistgħu jintalbu jkollhom rappreżentanza lokali fil-pajjiż ikkonċernat.
Il-pajjiżi tal-UE għandhom jgħarrfu lill-Kummissjoni Ewropea dwar ir-relazzjonijiet ta’ ħidma stabbiliti minnhom.
Pajjiż tal-UE jista’ jissospendi jew jirtira awtorizzazzjoni ta’ organizzazzjoni rikonoxxuta jekk iqis li l-organizzazzjoni ma għadhiex tissodisfa l-kondizzjonijiet biex twettaq id-dmirijiet tagħha.
Monitoraġġ
Il-pajjiżi tal-UE għandhom jiżguraw li l-organizzazzjonijiet rikonoxxuti li jaġixxu f’isimhom iwettqu d-doveri tagħhom b’mod effettiv. Huma għandhom jimmonitorjawhom kull sentejn u għandhom jgħarrfu lill-pajjiżi tal-UE u lill-Kummissjoni dwar ir-riżultati ta’ dawn l-attivitajiet ta’ monitoraġġ.
Meta jimmonitorja l-vapuri bħala stat tal-port, pajjiż tal-UE għandu jinforma lill-Kummissjoni u pajjiżi oħra tal-UE jekk:
Pajjiż tal-UE għandu jirrapporta biss dawk il-każijiet ta’ vapuri li huma ta’ theddida serja għas-sikurezza u għall-ambjent jew meta jkun hemm evidenza ta’ mġiba partikolarment negliġenti min-naħa tal-organizzazzjoni rikonoxxuta. L-organizzazzjonijiet għandhom jinżammu infurmati sabiex ikunu jistgħu jieħdu l-miżuri korrettivi neċessarji.
Ilha tapplika mis-17 ta’ Ġunju 2009 u kellha ssir liġi fil-pajjiżi tal-UE sas-17 ta’ Ġunju 2011.
Din id-direttiva ġiet adottata b’mod parallel mar-Regolament (KE) Nru 391/2009 dwar ir-regoli u l-istandards komuni għall-organizzazzjonijiet għall-ispezzjoni u l-perizji tal-vapuri. Dawn l-istrumenti jħassru d-Direttiva 94/57/KE. Ir-regolament joħloq sistema ta’ ħruġ ta’ liċenzji fil-livell tal-UE bħala prerekwiżit għal kwalunkwe organizzazzjoni li trid tiġi awtorizzata minn pajjiż tal-UE fil-kuntest tad-Direttiva 2009/15/KE.
Għal aktar informazzjoni, ara:
Direttiva 2009/15/KE tal-Parlament Ewropew u tal-Kunsill tat-23 ta’ April 2009 dwar ir-regoli u l-istandards komuni għall-organizzazzjonijiet għall-ispezzjoni u l-perizji tal-vapuri u għall-attivitajiet rilevanti tal-amministrazzjonijiet marittimi (ĠU L 131, 28.5.2009, pp. 47-56)
Emendi suċċessivi għad-Direttiva 2009/15/KE ġew inkorporati fit-test oriġinali. Din il-verżjoni kkonsolidata għandha valur dokumentarju biss.
Ir-Regolament (KE) Nru 391/2009 tal-Parlament Ewropew u tal-Kunsill tat-23 ta’ April 2009 dwar ir-regoli u l-istandards komuni għall-organizzazzjonijiet għall-ispezzjoni u l-perizji tal-vapuri (ĠU L 131, 28.5.2009, pp. 11-23)
Ara l-verżjoni konsolidata.
l-aħħar aġġornament 19.02.2021