L-Awtorità Bankarja Ewropea (EBA)
SOMMARJU TA’:
Ir-Regolament (UE) Nru 1093/2010 li jistabbilixxi l-Awtorità Bankarja Ewropea
X’INHU L-GĦAN TAR-REGOLAMENT?
- Huwa jistabbilixxi l-Awtorità Bankarja Ewropea (EBA), aġenzija tal-Unjoni Ewropea (UE) li taħdem sabiex tiżgura regolamentazzjoni u sorveljanza prudenzjali effettivi u konsistenti fis-settur bankarju Ewropew.
- L-għanijiet ġenerali tal-EBA huma li żżomm l-istabbiltà finanzjarja fl-UE, kif ukoll li tissalvagwardja l-integrità, l-effiċjenza u l-funzjonament ordnat tas-settur bankarju.
PUNTI EWLENIN
Applikazzjoni konsistenti tad-dritt tal-Unjoni
L-EBA:
- tfassal standards tekniċi regolatorji li jispeċifikaw il-leġiżlazzjoni bankarja li għandha tiġi adottata mill-Kummissjoni Ewropea, fejn il-Parlament Ewropew u l-Kunsill tal-Unjoni Ewropea jiddelegaw din is-setgħa lill-Kumissjoni;
- għandha s-setgħa li toħrog linji gwida u rakkomandazzjonijiet dwar l-applikazzjoni tal-leġizlazzjoni tal-UE rilevanti u, skont l-emenda tar-Regolament (UE) 2019/2175, tingħata firxa wiesgħa ta’ setgħat fir-rigward ta’ ksur relatat mal-ħasil tal-flus.
Testijiet tal-istress
L-EBA għandha rwol prominenti fl-eżerċizzju tat-test tal-istress li jsir madwar l-UE biex jeżamina r-reżiljenza tal-banek fir-rigward tal-iżviluppi avversi tas-suq u kwalunkwe riskju sistemiku fis-sistema finanzjarja tal-UE.
- Hija tagħti bidu u tikkoordina t-testijiet tal-istress fl-UE flimkien mal-awtoritajiet nazzjonali responsabbli għas-superviżjoni tal-banek.
- F’kooperazzjoni mal-Bord Ewropew dwar ir-Riskju Sistemiku (BERS), mal-Bank Ċentrali Ewropew u l-Kummissjoni, l-EBA tiddefinixxi metodoloġija komuni għal kull edizzjoni tat-test tal-istress.
- Hija tissorvelja u tevalwa wkoll ix-xejriet tas-suq u tal-kreditu.
Il-ksur tad-dritt tal-Unjoni
- L-EBA għandha s-setgħa li tinvestiga l-allegata applikazzjoni mhux korretta minn superviżur nazzjonali tal-leġiżlazzjoni bankarja u finanzjarja tal-UE (b’mod partikolari meta tonqos milli tiżgura li bank jikkonforma mar-rekwiżiti stabbiliti f’dik il-leġiżlazzjoni).
- L-EBA tista’ tindirizza rakkomandazzjoni lis-superviżur nazzjonali partikolari. Jekk is-superviżur ma jikkonformax ma’ dan, il-Kummissjoni tista’ toħroġ opinjoni formali li tqis ir-rakkomandazzjoni tal-EBA.
- Jekk superviżur nazzjonali jibqa’ jippersisti li ma jikkonformax mal-liġi, l-EBA tista’ tadotta deċiżjonijiet indirizzati direttament lill-bank. Din is-setgħa tista’ tintuża biss f’ċirkostanzi eċċezzjonali.
- Ir-Regolament Emendatorju (UE) 2019/2175 jagħti s-setgħa lill-EBA li tieħu azzjoni immedjata fejn ir-regoli kontra l-ħasil tal-flus jiġu miksura fil-livell nazzjonali (ara hawn taħt).
Superviżjoni finanzjarja Ewropea
L-EBA hija parti mis-sistema Ewropea ta’ superviżjoni finanzjarja stabbilita fl-2010, li, minbarra l-BERS, tinkludi żewġ organizzazzjonijiet superviżorji oħra:
Ir-Regolament Emendatorju (UE) 2019/2175 isaħħaħ il-mandati, il-governanza u l-finanzjament tat-tliet awtoritajiet superviżorji Ewropej u, fir-rigward tal-EBA, huwa:
- isaħħaħ ir-rwol u s-setgħat superviżorji tagħha bil-għan li tiġġieled kontra l-ħasil tal-flus u l-finanzjament tat-terroriżmu u, f’dan ir-rigward, jirrikjedi li din:
- tiġbor informazzjoni mill-awtoritajiet nazzjonali kompetenti,
- tiżviluppa standards ġodda biex ittejjeb il-kwalità tas-superviżjoni,
- twettaq valutazzjonijiet tar-riskju,
- tiffaċilita l-kooperazzjoni ma’ pajjiżi mhux tal-UE dwar każijiet transfruntiera;
- issaħħaħ is-setgħat tagħha fil-qasam tal-protezzjoni tal-konsumatur billi tippromwovi trasparenza u ċarezza akbar rigward il-prodotti u s-servizzi finanzjarji billi:
- timmonitorja x-xejriet fil-kostijiet u l-imposti tal-prodotti finanzjarji għall-konsumatur,
- tiżviluppa indikaturi tar-riskju għall-konsumaturi;
- iżżid ir-riżorsi tagħha biex tkun tista’ twettaq l-kompiti l-ġodda tagħha.
Servizzi ta’ ħlas
Fir-rigward tas-servizzi ta’ pagamenti fl-UE, id-Direttiva emendatorja (UE) 2015/2366 issaħħaħ ir-rwol tal-EBA (ara s-s-sommarju) u tirrikjedi li:
- tiżviluppa reġistru ċentrali aċċessibbli għall-pubbliku ta’ istituzzjonijiet ta’ pagament awtorizzati,li għandu jinżamm aġġornat mill-awtoritajiet nazzjonali;
- tassisti fir-riżoluzzjoni tat-tilwim bejn l-awtoritajiet nazzjonali;
- tiżviluppa u toħroġ linji gwida u abbozzi ta’ standards tekniċi regolatorji dwar:
- l-awtentikazzjoni msaħħa tal-klijent u mezzi ta’ komunikazzjoni siguri li jridu jikkonformaw magħhom il-fornituri tas-servizzi ta’ pagament kollha;
- il-kooperazzjoni u l-iskambju ta’ informazzjoni bejn l-awtoritajiet superviżorji.
Kwartieri ġenerali
Skont ir-Regolament emendatorju (UE) 2018/1717, fil-kuntest tal-ħrug tar-Renju Unit mill-UE, is-sede tal-EBA kellha tiġi rilokata minn Londra għal Pariġi mit-30 ta’ Marzu 2019.
MINN META BEDA JAPPLIKA R-REGOLAMENT?
- Ir-Regolament (UE) Nru 1093/2010 ilu japplika mill-1 ta’ Jannar 2011.
- Id-Direttiva Emendatorja (UE) 2015/2366 ilha tapplika mit-12 ta’ Jannar 2016 u kellha ssir liġi fl-Istati Membri sat-13 ta’ Jannar 2018.
- Ir-Regolament Emendatorju (UE) 2019/2175 ilu japplika mill-1 ta’ Jannar 2020.
SFOND
Għal aktar informazzjoni, ara:
DOKUMENT EWLIENI
Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, pp. 12–47).
L-emendi suċċessivi għar-Regolament (UE) Nru 1093/2010 ġew inkorporati fid-dokument oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, pp. 349–496).
Ara l-verżjoni konsolidata.
Ir-Regolament tal-Kunsill (UE) Nru 1096/2010 tas-17 ta’ Novembru 2010 li jagħti lill-Bank Ċentrali Ewropew kompiti speċifiċi rigward il-funzjonament tal-Bord Ewropew dwar ir-Riskju Sistemiku (ĠU L 331, 15.12.2010, pp. 162–164).
l-aħħar aġġornament 29.11.2021