It-tqegħid fis-suq b’distanza ta’ servizzi finanzjarji: protezzjoni tal-konsumatur

SOMMARJU TA’:

Id-Direttiva 2002/65/KE li tikkonċerna t-tqegħid fis-suq tas-servizzi finanzjarji għall-konsumatur

X’INHU L-GĦAN TAD-DIRETTIVA?

Din tistabilixxi regoli komuni għat-tqegħid fis-suq ta’ servizzi finanzjarji minn fornituri lil konsumaturi fl-Unjoni Ewropea (UE), sabiex ittejjeb il-protezzjoni tal-konsumaturi.

PUNTI EWLENIN

Kamp ta’ applikazzjoni

Id-direttiva tkopri s-servizzi finanzjarji kollha, inklużi karti tal-kreditu, fondi ta’ investiment, assigurazzjoni u pjanijiet personali ta’ pensjoni li jistgħu jinbiegħu lil konsumaturi permezz ta’ kanali ta’ bejgħ mill-bogħod bħal bit-telefown, fax u l-internet.

Id-direttiva tiggarantixxi l-protezzjoni tal-konsumatur, inkluż:

• obbligu tal-fornitur li jipprovdi lil konsumaturi informazzjoni komprensiva qabel ma jiġi konkluż kuntratt;
• id-dritt tal-konsumatur biex jirtira mill-kuntratt fi żmien 14-il jum;
• projbizzjoni fuq prattiki abbużivi tas-suq li jippruvaw jobbligaw lil konsumaturi biex jixtru servizz li ma jkunux talbu (bejgħ b’“inertia”);
• regoli biex jirrestrinġu prattiki oħra bħal telefonati u emails mhux mitluba (telefonati għall-għarrieda u spamming);
• sanzjonijiet xierqa minn Stati Membri tal-UE għal fornituri li jonqsu milli jikkonformaw ma’ din id-direttiva;
• rimedju legali xieraq, inklużi proċeduri għal soluzzjoni barra mill-qorti għal konsumaturi li d-drittijiet tagħhom huma miksura.

Id-direttiva dwar id-drittjiet tal-konsumatur — Direttiva 2011/83/KE (ara s-sommarju) — tirregola l-bejgħ mill-bogħod għal konsumaturi tal-prodotti u servizzi oħra kollha mhux finanzjarji, u tħassar id-Direttiva 97/7/KE.

Rieżami tad-Direttiva

Ir-rieżami tad-direttiva kien inkluż fil-programm ta’ ħidma 2020 tal-Kummissjoni (Anness II — inizjattivi REFIT, “Spinta ġdida għad-Demokrazija Ewropea”). Evalwazzjoni tad-direttiva kienet ippubblikata wkoll fl-2020.

Revoka

Direttiva 2002/65/KE ser tkun imħassra minn Direttiva (UE) 2023/2673 mid-19 ta’ Ġunju 2026.

MINN META TAPPLIKA D-DIRETTIVA?

Din ilha tapplika mid-9 ta’ Ottubru 2002 u kellha ssir liġi fl-Istati Membri sad-9 ta’ Ottubru 2004.

SFOND

Għal aktar informazzjoni, ara:

• It-tqegħid fis-suq b’distanza tas-servizzi finanzjarji (il-Kummissjoni Ewropea)
• It-tqegħid fis-suq b’distanza tas-servizzi finanzjarji — rieżami tar-regoli tal-UE (il-Kummissjoni Ewropea)
• It-tqegħid fis-suq b’distanza tas-servizzi finanzjarji — evalwazzjoni tar-regoli tal-UE (il-Kummissjoni Ewropea).

DOKUMENT PRINĊIPALI

Id-direttiva 2002/65/KE tal-Parliament Ewropew u tal-Kunsill tat-23 ta’ Settembru 2002 li tikkonċerna t-tqegħid fis-suq b’distanza ta’ servizzi finanzjarji ta’ konsumaturi u li temenda d-Direttivi tal-Kunsill 90/619/KEE u direttiva 97/7/KE u 98/27/KE (ĠU L 271, 9.10.2002, pp. 16–24).

L-emendi suċċessivi għad-Direttiva 2002/65/KE ġew inkorporati fit-test bażiku. Din il-verżjoni konsolidata hija biss għall-finijiet ta’ referenza.

DOKUMENTI RELATATI

Id-Direttiva 2011/83/UE tal-Parlament Ewropew u tal-Kunsill tal-25 ta’ Ottubru 2011 dwar drittijiet tal-konsumatur, li temenda d-Direttiva tal-Kunsill 93/13/KEE u d-Direttiva 1999/44/KE tal-Parlament Ewropew u tal-Kunsill u li tħassar id-Direttiva tal-Kunsill 85/577/KEE u d-Direttiva 97/7/KE tal-Parlament Ewropew u tal-Kunsill (ĠU L 304, 22.11.2011, pp. 64–88).

Ara l-verżjoni konsolidata.

Il-Komunikazzjoni mill-Kummissjoni lil Kunsill u lil Parliament Ewropew — Rieżami tad-Direttiva (2002/65/KE) rigward it-tqegħid fis-suq tas-servizzi finanzjarji għall-konsumatur (COM(2009) 626 finali tal-20.11.2009).

l-aħħar aġġornament 08.12.2023