Ir-rati tal-konverżjoni bejn il-muniti nazzjonali u l-euro

SOMMARJU TA’:

Ir-Regolament (KE) Nru 2866/98 dwar ir-rati tal-konverżjoni bejn l-euro u l-muniti tal-pajjiżi li jadottaw l-euro

X’INHU L-GĦAN TAR-REGOLAMENT?

Dan jistabbilixxi r-rati tal-konverżjoni bejn l-euro u dawk li kienu l-muniti nazzjonali tal-Istati Membri taż-żona tal-euro.
Dawn ir-rati ġew adottati fil-31 ta’ Diċembru 1998 meta l-ewwel 11-il Stat Membru tal-Unjoni Ewropea (UE) adottaw l-euro (il-Belġju, il-Ġermanja, l-Irlanda, Spanja, Franza, l-Italja, il-Lussemburgu, in-Netherlands, l-Awstrija, il-Portugall u l-Finlandja).

PUNTI EWLENIN

Sabiex isir membru taż-żona tal-euro, it-tielet stadju fl-unjoni ekonomika u monetarja tal-UE, Stat Membru jrid jissodisfa ċerti kundizzjonijiet ekonomiċi u legali, magħrufin bħala l-kriterji ta’ konverġenza. Dawn il-kriterji huma mfasslin sabiex jiżguraw li l-pajjiżi jkunu jistgħu juru stabbiltà — fi ħdan ċerti limiti definiti — fil-prezzijiet, fil-pożizzjoni finanzjarja tal-gvern tagħhom, fir-rati tal-kambju u fir-rati tal-imgħax fit-tul.
Ir-regolament ġie emendat diversi drabi sabiex jadotta r-rati tal-konverżjoni tal-pajjiżi l-ġodda li jissieħbu fiż-żona tal-euro:
- Il-Greċja fl-2001;
- Is-Slovenja fl-2007;
- Ċipru u Malta fl-2008;
- Is-Slovakkja fl-2009;
- L-Estonja fl-2011;
- Il-Latvja fl-2014;
- Il-Litwanja fl-2015;
- Il-Kroazja fl-2023.
Skont l-Artikolu 140 tat-Trattat dwar il-Funzjonament tal-Unjoni Ewropea, ir-rati tal-konverżjoni bejn l-euro u l-muniti tal-Istati Membri huma stabbiliti mill-Kunsill tal-Unjoni Ewropea. Il-Kunsill jiddeċiedi bl-unanimità tal-pajjiżi taż-żona tal-euro u l-pajjiż ikkonċernat, filwaqt li jaġixxi fuq proposta tal-Kummissjoni Ewropea u wara li jikkonsulta lill-Bank Ċentrali Ewropew.

Ir-rati tal-konverżjoni jiġu ffissati b’mod irrevokabbli.

1 euro =	Ir-Rata tal-Kambju	Il-munita nazzjonali ta’ qabel
	40.34	Il-frank Belġjan
	1.96	Il-mark Ġermaniż
	15.65	Il-kroon Estonjan
	0.79	Il-lira Irlandiża
	340.75	Id-drakma Griega
	166.39	Il-peseta Spanjola
	6.56	Il-frank Franċiż
	7.53	Il-kuna Kroata
	1 936.27	Il-lira Taljana
	0.59	Il-lira Ċiprijotta
	0.70	Il-lat Latvjana
	3.45	Il-lita Litwana
	40.34	Il-frank Lussemburgiż
	0.43	Il-lira Maltija
	2.20	Il-guilder Netherlandiż
	13.76	Ix-schilling Awstrijaka
	200.48	L-escudo Portugiż
	239.64	It-tolar Sloven
	30.13	Il-koruna Slovakka
	5.95	Il-mark Finlandiż

MINN META BEDA JAPPLIKA R-REGOLAMENT?

Ilu japplika mill-1 ta’ Jannar 1999.

SFOND

Għal aktar informazzjoni, ara:

L-euro (il-Kummissjoni Ewropea)
Flusna (il-Bank Ċentrali Ewropew).

DOKUMENT PRINĊIPALI

Ir-Regolament tal-Kunsill (UE) Nru 2866/98 tal-31 ta’ Diċembru 1998 dwar ir-rati tal-konverżjoni bejn l-euro u l-muniti tal-Istati Membri li jadottaw l-euro (ĠU L 359, 31.12.1998, pp. 1-2).

L-emendi suċċessivi għar-Regolament (KE) Nru 2866/98 ġew inkorporati fit-test bażiku. Din il-verżjoni konsolidata għandha valur dokumentarju biss.

l-aħħar aġġornament 26.07.2022