Regoli dwar l-iġjene għal ikel li joriġina mill-annimali

SOMMARJU TA’:

Ir-Regolament (KE) Nru 853/2004 li jistabbilixxi ċerti regoli speċifiċi ta’ iġjene għall-ikel li joriġina mill-annimali

X’INHU L-GĦAN TAR-REGOLAMENT?

Huwa jistabbilixxi r-regoli tal-Unjoni Ewropea (UE) li għandhom jiġu segwiti mill-operaturi tan-negozju tal-ikel dwar l-iġjene fl-ikel li joriġina mill-annimali, bħal-laħam, prodotti tas-sajd u prodotti tal-ħalib.
Huwa jikkumplimenta r-Regolament (KE) Nru 852/2004, li jistabbilixxi r-regoli ġenerali dwar l-iġjene fl-oġġetti tal-ikel (ara s-sommarju).

PUNTI EWLENIN

L-għan ewlieni tar-regolament huwa li jistabbilixxi rekwiżiti speċifiċi ta’ iġjene għall-ikel li joriġina mill-annimali, dettaljati fl-Anness III tiegħu (ara hawn taħt).

Obbligi ġenerali tal-operaturi tan-negozju tal-ikel

L-operaturi għandhom jużaw biss ilma tajjeb għax-xorb (jew “ilma nadif” f’xi ċirkostanzi) biex ineħħu l-kontaminazzjoni tal-wiċċ, sakemm ma jkunux approvati alternattivi mill-Kummissjoni Ewropea.
Il-prodotti għandhom jiġu ppreparati u mmaniġġjati fi stabbilimenti li jridu jkunu għall-inqas irreġistrati, imma ħafna drabi approvati.
Il-prodotti għandu jkollhom marka tas-saħħa jew marka ta’ identifikazzjoni approvata oħra, kif deskritt f’Anness II.
Prodotti minn barra l-UE għandhom mill-inqas jissodisfaw ir-rekwiżit tal-UE, murija fil-lista tal-pajjiżi u l-istabbilimenti awtorizzati; barra minn hekk, il-prodotti għandhom ikunu akkumpanjati b’ċertifikati.
Japplikaw regoli speċjali fil-Finlandja u l-Iżvezja fir-rigward tas-salmonella għal xi laħmijiet, tjur u bajd.

Anness III jistabbilixxi regoli speċifiċi għal kull kategorija tal-prodott.

Laħam, inklużi ungulati domestiċi (speċi bovini, porċini, ovini u kaprini); tjur u lagomorfi (tjur imrobbija, fniek, fniek selvaġġi u annimali gerriema); kaċċa mrobbija u selvaġġa; laħam ikkapuljat, preparazzjonijiet mil-laħam u laħam separat b’mod mekkaniku/laħam irkuprat; u prodotti tal-laħam. Ir-regoli jinkludu rekwiżiti għal:

trasport ta’ annimali ħajjin lejn il-biċċeriji;
biċċeriji u impjanti tat-tqattigħ;
iġjene tal-qtil u l-iġjene waqt it-tqattigħ u tneħħija tal-għadam;
qatla ta’ emerġenza (barra l-biċċeriji) u qatla fir-razzett;
rekwiżiti tat-temperatura waqt l-ipproċessar u l-ħżin;
taħriġ għall-kaċċaturi fis-saħħa u l-iġjene;
immaniġġjar ta’ tjur selvaġġ (kbar u żgħar).

Molluski bivalvi ħajjin, bħal gajdri, molluski, gandofli, kokli u arzelli. Rekwiżiti speċifiċi f’Anness III jinkludu:

jinbiegħu permezz ta’ ċentru ta’ dispaċċ;
tiġi applikata fuqhom marka ta’ identifikazzjoni u tabella ddatata;
ikunu akkumpanjati minn dokument irreġistrat li fih informazzjoni dwar il-purifikazzjoni (fejn applikabbli);
jinħasdu minn żoni ta’ produzzjoni kklassifikati b’mod uffiċjali;
jiġu ppurifikati permezz ta’ trattamenti permessi biss;
ikunu protetti minn tgħaffiġ, brix jew vibrazzjoni;
ma jkunux esposti għal temperaturi estremi; u
jissodisfaw standards minimi tas-saħħa għal-livelli tal-bijotossini.

Prodotti tas-sajd, ħut tal-ilma baħar u ħut tal-ilma ħelu, inkluż krustaċji u molluski, kemm jekk selvaġġi jew imrobbija. Ir-regoli japplikaw għal prodotti tas-sajd imdewba, mhux proċessati u prodotti tas-sajd friski. Fost affarijiet oħra, il-prodotti għandhom jissodisfaw ir-rekwiżiti għal:

bastimenti fabbrika, tas-sajd u bi friżers;
proċeduri ta’ iġjene u mmaniġġjar u ħatt kif xieraq;
kontroll tal-parassiti;
sajran, tkessiħ, tqaxxir u t-tneħħija tal-qoxra ta’ krustaċji u molluski;
standards tas-saħħa u freskezza;
tossini li jagħmlu ħsara lill-bnedmin; u
tgeżwir, imballaġġ, ħażna u trasport.

Ħalib mhux ipproċessat u prodotti tal-ħalib għandhom jiġu minn annimali li huma:

f’saħħa tajba inġenerali;
ma juru ebda sintomi ta’ mard infettiv trasmissibbli lill-bnedmin permezz tal-ħalib; u
minn merħliet li m’għandhomx bruċellożi u tuberkolożi.

Hemm ukoll rekwiżit għal:

bini u tagħmir;
iġjene waqt it-taħlib, il-ġbir u t-trasport;
temperatura u trattament tat-tisħin; u
tgeżwir, imballaġġ, tikkettar u mmarkar ta’ identifikazzjoni.

Bajd u prodotti mill-bajd għandhom:

jinżammu ndaf, xotti, f’ambjent bla riħa, protetti minn xokkijiet u xemx diretta;
maħżuna u ttrasportati f’temperatura adattata għal konservazzjoni ottima;
kunsinjati lill-konsumatur fi żmien 21 jum ta’ bidien.

L-istabbilimenti għandhom ikunu mqassma u mgħammra biex jiżguraw li l-operazzjonijiet li ġejjin ikunu separati:

il-ħasil, it-tnixxif u d-diżinfezzjoni ta’ bajd maħmuġ, fejn jitwettqu;
il-ksur tal-bajd, il-ġbir tal-kontenut tagħhom u t-tneħħija ta’ partijiet tal-qxur u tal-membrani; u
kwalunkwe operazzjoni oħra.

Rekwiżiti addizzjonali għal prodott tal-bajd inkluż dan li ġej:

il-bajd ma għandux jinkiser sakemm ma jkunx nadif u xott;
bajd imxaqqaq għandu jiġi pproċessat malajr kemm jista’ jkun;
bajd għajr dak tat-tiġieġ, dundjani jew fargħuni għandu jiġi mmaniġġjat u pproċessat separatament;
il-kontenut tal-bajd għall-konsum mill-bniedem ma għandux jinkiseb biċ-ċentrifugazzjoni jew it-tgħaffiġ.

Ikel ieħor li joriġina mill-annimali

Anness III fih ukoll regoli li japplikaw għal:

saqajn taż-żrinġijiet u bebbux;
xaħam u dam tal-annimali imdewweb (ir-residwu tat-tidwib li fih il-proteina);
stonkiijet, bżieżaq tal-awrina u intestini trattati;
ġelatina;
collagen; u
sulfat tal-kondrojtin raffinat ħafna, aċidu tal-hyaluronic, prodotti oħra tal-qarquċa idrolizzata, chitosan, glukożamina, xorrox, isinglass u aċidi amini.

Setgħat delegati u ta’ implimentazzjoni tal-Kummissjoni

Ir-regolament jagħti lill-Kummissjoni s-setgħa li tadattah permezz tal-adozzjoni ta’ atti delegati meta jkunu ġġustifikati minn informazzjoni xjentifika ġdida jew esperjenza prattika miksuba.

MINN META JAPPLIKA R-REGOLAMENT?

Dan ilu japplika mill-1 ta’ Jannar 2006.

SFOND

Għal aktar informazzjoni, ara:

L-iġjene tal-ikel (Il-Kummissjoni Ewropea).

DOKUMENT EWLIENI

Ir-Regolament (KE) Nru 853/2004 tal-Parlament Ewropew u tal-Kunsill tad-29 ta’ April 2004 li jistabbilixxi ċerti regoli speċifiċi ta’ iġjene għall-ikel li joriġina mill-annimali (ĠU L 139, 30.4.2004, pp. 55–205).

L-emendi suċċessivi għar-Regolament (KE) Nru 853/2004 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2017/625 tal-Parlament Ewropew u tal-Kunsill tal-15 ta’ Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta’ regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (ĠU L 95, 7.4.2017, pp. 1-142).

Ara l-verżjoni konsolidata.

Ir-Regolament tal-Kummissjoni (KE) Nru 2074/2005 tal-5 ta’ Diċembru 2005 li jistabbilixxi miżuri ta’ implimentazzjoni għal ċerti prodotti taħt ir-Regolament (KE) Nru 853/2004 tal-Parlament Ewropew u tal-Kunsill u għall-organizzazzjoni ta’ kontrolli uffiċjali taħt ir-Regolament (KE) Nru 854/2004 tal-Parlament Ewropew u tal-Kunsill u r-Regolament (KE) Nru 882/2004 tal-Parlament Ewropew u tal-Kunsill, li jidderoga mir-Regolament (KE) Nru 852/2004 tal-Parlament Ewropew u tal-Kunsill u li jemenda r-Regolamenti (KE) Nru 853/2004 u (KE) Nru 854/2004 (ĠU L 338, 22.12.2005, pp. 27–59).

Ara l-verżjoni konsolidata.

Ir-Regolament (KE) Nru 852/2004 tal-Parlament Ewropew u tal-Kunsill tad-29 ta’ April 2004 dwar l-iġjene tal-oġġetti tal-ikel (ĠU L 139, 30.4.2004, pp. 1–54).

Ara l-verżjoni konsolidata.

l-aħħar aġġornament 15.02.2023