Dikjarazzjoni Annwali dwar iż-Żona Euro tal-2009

SOMMARJU TAD-DOKUMENT:

Komunikazzjoni (COM(2009) 527 final) – Dikjarazzjoni Annwali dwar iż-Żona tal-Euro 2009

X’INHU L-GĦAN TAL-KOMUNIKAZZJONI?

• Hija tipprovdi dettalji dwar ir-reazzjoni taż-żona tal-euro għall-kriżi ekonomika tal-2008 u dwar kif għandu jittejjeb il-funzjonament tal-Unjoni Ekonomika u Monetarja.
• Hija tistabbilixxi l-ħtieġa għal sorveljanza makroekonomika usa’ tas-sistemi finanzjarji fi ħdan iż-żona tal-euro biex fil-futur tkun tista’ tiġi stabbilita reazzjoni kkoordinata mil-livell ta’ politika ekonomika aktar rapida u effettiva.

PUNTI EWLENIN

• Wara l-kriżi ekonomika li bdiet fis-sajf tal-2007 u li laħqet il-qofol tagħha fl-2008, qed jibdew jidhru sinjali ta’ stabbiltà fis-sistema finanzjarja. Tul din il-kriżi, l-euro pproteġiet iż-żona tal-euro b’mod effettiv minn ċaqliq fir-rati tal-kambju u tal-imgħax li jikkawża taqlib, li qabel kienu tant detrimentali għall-pajjiżi tal-Unjoni Ewropea (UE) fi żminijiet ta’ stress fis-swieq finanzjarji. Il-kapaċità taż-żona tal-euro li taġixxi malajr u tikkoordina mal-banek ċentrali għenet biex tiġi stabbilizzata s-sistema monetarja internazzjonali kollha kemm hi.
• Il-kriżi finanzjarja wriet il-benefiċċji tas-sħubija fl-euro, u b’hekk żiedet l-attrattività tagħha għal pajjiżi tal-UE mhux fiż-żona tal-euro. Il-benefiċċji jinkludu l-fatt li l-istituzzjonijiet domestiċi ngħataw aċċess għal-likwidità tal-Bank Ċentrali Ewropew.
• Madankollu l-euro ma hijiex kapaċi tipproteġi ż-żona tal-euro mill-problemi ekonomiċi kollha – b’mod partikolari dawk relatati mal-iżbilanċi makroekonomiċi. Il-kriżi enfasizzat ċerti dgħufijiet fi ħdan iż-żona tal-euro. L-iżbilanċi fi ħdan iż-żona tal-euro kienu jfissru li xi ekonomiji tħallew aktar esposti għall-kriżi minn oħrajn. Qabel il-kriżi ħafna pajjiżi taż-żona tal-euro kienu jinjoraw ir-riskju ta’ żbilanċi, iżda l-kriżi finanzjarja wriet il-ħtieġa għal bidla.

Ir-reazzjoni taż-żona tal-euro għall-kriżi

• Kien hemm nuqqas ta’arranġamenti superviżorji sodisfaċenti, li naqsu milli jaġixxu malajr u jipprovdu reazzjoni kkoordinata meta bdiet il-kriżi. Ir-reazzjonijiet inizjali kellhom tendenza jkunu definiti primarjament mill-kunsiderazzjonijiet domestiċi individwali tal-pajjiżi taż-żona tal-euro. F’Ottubru 2008, l-ewwel summit tal-Grupp tal-Euro għen biex jiġġenera reazzjoni fil-livell tal-UE, li permezz tiegħu il-Kummissjoni Ewropea pprovdiet strateġija komuni għall-implimentazzjoni tal-pjanijiet ta’ salvataġġ għall-banek nazzjonali.
• Il-Kummissjoni minn dakinhar ippreżentat proposti legali formali li rriżultaw f’sistema Ewropea ta’ superviżjoni finanzjarja ġdida. L-għan kien li tiżdied is-superviżjoni prudenzjali tal-istituzzjonijiet finanzjarji individwali kif ukoll tas-sistema finanzjarja kollha kemm hi.
• Minbarra l-politiki interni, l-UE qed tmexxi wkoll ir-riforma regolatorja tas-swieq finanzjarji, u qed tgħin biex jiffurmaw u jiġu żviluppati l-inizjattivi u l-impenji tal-G20.
• Il-konsolidament fiskali fi ħdan iż-żona tal-euro, b’konformità mal-Patt ta’ Stabbiltà u Tkabbir, kien ifisser li ħafna pajjiżi kienu kapaċi jindirizzaw il-kriżi aħjar minn qabel. Madankollu, il-konsolidazzjoni fiskali ma kinitx tlestiet f’xi pajjiżi taż-żona tal-euro, fejn il-livelli ta’ dejn pubbliku baqgħu għoljin u l-finanzi pubbliċi saru dipendenti fuq id-dħul fiskali. Bħala riżultat, xi pajjiżi taż-żona tal-euro ma kinux kapaċi jikkontribwixxu għall-istimolu fiskali konġunt stabbilit mill-Pjan Ewropew ta’ Rkupru Ekonomiku.
• Bħala riżultat tar-relazzjoni ekonomika u finanzjarja mill-qrib tagħhom ma’ munita komuni u politika monetarja unika, il-koordinazzjoni hija essenzjali għall-pajjiżi fiż-żona tal-euro. Ir-reazzjoni taż-żona tal-euro għall-kriżi setgħet tkun aktar rapida u aktar effettiva li kieku l-koordinazzjoni bejn il-pajjiżi membri kienet aktar effiċjenti.

It-triq ’il quddiem–sorveljanza makroekonomika usa’

• Il-kriżi uriet il-ħtieġa għall-pajjiżi membri taż-żona tal-euro li jiksbu progress fuq l-aġenda ta’ riforma EMU@10 u japplikawha. F’din il-komunikazzjoni tas-7 ta’ Mejju 2008, il-Kummissjoni pproponiet aġenda ta’riforma politika biex ittejjeb il-funzjonament tal-Unjoni Ekonomika u Monetarja (UEM) kontra l-ambjent globali li qed jinbidel malajr, il-popolazzjonijiet li qed jixjieħu u tħassib li qed jiżdied dwar l-enerġija u l-bidla fil-klima. Il-qasam ta’ politika esterna tal-aġenda ta’ riforma pproponiet li ż-żona tal-euro għandu jkollha rwol prominenti fil-governanza ekonomika globali.
• L-iżbilanċi fi ħdan iż-żona tal-euro ma kinux indirizzati qabel il-kriżi finanzjarja. Għalhekk hija meħtieġa sorveljanza usa’politika kkoordinata biex tiġi stabbilita reazzjoni ta’politika kkoordinata. Din is-sorveljanza usa’ għandha tinkludi l-iżviluppi fis-swieq finanzjarji. Dejn żejjed fis-settur privat irriżulta f’xejriet ekonomiċi mhux sostenibbli. Tali żbilanċi finanzjarji jeħtieġ li jiġu skoperti u indirizzati aktar kmieni.
• Is-sorveljanza għandha titwessa’ biex jiġu żgurati finanzi pubbliċi sostenibbli. It-tkabbir baxx flimkien ma’ dejn li qed jiżdied ipoġġi l-finanzi pubbliċi f’pożizzjoni prekarja fi żmien meta l-impatt tat-tixjiħ qed jibda jidher. Huwa meħtieġ impenn strateġiku konkret biex tinkiseb kooperazzjoni fiskali msaħħa, li tibbilanċja b’mod adegwat it-tħassib dwar l-istabbilizzazzjoni u s-sostenibbiltà b’konformità mal-Patt ta’ Stabbiltà u Tkabbir.
• Il-koordinazzjoni bejn il-politiki u l-pajjiżi taż-żona tal-euro trid tittejjeb biex tippermetti strateġiji adegwati għall-ħruġ mill-kriżi. Tali koordinazzjoni trid tikkonsisti f’fehim komuni dwar iż-żminijiet, ir-ritmi u s-sekwenza tan-normalizzazzjoni tal-orjentazzjonijiet politiki xierqa.

DOKUMENT EWLIENI

Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni u lill-Bank Ċentrali Ewropew – Dikjarazzjoni Annwali dwar iż-Żona tal-Euro 2009 (KUMM(2009) 527 finali, 7.10.2009)

DOKUMENTI RELATATI

Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew, lill-Kumitat tar-Reġjuni u lill-Bank Ċentrali Ewropew - EMU@10: suċċessi u sfidi wara 10 snin mill-Unjoni Ekonomika u Monetarja {SEC(2008) 553} (KUMM(2008) 238 finali, 7.5.2008)

l-aħħar aġġornament 28.03.2017