Inġunzjonijiet għall-protezzjoni tal-interessi kollettivi tal-konsumaturi (sal-2023)

SOMMARJU TA’:

Direttiva 2009/22/KE — inġunzjonijiet għall-protezzjoni tal-interessi tal-konsumaturi

X’INHU L-GĦAN TAD-DIRETTIVA?

Din tintroduċi regoli tal-Unjoni Ewropea (UE) biex jiġi żgurat li l-inġunzjonijiet ikunu effettivi biżżejjed biex jitwaqqaf il-ksur li jkun ta’ ħsara għall-interessi kollettivi tal-konsumaturi.

Din id-Direttiva se tiġi rrevokata u ssostitwita bid-Direttiva (UE) 2020/1828 (ara s-sommarju) mill-25 ta’ Ġunju 2023.

PUNTI EWLENIN

L-inġunzjonijiet għandhom l-għan li jwaqqfu jew jipprojbixxu ksur li jmur kontra l-interessi kollettivi tal-konsumaturi. L-allinjament tal-leġiżlazzjoni f’konformità ma’ din id-Direttiva jippermetti li dawn l-inġunzjonijiet ikunu aktar effettivi u jippermettu lis-suq intern tal-UE jiffunzjona b’mod aktar mexxej.
Il-ksur inkwistjoni jinkludi dak relatat mal-kreditu għall-konsumatur, il-vjaġġi offruti bħala pakkett, klawżoli inġusti fil-kuntratti konklużi mal-konsumaturi, kuntratti li jsiru mill-bogħod u prattiki kummerċjali żleali. Lista sħiħa tad-direttivi kkonċernati tista’ tinstab fl-Anness I tad-Direttiva 2009/22/KE.
Ir-rikors għall-inġunzjonijiet jista’ jirriżulta:
- fit-twaqqif u l-impediment ta’ ksur, fejn xieraq permezz ta’ proċedura mħaffa*;
- l-eliminazzjoni tal-effetti kontinwi tal-ksur, b’mod partikolari permezz tal-pubblikazzjoni tad-deċiżjoni;
- is-sentenzi mogħtija lill-akkużati biex jikkonformaw ma’ deċiżjoni billi jkunu kostretti jħallsu multa.
L-entitajiet kwalifikati biex jieħdu azzjoni irid ikollhom interess leġittimu biex jiżguraw li jitħarsu l-interessi kollettivi tal-konsumaturi u l-funzjonament tajjeb tas-suq intern. Dan huwa l-każ, b’mod partikolari, għal korpi pubbliċi indipendenti li huma speċifikament responsabbli biex jipproteġu l-interessi kollettivi tal-konsumaturi, jew l-organizzazzjonijiet għall-protezzjoni tal-konsumaturi.
Lista tal-awtoritajiet kwalifikati li jistgħu jieħdu azzjoni fil-każ ta’ ksur fi ħdan l-UE hija stabbilita mill-Kummissjoni Ewropea u ppubblikata f’Il-Ġurnal Uffiċjali tal-Unjoni Ewropea. Għal-lista ta’ korpi kwalifikati li jistgħu jaġixxu fil-każ ta’ ksur fi ħdan l-UE, jekk jogħġbok ara hawn.
L-Istat Membru tal-UE li fih tinbeda proċedura jista’ jiddeċiedi jekk għandux ikun hemm konsultazzjoni minn qabel bejn il-partijiet, fil-preżenza ta’ entità kwalifikata minn dak il-pajjiż jew fin-nuqqas tagħha. Jekk il-ksur ikompli għal aktar minn ġimagħtejn wara li tkun waslet it-talba għal konsultazzjoni, l-azzjoni għal inġunzjoni tista’ ssir immedjatament.
Fl-2011 sar studju dwar l-applikazzjoni tad-Direttiva 2009/22/KE u ntuża fit-tħejjija tar-rapport tal-Kummissjoni ppubblikat fl-2012.
Id-Direttiva ġiet evalwata fl-2017 fi ħdan il-kontroll tal-idoneità tal-liġi tal-UE dwar il-konsumatur u l-kummerċjalizzazzjoni.

Revoka

Id-Direttiva 2009/22/KE se tiġi rrevokata u ssostitwita bid-Direttiva (UE) 2020/1828 mil-25 ta’ Ġunju 2023. Din tal-aħħar ġiet adottata wara l-inizjattiva tal-Kummissjoni dwar il-“patt il-ġdid għall-konsumaturi”.

MINN META TAPPLIKA D-DIRETTIVA?

Ilha tapplika mid-29 ta’ Diċembru 2009. Id-Direttiva 2009/22/KE kkodifikat u ssostitwiet id-Direttiva 98/27/KE u l-emendi sussegwenti tagħha. Id-Direttiva oriġinali 98/27/UE kellha ssir liġi fl-Istati Membri sal-2001.

SFOND

Għal aktar informazzjoni, ara:

Inġunzjonijiet (Il-Kummissjoni Ewropea).

TERMINI EWLENIN

Proċedura mħaffa. Proċedura speċjali li tippermetti lit-tribunal tal-arbitraġġ iwarrab talbiet mhux eliġibbli u abbużivi fl-istadju preliminari ta’ proċediment ta’ arbitraġġ.

DOKUMENT PRINĊIPALI

Id-Direttiva 2009/22/KE tal-Parlament Ewropew u tal-Kunsill tat-23 ta’ April 2009 dwar inġunzjonijiet għall-protezzjoni tal-interessi tal-konsumaturi (verżjoni kodifikata) (ĠU L 110, 1.5.2009, pp. 30-36).

Emendi suċċessivi għad-Direttiva 2009/22/KE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Rapport dwar il-kontroll tal-idoneità tal-liġi tal-konsumatur u tal-kummerċjalizzazzjoni tal-25 ta’ Mejju 2017 (SWD(2017) 209 final).

Rapport tal-Kummissjoni lill-Parlament Ewropew u lill-Kunsill li jikkonċerna l-applikazzjoni tad-Direttiva 2009/22/KE tal-Parlament Ewropew u tal-Kunsill dwar inġunzjonijiet għall-protezzjoni tal-interessi tal-konsumaturi (COM(2012) 635 final, 6.11.2012).

Rakkomandazzjoni tal-Kummissjoni 2013/396/UE tal-11 ta’ Ġunju 2013 dwar prinċipji komuni għal mekkaniżmi ta’ rimedju kollettiv ta’ inġunzjoni u kumpensatorji fl-Istati Membri li jirrigwardaw il-ksur tad-drittijiet skont il-Liġi tal-Unjoni (ĠU L 201, 26.7.2013, pp. 60-65).

Notifika mill-Kummissjoni dwar l-Artikolu 4(3) tad-Direttiva 2009/22/KE tal-Parlament Ewropew u tal-Kunsill dwar inġunzjonijiet għall-protezzjoni tal-interessi tal-konsumaturi, li tikkodifika d-Direttiva 98/27/KE, rigward l-entitajiet ikkwalifikati biex jieħdu azzjoni skont l-Artikolu 2 ta’ din id-Direttiva (ĠU L 361, 30.9.2016, pp. 1-55).

Rettifika tan-Notifika mill-Kummissjoni dwar l-Artikolu 4(3) tad-Direttiva 2009/22/KE tal-Parlament Ewropew u tal-Kunsill dwar inġunzjonijiet għall-protezzjoni tal-interessi tal-konsumaturi, li tikkodifika d-Direttiva 98/27/KE, rigward l-entitajiet ikkwalifikati biex jieħdu azzjoni skont l-Artikolu 2 ta’ din id-Direttiva (ĠU C 367, 6.10.2016, p. 6).

l-aħħar aġġornament 03.02.2022