Proċedimenti kriminali — Il-preżunzjoni tal-innoċenza u tad-dritt li wieħed ikun preżenti waqt il-proċess

SOMMARJU TAD-DOKUMENT:

Direttiva (UE) Nru 2016/343 — it-tisħiħ ta' ċerti aspetti tal-preżunzjoni tal-innoċenza u tad-dritt li wieħed ikun preżenti waqt il-proċess fil-proċedimenti kriminali

X’INHU L-GĦAN TA’ DIN ID-DIRETTIVA?

Timmira li tipproteġi:

• il-preżunzjoni tal-innoċenza ta’ xi ħadd akkużat jew issuspettat ta’ reat mill-pulizija jew l-awtoritajiet tal-ġustizzja;
• id-dritt ta’ persuna akkużata li tkun preżenti waqt il-proċess kriminali.

PUNTI EWLENIN

Kamp ta’ applikazzjoni

• Id-direttiva tapplika għal kull individwu (persuna fiżika) suspettat jew akkużat fil-proċedimenti kriminali.
• Hija tapplika fl-istadji kollha tal-proċedimenti kriminali, mill-mument li l-persuna tkun issuspettata jew akkużata li wettqet reat kriminali sal-verdett finali.

Drittijiet

Id-Direttiva tistabbilixxi d-drittijiet fundamentali ta’ persuna akkużata jew issuspettata fi proċediment kriminali:

• innoċenti sa meta jinstabu ħatja
  • pajjiżi tal-UE jridu jieħdu l-passi biex jiżguraw li dikjarazzjonijiet pubbliċi minn awtoritajiet pubbliċi u deċiżjonijiet ġudizzjarji (ħlief dawk dwar il-ħtija) ma jirreferux għal persuna bħala ħatja
  • Il-pajjiżi tal-UE għandhom ukoll jieħdu l-passi biex jiżguraw li persuni suspettati jew akkużati ma jiġux ippreżentati bħala ħatja, fil-qorti jew fil-pubbliku, permezz tal-użu ta' miżuri ta' trażżin fiżiku;
• oneru tal-prova fuq il-prosekuzzjoni;
• id-dritt li wieħed jibqa' sieket u li wieħed ma jinkriminax ruħu;
• id-dritt li persuna tkun preżenti fil-proċess tagħha stess — proċess jista’ jsir fl-assenza ta' persuna suspettata jew akkużata meta waħda minn dawn il-kundizzjonijiet tkun issodisfata
  • il-persuna tkun ġiet infurmata fi żmien xieraq dwar il-proċess u dwar il-konsegwenzi ta' nuqqas ta' dehra
  • il-persuna hija rrappreżentata minn avukat li jkun intgħażel mill-persuni stess jew maħtur mill-istat.

Rimedji

• Il-pajjiżi tal-UE għandhom jiżguraw li jkun hemm fis-seħħ rimedji effettivi jekk dawn id-drittijiet ma jiġux rispettati.
• Meta d-dritt li wieħed jibqa' sieket jew id-dritt li wieħed ma jinkriminax ruħu ma jiġux rispettati, il-pajjiżi tal-UE għandhom jiżguraw li d-drittijiet tad-difiża u l-ekwità tal-proċedimenti jiġu kkunsidrati fil-valutazzjoni tad-dikjarazzjonijiet ikkonċernati.
• Meta persuna suspettata jew akkużata ma tkunx preżenti waqt il-proċess tagħha u l-kundizzjonijiet ta’ hawn fuq ma jkunux ġew issodisfati, huma jkollhom id-dritt għal proċess ġdid jew għal rimedju legali ieħor, li jippermetti eżami tal-merti tal-każ biex jiġi ddeterminat mill-ġdid (inkluż il-preżentazzjoni ta’ evidenza ġdida).

META TAPPLIKA D-DIRETTIVA?

Ilha tapplika mill-31 ta’ Marzu 2016. Pajjiżi tal-UE għandhom jinkorporawha fil-liġi nazzjonali sal-1 ta’ April 2018.

SFOND

• Id-Direttiva (UE) Nru 2016/343 hija r-raba’ f'serje ta’ miżuri li jistabbilixxu regoli minimi għad-drittijiet proċedurali madwar l-UE f'konformità ma’ Pjan Direzzjonali tal-2009. Hija ssegwi r-regoli dwar id-drittijiet għal interpretazzjoni u traduzzjoni, għal informazzjoni, u għal aċċess għal avukat.
• Żewġ direttivi ulterjuri jistabbilixxu drittijiet speċjali għal tfal fil-proċedimenti kriminaliu għal għajnuna legali fil-proċedimenti kriminali.
• Għal aktar informazzjoni, ara
  • L-istqarrija għall-istampa tal-Kummissjoni “Id-dritt ta' proċess ġust: regoli ġodda li jiggarantixxu l-preżunzjoni tal-innoċenza”
  • “Id-drittijiet tas-suspettati u l-akkużati” fuq is-sit elettroniku tal-Kummissjoni Ewropea.

DOKUMENT EWLIENI

Id-Direttiva (UE) 2016/343 tal-Parlament Ewropew u tal-Kunsill tad-9 ta’ Marzu 2016 dwar it-tisħiħ ta' ċerti aspetti tal-preżunzjoni tal-innoċenza u tad-dritt li wieħed ikun preżenti waqt il-proċess fil-proċedimenti kriminali (ĠU L 65, 11.3.2016, pp. 1-11)

DOKUMENTI RELATATI

Id-Direttiva 2010/64/UE tal-Parlament Ewropew u tal-Kunsill tal-20 ta’ Ottubru 2010 dwar id-drittijiet għall-interpretazzjoni u għat-traduzzjoni fi proċedimenti kriminali (ĠU L 280, 26.10.2010, pp. 1-7)

Id-Direttiva 2012/13/UE tal-Parlament Ewropew u tal-Kunsill tat-22 ta’ Mejju 2012 dwar id-dritt għall-informazzjoni fi proċeduri kriminali (ĠU L 142, 1.6.2012, pp. 1-10)

Id-Direttiva 2013/48/UE tal-Parlament Ewropew u tal-Kunsill tat-22 ta’ Ottubru 2013 dwar id-dritt ta' aċċess għas-servizzi ta' avukat fi proċedimenti kriminali u fi proċedimenti ta' mandat ta' arrest Ewropew, u dwar id-dritt li tiġi infurmata parti terza dwar iċ-ċaħda tal-libertà u d-dritt għal komunikazzjoni ma' partijiet terzi u mal-awtoritajiet konsulari, matul iċ-ċaħda tal-libertà (ĠU L 294, 6.11.2013, pp. 1-12)

Id-Direttiva (UE) 2016/800 tal-Parlament Ewropew u tal-Kunsill tal-11 ta’ Mejju 2016 dwar il-garanziji proċedurali għal tfal li huma suspettati jew li huma persuni akkużati fi proċedimenti kriminali (ĠU L 132, 21.5.2016, pp. 1-20)

Id-Direttiva (UE) 2016/1919 tal-Parlament Ewropew u tal-Kunsill tas-26 ta’ Ottubru 2016 dwar għajnuna legali għal persuni ssuspettati u akkużati fi proċedimenti kriminali u għal persuni rikjesti fi proċedimenti ta' mandat ta' arrest Ewropew (ĠU L 297, 4.11.2016, pp. 1-8)

l-aħħar aġġornament 14.02.2017