Europeana — nagħtu wirja tal-wirt kulturali tagħna

SOMMARJU TAD-DOKUMENT:

Konklużjonijiet tal-Kunsill dwar ir-rwol tal-Europeana għall-aċċess diġitali, il-viżibbiltà u l-użu tal-wirt kulturali Ewropew

X’INHU L-GĦAN TA’ DAWN IL-KONKLUŻJONIJIET?

Il-konklużjonijiet jistabbilixxu rakkomandazzjonijiet biex jittejbu l-finanzjament, il-governanza, il-kwalità tad-data disponibbli u l-orjentazzjoni għall-utent tal-kollezzjonijiet onlajn tal-Europeana.

PUNTI EWLENIN

X’inhi l-Europeana?

Din hija proġett onlajn kulturali konġunt biex jiġi aċċessat u jintwera l-wirt kulturali Ewropew.

Sfidi

Il-konklużjonijiet jistabbilixxu għadd ta’ sfidi li jridu jiġu indirizzati biex jiġi żgurat li l-Europeana tkompli tiżviluppa. Dawn jinkludu:

it-titjib fit-teknoloġija biex l-istituzzjonijiet tal-wirt kulturali jkunu jistgħu jikkollegaw, jikkondividu u jtellgħu l-kontenut tagħhom;
li l-websajt multilingwi jsir aktar orjentat għall-utent;
il-preżentazzjoni tal-kontenut kondiviż b’modi aktar attraenti u divers;
li l-governanza tagħha ssir aktar inklużiva;
it-titjib tal-metodu ta’ finanzjament.

Azzjonijiet

Il-konklużjonijiet jissuġġerixxu li jissaħħaħ il-valur tal-innovazzjoni kulturali u diġitali tal-Europeana billi l-pjattaforma tas-servizzi ewlenin tiġi evalwata mill-ġdida taħt il-Faċilità Nikkollegaw l-Ewropa (CEF), b’iffukar fuq:

li tiġi sostnuta pjattaforma b’diversi aspetti* għall-kondiviżjoni u l-użu (mill-ġdid) ta’ metadata u kontenut;
li jiġi pprovdut punt ta’ aċċess multilingwi ġenerali għall-kontenut kulturali;
il-kisba ta’ avvanz teknoloġiku;
l-appoġġ għal netwerks professjonali bħall-Assoċjazzjoni tan-Netwerk Europeana.

Fuq il-bażi ta’ dawn l-għanijiet ġenerali, il-konklużjonijiet jirrakkomandaw azzjonijiet immirati speċifiċi li għandhom fil-mira l-partijiet differenti involuti fil-Europeana.

L-operatur tal-Europeana huwa mistieden jieħu għadd ta’ miżuri, inkluż:

jinvolvi ruħu ma’ organizzazzjonijiet sħab jew organizzazzjonijiet sħab potenzjali b’mod partikolari f’pajjiżi fejn il-proġett mhuwiex magħruf sew;
jesplora possibbiltajiet biex jikkoordina mal-inizjattivi eżistenti tal-UE b’mod partikolari fil-qasam tar-riċerka;
jagħmel kuntatt aktar sistematiku mal-pajjiżi tal-UE u jinvolvihom fit-tfassil tal-politika u t-teħid ta’ deċiżjonijiet.

Il-Kummissjoni Ewropea hija mistiedna tieħu diversi miżuri, inkluż:

tippreżenta reviżjoni indipendenti tal-Europeana lill-Kunsill tal-Unjoni Ewropea sa Ottubru 2017, inklużi direzzjonijiet ċari għall-iżvilupp fuq terminu medju u twil tagħha;
tbiddel il-metodu ta’ finanzjament f’taħlita ta’ akkwisti u għotjiet. L-UE se tappoġġa bis-sħiħ il-koordinazzjoni ċentrali tal-Europeana permezz tal-akkwist, filwaqt li tikkofinanzja proġetti kulturali orjentati għall-utent li jibnu fuq l-Europeana (eż. kollezzjonijiet tematiċi relatati mal-istorja tal-arti jew “Europeana 1914-1918”) permezz ta’ għotjiet.

Il-pajjiżi tal-UE huma mistiedna jieħdu diversi miżuri, inkluż:

ikomplu jippromwovu d-diġitalizzazzjoni tal-kollezzjonijiet tal-wirt kulturali, kif ukoll l-aktar aċċess wiesa’ possibbli għall-wirt kulturali diġitali u l-użu mill-ġdid tiegħu;
jappoġġaw l-attivitajiet tal-Europeana permezz ta’ kontribuzzjonijiet finanzjarji volontarji għall-Fondazzjoni Europeana.

Il-konklużjonijiet jistiednu wkoll lill-partijiet kollha kemm huma biex jippromwovu l-valur tal-Europeana billi jinvolvu wkoll lis-setturi tar-riċerka u l-innovazzjoni, l-edukazzjoni, it-turiżmu u s-setturi kreattivi.

SFOND

“Europeana – Librerija Diġitali Ewropea għal kulħadd” fuq is-sit elettroniku tal-Kummissjoni Ewropea.

* TERMINI EWLENIN

Pjattaforma b’diversi aspetti: din hija wieħed mill-mudelli prevalenti tal-ekonomija tal-Internet. Il-pjattaformi b’diversi aspetti joħolqu l-valur billi jiffaċilitaw l-interazzjoni bejn żewġ gruppi jew aktar li jkunu distinti iżda interdipendenti. Bħala tali l-pjattaforma hija ta’ valur għal grupp wieħed ta’ utenti biss jekk il-gruppi l-oħra jkunu preżenti wkoll.

DOKUMENT EWLIENI

Konklużjonijiet tal-Kunsill dwar ir-rwol tal-Europeana għall-aċċess diġitali, il-viżibbiltà u l-użu tal-wirt kulturali Ewropew (ĠU C 212, 14.6.2016, pp. 9–13)

l-aħħar aġġornament 17.01.2017