IL-KUMMISSJONI EWROPEA

Brussell, 26.6.2017

COM(2017) 365 final

KOMUNIKAZZJONI TAL-KUMMISSJONI

KONTIJIET ANNWALI KONSOLIDATI TAL-UNJONI EWROPEA 2016

WERREJ

DAĦLA    

QAFAS POLITIKU TAL-UNJONI EWROPEA, GOVERNANZA U RESPONSABBILTÀ    

NOTA LI TAKKUMPANJA L-KONTIJIET KONSOLIDATI    

DIKJARAZZJONIJIET FINANZJARJI KONSOLIDATI U NOTI TA’ SPJEGA    

KARTA BILANĊJALI KARTA BILANĊJALI

DIKJARAZZJONI TAL-PRESTAZZJONI FINANZJARJA DIKJARAZZJONI TAL-PRESTAZZJONI FINANZJARJA

RAPPORT TAL-FLUSS TAL-FLUS RAPPORT TAL-FLUSS TAL-FLUS

DIKJARAZZJONI TAL-BIDLIET FL-ASSI NETTI DIKJARAZZJONI TAL-BIDLIET FL-ASSI NETTI

NOTI GĦAD-DIKJARAZZJONIJIET FINANZJARJI NOTI GĦAD-DIKJARAZZJONIJIET FINANZJARJI

DISKUSSJONI U ANALIŻI DWAR IR-RAPPORT FINANZJARJU    

RAPPORTI DWAR L-IMPLIMENTAZZJONI BAĠITARJA U NOTI TA’ SPJEGA    

GLOSSARJU    

DAĦLA

Inqas minn sena u nofs wara li tnieda, il-Fond Ewropew għall-Investimenti Strateġiċi (European Fund for Strategic Investments, EFSI), il-punt tal-qofol tal-Pjan ta' Investiment għall-Ewropa, diġà ta riżultati konkreti. Dan il-Fond kien attiv fit-28 Stati Membri kollha u mmobilizza iktar minn EUR 190 biljun f’investimenti sa nofs Mejju 2017, li huwa iktar minn nofs il-mira ta’ EUR 315-il biljun biex tintlaħaq sa nofs l-2018, f’kontribut lill-irkupru ekonomiku. Fi tmiem l-2016, il-fond ta' garanzija li jkopri l-ħidmiet tal-EFSI li saru mill-grupp tal-BEI kien allokat minn fondi mill-baġit tal-UE u laħħaq il-EUR 1 biljun f'dawn il-kontijiet annwali.

Iż-żieda tal-impjiegi, it-tkabbir u l-investiment jibqgħu l-prijorità ewlenija għall-baġit tal-UE. Il-Kummissjoni qed tkompli fl-isforzi tagħha biex issaħħaħ l-irkupru ekonomiku tal-UE u biex tinvesti fiż-żagħżagħ tagħha u f'dawk li qegħdin ifittxu impjieg, kif ukoll f’negozji ġodda u f’intrapriżi żgħar u ta' daqs medju (small and medium sized enterprises, SMEs). Eżempju tajjeb huwa l-Faċilità ta’ Garanzija ta’ Self permezz tal-programm "COSME" (“Kompetittività tal-intrapriżi u l-intrapriżi ż-żgħar u ta’ daqs medju”) li kompliet tkun ta’ suċċess fl-2016, bis-saħħa wkoll tal-kapaċità addizzjonali ta' rfigħ tar-riskji mill-EFSI. Sal-aħħar tal-2016, iktar minn 143 000 intrapriża żgħar u ta’ daqs medju f’21 pajjiż diġà rċevew finanzjament ta’ iktar minn EUR 5,5 biljun bl-appoġġ tal-programm COSME.

Il-programm ta’ riċerka u innovazzjoni Orizzont 2020 għandu rwol ewlieni fil-bini ta’ ekonomija u soċjetà bbażati fuq l-għarfien u l-innovazzjoni fl-UE. Irnexxielu jilħaq 49 000 parteċipazzjoni u ġew iffirmati ftehimiet ta’ għotja għal ammont totali ta’ EUR 20,5 biljun. Iktar minn 21 % tal-parteċipazzjonijiet kollha kienu SMEs. Iż-żieda fl-attivitajiet tal-Orizzont 2020 tidher fiż-żieda ta’ kważi 40 % fl-istrumenti ta’ garanzija tal-Orizzont 2020 inklużi f'dawn il-kontijiet meta mqabbla mas-sena l-oħra.

Wara d-dikjarazzjoni tas-Servizzi Inizjali fl-2016, il-programm Galileo, li kien qed jarma s-sistema Ewropea ta' navigazzjoni bis-satellita, għamel tranżizzjoni mill-fażi ta’ skjerament għall-fażi ta’ esplojtazzjoni fl-2016. Il-valur ta’ satelliti u infrastruttura tal-art Galileo operazzjonali inklużi f’dawn il-kontijiet jammontaw għal EUR 2 biljun sa tmiem l-2016. L-implimentazzjoni ta’ proġetti permezz ta' Orizzont 2020 inkoraġġixxiet l-iżvilupp ta’ applikazzjonijiet Galileo ġodda. Dawn il-proġetti diġà wasslu għal 13-il innovazzjoni li jkunu ppreżentati fis-suq, ħames brevetti, 34 prototip avvanzat, żewġ prodotti fis-suq u 223 artiklu xjentifiku ppubblikat. Is-suq tas-Sistema Globali ta' Navigazzjoni bis-Satellita huwa mistenni li jikber minn 5,8 biljun apparat f’użu fl-2017 għal 8 biljuni stmati sal-2020.

Il-Faċilità Nikkollegaw l-Ewropa għat-Trasport bl-għan tagħha li tiffaċilita l-aċċess ta’ proġetti ta’ infrastruttura għal finanzjament fl-oqsma tat-trasport, tat-telekomunikazzjoni u l-enerġija kkontribwixxiet għall-mina ferrovjarja ta’ Brenner Base twila 64 km li se tkun l-itwal mina ferrovjarja b’kapaċità għolja fid-dinja. L-istrument tad-dejn CEF inkluż fil-kontijiet joffri kondiviżjoni tar-riskji għall-finanzjament tad-dejn fil-forma ta’ dejn jew garanzija superjuri u subordinat(a), kif ukoll appoġġ għall-bonds tal-proġetti.

Fl-2016 ir-rispons Ewropew għal sfidi ġodda li joħorġu mis-sitwazzjoni ġeopolitika li qed tinbidel kompla. Il-baġit tal-UE pprovda appoġġ lill-Istati Membri fil-ġestjoni xierqa tal-flussi ta’ migrazzjoni, billi jindirizza l-kawżi primarji tal-migrazzjoni u s-salvagwardja taż-żona Schengen. L-implimentazzjoni tal-programmi nazzjonali tal-Istati Membri skont il-Fond għall-Asil, il-Migrazzjoni u l-Integrazzjoni u l-Fond għas-Sigurtà Interna qabdu l-pass fl-2016.

Il-Kummissjoni stabbilixxiet ukoll il-Faċilità għar-refuġjati fit-Turkija li saret operazzjonali fis-17 ta’ Frar 2016 u li għaliha l-kontijiet jinkludu EUR 630 miljun ta’ kontribuzzjonijiet mill-Istati Membri msarrfin fl-2016. Dan ippermetta lill-Kummissjoni, fost inizjattivi oħra, tniedi programm innovattiv imsejjaħ s-Sistema ta’ Protezzjoni Soċjali ta’ Emerġenza, bil-għan li jassisti sa miljun mill-iktar refuġjati vulnerabbli fit-Turkija b’allokazzjonijiet regolari ta’ flus. Dan huwa eżempju tal-użu dejjem jiżdied ta’ assistenza mill-baġit tal-UE bħala mod effiċjenti u effettiv li tagħti l-għajnuna lin-nies f’sitwazzjonijiet ta’ emerġenza.

F'Ġunju 2016, il-Kummissjoni pproponiet Qafas ta’ Sħubija ġdid ma’ pajjiżi terzi skont l-Aġenda Ewropea dwar il-Migrazzjoni. Il-Qafas huwa approċċ Ewropew għall-approfondiment tal-kooperazzjoni ma’ pajjiżi ta’ oriġini, ta’ tranżitu u ta’ destinazzjoni tal-flussi migratorji. Huwa appoġġat mill-maġġoranza tal-programmi “Ewropa Globali” tal-baġit, u ukoll mill-Fondi Fiduċjarji tal-UE rilevanti, b’mod partikolari l-Fond Fiduċjarju għas-Sirja, li huwa inkluż fil-kontijiet annwali. Finanzjament adegwat għall-Qafas ta’ Sħubija huwa essenzjali biex tkun tista’ tiġi intensifikata l-kooperazzjoni mal-pajjiżi msieħba prijoritarji u jitkomplew l-isforzi fuq ir-rotta migratorja tal-Mediterran Ċentrali.

Sfidi globali oħra, bħal pereżempju l-indirizzar tat-tibdil fil-klima, komplew ikunu prijorità tal-baġit tal-UE. Fl-2016 il-kontribuzzjoni totali tas-simplifikazzjoni tal-klima kienet stmata għal 20,9 %, f’konformità mal-mira stabbilita mill-perjodu tal-QFP attwali 2014–2020.

F’termini baġitarji, il-Fondi Strutturali u ta’ Investiment Ewropej u l-Politika Agrikola Komuni jibqgħu l-istrumenti ewlenin tal-investiment tal-UE. Fl-2016 il-baġit tal-UE nefaq EUR 57,4 biljun fuq biedja u żvilupp rurali u, minkejja dewmien ta’ qabel fit-tnedija u l-implimentazzjoni tal-QFP attwali, intefqu EUR 37,8 biljun fuq il-Koeżjoni Ekonomika, Soċjali u Territorjali. 

Il-Kummissjoni nediet dibattitu dwar il-ġejjieni u l-prijoritajiet ta’ UE b’27 Stat Membru. Aħna se nkomplu naħdmu flimkien biex nibnu ġejjieni aktar għani, kompetittiv u sigur. 

Günther H. Oettinger

Kummissarju għall-Baġit u r-Riżorsi Umani, il-Kummissjoni Ewropea

QAFAS POLITIKU TAL-UNJONI EWROPEA, GOVERNANZA U RESPONSABBILTÀ

L-Unjoni Ewropea (UE) hija unjoni li t-28 1  pajjiż Ewropew (l-Istati Membri) jikkonferixxulha kompetenzi sabiex jiksbu għanijiet li għandhom komuni bejniethom. L-Unjoni hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta’ persuni li jagħmlu parti minn minoranzi. Dawn il-valuri huma komuni għall-Istati Membri f'soċjetà fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel.

1.QAFAS POLITIKU

L-UE ssegwi l-objettivi stabbiliti fit-Trattat b’għadd ta’ għodod, li waħda minnhom hija l-baġit tal-UE. Oħrajn huma, pereżempju, il-proposta ta’ leġiżlazzjoni jew is-segwitu tal-istrateġiji ta’ politika.

Il-politiki appoġġati mill-baġit tal-UE huma implimentati f’konformità mal-qafas finanzjarju pluriennali (QFP).

Il-QFP miftiehem b’unanimità jindika l-ftehim tal-Istati Membri kollha għall-objettivi u l-infiq. Il-baġit tal-UE jiffinanzja firxa wiesgħa ta’ politiki u programmi madwar l-UE kollha. F’konformità mal-prijoritajiet stabbiliti mill-Parlament Ewropew u mill-Kunsill fil-QFP, il-Kummissjoni timplimenta programmi, attivitajiet u proġetti ta’ nfiq. Taħt il-qasam prinċipali ta’ nfiq tal-Fondi Strutturali u ta’ Investiment Ewropej (FSIE), l-UE timpenja ruħha legalment li timplimenta dawn l-azzjonijiet billi tadotta l-programmi operattivi.

Is-sors ta’ finanzjament primarju għall-UE huwa d-dħul mir-riżorsi proprji li huwa kkomplementat minn dħul ieħor. Hemm tliet tipi ta’ riżorsi proprji: riżorsi proprji tradizzjonali (bħal dazji doganali jew imposti fuq iz-zokkor), ir-riżorsa proprja bbażata fuq il-VAT u r-riżorsi proprji bbażati fuq l-introjtu nazzjonali gross (ING). Dħul ieħor li jiġi mill-attivitajiet tal-UE (pereżempju multi relatati mal-kompetizzjoni) normalment jirrappreżenta inqas minn 10 % tad-dħul totali. L-ammont globali ta’ riżorsi proprji meħtieġa sabiex jiġi ffinanzjat il-baġit jiġi stabbilit min-nefqa totali li minnha jitnaqqas dħul ieħor. L-ammont totali ta’ riżorsi proprji ma jistax jaqbeż il-1,23 % tal-introjtu nazzjonali gross (ING) tal-Istati Membri.

In-nefqa operazzjonali tal-UE tkopri d-diversi intestaturi tal-QFP u tieħu forom differenti, skont kif jitħallsu u jiġu ġestiti l-flus. Il-baġit tal-UE huwa implimentat fi tliet modi ta’ ġestjoni:

Ġestjoni kondiviża: skont dan il-metodu, il-kompiti ta’ implimentazzjoni baġitarja jiġu ddelegati lill-Istati Membri. Madwar 80 % tan-nefqa taqa’ taħt dan il-mod ta’ ġestjoni li jkopri oqsma bħall-infiq fuq l-agrikoltura u l-azzjonijiet strutturali.

Ġestjoni diretta: din tfisser meta l-baġit jiġi implimentat direttament mis-servizzi tal-Kummissjoni.

Ġestjoni Indiretta: din tirreferi għal każijiet fejn il-Kummissjoni tikkonferixxi l-kompiti ta’ implimentazzjoni tal-baġit lil korpi tal-liġi tal-UE jew tal-liġi nazzjonali, bħall-aġenziji tal-UE jew l-organizzazzjonijiet internazzjonali.

2.GOVERNANZA U RESPONSABBILTÀ FL-UE

2.1.STRUTTURA ISTITUZZJONALI

Il-governanza organizzazzjonali tal-UE tikkonsisti minn istituzzjonijiet, aġenziji u korpi oħrajn tal-UE li huma elenkati fin-Nota 9 tan-noti għar-rapporti finanzjarji konsolidati. L-istituzzjonijiet ewlenin, fis-sens li huma responsabbli għat-tfassil ta’ politiki u t-teħid tad-deċiżjonijiet, huma l-Parlament Ewropew, il-Kunsill Ewropew, il-Kunsill u l-Kummissjoni:

Il-Kummissjoni hija l-eżekuttiv tal-UE u tippromwovi l-interess ġenerali tagħha. Hija tagħmel dan billi tipproponi l-leġiżlazzjoni; timplimenta l-politiki tal-UE; tissorvelja l-implimentazzjoni korretta tat-Trattati u tal-liġi Ewropea; tiġġestixxi l-baġit tal-UE; u billi tirrappreżenta lill-Unjoni barra l-Ewropa.

Il-funzjonament intern tal-Kummissjoni huwa bbażat fuq għadd ta’ prinċipji ewlenin li jirfdu l-governanza tajba: irwoli u responsabbiltajiet ċari, impenn qawwi għall-ġestjoni tal-prestazzjoni u konformità mal-qafas legali, mekkaniżmi ta’ akkontabilità ċari, qafas regolatorju inklużiv u ta’ kwalità għolja, aċċess miftuħ u trasparenza u standards għoljin ta’ mġiba etika.

2.2.L-ISTRUTTURA TA’ GOVERNANZA TAL-KUMMISSJONI

Il-Kummissjoni Ewropea għandha sistema ta’ governanza unika, b’distinzjoni ċara bejn l-istrutturi ta’ sorveljanza amministrattiva u politika u linji definiti sewwa ta’ responsabbiltà u akkontabilità finanzjarja. Is-sistema hija bbażata fit-Trattati u l-istruttura evolviet sabiex tadatta għal ambjent li qed jinbidel u sabiex tibqa’ konformi mal-aħjar prattika kif stabbilita fl-istandards internazzjonali rilevanti 5 .

§Il-Kulleġġ tal-Kummissarji jassumi responsabbiltà politika kolleġġjali għall-ħidma tal-Kummissjoni. L-implimentazzjoni operattiva tal-baġit hija ddelegata lid-Diretturi Ġenerali u lill-Kapijiet tas-Servizzi li jmexxu l-istruttura amministrattiva tal-Kummissjoni 6 .

§Il-Kulleġġ jiddelega l-kompiti ta’ ġestjoni finanzjarja lid-Diretturi Ġenerali jew lill-Kapijiet tas-Servizzi li b’hekk isiru Uffiċjali Awtorizzanti b’Delega (AOD). Dawn il-kompiti jistgħu ulterjorment jiġu ddelegati lil Diretturi, Kapijiet ta’ Unitajiet u oħrajn, li b’hekk isiru Uffiċjali Awtorizzanti b’Sottodelega. Ir-responsabbiltà tal-Uffiċjali Awtorizzanti tkopri l-proċess sħiħ tal-ġestjoni, mid-determinazzjoni ta’ x’hemm bżonn li jsir biex jintlaħqu l-objettivi tal-politika stabbiliti mill-istituzzjoni sal-ġestjoni tal-attivitajiet imnedija kemm minn perspettiva operattiva kif ukoll baġitarja.

Fil-Kummissjoni, ir-rwoli u r-responsabbiltajiet fil-ġestjoni finanzjarja huma b’hekk definiti u applikati b’mod ċar. Dan huwa approċċ deċentralizzat b’responsabbiltajiet ċari bil-għan li tinħoloq kultura amministrattiva li tħeġġeġ lill-impjegati taċ-ċivil jerfgħu r-responsabbiltà għall-attivitajiet li fuqhom għandhom kontroll u sabiex jingħataw kontroll fuq l-attivitajiet li għalihom huma responsabbli.

Fil-kuntest taċ-ċiklu tal-Ippjanar u l-Ipprogrammar Strateġiku tal-Kummissjoni, kull uffiċjal awtorizzanti huwa mitlub li jħejji “rapport annwali tal-attività” (annual activity report, AAR) dwar l-attivitajiet u r-riżultati u l-eżiti politiċi tas-sena fejn huwa jiddikjara li r-riżorsi ntużaw abbażi tal-prinċipji ta’ ġestjoni finanzjarja tajba u li huwa daħħal fis-seħħ proċeduri ta’ kontroll li jipprovdu l-garanzija meħtieġa li tikkonċerna l-legalità u r-regolarità tat-tranżazzjonijiet bażi. Fil-livell tal-Kummissjoni, dawn ir-riżultati jiġu adottati u ppubblikati f’forma aggregata fir-Rapport Annwali dwar il-Ġestjoni u l-Prestazzjoni għall-baġit u jintbagħtu lill-Parlament Ewropew u lill-Kunsill u dan huwa l-istrument prinċipali li permezz tiegħu l-Kulleġġ tal-Kummissarji jieħu r-responsabbiltà politika għall-ġestjoni tal-baġit.

L-Uffiċjal tal-Kontabbiltà tal-Kummissjoni huwa ċentralment responsabbli għall-ġestjoni tat-teżor, għall-proċeduri ta’ rkupru, għall-istabbiliment ta’ regoli tal-kontabbiltà bbażati fuq metodi u Standards Internazzjonali tal-Kontabbiltà għas-Settur Pubbliku, għall-validazzjoni tas-sistemi kontabilistiċi u għat-tħejjija tal-kontijiet annwali konsolidati tal-Kummissjoni u tal-UE. Barra minn hekk, l-Uffiċjal tal-Kontabbiltà huwa mitlub jiffirma l-kontijiet annwali filwaqt li jiddikjara li dawn jippreżentaw b’mod ġust il-pożizzjoni finanzjarja, ir-riżultati tal-operazzjonijiet u l-flussi tal-flus fl-aspetti materjali kollha. L-Uffiċjal tal-Kontabbiltà huwa funzjoni indipendenti u għandu responsabbiltà ewlenija fir-rigward tar-rapportar finanzjarju fil-Kummissjoni. L-Awditur Intern tal-Kummissjoni huwa wkoll funzjoni indipendenti u ċentralizzata.

Il-Bord ta' Ġestjoni Korporattiva għandu rwol fil-governanza korporattiva tal-Kummissjoni billi jipprovdi sorveljanza u orjentazzjonijiet strateġiċi dwar kwistjonijiet ta’ ġestjoni korporattivi kbar, inkluż fir-rigward tal-ġestjoni tar-riżorsi finanzjarji u umani. Ippresedut mis-Segretarju Ġenerali, huwa jlaqqa’ flimkien, fuq bażi regolari, lid-Diretturi Ġenerali u l-Kabinetti responsabbli għall-baġit, ir-riżorsi umani u l-IT sabiex jiġi żgurat li fil-Kummissjoni jkun hemm fis-seħħ l-istrutturi tekniċi u organizzazzjonali meħtieġa sabiex il-prijoritajiet politiċi tal-President jitwasslu b’mod effiċjenti u effettiv.

2.3.QAFAS TAL-PRESTAZZJONI ROBUST

L-implimentazzjoni ta’ oqfsa tal-prestazzjoni robusti hija essenzjali għall-iżgurar ta’ fok aktar qawwi fuq ir-riżultati, valur miżjud tal-UE u l-ġestjoni tajba tal-programmi tal-UE. Il-prestazzjoni tal-baġit tal-UE trid tikkunsidra l-multipliċità tal-objettivi, kif ukoll il-kumplimentarjetà u l-integrazzjoni tal-politiki u l-programmi u r-rwol ewlieni tal-Istati Membri fl-implimentazzjoni tal-Baġit tal-UE. Il-Kummissjoni hija impenjata li tiżgura li l-baġit tal-UE jikseb riżultati aħjar għaċ-ċittadini u li jappoġġa l-prijoritajiet politiċi. Sabiex tiżgura li r-riżorsi jkunu allokati għal prijoritajiet u li kull azzjoni twassal għal prestazzjoni għolja u valur miżjud, il-Kummissjoni timplimenta l-Inizjattiva Baġit Iffukat fuq ir-Riżultati tal-UE. Billi tibni fuq il-qafas ta’ prestazzjoni tal-2014–2020, hija tippromwovi bilanċ aħjar bejn il-konformità u l-prestazzjoni. L-oqfsa tal-prestazzjoni tal-2014-2020 ġew inklużi bħala element obbligatorju ġdid u bħala pilastru ewlieni tal-orjentazzjoni miżjuda lejn ir-riżultati ta’ dan il-perjodu ta’ programmazzjoni. Huwa jipprevedi l-istabbiliment ta’ objettivi, indikaturi u miri ċari u li jistgħu jitkejlu, kif ukoll arranġamenti ta’ monitoraġġ, rapportar u evalwazzjoni.

Ir-Rapport Annwali dwar il-Ġestjoni u l-Prestazzjoni għall-baġit tal-UE jipprovdi ħarsa ġenerali komprensiva dwar il-prestazzjoni, il-ġestjoni u l-ħarsien tal-baġit tal-UE. Dan jispjega kif il-baġit tal-UE jappoġġa l-prijoritajiet politiċi tal-Unjoni Ewropea, ir-riżultati miksuba bil-baġit tal-UE, u l-irwoli li għandha l-Kummissjoni fl-iżgurar u l-promozzjoni tal-ogħla standards ta’ ġestjoni baġitarja u finanzjarja.

2.4.RAPPORTAR FINANZJARJU

L-element prinċipali tar-rapportar finanzjarju tal-UE huwa l-Pakkett ta’ Rapportar Finanzjarju Integrat (Integrated Financial Reporting Package, IFRP) tal-UE, li jinkludi l-kontijiet annwali kkonsolidati tal-UE u rapporti oħrajn li jakkumpanjaw il-kontijiet, jiġifieri r-Rapport Annwali dwar il-Ġestjoni u l-Prestazzjoni għall-baġit u r-rapport dwar is-segwitu għall-kwittanza. L-IFRP jipprovdi lill-pubbliku b’ħarsa komprensiva lejn is-sitwazzjoni finanzjarja u operattiva tal-UE kull sena.

Il-kontijiet annwali kkonsolidati tal-UE jipprovdu informazzjoni finanzjarja dwar l-attivitajiet tal-istituzzjonijiet, tal-aġenziji u tal-korpi l-oħrajn tal-UE mill-perspettiva baġitarja u tal-kontabbiltà bbażata fuq id-dovuti. Dawn il-kontijiet ma jinkludux il-kontijiet annwali tal-Istati Membri.

Il-kontijiet annwali kkonsolidati tal-UE jikkonsistu f’żewġ partijiet separati iżda marbuta ma’ xulxin:

a) ir-rapporti finanzjarji kkonsolidati; u

b)    ir-rapporti dwar l-implimentazzjoni tal-baġit, li jipprovdu rekord aggregat tal-implimentazzjoni tal-baġit.

Barra minn hekk, ir-rapporti finanzjarji kkonsolidati tal-UE huma akkumpanjati minn Analiżi u Diskussjoni tar-Rapport Finanzjarju (‘Financial Statement Discussion and Analysis’ - FSDA), li tiġbor fil-qosor il-bidliet sinifikanti u x-xejriet fir-rapporti finanzjarji u tispjega r-riskji u l-inċertezzi li l-UE ffaċċjat fil-passat u li jeħtieġ li tindirizza fil-ġejjieni.

Rapportar u Akkontabilità fil-Kummissjoni:

2.5.KONTROLLI

Awditjar estern

Il-Qorti Ewropea tal-Awdituri (il-Qorti) hija l-awditur estern tal-istituzzjonijiet (u korpi) tal-Unjoni. Il-missjoni tal-Qorti huwa li tikkontribwixxi biex ittejjeb il-ġestjoni finanzjarja tal-UE, tippromwovi l-akkontabilità u t-trasparenza u taġixxi bħala l-gwardjana indipendenti tal-interessi finanzjarji taċ-ċittadini tal-UE. Ir-rwol tal-Qorti bħala l-awditur estern indipendenti tal-UE huwa li tivverifika li l-fondi tal-UE qegħdin jiġu kkontabilizzati b’mod korrett, jinġabru u jintefqu f’konformità mar-regoli u r-regolamenti rilevanti u li jkunu kisbu valur għall-flus.

Il-kontijiet annwali tal-UE u l-ġestjoni tar-riżorsi tagħha jiġu awditjati mill-Qorti, li, bħala parti mill-attivitajiet tagħha, tfassal għall-PE u għall-Kunsill:

(1) rapport annwali dwar l-attivitajiet iffinanzjati mill-baġit ġenerali, li fih tispjega fid-dettall l-osservazzjonijiet tagħha dwar il-kontijiet annwali u t-tranżazzjonijiet bażi;

(2)    opinjoni, ibbażata fuq l-awditjar tiegħu mogħtija fir-rapport annwali fil-forma ta’ dikjarazzjoni ta’ aċċertament, dwar (i) il-kredibbiltà tal-kontijiet u (ii) l-legalità u r-regolarità tat-tranżazzjonijiet sottostanti li jinvolvu kemm dħul miġbur kif ukoll pagamenti lil benefiċjarji finali; kif ukoll

(3) rapporti speċjali li jkopru oqsma speċifiċi.

Kwittanza

L-aħħar pass taċ-ċiklu tal-ħajja ta’ baġit huwa l-kwittanza tal-baġit għal sena finanzjarja partikolari. Kwittanza tingħata lill-Kummissjoni u lill-istituzzjonijiet u l-korpi l-oħrajn kollha tal-UE. Il-kwittanza tirrappreżenta l-aspett politiku tal-kontroll estern tal-implimentazzjoni tal-baġit u hija d-deċiżjoni li biha l-Parlament Ewropew, li jaġixxi fuq rakkomandazzjoni mill-Kunsill, “jeħles” lill-Kummissjoni (u korpi oħrajn tal-UE) mir-responsabilità u l-ġestjoni ta’ baġit partikolari billi timmarka tmiem l-eżistenza ta’ dak il-baġit. Il-Parlament Ewropew huwa l-awtorità tal-kwittanza fl-UE. Dan ifisser li wara l-awditjar u l-finalizzazzjoni tal-kontijiet annwali, huwa f’idejn il-Kunsill li jirrakkomanda u mbagħad f’idejn il-Parlament Ewropew li jagħti kwittanza lill-Kummissjoni u korpi oħrajn tal-UE sabiex jimplimentaw il-baġit tal-UE għal sena finanzjarja partikolari. Din id-deċiżjoni hija bbażata fuq eżami tal-kontijiet annwali, ir-rapport annwali tal-Kummissjoni dwar il-ġestjoni u l-prestazzjoni għall-baġit, ir-rapport annwali, l-opinjoni tal-awditjar u r-rapporti speċjali tal-Qorti, u t-tweġibiet tal-Kummissjoni għall-mistoqsijiet u t-talbiet għal informazzjoni ulterjuri.

Din il-proċedura ta’ kwittanza tista’ tipproduċi tliet eżiti: l-għoti, il-posponiment jew ir-rifjut tal-kwittanza. Parti integrali mill-proċedura annwali ta’ kwittanza baġitarja fil-Parlament Ewropew huma s-seduti ta’ smigħ mal-Kummissarji li jsirulhom mistoqsijiet mill-MPE fil-Kumitat għall-Kontroll tal-Baġit tal-PE rigward l-oqsma politiċi taħt ir-responsabbiltà tagħhom. Ir-rapport finali ta’ kwittanza, li jinkludi r-rakkomandazzjonijiet speċifiċi lill-Kummissjoni għal azzjoni, jiġi adottat fis-Sessjoni Plenarja tal-Parlament Ewropew. Ir-rakkomandazzjonijiet ta’ kwittanza tal-Kunsill huma adottati mill-Kunsill Affarijiet Ekonomiċi u Finanzjarji (ECOFIN). Kemm ir-rapport ta’ kwittanza tal-Parlament Ewropew kif ukoll ir-rakkomandazzjonijiet ta’ kwittanza tal-Kunsill huma soġġetti għal rapport ta’ segwitu annwali li fih il-Kummissjoni tiddeskrivi l-azzjonijiet konkreti li ħadet biex timplimenta r-rakkomandazzjonijiet li saru.

NOTA LI TAKKUMPANJA L-KONTIJIET KONSOLIDATI

Il-kontijiet annwali konsolidati tal-Unjoni Ewropea għas-sena 2016 tħejjew fuq il-bażi tal-informazzjoni ppreżentata mill-istituzzjonijiet u l-korpi skont l-Artikolu 148(2) tar-Regolament Finanzjarju applikabbli għall-baġit ġenerali tal-Unjoni Ewropea. B’dan niddikjara li huma tħejjew b’konformità mat-Titolu IX ta’ dan ir-Regolament Finanzjarju u skont il-prinċipji, regoli u metodi ta’ kontabbiltà stipulati fin-noti mad-dikjarazzjonijiet finanzjarji.

Ksibt l-informazzjoni kollha neċessarja mingħand l-uffiċjali tal-kontabilità ta’ dawn l-istituzzjonijiet u korpi, li ċċertifikaw l-kredibbiltà tagħha, għall-produzzjoni tal-kontijiet li juru l-assi u l-obbligazzjonijiet tal-Unjoni Ewropea u l-implimentazzjoni tal-baġit.

Jiena hawnhekk niċċertifika li fuq il-bażi ta’ din l-informazzjoni, u fuq it-tali verifiki li dehruli neċessarji biex niffirma l-kontijiet tal-Kummissjoni Ewropea, għandi assigurazzjoni raġonevoli li l-kontijiet jippreżentaw b’mod ġust il-pożizzjoni finanzjarja, ir-riżultati tal-operazzjonijiet u l-fluss tal-flus tal-Unjoni Ewropea fl-aspetti materjali kollha.

[firma]

Rosa ALDEA BUSQUETS

L-Uffiċjal tal-Kontabbiltà tal-Kummissjoni

23 ta' Ġunju 2017

UNJONI EWROPEA

SENA FINANZJARJA 2016

DIKJARAZZJONIJIET FINANZJARJI KONSOLIDATI U NOTI TA’ SPJEGA

Ta’ min jinnota li minħabba l-arrotondament taċ-ċifri f’miljuni ta’ euro, jista’ jidher li xi data finanzjarja fit-tabelli ta’ hawn taħt ma taqbilx fl-għadd finali.

WERREJ

KARTA BILANĊJALI    

DIKJARAZZJONI TAL-PRESTAZZJONI FINANZJARJA    

RAPPORT TAL-FLUSS TAL-FLUS    

DIKJARAZZJONI TAL-BIDLIET FL-ASSI NETTI    

NOTI GĦAR-RAPPORTI FINANZJARJI    

1. 1. POLITIKI KONTABILISTIĊI SINIFIKANTI

2. 2. NOTI GĦALL-KARTA BILANĊJALI

3. 3. NOTI GĦAR-RAPPORT TAL-INTROJTU

4. 4. OBBLIGAZZJONIJIET U ASSI KONTINĠENTI

5. 5. IMPENJI LEGALI U BAĠITARJI

6. 6. ĠESTJONI TAR-RISKJU FINANZJARJU

7. 7. DIVULGAZZJONIJIET DWAR IL-PARTIJIET RELATATI

8. 8. AVVENIMENTI WARA D-DATA TAL-KARTA BILANĊJALI

9. 9. IL-KAMP TA’ APPLIKAZZJONI TAL-KONSOLIDAZZJONI

KARTA BILANĊJALI

*    Il-Parlament Ewropew adotta baġit fl-1 ta' Diċembru 2016 li jipprovdi għall-ħlas tal-obbligazzjonijiet bi skadenza qasira tal-Unjoni mir-riżorsi proprji li għandhom jinġabru mill-Istati Membri, jew jiġu mitluba lilhom, fl-2017. Barra minn hekk, skont l-Artikolu 83 tar-Regolamenti tal-Persunal (ir-Regolament tal-Kunsill 259/68 tad-29 ta’ Frar 1968 kif emendat), l-Istati Membri għandhom jiggarantixxu b’mod konġunt l-obbligazzjoni għall-pensjonijiet.

DIKJARAZZJONI TAL-PRESTAZZJONI FINANZJARJA

RAPPORT TAL-FLUSS TAL-FLUS

DIKJARAZZJONI TAL-BIDLIET FL-ASSI NETTI

NOTI GĦAD-DIKJARAZZJONIJIET FINANZJARJI

1.POLITIKI KONTABILISTIĊI SINIFIKANTI

1.1.Il-BAŻI ĠURIDIKA U R-REGOLI KONTABILISTIĊI

Il-kontijiet tal-UE jinżammu f’konformità mar-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (ĠU L 298, is-26 ta’ Ottubru 2012, p. 1) minn hawn ’il quddiem imsejjaħ ir-‘Regolament Finanzjarju’ u r-Regolament ta’ Delega tal-Kummissjoni (UE) Nru 1268/2012 tad-29 ta’ Ottubru 2012, p. 1) li jistabbilixxi regoli dettaljati ta’ applikazzjoni ta’ dan ir-Regolament Finanzjarju.

F’konformità mal-Artikolu 143 tar-Regolament Finanzjarju, l-UE tħejji r-rapporti finanzjarji tagħha fuq il-bażi ta’ regoli dwar il-kontabbiltà abbażi tad-dovuti li huma bbażati fuq l-Istandards Internazzjonali tal-Kontabbiltà għas-Settur Pubbliku (‘International Public Sector Accounting Standards’ - IPSAS). Dawn ir-regoli dwar il-kontabbiltà, adottati mill-Uffiċjal tal-Kontabbiltà tal-Kummissjoni, għandhom jiġu applikati mill-istituzzjonijiet u l-korpi kollha tal-UE li jaqgħu fil-kamp ta’ applikazzjoni tal-konsolidazzjoni sabiex jiġi stabbilit sett uniformi ta’ regoli għall-kontabbiltà, il-valwazzjoni u l-preżentazzjoni tal-kontijiet bil-għan li jiġi armonizzat il-proċess għat-tfassil tar-rapporti finanzjarji u l-konsolidazzjoni.

1.2.IL-PRINĊIPJI KONTABILISTIĊI

L-għan tar-rapporti finanzjarji huwa li jipprovdu informazzjoni li tkun utli għal firxa wiesgħa ta’ utenti dwar il-pożizzjoni finanzjarja, ir-rendiment u l-flussi tal-flus ta’ entità. Għall-UE bħala entità tas-settur pubbliku, l-għanijiet huma b’mod aktar speċifiku li tiġi pprovduta informazzjoni utli għat-teħid ta’ deċiżjonijiet u li tintwera r-responsabbiltà tal-entità għar-riżorsi fdati lilha. Huwa b’kunsiderazzjoni ta’ dawn l-għanijiet li tfassal dan id-dokument.

Il-kunsiderazzjonijiet ġenerali (jew prinċipji kontabilistiċi) li jridu jiġu segwiti meta jitħejjew ir-rapporti finanzjarji huma stipulati fir-regola kontabilistika tal-UE nru 1 “Rapporti Finanzjarji” u huma l-istess bħal dawk deskritti fl-IPSAS 1, jiġifieri: il-preżentazzjoni ġusta, il-bażi tad-dovuti, in-negozju avvjat, il-konsistenza tal-preżentazzjoni, il-materjalità, l-aggregazzjoni, it-tpaċija u l-informazzjoni komparattiva. Il-karatteristiċi kwalitattivi tar-rapportar finanzjarju skont l-Artikolu 144 tar-Regolament Finanzjarju huma r-rilevanza, l-affidabbiltà, il-komprensibbiltà u l-komparabbiltà.

1.3.KONSOLIDAZZJONI

Il-kamp ta’ applikazzjoni tal-konsolidazzjoni

Ir-rapporti finanzjarji konsolidati tal-UE jinvolvu l-entitajiet ikkontrollati kollha sinifikanti (jiġifieri l-istituzzjonijiet tal-UE (inkluża l-Kummissjoni) u l-aġenziji tal-UE), kumpaniji assoċjati u impriżi konġunti. Il-lista sħiħa ta’ entitajiet ikkonsolidati tista’ tinstab fin-Nota 9 tar-rapporti finanzjarji tal-UE. Din il-lista issa tinkludi 52 entità kkontrollata u kumpanija assoċjata waħda. L-entitajiet li jaqgħu taħt il-kamp ta’ applikazzjoni tal-konsolidazzjoni, iżda li huma immaterjali għar-rapporti finanzjarji konsolidati b’mod ġenerali, ma għandhomx bżonn jiġu kkonsolidati jew kkontabilizzati bl-użu tal-metodu tal-ekwità, meta dan ikun se jirriżulta f’ħin eċċessiv jew kost eċċessiv għall-UE. Dawk l-entitajiet issir referenza għalihom bħala ‘Entitajiet minuri’ u huma elenkati separatament fin-Nota 9 . Fl-2016, kien hemm 7 entitajiet li kienu kklassifikati bħala entitajiet minuri.

Entitajiet ikkontrollati

Id-deċiżjoni li tiġi inkluża entità fil-kamp ta’ applikazzjoni tal-konsolidazzjoni hija bbażata fuq il-kunċett ta’ kontroll. L-entitajiet ikkontrollati huma kollha entitajiet li għalihom l-UE hija esposta, jew għandha dritt, għal benefiċċji varjabbli mill-involviment tagħha u għandha r-responsabbiltà li taffettwa n-natura u l-ammont ta’ dawk il-benefiċċji permezz tas-setgħa tagħha fuq l-entità l-oħra. Din is-setgħa għandha tkun eżerċitabbli fil-preżent u tkun relatata mal-attivitajiet rilevanti tal-entità. L-entitajiet ikkontrollati huma kkonsolidati kompletament. Il-konsolidazzjoni tibda fl-ewwel data li fiha jeżisti l-kontroll u tintemm meta ma jibqax jeżisti dan il-kontroll.

L-aktar indikaturi komuni ta’ kontroll fl-UE huma: il-ħolqien tal-entità permezz ta’ trattati fundaturi jew leġiżlazzjoni sekondarja, il-finanzjament tal-entità mill-baġit tal-UE, l-eżistenza tad-drittijiet tal-vot fil-korpi ta’ governanza, l-awditjar mill-Qorti Ewropea tal-Awdituri u l-kwittanza mill-Parlament Ewropew. Issir valutazzjoni individwali għal kull entità sabiex jiġi deċiż dwar jekk wieħed mill-kriterji jew il-kriterji kollha elenkati hawn fuq humiex biżżejjed biex jirriżultaw f’kontroll.

Taħt dan l-approċċ, l-istituzzjonijiet (għajr il-Bank Ċentrali Ewropew) u l-aġenziji tal-UE (minbarra l-aġenziji ta’ dak li qabel kien it-tieni pilastru) jitqiesu li huma taħt il-kontroll esklussiv tal-UE u, għalhekk, huma inklużi fil-kamp ta’ applikazzjoni tal-konsolidazzjoni. Barra minn hekk, il-Komunità Ewropea tal-Faħam u l-Azzar (KEFA) f’Likwidazzjoni hija meqjusa wkoll bħala entità kkontrollata.

“It-tranżazzjonijiet u l-bilanċi materjali bejn l-entitajiet” kollha bejn entitajiet ikkontrollati mill-UE huma eliminati, filwaqt li l-qligħ u t-telf mhux realizzati fuq tali tranżazzjonijiet mhumiex materjali u allura ma ġewx eliminati.

Arranġamenti Konġunti

Arranġament konġunt huwa ftehim li fuqu għandhom kontroll konġunt l-UE u parti waħda jew aktar. Kontroll konġunt huwa l-kondiviżjoni miftiehma kuntrattwalment tal-kontroll fuq arranġament, li jeżisti biss meta d-deċiżjonijiet dwar l-attivitajiet rilevanti jkunu jeħtieġu l-kunsens unanimu tal-partijiet li jikkondividu l-kontroll. Il-ftehimiet konġunti jistgħu jkunu operazzjonijiet konġunti jew impriżi konġunti. F’każ li arranġament konġunt ikun strutturat permezz ta’ veikolu separat u l-partijiet għall-arranġament konġunt ikollhom drittijiet għall-assi netti tal-arranġament, dan l-arranġament konġunt jikklassifika bħala impriża konġunta. Il-parteċipazzjonijiet f’impriżi konġunti jiġu kkontabilizzati bl-użu tal-metodu tal-ekwità (ara 1.5.4). F’każ li l-partijiet ikollhom drittijiet għall-assi, u obbligi għall-obbligazzjonijiet, relatati mal-arranġament, dan l-arranġament konġunt jiġi kklassifikat bħala operazzjoni konġunta. Fir-rigward tal-interess tagħha f’operazzjonijiet konġunti, l-UE tirrikonoxxi fir-rapporti finanzjarji tagħha: l-assi u l-obbligazzjonijiet tagħha, id-dħul u l-ispejjeż tagħha, kif ukoll is-sehem tagħha ta’ assi, obbligazzjonijiet, dħul u spejjeż miżmuma jew mġarrba b’mod konġunt.

Kumpaniji assoċjati

Il-kumpaniji assoċjati huma entitajiet li fuqhom l-UE għandha, direttament jew indirettament, influwenza sinifikanti, iżda mhux kontroll. Huwa preżunt li teżisti influwenza sinifikanti jekk l-UE jkollha, direttament jew indirettament, 20 % jew aktar mid-drittijiet tal-vot. Il-parteċipazzjonijiet fil-kumpaniji assoċjati jiġu kkontabilizzati bl-użu tal-metodu tal-ekwità (ara n-Nota 1.5.4).

Entitajiet mhux ikkonsolidati li l-fondi tagħhom huma ġestiti mill-Kummissjoni

Il-fondi tar-Reġim Komuni tal-Assigurazzjoni tal-Mard għall-persunal tal-UE, il-Fond Ewropew għall-Iżvilupp u l-Fond ta’ Garanzija tal-Parteċipanti huma ġestiti mill-Kummissjoni f’isimhom. Madankollu, billi dawn l-entitajiet mhumiex ikkontrollati mill-UE, huma mhumiex ikkonsolidati fir-rapporti finanzjarji tagħha.

1.4.IL-BAŻI TAT-TĦEJJIJA

Ir-rapporti finanzjarji jiġu ppreżentati kull sena. Is-sena kontabilistika tibda fl-1 ta’ Jannar u tintemm fil-31 ta’ Diċembru.

2.Il-munita u l-bażi għall-konverżjoni

Munita funzjonali u tar-rapportar

Ir-rapporti finanzjarji jiġu ppreżentati f’miljuni ta’ euro, sakemm ma jkunx indikat mod ieħor, l-euro li hija l-munita funzjonali u tar-rapportar tal-UE.

Tranżazzjonijiet u bilanċi

It-tranżazzjonijiet f’muniti barranin jinqalbu f’euro bir-rati tal-kambju prevalenti fid-dati tat-tranżazzjonijiet. Il-qligħ u t-telf tal-kambju li jirriżultaw mis-saldu ta’ tranżazzjonijiet f’muniti barranin u mill-qlib mill-ġdid bir-rati tal-imgħax fi tmiem is-sena ta’ assi u obbligazzjonijiet monetarji denominati f’muniti barranin huma rikonoxxuti fir-rapport tal-introjtu. Id-differenzi fil-qlib fuq strumenti finanzjarji mhux monetarji kklassifikati bħala assi finanzjarji disponibbli għall-bejgħ huma inklużi fir-riżerva ta’ valur ġust.

Japplikaw metodi ta’ konverżjoni differenti għall-proprjetà, l-impjanti u t-tagħmir u għall-assi intanġibbli, li jżommu l-valur tagħhom f’euro bir-rata li tkun ġiet applikata fid-data meta nxtraw.

Il-bilanċi fi tmiem is-sena tal-assi u l-obbligazzjonijiet monetarji denominati f’muniti barranin jiġu kkonvertiti f’euro fuq il-bażi tar-rati tal-kambju tal-Bank Ċentrali Ewropew (BĊE) applikabbli fil-31 ta’ Diċembru:

Rati tal-kambju tal-euro

3.L-użu tal-istimi

F’konformità mal-IPSAS u mal-prinċipji kontabilistiċi aċċettati b’mod ġenerali, ir-rapporti finanzjarji neċessarjament jinkludu ammonti bbażati fuq estimi u suppożizzjonijiet mill-maniġment abbażi tal-aktar informazzjoni affidabbli disponibbli. L-estimi sinifikanti jinkludu, iżda mhumiex limitati għal: ammonti għall-obbligazzjonijiet tal-benefiċċji tal-impjegati, provvedimenti, riskju finanzjarju fuq inventarji u kontijiet riċevibbli, introjtu u imposti dovuti, assi u obbligazzjonijiet kontinġenti, il-grad ta’ indeboliment ta’ assi intanġibbli u proprjetà, impjanti u tagħmir u l-ammonti divulgati fin-noti dwar l-istrumenti finanzjarji. Ir-riżultati attwali jistgħu jkunu differenti minn dawk l-estimi. Il-bidliet fl-estimi huma riflessi fil-perjodu li fih isiru magħrufa.

3.1.KARTA BILANĊJALI

4.Assi intanġibbli

Il-liċenzji għas-softwer tal-kompjuter akkwistati huma kkontabilizzati skont il-kost storiku nieqes l-amortizzazzjoni akkumulata u t-telf mill-indeboliment. L-assi huma amortizzati fuq bażi ta’ "linja dritta" matul il-ħajja utli stmata tagħhom (3 - 11-il sena). L-istima tal-ħajja utli tal-assi intanġibbli tiddependi fuq il-ħajja ekonomika speċifika tagħhom jew il-ħajja legali tagħhom iddeterminata permezz ta’ ftehim. L-assi intanġibbli żviluppati internament huma kapitalizzati meta jkunu ssodisfati l-kriterji rilevanti tar-regoli kontabilistiċi tal-UE u huma relatati biss mal-fażi ta’ żvilupp tal-assi. Il-kostijiet kapitalizzabbli jinkludu l-ispejjeż direttament attribwibbli kollha neċessarji sabiex jinħoloq, jiġi prodott u jitħejja l-assi biex ikun jista’ jopera bil-mod maħsub mill-maniġment. Il-kostijiet assoċjati mal-attivitajiet ta’ riċerka, il-kostijiet tal-iżvilupp mhux kapitalizzabbli u l-kostijiet ta’ manutenzjoni huma rikonoxxuti bħala spejjeż kif imġarrba.    

5.Proprjetà, impjanti u tagħmir

Il-proprjetà, l-impjanti u t-tagħmir kollha jiġu kkontabilizzati skont il-kost storiku nieqes id-deprezzament akkumulat u t-telf mill-indeboliment. Il-kostijiet jinkludu l-infiq li jkun attribwibbli direttament għall-akkwiżizzjoni, il-kostruzzjoni jew it-trasferiment tal-assi.

Il-kostijiet sussegwenti jiġu inklużi fl-ammont riportat tal-assi jew rikonoxxuti bħala assi separat, kif xieraq, biss meta jkun probabbli li l-benefiċċji ekonomiċi futuri jew il-potenzjal tas-servizz assoċjat mal-entrata jmorru lejn l-UE u l-kost tiegħu jista’ jitkejjel b’mod affidabbli. Il-kostijiet tat-tiswija u l-manutenzjoni jiġu ddebitati lir-rapport tal-introjtu matul il-perjodu finanzjarju li fih jiġġarrbu.

L-art u x-xogħlijiet artistiċi ma jiġux deprezzati billi huma jitqiesu li għandhom ħajja utli indefinita. L-assi li jkunu għadhom qegħdin jinbnew ma jiġux deprezzati minħabba li dawn l-assi għadhom mhumiex disponibbli għall-użu. Id-deprezzament fuq assi oħrajn jiġi kkalkolat bl-użu tal-metodu tal-‘linja dritta’ sabiex jiġi allokat il-kost tagħhom nieqes il-valuri residwi tagħhom matul il-ħajja utli stmata tagħhom, kif ġej:

Il-qligħ jew it-telf fuq disponimenti jiġu ddeterminati billi r-rikavat nieqes l-ispejjeż tal-bejgħ jitqabbel mal-ammont riportat tal-assi disposti u huma inklużi fir-rapport tal-introjtu.

Lokazzjonijiet

Il-lokazzjonijiet ta’ assi tanġibbli, meta l-UE jkollha sostanzjalment ir-riskji u l-benefiċċji kollha tas-sjieda, huma klassifikati bħala lokazzjonijiet finanzjarji. Il-lokazzjonijiet finanzjarji jiġu kapitalizzati fil-bidu nett tal-lokazzjoni skont l-inqas mill-valur ġust tal-assi mogħti b’lokazzjoni u l-valur preżenti tal-pagamenti minimi tal-lokazzjoni. L-element tal-imgħax tal-ħlas ta’ lokazzjoni finanzjarja jiġi ddebitat għan-nefqa matul il-perjodu tal-lokazzjoni f’rata perjodika kostanti fir-rigward tal-bilanċ pendenti. L-obbligi tal-kiri, wara li jkunu tnaqqsu l-imposti finanzjarji, huma inklużi fl-obbligazzjonijiet finanzjarji (kurrenti u mhux kurrenti.) L-element tal-imgħax tal-kostijiet finanzjarji jiġi ddebitat fir-rapport tal-introjtu matul il-perjodu tal-lokazzjoni sabiex jipproduċi rata perjodika kostanti tal-imgħax fuq il-bilanċ li jifdal tal-obbligazzjoni għal kull perjodu. L-assi miżmuma taħt lokazzjonijiet finanzjarji jiġu deprezzati matul l-iqsar mill-ħajja utli tal-assi u t-terminu tal-lokazzjoni.

Il-lokazzjonijiet fejn il-lokatur iżomm sehem sinifikanti mir-riskji u l-benefiċċji inerenti għas-sjieda huma kklassifikati bħala lokazzjonijiet operatorji. Il-pagamenti ta’ lokazzjonijiet operatorji huma rikonoxxuti bħala spiża fir-rapport tal-introjtu fuq bażi ta’ linja dritta matul il-perjodu tal-lokazzjoni.

6.Indeboliment ta’ assi mhux finanzjarji

L-assi li għandhom ħajja utli indefinita mhumiex soġġetti għal amortizzament jew deprezzament u jiġu ttestjati kull sena għal indeboliment. L-assi li huma soġġetti għal amortizzament jew deprezzament jiġu riveduti għal indeboliment kull meta avvenimenti jew bidliet fiċ-ċirkostanzi jindikaw li l-ammont riportat jista’ ma jkunx rikoverabbli. Telf minn indeboliment huwa rikonoxxut għall-ammont li bih l-ammont riportat tal-assi jaqbeż l-ammont (servizz) rikoverabbli tiegħu. L-ammont rikoverabbli (servizz) huwa l-ogħla mill-valur ġust tal-assi nieqes il-kostijiet tal-bejgħ u l-valur tiegħu fl-użu.

Il-valuri residwi u l-ħajja utli tal-assi intanġibbli u tal-proprjetà, l-impjanti u t-tagħmir jiġu riveduti u, jekk ikun xieraq, aġġustati, mill-inqas darba fis-sena. L-ammont riportat ta’ assi jitnaqqas minnufih għall-ammont (servizz) rikoverabbli tiegħu jekk l-ammont riportat tal-assi jkun akbar mill-ammont (servizz) rikoverabbli stmat tiegħu. Jekk ir-raġunijiet għall-indebolimenti rikonoxxuti fis-snin preċedenti ma japplikawx aktar, it-telf minn indeboliment jitreġġa’ lura kif xieraq.

7.Investimenti kkontabilizzati bl-użu tal-metodu tal-ekwità

Parteċipazzjonijiet f’kumpaniji assoċjati u impriżi konġunti

L-investimenti kkontabilizzati bl-użu tal-metodu tal-ekwità fil-bidu jiġu rikonoxxuti skont il-kost. L-interess tal-UE f’dawn l-investimenti huwa rikonoxxut fir-rapport tal-introjtu u s-sehem tagħha taċ-ċaqliq fir-riżervi huwa rikonoxxut fir-riżerva tal-valur ġust fl-assi netti. Il-kost inizjali flimkien maċ-ċaqliq kollu (kontribuzzjonijiet oħrajn, is-sehem tar-riżultati ekonomiċi u ċ-ċaqliq tar-riżerva, indebolimenti u dividendi) jagħtu l-valur kontabilistiku tal-investiment fir-rapporti finanzjarji fid-data tal-karta bilanċjali. Id-distribuzzjonijiet riċevuti mill-investiment inaqqsu l-ammont riportat tal-assi.

Jekk is-sehem tal-UE tad-defiċits ta’ investiment kontabilizzat bl-użu tal-metodu tal-ekwità jkun daqs jew aktar mill-interess tagħha fl-investiment, l-UE ma tibqax tirrikonoxxi s-sehem tagħha ta’ telf ulterjuri (“telf mhux rikonoxxut”). Wara li l-interess tal-UE jitnaqqas għal żero, jiġi previst telf addizzjonali u tiġi rikonoxxuta obbligazzjoni, sal-punt biss li l-UE tkun ġarrbet obbligu legali jew kostruttiv jew tkun għamlet pagamenti f’isem l-entità.

Jekk ikun hemm indikazzjonijiet ta’ indeboliment, tkun meħtieġa valwazzjoni negattiva għall-inqas ammont rikoverabbli. L-ammont rikoverabbli jiġi stabbilit kif deskritt fin-Nota 1.5.3. Jekk ir-raġuni għall-indeboliment ma tibqax tapplika aktar tard, it-telf minn indeboliment jitreġġa’ lura għall-ammont riportat li kien ikun stabbilit li kieku ma ġie rikonoxxut l-ebda telf minn indeboliment.

F’każijiet fejn l-UE jkollha 20 % jew aktar minn fond kapitali tal-investiment, hija ma tfittixx li teżerċita influwenza sinifikanti. Għalhekk, dawn il-fondi huma ttrattati bħala strumenti finanzjarji u kkategorizzati bħala assi finanzjarji disponibbli għall-bejgħ.

Il-kumpaniji assoċjati u l-impriżi konġunti kklassifikati bħala entitajiet minuri ma jiġux kkontabilizzati skont il-metodu tal-ekwità. Il-kontribuzzjonijiet tal-UE għal dawk l-entitajiet jiġu kkontabilizzati bħala spiża tal-perjodu.

8.Assi finanzjarji

Klassifikazzjoni

L-UE tikklassifika l-assi finanzjarji tagħha fil-kategoriji li ġejjin: assi finanzjarji skont il-valur ġust permezz ta’ surplus jew defiċit; selfiet u ammonti riċevibbli; investimenti miżmuma sal-maturità; u assi finanzjarji disponibbli għall-bejgħ. Il-klassifikazzjoni tal-istrumenti finanzjarji tiġi ddeterminata mar-rikonoxximent inizjali u terġa’ tiġi evalwata f’kull data tal-karta bilanċjali.

(I)Assi finanzjarji skont il-valur ġust permezz ta’ surplus jew defiċit

Assi finanzjarju jiġi kklassifikat f’din il-kategorija jekk ikun akkwistat prinċipalment għall-fini ta’ bejgħ fit-terminu qasir jew jekk tkun għażlet hekk l-UE. Id-derivattivi jiġu kkategorizzati wkoll f’din il-kategorija. L-assi f’din il-kategorija jiġu kklassifikati bħala assi kurrenti jekk ikunu mistennija li jiġu realizzati fi żmien 12-il xahar mid-data tal-karta bilanċjali.

(II)Self u ammonti riċevibbli

Is-self u l-ammonti riċevibbli huma assi finanzjarji mhux derivattivi b’pagamenti fissi jew li jistgħu jiġu ddeterminati li mhumiex ikkwotati f’suq attiv. Dawn jinħolqu meta l-UE tipprovdi flus, oġġetti jew servizzi direttament lil debitur bl-ebda intenzjoni li jinnegozja l-ammonti riċevibbli, jew f’każ li l-UE hija surrogata għad-drittijiet tal-mutwanti oriġinali wara pagament imħallas mill-UE taħt kuntratt ta’ garanzija. Pagamenti dovuti fi żmien 12-il xahar mid-data tal-karta bilanċjali jiġu kklassifikati bħala assi kurrenti. Pagamenti dovuti wara 12-il xahar mid-data tal-karta bilanċjali jiġu kklassifikati bħala assi mhux kurrenti. Is-self u l-ammonti riċevibbli jinkludu depożiti ta’ żmien fiss, li l-maturità oriġinali tagħhom tkun ta’ aktar minn tliet xhur.

(III)Investimenti miżmuma sal-maturità

L-investimenti miżmuma sal-maturità huma assi finanzjarji mhux derivattivi b’pagamenti fissi jew li jistgħu jiġu ddeterminati u maturitajiet fissi li l-UE għandha l-intenzjoni pożittiva u l-kapaċità li żżomm sal-maturità. Matul din is-sena finanzjarja, l-UE ma żammet l-ebda investiment f’din il-kategorija.

(IV)Assi finanzjarji disponibbli għall-bejgħ

Assi finanzjarji disponibbli għall-bejgħ huma assi mhux derivattivi li jew huma kklassifikati f’din il-kategorija jew li ma huma kklassifikati fl-ebda waħda mill-kategoriji l-oħrajn. Huma kklassifikati bħala assi kurrenti jew mhux kurrenti, skont il-perjodu ta’ żmien li fih l-UE tistenna li żżommhom, li ġeneralment ikun id-data tal-maturità. Investimenti f’entitajiet li la huma konsolidati u lanqas kontabbilizzati bl-użu tal-metodu tal-ekwità u investimenti oħrajn ta’ tip ta’ ekwità (pereżempju, Operazzjonijiet ta’ Kapital tar-Riskju) huma kklassifikati wkoll bħala assi finanzjarji disponibbli għall-bejgħ.

Rikonoxximent u kejl inizjali

Ix-xiri u l-bejgħ ta’ assi finanzjarji skont il-valur ġust permezz ta’ surplus jew defiċit, miżmuma sal-maturità u disponibbli għall-bejgħ jiġu rikonoxxuti fid-data tan-negozju – id-data li fiha l-UE timpenja ruħha li tixtri jew tbiegħ l-assi. L-ekwivalenti ta’ flus u s-self jiġu rikonoxxuti meta l-flus jingħataw lill-mutwatarji. L-istrumenti finanzjarji jiġu inizjalment rikonoxxuti skont il-valur ġust. Għall-assi finanzjarji kollha mhux riportati skont il-valur ġust permezz ta’ surplus jew defiċit, l-ispejjeż tat-tranżazzjonijiet jiżdiedu mal-valur ġust fir-rikonoxximent inizjali. L-assi finanzjarji riportati skont il-valur ġust permezz ta’ surplus jew defiċit huma inizjalment rikonoxxuti skont il-valur ġust u l-ispejjeż tat-tranżazzjoni jiġu ddebitati fir-rapport tal-introjtu.

Il-valur ġust ta’ assi finanzjarju mar-rikonoxximent inizjali normalment ikun il-prezz tat-tranżazzjoni (jiġifieri l-valur ġust tal-korrispettiv riċevut), sakemm il-valur ġust ta’ dak l-istrument ma jintweriex permezz ta’ tqabbil ma’ tranżazzjonijiet tas-suq kurrenti osservabbli oħrajn fl-istess strument jew abbażi ta’ teknika ta’ valwazzjoni li l-varjabbli tagħha jinkludu biss data minn swieq osservabbli (eż. f’każ ta’ xi kuntratti tad-derivattivi). Madankollu, meta jingħata self fit-tul li ma jkollu ebda imgħax jew imgħax bil-kundizzjonijiet tas-suq, il-valur ġust tiegħu jista’ jkun stmat bħala l-valur preżenti tar-riċevuti ta’ flus kollha fil-ġejjieni skontati billi tintuża r-rata tal-imgħax tas-suq prevalenti għal strument simili bi klassifikazzjoni tal-kreditu simili.

Is-self mogħti jitkejjel bl-ammont nominali tiegħu, li jitqies li huwa l-valur ġust tas-self. Ir-raġunament għal dan huwa kif ġej:

-L-“ambjent tas-suq” għall-għoti b’self mill-UE huwa speċifiku ħafna u differenti mis-suq kapitali użat biex jinħarġu bonds kummerċjali jew tal-gvern. Billi l-mutwanti f’dawn is-swieq għandhom l-opportunità li jagħżlu investimenti alternattivi, il-possibbiltà ta’ opportunità tiddaħħal fil-kalkolu tal-prezzijiet tas-suq. Madankollu, din l-opportunità għal investimenti alternattivi ma teżistix għall-UE, li mhijiex permessa li tinvesti flus fis-swieq kapitali; hija tissellef biss fondi bl-iskop li ssellef bl-istess rata. Dan ifisser li ma hemm l-ebda għażla alternattiva ta’ għoti b’self jew investiment disponibbli għall-UE għas-somom meħuda b’self. Għalhekk, ma hemm l-ebda kost ta’ opportunità u għalhekk ma hemmx bażi ta’ paragun mar-rati tas-suq. L-operazzjoni nnifisha ta’ għoti b’self tal-UE tirrappreżenta lis-suq. Essenzjalment, billi l-“għażla” tal-kost ta’ opportunità mhijiex applikabbli, il-prezz tas-suq ma jirriflettix b’mod ġust is-sustanza tat-tranżazzjonijiet ta’ għoti b’self tal-UE. Għalhekk, mhuwiex xieraq li jiġi ddeterminat il-valur ġust tal-għoti b’self tal-UE b’referenza għal bonds kummerċjali jew tal-gvern.

-Barra minn hekk, minħabba li ma hemm l-ebda tranżazzjoni tas-suq attiv jew tranżazzjonijiet simili li wieħed jista’ jqabbel magħhom, ir-rata tal-imgħax li trid tintuża mill-UE għall-valwazzjoni ġusta tal-operazzjonijiet ta’ għoti b’self tagħha taħt l-EFSM, il-BOP u self simili ieħor, għandha tkun ir-rata tal-imgħax imposta.

-Barra minn hekk, għal dan is-self, hemm effetti kumpensatorji bejn l-għoti u t-teħid b’self minħabba l-karattru spalla ma’ spalla tagħhom. B’hekk, l-imgħax effettiv għas-self huwa daqs ir-rata effettiva tal-imgħax għat-teħid b’self relatat. Il-kostijiet tat-tranżazzjoni mġarrba mill-UE u mbagħad mitluba mill-ġdid lill-benefiċjarju tas-self huma direttament rikonoxxuti fir-rapport tal-introjtu.

L-istrumenti finanzjarji ma jibqgħux rikonoxxuti meta jiskadu d-drittijiet li jiġu riċevuti flussi ta’ flus mill-investimenti jew l-UE tkun ittrasferixxiet b’mod sostanzjali r-riskji u l-benefiċċji kollha tas-sjieda lil parti oħra.

Kejl sussegwenti

(I)L-assi finanzjarji skont il-valur ġust permezz ta’ surplus jew defiċit sussegwentement jiġu riportati skont il-valur ġust. Il-qligħ u t-telf li jirriżultaw minn bidliet fil-valur ġust tal-kategorija “strumenti finanzjarji skont il-valur ġust permezz ta’ surplus jew defiċit” huma inklużi fir-rapport tal-introjtu fil-perjodu meta jseħħu.

(II)Is-self u l-ammonti riċevibbli jiġu riportati bil-kost amortizzat bl-użu tal-metodu tal-imgħax effettiv. Fil-każ ta’ self mogħti fuq fondi meħuda b’self, l-istess rata effettiva tal-imgħax tiġi applikata kemm għall-għoti kif ukoll għat-teħid b’self, minħabba li dan is-self għandu l-karatteristiċi ta’ “operazzjonijiet spalla ma’ spalla” u d-differenzi bejn is-self u l-kundizzjonijiet u l-ammonti tat-teħid b’self mhumiex materjali. Il-kostijiet tat-tranżazzjoni mġarrba mill-UE u mbagħad mitluba lura lill-benefiċjarju tas-self huma direttament rikonoxxuti fir-rapport tal-introjtu.

(III)L-assi miżmuma sal-maturità jiġu riportati bil-kost amortizzat bl-użu tal-metodu tal-imgħax effettiv. Bħalissa, l-UE ma għandhiex investimenti miżmuma sal-maturità.

(IV)L-assi finanzjarji disponibbli għall-bejgħ sussegwentement jiġu riportati skont il-valur ġust. Il-qligħ u t-telf li jirriżultaw minn bidliet fil-valur ġust tal-assi finanzjarji disponibbli għall-bejgħ huma rikonoxxuti fir-riżerva tal-valur ġust, ħlief għad-differenzi fil-qlib fuq l-assi monetarji li huma rikonoxxuti fir-rapport tal-introjtu. Meta l-assi kklassifikati bħala assi finanzjarji disponibbli għall-bejgħ ma jibqgħux rikonoxxuti jew ikunu indeboliti, l-aġġustamenti kumulattivi skont il-valur ġust li qabel kienu rikonoxxuti fir-riżerva ta’ valur ġust huma rikonoxxuti fir-rapport tal-introjtu. L-imgħax fuq l-assi finanzjarji disponibbli għall-bejgħ ikkalkolat bl-użu tal-metodu tal-imgħax effettiv huwa rikonoxxut fir-rapport tal-introjtu. Id-dividendi fuq strumenti ta’ ekwità disponibbli għall-bejgħ jiġu rikonoxxuti meta jiġi stabbilit id-dritt li l-UE tirċievi l-pagament.

Il-valuri ġusti tal-investimenti kkwotati fi swieq attivi huma bbażati fuq il-prezzijiet kurrenti tax-xiri. Jekk is-suq għal assi finanzjarju ma jkunx attiv (u għal titoli mhux ikkwotati u derivattivi barra l-Borża), l-UE tistabbilixxi valur ġust billi tuża tekniki ta’ valwazzjoni. Dawn jinkludu l-użu ta’ tranżazzjonijiet distakkati riċenti, referenza għal strumenti oħrajn li huma sostanzjalment l-istess, analiżi tal-flussi tal-flus skontati, mudelli tal-ipprezzar tal-għażliet u tekniki ta’ valwazzjoni oħrajn li jintużaw ta’ spiss mill-parteċipanti fis-suq.

L-investimenti f’Fondi ta’ Kapital ta’ Riskju, ikklassifikati bħala assi finanzjarji disponibbli għall-bejgħ, li ma għandhomx prezz ikkwotat f’suq attiv, jiġu vvalutati bil-valur tal-assi netti attribwibbli, li jitqies bħala ekwivalenti tal-valur ġust tagħhom.

Fil-każijiet fejn il-valur ġust tal-investimenti fi strumenti ta’ ekwità li ma għandhomx prezz tas-suq ikkwotat f’suq attiv ma jkunx jista’ jitkejjel b’mod li wieħed jista’ jorbot fuqu, dawn l-investimenti jiġu vvalutati skont il-kost tagħhom nieqes it-telf minn indeboliment.

Indeboliment tal-assi finanzjarji

L-UE tivvaluta f’kull data tal-karta bilanċjali jekk hemmx evidenza oġġettiva li assi finanzjarju huwa indeboliti. Assi finanzjarju jkun indeboliti u b’hekk jiġġarrab telf minn indeboliment jekk, u biss jekk, ikun hemm evidenza oġġettiva ta’ indeboliment bħala riżultat ta’ avveniment wieħed jew aktar li seħħew wara r-rikonoxximent inizjali tal-assi u dak l-avveniment (jew avvenimenti) ta’ telf ikollhom impatt fuq il-flussi tal-flus futuri stmati tal-assi finanzjarju li jista’ jkun stmat b’mod affidabbli.

(a)Assi riportati bi prezz amortizzat

Jekk ikun hemm evidenza oġġettiva li ġġarrab telf minn indeboliment fuq self u ammonti riċevibbli jew investimenti miżmuma sal-maturità riportati bil-kost amortizzat, l-ammont tat-telf jitkejjel bħala d-differenza bejn l-ammont riportat tal-assi u l-valur preżenti tal-flussi tal-flus stmati fil-ġejjieni (minbarra t-telf ta’ kreditu futur li ma ġġarrabx) skontati bir-rata effettiva tal-imgħax oriġinali tal-assi finanzjarju. L-ammont riportat tal-assi jitnaqqas u l-ammont tat-telf jiġi rikonoxxut fir-rapport tal-introjtu. Jekk self jew investiment miżmum sal-maturità jkollu rata tal-imgħax varjabbli, ir-rata ta’ skont għall-kejl ta’ kwalunkwe telf minn indeboliment tkun ir-rata effettiva tal-imgħax attwali stabbilita skont il-kuntratt. Il-kalkolu tal-valur preżenti tal-flussi ta’ flus stmati fil-ġejjieni ta’ assi finanzjarju kollateralizzat jirrifletti l-flussi ta’ flus li jistgħu jirriżultaw minn esklużjoni li minnhom jitnaqqsu l-kostijiet għall-kisba u l-bejgħ tal-kollateral, kemm jekk esklużjoni hija probabbli kif ukoll jekk mhijiex. Jekk, f’perjodu sussegwenti, l-ammont tat-telf minn indeboliment jonqos u t-tnaqqis jista’ jkun relatat b’mod oġġettiv ma’ avveniment li jseħħ wara r-rikonoxximent tal-indeboliment, it-telf minn indeboliment rikonoxxut qabel jitreġġa’ lura permezz tar-rapport tal-introjtu.

(b)Assi riportati b’valur ġust

Fil-każ ta’ investimenti ta’ ekwità kklassifikati bħala assi finanzjarji disponibbli għall-bejgħ, tnaqqis sinifikanti jew permanenti (imtawwal) fil-valur ġust tat-titolu taħt il-kost tiegħu jiġi kkunsidrat fid-determinazzjoni ta’ jekk it-titoli humiex indeboliti. Jekk tkun teżisti evidenza bħal din għal assi finanzjarji disponibbli għall-bejgħ, it-telf kumulattiv – imkejjel bħala d-differenza bejn il-kost tal-akkwiżizzjoni u l-valur ġust kurrenti, nieqes kwalunkwe telf minn indeboliment fuq dak l-assi finanzjarju preċedentement rikonoxxut fir-rapport tal-introjtu – jitnaqqas mir-riżervi u jiġi rikonoxxut fir-rapport tal-introjtu. It-telf minn indeboliment rikonoxxut fir-rapport tal-introjtu fuq strumenti ta’ ekwità ma jitreġġax lura permezz tar-rapport tal-introjtu. Jekk, f’perjodu sussegwenti, jiżdied il-valur ġust ta’ strument ta’ dejn ikklassifikat bħala assi finanzjarju disponibbli għall-bejgħ u ż-żieda tista’ tkun relatata b’mod oġġettiv ma’ avveniment li jseħħ wara li jkun ġie rikonoxxut it-telf minn indeboliment, it-telf minn indeboliment jitreġġa’ lura permezz tar-rapport tal-introjtu.

9.Inventarji

L-inventarji huma ddikjarati skont l-inqas kost u valur nett realizzabbli. Il-kost jiġi ddeterminat bl-użu tal-metodu ta’ dak li jidħol l-ewwel joħroġ l-ewwel (“first-in, first-out” - FIFO). Il-kost tal-oġġetti lesti u tax-xogħol li jkun għadu għaddej jinkludi l-kostijiet tal-materja prima, tax-xogħol dirett u kostijiet oħrajn direttament attribwibbli, kif ukoll spejjeż fissi tal-produzzjoni relatati (ibbażati fuq kapaċità operatorja normali). Il-valur nett realizzabbli huwa l-prezz tal-bejgħ stmat fil-kors normali tan-negozju, nieqes il-kostijiet tat-tlestija u l-ispejjeż tal-bejgħ. Meta l-inventarji jinżammu għad-distribuzzjoni mingħajr ħlas jew bi ħlas nominali, dawn jitkejlu skont l-inqas kost u l-kost tas-sostituzzjoni attwali. Il-kost ta’ sostituzzjoni kurrenti huwa l-kost li ġġarrab l-UE sabiex tikseb l-assi fid-data tar-rapportar.

10.Ammonti tal-prefinanzjament

Prefinanzjament huwa pagament maħsub biex jipprovdi lill-benefiċjarju b’avvanz ta’ flus, jiġifieri float. Huwa jista’ jinqasam f’għadd ta’ pagamenti fuq perjodu definit fil-kuntratt, fid-deċiżjoni, fil-ftehim partikolari jew fl-att ġuridiku bażiku. Il-float jew l-avvanz jintuża għall-finijiet li għalihom ġie pprovdut matul il-perjodu definit fil-ftehim jew inkella jitħallas lura. Jekk il-benefiċjarju ma jġarrabx in-nefqa eliġibbli, huwa ma għandux l-obbligu li jrodd lura l-avvanz ta’ prefinanzjament lill-UE. L-ammont tal-prefinanzjament jista’ jitnaqqas (kompletament jew parzjalment) bl-aċċettazzjoni tal-kostijiet eliġibbli (li huma rikonoxxuti bħala spejjeż).

Il-prefinanzjament jitkejjel, f’dati sussegwenti tal-karta bilanċjali, fl-ammont inizjalment rikonoxxut fil-karta bilanċjali nieqes l-ispejjeż eliġibbli (inklużi l-ammonti stmati fejn meħtieġ) imġarrba matul il-perjodu.

L-imgħax fuq il-prefinanzjament jiġi rikonoxxut hekk kif jiġi akkumulat skont il-provvedimenti tal-ftehim rilevanti. Stima tad-dħul mill-imgħax dovut, fuq il-bażi tal-aktar informazzjoni affidabbli, issir fl-aħħar tas-sena u tiġi inkluża fil-karta bilanċjali.

Avvanzi oħrajn lil Stati Membri li joriġinaw minn rimborż mill-UE ta’ ammonti mħallsa bil-quddiem mill-Istati Membri lill-benefiċjarji tagħhom (inklużi “strumenti finanzjarji taħt ġestjoni kondiviża”) huma rikonoxxuti bħala assi u ppreżentati taħt l-intestatura tal-prefinanzjament. Avvanzi oħrajn lil Stati Membri sussegwentement jitkejlu bl-ammont inizjalment rikonoxxut fil-karta bilanċjali nieqes l-aħjar stima tal-ispejjeż eliġibbli mġarrba mill-benefiċjarji finali, ikkalkolat fuq il-bażi ta’ suppożizzjonijiet raġonevoli u li jistgħu jiġu appoġġati.

Il-kontribuzzjonijiet tal-UE fil-fondi fiduċjarji tal-Fond Ewropew għall-Iżvilupp jew lil entitajiet oħrajn mhux ikkonsolidati huma kklassifikati bħala prefinanzjament minħabba li l-għan tagħhom hu li jagħtu float għall-fond fiduċjarju sabiex dan ikun jista’ jiffinanzja azzjonijiet speċifiċi definiti skont l-għanijiet tal-fond fiduċjarju. Il-kontribuzzjonijiet tal-UE fil-fondi fiduċjarji jitkejlu fl-ammont inizjali ta’ kontribuzzjoni tal-UE nieqes l-ispejjeż eliġibbli, inklużi l-ammonti stmati, fejn ikunu meħtieġa, imġarrba mill-fond fiduċjarju matul il-perjodu tar-rapportar u allokati għall-kontribuzzjoni tal-UE f’konformità mal-ftehim sottostanti.

11.Ammonti riċevibbli ta’ skambju u ammonti rikoverabbli mhux ta’ skambju

Billi r-regoli tal-kontabbiltà tal-UE jeħtieġu preżentazzjoni separata tat-tranżazzjonijiet ta’ skambju u ta’ dawk mhux ta’ skambju, għall-fini tat-tfassil tal-kontijiet, l-ammonti riċevibbli huma definiti bħala li jirriżultaw minn tranżazzjonijiet ta’ skambju u l-ammonti rikoverabbli huma definiti bħala li jirriżultaw minn tranżazzjonijiet mhux ta’ skambju, jiġifieri meta l-UE tirċievi valur mingħand entità oħra mingħajr ma tagħti direttament prezz fil-borża bejn wieħed u ieħor ugwali (pereżempju, ammonti rikoverabbli minn Stati Membri relatati mar-riżorsi proprji).

Il-ammonti riċevibbli minn tranżazzjonijiet ta’ skambju jissodisfaw id-definizzjoni ta’ strumenti finanzjarji u, b’hekk, huma kklassifikati bħala self u ammonti riċevibbli u mkejla kif xieraq (ara n-Nota 1.5.5). Id-divulgazzjonijiet fin-noti tal-istrumenti finanzjarji li jikkonċernaw il-ammonti riċevibbli minn tranżazzjonijiet ta’ skambju jinkludu l-introjtu dovut u l-imposti differiti minn tranżazzjonijiet ta’ skambju, minħabba li mhumiex materjali.

L-ammonti rikoverabbli minn tranżazzjonijiet mhux ta’ skambju jiġu riportati fl-ammont oriġinali (aġġustat għal imgħax u penali) nieqes il-valwazzjoni negattiva għal indeboliment. Valwazzjoni negattiva għal indeboliment ta’ ammonti rikoverabbli minn tranżazzjonijiet mhux ta’ skambju tiġi stabbilita meta jkun hemm evidenza oġġettiva li l-UE mhijiex se tkun tista’ tiġbor l-ammonti kollha dovuti skont it-termini oriġinali tal-ammonti rikoverabbli minn tranżazzjonijiet mhux ta’ skambju. L-ammont tal-valwazzjoni negattiva huwa d-differenza bejn l-ammont riportat tal-assi u l-ammont rikoverabbli. L-ammont tal-valwazzjoni negattiva huwa rikonoxxut fir-rapport tal-introjtu. Issir ukoll valwazzjoni negattiva ġenerali, abbażi tal-esperjenza tal-passat, għal ordnijiet ta’ rkupru pendenti li mhumiex diġà soġġetti għal valwazzjoni negattiva speċifika. Ara n-Nota 1.5.14 dwar it-trattament ta’ dħul dovut fi tmiem is-sena. L-ammonti rikoverabbli murija u divulgati minn tranżazzjonijiet mhux ta' skambju mhumiex strumenti finanzjarji peress li ma jirriżultawx minn kuntratt li jwassal għal obbligazzjoni finanzjarja jew strument ta' ekwità. Madankollu, fin-noti għar-rapporti finanzjarji, l-ammonti rikoverabbli minn tranżazzjonijiet mhux ta’ skambju huma divulgati flimkien mal-ammonti riċevibbli minn tranżazzjonijiet ta’ skambju, fejn xieraq.

12.Flus u l-ekwivalenti ta’ flus

Il-flus u l-ekwivalenti ta’ flus huma strumenti finanzjarji u jinkludu kontanti, depożiti miżmuma fuq talba jew b’avviż ta’ malajr mal-banek u investimenti ferm likwidi oħrajn għal perjodu ta’ żmien qasir bil-maturitajiet oriġinali ta’ tliet xhur jew inqas.

13.Pensjoni u benefiċċji oħrajn tal-impjegati

Obbligi tal-pensjoni

L-UE topera pjanijiet ta’ pensjoni b’benefiċċji definiti. Filwaqt li l-membri tal-persunal jikkontribwixxu mis-salarju tagħhom terz tal-kost mistennija ta’ dawn il-benefiċċji, l-obbligazzjoni ma tiġix iffinanzjata. L-obbligazzjoni rikonoxxuta fil-karta bilanċjali fir-rigward tal-pjanijiet tal-pensjoni b’benefiċċji definiti hija l-valur preżenti tal-obbligu tal-benefiċċju definit fid-data tal-karta bilanċjali nieqes il-valur ġust ta’ kwalunkwe assi tal-pjan. L-obbligu tal-benefiċċju definit jiġi kkalkolat minn attwarji bl-użu tal-metodu ta’ kreditu għal kull unità proġettata. Il-valur preżenti tal-obbligu tal-benefiċċju definit jiġi ddeterminat billi l-ħruġ tal-flus stmat fil-futur jiġi skontat bl-użu ta’ rati tal-imgħax ta’ bonds tal-gvern li huma denominati fil-munita li biha jitħallsu l-benefiċċji u li għandhom termini ta’ maturità li joqorbu lejn it-termini tal-obbligazzjoni tal-pensjoni relatata.

Il-qligħ u t-telf attwarjali li ġejjin mill-aġġustamenti u l-allokazzjoni tal-esperjenza fis-suppożizzjonijiet attwarjali jiġu rikonoxxuti minnufih fir-rapport tal-introjtu. Il-kostijiet tas-servizz passat huma rikonoxxuti minnufih fir-rapport tal-introjtu, sakemm il-bidliet fil-pjan tal-pensjonijiet ma jkunx kundizzjonali fuq il-fatt li l-impjegati jibqgħu fis-servizz għal perjodu ta’ żmien speċifikat (il-perjodu tal-vestiment). F’dan il-każ, il-kostijiet tas-servizzi mogħtija fil-passat jiġu amortizzati fuq bażi ta’ linja dritta waqt il-perjodu tal-vestiment.

Benefiċċji tal-mard ta’ wara l-impjieg

L-UE tipprovdi benefiċċji tas-saħħa lill-impjegati tagħha permezz ta’ rimborż tal-ispejjeż mediċi. Inħoloq fond separat għall-amministrazzjoni ta’ kuljum tagħha. Mis-sistema jibbenifikaw kemm l-impjegati attwali, kif ukoll il-pensjonanti, ir-romol u l-qraba tagħhom. Il-benefiċċji mogħtija lill-persuni “inattivi” (pensjonanti, orfni, eċċ.) huma kklassifikati bħala “Benefiċċji tal-Impjegati ta’ Wara l-Impjieg”. Minħabba n-natura ta’ dawn il-benefiċċji, huwa meħtieġ kalkolu attwarju. L-obbligazzjoni fil-karta bilanċjali tiġi stabbilita b’mod simili bħal fil-każ ta’ obbligi tal-pensjoni (ara aktar ’il fuq).

14.Provvedimenti

Il-provvedimenti jiġu rikonoxxuti meta l-UE jkollha obbligu legali jew kostruttiv preżenti lejn partijiet terzi bħala riżultat ta’ avvenimenti tal-passat, ikun aktar probabbli milli le li jkun hemm bżonn ta’ fluss ta’ ħruġ ta’ riżorsi għas-saldu tal-obbligu u l-ammont ikun jista’ jiġi stmat b’mod affidabbli. Mhumiex rikonoxxuti provvedimenti għal telf operatorju fil-ġejjieni. L-ammont tal-provvediment huwa l-aħjar stima tal-ispejjeż li mistennija jkunu meħtieġa biex jiġi saldat l-obbligu preżenti fid-data tar-rapportar. Fejn il-provvediment jinvolvi għadd kbir ta’ entrati, l-obbligu jiġi stmat billi jiġu ponderati l-eżiti kollha possibbli skont il-probabbiltajiet assoċjati tagħhom (il-metodu tal-“valur mistenni”).

15.Obbligazzjonijiet finanzjarji

L-obbligazzjonijiet finanzjarji huma kklassifikati bħala obbligazzjonijiet finanzjarji skont il-valur ġust permezz ta’ surplus jew defiċit jew bħala obbligazzjonijiet finanzjarji riportati bil-kost amortizzat. Is-self meħud jikkonsisti f’self meħud minn istituzzjonijiet ta’ kreditu u djun ipprovati minn ċertifikati. Huma jiġu rikonoxxuti inizjalment skont il-valur ġust, bħala r-rikavat mill-ħruġ tagħhom (il-valur ġust tal-korrispettiv riċevut) nett mill-kostijiet tat-tranżazzjoni mġarrba, imbagħad sussegwentement jiġu riportati bil-kost amortizzat bl-użu tal-metodu tal-imgħax effettiv; kwalunkwe differenza bejn ir-rikavat, nett mill-kostijiet tat-tranżazzjoni, u l-prezz tal-fidwa tiġi rikonoxxuta fir-rapport tal-introjtu matul il-perjodu tat-teħid b’self bl-użu tal-metodu tal-imgħax effettiv.

L-obbligazzjonijiet finanzjarji huma kklassifikati bħala obbligazzjonijiet mhux kurrenti, għajr għall-maturitajiet ta’ inqas minn 12-il xahar wara d-data tal-karta bilanċjali. Fil-każ tas-self mogħti fuq fondi missellfa, il-metodu tal-imgħax effettiv ma jistax jiġi applikat separatament għall-għoti u t-teħid b’self, fuq il-bażi ta’ kunsiderazzjonijiet ta’ materjalità. Il-kostijiet tat-tranżazzjoni mġarrba mill-UE u mbagħad mitluba lura lill-benefiċjarju tas-self jiġu direttament rikonoxxuti fir-rapport tal-introjtu.

Il-fondi fiduċjarji tal-UE li huma meqjusa bħala parti mill-attivitajiet operattivi tal-Kummissjoni jiġu kkontabilizzati fil-kontijiet tal-Kummissjoni u kkonsolidati ulterjorment fil-kontijiet annwali tal-UE. Għalhekk, il-kontribuzzjonijiet minn donaturi oħrajn għall-fondi fiduċjarji tal-UE jissodisfaw il-kriterji tad-dħul minn tranżazzjonijiet mhux ta’ skambju skont ċerti kundizzjonijiet u jiġu ppreżentati bħala obbligazzjonijiet finanzjarji sakemm jiġu ssodisfati l-kundizzjonijiet mehmuża mal-kontribuzzjonijiet ittrasferiti, jiġifieri jiġġarrbu l-ispejjeż eliġibbli mill-fond fiduċjarju. Il-fond fiduċjarju huwa meħtieġ biex jiffinanzja proġetti speċifiċi u jagħti lura l-bqija tal-fondi fil-mument tal-istralċ. Fid-data tal-karta bilanċjali, l-obbligazzjonijiet pendenti tal-kontribuzzjoni jitkejlu f’kontribuzzjonijiet riċevuti neqsin l-ispejjeż imġarrba mill-fond fiduċjarju, inklużi l-ammonti stmati, meta meħtieġ. Għall-finijiet ta’ rapportar, l-ispejjeż netti jiġu allokati għall-kontribuzzjonijiet ta’ donaturi oħrajn fi proporzjon għall-kontribuzzjonijiet netti mħallsin fil-31 ta’ Diċembru. Din l-allokazzjoni ta’ kontribuzzjonijiet hija biss indikattiva. Meta l-fond fiduċjarju jiġi stralċat, il-qasma attwali tar-riżorsi li jifdal tiġi deċiża mill-bord tal-fond fiduċjarju.

L-obbligazzjonijiet finanzjarji kategorizzati skont il-valur ġust permezz ta’ surplus jew defiċit jinkludu derivattivi meta l-valur ġust tagħhom ikun negattiv. Huma jingħataw l-istess trattament kontabilistiku bħall-assi finanzjarji skont il-valur ġust permezz ta’ surplus jew defiċit, ara n-Nota 1.5.5.

16.Ammonti pagabbli

Ammont sinifikanti mill-ammonti pagabbli tal-UE huma pretensjonijiet ta’ kostijiet mhux imħallsin mill-benefiċjarji ta’ għotjiet jew finanzjament ieħor mill-UE (tranżazzjonijiet mhux ta’ skambju). Huma jiġu rreġistrati bħala ammonti pagabbli għall-ammont mitlub meta tiġi riċevuta l-pretensjoni tal-kostijiet. Wara verifika u aċċettazzjoni tal-kostijiet eliġibbli, l-ammonti pagabbli jiġu vvalutati fl-ammont aċċettat u eliġibbli.

Pagabbli li ġejjin mix-xiri ta’ prodotti u servizzi jiġu rikonoxxuti mar-riċevuta tal-fattura għall-ammont oriġinali u l-ispejjeż korrispondenti jiddaħħlu fil-kontijiet meta l-provvisti jew is-servizzi jiġu fornuti u aċċettati mill-UE.

17.Introjtu u imposti dovuti u differiti

It-tranżazzjonijiet u l-avvenimenti huma rikonoxxuti fir-rapporti finanzjarji fil-perjodu li miegħu huma relatati. Fl-aħħar tas-sena, jekk fattura tkun għadha ma nħarġitx iżda s-servizz ikun ingħata, il-provvisti jkunu ġew ikkonsenjati mill-UE, jew ikun jeżisti ftehim kuntrattwali (pereżempju, b’referenza għal trattat), dħul dovut jiġi rikonoxxut fir-rapporti finanzjarji. Barra minn hekk, fl-aħħar tas-sena, jekk tinħareġ fattura iżda s-servizzi jkunu għadhom ma ġewx ipprovduti jew l-oġġetti fornuti jkunu għadhom ma ġewx ikkonsenjati, id-dħul jiġi differit u rikonoxxut fil-perjodu kontabilistiku sussegwenti.

L-ispejjeż jiġu kkontabilizzati wkoll fil-perjodu li miegħu jkunu relatati. Fl-aħħar tal-perjodu kontabilistiku, l-ispejjeż dovuti jiġu rikonoxxuti fuq il-bażi ta’ ammont stmat tal-obbligu tat-trasferiment għall-perjodu. Il-kalkolu tal-ispejjeż dovuti jsir f’konformità mal-linji gwida operazzjonali u prattiċi dettaljati maħruġa mill-Kummissjoni, li għandhom l-għan li jiżguraw li r-rapporti finanzjarji jagħtu rappreżentazzjoni leali tal-fenomeni ekonomiċi u oħrajn li huma jippretendu li jirrappreżentaw. Permezz ta’ analoġija, jekk ikun sar ħlas bil-quddiem għal servizzi jew oġġetti li jkunu għadhom ma ġewx riċevuti, l-ispiża tiġi differita u rikonoxxuta fil-perjodu kontabilistiku sussegwenti.

17.1.RAPPORT TAL-INTROJTU

18.Dħul

DĦUL MINN TRANŻAZZJONIJIET MHUX TA’ SKAMBJU

Il-maġġoranza kbira tad-dħul tal-UE huwa relatat mat-tranżazzjonijiet mhux ta’ skambju:

Riżorsi bbażati fuq l-ING u r-riżorsi mill-VAT

Id-dħul huwa rikonoxxut għall-perjodu li fih il-Kummissjoni Ewropea tibgħat sejħa għal fondi lill-Istati Membri, fejn hija titlob il-kontribuzzjoni tagħhom. Huma jitkejlu skont “l-ammont eżerċitat” tagħhom. Billi r-riżorsi mill-VAT u mill-ING huma bbażati fuq estimi tad-data għas-sena baġitarja kkonċernata, huma jistgħu jiġu riveduti skont il-bidliet li jseħħu sakemm tinħareġ id-data finali mill-Istati Membri. L-effett ta’ bidla fl-istima jiġi inkluż meta jiġi ddeterminat is-surplus jew id-defiċit nett għal dak il-perjodu li fih tkun seħħet il-bidla.

Riżorsi proprji tradizzjonali

L-ammonti rikoverabbli minn tranżazzjoni mhux ta’ skambju u d-dħul relatat huma rikonoxxuti meta d-dikjarazzjonijiet rilevanti tat-tip "A" ta’ kull xahar (li jinkludu d-dazji miġbura u l-ammonti dovuti li huma garantiti u mhux ikkontestati) jaslu għand l-Istati Membri. Fid-data tar-rapportar, id-dħul miġbur mill-Istati Membri għall-perjodu, iżda li jkun għadu ma tħallasx lill-Kummissjoni Ewropea, jiġi stmat u rikonoxxut bħala introjtu dovut. Id-dikjarazzjonijiet tat-tip “B” ta’ kull trimestru (li jinkludu dazji li la huma miġbura u lanqas garantiti, kif ukoll ammonti garantiti li ġew ikkontestati mid-debitur) li jaslu għand l-Istati Membri jiġu rikonoxxuti bħala dħul wara li jitnaqqsu minnhom il-kostijiet tal-ġbir li għalih huma intitolati. Barra minn hekk, tnaqqis fil-valur huwa rikonoxxut għall-ammont stmat tad-differenza fl-irkupru.

Multi

L-ammonti riċevibbli u d-dħul relatat huma rikonoxxuti meta d-deċiżjoni tal-UE li timponi multa tkun ittieħdet u tkun ġiet innotifikata b’mod uffiċjali lid-destinatarju. Jekk ikun hemm dubji dwar is-solvenza tal-impriża, għandu jiġi rikonoxxut tnaqqis fil-valur tal-intitolament. Wara d-deċiżjoni li tiġi imposta l-multa, id-debituri għandhom xahrejn mid-data tan-notifika biex:

-jew jaċċettaw id-deċiżjoni, u b’hekk ikollhom iħallsu l-multa fiż-żmien stipulat u l-ammont jinġabar b’mod definittiv mill-UE;

-jew ma jaċċettawx id-deċiżjoni, u f'dak il-każ jappellaw skont il-liġi tal-UE.

Madankollu, anki jekk ikun hemm l-appell, il-multa għandha titħallas fiż-żmien stipulat ta’ tliet xhur billi l-appell ma għandux l-effett ta’ sospensjoni (l-Artikolu 278 tat-Trattat tal-UE) jew, taħt ċerti ċirkustanzi u suġġett għall-qbil mal-Uffiċjal tal-Kontabbiltà tal-Kummissjoni, id-debitur jista’ minflok jippreżenta garanzija bankarja għall-ammont.

Jekk l-impriża tappella kontra d-deċiżjoni, u tkun diġà ħallset il-multa b’mod proviżorju, l-ammont jiġi ddivulgat bħala obbligazzjoni kontinġenti. Madankollu, billi appell tad-destinatarju kontra deċiżjoni tal-UE ma għandux effett ta’ sospensjoni, il-flus riċevuti jintużaw biex jillikwidaw l-ammont rikoverabbli. Jekk tiġi riċevuta garanzija minflok ħlas, il-multa tibqa’ bħala ammont rikoverabbli. Jekk ikun jidher probabbli li l-Qorti Ġenerali ma tkunx se tiddeċiedi favur l-UE, jiġi rikonoxxut provvediment sabiex ikopri dan ir-riskju. Jekk minflok tkun ingħatat garanzija, allura l-ammont rikoverabbli pendenti jkun imnaqqas kif meħtieġ. L-imgħax dovut riċevut mill-Kummissjoni Ewropea fil-kontijiet bankarji fejn jiġu ddepożitati l-pagamenti riċevuti huwa rikonoxxut bħala dħul, u kwalunkwe obbligazzjoni kontinġenti tiżdied kif xieraq.

Mill-2010, il-multi kollha msarrfin b’mod proviżorju bdew jiġu amministrati mill-Kummissjoni f’fond maħluq speċifikament (BUFI) u investiti fi strumenti finanzjarji.

DĦUL MINN TRANŻAZZJONIJIET TA’ SKAMBJU

Dħul mill-bejgħ ta’ oġġetti huwa rikonoxxut meta r-riskju u l-benefiċċji sinifikanti tas-sjieda tal-oġġetti jiġu trasferiti lix-xerrej. Dħul assoċjat ma’ tranżazzjoni li tinvolvi l-forniment ta’ servizzi huwa rikonoxxut b’referenza għall-istadju ta’ twettiq tat-tranżazzjoni fid-data tar-rapportar.

Introjtu u spejjeż mill-imgħax

L-introjtu u l-ispejjeż mill-imgħax jiġu rikonoxxuti fir-rapport tal-introjtu billi jintuża l-metodu tal-imgħax effettiv. Dan huwa metodu li jintuża sabiex jiġi kkalkolat il-kost amortizzat ta’ assi finanzjarju jew ta’ obbligazzjoni finanzjarja u sabiex jiġi allokat l-introjtu mill-imgħax jew l-ispiża tal-imgħax matul il-perjodu rilevanti. Meta tikkalkula r-rata effettiva tal-imgħax, l-UE tistma l-flussi tal-flus wara li tikkunsidra t-termini kuntrattwali kollha tal-istrument finanzjarju (pereżempju, għażliet ta’ prepagament) iżda ma tqisx it-telf ta’ kreditu fil-ġejjieni. Il-kalkolu jinkludi l-onorarji u l-punti kollha mħallsa jew riċevuti bejn il-partijiet fil-kuntratt li huma parti integrali mir-rata effettiva tal-imgħax, mill-ispejjeż tat-tranżazzjoni u mill-primjums jew l-iskontijiet l-oħrajn kollha.

Ladarba assi finanzjarju jew grupp ta’ assi finanzjarji simili jkun tniżżel fil-valur minħabba telf minn indeboliment, l-introjtu mill-imgħax jiġi rikonoxxut billi tintuża r-rata tal-imgħax biex jiġu skontati l-flussi ta’ flus futuri għall-fini tal-kejl tat-telf minn indeboliment.

Introjtu minn dividendi

L-introjtu minn dividendi jiġi rikonoxxut meta jiġi stabbilit id-dritt li jiġi riċevut ħlas.

19.Spejjeż

L-ispejjeż minn tranżazzjonijiet mhux ta’ skambju jirrappreżentaw il-maġġoranza tal-ispejjeż tal-UE. Huma jirrigwardjaw it-trasferimenti lill-benefiċjarji u jistgħu jkunu ta’ tliet tipi: intitolamenti, trasferimenti bi ftehim u għotjiet diskrezzjonarji, kontribuzzjonijiet u donazzjonijiet.

It-trasferimenti huma rikonoxxuti bħala spejjeż fil-perjodu li matulu jkunu seħħew l-avvenimenti li wasslu għat-trasferiment, sakemm in-natura tat-trasferiment tkun permessa mir-regolament (ir-Regolament Finanzjarju, ir-Regolamenti tal-Persunal jew regolament ieħor) jew ikun ġie ffirmat ftehim li jawtorizza t-trasferiment; kwalunkwe kriterji tal-eliġibbiltà jkunu ġew issodisfati mill-benefiċjarju; u tkun tista’ ssir stima raġonevoli tal-ammont.

Meta tiġi riċevuta talba għal ħlas jew pretensjoni tal-kost u din tissodisfa l-kriterji ta’ rikonoxximent, hija tiġi rikonoxxuta bħala spiża għall-ammont eliġibbli. Fl-aħħar tas-sena, l-ispejjeż eliġibbli mġarrba dovuti lill-benefiċjarji, iżda li jkunu għadhom ma ġewx irrapportati, jiġu stmati u rreġistrati bħala spejjeż dovuti.

L-ispejjeż minn tranżazzjonijiet ta’ skambju li ġejjin mix-xiri ta’ oġġetti u servizzi jiġu rikonoxxuti meta l-provvisti jiġu fornuti u aċċettati mill-UE. Dawn jiġu vvalutati skont l-ammont oriġinali tal-fattura. Barra minn hekk, fid-data tal-karta bilanċjali, l-ispejjeż relatati mas-servizz mogħti matul il-perjodu li għalih ma tkunx għadha waslet jew aċċettata fattura jkunu stmati u rikonoxxuti fir-rapport tal-introjtu.

19.1.ASSI U OBBLIGAZZJONIJIET KONTINĠENTI

20.Assi kontinġenti

Assi kontinġenti huwa assi possibbli li jirriżulta minn avvenimenti tal-passat u li l-eżistenza tagħhom tiġi kkonfermata biss meta jseħħ jew ma jseħħx avveniment inċert wieħed jew aktar fil-futur mhux totalment fil-kontroll tal-UE. Assi kontinġenti jiġi divulgat meta jkun probabbli influss ta’ benefiċċji ekonomiċi jew potenzjal ta’ servizz.

21.Obbligazzjonijiet kontinġenti

Obbligazzjoni kontinġenti hija obbligu possibbli li jirriżulta minn avvenimenti tal-passat u li l-eżistenza tagħhom tiġi kkonfermata biss meta jseħħ jew ma jseħħx avveniment inċert wieħed jew aktar fil-futur mhux totalment fil-kontroll tal-UE; jew obbligu preżenti li jirriżulta minn avvenimenti tal-passat iżda li mhuwiex rikonoxxut minħabba li: mhuwiex probabbli li jkun meħtieġ fluss ta’ ħruġ ta’ riżorsi li jinkorporaw benefiċċji ekonomiċi jew potenzjal ta’ servizz għas-saldu tal-obbligu jew fiċ-ċirkostanzi rari fejn l-ammont tal-obbligu ma jkunx jista’ jitkejjel b’affidabbiltà suffiċjenti.

21.1.RAPPORT TAL-FLUSS TAL-FLUS

L-informazzjoni dwar il-fluss tal-flus tintuża biex tipprovdi bażi għall-valutazzjoni ta’ kemm l-UE hija kapaċi tiġġenera l-flus u l-ekwivalenti ta’ flus, u l-ħtiġijiet tagħha biex tuża dawk il-flussi tal-flus.

Ir-rapport tal-fluss tal-flus jitħejja billi jintuża l-metodu indirett. Dan ifisser li r-riżultat ekonomiku għas-sena finanzjarja jiġi aġġustat skont l-effetti ta’ tranżazzjonijiet ta’ natura mhux ta’ flus, kwalunkwe differiment jew akkumulazzjoni ta’ riċevuti ta’ flus jew pagamenti operatorji, kemm passati kif ukoll futuri, u entrati ta’ dħul jew infiq assoċjati mal-flussi tal-flus tal-investimenti.

Il-flussi ta’ flus li jirriżultaw minn tranżazzjonijiet f’munita barranija jiġu rreġistrati fil-munita tar-rapportar tal-UE (Euro), billi tiġi applikata, għall-ammont ta’ flus fil-munita barranija, ir-rata tal-kambju bejn l-euro u l-munita barranija fid-data tal-fluss ta’ flus.

Ir-rapport tal-fluss tal-flus jirrapporta flussi ta’ flus matul il-perjodu kklassifikat skont attivitajiet operatorji u ta’ investiment (l-UE ma għandhiex attivitajiet ta’ finanzjament).

Attivitajiet operatorji huma l-attivitajiet tal-UE li mhumiex attivitajiet ta’ investiment. Dawn huma l-maġġoranza tal-attivitajiet imwettqa. Self mogħti lill-benefiċjarji (u l-għotjiet b'self relatati, meta applikabbli) mhumiex ikkunsidrati bħala attivitajiet ta’ investiment (jew finanzjament) minħabba li huma parti mill-objettivi ġenerali u għalhekk huma operazzjonijiet ta’ kuljum tal-UE. L-attivitajiet operatorji jinkludu wkoll investimenti bħal fil-Fond Ewropew tal-Investiment (FEI), fil-Bank Ewropew għar-Rikostruzzjoni u l-Iżvilupp (BERŻ) u f’fondi ta’ kapital ta’ riskju. Tabilħaqq, l-għan ta’ dawn l-attivitajiet huwa li jikkontribwixxu sabiex jintlaħqu l-objettivi tal-politika.

L-attivitajiet ta’ investiment huma l-akkwiżizzjoni u d-disponiment ta’ assi intanġibbli u proprjetà, impjanti u tagħmir u ta’ investimenti oħrajn li mhumiex inklużi fl-ekwivalenti ta’ flus. L-attivitajiet ta’ investiment ma jinkludux is-self mogħti lill-benefiċjarji. L-għan huwa li jintwerew l-investimenti reali li jsiru mill-UE.

22.NOTI GĦALL-KARTA BILANĊJALI

ASSI

22.1.ASSI INTANĠIBBLI

L-ammonti ta’ hawn fuq huma primarjament relatati ma’ softwer tal-kompjuter.

22.2.PROPRJETÀ, IMPJANTI U TAGĦMIR

Il-kategorija tal-Assi spazjali tkopri l-assi fissi relatati maż-żewġ programmi spazjali tal-UE: is-Sistemi Globali ta’ Navigazzjoni bis-Satellita (GNSS) - Galileo u EGNOS, kif ukoll il-programm Ewropew ta’ osservazzjoni tad-Dinja msejjaħ Copernicus. Fl-2015, l-assi fissi relatati ma’ EGNOS u Copernicus, li jammontaw għal EUR 584 miljun, ġew inklużi taħt il-kategorija Impjanti u Tagħmir.

Għal Galileo, wara d-dikjarazzjoni tas-Servizzi Inizjali ta’ Galileo fil-15 ta’ Diċembru 2016, ġie ttrasferit bilanċ ta’ EUR 2 165 miljun ta’ satelliti u assi tas-segment tal-art mill-assi li qegħdin jinbnew għall-assi fissi, inklużi 14-il satellita operazzjonali ta’ Galileo, kif ukoll l-infrastruttura fuq l-art. L-assi fissi operazzjonali ta’ Galileo kienu jammontaw għal EUR 2 146 miljun fil-31 ta’ Diċembru 2016, netti minn deprezzament. L-assi li jifdal li qegħdin jinbnew u li jammontaw għal EUR 756 miljun (2015: EUR 2 110 miljun) jinkludu 4 satelliti llanċjati fl-2016, iżda li għalihom l-ittestjar fl-orbita jkun għadu ma tlestiex fid-data tal-karta bilanċjali. L-iżvilupp tas-sistema Galileo se jkompli sakemm is-sistema tilħaq il-kapaċità operattiva sħiħa tagħha. Meta titlesta, il-kostellazzjoni Galileo se tinkludi 30 satellita.

Fir-rigward ta’ Copernicus, EUR 1 073 miljun li jikkonċernaw is-satelliti ta’ Copernicus li qegħdin joperaw (Sentinelli 1A, 2A, 3A u 1B) huma rikonoxxuti taħt l-intestatura Assi spazjali (2015: EUR 498 miljun), netti mid-deprezzament akkumulat. EUR 1 133 miljun oħrajn relatati mas-satelliti ta’ Copernicus huma rikonoxxuti bħala assi li qegħdin jinbnew (2015: EUR 1 188 miljun).

L-assi fissi relatati mal-infrastruttura fuq l-art tas-Sistema Ewropea ta’ Navigazzjoni b’Kopertura Ġeostazzjonarja (EGNOS) ta’ EUR 83 miljun (2015: EUR 85 miljun) huma inklużi wkoll taħt l-intestatura Assi spazjali. Barra minn hekk, l-assi tal-EGNOS li qegħdin jinbnew jammontaw għal EUR 21 miljun (2015: EUR 14-il miljun).

L-assi relatati mal-programmi spazjali tal-UE qegħdin jinbnew bl-assistenza tal-Aġenzija Spazjali Ewropea (ESA).

Proprjetà, impjanti u tagħmir

22.3.INVESTIMENTI MAGĦDUDA BL-UŻU TAL-METODU TAL-EKWITÀ

23.Parteċipazzjonijiet f’impriżi konġunti

Hemm għadd ta’ entitajiet parzjalment iffinanzjati mill-UE li jissodisfaw ir-rekwiżiti li jridu jiġu kkontabilizzati bl-użu tal-metodu ta’ ekwità fir-rapporti finanzjarji konsolidati tal-UE, iżda li huma immaterjali għar-rapporti finanzjarji b’mod ġenerali, u għalhekk ma ġewx kkontabilizzati bl-użu tal-metodu ta’ ekwità fl-istrumenti finanzjarji konsolidati tal-2016. Dawn l-entitajiet issir referenza għalihom bħala ‘Entitajiet Minuri’ - ara n-Nota 1.3. Kull sena titwettaq valutazzjoni tal-immaterjalità sabiex tiddetermina jekk din l-esklużjoni tkomplix tkun ġustifikata. Il-kontribuzzjonijiet tal-UE lil dawn l-entitajiet ġew kkontabilizzati bħala spiża. In-Nota 9 tinkludi l-lista ta’ dawk l-entitajiet fl-2016.

24.Parteċipazzjonijiet f’assoċjati

Il-parteċipazzjoni tal-UE fil-Fond Ewropew tal-Investiment (FEI) hija ttrattata bħala kumpanija assoċjata bl-użu tal-metodu kontabilistiku tal-ekwità. Il-FEI huwa l-istituzzjoni finanzjarja tal-UE li tispeċjalizza fil-forniment ta’ kapital ta’ riskju u garanziji lil Entitajiet Żgħar u ta’ Daqs Medju (SMEs). Il-FEI jinsab fil-Lussemburgu u jopera bħala sħubija pubblika-privata, li l-membri tagħha huma l-Bank Ewropew tal-Investiment (BEI), l-UE u grupp ta’ istituzzjonijiet finanzjarji. Fil-31 ta’ Diċembru 2016, l-UE kellha 28,1 % tal-interessi tas-sjieda fil-FEI (2015: 26,5 %) u 28,1 % tad-drittijiet tal-vot (2015: 26,5 %). F’konformità mal-istatuti tiegħu, il-FEI huwa meħtieġ li jalloka għal riżerva statutorja ta’ mill-inqas 20 % tal-profitt nett annwali tiegħu sakemm ir-riżerva aggregata tkun tammonta għal 10 % tal-kapital sottoskritt. Din ir-riżerva mhijiex disponibbli għad-distribuzzjoni.

L-ammonti riportati li ġejjin huma attribwibbli għall-UE abbażi tal-perċentwal tal-parteċipazzjoni tagħha:

L-UE ħallset 20 % tal-parteċipazzjoni tagħha, bil-bilanċ li mhuwiex eżerċitat jikkorrispondi għal ammont ta’ EUR 986 miljun.

24.1.ASSI FINANZJARJI

25.Assi finanzjarji disponibbli għall-bejgħ

*    L-ammonti tas-sena preċedenti huma relatati mal-Inizjattiva tal-Bonds tal-Proġetti u l-Istrument ta’ Garanzija fuq is-Self għall-proġetti tat-TEN-T. Dawn iż-żewġ strumenti ġew amalgamati fl-2016 fil-Faċilità Nikkollegaw l-Ewropa.

Mit-total ta’ EUR 10 442 miljun, l-UE żżomm assi finanzjarji disponibbli għall-bejgħ fil-forma ta’ titoli tad-dejn (eż. bonds) ta’ EUR 8 920 miljun, strumenti ta’ ekwità ta’ EUR 1 302 miljun u investimenti fil-Fond Unitarju tal-BEI (fond tas-suq monetarju) ta’ EUR 221 miljun. It-titoli tad-dejn u l-unitajiet fil-Fond Unitarju tal-BEI jintużaw prinċipalment biex temporanjament jiġu investiti l-ammonti allokati għall-garanzija tal-UE u l-istrumenti ta’ kondiviżjoni tar-riskji sakemm jintużaw biex jissodisfaw is-sejħiet ta’ garanzija.

Investimenti BUFI

Il-multi msarrfin b’mod proviżorju relatati ma’ każijiet ta’ kompetizzjoni jiġu allokati f’fond dedikat (Fond BUFI - Fond “Baġit Multi”) u investiti mill-Kummissjoni fi strumenti ta’ dejn kategorizzati bħala assi finanzjarji disponibbli għall-bejgħ.

Il-KEFA f’Likwidazzjoni

Fir-rigward tal-Komunità Ewropea tal-Faħam u l-Azzar (KEFA) f’likwidazzjoni, l-assi finanzjarji kollha disponibbli għall-bejgħ huma titoli ta’ dejn denominati f’EUR u kkwotati f’suq attiv.

Il-Bank Ewropew għar-Rikostruzzjoni u l-Iżvilupp

Billi l-Bank Ewropew għar-Rikostruzzjoni u l-Iżvilupp (BERŻ) mhuwiex ikkwotat fuq xi borża u fid-dawl tar-restrizzjonijiet kuntrattwali inklużi fl-artikoli ta’ inkorporazzjoni tal-BERŻ li jirrigwardjaw, fost l-oħrajn, il-bejgħ ta’ interessi ta’ parteċipazzjoni, limitati għall-kost tal-akkwiżizzjoni u awtorizzati biss għall-azzjonisti eżistenti, il-parteċipazzjoni azzjonarja tal-UE tiġi vvalutata skont il-kost.

FONDI TA’ GARANZIJA GĦALL-GARANZIJI BAĠITARJI

Il-Fond ta’ Garanzija għal azzjonijiet esterni

Il-Fond ta’ Garanzija għal azzjonijiet esterni jkopri s-self garantit mill-baġit tal-UE, b’mod partikolari l-operazzjonijiet ta’ self tal-BEI barra l-UE ffinanzjati mir-riżorsi proprji tal-BEI u s-self permezz tal-assistenza makrofinanzjarja (AMF) u self tal-Euratom barra l-UE - ara n-Nota 4.1.1. Huwa strument fit-tul (il-parti mhux kurrenti: EUR 1 946 miljun) ġestit mill-BEI u maħsub biex ikopri kull self inadempjenti garantit mill-UE. Il-Fond huwa mogħni b’pagamenti mill-baġit tal-UE, ir-rikavat minn imgħaxijiet fuq investimenti magħmula mill-assi tal-Fond u l-ammonti rkuprati minn debituri inadempjenti u li għalihom il-Fond kellu jattiva l-garanzija tiegħu. Il-Fond għandu jinżamm fl-ammont immirat li jikkorrispondi għal 9 % tas-selfiet garantiti pendenti fi tmiem is-sena. Id-differenza bejn l-ammont immirat u l-valur tal-assi tal-Fond fi tmiem is-sena għandu jkun kopert mill-baġit tal-UE fis-sena n+2, filwaqt li kwalunkwe surplus jitħallas lura lill-baġit tal-UE.

Fond ta’ Garanzija tal-FEIS

Skont ir-Regolament tal-FEIS, il-Fond ta’ Garanzija tal-FEIS ġie stabbilit biex jipprovdi marġini ta’ likwidità kontra t-telf potenzjali mġarrab mill-BEI b’rabta mal-operazzjonijiet ta’ finanzjament u investiment tiegħu eliġibbli għall-garanzija tal-FEIS tal-UE skont il-Ftehim tal-FEIS - ara n-Nota 4.1.1. Il-Fond ta’ Garanzija tal-FEIS huwa ffinanzjat mill-kontribuzzjonijiet mill-baġit tal-UE. Huwa mogħni wkoll b’redditi fuq ir-riżorsi tal-fond ta’ garanzija investiti, id-dħul riċevut mill-UE bħala rimunerazzjoni għall-garanzija skont il-Ftehim tal-FEIS u l-ammonti rkuprati mill-BEI minn debituri f’kontumaċja fir-rigward tat-talbiet għal ħlasijiet ta’ garanziji preċedenti. Il-fond huwa ġestit mill-Kummissjoni, li hija awtorizzata li tinvesti l-assi tal-Fond ta’ Garanzija tal-FEIS fis-swieq finanzjarji f’konformità mal-prinċipju ta’ ġestjoni finanzjarja tajba skont ir-regoli prudenzjali xierqa. Il-Fond ta’ Garanzija tal-FEIS beda l-operazzjonijiet tiegħu f’April 2016. Huwa se jiġi pprovdut b’mod progressiv u gradwalment jilħaq EUR 8 biljun, jiġifieri 50 % tal-garanzija totali tal-FEIS tal-UE fuq perjodu ta’ żmien li jestendi mill-2016 sal-2022.

STRUMENTI FINANZJARJI FFINANZJATI MILL-BAĠIT TAL-UE

Għal ħarsa ġenerali lejn l-istrumenti finanzjarji kollha ffinanzjati mill-baġit, ara d-Diskussjoni u l-Analiżi tar-Rapport Finanzjarju.

Orizzont 2020

Skont ir-Regolament tal-UE li jistabbilixxi L-Orizzont 2020 — il-Programm Qafas għar-Riċerka u l-Innovazzjoni (2014–2020), strumenti finanzjarji ġodda ġew stabbiliti sabiex jittejjeb l-aċċess għall-finanzjament għall-entitajiet involuti fir-riċerka u l-innovazzjoni (RuI). Dawn l-istrumenti huma: is-servizz ta’ Self u Garanzija InnovFin għar-Riċerka u l-Iżvilupp li taħtu l-Kummissjoni tikkondividi r-riskju finanzjarju relatat ma’ portafoll ta’ operazzjonijiet ġodda ta’ finanzjament li jkun daħal għalihom il-BEI; il-Garanzija InnovFin għall-SMEs inkluża l-Inizjattiva tal-SMEs Strument ta’ Garanzija mingħajr Limitu (SIUGI) - faċilitajiet ta’ garanzija ġestiti mill-FEI li jipprovdu garanziji u kontrogaranziji lill-intermedjarji finanzjarji għall-portafolli ġodda tas-self (skont SIUGI, il-Kummissjoni tikkondividi r-riskju finanzjarju relatat mal-garanzija mogħtija mal-Istati Membri, mal-FEI u mal-BEI); u l-Faċilità tal-Ekwità ta’ InnovFin għar-Riċerka u l-Iżvilupp li tipprevedi investimenti f’fondi ta’ kapital tar-riskju u ġestiti mill-FEI.

Faċilità ta' Finanzjament għall-Kondiviżjoni tar-Riskji

Il-Faċilità ta’ Finanzjament għall-Kondiviżjoni tar-Riskji (RSFF) hija ġestita mill-BEI u l-portafoll ta’ investiment tal-Kummissjoni jintuża biex jipprovdi riskju finanzjarju għas-self u l-garanziji mogħtija mill-BEI għal proġetti ta’ riċerka eliġibbli. B’kollox, baġit tal-UE li jasal sa EUR 1 biljun ġie allokat għall-RSFF fil-QFP 2007–2013. Skont il-QFP 2014–2020, ma hemmx kontribuzzjonijiet baġitarji ġodda previsti għall-RSFF. Ir-riskju globali tal-UE huwa limitat għall-ammont li hija tikkontribwixxi għall-Faċilità.

Il-Faċilità Nikkollegaw l-Ewropa

Skont ir-Regolament (UE) Nru 1316/2013, l-istrument tad-dejn tal-Faċilità Nikkollegaw l-Ewropa (Connecting Europe Facility - CEF) ġie stabbilit bl-għan li jiffaċilita l-aċċess tal-proġetti ta’ infrastruttura għal finanzjament fis-setturi tat-trasport, tat-telekomunikazzjoni u tal-enerġija. Huwa ġestit mill-BEI skont ftehim mal-UE. L-istrument finanzjarju tad-dejn tas-CEF huwa l-kontinwità tal-Istrument ta’ Garanzija fuq is-Self għall-proġetti TEN-T (LGTT) u tal-fażi pilota tal-Inizjattiva tal-Bonds tal-Proġetti (PBI). L-LGTT u l-Portafoll tal-PBI ġew amalgamati fl-istrument finanzjarju tas-CEF b’effett mill-1 ta’ Jannar 2016. Huwa joffri kondiviżjoni tar-riskji għall-finanzjament tad-dejn fil-forma ta’ dejn jew garanzija superjuri u subordinat(a), kif ukoll appoġġ għall-bonds tal-proġetti.

Bidu tal-ETF

Dawn l-istrumenti ta' ekwità li kienu ffinanzjati mill-programm ta' Tkabbir u Impjiegi, il-programm MAP, il-programm CIP u l-Proġett Pilota tat-Trasferiment tat-Teknoloġija, li hu l-fiduċjarju tagħhom l-FEI, jagħtu l-appoġġ għall-ħolqien u l-finanzjament tal-SMEs ġodda billi jinvestu f’fondi ta’ kapital ta’ riskju speċjalizzati.

26.Assi finanzjarji skont il-valur ġust permezz ta’ surplus jew defiċit

Fl-2016, l-UE daħlet f’żewġ kuntratti forward f’munita barranija sabiex tiħħeġġja r-riskju tal-kambju relatat mat-titoli tad-dejn denominati f’USD miżmuma fil-Fond ta’ Garanzija tal-FEIS. Skont dawn il-kuntratti forward tal-munita, l-UE għandha twassal l-ammont nozzjonali miftiehem kuntrattwalment f’munita barranija (‘stadju ta’ pagament’) u tirċievi l-ammont nozzjonali f’EUR (‘stadju ta’ riċeviment’) fid-data tal-maturità. Dawn il-kuntratti derivattivi jitkejlu skont il-valur ġust fid-data tal-karta bilanċjali u huma kklassifikati bħala assi jew obbligazzjonijiet finanzjarji skont il-valur ġust permezz ta’ surplus jew defiċit skont jekk il-valur ġust tagħhom huwiex pożittiv jew negattiv. Fil-31 ta’ Diċembru 2016, kuntratt forward wieħed f’munita barranija, b’ammont nozzjonali ta’ EUR 50 miljun, irriżulta f’valur ġust pożittiv ta’ EUR 0,5 miljun u kien rikonoxxut taħt l-assi finanzjarji. Il-kuntratt l-ieħor, għall-ammont nozzjonali ta’ EUR 101 miljun, irriżulta f’valur ġust negattiv u bħala tali kien rikonoxxut bħala obbligazzjoni finanzjarja - ara n-Nota 2.11.2.

Fil-31 ta’ Diċembru 2016, l-assi finanzjarji kollha skont il-valur ġust permezz ta’ surplus jew defiċit huma kategorizzati fil-livell 2 tal-ġerarkija tal-valur ġust – ara t-tabella hawn taħt.

Ġerarkija f’valur ġust tal-assi finanzjarji mkejla skont il-valur ġust

Matul il-perjodu ma kienx hemm trasferimenti bejn il-livelli 1 u l-livell 2.

Rikonċiljazzjoni tal-assi finanzjarji mkejla bl-użu ta’ tekniki ta' valwazzjoni b’inputs mhux ibbażati fuq data osservabbli tas-suq (livell 3)

27.Self

28.Self għall-assistenza finanzjarja

Il-bidla fl-ammont riportat tikkorrispondi għall-bidla fl-imgħaxijiet dovuti.

Il-valur nominali tas-self għall-assistenza finanzjarja fil-31 ta’ Diċembru 2016 jammonta għal total ta’ EUR 54 373 miljun (2015: EUR 56 011 miljun).

L-EFSM jippermetti l-għoti ta’ assistenza finanzjarja lil Stat Membru f’diffikultajiet jew mhedded serjament b’diffikultajiet gravi kkaġunati minn ċirkostanzi eċċezzjonali barra l-kontroll tiegħu. L-assistenza tista’ tieħu l-forma ta’ self jew linja ta’ kreditu. Il-konklużjonijiet tal-Kunsill ECOFIN tad-9 ta’ Mejju 2010 jillimitaw il-faċilità għal EUR 60 biljun, iżda l-limitu legali jillimita l-ammont pendenti tas-self jew tal-linji ta’ kreditu għall-marġini disponibbli taħt il-limitu massimu tar-riżorsi proprji. Is-self meħud relatat mas-self żborżat skont l-EFSM huwa garantit mill-baġit tal-UE. Mhux previst li l-EFSM jinvolvi ruħu fi programmi ta’ finanzjament ġodda jew li jidħol fi ftehimiet ġodda dwar faċilità ta’ self.

Il-faċilità tal-BOP, strument finanzjarju bbażat fuq il-politika, tipprovdi assistenza finanzjarja għal perjodu ta’ żmien medju lill-Istati Membri tal-UE li ma adottawx l-Euro. Hija tippermetti l-għoti ta’ self lil Stati Membri li jkunu qegħdin jesperjenzaw, jew li jkunu mhedda serjament minn, diffikultajiet fil-bilanċi tal-pagamenti jew fil-movimenti tal-kapital tagħhom. L-ammont pendenti massimu ta’ self mogħti taħt l-istrument huwa limitat għal EUR 50 biljun. Is-self meħud relatat ma’ dan is-self tal-BOP huwa garantit mill-baġit tal-UE.

L-AMF huwa strument finanzjarju bbażat fuq il-politika ta’ bilanċ tal-pagamenti u/jew appoġġ baġitarju ġenerali u mhux marbut għal pajjiżi msieħba li bħalissa qed isegwu programm tal-FMI. Huwa jieħu l-forma ta’ self jew għotjiet għal perjodu ta’ żmien medju/twil jew kombinazzjoni xierqa tat-tnejn u ġeneralment jikkomplementa finanzjament ipprovdut fil-kuntest ta’ programm ta’ aġġustament u ta’ riforma appoġġat mill-FMI. Dan is-self huwa garantit mill-Fond ta’ Garanzija għal azzjonijiet esterni. Fil-31 ta’ Diċembru 2016, ingħataw EUR 1 313-il miljun relatati ma’ ftehim dwar faċilità ta’ self, permezz tal-assistenza tal-AMF, lill-Ukraina (EUR 1 200 miljun), lit-Tuneżija (EUR 100 miljun) u lill-Ġeorġja (EUR 13-il miljun), iżda għadhom ma ġewx żborżati - ara n-Nota 4.1.2.

L-entità legali Euratom (irrappreżentata mill-Kummissjoni) issellef flus kemm lil Stati Membri kif ukoll lil Stati terzi biex jiffinanzjaw proġetti relatati ma’ installazzjonijiet tal-enerġija. Fil-31 ta’ Diċembru 2016, ingħata self ta’ EUR 300 miljun lill-Ukraina, li sa issa għadu ma ġiex żborżat - ara n-Nota 4.1.2. Ġew riċevuti garanziji minn partijiet terzi ta’ EUR 252 miljun (2015: EUR 301 miljun) li jkopru s-self tal-Euratom.

Selfiet tal-KEFA f’Likwidazzjoni ngħataw fuq fondi missellfa f’konformità mal-Artikoli 54 u 56 tat-Trattat tal-KEFA.

Ir-rati effettivi tal-imgħax fuq is-self (espressi bħala firxa ta’ rati tal-imgħax)

29.Self ieħor

Il-valur nominali ta’ self ieħor fil-31 ta’ Diċembru 2016 jammonta għal total ta’ EUR 673 miljun (2015: EUR 609 miljun).

Selfiet b’kundizzjonijiet speċjali jingħataw b’rati preferenzjali bħala parti mill-kooperazzjoni ma’ Stati li mhumiex membri.

Is-self surrogat huwa self inadempjenti li ngħata mill-BEI u li għalih id-drittijiet kollha ġew surrogati mill-UE wara l-pagament mill-Fond ta’ Garanzija għal azzjonijiet esterni. Dan is-self huwa indeboliti kompletament għal ammont ta’ EUR 332 miljun (2015: EUR 218-il miljun).

Indeboliment fuq self ieħor

29.1.PREFINANZJAMENT

Il-livell tal-ammonti ta’ prefinanzjament fil-programmi varji jrid ikun suffiċjenti biex jiżgura l-finanzjament meħtieġ sabiex il-benefiċjarju jkun jista’ jibda l-proġett, filwaqt li jkunu mħarsa wkoll l-interessi finanzjarji tal-UE u jittieħdu f’kunsiderazzjoni r-restrizzjonijiet legali, operazzjonali u tal-kosteffettività. Dawn l-elementi kollha ngħataw kunsiderazzjoni xierqa mill-Kummissjoni fi sforz sabiex ittejjeb is-segwitu tal-prefinanzjament.

30.Prefinanzjament

Il-prefinanzjament jirrappreżenta l-flus imħallsin u, b’hekk, l-implimentazzjoni tal-approprjazzjonijiet ta’ pagament. Kif ġie spjegat fin-Nota 1.5.7, dawn huma avvanzi u, għalhekk, għadhom ma ġewx iddebitati. B’hekk, filwaqt li l-prefinanzjament inaqqas l-RAL pendenti (ara n-Nota 5.1), huwa jirrappreżenta l-ispejjeż li għadhom iridu jiġu rikonoxxuti fir-rapport tal-introjtu.

L-għeluq tal-perjodu ta’ programmazzjoni 2007-2013 u t-twaqqif gradwali tal-programmi taħt il-perjodu 2014-2020 huma l-fatturi ewlenin li jinfluwenzaw l-ammonti fuq il-karta bilanċjali: il-prefinanzjament relatat mal-programmi antiki qed jonqos minħabba l-aċċettazzjoni tal-kostijiet, filwaqt li tħallsu aktar prefinanzjamenti fir-rigward tal-perjodu ta’ programmazzjoni ġdid.

Għall-ġestjoni kondiviża, din it-tranżizzjoni bejn il-perjodi ta’ programmazzjoni tispjega wkoll iċ-ċaqliq bejn il-bilanċi kurrenti u dawk mhux kurrenti. Il-perjodu ta’ programmazzjoni 2007-2013 jinsab fil-fażi tal-għeluq tiegħu u, b’hekk, aktar ammonti se jsiru dovuti fi żmien tnax-il xahar. Fir-rigward tal-perjodu ta’ programmazzjoni 2014 - 2020, il-prefinanzjament inizjali mħallas jitniżżel bħala mhux attwali, filwaqt li l-prefinanzjament annwali jitniżżel bħala attwali.

It-tabella hawn fuq turi tnaqqis sinifikanti fl-ammonti grossi ta’ prefinanzjament taħt ġestjoni kondiviża, li huwa spjegat permezz tal-approvazzjoni ta’ EUR 18 521 miljun f’kostijiet paċuti parzjalment bil-pagament ta’ prefinanzjament ġdid ta’ EUR 12 426 miljun.

Garanziji riċevuti fir-rigward tal-prefinanzjament

Dawn huma garanziji li l-Kummissjoni titlob mill-benefiċjarji li mhumiex Stati Membri, f’ċerti każijiet, meta jħallsu pagamenti bil-quddiem (prefinanzjament). Hemm żewġ valuri li jridu jiġu ddivulgati għal din ix-xorta ta’ garanzija, il-valur “nominali” u dak “kurrenti”. Għall-valur nominali, l-avveniment ġenerattiv huwa marbut mal-eżistenza tal-garanzija. Għall-valur kurrenti, l-avveniment ġenerattiv tal-garanzija huwa l-pagament tal-prefinanzjament u/jew l-approvazzjonijiet sussegwenti. Fil-31 ta’ Diċembru 2016, il-valur nominali tal-garanziji riċevuti fir-rigward tal-prefinanzjament kien jammonta għal EUR 683 miljun, filwaqt li l-valur kontinwu ta’ dawk il-garanziji kien ta’ EUR 496 miljun (2015: EUR 844 miljun u EUR 626 miljun, rispettivament).

Ċerti ammonti ta’ prefinanzjament imħallsin taħt is-7 Programm Kwadru għar-riċerka u l-iżvilupp teknoloġiku (FP7) u taħt Orizzont 2020 huma effettivament koperti minn Fond ta’ Garanzija tal-Parteċipanti (PGF). Il-PGF huwa strument ta’ benefiċċju reċiproku stabbilit biex ikopri r-riskji relatati ma' benefiċjarji li ma jħallsux l-ammonti matul l-implimentazzjoni tal-azzjonijiet indiretti tal-FP7 u Orizzont 2020. Il-parteċipanti kollha fl-azzjonijiet indiretti li jirċievu għotja mill-UE jikkontribwixxu 5 % tal-ammont totali riċevut għall-kapital tal-PGF.

Fil-31 ta’ Diċembru 2016, l-ammonti ta’ prefinanzjament koperti mill-PGF kienu jammontaw għal EUR 1.8 biljun (2015: EUR 1,7 biljun). L-UE (irrappreżentata mill-Kummissjoni) taġixxi bħala aġent eżekuttiv tal-parteċipanti tal-PGF, iżda l-fond huwa proprjetà tal-parteċipanti.

Fi tmiem is-sena, il-PGF kellu assi totali ta’ EUR 1 951 miljun (2015: EUR 1 838 miljun). L-assi tal-PGF jinkludu wkoll assi finanzjarji li huma ġestiti mid-Direttorat Ġenerali għall-Affarijiet Ekonomiċi u Finanzjarji tal-Kummissjoni. Minħabba li l-PGF huwa entità separata, l-assi tal-fond mhumiex ikkonsolidati f’dawn il-kontijiet annwali tal-UE.

31.Avvanzi oħrajn lill-Istati Membri

Avvanzi lil Stati Membri għal strumenti finanzjarji taħt ġestjoni kondiviża

Bil-qafas tal-programmi tal-Fondi Strutturali u ta’ Investiment Ewropej (FSIE), huwa possibbli li jsiru pagamenti bil-quddiem mill-baġit tal-UE lill-Istati Membri sabiex jippermettulhom jikkontribwixxu għall-istrumenti finanzjarji (jiġifieri selfiet, investimenti ta’ ekwità jew inkella garanziji). Dawn l-istrumenti finanzjarji huma stabbiliti u mmaniġġati taħt ir-responsabbiltà tal-Istati Membri, u mhux tal-Kummissjoni. Madankollu, il-flejjes li ma jintużawx minn dawn l-istrumenti fi tmiem is-sena huma proprjetà tal-UE (bħal bil-prefinanzjament kollu) u b’hekk huma ttrattati bħala assi fuq il-karta bilanċjali tal-UE.

Perjodu 2014-2020:

F’konformità mal-politika ta’ koeżjoni, l-Istati Membri kkontribwixxew l-ammont ta’ EUR 3 681 miljun, li minnhom huwa stmat li EUR 1 842 miljun kienu għadhom iridu jiġu implimentati fl-31 ta’ Diċembru 2016. Dan jinkludi l-kontribuzzjoni tal-Istati Membri lill-Inizjattiva tal-SMEs, strument intenzjonat li jistimula self addizzjonali mis-settur bankarju lill-SMEs (EUR 745 miljun imħallsa, li minnhom EUR 481 miljun huma stmati bħala li għadhom mhux implimentati).

Għall-iżvilupp rurali, sa tmiem is-sena kien hemm EUR 6 miljun li kienu għadhom ma ntużawx.

Perjodu 2007-2013:

Fil-perjodu ta’ programmazzjoni preċedenti, l-atti legali bażiċi ma jobbligawx lill-Istati Membri sabiex jipprovdu rapporti perjodiċi lill-Kummissjoni dwar l-użu li għamlu minn dawn l-avvanzi u, f’xi każijiet, lanqas ma jidentifikawhom fid-dikjarazzjonijiet tal-infiq ippreżentati lill-Kummissjoni.

Għall-politika ta’ koeżjoni, kull sena, il-Kummissjoni tiġbor informazzjoni mill-Istati Membri dwar dawn l-istrumenti finanzjarji u tikkonsolidaha f’rapport ta’ implimentazzjoni annwali. Ir-rapport li jmiss se jkun ir-rapport ta’ implimentazzjoni finali, iżda dan ir-rapport mhux se jkun disponibbli fil-ħin sabiex ikun jista’ jiġi inkluż f’dawn il-kontijiet. Konsegwentement, u b’mod konsistenti mas-snin preċedenti, il-kejl jiġi stmat fuq il-bażi tal-aħħar informazzjoni affidabbli disponibbli, jiġifieri r-rapport ta’ implimentazzjoni annwali fil-31 ta’ Diċembru 2015 u l-iżborżi li saru matul l-2016. L-istima tistrieħ ukoll fuq is-suppożizzjoni li l-fondi jintużaw b’mod sħiħ u b’mod uniformi matul il-bqija tal-perjodu tal-operat (li jintemm fil-31 ta’ Marzu 2017). Huwa stmat li, fl-aħħar tas-sena 2016, ammont ta’ EUR 686 miljun kien għad irid jintuża għal investimenti f’benefiċjarji finali.

Għall-iżvilupp rurali, fl-aħħar tas-sena, l-ammonti kollha kienu ġew implimentati jew riallokati għal miżuri oħrajn qabel it-tmiem tal-perjodu ta’ programmazzjoni.

Skemi ta’ Għajnuna

Simili għal dak li ntqal hawn fuq, l-avvanzi mħallsin mill-Istati Membri għal diversi skemi ta’ għajnuna (għajnuna mill-Istat, interventi fis-suq tal-FAEG jew miżuri ta’ investiment tal-FAEŻR) li ma ntużawx sal-aħħar tas-sena huma rreġistrati bħala assi fil-karta bilanċjali tal-UE. Il-Kummissjoni stmat il-valur ta’ dawn l-avvanzi abbażi tal-informazzjoni pprovduta mill-Istati Membri; l-ammonti li rriżultaw huma inklużi taħt is-subintestatura Skemi ta’ Għajnuna ta’ hawn fuq.

Perjodu 2014-2020:

Għall-politika ta’ koeżjoni, sa tmiem is-sena kien hemm EUR 117-il miljun li kienu għadhom ma ntużawx.

Għall-politika agrikola, il-Kummissjoni talbet informazzjoni dwar l-ammonti mhux użati direttament mingħand l-aġenziji tal-pagamenti fl-Istati Membri. Abbażi ta’ din l-informazzjoni, huwa stmat li sal-aħħar tas-sena kien hemm EUR 721 miljun li baqgħu ma ntużawx.

Perjodu 2007-2013:

Huwa stmat li EUR 461 miljun li jirrappreżentaw l-avvanzi mħallsin fil-kuntest tal-politika agrikola baqgħu ma ntużawx sal-aħħar tal-2016.

31.1.AMMONTI RIĊEVIBBLI TA’ SKAMBJU U AMMONTI RIKOVERABBLI MHUX TA’ SKAMBJU

32.Ammonti rikoverabbli minn tranżazzjonijiet mhux ta’ skambju

33.Ammonti rikoverabbli mill-Istati Membri

L-ammonti mhux kurrenti dovuti mingħand l-Istati Membri jirrigwardjaw deċiżjonijiet tal-approvazzjoni tal-konformità mhux eżegwiti għall-Fond Agrikolu Ewropew ta’ Garanzija (FAEG) u għall-Fond Agrikolu Ewropew għall-Iżvilupp Rurali (FAEŻR) li jridu jiġu implimentati permezz ta’ pagamenti akkont annwali u/jew differimenti.

Ammonti rikoverabbli tar-riżorsi proprji

Ir-riżorsi proprji tradizzjonali (‘traditional own resources’ - TOR), magħmula minn dazji doganali u imposti fuq iz-zokkor, jinġabru mill-Istati Membri f’isem il-Kummissjoni. L-Istati Membri jistabbilixxu t-TOR u jikkomunikaw l-ammonti tal-intitolamenti stabbiliti lill-Kummissjoni permezz ta’ dikjarazzjonijiet ta’ kull xahar tal-‘kont A’. L-intitolamenti stabbiliti li ma ġewx inklużi fil-‘kontijiet A’, minħabba li ma ġewx irkuprati mill-Istati Membri u ma ġie pprovdut ebda titolu ta’ sigurtà (jew jekk ikun ġie pprovdut titolu ta’ sigurtà iżda jkunu kkontestati xorta waħda), huma murija fil-‘kont separat’.

Il-kontribuzzjoni tal-Istati Membri bbażata fuq il-VAT u l-ING hija soġġetta għal aġġustament annwali, li jsir kull sena fl-ewwel jum tax-xogħol ta’ Diċembru. Ir-riżorsi proprji li jridu jiġu riċevuti kienu jinkludu wkoll l-aġġustamenti għas-snin finanzjarji 2014, 2015 u 2016 relatati mad-dispożizzjonijiet ġodda introdotti mid-Deċiżjoni dwar ir-Riżorsi Proprji (ORD) 2014 wara t-tlestija tal-proċess ta’ ratifika u d-dħul fis-seħħ fl-1 ta’ Ottubru 2016, li kienu dovuti għall-ħlas mill-Istati Membri fl-1 ta’ Jannar 2017.

Matul l-erba’ snin ta’ wara jkunu jistgħu jibqgħu jsiru korrezzjonijiet għall-bażijiet attwali tal-VAT u l-ING, sakemm ma tinħariġx riżerva. Dawn ir-riżervi għandhom jitqiesu bħala pretensjonijiet potenzjali fuq l-Istati Membri għal ammonti mhux stabbiliti billi l-impatt finanzjarju tagħhom ma jistax jiġi kkalkolat bi preċiżjoni. Meta jkun jista’ jiġi stabbilit l-ammont preċiż, ir-riżorsi korrispondenti bbażati fuq il-VAT u l-ING jinġabru jew b’konnessjoni mal-bilanċi tal-VAT u l-ING jew permezz ta’ sejħiet individwali għall-fondi.

Il-FAEG u l-ammonti rikoverabbli tal-Iżvilupp Rurali

Din l-entrata tkopri primarjament l-ammonti dovuti mill-Istati Membri fil-31 ta’ Diċembru 2016, kif iddikjarati u ċċertifikati mill-Istati Membri fil-15 ta’ Ottubru 2016. Tinħareġ stima għall-ammonti rikoverabbli li jirriżultaw wara din id-dikjarazzjoni u sal-31 ta’ Diċembru 2016. Il-Kummissjoni qed tikkalkula wkoll tnaqqis fil-valur kontabbli tal-ammonti dovuti minn benefiċjarji, li aktarx ma jiġux irkuprati. Il-fatt li jsir dan l-aġġustament ma jfissirx li l-Kummissjoni qegħda tirrinunzja għall-irkupru ta’ dawn l-ammonti fil-futur. Huwa inkluż ukoll tnaqqis ta’ 20 % fl-aġġustament, li jikkorrispondi għal dak li l-Istati Membri jistgħu jżommu sabiex ikopru l-ispejjeż amministrattivi.

34.Multi

Dan jirreferi għall-multi maħruġa mill-Kummissjoni li ma ssarrfux (b’mod proviżorju) sal-aħħar tas-sena (EUR 1 986 miljun) wara li jitnaqqsu l-ammonti li tnaqqsilhom il-valur (EUR 178 miljun). Ġew riċevuti garanziji li jammontaw għal EUR 1 012 miljun għall-multi pendenti fi tmiem is-sena (2015: EUR 1 428 miljun). Ta’ min jinnota li EUR 651 miljun minn dawn l-ammonti riċevibbli kienu dovuti li jitħallsu wara l-31 ta’ Diċembru 2016.

35.Introjtu dovut u imposti differiti

36.Ammonti riċevibbli minn tranżazzjonijiet ta’ skambju

Indeboliment tal-ammonti riċevibbli mingħand il-klijenti indikati hawn fuq jinkludu EUR 55 miljun ta’ indeboliment determinat fuq bażi individwali.

36.1.INVENTARJI

36.2.FLUS U L-EKWIVALENTI TA’ FLUS

37.Kontijiet bankarji għall-implimentazzjoni tal-baġit u depożiti oħrajn ta’ żmien fiss

Din l-intestatura tkopri l-fondi kollha li l-Kummissjoni żżomm fil-kontijiet tagħha f’kull Stat Membru u pajjiż tal-EFTA (teżor jew bank ċentrali), kif ukoll f’kontijiet kurrenti, kontijiet imprest u flejjes żgħar f'banek kummerċjali. Il-bilanċ eċċezzjonalment għoli tat-teżor fl-aħħar tal-2016 huwa dovut għall-elementi prinċipali li ġejjin:

·Fir-rigward tar-riżorsi proprji, il-bilanċ fl-aħħar tas-sena jinkludi ammont nett totali ta’ EUR 7.7 biljun li jridu jingħataw lura lill-Istati Membri fil-bidu tal-2017 bħala riżultat tal-baġits emendatorji adottati fl-aħħar tal-2016. Barra minn hekk, l-avvanzi fuq ir-riżorsi proprji li jammontaw għal EUR 1.5 biljun waslu fl-aħħar jiem tal-2016.

·Ammont sinifikanti ta’ multi imposti mill-Kummissjoni għal ksur tar-regoli tal-kompetizzjoni, li jammontaw għal EUR 4,3 biljun, issarrfu b’mod definittiv fl-2016 u issa huma parti mill-bilanċ tat-teżor fi tmiem is-sena.

·Il-bilanċ tat-teżor jinkludi wkoll id-dħul assenjat u l-approprjazzjonijiet ta’ pagament mhux minfuqa sal-aħħar tal-2016 ta’ EUR 11-il biljun.

38.Flus li jappartjenu għal strumenti finanzjarji

L-ammonti murija taħt din l-intestatura jikkonċernaw primarjament l-ekwivalenti ta’ flus ġestiti mill-fiduċjarji f’isem il-Kummissjoni għall-iskop tal-implimentazzjoni ta’ programmi partikolari ta’ strumenti finanzjarji ffinanzjati mill-baġit tal-UE (ara n-Nota 2.4.1). B’hekk, il-flus li jappartjenu għal strumenti finanzjarji jistgħu jintużaw biss fil-programm ikkonċernat.

39.Flus relatati ma’ multi

Dawn huma flus riċevuti fir-rigward ta’ multi maħruġa mill-Kummissjoni li għalihom il-każ ikun għadu miftuħ. Dawn l-ammonti jinżammu f’kontijiet ta’ depożitu speċifiċi li ma jintużawx għal attivitajiet oħrajn. Meta jkun ġie ppreżentat appell jew meta ma jkunx magħruf jekk huwiex se jsir appell mill-parti l-oħra, l-ammont sottostanti jintwera bħala obbligazzjoni kontinġenti fin-Nota 4.1.4.

It-tnaqqis f’dan il-bilanċ huwa dovut għall-fatt li mill-2010, il-multi kollha msarrfin b’mod proviżorju huma amministrati mill-Kummissjoni f’fond BUFI u investiti fi strumenti finanzjarji kategorizzati bħala disponibbli għall-bejgħ (ara n-Nota 2.4.1).

OBBLIGAZZJONIJIET

39.1.PENSJONI U BENEFIĊĊJI OĦRAJN TAL-IMPJEGATI

Obbligazzjoni ta' skema ta’ benefiċċji netti tal-impjegati

Iż-żieda fl-obbligazzjoni totali tal-benefiċċji tal-impjegati hija primarjament dovuta għal żieda fl-obbligazzjoni netta tal-Iskema tal-Pensjoni tal-Uffiċjali Ewropej. Din iż-żieda hija prinċipalment dovuta għat-tnaqqis fir-rata ta' skont reali minn 0,6 % għal 0,3 % flimkien mal-fatt li d-drittijiet addizzjonali miksuba mill-membri tal-iskema qabżu l-ħlasijiet tal-benefiċċji barra mill-iskema.

40.Skema ta’ Pensjonijiet tal-Uffiċjali Ewropej

Dan l-obbligu tal-benefiċċju definit jirrappreżenta l-valur preżenti ta’ pagamenti futuri mistennija li l-UE hija obbligata li tagħmel sabiex issalda l-obbligi ta’ pensjoni li jirriżultaw mis-servizz tal-impjegati fil-perjodi kurrenti u ta’ qabel. L-iskema għadha għaddejja u, bħala tali, il-pagamenti kollha meħtieġa li jridu jsiru mill-iskema fuq bażi annwali jiġu inklużi fil-baġit tal-UE kull sena.

Skont l-Artikolu 83 tar-Regolamenti tal-Persunal, il-ħlas tal-benefiċċji previsti fl-iskema tal-pensjonijiet tal-persunal jikkostitwixxi imposta fil-baġit tal-UE. L-iskema mhijiex iffinanzjata, iżda l-Istati Membri jiggarantixxu l-ħlas ta’ dawn il-benefiċċji b’mod kollettiv. Mis-salarji bażiċi tal-membri attivi titnaqqas kontribuzzjoni tal-pensjoni obbligatorja, li bħalissa hija ta’ 9,8 %. Dawn il-kontribuzzjonijiet huma ttrattati bħala dħul tal-baġit għas-sena u jikkontribwixxu għall-finanzjament tal-infiq tal-UE b’mod ġenerali, ara wkoll in-Nota 3.6.

L-obbligazzjonijiet ta' din l-iskema tal-pensjonijiet ġew ivvalutati fuq il-bażi tan-numru ta' persunal u tal-persunal irtirat fil-31 ta’ Diċembru 2016 u fuq ir-regoli tar-Regolamenti tal-Persunal applikabbli f'din id-data. Din il-valwazzjoni twettqet f’konformità mal-metodoloġija ta’ IPSAS 25 (u għalhekk f’konformità wkoll mar-regola tal-UE dwar il-kontabbiltà nru 12). Matul l-2016, il-Kummissjoni ħadet passi biex issaħħaħ il-proċessi u l-kredibbiltà tal-ġbir tad-dejta bażika użat għall-kalkolu tal-obbligazzjoni tal-benefiċċji tal-impjegati. Il-ħidma se tkompli matul l-2017 – ir-riżultati possibbli, fejn xieraq, se jkun riflessi fil-kontijiet tal-2017.

41.Skemi oħrajn ta’ benefiċċji tal-irtirar

Din tirreferi għall-obbligazzjoni li tirrigwardja l-obbligi tal-pensjonijiet fil-konfront tal-Membri u l-eks-Membri tal-Kummissjoni, tal-Qorti tal-Ġustizzja (u tal-Qorti Ġenerali) u tal-Qorti tal-Awdituri, is-Segretarji Ġenerali tal-Kunsill, l-Ombudsman, il-Kontrollur Ewropew għall-Protezzjoni tad-Data u t-Tribunal tas-Servizz Ċivili tal-Unjoni Ewropea. F’din l-intestatura hemm inkluża wkoll obbligazzjoni relatata mal-pensjonijiet tal-Membri tal-Parlament Ewropew.

42.Reġim Komuni tal-Assigurazzjoni tal-Mard

Barra mill-iskemi ta’ benefiċċji għall-irtirar ta' hawn fuq, issir valutazzjoni għall-obbligazzjoni stmata li għandha l-UE rigward ir-Reġim Komuni tal-Assigurazzjoni tal-Mard fir-rigward tal-ispejjeż tal-kura tas-saħħa li jridu jitħallsu matul il-perjodi ta' wara l-attività tal-impjegati (nett tal-kontribuzzjonijiet tagħhom).

Ċaqliq fil-valur preżenti tal-obbligu tal-benefiċċji definiti tal-impjegati

Il-valur preżenti tal-obbligu tal-benefiċċju definit huwa l-valur preżenti tal-pagamenti futuri mistennija skontati, mingħajr ma jitnaqqsu kwalunkwe assi tal-pjan, meħtieġa biex jissodisfaw l-obbligu li jirriżulta mis-servizz tal-impjegati fil-perjodi kurrenti u ta’ qabel.

Hawn taħt tidher analiżi taċ-ċaqliq tas-sena preżenti fl-obbligu tal-benefiċċju definit:

L-ispejjeż kurrenti tas-servizz huma ż-żieda fil-valur preżenti tal-obbligu tal-benefiċċju definit li jirriżulta mis-servizz tal-membri kurrenti fil-perjodu preżenti.

L-ispejjeż tal-imgħax huma ż-żieda matul il-perjodu fil-valur preżenti ta’ obbligu ta’ benefiċċju definit minħabba li l-benefiċċji jkunu perjodu wieħed eqreb lejn is-sald.

Il-qligħ u t-telf attwarjali nett ikopri:

-L-aġġustamenti tal-esperjenza (l-effetti tad-differenzi bejn is-suppożizzjonijiet attwarjali preċedenti għall-2016 u dak li seħħ fl-2016); u

-L-effetti tal-bidliet fis-suppożizzjonijiet attwarjali, li jistgħu jkunu finanzjarji (bħaż-żidiet ipproġettati fis-salarju) jew demografiċi (bħar-rati tal-mortalità). Dawn is-suppożizzjonijiet minnhom infushom huma inċerti u għalhekk jistgħu juru ċaqliq sinifikanti minn sena għal sena.

Il-benefiċċji jitħallsu matul is-sena skont ir-regoli tal-iskema. Dawn il-benefiċċji mħallsa jwasslu għal tnaqqis fl-obbligu tal-benefiċċju definit peress li ma għandhomx jitħallsu iktar fil-futur.

Suppożizzjonijiet attwarjali - benefiċċji tal-impjegati

Hawn taħt jidhru s-suppożizzjonijiet attwarjali prinċipali użati fil-valutazzjoni taż-żewġ skemi ewlenin ta’ benefiċċju għall-impjegati tal-UE:

Ir-rati ta’ mortalità huma bbażati fuq It-Tabella Internazzjonali tal-Ħajja tal-Uffiċjali Ċivili (tal-ICSLT 2013).

Ir-rata ta’ skont nominali hija ddeterminata bħala l-valur tar-rendiment mingħajr kupun tal-Euro (b’maturità ta’ 21 sena minn Diċembru 2016 għall-Iskema tal-Pensjonijiet tal-Uffiċjali Ewropej (PSEO) u 26 sena għar-Reġim Komuni tal-Assigurazzjoni tal-Mard). Ir-rata tal-inflazzjoni użata tkun ir-rata tal-inflazzjoni mistennija matul il-perjodu ekwivalenti. Hija trid tiġi ddeterminata b’mod empiriku, abbażi tal-valuri prospettivi kif espressi mill-bonds marbuta mal-indiċi fuq is-swieq finanzjarji Ewropej. Ir-rata reali ta’ skont tiġi kkalkulata skont ir-rata ta’ skont nominali kif ukoll ir-rata ta’ inflazzjoni mistennija fit-tul.

Ċaqliq fil-valur preżenti tal-assi tal-pjan

Tendenza ta' 5 snin

Iż-żieda sinifikanti fl-obbligazzjoni tal-benefiċċji tal-impjegati matul il-ħames snin tista’ tiġi spjegata fil-biċċa l-kbira minn tnaqqis fir-rata reali ta’ skont użata biex jiġu skontati l-flussi tal-flus futuri. Dan it-tnaqqis huwa marbut ma’ kundizzjonijiet ekonomiċi sottostanti, b’mod partikolari t-tnaqqis fir-rati tal-imgħax. Għall-iskema ewlenija PSEO, pereżempju, ir-rata ta’ skont reali niżlet minn 1,6 % fi tmiem l-2012 għal 0,3 % fi tmiem l-2016.

Ammonti rikonoxxuti fir-Rapport tal-Introjtu

Sensittività tar-Reġim Komuni tal-Assigurazzjoni tal-Mard

Bidla ta’ punt perċentwali wieħed fir-rati tat-tendenza tal-kostijiet mediċi preżunti jkollha l-effetti li ġejjin:

42.1.DISPOŻIZZJONIJIET