KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Qafas ġdid tal-UE biex jissaħħaħ l-Istat tad-Dritt /* COM/2014/0158 final */
WERREJ KOMUNIKAZZJONI
MILL-KUMMISSJONI LILL-PARLAMENT EWROPEW U LILL-KUNSILL Qafas ġdid tal-UE
biex jissaħħaħ l-Istat tad-Dritt 1........... Introduzzjoni................................................................................................................ 2 2........... Għaliex l-istat tad-dritt huwa
ta’ importanza fundamentali għall-UE.......................... 3 3........... Għaliex qafas ġdid tal-UE
biex jissaħħaħ l-istat tad-dritt............................................ 5 4........... Kif se jaħdem il-Qafas
il-ġdid tal-Istat tad-Dritt tal-UE.............................................. 6 4.1........ X’se jagħti bidu
għall-Qafas il-ġdid tal-Istat tad-Dritt tal-UE..................................... 6 4.2........ Il-Qafas il-ġdid tal-Istat
tad-Dritt tal-UE bħala proċess fi tliet stadji.......................... 7 5........... Konklużjoni.................................................................................................................. 9
1.
Introduzzjoni
L-istat
tad-dritt huwa s-sinsla ta’ kull demokrazija kostituzzjonali moderna. Huwa
wieħed mill-prinċipji fundamentali li jirriżultaw
mit-tradizzjonijiet kostituzzjonali komuni tal-Istati Membri kollha tal-UE u
wieħed mill-aktar valuri sinifikanti li fuqhom hija bbażata l-Unjoni.
Dan jitfakkar bl-Artikolu 2 tat-Trattat dwar l-Unjoni Ewropea (TUE), kif
ukoll bil-Preamboli tat-Trattat u l-Karta tad-Drittijiet Fundamentali tal-UE.
Din hija wkoll ir-raġuni għaliex, skont l-Artikolu 49 tat-TUE,
ir-rispett għall-istat tad-dritt huwa kundizzjoni stabbilita minn qabel
għas-sħubija fl-UE. Flimkien mad-demokrazija u d-drittijiet
tal-bniedem, l-istat tad-dritt huwa wkoll wieħed mit-tliet pilastri
tal-Kunsill tal-Ewropa u huwa approvat fil-Preambolu għall-Konvenzjoni
Ewropea għall-Protezzjoni tad-Drittijiet tal-Bniedem u l-Libertajiet
Fundamentali (KEDB)[1] . Il-fiduċja
reċiproka fost l-Istati Membri tal-UE u s-sistemi legali rispettivi
tagħhom hija l-bażi tal-Unjoni. Il-mod kif l-istat tad-dritt huwa
implimentat f’livell nazzjonali għandu rwol ewlieni f’dan ir-rigward.
Il-fiduċja taċ-ċittadini kollha tal-UE u tal-awtoritajiet
nazzjonali fil-funzjonament tal-istat tad-dritt hija partikolarment essenzjali
għall- iżvilupp fl-UE bħala "spazju ta' libertà, sigurtà u
ġustizzja mingħajr fruntieri interni"[2].
Din il-fiduċja se tinbena u tinżamm biss jekk l-istat tad-dritt huwa
osservat fl-Istati Membri kollha. Il-kostituzzjonijiet
u sistemi ġudizzjarji differenti tal-Istati Membri tal-UE huma,
fil-prinċipju, imfassla tajjeb u mgħammra biex jipproteġu
ċ-ċittadini kontra kull theddida għall-istat tad-dritt.
Madankollu, l-avvenimenti riċenti f’xi Stati Membri wrew li nuqqas ta’
rispett lejn l-istat tad-dritt u, bħala konsegwenza, anki lejn il-valuri
fundamentali li l-istat tad-dritt għandu l-għan li jipproteġi,
jistgħu jsiru kwistjoni ta’ tħassib serju. Matul dawn l-avvenimenti,
kien hemm talba ċara mill-pubbliku inġenerali lill-UE, u notevolment
lill-Kummissjoni, biex tittieħed azzjoni. Riżultati nkisbu. Madankollu,
il-Kummissjoni u l-UE kellhom isibu soluzzjonijiet ad hoc minħabba
li l-mekkaniżmi u l-proċeduri attwali tal-UE mhux dejjem kienu xierqa
biżżejjed biex jiżguraw rispons effettiv u f’waqthu
għat-theddid għall-istat tad-dritt. Il-Kummissjoni
hija l-gwardjan tat-Trattati u għandha r-responsabbiltà li tiżgura
r-rispett tal-valuri li fuqhom hija msejsa l-UE u tipproteġi l-interess
ġenerali tal-Unjoni. Għaldaqstant il-Kummissjoni jrid ikollha rwol
attiv f’dan ir-rigward[3]. F’Settembru 2012, il-President
Barroso, fid-diskors annwali tiegħu dwar l-Istat tal-Unjoni lill-Parlament
Ewropew, qal: “Neħtieġu sett ta’ strumenti żviluppati
aħjar, mhux biss l-alternattiva bejn is-'setgħa ta' persważjoni'
tal-persważjoni politika u l-'għażla nukleari”
tal-Artikolu 7 tat-TUE. Fid-diskors tas-sena ta’ wara, huwa qal li
"l-esperjenza kkonfermat l-importanza tar-rwol tal-Kummissjoni bħala
arbitru indipendenti u oġġettiv. Għandna nikkonsolidaw din
l-esperjenza permezz ta' qafas aktar ġenerali […]. Il-Kummissjoni se
tippreżenta komunikazzjoni dwar dan. Nemmen li huwa dibattitu l ta'
importanza ewlenija għall-idea tagħna tal-Ewropa."[4]
F’Ġunju 2013,
il-Kunsill tal-Ġustizzja u l-Affarijiet Interni enfasizza li
"ir-rispett lejn l-istat tad-dritt huwa prerekwiżit
għall-ħarsien tad-drittijiet fundamentali" u talab
lill-Kummissjoni "biex tmexxi ‘l quddiem id-dibattitu konformi
mat-Trattati dwar il-ħtieġa possibbli għal kif ukoll il-forma
ta' metodu kollaborattiv u sistematiku biex jiġu indirizzati dawn
il-kwistjonijiet". F’April 2013, il-Kunsill tal-Affarijiet
Ġenerali organizza diskussjoni komprensiva dwar is-suġġett.[5] F’Lulju 2013,
il-Parlament Ewropew talab li "l-Istati Membri jiġu vvalutati
regolarment għall-konformità kontinwa tagħhom mal-valuri fundamentali
tal-Unjoni u r-rekwiżit tad-demokrazija u l-istat tad-dritt"[6].
Din
il-Komunikazzjoni hija t-tweġiba għal dawn it-talbiet. Fuq
il-bażi tal-esperjenza tal-Kummissjoni, id-dibattitu interistituzzjonali u
konsultazzjonijiet wiesgħa[7], il-Komunikazzjoni tistabbilixxi
qafas ġdid biex tiżgura protezzjoni effettiva u koerenti tal-istat
tad-dritt fl-Istati Membri kollha. Dan huwa qafas li jindirizza u jsolvi
sitwazzjoni fejn hemm theddida sistemika għall-istat tad-dritt.[8]
Il-qafas
jipprova jsolvi t-theddidiet futuri għall-istat tad-dritt fl-Istati Membri
qabel jintlaħqu l-kundizzjonijiet għall-attivazzjoni
tal-mekkaniżmi previsti fl-Artikolu 7 tat-TUE. Għaldaqstant dan
huwa maħsub biex jindirizza nuqqas. Mhuwiex alternattiva
għall-mekkaniżmi tal-Artikolu 7 tat-TUE iżda pjuttost
jiġi qablu u jikkumplimentah. Dan huwa wkoll mingħajr
preġudizzju għas-setgħat tal-Kummissjoni sabiex jiġu
indirizzati sitwazzjonijiet speċifiċi li jaqgħu fil-kamp ta’
applikazzjoni tal-liġi tal-UE permezz ta’ proċeduri ta’ ksur skont
l-Artikolu 258 tat-Trattat dwar il-Funzjonament tal-Unjoni Ewropea (TFUE).
Minn
perspettiva Ewropea usa’, il-qafas huwa maħsub biex jikkontribwixxi biex
jintlaħqu l-objettivi tal-Kunsill tal-Ewropa, inkluż fuq il-bażi
tal-kompetenza tal-Kummissjoni Ewropea għad-Demokrazija permezz tad-Dritt
(il-Kummissjoni ta’ Venezja)[9].
2.
Għaliex l-istat tad-dritt
huwa ta’ importanza fundamentali għall-UE
Il-prinċipju
tal-istat tad-dritt isir kull ma jmur mudell organizzattiv dominanti
tal-liġi kostituzzjonali moderna u organizzazzjonijiet internazzjonali
(inklużi n-Nazzjonijiet Uniti u l-Kunsill tal-Ewropa) biex jirregola
l-eżerċizzju tas-setgħat pubbliċi. Dan jiżgura li
s-setgħat pubbliċi kollha jaġixxu fil-limiti stabbiliti
mil-liġi, skont il-valuri tad-demokrazija u d-drittijiet fundamentali, u
taħt il-kontroll ta’ qrati indipendenti u imparzjali. Il-kontenut
preċiż tal-prinċipji u l-istandards li joriġina mill-istat
tad-dritt jista' jvarja fil-livell nazzjonali, skont is-sistema kostituzzjonali
ta’ kull Stat Membru. Madankollu, il-ġurisprudenza tal-Qorti
tal-Ġustizzja tal-Unjoni Ewropea ("il-Qorti tal-Ġustizzja")
u l-Qorti Ewropea tad-Drittijiet tal-Bniedem, kif ukoll dokumenti mħejjija
mill-Kunsill tal-Ewropa, li jibnu b’mod partikolari fuq il-kompetenza
tal-Kummissjoni ta’ Venezja, jipprovdu lista mhux eżawrjenti ta’ dawn
il-prinċipji u għalhekk jiddefinixxu t-tifsira ewlieni tal-istat
tad-dritt bħala valur komuni tal-UE f’konformità mal-Artikolu 2
tat-TUE. Dawn
il-prinċipji jinkludu l-legalità, li tfisser proċess
trasparenti, responsabbli, demokratiku u pluralista għall-promulgazzjoni
tal-liġijiet; ċertezza tad-dritt; projbizzjoni
tal-arbitrarjetà tas-setgħat eżekuttivi; qrati indipendenti u
imparzjali; stħarriġ ġudizzjarju indipendenti u effettiv, li
jinkludi r-rispett għad-drittijiet fundamentali; u ugwaljanza
quddiem il-liġi[10]. Kemm
il-Qorti tal-Ġustizzja kif ukoll l-Qorti Ewropea tad-Drittijiet
tal-Bniedem kkonfermaw li dawn il-prinċipji mhumiex purament formali u
rekwiżiti proċedurali. Dawn huma l-mezz biex jiġu żgurati
kemm konformità kif ukoll rispett lejn id-demokrazija u d-drittijiet
tal-bniedem. L-istat tad-dritt huwa għalhekk prinċipju
kostituzzjonali b’komponenti formali kif ukoll sostantivi[11].
Dan
ifisser li r-rispett għall-istat tad-dritt huwa marbut mad-demokrazija u
d-drittijiet fundamentali: ma jistax ikun hemm demokrazija u rispett
għad-drittijiet fundamentali mingħajr rispett lejn l-istat tad-dritt
u vice versa. Id-drittijiet fundamentali huma effettivi biss jekk ikunu
ġustizzjabbli. Id-demokrazija hija protetta jekk ir-rwol fundamentali
tal-ġudikatura, inklużi l-qrati kostituzzjonali jistgħu
jiżguraw il-libertà tal-espressjoni, il-libertà tal-għaqda u
r-rispett tar-regoli li jirregolaw il-proċess politiku u elettorali. Fl-UE,
l-istat tad-dritt huwa ta’ importanza partikolari. Il-konformità mal-istat
tad-dritt hija prerekwiżit għall-protezzjoni tal-valuri fundamentali
kollha elenkati fl-Artikolu 2 tat-TUE. Din hija wkoll prerekwiżit
għaż-żamma tad-drittijiet u l-obbligi kollha li joriġinaw
mit-Trattati u mil-liġi internazzjonali. Il-fiduċja
taċ-ċittadini kollha tal-UE u tal-awtoritajiet nazzjonali fis-sistemi
ġudizzjarji tal-Istati Membri l-oħra kollha hija essenzjali
għall-funzjonament tal-UE kollha bħala "spazju ta' libertà,
sigurtà u ġustizzja mingħajr fruntieri interni". Illum, sentenza
fi kwistjonijiet ċivili u kummerċjali ta’ qorti nazzjonali trid
tiġi rikonoxxuta awtomatikament u infurzata fi Stat Membru ieħor u
Mandat ta’ Arrest Ewropew kontra allegat kriminal maħruġ fi Stat
Membru wieħed irid jiġi infurzat bl-istess mod fi Stat Membru
ieħor[12]. Dawn huma eżempji ċari
ta’ għaliex l-Istati Membri kollha jeħtieġu li jieħdu dan
f'kunsiderazzjoni jekk il-prinċipju tal-istat tad-dritt ma jkunx rispettat
b'mod sħiħ fi Stat Membru wieħed. Din hija r-raġuni
għaliex l-UE għandha interess qawwi fis-salvagwardja u
t-tisħiħ tal-istat tad-dritt madwar l-Unjoni.
3.
Għaliex Qafas ġdid
tal-UE biex jissaħħaħ l-istat tad-dritt
F’każijiet
fejn il-mekkaniżmi stabbiliti fuq livell nazzjonali biex jiġi
żgurat l-istat tad-dritt ma jkunux qed jaħdmu b’mod effettiv, hemm
theddida sistemika għall-istat tad-dritt u, b’hekk,
għall-funzjonament tal-UE bħala spazju ta’ libertà, sigurtà u
ġustizzja mingħajr fruntieri interni. F’sitwazzjonijiet bħal
dawn, l-UE teħtieġ li taġixxi biex tipproteġi l-istat
tad-dritt bħala valur komuni tal-Unjoni. Madankollu,
l-esperjenza wriet li theddida sistemika għall-istat tad-dritt fl-Istati
Membri ma tistax, fiċ-ċirkostanzi kollha, tiġi indirizzata b’mod
effettiv permezz tal-istrumenti li jeżistu bħalissa fil-livell
tal-Unjoni. L-azzjoni
li ttieħdet mill-Kummissjoni biex jitnedew proċeduri ta' ksur,
ibbażati fuq l-Artikolu 258 tat-TFEU, kienet strument
importanti biex jiġi indirizzat ċertu tħassib tal-istat
tad-dritt[13]. Iżda l-proċeduri ta’
ksur jistgħu jitnedew mill-Kummissjoni biss fejn dan it-tħassib
jikkostitwixxi, fl-istess ħin, ksur ta’ dispożizzjoni speċifika
tal-liġi tal-UE[14]. Hemm
sitwazzjonijiet ta’ tħassib li jaqgħu barra mill-ambitu tal-liġi
tal-UE u għalhekk ma jistgħux jitqiesu bħala ksur tal-obbligi
skont it-Trattati iżda xorta jkunu ta’ theddida sistemika għall-istat
tad-dritt. Għal dawn is-sitwazzjonijiet jistgħu japplikaw mekkaniżmi
ta' prevenzjoni u ta’ sanzjoni previsti fl-Artikolu 7 tat-TUE .
Il-Kummissjoni hija fost l-atturi li għandhom is-setgħa permezz tat-Trattat
li joħorġu proposta motivata sabiex dawn il-mekkaniżmi
jintużaw. L-Artikolu 7 tat-TUE għandu l-għan li
jiżgura li l-Istati Membri kollha jirrispettaw il-valuri komuni tal-UE,
inkluż l-istat tad-dritt. L-ambitu tiegħu ma għandux ikun
limitat għal oqsma koperti mil-liġi tal-UE, iżda jagħti
s-setgħa lill-UE biex tintervjeni bil-għan li tipproteġi l-istat
tad-dritt anki f’oqsma fejn l-Istati Membri jaġixxu b’mod awtonomu. Kif
spjegat fil-Komunikazzjoni tal-Kummissjoni dwar l-Artikolu 7 tat-TUE, dan huwa
ġġustifikat mill-fatt li "jekk Stat Membru jikser il-valuri
fundamentali b’mod pjuttost serju li jaqa' taħt l-Artikolu 7, dan
x’aktarx li jnaqqas l-istess bażi tal-UE u l-fiduċja bejn il-membri
tagħha, ikun xi jkun il-qasam li fih il-ksur ikun seħħ"[15].
Madankollu,
il-mekkaniżmu ta' prevenzjoni tal-Artikolu 7(1) tat-TUE jista'
jintuża biss f'każ ta' "riskju ċar ta' ksur serju" u
l-mekkaniżmu ta' sanzjoni tal-Artikolu 7(2) tat-TUE f'każ biss
ta' "ksur serju u persistenti minn Stat Membru" tal-valuri stabbiliti
fl-Artikolu 2 tat-TUE. Il-livelli limiti biex jintużaw
iż-żewġ mekkaniżmi tal-Artikolu 7 tat-TUE huma
għoljin ħafna u jenfasizzaw in-natura ta’ dawn il-mekkaniżmi
bħala l-aħħar għażla. L-iżviluppi
riċenti f’xi Stati Membri wrew li dawn il-mekkaniżmi mhux dejjem
ikunu adattati biex jirrispondu malajr għat-theddid għall-istat
tad-dritt fi Stat Membru. Għaldaqstant
hemm sitwazzjonijiet fejn it-theddid relatat mal-istat tad-dritt ma jistax
jiġi indirizzat b'mod effettiv mill-istrumenti eżistenti[16].
Qafas ġdid tal-UE biex jissaħħaħ l-Istat tad-Dritt
bħala valur komuni ewlieni tal-UE huwa meħtieġ flimkien ma’
proċeduri ta’ ksur u l-mekkaniżmi tal-Artikolu 7 tat-TUE.
Il-Qafas se jkun komplementari għall-mekkaniżmi eżistenti kollha
diġà fis-seħħ fil-livell tal-Kunsill tal-Ewropa biex jiġi
protett l-istat tad-dritt[17]. Dan jirrifletti kemm l-objettivi
tal-UE biex jiġu protetti l-valuri fundamentali tagħha u li
jintlaħaq livell ogħla ta’ fiduċja reċiproka u
integrazzjoni fl-ispazju ta’ libertà, sigurtà u ġustizzja mingħajr
fruntieri interni. Bit-twaqqif
ta' Qafas ġdid biex jissaħħaħ l-Istat tad-Dritt
il-Kummissjoni tkun qed tipprovdi ċarezza u ttejjeb il-prevedibbilità
rigward l-azzjonijiet li jista' jkollha tieħu fil-ġejjieni, filwaqt
li tiżgura li l-Istati Membri kollha jiġu trattati b’mod ugwali.
Abbażi ta’ din il-Komunikazzjoni, il-Kummissjoni hija lesta li tidħol
f’aktar diskussjonijiet mal-Istati Membri, il-Kunsill u l-Parlament Ewropew
dwar dawn il-kwistjonijiet.
4.
Kif se jaħdem il-Qafas
il-ġdid tal-Istat tad-Dritt tal-UE
L-iskop
tal-Qafas huwa li jippermetti lill-Kummissjoni biex issib soluzzjoni mal-Istat
Membru kkonċernat sabiex jiġi evitat li tinħoloq theddida
sistemika għall-istat tad-dritt f’dak l-Istat Membru li tista’ twassal
għal "riskju ċar ta’ ksur serju" skont it-tifsira
tal-Artikolu 7 tat-TUE, li jkun jeħtieġ li l-mekkaniżmi
pprovduti f’dak l-Artikolu jitniedu. Sabiex
tiġi żgurata l-ugwaljanza tal-Istati Membri, il-Qafas se japplika
bl-istess mod għall-Istati Membri kollha u se jopera fuq il-bażi tal-istess
punti ta’ referenza fir-rigward ta' dak li huwa ta’ theddida sistemika
għall-Istat tad-dritt.
4.1.
X’se jagħti bidu
għall-Qafas il-ġdid
Il-Qafas
se jintuża f’sitwazzjonijiet fejn l-awtoritajiet ta’ Stat Membru qed
jieħdu miżuri jew qed jaċċettaw sitwazzjonijiet li x’aktarx
jaffettwaw b’mod sistematiku u negattiv l-integrità, l-istabbiltà jew
il-funzjonament xieraq tal-istituzzjonijiet u tal-mekkaniżmi ta'
salvagwardja stabbiliti fuq livell nazzjonali biex l-istat tad-dritt jiġi
protett. Il-Qafas
il-ġdid tal-Istat tad-Dritt tal-UE mhuwiex imfassal b'tali mod li
jingħata bidu għalih minħabba ksur tad-drittijiet fundamentali
individwali jew amministrazzjoni ħażina tal-ġustizzja. Dawn
il-każijiet jistgħu u għandhom jiġu ttrattati mis-sistemi
ġudizzjarji nazzjonali, u fil-kuntest tal-mekkaniżmi ta’ kontroll
stabbiliti taħt il-Konvenzjoni Ewropea dwar id-Drittijiet tal-Bniedem li
l-Istati Membri kollha tal-UE jagħmlu parti minnha. L-iskop
ewlieni tal-Qafas huwa li jindirizza t-theddid tal-istat tad-dritt (kif
definit fit-tieni Taqsima) li huwa ta' natura sistemika[18].
L-ordni politika, istituzzjonali u/jew ġudizzjarja ta’ Stat Membru,
l-istruttura kostituzzjonali tiegħu, is-separazzjoni tas-setgħat,
l-indipendenza jew l-imparzjalità tal-ġudikatura, jew is-sistema
tiegħu ta’ rieżami ġudizzjarju inkluż ġustizzja kostituzzjonali fejn din
teżisti, iridu jkunu mhedda - pereżempju bħala riżultat
tal-adozzjoni ta’ miżuri ġodda jew ta’ prattiki mifruxa sew
tal-awtoritajiet pubbliċi u n-nuqqas ta’ rimedju domestiku. Il-Qafas se
jibda jintuża meta s-"salvagwardji tal-istat tad-dritt"
nazzjonali ma jkunux jistgħu jindirizzaw dan it-theddid b’mod effettiv. Il-Qafas
ma jwaqqafx lill-Kummissjoni milli tuża s-setgħat tagħha skont
l-Artikolu 258 tat-TFUE f’sitwazzjonijiet li jaqgħu fl-ambitu
tal-liġi tal-UE. U lanqas jipprevjeni li l-mekkaniżmi stabbiliti
fl-Artikolu 7 tat-TUE jibdew jintużaw direttament, jekk
id-deterjorament f’daqqa fi Stat Membru jkun jeħtieġ reazzjoni
msaħħa mill-UE[19].
4.2.
Il-Qafas bħala
proċess fi tliet stadji
Fejn
hemm indikazzjonijiet ċari ta’ theddida sistemika għall-istat
tad-dritt fi Stat Membru, il-Kummissjoni se tagħti bidu għal skambju
strutturat ma’ dan l-Istat Membru. Il-proċess huwa bbażat fuq
il-prinċipji li ġejjin: - enfażi fuq sejbien ta' soluzzjoni permezz ta’ djalogu
mal-Istat Membru kkonċernat; - żgurar ta' valutazzjoni oġġettiva
u dettaljata tas-sitwazzjoni inkwistjoni; - rispett tal-prinċipju ta’ trattament
ugwali tal-Istati Membri; - indikazzjoni tal-azzjonijiet rapidi
u konkreti li jistgħu jittieħdu biex jiġi indirizzat
it-theddid sistemiku u jiġi evitat l-użu tal-mekkaniżmi
tal-Artikolu 7 tat-TUE. Il-proċess
huwa magħmul, bħala regola, minn tliet stadji, valutazzjoni
tal-Kummissjoni, rakkomandazzjoni mill-Kummissjoni u segwitu
għar-rakkomandazzjoni. Il-valutazzjoni
tal-Kummissjoni Il-Kummissjoni
tiġbor u teżamina l-informazzjoni rilevanti kollha u tivvaluta jekk
hemmx indikazzjonijiet ċari ta' theddida sistemika għall-istat
tad-dritt kif deskritt hawn fuq. Din il-valutazzjoni tista’ tkun ibbażata
fuq l-indikazzjonijiet mogħtija minn sorsi disponibbli u istituzzjonijiet
rikonoxxuti, inklużi b’mod partikolari l-korpi tal-Kunsill tal-Ewropa u
l-Aġenzija tal-Unjoni Ewropea għad-Drittijiet Fundamentali[20].
Jekk,
bħala riżultat ta’ din il-valutazzjoni preliminari, il-Kummissjoni
hija tal-opinjoni li hemm tabilħaqq sitwazzjoni ta’ theddida sistemika
għall-istat tad-dritt, tibda djalogu mal-Istat Membru kkonċernat,
billi tibgħat "opinjoni dwar l-istat tad-dritt" u ssostni
t-tħassib tagħha, u tagħti lill-Istat Membru kkonċernat
il-possibiltà li jwieġeb. L-opinjoni tista’ tkun ir-riżultat ta’
skambju ta’ korrispondenza u laqgħat mal-awtoritajiet rilevanti u, fejn
xieraq,tkun segwita b’aktar skambji. Il-Kummissjoni
tistenna li l-Istat Membru kkonċernat jikkoopera matul il-proċess u
jibqa’ lura milli jadotta kull miżura irriversibbli fir-rigward
tal-kwistjonijiet ta’ tħassib imqajma mill-Kummissjoni, fl-istennija
tal-valutazzjoni tal-aħħar, skont id-dmir ta’ kooperazzjoni leali
stabbilit fl-Artikolu 4(3) tat-TUE. Jekk Stat Membru jonqos milli
jikkoopera f’dan il-proċess, jew saħansitra jfixklu, ikun element li
għandu jitqies meta tiġi vvalutata s-serjetà tat-theddida. F’dan
l-istadju tal-proċess, filwaqt li t-tnedija tal-valutazzjoni
tal-Kummissjoni u t-twassil ta’ din l-opinjoni se jiġu ppubblikati
mill-Kummissjoni, il-kontenut tal-iskambji mal-Istat Membru kkonċernat,
bħala regola, jinżamm kunfidenzjali, sabiex jiġi ffaċilitat
li tinstab soluzzjoni malajr. Ir-Rakkomandazjoni
tal-Kummissjoni Fit-tieni
stadju, sakemm il-kwistjoni ma tkunx sadanittant ġiet diġà solvuta
b’mod sodisfaċenti, il-Kummissjoni toħroġ "rakkomandazzjoni
dwar l-istat tad-dritt" indirizzata lill-Istat Membru
kkonċernat, jekk issib li hemm provi oġġettivi ta’ theddida
sistemika u li l-awtoritajiet ta’ dan l-Istat Membru ma jkunux qed jieħdu
azzjoni xierqa biex jirrimedjaw dan. Fir-rakkomandazzjoni
tagħha l-Kummissjoni tindika b’mod ċar ir-raġunijiet
għat-tħassib tagħha u tirrakkomanda li l-Istat Membru jsolvi
l-problemi identifikati fil-limitu ta’ żmien fiss u tinforma
lill-Kummissjoni bil-passi meħuda għal dan il-għan. Fejn xieraq,
ir-rakkomandazzjoni tista' tinkludi indikazzjonijiet speċifiċi dwar
modi u miżuri biex tissolva s-sitwazzjoni. Il-valutazzjoni
tal-Kummissjoni u l-konklużjonijiet jkunu ibbażati fuq
ir-riżultati tad-djalogu mal-Istat Membru kkonċernat kif ukoll fuq
kull evidenza addizzjonali li l-Istat Membru jkun jeħtieġ ukoll li
juri minn qabel. It-twassil
tar-rakkomandazzjoni tagħha u l-kontenut ewlieni tagħha jiġu
ppubblikati mill-Kummissjoni. Segwitu
għar-Rakkomandazzjoni tal-Kummissjoni Fit-tielet
stadju, il-Kummissjoni se tissorvelja s-segwitu mogħti mill-Istat Membru
kkonċernat għar-rakkomandazzjoni li ngħatat lilu. Din is-sorveljanza
tista’ tkun ibbażata fuq aktar skambji mal-Istat Membru kkonċernat u
tista’, pereżempju, tiffoka dwar għadhomx iseħħu
ċerti prattiki li jqajmu tħassib , jew dwar kif l-Istat Membru
jimplimenta l-impenji li għamel sadanittant sabiex isib soluzzjoni għas-sitwazzjoni.
Jekk
ma jkunx hemm segwitu sodisfaċenti għar-rakkomandazzjoni mill-Istat
Membru kkonċernat fiż-żmien stipulat, il-Kummissjoni tivvaluta
l-possibbiltà li tibda tuża wieħed mill-mekkaniżmi stabbiliti
fl-Artikolu 7 tat-TUE.[21] Interazzjoni
istituzzjonali Il-Parlament
Ewropew u l-Kunsill, jinżammu infurmati regolarment u mill-qrib dwar
il-progress li jkun sar f’kull wieħed minn dawn l-istadji. Benefiċċji
minn kompetenza ta' parti terza Sabiex
tikseb għarfien espert dwar kwistjonijiet partikolari marbutin mal-istat
tad-dritt fl-Istati Membri, il-Kummissjoni tista’, b’mod partikolari matul
il-fażi ta’ valutazzjoni, tfittex kompetenza esterna, inkluż
mill-Aġenzija tal-UE għad-Drittijiet Fundamentali[22].
Kompetenza esterna bħal din, tista' tgħin b'mod partikolari biex
tipprovdi analiżi komparattiva dwar ir-regoli u l-prattiki eżistenti
fi Stati Membri oħra sabiex ikun żgurat trattament ugwali tal-Istati
Membri, fuq il-bażi ta’ fehim komuni tal-istat tad-dritt fl-UE. Skont
is-sitwazzjoni, il-Kummissjoni tista' tiddeċiedi li tfittex parir u
għajnuna minn membri tan-netwerks ġudizzjarji fl-UE,
bħan-netwerks tal-Presidenti ta' Qrati Supremi tal-UE[23],
l-Assoċjazzjoni tal-Kunsilli tal-Istat u tal-Ġurisdizzjonijiet
Amministrattivi Supremi tal-UE[24] jew il-Kunsilli Ġudizzjarji[25].
Il-Kummissjoni teżamina, flimkien ma’ dawn in-netwerks, kif din
l-għajnuna tista’ tiġi pprovduta malajr fejn xieraq, u jekk humiex
meħtieġa arranġamenti partikolari għal dan il-għan. Il-Kummissjoni,
bħala regola u f’każijiet xierqa, tfittex il-parir tal-Kunsill
tal-Ewropa u/jew tal-Kummissjoni ta’ Venezja tagħha, u tikkoordina
l-analiżi tagħha magħhom fil-każijiet kollha fejn
il-kwistjoni hija wkoll taħt il-kunsiderazzjoni u l-analiżi
tagħhom.
5.
Konklużjoni
Din
il-Komunikazzjoni tistabbilixxi Qafas ġdid tal-UE għall-Istat
tad-Dritt bħala l-kontribut tal-Kummissjoni biex issaħħaħ
il-kapaċità tal-UE u tiżgura protezzjoni effettiva u ugwali tal-istat
tad-dritt fl-Istati Membri kollha. B’hekk tirrispondi għat-talbiet
mill-Parlament Ewropew u l-Kunsill. Filwaqt li ma jiġux esklużi
żviluppi futuri tat-Trattati f’dan il-qasam – li jridu jiġu diskussi
bħala parti mir-riflessjonijiet usa’ dwar il-ġejjieni tal-Ewropa – ,
huwa bbażat fuq il-kompetenzi tal-Kummissjoni kif previst fit-Trattati
eżistenti. Minbarra l-azzjoni tal-Kummissjoni, ir-rwol tal-Parlament
Ewropew u tal-Kunsill se jkun essenzjali fit-tisħiħ
tad-determinazzjoni tal-UE biex tħares l-istat tad-dritt. [1] Ara l-Preambolu tal-KEDB u l-Artikolu 3 tal-Istatut
tal-Kunsill tal-Ewropa (http://conventions.coe.int/Treaty/en/Treaties/Html/001.htm). [2] Ara l-Artikoli 3(2) tat-TUE u 67 tat-TFUE. [3] Ara d-diskors tal-Viċi President Reding,
il-Kummissarju għall-Ġustizzja tal-UE, "The EU and the Rule of
Law – What next?"""(http://europa.eu/rapied/press-release_SPEECH-13-677_en.htm). [4] Ara http://europa.eu/rapid/press-release_SPEECH-12-596_en.htm
u http://europa.eu/rapid/press-release_SPEECH-13-684_en.htm [5] F’Marzu 2013, il-Ministri tal-Affarijiet Barranin
tad-Danimarka, il-Finlandja, il-Ġermanja u l-Pajjiżi l-Baxxi talbu
għal aktar salvagwardji Ewropej biex tiġi żgurata l-konformità
mal-valuri fundamentali tal-Unjoni fl-Istati Membri. Dwar id-diskussjoni
fil-Kunsill Affarijiet Ġenerali ara http://www.consilium.europa.eu/uedocs/cms_Data/docs/pressdata/EN/genaff/136915.pdf.
Fuq il-konklużjonijiet tal-Kunsill tal-Ġustizzja u l-Affarijiet
Interni ara http://www.consilium.europa.eu/uedocs/cms_data/docs/pressdata/en/jha/137404.pdf [6] Ara r-riżoluzzjonijiet tal-PE li jistabbilixxu
għadd ta’ rakkomandazzjonijiet għall-istituzzjonijiet tal-UE dwar kif
tista' tissaħħaħ il-protezzjoni tal-Artikolu 2 tat-TUE
(ir-Rapport ta' Rui Tavares tal-2013, ir-Rapporti ta' Louis Michel u Kinga
Göncz tal-2014 - http://www.europarl.europa.eu/committees/mt/libe/reports.html). [7] F'Novembru 2013, fl-Assises
de la Justice, li hija konferenza ta' livell għoli dwar il-futur
tal-ġustizzja fl-UE li attendew għaliha aktar minn 600 parti
interessata, sessjoni waħda ġiet iddedikata speċifikament
għas-suġġett "Lejn mekkaniżmu ġdid ta' stat
tad-dritt". Ġiet organizzata sejħa għal rispons kemm qabel
il-konferenza kif ukoll wara li rriżultat f'għadd kbir ta'
kontribuzzjonijiet bil-miktub (ara http://ec.europa.eu/justice/events/assises-justice-2013/contributions_en.htm). [8] Kif enfasizza l-President
Barroso fid-diskors tiegħu dwar l-Istat tal-Unjoni ta’
Settembru 2013, il-qafas "għandu jkun ibbażat fuq
il-prinċipju ta’ ugwaljanza bejn l-Istati Membri u użat biss
f’sitwazzjonijiet fejn ikun hemm riskju serju u sistemiku għall-istat
tad-dritt, u li nħoloq minħabba referenzi predefiniti" (see
http://europa.eu/rapid/press-release_SPEECH-13-684_mt.htm). [9] Il-Kummissjoni ta’ Venezja, msejħa
uffiċjalment il-Kummissjoni Ewropea għad-Demokrazija permezz
tad-Dritt, hija korp konsultattiv tal-Kunsill tal-Ewropa dwar kwistjonijiet
kostituzzjonali (ara http://www.venice.coe.int/WebForms/pages/?p=01_Presentation). [10] Għal ħarsa ġenerali tal-ġurisprudenza
rilevanti dwar l-istat tad-dritt u l-prinċipji li l-istat tad-dritt
jinvolvi ara Anness I. [11] Il-Qorti tal-Ġustizzja ma tagħmilx referenza
għall-istat tad-dritt bħala sempliċement rekwiżit formali u
proċedurali, iżda tenfasizza wkoll il-valur sostantiv tiegħu
billi tispeċifika li "Unjoni bbażata fuq l-istat tad-dritt"
tfisser li l-istituzzjonijiet tal-UE huma soġġetti għal
stħarriġ ġudizzjarju tal-kompatibbilità tal-azzjonijiet
tagħhom mhux biss mat-Trattat iżda "mal-prinċipji
ġenerali tal-liġi li jinkludu d-drittijiet fundamentali" (ara ex
pluribus, l-Kawża C-50/00 P, Unión de Pequeños Agricultores
[2002] Ġabra I-06677, paragrafi 38 u 39; Il-Kawżi
Magħquda C-402/05 P u C-415/05 P, Kadi, [2008],
Ġabra I-06351, paragrafu 316). Dan ġie kkonfermat ukoll
mill-Qorti Ewropea tad-Drittijiet tal-Bniedem li tagħti l-istat tad-dritt
natura sostantiva billi tistabbilixxi li huwa kunċett inerenti fl-Artikoli
kollha tal-KEDB (ara pereżempju QEDB Stafford vs ir-Renju Unit,
28 ta’ Mejju 2001, paragrafu 63). Irid jiġi enfasizzat
li fil-verżjoni Franċiża l-Qorti ma tużax biss it-termini
"pre-eminence du droit" (preċedenza tal-liġi), iżda
wkoll "Etat de Droit" (l-istat tad-dritt). [12] Ara l-Kawża C-168/13, Jeremy F vs Premier
Ministre, li għadha ma ġietx ippubblikata, paragrafi 35 u 36. [13] Ara, pereżempju, il-Kawża C-286/12
Il-Kummissjoni vs l-Ungerija, li għadha ma ġietx ippubblikata
(trattament ugwali fir-rigward tal-irtirar obbligatorju ta’ mħallfin u
prosekuturi pubbliċi); C-518/07 Il-Kummissjoni vs Il-Ġermanja [2010]
Ġabra I-01885 u C-614/10 Il-Kummissjoni vs l-Awstrija, li għadha
ma ġietx ippubblikata (indipendenza tal-awtoritajiet tal-protezzjoni
tad-dejta). [14] L-azzjoni tal-Kummissjoni biex tiġi żgurata
konformità mal-Karta tad-Drittijiet Fundamentali turi din il-limitazzjoni
ġuridika li tirriżulta mit-Trattat innifsu. Kif
spjegat fil-Komunikazzjoni tagħha "Strategy for the effective
implementation of the Charter of Fundamental rights"
tad-19 ta’ Ottubru 2010 (COM(2010) 573 final),
il-Kummissjoni hija determinata li tuża l-mezzi kollha disponibbli sabiex
tiżgura li l-Karta tiġi rispettata b'mod sħiħ mill-Istati
Membri. Dan jikkonċerna b’mod partikolari l-Artikolu 47 tal-Karta li
jipprovdi li kull persuna li d-drittijiet tagħha garantiti mil-liġi
tal-UE jiġu miksura għandha d-dritt għal rimedju effettiv
quddiem tribunal indipendenti. Madankollu, dan jista’ jsir mill-Kummissjoni vis-à-vis
l-Istati Membri "meta jkunu qed jimplimentaw il-liġi tal-Unjoni
biss", kif stipulat b’mod espliċitu fl-Artikolu 51 tal-Karta.
Ara pereżempju l-Kawża C-87/12, Kreshnik Ymeraga u Oħrajn
vs Ministre du Travail, de l’Emploi et de l'Immigration, li għadha ma
ġietx ippubblikata, C-370/12 Thomas Pringle vs il-Gvern tal-Irlanda,
l-Irlanda u lill-Avukat Ġenerali, li għadha ma ġietx
ippubblikata u C-617/10, Åklagaren vs Hans Åkerberg Fransson, li għadha ma
ġietx ippubblikata. [15] Komunikazzjoni mill-Kummissjoni
tal-15 ta’ Ottubru 2003: Respect for and promotion of the values
on which the Union is based, COM(2003) 606 final. [16] F’xi każijiet, nuqqasijiet
sistemiċi marbutin mal-istat tad-dritt jistgħu jiġu trattati
bl-użu ta’ Mekkaniżmi ta’ Kooperazzjoni u Verifika (CVM) bbażati
fuq l-Atti ta’ Adeżjoni għar-Rumanija u l-Bulgarija. Madankollu, dawn
il-mekkaniżmi, li l-bażi tagħhom tinsab direttament fil-liġi
primarja tal-UE, jindirizzaw sitwazzjonijiet relatati li seħħew qabel
l-adeżjoni u għalhekk huma tranżitorji. Għalhekk dawn
mhumiex adattati għall-indirizzar ta' theddida għall-istat tad-dritt
fl-Istati Membri kollha tal-UE. [17] L-Artikolu 8 tal-Istatut tal-Kunsill tal-Ewropa
jipprovdi li Stat Membru li jkun "kiser b'mod serju"
il-prinċipji tas-supremazija tad-dritt u d-drittijiet tal-bniedem jista’
jiġi sospiż mid-drittijiet tiegħu ta’ rappreżentanza u
saħansitra jitkeċċa mill-Kunsill tal-Ewropa. Bħall-mekkaniżmi
stabbiliti fl-Artikolu 7 tat-TUE, dan il-mekkaniżmu qatt ma
ntuża. [18] Fir-rigward tal-kunċett ta’ "nuqqasijiet
sistemiċi" fil-konformità mad-drittijiet fundamentali meta
wieħed jaġixxi fl-ambitu tal-liġi tal-UE, ara, pereżempju,
il-Kawżi Magħquda C-411/10 u 493/10, N.S., li għadhom ma
ġewx ippubblikati, paragrafi 94 u 106; u l-Kawża C-4/11,
Il-Ġermanja vs Kaveh Puid, li għadha ma ġietx ippubblikata,
paragrafu 36. Rigward il-kunċett ta’ “sistemika” jew “strutturali”
fil-kuntest tal-Konvenzjoni Ewropea tad-Drittijiet tal-Bniedem, ara wkoll
ir-rwol tal-Qorti Ewropea tad-Drittijiet tal-Bniedem fl-identifikazzjoni ta'
problemi sistemiċi sottostanti, kif definiti fir-Riżoluzzjoni
Res(2004)3 tal-Kumitat tal-Ministri tat-12 ta’ Mejju 2004, dwar
Judgments Revealing an Underlying Systemic Problem, (https://wcd.coe.int/ViewDoc.jsp?id=743257&Lang=fr). [19] Ara wkoll il-Komunikazzjoni tal-Kummissjoni
tal-15 ta’ Ottubru 2003 (nota 15 f’qiegħ il-paġna). [20] Ara b’mod partikolari l-Artikolu 4(1)(a) tar-Regolament
tal-Kunsill (KE) Nru 168/2007 li jistabbilixxi Aġenzija tal-Unjoni
Ewropea għad-Drittijiet Fundamentali, (ĠU L 53, p. 1). [21] Ara wkoll il-Komunikazzjoni tal-Kummissjoni
tal-15 ta’ Ottubru 2003 (nota 15 f’qiegħ il-paġna). [22] L-Aġenzija tal-Unjoni Ewropea għad-Drittijiet
Fundamentali (FRA) tista’ tagħti pariri fl-ambitu tal-kompiti tagħha
kif definit mir-Regolament tal-Kunsill (KE) Nru 168/2007 (ara n-nota 20
ta’ qiegħ il-paġna). [23] In-Netwerk tal-Presidenti tal-Qrati Ġudizzjarji
Supremi tal-Unjoni Ewropea (ara http://www.networkpresidents.eu/). [24] L-Assoċjazzjoni tal-Kunsilli ta' l-Istati u
l-Amministrazzjonijiet Supremi tal-Ġurisdizzjoni ta' l-Unjoni Ewropea (ara
http://www.aca-europe.eu/index.php/en/). [25] In-Netwerk Ewropew tal-Kunsilli tal-Ġudikatura (ara http://www.encj.eu). Anness I: L-Istat tad-Dritt bħala prinċipju fundamentali tal-Unjoni L-istat
tad-dritt u s-sistema legali tal-Unjoni L-istat
tad-dritt huwa prinċipju kostituzzjonali legalment vinkolanti. Huwa
unanimament rikonoxxut bħala wieħed mill-prinċipji fundamentali
inerenti fis-sistemi kostituzzjonali kollha tal-Istati Membri tal-UE u
l-Kunsill tal-Ewropa. Ferm
qabel ma l-prinċipju tal-istat tad-dritt kien imsemmi b'mod espliċitu
fit-Trattati tal-UE[1],
il-Qorti tal-Ġustizzja fis-sentenza tagħha tal-1986 "Les Verts"
kienet enfasizzat li l-UE hija bbażata fuq l-istat tad-dritt minħabba
li la l-Istati Membri u lanqas l-istituzzjonijiet tagħha ma jistgħu
jevitaw stħarriġ tal-mistoqsija jekk il-miżuri adottati minnhom
humiex f'konformità mal-Karta Kostituzzjonali bażika, it-Trattat"[2]. Fil-ġurisprudenza
tagħha, il-Qorti tindika li l-istat tad-dritt huwa s-sors
tal-prinċipji ġustizzjabbli applikabbli b'mod sħiħ
fiis-sistema legali tal-UE. Il-Qorti tenfasizza wkoll li dawn il-prinċipji
huma prinċipji ġenerali tal-liġi mnisslin mit-tradizzjonijiet
kostituzzjonali komuni għall-Istati Membri. Il-prinċipji li
ġejjin huma sinifikanti: (a)
il-prinċipju
tal-legalità,li f’termini
sostanzjali jinkludi proċess trasparenti, responsabbli, demokratiku u
pluralista biex jiġu ppromulgati l-liġijiet. Il-Qorti kkonfermat
il-prinċipju tal-legalità bħala prinċipju fundamentali
tal-Unjoni, billi stqarret li "[...] f'komunità ta' dritt, ir-rispett
tal-legalità għandu jkun garantit kompletament "[3]; (b)
ċertezza
tad-dritt, li
tirrekjedi fost oħrajn li r-regoli jkunu ċari u prevedibbli u ma
jistgħux jinbidlu retroattivament. Il-Qorti enfasizzat l-importanza
taċ-ċertezza tad-dritt billi ddikjarat li minħabba
l-prinċipji taċ-ċertezza tad-dritt u l-protezzjoni tal-aspettattiva
leġittima, "[...] l-effett tal-leġiżlazzjoni [tal-Unjoni]
għandu jkun ċar u prevedibbli għal dawk li huma
soġġetti għaliha [...]". Il-Qorti ddikjarat ukoll li
"[...] il-prinċipju taċ-ċertezza tad-dritt jipprekludi miżura
[tal-Unjoni] milli tidħol fis-seħħ f'data qabel il-pubblikazzjoni
tagħha u li jekk ikun mod ieħor, f’każijiet
eċċezzjonali biss, fejn l-għan li għandu jinkiseb jitlob
hekk u fejn l-aspettativi leġittimi ta’ dawk ikkonċernati jkunu
rispettati kif jixraq"[4]; (c)
projbizzjoni
tal-arbitrarjetà tas-setgħat eżekuttivi. Il-Qorti tal-Ġustizzja ddikjarat:
"Madankollu, fis-sistemi legali kollha tal-Istati Membri, kull intervent
mill-awtoritajiet pubbliċi fil-qasam ta’ attivitajiet privati ta’ kull
persuna, kemm jekk fiżika jew ġuridika, għandu jkollu bażi
legali u jkun iġġustifikat għar-raġunijiet stabbiliti
mil-liġi, u, għalhekk, dawn is-sistemi jipprovdu, għalkemm
f’forom differenti, il-protezzjoni kontra intervent arbitrarju jew
sproporzjonat. Il-ħtieġa għal din il-protezzjoni trid tiġi
rikonoxxuta bħala prinċipju ġenerali tal-liġi [tal-Unjoni].
[…]"[5]; (d)
stħarriġ
ġudizzjarju indipendenti u effettiv, inkluż ir-rispett tad-drittijiet
fundamentali. Il-Qorti
tenniet li l-UE hija unjoni bbażata fuq l-istat tad-dritt li fiha l-atti
tal-istituzzjonijiet tagħha huma soġġetti għal
stħarriġ tal-kompatibilità tagħhom, b’mod partikolari,
it-Trattati, il-prinċipji ġenerali tad-dritt u d-drittijiet
fundamentali". Il-Qorti speċifikat li dan ifisser, b’mod partikolari,
li "individwi huma intitolati għal protezzjoni ġudizzjarja
effettiva tad-drittijiet li għandhom mill-ordni ġuridiku
tal-Unjoni". Il-Qorti spjegat b’mod ċar li d-dritt għal
protezzjoni bħal din huwa “wieħed mill-prinċipji ġenerali
tal-liġi mnissel mit-tradizzjonijiet kostituzzjonali komuni
għall-Istati Membri, li ilu stabbilit fl-Artikoli 6 u 13
tal-Konvenzjoni Ewropea għall-Protezzjoni tad-Drittijiet tal-Bniedem u
tal-Libertajiet Fundamentali"[6]. (e)
Barra minn hekk,
fir-rigward tar-rabta bejn id-dritt għal proċess ġust u
s-separazzjoni tas-setgħat il-Qorti speċifikat li “[...]
il-prinċipju ġenerali tad-dritt [tal-Unjoni] li jippermetti li kull
persuna jkollha dritt għal proċess ġust, ispirat
mill-Artikolu 6 tal-KEDB [...] jinkludi d-dritt għal tribunal li huwa
indipendenti għas-setgħa eżekuttiva b’mod partikolari [...][7]".
Il-prinċipju tas-separazzjoni tas-setgħat, huwa fil-fatt, element
importanti biex tiġi żgurata l-konformità mal-prinċipju
tal-istat tad-dritt. Madankollu, dan jista’ jieħu forom differenti
minħabba mudelli parlamentari differenti u livelli differenti li dan
il-prinċipju japplika għalihom fil-livell nazzjonali. F’dan
ir-rigward, il-Qorti għamlet referenza għas-separazzjoni operattiva
tas-setgħat bħala stħarriġ ġudizzjarju indipendenti u
effettiv, u indikat li "[...] il-liġi tal-UE ma għandhiex tipprekludi
Stat Membru milli fl-istess ħin jeżerċita funzjonijiet
leġiżlattivi, amministrattivi u ġudizzjarji, sakemm dawn
il-funzjonijiet jitwettqu skont il-prinċipju tas-separazzjoni
tas-setgħat li jikkaratterizza l-funzjonament tal-istat tad-dritt"[8].
(f)
ugwaljanza
quddiem il-liġi. Il-Qorti
enfasizzat ir-rwol ta’ trattament ugwali bħala prinċipju
ġenerali tal-liġi tal-UE billi tistqarr li "għandu
jitfakkar li l-prinċipju ta’ trattament ugwali huwa prinċipju
ġenerali tal-liġi tal-UE, stabbilit fl-Artikoli 20 u 21
tal-Karta tad-Drittijiet Fundamentali tal-Unjoni Ewropea"[9].
L-istat
tad-dritt u l-Kunsill tal-Ewropa Dawk
l-aspetti tal-istat tad-dritt bħala denominatur komuni tal-Unjoni huma
riflessi b'mod sħiħ fil-livell tal-Kunsill tal-Ewropa. Filwaqt li ma
hemmx definizzjoni fl-istatut tal-Kunsill tal-Ewropa jew fil-KEDB[10], u
minħabba li l-lista preċiża tal-prinċipji, l-istandards u
l-valuri li joriġinaw mill-istat tad-dritt jistgħu ivarjaw fuq livell
nazzjonali, il-Kummissjoni ta' Venezja, f'rapport ippubblikat fl-2011 tirreferi
għall-istat tad-dritt bħala "standard Ewropew fundamentali u
komuni biex jiggwida u jillimita l-eżerċizzju tas-setgħat
tad-demokrazija" u bħala "parti inerenti ta' kull soċjetà
demokratika" li "tirrikjedi li kulħadd jiġi trattat minn dawk
li jieħdu d-deċiżjonijiet b'dinjità, ugwaljanza u razzjonalità u
skont id-dritt, u jkollu l-opportunità li jikkontesta d-deċiżjoijiet
quddiem qrati indipendenti u imparzjali"[11]. Partikolarment, fuq il-bażi
wkoll tal-ġurisprudenza rilevanti tal-Qorti Ewropea tad-Drittijiet
tal-Bniedem, fir-Rapport tagħha l-Kummissjoni ta’ Venezja identifikat
il-karatteristiċi importanti u ġeneralment komuni iżda mhux
eżawrjenti li ġejjin tal-istat tad-dritt: (a)
legalità (inkluż
proċess trasparenti, responsabbli u demokratiku li jippromulga
l-liġijiet); (b)
ċertezza
tad-dritt; (c)
projbizzjoni ta’
arbitrarjetà; (d)
aċċess
għall-ġustizzja quddiem qrati indipendenti u imparzjali; (e)
rispett
għad-drittijiet tal-bniedem; nondiskriminazzjoni u ugwaljanza quddiem
id-dritt. L-istat
tad-dritt fuq livell nazzjonali Filwaqt
li l-istat tad-dritt ma kienx definit b'mod preċiż jew
eżawrjenti minn kostituzzjonijiet nazzjonali jew qrati, u ma kienx dejjem
kodifikat b'mod ċar u uniformi f'kostituzzjonijiet bil-miktub, huwa
denominatur komuni fit-tradizzjonijiet kostituzzjonali Ewropej moderni. F’bosta
ċirkustanzi l-qrati nazzjonali jagħmlu referenza għalih sabiex
jiggwidaw l-interpretazzjoni tagħhom tal-liġi nazzjonali jew
jużawh bħala sors biex jiżviluppaw b'mod sħiħ
il-prinċipji ġustizzjabbli. Anness II [1] L-ewwel referenza għall-istat tad-dritt kienet
tinsab fil-Preambolu tat-Trattat ta’ Maastricht tal-1992. It-Trattat ta’
Amsterdam semma l-Istat tad-Dritt fl-Artikolu 6(1) sostanzjalment
bl-istess mod bħall-Artikolu 2 kurrenti tat-TUE. [2] Il-Kawża 294/83, "Les Verts" vs
Il-Parlament Ewropew, [1986] Ġabra 01339, paragrafu 23. [3] Il-Kawża C-496/99 P, Il-Kummissjoni vs CAS
Succhi di Frutta [2004] Ġabra I-03801, paragrafu 63. [4] Il-Kawżi Magħquda 212 sa 217/80
Amministrazione delle Finanze dello Stato vs Salumi [1981]
Ġabra 2735, paragrafu 10. [5] Il-Kawżi Magħquda 46/87 u 227/88 Hoechst
vs Il-Kummissjoni [1989] Ġabra 02859, paragrafu 19. [6] Il-Kawża C-583/11 P Inuit Tapiriit Kanatami u
Oħrajn vs Il-Parlament u l-Kunsill, li għadha ma ġietx
ippubblikata, paragrafu 91; Il-Kawża C-550/09 E u F, [2010]
Ġabra I-06213, paragrafu 44; Il-Kawża C-50/00 P Unión
de Pequeños Agricultores [2002] Ġabra I-06677, paragrafu 38 u
39. [7] Kawżi Magħquda C-174/98 P u C-189/98 P,
Il-Pajjiżi l-Baxxi u Van der Wal vs Il-Kummissjoni [2000]
Ġabra I-00001, paragrafu 17. [8] Il-Kawża C-279/09 DEB, [2010]
Ġabra I-13849, paragrafu 58. [9] Il-Kawża C-550/07 P, Akzo Nobel Chemicals u
Akcros Chemicals vs Il-Kummissjoni [2010] Ġabra I-08301,
paragrafu 54. [10] Fil-preambolu tad-Dikjarazzjoni Universali
tan-Nazzjonijiet Uniti dwar id-Drittijiet tal-Bniedem (1948) hemm referenza
għall-istat tad-dritt iżda l-ebda definizzjoni. [11] Ara r-Rapport tal-Kummissjoni ta’ Venezja
tal-4 ta’ April 2011 L-Istudju Nru 512/2009
(CDL-AD(2011)003rev).