RAPPORT MILL-KUMMISSJONI LILL-PARLAMENT EWROPEW U LILL-KUNSILL Dwar il-Progress tal-Bulgarija taħt il-Mekkaniżmu ta' Kooperazzjoni u Verifika /* COM/2014/036 final
1.
Introduzzjoni Fl-2012, il-ħames sena
tal-Mekkaniżmu ta' Kooperazzjoni u Verifika (MKV), il-Kummissjoni
ddeċidiet li tipproduċi valutazzjoni fit-tul biex tagħti stampa
sħiħa tal-progress. Din il-valutazzjoni ġiet ippubblikata f'Lulju
2012.[1]
Hija wriet progress importanti fl-adattament tal-qafas leġiżlattiv u
istituzzjonali bażiku, iżda wkoll xi lakuni li fadal bħala
bżonn għal implimentazzjoni effettiva u konsistenti tar-riformi. Kien
għad hemm sfidi konsiderevoli x'jiġu indirizzati. F'dan il-kuntest, ġie
deċiż li jittieħed żmien itwal qabel ir-rapport li jmiss
(18-il xahar) juri kif ir-riformi li diġa' ġew implimentati
mill-Bulgarija kienu qed jiġu stabbiliti u biex jingħata
ż-żmien biex jiġi vvalutat il-grad ta' sostenibilità qabel
il-valutazzjoni li jmiss. Ir-rapport tal-2012, il-metodoloġija u
l-konklużjoni tiegħu kienu approvati wkoll fil-konklużjonijiet
tal-Kunsill tal-Ministri.[2] Dan ir-rapport jivvaluta
l-progress li għamlet il-Bulgarija fl-oqsma prinċipali tal-MKV
tar-riforma ġudizzjarja, tax-xogħol kontra l-korruzzjoni, u
l-ġlieda kontra l-kriminalità organizzata. Dawn huma kwistjonijiet
fil-qalba tal-modernizzazzjoni tas-soċjetà Bulgara: biex ir-riforma
tirnexxi, jeħtieġ li jkollha approċċ konsistenti u koerenti
bbażat fuq kunsens wiesa' fis-soċjetà Bulgara. L-inċertezzi
politiċi fil-Bulgarija ma għenux biex dan il-kunsens jiżdied, bi
tliet gvernijiet differenti fil-poter fiż-żmien kopert minn dan
ir-rapport, minkejja li l-avvenimenti wrew ukoll aspirazzjoni għal riforma
fost il-pubbliku. Il-Kummissjoni temmen li
l-proċess ta' monitoraġġ tal-MKV, l-opportunitajiet provduti
mill-fondi tal-UE u l-involviment kostruttiv tal-Kummissjoni u ħafna Stati
Membri jkompli jkun ta' appoġġ siewi għar-riforma fil-Bulgarija.
Ir-rapport formali li jmiss jitlesta f'madwar sena. 2.
Il-Qagħda tal-proċess ta' riforma fil-Bulgarija 2.1 Riforma
tal-ġudikatura L-Indipendenza,
l-Integrità u l-Kontabilità Il-fiduċja tal-pubbliku
fil-ġudikatura tal-Bulgarija mhix kbira.[3]
Ir-rapporti tal-MKV urew modi kif din il-fiduċja tista' titjieb, permezz
ta' approċċ professjonali fl-immaniġjar tas-sistema
għall-iżolament ta' ħatriet ġudizzjarji u
deċiżjonijiet mill-influwenza politika.[4] Minn Lulju 2012 'l hawn
ittieħdu xi passi sinifikanti. Il-proċeduri għall-ħatra ta'
maġistrati anzjani saru aktar pubbliċi u kien hemm sforz akbar biex
jiġu indirizzati xi wħud mill-kwistjonijiet ta' maniġment li
tiffaċċja l-ġudikatura, bħal żbilanċi fil-volum
ta' xogħol. Ġie kkonfermat li xi problemi serji jeħtieġu
azzjoni, bħall-bżonn li s-sistema tal-allokazzjoni tal-kawżi
tiġi protetta mill-manipulazzjoni. Fit-tieni nofs tal-2013, ma kien hemm
ebda attakk dirett mill-eżekuttiv fuq il-ġudikatura.[5] Madankollu,
kif ġie enfasizzat ukoll f'rapporti preċedenti, jibqa' t-tħassib
dwar l-indipendenza tal-ġudikatura fil-Bulgarija. F'Lulju 2012, il-Kummissjoni
esprimiet tama qawwija li l-maniġment futur tal-Kunsill Ġudizzjarju
Suprem (KĠS) jagħtih il-pożizzjoni ta' istituzzjoni ewlenija li
hija l-mutur tal-progress fir-riforma tal-ġudikatura. Ir-riformi fl-2012
introduċew aktar proċeduri ta' elezzjoni pubbliċi
għall-KĠS. Madankollu, il-mod kif tmexxiet l-elezzjoni
għall-KĠS fil-ħarifa tal-2012 ma weriex b'mod konvinċenti
kompetizzjoni miftuħa fejn il-mertu u l-integrità professjonali kienu
evidenti. Il-proċedimenti għall-elezzjoni tal-kwota parlamentari,
filwaqt li kienu aktar miftuħa minn qabel,[6]
taw ħjiel ta' influwenza sinifikanti mill-partiti politiċi fuq
il-proċess. Id-deċiżjoni li elezzjonijiet diretti
mill-imħallfin ma jiġux permessi kellha effett negattiv .fuq
l-elezzjoni tal-kwota ġudizzjarja.[7]
Dan ħalla ħafna mill-influwenza f'idejn it-tmexxija eżistenti
tal-qorti, u illimita l-opportunitajiet għal bidu ġdid. Il-KĠS identifika
l-prijoritajiet tiegħu b'mod aktar ċar minn qabel. Għamel ukoll
sforzi biex jinfetaħ, b'aktar komunikazzjoni u bit-twaqqif ta' Kunsill
Ċiviku biex iġib pariri mis-soċjetà ċivili lill-KĠS,
inkluż minn NGOs ewlenin kif ukoll minn organizzazzjonijiet professjonali.
Ir-rapport ta' Lulju 2012 identifika soċjetà ċivili
rigoruża f'dan il-qasam fbħala pass importanti 'l quddiem
għall-Bulgarija.[8]
Madankollu, l-influwenza vera tiegħu fuq il-politika għadha mhix
ċara u proċedura aktar ċara għall-konsultazzjoni
mal-Kunsill Ċiviku u li tingħata spjegazzjoni meta
r-rakkomandazzjonijiet tiegħu ma jiġux segwiti jżidu
l-effettività tal-Kunsill Ċiviku. B'mod ġenerali, il-KĠS
għandu jieħu aktar passi fid-direzzjoni tat-trasparenza. Il-KĠS ħa
xi passi 'l quddiem lejn riforma maniġerjali. Dwar il-volum ta'
xogħol u l-allokazzjoni mill-ġdid tar-riżorsi, jidher li qed
isir xi progress permezz ta' approċċ prattiku. F'oqsma oħra,
bħal proċeduri oġġettivi ta' evalwazzjoni u promozzjoni jew
l-introduzzjoni ta' aktar konsistenza fi proċedimenti dixxiplinari,
il-passi konkreti s'issa huma ftit. [9]
Il-kumitat tal-etika jista' jkun mistenni jaġixxi bħala difensur
tal-integrità, iżda l-KĠS ma ħax pożizzjoni biex
jagħmel l-integrità prijorità ewlenija.[10]
Hija iebsa għalih biex ineħħi tħassib kontinwu dwar
l-influwenza politika fuq it-teħid ta' deċiżjonijiet
tiegħu. Ir-riżultat huwa li
l-KĠS illum ma jitqiesx minn ħafna bħala awtorità awtonoma u
indipendenti li kapaċi tiddefendi b'mod effettiv l-indipendenza
ġudizzjarja fil-konfront tal-fergħat eżekuttivi u parlamentari
tal-gvern. L-oneru għad-difiża tal-indipendenza tal-ġudikatura,
jew għall-iskrutinju ta' jekk il-kawżi li huma politikament
sensittivi jiġux ġestiti oġġettivament,[11] spiss jidher li jaqa'
fuq is-soċjeta ċivili. Il-KĠS għandu jirrikonoxxi dan
bħala prijorita importanti u jintroduċi proċeduri trasparenti
għall-ġestjoni konsistenti tal-kwistjonijiet hekk kif
jitfaċċaw. Dan jissuġġerixxi wkoll li hemm bżonn ta'
politika aktar konsistenti lejn il-midja. Wieħed mill-oqsma
ewlenin li jinfluwenzaw il-perċezzjoni pubblika tal-infurzar tal-liġi
u l-ġustizzja huma l-ħatriet. Dawn servew ta' iffukar mill-midja u
fuq il-politika. Tħassib dwar ħatriet pubbliċi importanti li
jiġu deċiżi b'mod mhux trasparenti u li jinvolvi gruppi
b'saħħithom ta' interess ekonomiku u politiku, kompla
jissaħħaħ b'diversi ħatriet ta' profil għoli matul
is-sena li għaddiet. Eżempji konkreti huma l-ħatriet li fallew
tal-qorti kostituzzjonali u tal-Aġenzija Statali tas-Sigurtà Nazzjonali
(ASSN).[12]
Fiż-żewġ każijiet, il-kandidati eventwalment kellhom
jirriżenjaw, iżda t-tnejn li huma ħallew riżultat ta'
tħassib dwar kif taħdem is-sistema. Dawn kienu biss l-aktar
każijiet emblematiċi. F'każijiet oħra, ir-riżultati
ġew ikkontestati anqas, iżda l-proċess xorta waħda
ħalla stampa li t-tiswir ta' deċiżjonijiet mhux trasparenti
għandu influwenza akbar mill-proċeduri formali, minkejja t-titjib
fit-trasparenza.[13]
Każijiet bħal dawn
juru li filwaqt li proċeduri trasparenti huma importanti
għall-funzjonament tajjeb tal-istituzzjonijiet pubbliċi, ir-regoli
formali mhumiex dejjem biżżejjed. Sabiex iżżid il-fiduċja
fl-istituzzjonijiet tagħha, il-Bulgarija teħtieġ li
tiżviluppa rekord billi tippermetti li deċiżjonijiet li
jikkonċernaw ħatriet, inkluż karigi ta' livell għoli, jkunu
ibbażati fuq kompetizzjoni vera bejn il-kandidati skont l-istandards
ċari ta' mertu u integrità enfasizzati f'rapporti preċedenti tal-MKV.[14]
Każ ta' prova importanti ser ikun in-nomina u l-ħatra tal-Ispettur
Prinċipali tal-Ispettorat Ġudizzjarju. Id-dewmien ta l-impressjoni li
l-fattur ewlieni huwa li ma kienx hemm qbil bil-quddiem fuq kandidat, filwaqt
li din it-tip ta' pożizzjoni għandha timtela' wara proċess
miftuħ imfassal biex jaħtar persuna professjonali b'ħila kbira
li tista' turi u tapplika oġġettività sħiħa. L-elezzjoni
tal-President tal-Qorti Suprema tal-Kassazzjoni ser tkun ukoll ħatra
importanti aktar tard fl-2014. Element importanti
fil-protezzjoni tar-responsabbiltà u l-integrità ġudizzjarja huma
l-proċeduri dixxiplinari li jiġu applikati lill-maġistrati. Dan
jeħtieġ kriterji sistematiċi bil-għan ta' konsistenza
fl-azzjoni dixxiplinarja.[15]
Fejn ma hemmx standards ċari għall-valutazzjoni tal-każijiet
individwali, il-proċess isir miftuħ għal deċiżjonijiet
arbitrarji. Il-fatt li l-Qorti Amministrattiva Suprema spiss
reġġgħet lura deċiżjonijiet tal-KĠS jagħti
ħjiel ukoll ta' inkonsistenza jew nuqqas ta' interpretazzjoni komuni
tar-regoli. Approċċ sistematiku għall-azzjoni dixxiplinarja huwa
element ewlieni tal-indipendenza u l-initegrità ġudizzjarja, minħabba
li deċiżjonijiet arbitrarji f'dan il-qasam għandhom it-tendenza
li joħolqu l-bażi għal pressjoni bla bżonn - reali jew
perċepita - fuq il-maġistrati. L-unità l-ġdida mwaqqfa
biex tinvestiga r-reati magħmula minn maġistrati ser tkun
responsabbli għal qasam partikolarment sensittiv. Jekk tkun kapaċi
tistabbilixxi rekord ta' oġġettività u effettività, din tista' tkun
żieda importanti mal-isforzi għall-promozzjoni tal-integrità.
Madankollu, l-abbużi identifikati mit-tmexxija preżenti
tal-prosekuzzjonii fl-Ispettorat tal-Prosekuzzjoni ta' qabel juru wkoll ir-riskji
ta' korpi awtonomi fil-prosekuzzjoni.[16]
L-implimentazzjoni u l-applikazzjoni ta' proċeduri ċari, trasparenti
u responsabbli hija essenzjali biex tpatti għal dan ir-riskju. Qafas Legali Diskussjonijiet kurrenti dwar
ir-riforma tal-Kodiċi Penali għandhom l-għan li d-diskussjonijiet
dwar l-ewwel abbozz li ilhom għaddejjin jaslu għal konklużjoni u
f'Jannar ġiet ippreżentata proposta lill-Parlament. Il-kodiċi
l-ġdid għandu jġib miegħu titjib importanti. Madankollu,
għandu jiġi nnutat li filwaqt li riforma tal-Kodiċi Penali
tal-1968 - emendat b'mod regolari - tkun ta' għajnuna, jeħtieġ
li din ir-riforma tkun parti minn approċċ aktar wiesa'
tal-ġustizzja kriminali u tiġi diskussa mal-prattikanti u
mas-soċjetà ċivili. Fl-oqsma koperti mill-MKV, ser ikun importanti li
d-dispożizzjonijiet li huma maħsuba biex itejbu l-ġlieda kontra
l-korruzzjoni u l-kriminalità organizzata jiġu identifikati u spjegati,
izda ser ikun importanti wkoll li wieħed jara kif il-bidliet jistgħu
jiġu abbinati ma' sistema ġudizzjarja u ta' infurzar tal-liġi
mmaniġjata aħjar. Dan jista' jeħtieġ tibdil fil-Kodiċi
ta' Proċedura Kriminali. Fl-istess ħin, il-bżonn għal
tibdil leġiżlattiv m'għandux iżomm lura passi prattiċi
u organizzazzjonali siewja li jistgħu jsiru f'perjodu qasir,
indipendentement mill-liġi l-ġdida. Element importanti f'dan
il-proċess għandhom ikunu l-konklużjonijiet ta' analiżi ta'
każijiet li ma rnexxewx irrakkomandati mill-Kummissjoni,[17] kif ukoll
analiżijiet oħra ta' kwistjonijiet bħad-dewmien
fil-proċedimenti kriminali (ara hawn taħt). Qafas strateġiku
għar-riforma ġudizzjarja Flimkien mal-KĠS,
l-attur ewlieni l-ieħor li qed iservi ta' sfond għar-riforma
tas-sistema ġudizzjarja huwa l-Ministeru tal-Ġustizzja. B'tibdil
fit-tmexxija Ministerjali u aritmetika parlamentari li issa tagħmel
it-tibdil leġiżlattiv diffiċli, kien diffiċli
għall-Ministeru biex jipprovdi l-perspettiva meħtieġa,
għalkemm il-promozzjoni ta' oqsma bħall-ġustizzja elettronika
tista' tgawdi d-dividendi fil-futur. Jekk jingħataw responsabilità
ġenwina, l-isforzi preżenti biex tiġi aġġornata
l-istrateġija fit-tul għar-riforma ġudizzjarja jistgħu
jaġixxu bħala fokus bżonnjuż. Il-Ministru
tal-Ġustizzja staqsa lil NGOs prinċpali biex jgħinu
fl-analiżi tal-istat attwali tar-riforma tal-ġudikatura sal-lum.
L-idea hija li tkompli tinbena l-istrateġija tal-2010, li ġiet
implimentata biss parzjalment, u biex tkopri varjetà ta' kwistjonijiet li
jinkludu l-ibbilanċjar mill-ġdid tar-riżorsi skont
il-bżonn, kwistjonijiet ta' integrità, l-armonizzazzjoni tal-prassi
maniġerjali tal-qrati u l-irwol tal-kapijiet amministrattivi. Din
l-analiżi kellha tkun lesta fil-ħarifa tal-2013 iżda ġiet
imdewma. Għandha tiġi adottata fl-2014 wara konsultazzjoni
mal-partijiet interessati rilevanti u għandha tkopri perjodu ta' 7 snin
biex timplimenta riformi, parzjalment biex jiġi allinjat perjodu ta'
żmien mal-iprogrammar tal-appoġġ taħt il-fondi strutturali
tal-UE. Huwa importanti li l-istrateġija tkun suġġetta għal
konsultazzjoni wiesgħa, inkluż mas-soċjetà ċivili u
l-organizzazzjonijiet professjonali, iżda imbagħad tiġi adottata
bħala pjan direzzjonali maqbul mill-gvern u l-KĠS, biex tiġi
żgurata responsabilità massima. L-effiċjenza
tas-sistema ġudizzjarja u tal-infurzar tal-liġi Qed jittieħdu l-ewwel
passi fl-indirizzar ta' kwistjonijiet diffiċli li jirrigwardaw il-volum
ta' xogħol u ta' tqassim mill-ġdid tar-riżorsi bejn il-qrati u
l-uffiċċji tal-prosekuzzjoni. Dan jista' jiltaqa' ma xi
reżistenza minn ċerti partijiet ikkonċernati, iżda sakemm
jista' jintwera li huwa bbażat fuq kriterji oġġettivi u
trasparenti, se jaġixxi wkoll bħala turija li t-tmexxija
ġudizzjarja tista' tindirizza kwistjonijiet sensittivi. Flimkien
mat-tnedija ta' kompetizzjonijiet wefqin, dan issa għandu jibda
jirriżulta f'xi titjib reali.[18]
Ix-xogħol li sar fil-KĠS dwar l-iżvilupp ta' linji ġwida
metodoloġiċi biex jindirizza l-iżbilanċ fil-volum ta'
xogħol għandu joffri wkoll bażi tajba għall-futur. Tqassim
ġust tal-volum ta' xogħol mhux biss jagħmel tajjeb għal
sistema aktar effiċjenti li sservi aħjar għall-pubbliku Bulgaru
- iżda jkollu konsegwenzi wkoll għal proċedimenti dixxiplinari.
Bħalissa, id-dewmien mifrux ħafna jista' wisq faċilment
jintuża għal kawżi ta' dixxiplinar - spiss fuq bażi
inkonsistenti - filwaqt li r-responsabilità għall-problema tista' tkun
fit-tmexxija ġudizzjarja u l-kapijiet amministrattivi. Dwar l-allokazzjoni
tal-kawżi, il-KĠS beħsiebu jinstalla sistema ċentralizzata
biex iżomm kont ta' allokazzjonijiet aleatorji ta' kawżi fil-qrati
kollha, biex jindirizza t-tħassib li s-sistema preżenti tista' tiġi
mmanipulata.[19]
Wieħed jilqa' l-fatt li l-eżistenza ta' problema issa ġiet
rikonoxxuta. Sistema permanenti għandha tibbenefika minn għarfien
espert minn barra u mill-involviment tal-partijiet interessati u s-soċjetà
ċivili jekk il-fiduċja għandha tiġi stabbilita
mill-ġdid. Huwa importanti wkoll li jkun hemm regoli implimentattivi
komuni, sabiex il-partijiet kollha jkunu jafu kif is-sistema tissarraf
fil-prattika u jkunu jistgħu jqajjmu mistoqsijiet dwar kwalunkwe mumenti
fejn ir-regoli jkunu jidhru li ma ġewx rispettati. Parti importanti oħra
tal-maniġment tas-sistema ġudizzjarja huwa l-Ispettorat marbut
mal-Kunsill Ġudizzjarju Suprem. Kif imniżżel f'rapporti
preċedenti tal-MKV,[20]
l-Ispettorat jista' jkun għodda siewja biex imexxi approċċ ta'
maniġment aktar rigoruż u biex jiffoka fuq nuqqasijiet li ġew
identifikati, u jorjenta xogħlu mill-ġdid minn approċċ
formali tal-ispezzjonijiet għal wieħed kwalitattiv. Bħalissa
l-Ispettorat qed janalizza l-istatistiki fuq il-konformità mal-iskadenzi jew
jikkontrolla l-applikazzjoni tal-allokazzjoni aleatorja tal-każijiet,
iżda rari jikkontrolla l-kwalità tal-fajls tal-kawżi u lanqas ma jqis
il-kwistjonijiet tal volum ta' xogħol b'mod sistematiku. Bħala
konsegwenza, il-konklużjonijiet li wasal għalihom l-ispettorat
f'qasam bħall-allokazzjoni aleatorja ma jidhirx li jindirizzaw
il-kwistjonijiet għal kollox. Barra minn hekk, kwistjonijiet relatati
mal-integrità jew l-imġieba etika tal-maġistrati, ma jiġux
trattati mill-Ispettorat, minħabba li l-Ispettorat iqis li dawn
jaqgħu 'il barra mill-kompetenza tiegħu. Dawn il-fatturi jillimitaw
l-impatt tal-Ispettorat fejn jidħol l-indirizzar tan-nuqqasijiet usa' li
jaffettwaw is-sistema ġudizzjarja fil-Bulgarija.[21] Eżempju fejn
il-maniġment ħa approċċ aktar sistematiku huwa
fil-prosekuzzjoni.[22]
L-awditjar li sar mill-Prosekutur Ġenerali u l-pjan ta' azzjoni li jsegwi
jipprovdu analiżi ċara tan-nuqqasijiet, u jfittxu li jidentifikaw
rimedji partikolari. Jekk jiġi implimentat b'suċċess, l-pjan ta'
azzjoni jista' jrendi riżultati sinifikanti, filwaqt li tispjega li
r-riżorsi żejda mhumiex dejjem meħtieġa biex jagħtu
spinta lill-bidla. Filwaqt li proċess bħal dan fil-prosekuzzjoni ma
jistax ikun replikat b'mod awtomatiku fil-ġudikatura, minħabba
l-maniġment inqas ġerarkiku tiegħu, huwa jipprovdi eżempju
f'termini ta' rieda akbar li jindirizza l-problemi u jkun speċifiku
fis-soluzzjonijiet intenzjonati. Madankollu jkun hemm bżonn li tiġi
applikata aktar trasparenza lill-proċess, biex jiġi żgurat li
r-responsabilità għall-implimentazzjoni tiegħu tista' tkun effettiva.
Ir-riforma fil-prosekuzzjoni teħtieġ ukoll li timxi 'l quddiem
fil-kuntest tal-istrateġija ta' riforma ġudizzjarja usa' - l-problemi
bħall-indirizzar tad-diffikultajiet bl-użu tal-għarfien espert
fil-qorti jeħtieġu approċċ komuni mill-prosekuzzjoni u
l-KĠS. Kwistjonijiet bħall-valutazzjonijiet tal-prestazzjoni
jistgħu wkoll jimxu 'l quddiem b'mod li jiżgura approċċ
konsistenti għall-imħallfin u l-prosekuturi. B'mod aktar ġenerali,
il-Ministeru tal-Intern għadda minn għadd ta' riformi sinifikanti
biex jiffoka fuq l-iskop ewlieni tal-infurzar tal-liġi u biex iqassam
mill-ġdid il-persunal minn funzjonijiet amministrattivi għal dawk
operazzjonali. Il-prassi problematika tad-donazzjonijiet lill-Ministeru, li
ġiet ristretta għall-awtoritajiet u kumpaniji pubbliċi, skont
ir-rapporti twaqqfet. Fl-istess ħin, il-Ministeru jrid jaffaċċja
sfidi bħall-ġestjoni xierqa ta' dimostrazzjonijiet u pressjoni fuq
il-fruntieri. 2.2 Il-Korruzzjoni
Il-korruzzjoni mifruxa hija
pperċepita bħala problema ewlenija u hija ta' sfida sinifikanti
għall-awtoritajiet Bulgari[23]
Għandha konsegwenzi ċari għar-rieda tan-negozji biex jinvestu
fil-Bulgarija.[24]
Strateġija kontra l-korruzzjoni kienet adottata mill-gvern ta' qabel
fl-2010 u issa qed tiġi aġġornata - tista' tinvolvi b'mod utli għarfien
espert minn barra indipendenti f'dan ix-xogħol. Kollox ma' kollox,
ir-riżultati tal-isforzi preċedenti kienu limitati ħafna.
L-istampa ġenerali hija dik ta' rispons dgħajjef u mhux koordinat
għal x'inhi problema sistematika tul l-amministrazzjoni pubblika.
In-nuqqasijiet identifikati f'rapport MKV preċedenti, jibqgħu.[25] Saru għadd ta' bidliet
istituzzjonali matul l-aħħar snin, iżda hemm it-tendenza li dawn
l-inizjattivi jidħlu fi problemi jew sempliċement ma juru ebda
riżultati viżibbli. Pereżempju, il-Kummissjoni dwar il-Kunflitt
ta’ Interess, li setgħet kellha rwol kruċjali li timmira għal
prattiki irregolari fil-livelli kollha fis-settur pubbliku, minflok inqabdet fi
skandlu serju li jinvolvi s-suspett ta' influwenza politika qawwija.
Il-proġett kontra l-korruzzjoni BORKOR, li ġie promoss bħala
strument ewlieni biex jidentifika u jindirizza r-riskji ta' korruzzjoni,
għadu ma pproduċiex riżultati konkreti, minkejja li ġew
dedikati riżorsi għall-proġett. Fil-qasam tal-akkwist pubbliku,
qafas leġiżlattiv kumpless u li dejjem jinbidel għamilha aktar
diffiċli biex tinħoloq kultura ta' oġġettività u serjetà.
Xi vuċijiet tan-negozju qed jitilfu l-fiduċja li mewġa ta'
manipulazzjonijiet ta' offerti tista' titwaqqaf.[26] Hemm ukoll, madankollu, xi
żviluppi pożittivi. Mill-2007 'l hawn l-ispettorati interni
tal-amministrazzjoni tal-istat li jaħdmu taħt il-gwida
tal-Ispeettorat Ġenerali taħt l-Uffiċċju tal-Prim Ministru
issaħħew. Huma għandhom il-potenzjal ta' rwol importanti
fid-detezzjoni u l-prevenzjoni tal-irregolaritajiet kif ukoll
fil-preżentazzjoni ta' proposti għal aktar żviluppi fis-sistema
ta' kontra l-korruzzjoni. Il-prassi li jiġu stabbiliti timijiet
konġunti bejn l-aġenziji investigatorji u l-prosekuzzjoni
għandha twassal ukoll għal rispons aktar effettiv rigward reati ta'
korruzzjoni serji. Jibqa' l-każ li l-isforzi ta' kontra l-korruzzjoni huma
mxerrda, bl-ebda awtorità ta' korruzzjoni waħedha ma tingħata
l-awtorità, u l-awtonomija li ġġib il-bidla. L-Ispettorat Ġenerali
jista' jaġixxi bħala nukleju għal dan ix-xogħol, iżda
bħalissa qiegħed fuq skala żgħira wisq biex ikollu impatt
kbir. L-esperjenza
tissuġġerixxi, madankollu, li s-segwiment b'suċċess ta'
korruzzjoni f'livell għoli, hija ta' importanza ċentrali
għall-kredibilità tal-azzjoni kontra l-korruzzjoni, sabiex
it-trasgressjonijiet jitressqu quddiem il-ġustizzja. In-nuqqas ta' rekord
ta' suċċess tas-segwiment ta' każijiet ta' korruzzjoni f'livell
għoli jibqa' ostaklu biex il-pubbliku Bulgaru jiġi persważ li qed
isir sforz serju biex jindirizza l-problema. 2.3 Kriminalità
organizzata Bl-istess mod, in-nuqqas ta'
progress ġenerali jew ta' kawżi ta' kriminalità organizzata
emblematiċi, għandu konsegwenzi inevitabbli
għall-perċezzjonijiet dwar il-ġlieda kontra l-kriminalità
organizzata. Għadd ta' kawżi bi profil għoli waqgħu,
filwaqt li għal reati serjii oħra, bħal qtil kuntrattwali, ma
saru ebda akkużi wara diversi snin ta' investigazzjoni. Il-fatt li figuri involuti
fil-kriminalità organizzata bi profil għoli kellhom il-ħila
jaħarbu mill-ġustizzja lejlet il-verdett finali f'Lulju 2012 kien
sors ta' tħassib mifrux:[27]
iżda l-fatt li ħadd ma kien lest li jieħu r-responsabilità
għal dan, u li ma ttieħdu ebda passi biex jiġi żgurat li
dan ma jerġax jiġri, hija riflessjoni aktar qawwija
tad-diffikultajiet tas-sistema biex tindirizza l-problemi.[28] Il-miżura ewlenija
meħuda mill-gvern il-ġdid kienet it-tisħiħ
għall-Aġenzija Statali tas-Sigurtà Nazzjonali (ASSN), li issa mhux
biss ser tkun qed tieħu ħsieb l-ispjunaġġ u
l-kontraintelliġenza, iżda wkoll il-kriminalità organizzata u varjetà
ta' reati oħra meqjusa li huma sinifikanti biżżejjed li
jaffettwaw is-sikurezza tal-istat. Dan jinkludi t-trasferiment ta' unitajiet
speċjali tal-Pulizija fuq kriminalità organizzata (GDBOP) għas-servizzi
tas-sigurtà (ASSN). Dan ħoloq xi tfixkil fl-operazzjoni tas-servizzi
kkonċernati u huwa importanti li jiġi żgurat li dan l-effett
ikun biss wieħed tranżitorju. B'mod aktar sinifikanti, il-mod li bih
ittieħdet id-deċiżjoni, mingħajr ebda konsultazzjoni jew
ġustifikazzjoni dak iż-żmien, ikkawża ħsara
sinifikanti fir-reputazzjoni tas-servizzi kif ukoll tal-gvern il-ġdid, li
tista' biss tiġi rimedjata billi s-servizzi juru li l-bidla ġġib
magħha riżultati operazzjonali imtejba. Kif diskuss hawn fuq, f'dan
il-każ l-istampa ġenerali ta' riforma implimentata b'mod prematur
ġiet aggravata aktar mill-kontroversja fuq il-ħatra tal-kap
il-ġdid tal-aġenzija ta' sigurtà. Kwistjoni ewlenija hija wkoll
it-tqassim tax-xogħol mal-Ministeru tal-Intern. Per eżempju, l-ASSN
ser tieħu ħsieb il-produzzjoni ta' drogi u t-traffikar
internazzjonali tad-drogi, filwaqt li l-pulizija ser tieħu ħsieb
reati oħra relatati mad-droga. L-ASSN ser tieħu ħsieb
il-korruzzjoni f'livell għoli, il-pulizija tieħu ħsieb il-forom kollha
l-oħra ta' korruzzjoni. Xi drabi l-każijiet jistgħu
jeħtieġu li jkunu mqassma mill-ġdid tul l-investigazzjoni. L-ASSN u l-Prosekuzzjoni
iffurmaw timijiet speċjalizzati biex jieħdu ħsieb
il-korruzzjoni, it-traffikar, u r-reati finanzjarji.[29] Filwaqt li din
l-organizzazzjoni mill-ġdid tista' ġġib xi żviluppi
pożittivi, l-aktar billi jkun hemm approċċ aktar integrat
minħabba l-konnessjonijiet bejn il-korruzzjoni u l-kriminalità
organizzata, l-aġenzija l-ġdida ser ikollha tistabbilixxi rekord b'saħħitha
jekk trid tneħħi l-impressjoni negattiva maħluqa mill-atmosfera
kontroversjali tal-ħolqien tagħha. Għandha tingħata
attenzjoni partikolari lill-kooperazzjoni mas-servizzi tal-infurzar
tal-liġi fi Stati Membri oħra.[30] B'mod aktar ġenerali,
ir-rapporti tal-MKV irrakkomandaw analiżi komprensiva tar-raġunijiet
għaliex il-każijiet fil-passat waqfu ħesrem jew ma kellhomx
suċċess, li tinvolvi l-awtoritajiet kollha tal-gvern u
ġudizzjarji relevanti,[31]
Il-problemi pperċepiti bħall-użu tal-evidenza esperta fil-qorti,
protezzjoni insuffiċjenti tax-xhieda u problemi bl-evidenza jridu jidhru
mill-perspettiva tal-investigazzjoni tal-pulizija, il-fażi
tal-prosekuzzjoni u tal-proċess jekk għandu jsegwi t-titjib.
Il-progress fuq l-analiżi kien bilmod u nuqqas ta' koordinazzjoni u sa
ċertu punt ta' responsabilità huwa ssuġġerit minn inizjattivi
paralleli mill-Prosekuzzjoni u l-KĠS.[32]
Diskussjonijiet miftuħa mal-partijiet interessati u mas-soċjetà
ċivili, segwiti minn pjan ta' azzjoni ċar, huma meħtieġa
biex jerġgħu jġibu l-momentum f'dan il-proċess. Is-sekwestru tal-assi huwa
għodda ewlenija biex il-gruppi tal-kriminalità organizzata jiġu
mċaħħda mid-dħul illegali tagħhom. It-tmexxija
l-ġdida tal-kummissjoni tas-sekwestru tal-assi (CEPACA) tidher li wettqet
żieda modesta f'assi ssekwestrati. Madankollu, l-liġi l-ġdida,
minkejja li tejjbet xi aspetti, inkludiet ukoll xi emendi parlamentari li
ħolqu ostakli ġodda, b'mod partikolari limitu ta' ġid mhux
ġustifikat għoli ħafna. għall-aġenzija (CEPACA) - biex
tintervjeni ex-officio. Xi mistoqsijiet għalhekk jibqgħu rigward l-istabbiliment
legali l-ġdid u l-impatt tiegħu fuq il-kapaċità tal-CEPACA li
taġixxi b'mod effettiv.[33] Bl-istess mod,
il-prosekuzzjoni speċjalizzata u l-qrati xorta waħda
jeħtieġ li jistabbilixxu esperjenza ta' indirizzar effettiv ta'
kawżi importanti. Jibqa' tħassib li xi aspetti tas-disinn qed ifixklu
l-effettività tagħhom, b'mod partikolari nuqqas ta' awtorità li
jipprijoritizzaw, li tħalli lill-istituzzjonijiet mtaqqla b'kawżi
żgħar. In-nuqqas ta' għarfien espert tekniku huwa spiss immarkat
mill-prosekuzzjoni speċjalizzata bħala problema operazzjonali serja,
u ż-żieda tal-importanza tal-investigazzjoni finanzjarja fi
kriminalità organizzata tagħmel dan partikolarment importanti. 3. KONKLUŻJONIJIET
U RAKKOMANDAZZJONIJIET Mill-aħħar
rapport tal-Kummissjoni f'Lulju 2012, il-Bulgarija għamlet xi passi
'l quddiem. Kien hemm ammont ta' titjib fil-proċeduri tal-ħatriet, xi
passi maniġerjali utili mill-Prosekutur Ġenerali u xi progress
mill-Kunsill Ġudizzjarju Suprem dwar il-kwistjoni tal-ammont ta'
xogħol. Madankollu,
il-progress ġenerali għadu mhux biżżejjed u huwa
fraġli. Il-fiduċja pubblika hija kkundizzjonata l-aktar minn mumenti
ewlenin meta d-deċiżjonijiet jew il-ġrajjiet ikunu ta'
importanza biżżejjed biex jiggarantixxu aktar interess ġenerali.
Ħafna mill-ġrajjiet bħal dawn matul l-aħħar 18-il
xahar - perjodu li fih il-Bulgarija kellha tliet gvernijiet differenti - kienu
s-sors ta' tħassib aktar milli ta' riassigurazzjoni, b'ħatriet li
kellhom jiġu abbandunati minħabba kwistjonijiet ta' integrità,
il-ħarba mill-ġustizzja ta' mexxejja kkundannati tal-kriminalità
organizzata u suċċessjoni ta' rivelazzjonijiet dwar l-influwenza
politika fuq is-sistema ġudizzjarja. Jifdal biss ftit każijiet li
fihom ir-reati ta' korruzzjoni jew kriminalità organizzata ġew konklużi
fil-qorti. Hemm vuċijiet
favur ir-riforma fil-Bulgarija, iffrustrati minħabba l-pass kajman
tal-bidla, li ħaqqhom jingħataw appoġġ. Biex isir progress
aktar mgħaġġel lejn il-punti ta' riferiment tal-MKV,
l-awtoritajiet Bulgari jeħtieġ li jaħdmu magħhom u
jipprovdu tmexxija bbażata fuq viżjoni li fil-qalba tagħha
għandha l-prinċipji ewlenin bħall-istat tad-dritt u
l-indipendenza tal-ġudikatura. Dan ikun ifisser impenn politiku għal
strateġija fit-tul għar-riforma kif ukoll miżuri konkreti u
prattiċi fuq perjodu qasir biex imexxu l-proċess 'il quddiem. Il-Kummissjoni tistieden
lill-Bulgarija biex tieħu azzjoni fl-oqsma li jmiss: 1. L-Indipendenza, ir-responsabilità u l-integrità
tal-ġudikatura Ir-regoli li jmexxu
l-ħatriet għandhom jiġu applikati b'ċarezza u trasparenza.
Serje ta' kawżi li fihom il-professjonaliżmu u l-integrità huma b'mod
ċar il-mexxejja ewlenin fi proċess ta' ħatra jkunu
meħtieġa biex tiġi stabbilita mill-ġdid il-fiduċja
pubblika, b'mod partikolari fil-każ tal-aktar ħatriet għoljin.
F'dan il-qasam il-Bulgarija għandha: ·
Tistabbilixxi sett ta' standards
oġġettivi għall-evalwazzjonijiet u l-promozzjonijiet, li
jiffukaw fuq il-mertu, l-integrità u t-trasparenza, u twaqqaf sistema biex
timmonitorja u tevalwa l-applikazzjoni ta' dawk l-istandards fil-prattika
attwali, li tkopri l-ispeċifiċitajiet
tal-funzjonijiet tal-imħallfin, prosekuturi u investigaturi. Tinvolvi, fiż-żewġ passi, lilll-assoċjazzjonijet
professjonali u partijiet interessati oħra. ·
Tiżviluppa prassi konsistenti, fil-KĠS li
tapplika standards oġġettivi ta' mertu, integrità u trasparenza
għall-ħatriet, inkluż għal karigi ta' livell għoli. ·
Tipprovdi garanziji għall-integrità u
t-trasparenza tas-sistema tal-allokazzjoni tal-kawżi madwar
il-ġudikatura, b'sistema ta'
allokazzjoni aleatorja kkontrollata minn esperti indipendenti biex tiżgura
li l-kapijiet amministrattivi jkunu responsabbli għal kollox
mid-deċiżjonijiet kollha li jiżvijaw mis-sistema.
Jinħtieġu regoli komuni għall-applikazzjoni tas-sistema u
għandhom japplikaw għall-qrati kollha. ·
Tagħti direzzjoni ġdida lix-xogħol
tal-Ispettorat u tal-KĠS biex jaġixxu b'mod proattiv biex jippromwovu
l-integrità u l-effiċjenza tal-ġudikatura. ·
Tistabbilixxi proċedura ċara
għall-KĠS biex jirreaġixxi b'mod pubbliku f'każijiet ta'
interferenza politika fil-ġudikatura u l-prosekuzzjoni. 2. Ir-Riforma tas-Sistema Ġudizzjarja L-istrateġija
aġġornata dwar ir-riforma ġudizzjarja għandha tintuża
biex tagħti direzzjoni u momentum lir-riforma. F'dan il-qasam,
il-Bulgarija għandha: ·
Timplimenta l-pjan ta' azzjoni
għall-prosekuzzjoni fil-perjodu ta' żmien propost. Tinkorpora l-pjan
ta' azzjoni fir-riforma usa' tal-ġudikatura. Sadanittant, fil-KĠS,
tieħu miżuri konkreti biex tindirizza l-problema ta' volum ta' xogħol
differenti bejn il-qrati u l-maġistrati b'mod oġġettiv. ·
L-istrateġija għandha tinkludi rapport
ta' progress annwali mill-KĠS dwar miżuri fir-riforma
ġudizzjarja u objettivi għas-sena ta' wara sabiex tiżdied
it-trasparenza tal-proċess
Tistabbilixxi
mira għat-tlestija tax-xogħol fuq il-Kodiċi Penali
l-ġdid, u għall-implimentazzjoni tiegħu.
Tiżgura
l-involviment miftuħ tal-NGOs kollha sinifikanti u
organizzazzjonijiet
professjonali
fid-definizzjoni u l-monitoraġġ tal-istrateġiji
għar-riforma. 3. L-effiċjenza tas-sistema ġudizzjarja Il-kwistjonijiet
tal-iżbilanċi fil-volum ta' xogħol u t-tqassim tar-riżorsi
għandhom ikomplu jiġu indirizzati flimkien ma' kwistjonijiet
bħal evalwazzjonijiet u promozzjonijiet billi iqisu b'mod sħiħ
l-integrità. Barra minn hekk, f'dan il-qasam il-Bulgarija għandha: ·
Tistabbilixxi proċeduri ċari, standards u
penali biex tiżgura deċiżjonijiet dixxiplinari konsistenti. Dawn
għandhom iservu bħala l-bażi għal approċċ
konsistenti mill-kapijiet amministrattivi. ·
Twettaq eżerċizzju ta' awditjar
kompletament pubbliku u funzjonali tal-uffiċċji tal-prosekuzzjoni
mmexxi mill-Prosekutur Ġenerali kif ukoll il-pjan ta' azzjoni biex twettaq
konsultazzjoni pubblika fuq il-pjan ta' azzjoni.
Tagħlaq
lakuni fl-implimentazzjoni effettiva tad-deċiżjonijiet
tal-qorti, bħal
ħrib biex tkun evitata sentenza ta’ ħabs jew ma
jkunux jistgħu jiġu applikati sanzjonijiet finanzjarji stabbiliti
mill-qorti. ·
Tagħmel progress konkret fuq il-ġustizzja
elettronika bħala mezz biex ittejjeb l-effiċjenza, it-trasparenza u
l-konsistenza tal-proċess ġudizzjarju fi żmien qasir sa medju
kif ukoll fil-prespettiva fit-tul. 4. Il-Korruzzjoni L-indirizzar
tal-korruzzjoni jieħtieġ sforz sostnut u konsistenti dwar
il-prevenzjoni, iżda wkoll dwar is-segwiment ta' trasgressjonijiet u
t-turija li l-aġir żbaljat iwassal għal sanzjonijiet. F'dan
il-qasam il-Bulgarija għandha:
Tafda
istituzzjoni ewlenija bil-kompitu li tikkoordina l-ġlieda kontra
l-korruzzjoni, biex tassisti u tikkoordina l-isforzi f'setturi differenti.
·
Tirrevedi u taġġorna l-istrateġija
ta' kontra l-korruzzjoni nazzjonali, b'konsultazzjoni mal-organizzazzjonijiet
tas-soċjetà ċivili, b'mudell standard ta' amministrazzjoni pubblika
li jkollu spettorati interni bl-indipendenza, it-trasparenza u l-kontabilità. ·
Tieħu passi biex tnaqqas ir-riskju ta' korruzzjoni
fi proċeduri ta' akkwist pubbliku billi tagħmilhom aktar faċli u
trasparenti. ·
Tirrevedi l-proċeduri dwar il-kunflitti
tal-interess sabiex tiżgura l-effettività u l-imparzjalità tagħhom
kif ukoll il-kredibilità tal-mekkaniżmu ta' sanzjonijiet. 5. Kriminalità organizzata L-investigazzjoni
u s-sanzjonar effettiv tal-kriminalità organizzata jibqa' dejjem l-aktar mod
effettiv biex isir il-progress, sabiex il-progress f'każijiet
emblematiċi jibqa' ta' importanza ċentrali. F'dan il-qasam
il-Bulgarija għandha: ·
Tipprepara u timplimenta pjan ta' azzjoni, billi
tagħmel użu mill-analiżi indipendenti u komprensiva tant
mistennija tal-falliment tal-kawżi, bi skeda ta' miżuri konkreti li
jindirizzaw l-aspetti u l-istadji kollha tal-infurzar tal-liġi u s-sistema
ġudizzjarja. ·
Tindirizza b'mod speċifiku l-problema ta'
imputati ta' livell għoli li jaħarbu qabel id-deċiżjoni
finali tal-qorti, b'inkarigu ċar tar-responsabilità għal kwalunkwe
falliment. ·
Tiżviluppa politika ċara li tiggverna
r-relazzjoni tal-Aġenzija Statali tas-Sigurtà Nazzjonali (ASSN), ma' korpi
li għandhom x'jaqsmu mal-kriminalità organizzata fi Stati Membri
oħra, bi proċeduri operattivi speċifiċi ma dawk il-korpi
biex jiġi żgurat li l-kooperazzjoni tinżamm u tiġi mtejba. ·
Tipprovdi li l-Qorti Speċjalizzata
għall-Kriminalità Organizzata u l-Uffiċċju tal-Prosekutur
marbut, jistgħu jikkonċentraw fuq kawżi ta' profil għoli. ·
Tiżgura l-kooperazzjoni neċessarja bejn
il-Kummissjoni għas-Sekwestru tal-Assi u l-istituzzjonijiet tal-infurzar
tal-liġi relevanti. Twettaq evalwazzjoni indipendenti tal-liġi
l-ġdida fuq is-sekwestru tal-assi u l-impatt tagħha sas-sajf
tal-2014. [1] COM(2012) 411 finali [2]
24 ta' Settembru 2012 [3] Ara l-aktar ċifri
riċenti mill-Forum Ekonomiku Dinji http://reports.weforum.org/the-global-competitiveness-report-2013-2014/
[4] Per eżempju, COM(2012)
411, pp 6-8 [5] Pereżempju, intemmet
il-prattika li l-operazzjonijiet tal-puliżija jissemmew għal
imħallfin li naqsu milli jimponu miżuri ta' detenzjoni fuq suspettati
taħt arrest. [6] Rapport tekniku p. 2. [7] COM(2012) 411 finali, ref [8] COM(2012) 411 finali,
p. 6. [9] Rapport tekniku pp. 13-14. [10] Rapport tekniku pp.11-12. [11] Kawżi attwali li jinvolvu
allegazzjonijiet ta' interċettar u mmanuvrar tal-vot ser iservu ta' prova
f'dan ir-rigward. [12] Rapport tekniku pp. 4 u 25. [13] Rapport tekniku p 5. [14] Hemm standards rikonoxxuti
internazzjonalment, bħal dawk tan-Netwerk Ewropew tal-Kunsilli
għall-Ġudikatura: http://encj.net/images/stories/pdf/GA/Dublin/encj_dublin_declaration_def_dclaration_de_dublin_recj_def.pdf
[15] Fejn jidħlu
l-evalwazzjonijiet u l-promozzjonijiet, il-proċedimenti dixxiplinari xi
drabi jitqiesu u xi drabi le matul l-eżerċizzju ta' promozzjoni. [16] Rapport tekniku p. 10. [17] COM(2012) 411 finali,
p. 21. [18] Rapport tekniku p. 14. [19] Rapport tekniku p. 6-7. [20] COM(2012) 411 finali, p. 7 u 21. [21] Rapport tekniku p. 11. [22] Rapport tekniku p. 9. [23] Ċentru għall-Istudju
tad-Demokrazija, il-Korruzzjoni u l-antikorruzzjoni fil-Bulgarija (2012-2013),
Policy Brief N 43, Novembru 2013. Skont l-Indiċi ta'
Perċezzjoni tal-Korruzzjoni tal-2013 ippubblikat minn Transparency
International, il-Bulgarija hija t-tieni l-aktar pajjiż fost l-Istati
Membri tal-UE fejnn jidħol il-livell ta' korruzzjoni pperċepit.
(http://www.transparency.org/cpi2013) [24] Ir-Rapport dwar
il-Kompetittività Globali tal-2013 jelenka l-korruzzjoni bħala l-aktar
fattur problematiku biex isir in-negozju fil-Bulgarija.
http://www3.weforum.org/docs/WEF_GlobalCompetitivenessReport_2013-14.pdf p.
138. [25] COM(2012) 411 finali
pp. 14. [26] Kuntatti diretti bejn
il-Kummissjoni u l-organizzazzjonijiet tan-negozju. [27] Il-fatt li każ ta'
sekwestru tal-assi kontra l-istess grupp issa intemm ħesrem,
saħħaħ dan it-tħassib. [28] Fil-fatt, kawża komparabbli
dwar imputat ikkundannat b'delitt doppju seħħet
f'Diċembru 2013. [29] B'żieda mal-unità dwar
ir-reati li tikkonċerna l-maġistratura nnutata hawn fuq [30] Problema partikolari
tikkonċerna l-ammissibilità f'xi ġuriżdizzjonijiet ta' evidenza
miġbura mis-servizzi ta' sikurezza. [31] COM(2012) 411 finali, p. 14 u
21. [32] Rapport tekniku p. 24. [33] Rapport tekniku p 25-26.