DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT Li jakkumpanja d-dokument Proposta għal Regolament tal-Parlament Ewropew u tal-Kunsill dwar il-prevenzjoni u l-ġestjoni tal-introduzzjoni u t-tixrid tal-ispeċijiet aljeni invażivi /* SWD/2013/0322 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAL-VALUTAZZJONI
TAL-IMPATT Li jakkumpanja d-dokument Proposta għal Regolament
tal-Parlament Ewropew u tal-Kunsill dwar il-prevenzjoni u l-ġestjoni
tal-introduzzjoni u t-tixrid tal-ispeċijiet aljeni invażivi Sommarju
eżekuttiv 1. Definizzjoni tal-problema Hemm żewġ aspetti
għall-problema tal-IAS fl-Ewropa: 1) Il-problema ekoloġika li
tinħoloq bid-dħul, l-istabbiliment u t-tixrid tagħhom, 2)
il-falliment tal-politika kkawżat mill-istabbiliment ta' politika mhux
koerenti u frammentata fil-livell tal-UE u dak nazzjonali li qed tippermetti li
l-problema ekoloġika tkompli tikber. Il-problema ekoloġika - L-ispeċijiet aljeni huma speċijiet li jiġu
ttrasportati bħala riżultat ta' azzjoni umana barra mill-firxa
naturali tagħhom lil hinn mill-ostakli ekoloġiċi. L-evidenza
xjentifika turi li minn dawn l-ispeċijiet aljeni bejn 10 u 15 %
għandhom impatt negattiv sinifikanti fuq il-bijodiversità kif ukoll
konsegwenzi gravi fil-livell ekonomiku u soċjali: dawn huma
l-Ispeċijiet Aljeni Invażivi (Invasive Alien Species - IAS). Hemm
żewġ kawżi prinċipali: 1) ċerti speċijiet aljeni
huma mixtieqa u jiddaħħlu, eż. permezz tal-kummerċ, fl-UE
(eż. interessi kummerċjali, għanijiet ornamentali, annimali ta'
kumpanija, kontroll bijoloġiku); 2) xi speċijiet aljeni jiġu
introdotti b'mod mhux intenzjonat bħala kontaminanti ta' prodotti
(kummerċ fi prodotti oħra) jew jistgħu jkunu qed jirkbu jew
moħbija fuq vetturi ta' trasport. Huwa stmat li matul l-aħħar
20 sena, l-IAS swew lill-UE tal-anqas EUR 12-il biljun fis-sena. Dawn
jaffettwaw in-negozji, inklużi l-intrapriżi żgħar u
l-mikrointrapriżi (eż. il-kastur tal-għadajjar (coypu)
iħalli impatt fuq il-produzzjoni agrikola), iċ-ċittadini
(eż. l-ambrosja tikkawża l-allerġiji), l-awtoritajiet
pubbliċi (eż. il-far tal-misk tal-ilma jikkawża ħsara
fl-infrastruttura) u l-bijodiversità (eż. il-papra ħamranija thedded
lill-brajmla rasha bajda nattiva). Filwaqt li l-volumi tal-kummerċ u
t-trasport qed jikbru, l-għadd ta' IAS introdotti qed jiżdied ukoll.
Barra minn hekk, waqt li l-IAS introdotti jistabbilixxu lilhom infushom u
jinxterdu, il-ħsara kkawżata minn kull IAS qed tikber, u dan qed
iwassal għal żieda fit-tkabbir tal-ħsara. Jekk ma tittieħed
l-ebda azzjoni xierqa, l-ispiża tal-UE mistennija li tkompli tiżdied
konsegwentement. Falliment tal-politika - Huma biss ftit l-Istati Membri li għandhom qafas legali
komprensiv biex jindirizzaw il-problema u l-maġġoranza jserrħu
fuq azzjoni ad hoc speċifika għall-ispeċi, li jwassal
għal approċċ frammentat u azzjoni mhux koordinata biex tiġi
indirizzata problema li hija fin-natura tagħha transfruntiera.
Bħalissa, il-leġiżlazzjoni tal-UE tindirizza biss il-pesti u
l-aġenti tal-mard li jaffettwaw il-pjanti u l-annimali u l-ispeċijiet
aljeni introdotti għall-akkwakultura (irregolati rispettivament permezz
tar-reġim tas-saħħa tal-pjanti, ir-reġim
tas-saħħa tal-annimali u r-regolament dwar l-użu ta'
speċijiet aljeni fl-akkwakultura), u mhix qed tindirizza parti sostanzjali
mill-problema. Barra minn hekk, l-azzjoni kurrenti fuq l-IAS fl-Istati Membri
tal-UE hija prinċipalment reattiva, u tfittex li tnaqqas il-ħsara li
diġà qed tiġi kkawżata. L-Istati Membri kollha jintlaqtu mill-IAS,
minkejja li fi żminijiet differenti u minn speċijiet differenti,
peress li xi IAS jaffettwaw il-biċċa l-kbira tal-UE filwaqt li
oħrajn huma ta' problema f'ċerti reġjuni biss, jew f'ċerti
kundizzjonijiet ekoloġiċi jew klimatiċi. Jista' jiġi
preżunt li aktarx il-pajjiżi li għandhom volumi ta' kummerċ
akbar u għadd ta' punti tad-dħul ibatu aktar mill-introduzzjonijet
tal-IAS. Mhuwiex possibbli li jiġi aċċertat il-kobor jew
il-konċentrazzjoni tal-movimenti intra-UE peress li ma hemm l-ebda
verifika interna tal-prodott bażiku jew monitoraġġ tal-movimenti
tal-ispeċijiet aljeni fis-selvaġġ madwar il-fruntieri.
Minħabba li l-impatt tal-IAS huwa rilevanti għall-UE kollha, l-Istati
Membri kollha għandhom igawdu minn azzjoni koordinata biex jindirizzaw
l-IAS, filwaqt li b'mod ċar jinħtieġu sforzi mill-Istati Membri
kollha. 2. Hija ġġustifikata azzjoni tal-UE abbażi
tas-sussidjarjetà? Il-fatt li l-għadd ta' IAS qed
jiżdied minkejja l-politiki/inizjattivi kurrenti, jindika li
l-approċċ preżenti mhuwiex effettiv. Peress li l-ispeċijiet
ma jirrispettawx il-fruntieri, l-azzjoni tal-UE se tkun
iġġustifikata. L-azzjoni koordinata tal-UE se tkun meħtieġa
biex tiżgura li, fejn l-IAS jidħlu għall-ewwel darba fl-Unjoni,
l-Istati Membri jieħdu miżuri fil-pront
għall-benefiċċju tal-Istati Membri l-oħra li ma jkunux
għadhom ġew affettwati. Se tiżgura wkoll ċarezza legali u
kundizzjonijiet ekwi għal dawk is-setturi li jużaw jew jinnegozjaw
l-ispeċijiet aljeni filwaqt li tevita l-frammentazzjoni tas-suq intern
minħabba restrizzjonijiet varji fuq il-kummerċjalizzazzjoni tal-IAS
bejn l-Istati Membri. Xi speċijiet huma invażivi u jikkawżaw
ħafna ħsara f'ċerti pajjiżi filwaqt li f'oħrajn ma
jagħmlux ħsara jew saħansitra jkunu ta' profitt. L-azzjoni
fil-livell tal-UE skont il-prinċipju tas-solidarjetà se tħares
l-interess ta' dawk l-Istati Membri li aktarx ibatu l-aktar konsegwenzi
negattivi. Fl-aħħar nett, l-Istati Membri li
diġà għandhom leġiżlazzjoni dwar l-IAS se jibbenefikaw minn
apporċċ komuni, li jiggarantixxi li l-Istati Membri ġirien
jieħdu azzjoni dwar l-istess speċijiet. 3. Għanijiet Għanijiet ġenerali: it-tnaqqis tal-impatt negattiv tal-IAS fuq
il-bijodiversità u fuq l-ambjent u l-għoti ta' kontribut għall-mira
tal-bijodiversità tal-UE 2020;billi tintlaħaq il-Mira 5. "sal-2020, l-Ispeċijiet
Aljeni Invażivi (IAS) u l-mogħdijiet tagħhom għandhom jiġu
identifikati u mogħtija prijorità, speċi prijoritarji għandhom
jiġu kkontrollati jew imneħħija, u l-mogħdijiet
għandhom ikunu ġestiti b'mod li jimpedixxu l-introduzzjoni u
l-istabbiliment ta' IAS ġodda. it-tnaqqis tal-impatt ekonomiku u soċjali
negattiv tal-IAS fuq l-ekonomija tal-UE u fuq iċ-ċittadini tal-UE u
li jitħarsu l-benesseri u s-saħħa tagħhom, biex b'hekk
jingħata kontribut għall-Istrateġija Ewropa 2020. Għanijiet speċifiċi: il-bidla fl-approċċ reattiv kurrenti
għal wieħed aktar preventiv dwar l-IAS; l-għoti ta' prijorità lill-azzjoni dwar
l-IAS fejn għandhom jinkisbu l-ogħla benefiċċji netti; l-inkoraġġiment għal
approċċ koerenti dwar l-IAS madwar l-UE. Għanijiet operattivi: il-prevenzjoni tal-introduzzjoni intenzjonata
fl-UE tal-IAS li huma sors ta' tħassib għall-UE; il-prevenzjoni tal-introduzzjoni mhux
intenzjonata tal-IAS fl-UE u tar-rilaxx mhux intenzjonat tagħhom
fl-ambjent; il-prevenzjoni tar-rilaxx intenzjonat tal-IAS
fl-ambjent; it-twissija bikrija u r-rispons rapidu sabiex
wieħed jilqa' għar-riproduzzjoni u t-tixrid tal-IAS li huma sors ta'
tħassib għall-UE; l-eliminazzjoni, it-tnaqqis jew
il-mitigazzjoni tal-ħsara permezz tal-ġestjoni tal-IAS li huma sors
ta' tħassib għall-UE li stabbilixxew lilhom infushom fl-ambjent. 4. Għażliet tal-politika Ġew identifikati ħames
għażliet, li lkoll jindirizzaw il-ħames għanijiet
operattivi, iżda bl-livell differenti ta' ambizzjoni. Dawn
l-għażliet inħolqu billi ntuża approċċ doppju, li
kien jinkludi fl-istess ħin analiżi tal-miżuri
meħtieġa biex jiġu indirizzati l-għanijiet operattivi
(il-kontenut), kif ukoll it-tip ta' strument politiku (il-forma). Għażla 0 - L-għażla bażika tirrappreżenta l-istatus quo
mingħajr ebda azzjoni oħra, għalhekk tindirizza biss
il-pesti u l-aġenti tal-mard li jaffettwaw il-pjanti u l-annimali u
l-ispeċijiet aljeni tal-akkwakultura. Barra minn hekk, jistgħu
jiġu imposti projbizzjonijiet fuq l-importazzjoni permezz tar-Regolament
dwar il-Kummerċ ta' Flora u Fawna Selvaġġi u l-ilma tas-saborra
jiġi indirizzat meta tidħol fis-seħħ il-Konvenzjoni dwar
l-ilma tas-Saborra. L-Istati Membri jkomplu jaġixxu fuq bażi ad
hoc xprunati mill-ispejjeż tal-ħsarat abbażi ta' kull
speċi. Għażla 1 - L-inkoraġġiment għal azzjoni volontarja u titjib
fil-kooperazzjoni jinkludi l-iżvilupp ta' linji gwida, kodiċijiet
tal-kondotta settorjali u kampanji edukattivi u ta' sensibilizzazzjoni. Din
tiżdied ma' dak li diġà jkun sar bl-għażla 0. Għażla 2.1 - Jiġi sostnut strument leġiżlattiv bażiku
permezz ta' lista unika ta' IAS li huma sors ta' tħassib għall-UE.
Dawn ikunu speċijiet aljeni li jkunu rriżultaw invażivi minn
valutazzjoni tar-riskju, u meqjusa bħala theddida rilevanti għall-UE
minn kumitat permanenti li jinkludi rappreżentanti mill-Istati Membri. Din
il-lista toħloq għadd ta' obbligi għall-Istati Membri: minn
naħa, li jieħdu azzjoni biex iżommu mid-dħul fl-UE
tal-ispeċijiet indikati fil-lista (il-prevenzjoni) u, min-naħa
l-oħra, li jiġġestixxu l-ispeċijiet indikati fil-lista li
diġà daħlu u stabbilixxew lilhom infushom fl-UE (ir-reazzjoni), b'tali
mod li jevitaw li jinxterdu aktar madwar l-UE u jnaqqsu l-ħsara
tagħhom. L-għażla tal-miżuri li se jittieħdu
(il-qerda, it-trażżin jew il-kontroll) titħalla f'idejn l-Istati
Membri. Għażla 2.2 - Din l-għażla twessa' l-kamp tal-applikazzjoni
tal-għażla 2.1 lil hinn mil-lista ta' IAS li huma sors ta'
tħassib għall-UE f'dak li għandu x'jaqsam mar-rilaxx fl-ambjent.
Dan jintlaħaq billi tiġi introdotta sistema li permezz tagħha
l-Istat Membru jkun jeħtieġ permess għar-rilaxx
għall-IAS li huma sors ta' tħassib għall-Istati Membri. Għażla 2.3 - Din l-għażla twessa' aktar il-kamp tal-applikazzjoni
tal-għażla 2.1 lil hinn mil-lista ta' IAS li huma sors ta'
tħassib għall-UE f'dak li għandu x'jaqsam mar-rilaxx fl-ambjent.
Dan jintlaħaq billi tiġi stabbilita sistema li permezz tagħha
l-ispeċijiet aljeni ġodda jkunu jistgħu jiġu rrilaxxati
fl-ambjent b'approvazzjoni espliċita biss, u jitniżżlu f'lista
tal-UE ta' speċijiet aljeni approvati għar-rilaxx, wara
l-aċċertament li r-rilaxx tagħhom ma jimplika l-ebda riskju. Għażla 2.4 - Din l-għażla ssaħħaħ
id-dispożizzjonijiet għal rispons rapidu meta mqabbla
mal-għażla 2.2. Dan jintlaħaq billi jkun introdott obbligu
għall-Istati Membri li jeqirdu l-IAS il-ġodda li jkunu qed
jistabbilixxu lilhom infushom li huma inklużi fil-lista ta' IAS li
huma sors ta' tħassib għall-UE, minflok ma jrażżnuhom jew
jikkontrollawhom, sakemm ma tkunx ingħatat deroga mill-Kummissjoni. 5. Valutazzjoni tal-impatti Waħda mid-diffikultajiet fl-analiżi
tal-impatti tad-diversi għażliet kienet il-fatt li kien impossibbli
li wieħed ikun jaf minn qabel l-għadd ta' invażjonijiet u liema
minnhom kienu se jeħtieġu li jiġu indirizzati u l-għadd ta'
speċijiet u liema minnhom kienu se jiġu inklużi fil-lista
tal-IAS li huma sors ta' tħassib għall-UE. Barra minn hekk, sa ftit
ilu, studji ekonomiċi komprensivi u fuq skala kbira dwar l-IAS
inġenerali kienu skarsi. Huwa importanti li jiġi kkunsidrat ukoll
li s-setturi li aktarx jintlaqtu mill-istrument leġiżlattiv, jinkludu
diversi intrapriżi żgħar u medji (SMEs), fosthom
il-mikrointrapriżi. Il-Kummissjoni hija mħassba dwar l-impatt
tal-leġiżlazzjoni fuq l-intrapriżi żgħar u
l-mikrointrapriżi u għandha politika biex tnaqqas il-piż ta'
dawn in-negozji; madankollu, huma mistennija li jaqgħu taħt il-kamp
tal-applikazzjoni tal-leġiżlazzjoni. L-IAS jista' jkollhom impatti
negattivi serji fuq l-SMEs f'setturi bħall-forestrija, l-agrikoltura,
it-turiżmu u l-attivitajiet rikreattivi. Għalhekk, dawn is-setturi
jibbenefikaw mill-introduzzjoni ta' miżuri koordinati biex jiġu
indirizzati l-IAS. Mill-banda l-oħra, SMEs oħra, bħal
kummerċjanti tal-annimali tad-dar u s-settur tal-ortikultura, jibbenefikaw
mill-kummerċ tal-ispeċijiet aljeni u jistgħu jintlaqtu
mil-leġiżlazzjoni li tindirizza l-IAS, li tista' timponi xi
restrizzjonijiet fuq l-użu ta' speċijiet aljeni, għalkemm huwa
magħruf b'mod ġenerali li għall-biċċa l-kbira
tal-iskopijiet hemm għażla ta' speċijiet sostituti. Fl-analiżi nstabu l-impatti ewlenin li
ġejjin: Għażla 0 - Filwaqt li l-ispiża tal-azzjoni diġà tammonta għal
EUR 1.4 biljun fis-sena, il-ġestjoni tal-istatus quo ma
tevitax iż-żieda fil-ħsara ekonomika, soċjali u ambjentali
kkawżata mill-IAS u għalhekk mhijiex effettiva biex jintlaħqu
l-għanijiet ta' din il-proposta. Għażla 1 - Din l-għażla tinvolvi biss żieda minima
fl-ispiża tal-azzjoni meta mqabbla mal-għażla 0, iżda
din ukoll mhijiex effettiva fil-prevenzjoni taż-żieda fil-ħsara. Għażla 2.1 - Din l-għażla mhix mistennija li żżid b'wisq
l-ispejjeż tal-azzjoni (żieda ta' EUR 26-40 miljun fis-sena)
meta mqabbla mal-għażla 0 u barra minn hekk tista' twassal
għal tnaqqis fl-ispejjeż matul is-snin (EUR 1 biljun fis-sena).
Il-miżuri proposti fl-għażla 2.1 jinvolvu
r-riorganizzazzjoni tan-nefqa kurrenti - b'aktar enfasi fuq il-prevenzjoni
aktar milli fuq ir-reazzjoni (skont ir-reġimi tas-saħħa
tal-pjanti u tal-annimali) - u għal użu aktar effiċjenti
tar-riżorsi, permezz ta' prijoritizzazzjoni koerenti. Iż-żieda
fl-ispejjeż tinżamm minima kemm jista' jkun billi jsir użu
massimu tad-dispożizzjonijiet eżistenti. L-għażla 2.1
tista' tolqot b'mod negattiv il-kummerċ internazzjonali (iżda
f'każ li jkunu pprojbiti l-IAS ta' valur għoli nnegozjati b'mod
ġenerali biss) u l-intrapriżi żgħar u l-mikrointrapriżi
li jikkultivaw l-IAS jew jinnegozjaw l-annimali tad-dar jew l-ispeċijiet
ornamentali (iżda dan jiġri biss jekk ma jinstabux alternattivi
xierqa). Madankollu, jitqiesu l-impatti ekonomiċi negattivi potenzjali
meta jitqiesu l-ispeċijiet għal-lista. Min-naħa l-oħra,
iċ-ċittadini, l-awtoritajiet pubbliċi, u l-operaturi
ekonomiċi l-oħra, inklużi bosta intrapriżi żgħar
u mikrointrapriżi, bħall-bdiewa u dawk li jaħdmu fil-forestrija,
ikunu l-benefiċjarji ewlenin meta tiġi evitata ż-żieda
fil-ħsara. L-operaturi ekonomiċi kollha jibbenefikaw ukoll minn
ċertezza legali mtejba u approċċ aktar koordinat.
Fl-aħħar nett, l-istrument leġiżlattiv bażiku
jġib miegħu benefiċċji soċjali, ambjentali u
ekonomiċi sostanzjali li jkunu akbar mill-ispejjeż. Fil-fatt, il-pakkett
jista' jevita t-telf ta' impjiegi (eż. wara kollass taż-żoni
tas-sajd), ikun ta' benefiċċju għas-saħħa pubblika kif
ukoll għall-proprjetajiet u għall-faċilitajiet rikreattivi.
L-impatti ambjentali jkunu pożittivi wkoll minħabba li tkun ġiet
evitata l-ħsara lill-bijodiversità u s-servizzi tal-ekosistema. Huwa stmat
li, għaż-żmien fit-tul, kull IAS li titwaqqaf twassal għal
tnaqqis ta' EUR 130 miljun fis-sena mill-ispiża
tal-kontroll/ħsara. Din hija stima approssimattiva, iżda turi
l-benefiċċji potenzjali b'mod sempliċi. Barra minn hekk, anki
jekk l-IAS ġodda li jkunu qed jistabbilixxu lilhom infushom ma jkunux
jistgħu jitwaqqfu, dawn xorta jitniżżlu f'lista u jiġu
ġestiti b'mod koerenti, b'hekk jiġu evitati aktar spejjeż
għall-ħsara. Għażla 2.2 - Din l-għażla hija maħsuba
għal approċċ aktar preventiv bla ma toħloq piż
żejjed. Iżżid xi spejjeż amministrattivi għal dawk
l-Istati Membri li għad m'għandhomx sistema ta' permess u għal
dawk l-operaturi ekonomiċi li għandhom interess fir-rilaxx ta'
speċijiet aljeni li huma sors ta' tħassib għall-Istati Membri.
Madankollu, din is-sistema tevita l-introduzzjoni tal-IAS fl-ambjent, li
għalkemm mhumiex imniżżla bħala IAS li huma sors ta'
tħassib għall-UE, jistgħu jikkawżaw ħsara ekonomika,
soċjali u ambjentali konsiderevoli. Għażla 2.3 - Din l-għażla ssegwi l-aktar approċċ ta'
prekawzjoni mil-lat ekonomiku, soċjali u ambjentali. Minkejja dan,
tirrappreżenta bidla konsiderevoli meta mqabbla mal-approċċ
kurrenti u tikkawża piż amministrattiv sostanzjali fuq is-setturi
ekonomiċi li jiddependu mill-introduzzjoni tal-ispeċijiet aljeni
fl-ambjent (eż. is-setturi tal-ortikultura u tal-forestrija). Għażla 2.4 – Din l-għażla tiżgura li l-invażjonijiet
ġodda jiġu indirizzati bir-reqqa immedjatament. Kull invażjoni
li tinqered rapidament tevita, għaż-żmien fit-tul, impatti
akonomiċi soċjali u ambjentali. Dan jinvolvi aktar investiment
importanti fil-qerda, prinċipalment mill-Istati Membri, iżda ffrankar
sostanzjali għaż-żmien fit-tul, għas-soċjetà kollha. Fl-aħħar nett, għandu jitqies
li l-Istati Membri se jiġu affettwati b'modi differenti skont l-istrutturi
tan-negozji tagħhom, minbarra l-ġeografija u l-kundizzjonijiet
klimatiċi tagħhom. Pereżempju, f'xi Stati Membri s-settur
tal-forestrija huwa aktar b'saħħtu minn oħrajn (eż:
il-pajjiżi Nordiċi, il-Ġermanja), filwaqt li f'oħrajn
is-settur tal-ortikultura huwa ta' suċċess (eż: il-Pajjiżi
l-Baxxi). Madankollu, ma kienx possibbli li jiġi indentifikat
żbilanċ partikolarment qawwi bejn l-Istati Membri. 6. Tqabbil tal-għażliet Abbażi
tal-analiżi tal-impatti, kien possibbli li tintlaħaq
il-konklużjoni li jmiss: Filwaqt li l-għażla 0 u
l-għażla 1 jinkludu diversi partijiet
mil-leġiżlazzjoni nazzjonali jew dik tal-UE, dawn ma jindirizzawx
il-biċċa l-kbira tal-ispeċijiet u l-mogħdijiet. Huwa stmat
li diġà jikkawżaw EUR 1.4 biljun fis-sena ta' spiża
għall-azzjoni, prinċipalment għall-Istati Membri, iżda
nstab li mhumiex effettivi biex jilħqu l-għan ta' dan
l-eżerizzju u għandhom nuqqas ta' koerenza mal-għanijiet
komprensivi tal-UE. L-għażla 2.1 tista'
tnaqqas b'mod sinifikanti l-impatti negattivi tal-IAS u tkun effettiva biex
jintlaħqu l-għanijiet. Tikkawża spejjeż żejda
tal-azzjoni ta' EUR 26 sa 40 miljun fis-sena biss. Barra minn hekk,
maż-żmien, l-ispiża tal-azzjoni tista' tonqos għal
EUR 1 biljun fis-sena. Din l-għażla tolqot b'mod pożittiv
l-effiċjenza tan-nefqa tal-awtoritajiet pubbliċi tal-Istati Membri u
tkun koerenti mal-għanijiet komprensivi tal-UE. L-għażla 2.2 tkun aktar
effiċjenti, effettiva u koerenti mill-għażla 2.1 bi spejjeż
żejda moderati, billi ħafna drabi l-Istati Membri jibnu fuq sistemi
eżistenti. L-għażla 2.3 tkun aktar
effettiva u koerenti mill-għażla 2.2 iżda fl-istess
ħin timponi piż sinifikanti fuq ċerti operaturi ekonomiċi,
b'mod partikolari dawk involuti fil-produzzjoni primarja, u b'hekk taffettwa
l-effiċjenza tagħha. L-għażla 2.4 tkun aktar
effiċjenti, effettiva u koerenti mill-għażla 2.2, bi
spejjeż żejda moderati. Fil-qosor, l-għażla 2.3
mistennija tiġġenera l-aqwa riżultat f'dik li hija effettività u
koerenza. Madankollu, il-kompromess tagħha lejn il-qasam ekonomiku huwa
meqjus bħala sostanzjali wisq u għalhekk il-proporzjon
tal-kostijiet/benefiċċji tagħha huwa inqas favorevoli minn dak
tal-għażla 2.2. Min-naħa l-oħra, ġie stmat li
l-benefiċċji żejda tal-għażla 2.4 huma
sostanzjali u huma akbar mill-ispejjeż żejda meta mqabbla
mal-għażliet 2.2 u 2.1. Apparti dan, l-għażla 2.4
tibni b'mod effiċjenti ħafna fuq id-dispożizzjonijiet eżistenti
tal-Istati Membri. Għaldaqstant, l-għażla 2.4
intgħażlet bħala l-għażla ppreferuta, billi
toffri l-ogħla benefiċċji f'relazzjoni mal-ispejjeż,
għalkemm mhijiex l-għażla li toffri l-ogħla
benefiċċji għall-bijodiversità. Bl-għażla 2.4, huwa mistenni li
1) l-ispiża tal-azzjoni annwali tibqa' stabbli jew saħansitra tonqos
matul iż-żmien, 2) il-kobor tal-benefiċċji (jiġifieri
li jiġu evitati spejjez tal-ġestjoni u ħsara) jkompli
jiżdied matul is-snin, billi tiġi evitata żieda fl-għadd
ta' invażjonijiet, 3) l-ispejjeż totali tal-problema ma jiżdidux
daqskemm kienu jiżdiedu mingħajr azzjoni tal-UE. 7. Monitoraġġ u evalwazzjoni Il-monitoraġġ u l-evalwazzjoni
tar-riżultat tal-istrument propost se jiġu indirizzati permezz
tal-obbligi tar-rappurtar u tan-notifika integrati fit-test legali. Abbażi
ta' dan, il-Kummissjoni u l-korpi l-oħra se jkunu jistgħu
jirrappurtaw dwar l-indikaturi u jsegwu l-progress lejn l-għanijiet. L-obbligi tar-rappurtar jibnu fuq
mekkaniżmi tar-rappurtar eżistenti bħalma huma dawk imwettqa
skont id-Direttivi dwar l-Għasafar u dwar il-Ħabitats, id-Direttiva Qafas
dwar l-Ilma u d-Direttiva Kwadru dwar l-Istrateġija Marina kif ukoll
ir-reġimi tas-Saħħa tal-Annimali u l-Pjanti u l-Akkwakultura.
Dawn l-obbligi jkunu limitati strettament għall-minimu meħtieġ
biex ikunu żgurati l-infurzar tat-test legali u l-impenji internazzjonali
l-oħra, sabiex ikun evitat piż amministrattiv bla bżonn. It-test legali jinkludi klawżola ta'
analiżi li tippermetti l-aġġornament tal-approċċ skont
il-progress tekniku u xjentifiku u tippermetti aktar żvilupp gradwali
fid-dawl tal-kwistjonijiet li jinqalgħu waqt l-implimentazzjoni.