DOKUMENT TA’ ĦIDMA TAL-PERSUNAL TAL-KUMMISSJONI SOMMARJU TAL-VALUTAZZJONI TAL-IMPATT Li jakkumpanja d-dokument RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-iskema volontarja tal-ekodisinn għat-tagħmir tal-immaġni /* SWD/2013/014 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU TAL-VALUTAZZJONI TAL-IMPATT Li jakkumpanja d-dokument RAPPORT TAL-KUMMISSJONI LILL-PARLAMENT
EWROPEW U LILL-KUNSILL
dwar l-iskema volontarja
tal-ekodisinn għat-tagħmir tal-immaġni Dan id-dokument ta' ħidma hu maħsub
biex jintuża mill-persunal tal-Kummissjoni Ewropea u hu
għall-finijiet ta' informazzjoni biss. Dan ma jirrappreżentax
il-pożizzjoni uffiċjali tal-Kummissjoni dwar din il-kwistjoni, u
lanqas ma jantiċipaha. Id-DĠ ewlieni: ENER Id-DĠ assoċjat: ENTR Servizzi
oħra involuti: SG, LS, CLIMA, CNECT, COMP, ECFIN, EMPL, ENV, JRC, JUST,
MARKT, SANCO, TAXUD, TRADE, RTD Sommarju
eżekuttiv It-tagħmir tal-immaġni jiġbor
fih prodotti relatati mal-enerġija koperti bid-Direttiva tal-Ekodisinn
2009/125/KE. Id-Direttiva tal-Ekodisinn tistabbilixxi qafas
biex jiġu stipulati rekwiżiti għall-ekodisinn għal prodotti
relatati mal-enerġija. Ir-rekwiżiti tal-ekodisinn għall-prodotti
joħolqu strument importanti biex jintlaħqu l-għanijiet
politiċi taħt "Ewropa li tuża r-riżorsi
b'effiċjenza — Inizjattiva ewlenija"[1],
id-dokument ta' strateġija "Ewropa 2020"[2] u l-"Pjan Ewropew
għall-Effiċjenza Enerġetika 2011"[3] tal-Kummissjoni. Dan id-dokument u r-rapport tal-valutazzjoni
tal-impatt iqisu jekk ir-rekwiżiti tal-ekodisinn għat-tagħmir
tal-immaġni għandhomx jiġu adottati skont id-Direttiva
tal-Ekodisinn biex jitnaqqas l-impatt ambjentali tat-tagħmir
tal-immaġni, b'mod partikolari l-konsum tal-enerġija tiegħu. 1. Definizzjoni tal-problema Meta mqabbel mas-sitwazzjoni tal-biċċa
l-kbira tal-prodotti oħra kkunsidarti għall-miżuri, ma hemm
l-ebda problema kbira dwar l-ekodisinn għat-tagħmir tal-immaġni,
peress li t-titjib fl-effiċjenza enerġetika u l-iffrankar fil-karta
permezz ta' stampar fuq iż-żewġ naħat qed javvanzaw malajr,
ilkoll xprunati minn strumenti politiċi volontarji. Mhuwiex qed ikun sfruttat bis-sħiħ
il-potenzjal tekniku kollu tal-iffrankar, u dan primarjament minħabba
d-dinamika tas-settur, li kiseb rati ta' titjib fl-effiċjenza ogħla
minn 6% kull sena u ffranka l-elettriku sa 87% matul l-aħħar 15-il
sena. Huwa ta' tħassib li x-xejra
pożittiva attwali fit-titjib tal-effiċjenza enerġetika mhux
garantit li tibqa' u li l-leġiżlazzjoni orizzontali attwali tkopri
biss aspetti ambjentali magħżula. 2. Għanijiet L-istudju preparatorju[4] u r-riċerka tal-2012[5] sabu li hemm potenzjal
kosteffikaċi biex jonqos il-konsum tal-enerġija tat-tagħmir
tal-immaġni, inkluż il-konsum tal-karta, u li bħalissa
l-potenzjal sħiħ mhux qed ikun sfruttat. Għalhekk, l-għan huwa li
tinħoloq miżura tal-ekodisinn li tkun tinkludi
l-awtoregolamentazzjoni, li tgħin sabiex jinkisbu l-għanijiet
politiċi attwali, jiġifieri li jkunu ffrankati 20% tal-enerġija
u li jonqsu b'20% l-emissjonijiet tal-gassijiet serra mill-1990 sal-2020, kif
ukoll il-promozzjoni tal-effiċjenza tar-riżorsi materjali (mhux
tal-enerġija) billi pereżempju jonqos l-użu tal-materjal
(eż: il-karta), isir riċiklaġġ (eż: ta' partijiet
akbar tal-plastik, l-elettronika u metalli) u jsir użu mill-ġdid
(eż: it-toner cartridges). Ir-riċerka tal-2012 uriet li
għalkemm diġà ġie ffrankat ammont konsiderevoli, il-livelli
tal-miri għall-2020 xorta jistgħu jkunu ambizzjużi u
jistgħu jimmiraw li jiffrankaw 60% tal-enerġija u li jilħqu
r-rata ta' 90% fi stampar fuq iż-żewġ naħat fejn
jidħol it-tagħmir tipiku tal-uffiċċju mill-2012 sal-2020. F'konformità mal-premessi 18 u 19 u
mal-Artikolu 15(6) tad-Direttiva tal-Ekodisinn, l-awtoregolamentazzjoni
għandha tiġi esplorata bħala l-għażla preferuta. 3. Kriterji
għall-miżuri tal-ekodisinn L-approċċ biex isiru l-miżura
proposta u l-valutazzjoni tal-impatt tagħha kien strutturat f'erba' passi. L-ewwel pass:
Bażi legali konformità mal-Artikolu 15 tad-Direttiva tal-Ekodisinn F'konformità mal-Artikolu 15(4a) u
mal-Annessi I u II tad-Direttiva tal-Ekodisinn, il-Kummissjoni
għamlet studju preparatorju tekniku, ambjentali u ekonomiku sabiex
tivvaluta l-kriterji għall-miżuri ta' implimentazzjoni tal-ekodisinn
għat-tagħmir tal-immaġni[6]. L-istudju wera li dawn
il-kriterji ntlaħqu, billi (1) it-tagħmir tal-immaġni
jitqiegħed fis-suq tal-UE fi kwantitajiet kbar, (2) l-impatt ambjentali
taċ-ċiklu tal-ħajja tal-konsum tal-elettriku tat-tagħmir
tal-immaġni huwa sinifikanti, (3) hemm differenzi konsiderevoli fl-impatti
ambjentali tat-tagħmir tal-immaġni li bħalissa hemm fis-suq.
Jeżistu soluzzjonijiet tekniċi kosteffikaċi li jistgħu
jwasslu għal titjib sinifikanti. Tabella 1: Il-kriterji
tal-Artikolu 15(2) tad-Direttiva tal-Ekodisinn kif applikati
għat-tagħmir tal-immaġni Art. 15(2a) || Il-volum tal-bejgħ annwali fl-UE (unitajiet) || 2010 31 miljun 2020 37 miljun 2030 41 miljun Art. 15(2b) || L-impatt ambjentali: il-konsum dirett tal-elettriku tat-tagħmir tal-immaġni, f'elettriku TWh u Mt CO2 ekwivalenti fis-sena [1] || dirett (elettriku) 2010 8.7 TWh (3.6 Mt CO2) 2020 9.1 TWh (3.5 Mt CO2) 2030 10.4 TWh (3.6 Mt CO2) L-impatt ambjentali: l-enerġija indiretta għall-produzzjoni tal-karta kkunsmata, f'elettriku TWh ekwivalenti u Mt CO2 ekwivalenti fis-sena [2] || indirett (karta) 2010 38.8 TWh (5.8 Mt CO2) 2020 42.8 TWh (6.4 Mt CO2) 2030 47.0 TWh (7.0 Mt CO2) Art. 15(2c) || il-potenzjal tat-titjib versus li kollox jibqa' bħas-soltu (BAU: business as usual) fl-istess sena (bl-applikazzjoni tat-teknoloġija kosteffikaċi attwali, Subgħażla volontarja), espressi f'unitajiet bħal ta' hawn fuq. || enerġija diretta (titjib fl-effiċjenza) 2020 7.9 TWh (4.1 Mt CO2) 2030 9.1 TWh (4.3 Mt CO2) enerġija indiretta (użu tal-karta miż-żewġ naħat u stampar-N) 2020 7.1 TWh (1.1 Mt CO2) 2030 7.8 TWh (1.1 Mt CO2) [1] Il-bidla minn elettriku TWh għal Mt CO2
ekwivalenti tqis it-titjib fl-emissjonijiet tas-CO2 tal-impjanti
tal-enerġija bejn l-2010 u l-2030 (sors: MEErP 2011). [2]
Tnaqqis fil-produzzjoni tal-karta tal-uffiċċji: enerġija
primarja 40 MJ/kg ta' karta, il-bidla għal elettriku ekwivalenti li
juża fattur tal-enerġija primarja 2.5 (40 MJ primarja =
16 MJ ta' elettriku = 4.44 kWh ta' elettriku), l-emissjonijiet
tal-gassijiet serra 0.6 kg/kg ta' karta (sors: MEErP 2011). Il-konsum
tal-karta ġie kkalkulat skont iċ-ċikli tat-tħaddim
tal-ENERGY STAR. Il-kriterji jintlaħqu bis-sħiħ
mit-tagħmir tal-immaġni monokromatika jew tal-kulur li juża
teknoloġija tal-istampar bil-ġettijiet tal-linka (IJ: inkjet),
elettrofotografika (EP/"lejżer") u bil-linka solida (SI:
solid-ink, inkluża fil-kategorija tal-EP). It-tagħmir tal-EP jinkludi
fotokopjaturi, printers, apparat multifunzjonali (MFDs) u magni tal-faks, u
t-tagħmir tal-IJ jinqasam f'apparat b'funzjoni waħda u f'apparat
multifunzjonali. It-teknoloġija tal-istampar tradizzjonali
bħat-trasferiment termali (TT: thermal transfer), it-termali dirett (DT:
direct thermal) u s-sublimazzjoni taż-żebgħa (DT: dye
sublimation) hija eskluża peress li din tinbiegħ fi kwantitajiet
żgħar u ħafna drabi tintuża f'applikazzjonijiet
speċjali bħall-istampar ta' irċevuti, tikketti u tessuti.
Għall-istess raġunijiet, huma esklużi wkoll il-printers il-kbar
li pereżempju jintużaw għad-disinji tekniċi.
Fl-aħħar nett, il-printers veloċi li pereżempju
jintużaw fl-istamperiji professjonali huma esklużi wkoll
minħabba li jekk titqies l-ispiża, f'dan is-segment tas-suq
ix-xerrejja jagħżlu li jixtru biss l-aktar mudelli effiċjenti
fl-użu tal-enerġija. It-tieni pass: L-inizjattivi eżistenti
u l-kapaċità tal-forzi tas-suq li jindirizzaw il-kwistjoni L-Artikoli 15(2) u 15(4c) tad-Direttiva
tal-Ekodisinn jesiġu li trid titqies il-leġiżlazzjoni ambjentali
tal-UE u nazzjonali rilevanti. It-tagħmir tal-immaġni ma kien
soġġett għall-ebda miżura obbligatorja speċifika
għall-prodott, iżda ċerti aspetti ġew indirizzati minn
leġiżlazzjoni orizzontali dwar l-użu tal-elettriku f'modalità
standby u f'modalità mitfija[7],
il-kimiċi[8],
u l-iskart[9].
L-użu tal-enerġija tat-tagħmir tal-immaġni fis-settur mhux
residenzjali huwa parti mill-kontabbiltà tal-enerġija taħt
id-Direttiva dwar ir-Rendiment tal-Bini fl-Użu tal-Enerġija[10] u dik li se tkun id-Direttiva
dwar l-Effiċjenza Enerġetika[11].
Din hija indirettament inkluża wkoll fil-kontabbiltà tal-karbonju
taħt l-Iskema tal-UE għall-Iskambju tal-Emissjonijiet. L-effiċjenza tal-enerġija u
l-impatti ambjentali ewlenin tat-tagħmir tal-immaġni huma indirizzati
prinċipalment mill-programm volontarju ENERGY STAR tal-UE, wara
l-Ftehimiet li saru bejn l-UE u l-Istati Uniti mill-2001. Għall-2012 huwa
ppjanat aktar appoġġ permezz tal-kriterju tal-Akkwist Pubbliku
Ekoloġiku (APE) u permezz tal-Ekotikketta tal-UE, li ħafna drabi
jużaw ir-rekwiżiti u l-formati tal-ENERGY STAR. Mill-2008 'l hawn, l-akkwist pubbliku
tat-tagħmir mill-istituzzjonijiet tal-UE u mill-ġvernijiet
ċentrali tal-Istati Membri, kien obbligat iħares il-kriterji
tal-ENERGY STAR, li huma aġġornati kull tliet snin jew erbgħa[12]. Ir-rispons tal-industrija
tat-tagħmir tal-immaġni għall-miżuri kien pożittiv,
b'rata għolja ta' parteċipazzjoni (kopertura tas-suq >90%),
b'sehem kbir ta' prodotti konformi (>90% tal-mudelli huma skont ir-rekwiżiti
attwali) u b'awtodikjarazzjoni f'livell ta' affidabbiltà sodisfaċenti[13]. Skont l-istudju
preparatorju, fejn hemm nuqqasijiet regolatorji u/jew tas-suq
għat-tagħmir tal-immaġni, dawn aktar għandhom x'jaqsmu
mal-apparat b'volum baxx fis-suq tal-konsumatur milli mas-suq tal-uffiċini
professjonali. Dawn jistgħu jinqalgħu minħabba li l-prezzijiet
attwali tal-elettriku ma jirriflettux l-ispejjeż ambjentali li
ġġarrab is-soċjetà u għalhekk ma jitqisux
biżżejjed waqt id-deċiżjoni tax-xiri (esternalità
negattiva). Barra minn hekk, ħafna mill-konsumaturi jagħżlu
t-tagħmir tagħhom skont il-prezz tal-bejgħ u skont fatturi
oħrajn fosthom id-disponibbiltà, is-servizz u l-ismijiet kummerċjali
"fdati", aktar milli skont l-ispejjeż tal-enerġija, u dan
minħabba nuqqas ta' tagħrif xieraq (tagħrif asimetriku). F'dan
il-kuntest, huwa rilevanti li l-logo tal-ENERGY STAR ikun magħruf sew
fis-settur tal-uffiċini iżda ferm inqas fost il-konsumaturi privati. Fl-aħħar
nett, il-każijiet ta' falliment tas-suq jiġru meta l-ispejjeż
tal-investiment u l-ispejjeż operattivi jġarrbuhom partijiet
differenti, eż: dipartiment tax-xiri f'kumpanija jaf ikollu perspettiva
finanzjarja differenti mill-unità tan-negozju li fil-fatt qed tuża
t-tagħmir u qed tħallas l-ispejjeż operattivi tiegħu
(inċentivi maqsuma). It-tielet pass: L-għanijiet
politiċi u l-livelli ta' ambizzjoni L-għan ġenerali hu li jiġu
indirizzati l-fallimenti tas-suq u esternalitajiet billi jittieħdu
l-miżuri xierqa tal-ekodisinn. L-għażliet li tqiesu
fl-analiżi dettaljata tal-impatt kienu ta': l-ebda azzjoni mill-UE (kollox
bħas-soltu, BAU), l-awtoregolamentazzjoni (l-għażla
"Volontarja"), u r-rekwiżiti tal-ekodisinn (l-għażla
tal-"Ekodisinn"). L-industrija ppreferiet ftehim volontarju
("awtoregolamentazzjoni") milli miżura regolatorja. L-Anness II tad-Direttiva tal-Ekodisinn
jipprovdi li r-rekwiżiti tal-konsum tal-enerġija għandhom
normalment jiġu stabbiliti f'livell sabiex jonqsu kemm jista' jkun
l-ispejjeż taċ-ċiklu tal-ħajja (sakemm ma jkunx hemm
fatturi oħra li lil din il-ħaġa jagħmluha stretta wisq). Il-punt tal-bidu tal-analiżi kien
l-istudju preparatorju, u dan ħejja bażi għax-xenarju jekk
kollox jibqa' kif inhu (BAU, kollox bħas-soltu). Id-dejta dwar il-bejgħ
li hemm fl-istudju preparatorju se tintuża fil-mudell
tal-ħażniet sabiex jiġu kkalkulati l-ħażniet,
il-konsum tal-elettriku u l-konsum tal-karta għall-għażliet
kollha. Saret analiżi addizzjonali tal-mudelli
rreġistrati fil-bażi tad-dejta tal-ENERGY STAR tal-UE li tinsab fuq
www.eu.energystar.org. Din ikkalkulat il-konsum tal-elettriku u
l-karatteristiċi tal-istampar fuq iż-żewġ naħat
għall-mudelli kollha tat-tagħmir tal-immaġni li tqiegħdu
fis-suq tal-UE u li kienu rreġistrati fil-bażi tad-dejta tal-ENERGY
STAR tal-UE fl-2012 iżda anke fis-snin ta' referenza ta' qabel sal-2009.
Din l-evalwazzjoni wriet mhux biss in-numru ta' mudelli li huma konformi
mal-verżjonijiet 1.0, 1.1 (li fuqa jissejjes il-Ftehim Volontarju (FV)
attwali) u l-abbozz tal-verżjoni 2.0 (li tidħol fis-seħħ
fl-2013 u fuq se jissejjes il-FV li jmiss) tar-rekwiżiti tal-ENERGY STAR,
iżda żvelat ukoll kif marru dawn il-mudelli fir-rigward ENERGY STAR
rekwiżiti minimi. Ir-riżultati ta' din il-valutazzjoni jidhru
fl-għażla Volontarja. B'din l-għażla ġie preżunt
li ftehim volontarju jżomm ir-ritmu ta' titjib f'livelli ogħla minn
dawk mitluba mir-rekwiżiti tal-ENERGY STAR (bħal fis-snin ta' qabel). L-għażla tal-Ekodisinn tistabbilixxi
rekwiżiti obbligatorji minimi tal-effiċjenza għat-tagħmir tal-immaġni
li jitqiegħed fis-suq. Meta mqabbel ma' ftehim volontarju effettiv b'mira
ta' konformità ta' 90%, Regolament li jesiġi konformità sħiħa
b'definizzjoni għandu l-iżvantaġġ li jkun nieqes
mill-flessibbiltà u allura normalment l-ambizzjoni tkun konsiderevolment aktar
baxxa. Għall-ewwel dan jista' jidher kontradittorju, iżda
essenzjalment, skont l-Artikolu 15(5) tad-Direttiva tal-Ekodisinn
("l-ebda impatt negattiv" fuq il-funzjonalità u fuq il-kompetittività
tal-industrija), prinċipalment il-livell ta' ambizzjoni
għar-rekwiżiti skont Regolament ikun determinat mill-aktar 10%
dgħajfa tas-suq, li jkunu jikkonsistu minn prodotti speċjali jew
prodotti li għamluhom kumpaniji finanzjarjament dgħajfa. B'kuntrast,
il-livell ta' ambizzjoni ta' ftehim volontarju jista' jiffoka fuq id-90% ta'
prodotti "normali", li jkunu għamluhom manifatturi innovattivi u
sodi finanzjarjament. L-għażla
tal-Ekodisinn tqis dan kollu: l-ewwel saff ġie stabbilit għall-2014
bil-preżunzjoni ta' mira tal-effiċjenza ta' 40% taħt il-livell
tal-BAU u t-tieni saff ġie stabbilit għall-2016 bil-preżunzjoni
ta' mira ta' 60% taħt il-BAU. Għall-istampar fuq
iż-żewġ naħat ġie preżunt — b'mod ottimist — li,
wara li tinħoloq lista ta' eżenzjonijiet, ir-rekwiżiti jkunu
jistgħu jiġu stabbiliti fl-istess livell tal-Għażla
volontarja, jiġifieri għall-printers tipiċi tal-uffiċini
għandhom japplikaw ir-rati ta' stampar fuq iż-żewġ
naħat ta' 75% għall-2014 u ta' 85% għall-2016. Ir-raba' pass: Valutazzjoni tal-impatt
ambjentali, ekonomiku u soċjali L-analiżi tas-subgħażliet
ikkalkulat l-iffrankar li jidher fit-Tabella 2. It-tabella u l-figura ta'
hawn taħt juru l-konsum dirett tal-elettriku tat-tagħmir
tal-immaġni, il-konsum indirett tal-elettriku (ikkalkulat bħala
ekwivalenti tal-elettriku) li hemm bżonn biex isiru l-karti, u l-konsum
totali tal-enerġija (dirett + indirett) taħt il-BAU u
l-iffrankar taż-żewġ għażliet l-oħra meta
mqabblin mal-BAU. Tabella 2:
Sommarju dwar l-iffrankar mit-tagħmir tal-immaġni fl-UE-27 skont
għażliet differenti meta mqabblin mal-linja bażi tal-BAU
għall-2020 u l-2030 (l-iffrankar monetarju hu espress f'ewro kostanti
tal-2010) L-iffrankar totali (enerġija diretta u indiretta tal-karta u mhux għat-toner) fl-2020 versus il-linja bażi tal-BAU || BAU (livelli) || Volontarja || tal-Ekodisinn || 2020 || 2030 || 2020 || 2030 || 2020 || 2030 Il-konsum tal-enerġija (TWh) || || || || || || Dirett || 9.13 || 10.40 || 7.92 || 9.07 || 5.56 || 6.31 Indirett || 42.75 || 49.99 || 7.12 || 7.83 || 6.54 || 7.83 Totali || 51.88 || 57.39 || 15.04 || 16.91 || 12.10 || 14.15 || || || || || || L-emissjonijiet (Mt) tas-CO2 || || || || || || Dirett || 3.47 || 3.54 || 2.99 || 3.09 || 2.10 || 2.15 Indirett || 6.41 || 7.05 || 1.07 || 1.17 || 0.98 || 1.17 Totali || 9.88 || 10.59 || 4.06 || 4.26 || 3.08 || 3.32 || || || || || || L-iffrankar fl-ispejjeż ħlief it-toner (f'biljun ewro) [14] || || || || || || Dirett || 2.43 || 4.10 || 2.11 || 3.58 || 1.48 || 2.49 Indirett || 42.75 || 46.99 || 7.12 || 7.83 || 6.54 || 7.83 Totali || 45.18 || 51.09 || 9.24 || 11.41 || 8.02 || 10.32 Il-Figura 1 turi li l-konsum
tal-elettriku se jiżdied jekk ma jittieħdu l-ebda miżuri.
Iż-żewġ għażliet, l-għażla Volontarja u
l-għażla tal-Ekodisinn se jnaqqsu sostanzjalment iż-żieda
fil-konsum tal-elettriku. Figura 1:
It-total tal-konsum tal-enerġija tal-UE-27 f'TWh fis-sena 4. Konklużjonijiet L-għażla Volontarja hija
l-għażla preferuta. Din tgħin biex tissolva l-problema
tal-kontinwità fix-xejra pożittiva attwali għal effiċjenza
enerġetika u biex jiġu ffrankati l-karti (stampar fuq
iż-żewġ naħat u stampar-N) u tindirizza kwistjonijiet
oħra ta' effiċjenza fl-użu tar-riżorsi
bħar-riċiklaġġ u l-użu mill-ġdid. F'dan is-settur
dinamiku tal-prodotti, din l-għażla tiffranka konsiderevolment aktar
mill-għażla tar-rekwiżiti obbligatorji tal-ekodisinn, toffri
flessibbiltà, tippermetti aġġornament aktar mgħaġġel
tal-livelli ta' mira, u għandha inqas piż amministrattiv.
B'differenza mill-miżuri obbligatorji, din l-għażla ma toħloq
l-ebda riskju ta' impatt negattiv fuq l-effikaċja tal-miżuri
politiċi attwali li rnexxew bħall-ENERGY STAR tal-UE. B'mod speċifiku, l-għażla
Volontarja tinvolvi: ·
kontribuzzjoni għall-mira "20-20-20"
(bejn l-1990 u l-2020) ta' ffrankar dirett fl-elettriku ta' 25 TWh/a billi
titjieb l-effiċjenza u l-ekwivalenti ta' ffranfar fl-elettriku ta' madwar
4 TWh/a permezz ta' ffrankar dirett fir-riżors tal-karti, li lkoll
f'daqqa jiffrankaw 29 TWh/a (ekwivalenti għal 1.1% tal-konsum totali
tal-elettriku tal-UE fl-2007); ·
kontribuzzjoni għall-mira "20-20-20"
(bejn l-1990 u l-2020) fl-għamla ta' tnaqqis dirett ta' 9.6 Mt CO2
eq/a (elettriku) u 0.6 Mt CO2 eq/a (karti) f'gassijiet serra,
li lkoll f'daqqa jnaqqsu 10.2 Mt CO2/a (0.2% tal-emissjonijiet
tal-gassijiet serra fl-UE); ·
kontribuzzjoni għal effiċjenza
fl-użu tar-riżorsi mhux tal-enerġija ta' aktar minn miljun
tunnellata (1 Mt) billi jonqos il-konsum tal-karti tal-uffiċini
mill-1990 sal-2020, u kontribuzzjoni għar-riċiklaġġ u
l-użu mill-ġdid; ·
li jintlaħqu r-rekwiżiti tad-Direttiva
tal-Ekodisinn 2009/125/KE, b'mod partikolari l-premessi 18 u 19,
l-Artikolu 15(6) u l-Anness VIII, ·
li r-rekwiżiti jkunu diġà daħlu
fis-seħħ u huma ogħla milli fil-każ ta' Regolament, ·
li hemm kompatibbiltà u l-kumplimentarjetà
mal-istrumenti politiċi eżistenti, ·
li ma jkunx hemm piż amministrattiv
sinifikanti għall-manifatturi jew il-bejjiegħa, ·
żieda insinifikanti, jekk ikun hemm, fil-prezz
tax-xiri, li titpatta bil-kbir bl-iffrankar waqt li jkun qed jintuża
l-prodott, ·
ebda impatt sinifikanti fuq il-kompetittività
tal-industrija u fuq l-impjiegi, b'mod partikolari għall-SMEs. [1] Ewropa li tuża r-riżorsi b'effiċjenza –
Inizjattiva ewlenija taħt l-Istrateġija Ewropa 2020, KE, 26.1.2011,
COM(2011) 21. [2] Enerġija 2020, Strateġija
għal enerġija kompetittiva, sostenibbli u b'sigurtà, KE, 10.11.2010, COM(2010) 639 finali. [3] Pjan għall-Effiċjenza Enerġetika 2011,
KE, 8.3.2011, COM(2011) 109 finali. [4] Studju Preparatorju tal-EuP dwar it-Tagħmir
tal-Immaġini li sar minn Fraunhofer IZM. [5] Riċerka tal-bazi tad-dejta EU-ENERGY STAR li saret
minn konsulenti (van Holsteijn en Kemna VHK) fl-2012 ("ir-riċerka
tal-2012"). [6] http://www.ecoimaging.org/ [7] Ir-Regolament Nru 1275/2008 dwar il-konsum
tal-elettriku ta' tagħmir tal-elettriku u elettroniku tad-dar u
tal-uffiċċju f'modalità standby u f'modalità mitfija. [8] Id-Direttiva RoHS 2011/65/KE (tfassil mill-ġdid). [9] Id-Direttiva WEEE 2012/19/KE (tfassil mill-ġdid). [10] Id-Direttiva EPBD 2010/31/KE (tfassil mill-ġdid). [11] L-abbozz tad-Direttiva dwar l-Effiċjenza
Enerġetika u li tħassar id-Direttivi 2004/8/KE u 2006/32/KE [COM(2011) 370,
22.06.2011]. [12] Ara l-Artikolu 16 tar-Regolament (KE)
Nru 106/2008 tal-Parlament Ewropew u tal-Kunsill
tal-15 ta' Jannar 2008 dwar programm Komunitarju ta' tikkettar
dwar l-effiċjenza enerġetika tat-tagħmir tal-uffiċċju (verżjoni
mfassla mill-ġdid), ĠU L 39, 13.2.2008, p. 1-7. [13] Il-Komunikazzjoni
tal-Kummissjoni COM(2011) 337 finali dwar l-implimentazzjoni tal-programm
ENERGY STAR fl-Unjoni Ewropea matul il-perjodu 2006-2010. Brussell,
id-9.6.2011. [14] Iffrankar fl-ispejjeż tal-karta huwa kkalkulat billi
n-numru ta' paġni ffrankati jiġi mmultipplikat bi EUR 0,02
(il-prezz għal paġna waħda hu kkalkulat ukoll
fil-Kapitolu 2). Ir-rati tal-elettriku huma għal kull kWh ta'
enerġija primarja. Għall-elettriku, jintużaw ir-rati
residenzjali tal-elettriku fl-2010 mingħajr taxxi, jiġifieri
EUR 0,18/kWh, bil-preżunzjoni li r-rata tal-prezz tal-elettriku
(il-medja fit-tul mill-2011 sal-2030) tiżdied kull sena b'4%.