KOMUNIKAZZJONI TAL-KUMMISSJONI LILL-KUNSILL U LILL-PARLAMENT EWROPEW Sistema Bankarja Parallela - Nindirizzaw Sorsi Ġodda ta' Riskju fis-Settur Finanzjarju /* COM/2013/0614 final */
KOMUNIKAZZJONI TAL-KUMMISSJONI
LILL-KUNSILL U LILL-PARLAMENT EWROPEW Sistema Bankarja Parallela - Nindirizzaw
Sorsi Ġodda ta' Riskju fis-Settur Finanzjarju Introduzzjoni Minn mindu bdiet il-kriżi finanzjarja
fl-2007/2008, il-Kummissjoni Ewropea wettqet l-akbar riforma tas-servizzi
finanzjarji li qatt seħħet fl-Ewropa. L-għan huwa li tkun
restawrata s-saħħa u l-istabbiltà sostenibbli għal dan is-settur
billi jiġu indirizzati n-nuqqasijiet u d-dgħufijiet li xeħtet
id-dawl fuqhom il-kriżi. L-approċċ tal-Kummissjoni
jikkonsisti f'li tindirizza r-riskji finanzjarji kollha, globalment u b'mod
komprensiv, u tiżgura li l-benefiċċji miksuba
bit-tisħiħ ta' ċerti atturi u swieq ma jitnaqqsux billi r-riskji
finanzjarji jiċċaqalqu għal setturi anqas irregolati. Dan l-arbitraġġ
regolatorju jimmina bil-kbir l-impatt tar-riformi. Il-Kummissjoni għalhekk
ippubblikat Green Paper dwar is-sistema bankarja parallela f'Marzu 2012[1], bil-għan li tiġbor
kontribuzzjonijiet dwar kif tittratta r-riskji li jirriżultaw
mill-intermedjazzjoni tal-kreditu li tinvolvi l-entitajiet u l-attivitajiet
barra mis-sistema bankarja regolari. Is-settur bankarju parallel għandu wkoll
post prominenti fuq l-aġenda internazzjonali. Il-mexxejja tal-G20 talbu
lill-Bord tal-Istabbiltà Finanzjarja (FSB)[2]
sabiex jagħti ħarsa lejn is-sistema bankarja parallela sabiex
jidentifika r-riskji ewlenin u jagħmel rakkomandazzjonijiet. L-għan
predominanti, kif affermat mill-ġdid f'diversi okkażjonijiet
mill-G20, huwa li jiġu eliminati l-irkejjen mudlama kollha fis-settur
finanzjarju u li "r-regolamentazzjoni u s-sorveljanza jiġu
estiżi għall-istituzzjonijiet finanzjarji, strumenti u swieq kollha
li huma sistemikament importanti[3]". L-ewwel rakkomandazzjonijiet tal-FSB se
tiġi approvata mill-mexxejja tal-G20 f’San Pietruburgu fil-5-6 ta’
Settembru 2013. Il-Kummissjoni kkontribwixxiet attivament ħafna
għall-ħidma tal-FSB u l-konklużjonijiet ippreżentati f'din
il-komunikazzjoni huma konsistenti għalkollox mal-orjentazzjonijiet
tal-FSB. Wara l-konsultazzjoni dwar il-Green Paper u fi
żmien meta r-regolamentazzjoni finanzjarja sejra tissaħħaħ
u tiġi mtejba b'mod sinifikanti fl-Ewropa, il-Kummissjoni tixtieq
tistabbilixxi l-pjan direzzjonali tagħha għax-xhur li ġejjin, li
għandu l-għan li jillimita l-ħolqien ta' riskji fis-sistema mhux
regolata, b'mod partikolari riskji ta' natura sistemika[4]. Dawn jistgħu
jinħolqu speċjalment permezz tal-interkonnettività tas-settur
bankarju parallel mas-sistema finanzjarja rregolata. Filwaqt li l-idea ta' "sistema bankarja
parallela" ma ilhiex li ġiet formalment definita fid-diskussjonijiet
tal-G20, ir-riskji relatati magħha mhumiex ġodda. Il-Kummissjoni,
flimkien mal-koleġiżlaturi Ewropej, diġà implimentat jew
qiegħda fil-proċess li timplimenta numru ta' miżuri biex
tipprovdi qafas aħjar għal dawn ir-riskji, bħalma huma r-regoli
li jirregolaw l-attività tal-fondi ħeġġ[5] u t-tisħiħ
tar-relazzjoni bejn il-banek u l-atturi mhux regolati[6]. Din il-Komunikazzjoni tippreżenta numru
ta' prijoritajiet fejn il-Kummissjoni għandha l-ħsieb li tieħu
inizjattivi bħat-trasparenza tas-settur bankarju parallel, it-twaqqif ta'
qafas għal fondi tas-suq tal-flus, ir-riforma tar-regoli
għall-impriżi għall-investiment kollettiv f'titoli trasferibbli
(UCITS), il-liġi dwar it-titoli u r-riskji assoċjati ma'
tranżazzjonijiet ta' finanzjament tat-titoli (prinċipalment self ta'
titoli u tranżazzjonijiet ta' riakkwist) u t-twaqqif ta' qafas għal
interazzjonijiet ma' banek. Barra minn hekk, se tingħata attenzjoni
partikolari għall-arranġamenti ta' superviżjoni sabiex jiġi
żgurat li r-riskji kbar kollha jiġu indirizzati b'mod adegwat.
Minbarra dan, ċerti oqsma jeħtieġu analiżi iktar profonda u
se jiġu ċċarati aktar tard din is-sena, b'mod partikolari fuq
il-bażi tal-analiżi tas-servizzi tal-Kummissjoni u l-ħidma
tal-G20. 1. Id-dibattitu
dwar is-sistema bankarja parallela 1.1. L-importanza
tas-sistema bankarja parallela fil-kuntest tar-riforma finanzjarja fl-UE ·
X'inhi s-sistema bankarja parallela? Ir-regolaturi jiddefinixxu s-sistema bankarja
parallela bħala sistema ta' intermedjazzjoni tal-kreditu li tinvolvi entitajiet
u attivitajiet barra mis-sistema bankarja regolari[7]. Dan jinkludi entitajiet li: –
jiġbru finanzjament b'karatteristiċi
simili għal depożitu; –
iwettqu trasformazzjoni tal-maturità u/jew
tal-likwidità; –
jippermettu trasferiment tar-riskju tal-kreditu; –
jużaw ingranaġġ dirett jew indirett[8]. Attivitajiet
bankarji paralleli, b'mod partikolari t-titolizzazzjoni, tranżazzjonijiet
ta' self u riakkwist ta' titoli, jikkostitwixxu sors importanti ta'
finanzjament għall-entitajiet finanzjarji. ·
Għaliex għandu jittieħed interess
partikolari f'din is-sistema? Barra mir-riskji assoċjati mal-ksur
tar-regoli eżistenti u l-fatt li dawn l-entitajiet/attivitajiet
jistgħu jrawmu akkumulazzjoni moħbija ta' livelli għolja ta'
dejn fis-settur finanzjarju, is-sistema bankarja parallela jeħtieġ li
tiġi mmonitorjata minħabba d-daqs tagħha, ir-rabtiet mill-qrib
tagħha mas-settur finanzjarju rregolat u r-riskju sistemiku li
tippreżenta. L-ewwel fattur huwa d-daqs. Anki jekk mhumiex
preċiżi għalkollox, l-estimi tad-daqs tas-sistema bankarja
parallela, kemm f'termini assoluti kif ukoll bħala sehem tas-settur
finanzjarju globali, juru li wħud mill-komponenti tagħha jistgħu
jkunu sistemikament sinifikanti. L-aħħar studji mill-FSB[9] jindikaw li l-ammont aggregat
tal-assi tas-sistema bankarja parallela, irrappreżentati mill-kategorija
statistika "intermedjarji finanzjarji oħra", huwa madwar nofs
id-daqs tas-sistema bankarja rregolata. Minkejja l-fatt li l-assi tas-sistema
bankarja parallela naqsu ftit sa mill-2008, iċ-ċifra totali fl-2011
kienet ta' EUR 51 000 biljun. F'termini ta' distribuzzjoni
ġeografika, hija kkonċentrata fl-Istati Uniti, (madwar EUR
17 500[10]
biljun), u fl-UE[11]
(iż-Żona tal-Euro b'EUR 16 800 biljun u r-Renju Unit b'EUR
6 800 biljun). It-tieni fattur li jżid ir-riskji huwa
l-livell għoli ta' interkonnettività bejn is-sistema bankarja parallela u
l-bqija tas-settur finanzjarju, partikolarment is-sistema bankarja rregolata.
Kwalunkwe dgħufija li hija mmaniġġjata ħażin jew
id-destabilizzazzjoni ta' attur importanti fis-sistema bankarja parallela
tista' twassal għal mewġa ta' kontaġju li taffettwa setturi
soġġetti għall-ogħla standards prudenzjali. Fl-aħħar mill-aħħar,
l-għan huwa li jiġi żgurat li r-riskji sistemiċi potenzjali
fis-settur finanzjarju jiġu koperti kif xieraq u li l-opportunitajiet ta'
arbitraġġ regolatorju jkunu limitati sabiex tissaħħaħ
l-integrità tas-suq u tiżdied il-fiduċja ta' min ifaddal u
tal-konsumaturi. 1.2. It-tweġibiet
għall-Green Paper tal-Kummissjoni L-għadd kbir ta' kontribuzzjonijiet li
waslu wara l-pubblikazzjoni tal-Green Paper[12],
u r-rapport tal-Parlament Ewropew fuq inizjattiva proprja[13], li żied valur
sostanzjali għad-dibattitu, jenfasizzaw l-importanza ta' din il-kwistjoni
għas-sistema finanzjarja, l-industrija mhux finanzjarja u l-awtoritajiet
pubbliċi. Il-maġġoranza ta' dawk li
wieġbu appoġġjaw bil-qawwa inizjattivi mmirati li jistabbilixxu
regoli aktar ċari dwar is-sistema bankarja parallela. Bosta talbu
lill-Kummissjoni biex tadotta approċċ proporzjonat li jiffoka,
bħala prijorità, fuq l-attivitajiet jew entitajiet li jippreżentaw
livell għoli ta' riskju sistemiku għas-settur ekonomiku u
finanzjarju. Dan l-approċċ għandu, sa fejn ikun possibbli,
juża l-qafas legali eżistenti tal-UE sabiex jiżgura l-koerenza u
l-kontinwità. Id-definizzjoni proposta tas-sistema bankarja
parallela stabbilita fil-Green Paper irċeviet l-approvazzjoni
ġenerali ta' dawk li rrispondew. Xi osservaturi kienu jippreferu
definizzjoni iżjed speċifika iżda oħrajn enfasizzaw l-importanza
li jkun hemm definizzjoni wiesgħa u flessibbli li kapaċi tadatta
ruħha għall-bidliet fis-sistema. Madankollu, bosta kontributuri ma
kinux kuntenti bit-terminu Ingliż "shadow banking" li huma
ħassew għandu konnotazzjonijiet negattivi. Il-Kummissjoni tieħu
nota ta' dan it-tħassib, iżda hija stess qed tuża dan it-terminu
b'mod newtrali u ħieles mill-konnotazzjonijiet. F'dan l-istadju,
madankollu, huwa diffiċli ħafna li wieħed jintroduċi
terminoloġija alternattiva, billi dan issa huwa terminu stabbilit tajjeb
fid-dibattitu internazzjonali. Hemm ukoll kunsens dwar il-ħtieġa li
jitnaqqsu l-opportunitajiet għall-arbitraġġ regolatorju bejn
setturi regolati ħafna u segmenti oħra tas-suq fejn ċerti
attivitajiet finanzjarji simili jistgħu jitwettqu mingħajr ma jkunu
soġġetti għall-istess livell ta' regolamentazzjoni. L-għan
globali tal-Kummissjoni huwa li timplimenta approċċ koerenti li
jinvolvi l-applikazzjoni ta' regoli simili għall-attivitajiet li
jippreżentaw riskji simili. 2. Ir-riformi
li se jitwettqu huma rispons adegwat għar-riskji inerenti fis-sistema
bankarja parallela? Il-Kummissjoni nediet programm ta' riforma
ambizzjuż u mingħajr preċedent li għalih il-Parlament
Ewropew u l-Kunsill taw prijorità f'termini tar-rwol tagħhom bħala
koleġiżlaturi. 2.1. Miżuri
mmirati lejn entitajiet finanzjarji ·
Tisħiħ tar-rekwiżiti imposti fuq
il-banek fir-relazzjonijiet tagħhom mas-sistema bankarja parallela L-entitajiet tas-sistema bankarja parallela
jistgħu, sa ċertu punt, jiġu mmonitorjati permezz
tar-relazzjonijiet tagħhom mal-banek. Żewġ settijiet ta'
rekwiżiti huma partikolarment importanti f'dan ir-rigward: rekwiżiti
relatati mat-tranżazzjonijiet konklużi bejn il-banek u
l-kontropartijiet finanzjarji tagħhom u r-regoli tal-kontabilità dwar
il-konsolidazzjoni. L-ewwel, ittieħdu miżuri sabiex
jiġi żgurat li l-interessi tal-persuni li jibdew
tranżazzjonijiet ta' titolizzazzjoni jkunu allinjati strettament ma' dawk
tal-investituri finali. Minn meta s-CRD II[14]
daħlet fis-seħħ fi tmiem l-2010, l-istituzzjonijiet ta' kreditu
huma obbligati li jiċċekkjaw li l-istituzzjoni oriġinatur jew
sponsor tat-tranżazzjoni jkollha interess ekonomiku ekwivalenti għal
mill-inqas 5% tal-assi titolizzati. Is-CRD III[15]
mbagħad saħħet ir-rekwiżiti tal-kapital għar-riskji
assoċjati mat-tranżazzjonijiet tat-titolizzazzjoni, b'mod partikolari
meta dawn l-istrutturi jinvolvu diversi livelli ta' titolizzazzjoni, u
żiedet ir-rekwiżiti prudenzjali għall-appoġġ
mogħti lill-istrumenti tat-titolizzazzjoni[16]. It-tieni nett, ir-rekwiżiti
kontabilistiċi rigward it-trasparenza wkoll għandhom rwol importanti
safejn dawn jippermettu lill-investituri jidentifikaw ir-riskji mġarrba
mill-banek u l-iskoperturi tagħhom għas-settur bankarju parallel.
L-istandards kontabilistiċi fuq il-konsolidament, b'mod partikolari,
jiddeterminaw jekk entità għandhiex tiġi inkluża fuq il-karta
tal-bilanċ konsolidata ta' bank. L-emendi magħmula mill-IASB
għad-dispożizzjonijiet tal-IFRS 10, 11 u 12, li se jidħlu
fis-seħħ fl-Ewropa fl-2014, se jiżviluppaw
il-ħtiġijiet ta' konsolidament tal-kontabbiltà u jżidu
d-divulgazzjoni dwar entitajiet strutturati mhux konsolidati. Barra minn hekk,
il-Kumitat ta' Bażilea beda reviżjoni tal-prattiki ta'
konsolidazzjoni prudenzjali u se jippubblika l-konklużjonijiet tiegħu
sa tmiem l-2014. Il-Kummissjoni qed issegwi dawn l-iżviluppi mill-qrib. Fl-2010, l-IASB saħħaħ
ir-rekwiżiti tad-divulgazzjoni dwar l-iskoperturi barra l-karta
tal-bilanċ fil-każ ta' trasferimenti ta' assi finanzjarji, li
daħlu fis-seħħ fl-Ewropa mill-1 ta' Lulju 2011 (IFRS 7). Matul
il-kriżi, in-nuqqas ta' informazzjoni dwar dan it-tip ta' impenn kien
ifisser li l-investituri u l-awtoritajiet bankarji ma setgħux jidentifikaw
b'mod korrett ir-riskji kollha li kienu qed iġorru l-banek. ·
It-tisħiħ tar-rekwiżiti imposti fuq
il-kumpaniji tal-assigurazzjoni fir-relazzjonijiet tagħhom mas-sistema
bankarja parallela Id-Direttiva
Solvenza II[17]
ukoll tindirizza għadd ta' kwistjonijiet tas-sistema bankarja parallela
permezz tal-approċċ ibbażat fuq ir-riskju tagħha, kif ukoll
billi timponi rekwiżiti stretti tal-immaniġġjar tar-riskju,
inkluż il-prinċipju ta' "persuna prudenti"
għall-investimenti. Bħal-leġiżlazzjoni bankarja tal-UE,
hija tipprovdi għal approċċ tal-karta tal-bilanċ totali
fejn l-entitajiet u l-iskoperturi kollha huma soġġetti għas-superviżjoni
tal-grupp. Ċerti
attivitajiet bħall-assigurazzjoni ta' self ipotekarju[18], ftehimiet mal-banek fuq
l-iswaps tal-likwidità u għoti dirett ta' self jistgħu jqajmu
tħassib speċifiku. Id-dispożizzjonijiet relatati
mal-immaniġġjar tar-riskju u r-rekwiżiti tal-kapital li se jkunu
speċifikati fil-miżuri tekniċi tal-implimentazzjoni tas-Solvenza
II se jassiguraw li r-riskji inerenti f'dawn l-attivitajiet se jkunu koperti
biżżejjed u li l-opportunitajiet għal arbitraġġ
regolatorju se jkunu limitati. Id-Direttiva Solvenza II tistabbilixxi, b'mod
partikolari, li s-self dirett se jkun suġġett għal
rekwiżiti tal-kapital u li l-ħolqien ta' strumenti ta'
titolizzazzjoni se jkun jeħtieġ awtorizzazzjoni mill-awtoritajiet ta'
superviżjoni. Ir-regoli ta' implimentazzjoni ta' din id-Direttiva se
jinkludu awtorizzazzjoni u rekwiżiti regolatorji kontinwi dwar
is-solvenza, il-governanza u r-rappurtar f'dak li jirrigwarda l-istrumenti
speċjali (SPVs) tal-assigurazzjoni. ·
Qafas awtorizzat għall-maniġers tal-fondi
ta' investiment alternattivi L-Ewropa diġà ħadet azzjoni
fir-rigward ta' atturi finanzjarji li qabel ma kinux soġġetti
għal regolamentazzjoni fil-livell tal-UE. Id-Direttiva dwar Maniġers
ta' Fondi ta' Investiment Alternattivi (AIFMD)[19]
tistabbilixxi rekwiżiti armonizzati għall-entitajiet responsabbli
għall-immaniġġjar u l-amministrazzjoni ta' dan it-tip ta' fondi.
Sa mit-22 ta' Lulju 2013, dawn ir-regoli jridu japplikaw għall-fondi
ħeġġ, l-ekwità privata u l-fondi tal-proprjetà immobbli[20]. Sabiex jirċievi l-approvazzjoni,
maniġer għandu jikkonforma mar-rekwiżiti f'termini tal-kapital u
l-immaniġġjar tar-riskji u l-likwidità, il-ħatra ta'
depożitarju wieħed u regoli dwar it-trasparenza
għall-investituri u s-superviżuri. L-ingranaġġ se jkun
soġġett għal monitoraġġ speċjali. Jekk
jirriżulta li jkun eċċessiv fir-rigward tar-riskji
għall-istabbiltà tas-sistema finanzjarja, l-awtoritajiet nazzjonali, fuq
ir-rakkomandazzjoni tal-Awtorità Ewropea tat-Titoli u s-Swieq (ESMA),
jistgħu jimponu limiti fuq l-użu tal-ingranaġġ. 2.2. Miżuri
meħuda biex tissaħħaħ l-integrità tas-suq ·
Qafas għall-istrumenti tat-trasferiment
tar-riskju Il-kontaġju bejn is-sistema finanzjarja
rregolata u s-sistema bankarja parallela jista' jkun serju u jsir agħar
minħabba n-nuqqas ta' trasparenza, b'mod partikolari fi żminijiet ta'
stress. Il-kriżi finanzjarja żvelat ir-rwol ċentrali
tad-derivattivi barra l-borża (OTC), bħad-derivattivi tal-kreditu.
Ir-Regolament dwar id-derivattivi OTC, kontropartijiet ċentrali u repożitorji
tat-tranżazzjonijiet[21]
(magħruf bħala "EMIR" - European Market Infrastructure
Regulation) jirrikjedi l-ikklerjar ċentrali tal-kuntratti derivattivi
standardizzati kollha, kif ukoll margin calls għal kuntratti mhux
standardizzati. Dan se jagħmilha possibbli li jiġi żgurat li
l-informazzjoni relatata mat-tranżazzjonijiet Ewropej kollha dwar
il-prodotti derivattivi tiġi maħżuna f'repożitorju
tad-dejta aċċessibbli għall-awtoritajiet superviżorji
kollha kkonċernati. Billi jiġi żgurat li dawn
it-tranżazzjonijiet ikunu trasparenti, se jkun possibbli li jiġi
definit b'mod ċar ir-rwol tal-entitajiet fis-sistema bankarja parallela. Fi ħdan il-qafas tal-implimentazzjoni u
r-rieżamijiet futuri tar-Regolament, il-Kummissjoni se tivvaluta
l-kopertura tal-entitajiet li jappartjenu għas-sistema bankarja parallela
u tiddetermina jekk inizjattivi supplimentari humiex meħtieġa biex
jiżguraw li dawn l-entitajiet ma jkunux eżenti mill-obbligi rigward
il-kumpens u t-trasparenza imposti permezz tar-repożitorji ċentrali. Minbarra dan, ir-regolament tal-bejgħ
bin-nieqes[22]
indirizza xi wħud minn dan it-tħassib billi żied it-trasparenza
għall-pożizzjonijiet tat-tpartitiet tal-inadempjenza tal-kreditu u
pprojbixxa t-tpartitiet tal-inadempjenza tal-kreditu sovran skoperti. ·
Arranġamenti msaħħa
tat-titolizzazzjoni It-titolizzazzjoni hija metodu ta'
finanzjament li huwa importanti għall-finanzjament effettiv tal-ekonomija.
Madankollu, hija ġiet użata wkoll għal trasferimenti sinifikanti
ta' riskju tal-kreditu mis-sistema bankarja tradizzjonali mingħajr
biżżejjed salvagwardji. Rekwiżiti simili għal dawk
stabbiliti fis-CRD II huma stabbiliti għall-kumpaniji tal-assigurazzjoni
(Solvenza II), maniġers ta' fondi ta' investiment alternattivi (AIFMD) u
impriżi ta' investiment kollettiv f'titoli trasferibbli (UCITS). Il-qafas regolatorju Ewropew huwa konformi
mar-rakkomandazzjonijiet maħruġa fis-16 ta' Novembru 2012
mill-Organizzazzjoni Internazzjonali tal-Kummissjonijiet tat-Titoli (IOSCO)[23]. Il-Kummissjoni se tkompli
tagħti attenzjoni partikolari lil dawn il-prinċipji sabiex
tiggarantixxi trattament indaqs u għarfien tajjeb tar-riskji fil-livell
internazzjonali. It-tisħiħ tal-qafas tat-titolizzazzjoni jinvolvi
wkoll li jittieħdu miżuri sodi f'termini ta' trasparenza.
Il-Kummissjoni tilqa' kull inizjattiva li għandha l-għan li
żżid it-trasparenza u ssaħħaħ l-istandardizzazzjoni
tad-divulgazzjoni. Inizjattivi mmexxija mill-banek ċentrali dwar
il-kollateral[24]
u mill-industrija, bħall-implimentazzjoni tat-tikkettar[25] se jippermettu
lis-superviżuri biex jikkontrollaw aħjar ir-riskji u jagħmluha
possibbli għall-investituri sabiex janalizzaw ir-riskji aktar bir-reqqa.
Dan għandu jikkontribwixxi għal kundizzjonijiet aktar ta'
benefiċċju sabiex jitqajjem mill-ġdid dan is-suq. ·
Qafas imsaħħaħ
għall-aġenziji ta' klassifikazzjoni L-aġenziji tal-klassifikazzjoni
tal-kreditu għandhom rwol importanti fil-katina tas-sistema bankarja
parallela. L-azzjonijiet tal-klassifikazzjoni għandhom impatt dirett fuq
l-investituri, dawk li jissellfu, l-emittenti u l-gvernijiet. Il-kriżi
finanzjarja enfassizzat l-importanza tal-evalwazzjonijiet magħmula
mill-aġenziji tal-klassifikazzjoni, b'mod partikolari fil-proċess
tat-teħid tad-deċiżjonijiet tal-investituri u kif dawn
iffaċilitaw l-estensjoni żejda tal-kreditu u reazzjonijiet
proċikliċi f'ħafna każijiet ukoll fis-settur bankarju
parallel permezz tal-iffaċilitar tal-ħolqien ta' ingranaġġ
eċċessiv. L-UE adottat tliet regolamenti[26] bil-għan li tipprovdi
qafas iktar ċar għal dawn l-aġenziji. Dan il-qafas il-ġdid
se jnaqqas id-dipendenza żejda fuq il-klassifikazzjonijiet esterni,
itejjeb il-kwalità tal-klassifikazzjonijiet u jżid ir-responsabbiltà
tal-aġenziji tal-klassifikazzjoni tal-kreditu. It-tielet Regolament (CRA3)
li daħal fis-seħħ fl-20 ta' Ġunju 2013 se jgħin biex
jillimita l-kunflitti ta' interess billi jagħmel l-aġenziji
responsabbli u se jnaqqas ukoll id-dipendenza eċċessiva u awtomatika
fuq dawn il-klassifikazzjonijiet. Dawn
il-miżuri flimkien se jgħinu biex is-sistema bankarja parallela ssir
aktar b'saħħitha u aktar reżiljenti. 3. Miżuri
addizzjonali li jipprovdu qafas għar-riskji assoċjati mas-sistema
bankarja parallela Ħames oqsma ta' prijorità jistgħu
jiġu identifikati: li tiġi miżjuda t-trasparenza fis-sistema
bankjara parallela, li jiġi pprovdut qafas imsaħħaħ
għall-fondi, partikolarment fondi tas-suq tal-flus, li tiġi
żviluppata liġi tat-titoli biex jiġu limitati r-riskji
assoċjati mat-tranżazzjonijiet ta' finanzjament tat-titoli, li
jissaħħu l-arranġamenti prudenzjali fis-settur bankarju u li
jittejjeb il-mod li bih is-superviżjoni tas-sistema bankarja parallela
hija organizzata. 3.1. Aktar
trasparenza Sabiex ikun possibbli li jkun hemm
monitoraġġ tar-riskji b'mod effettiv u li jsiru interventi meta
meħtieġ, huwa essenzjali li tinġabar dejta ddettaljata,
affidabbli u komprensiva. L-awtoritajiet għandhom ikomplu bl-isforzi
tagħhom biex jissupplimentaw u jsaħħu l-għodda
statistiċi tagħhom, bħall-granularità tad-dejta tagħhom
dwar il-fluss ta' fondi. F'dan l-istadju hemm erba' proġetti li jistħoqqilhom
trattament prijoritarju. ·
Supplimentar tal-inizjattivi rigward il-ġbir u
l-iskambju tad-dejta Hemm il-ħtieġa
għall-iżvilupp ta' qafas ta' monitoraġġ għar-riskji
tas-sistema bankarja parallela fl-UE. Evalwazzjoni kwantitattiva perjodika
għandha sseħħ mill-anqas kull sena u b'mod partikolari għandha
tidentifika l-mod kif għandhom jimtlew in-nuqqasijiet tal-informazzjoni
li jipprevjenu evalwazzjoni adegwata u komprensiva. F'dan il-kuntest,
il-Kummissjoni qiegħda tistenna bil-ħerqa l-kontribuzzjoni tal-grupp
ta' ħidma tal-ESRB u l-proposti konkreti tiegħu inklużi
indikaturi speċifiċi għar-riskji. Fil-livell internazzjonali,
l-eżerċizzju ta' monitoraġġ annwali tal-FSB joffri stampa
ġenerali tajba ta' dawn l-iżviluppi u għandu jkompli jitlesta.
Minbarra l-ħidma konġunta tal-FSB - il-Fond Moneterju Internazzjonali
(IMF) dwar qafas għall-ġbir u l-qsim tad-dejta fuq banek kbar ta'
importanza sistemika internazzjonali (l-Inizjattiva tan-Nuqqasijiet tad-Dejta)
tista' tiġi msaħħa utilment bil-ġbir ta' dejta dwar
l-interkonnettività settorjali li tkun utli għall-monitoraġġ
tar-riskji assoċjati mas-sistema bankarja parallela. ·
L-iżvilupp ta' repożitorji ċentrali
għad-derivattivi fi ħdan il-qafas ta' EMIR u r-reviżjoni
tal-MiFID EMIR teħtieġ reġistrazzjoni
tat-tranżazzjonijiet ta' derivattivi kollha f'repożitorji ċentrali
(repożitorji tat-tranżazzjonijiet). Dawn ir-rekwiżiti
tar-rappurtar se jiddaħħlu gradwalment mill-bidu tal-2014. F'termini
ta' monitoraġġ tas-sistema bankarja parallela, il-ġbir ta' din
id-dejta mir-repożitorji tal-kummerċ huwa pass kbir 'il quddiem billi
jgħin biex jiġu identifikati aħjar it-trasferimenti tar-riskji.
Dawn ir-repożitorji jipprovdu aċċess immedjat għal
informazzjoni dettaljata dwar l-interkonnettività tal-atturi differenti.
Pereżempju, jagħmluha possibbli għas-superviżuri sabiex
jimmonitorjaw min qed jixtri jew ibigħ il-protezzjoni f'ċerti swieq
(derivattivi tal-kreditu, derivattivi tar-rati u tal-ekwitatjiet). Jekk
l-entitajiet tas-sistema finanzjarja parallela, bħall-fondi
ħeġġ, ikunu dominanti jew iġorru riskji sinifikanti, huma
jistgħu jiġu identifikati mis-superviżuri. Ir-reviżjoni tad-Direttiva dwar is-Swieq
fl-Istrumenti Finanzjarji (MiFID)[27]
se tagħmilha wkoll possibbli li tiżdied it-trasparenza tal-bonds,
il-prodotti strutturati, l-istrumenti derivattivi u l-kwoti tal-emissjonijiet.
Din il-proposta testendi wkoll l-ambitu tad-direttiva biex jinkludi
attivitajiet bħan-negozju ta' frekwenza għolja. Billi tagħmel
dawn l-attivitajiet kondizzjonali fuq l-għoti tal-approvazzjoni,
il-proposta se tippermetti lill-awtoritajiet jidentifikaw u jimmonitorjaw aktar
faċilment ir-riskji għas-swieq maħluqa minn dawk involuti
fin-negozju ta' frekwenza għolja, anke jekk dawn ikunu jappartjenu
għas-sistema bankarja parallela. ·
L-implimentazzjoni tal-Identifikatur tal-Entità
Legali (IEL) Fuq talba tal-G20, l-FSB stabbilixxa entità
għall-governanza globali - il-Kumitat tas-Sorveljanza Regolatorja tal-IEL
- sabiex tiżviluppa u timmaniġġa standard ġdid li
jiżgura identifikatur uniku għal kull entità ġuridika li tkun
parti fi tranżazzjoni finanzjarja. L-IEL se jippermetti lill-awtoritajiet
superviżorji sabiex jimmonitorjaw lill-atturi finanzjarji kollha,
irrispettivament minn jekk humiex regolati, u t-tranżazzjonijiet
finanzjarji tagħhom, fuq bażi transfruntiera. B'mod partikolari, dan
se jagħmilha possibbli li tiġi identifikata l-konċentrazzjoni
tar-riskju fis-sistema finanzjarja, li jiġu ssimplifikati s-sistemi ta'
rappurtar u li jittejbu l-kwalità tad-dejta u l-immaniġġjar
tar-riskju mill-operaturi finanzjarji. L-IEL se jkollu impatt fuq is-sistema
bankarja parallela għaliex se jagħmilha possibbli li tinġabar
aktar informazzjoni dwar l-entitajiet li jwettqu tranżazzjonijiet
finanzjarji. Il-Kumitat tas-Sorveljanza Regolatorja tal-IEL
kellu l-ewwel żewġ laqgħat plenarji tiegħu fl-2013.
Bis-sostenn tal-FSB, gradwalment huwa se jistabbilixxi l-istruttura
responsabbli għall-immaniġġjar tal-istandard, li se tkun
ibbażata fuq unità ċentrali u fuq netwerk ta' operaturi lokali madwar
id-dinja. L-IEL inizjalment ser jintuża għar-rappurtar ta' prodotti
derivattivi fl-Ewropa u l-Istati Uniti. L-użu tiegħu mbagħad
jiġi estiż f'oqsma oħra, bħall-implimentazzjoni
tar-regolament li jirrigwarda l-banek, il-fondi ħeġġ,
l-aġenziji tal-klassifikazzjoni tal-kreditu u s-swieq finanzjarji. Tliet kwistjonijiet għandhom jiġu
enfasizzati f'dan ir-rigward. L-ewwel nett, il-Kummissjoni
tinkoraġġixxi t-twaqqif fl-Ewropa ta' unitajiet operazzjonali lokali
biex jassenjaw identifikaturi lill-kumpaniji Ewropej. It-tieni nett, hi se
tagħti attenzjoni partikolari lill-istadju tat-tranżizzjoni qabel
l-implimentazzjoni tal-identifikatur definittiv, sabiex, jiġi żgurat
li l-identifikaturi ta' tranżizzjoni jkunu globalment koerenti u
rikonoxxuti bħala tali mill-Kumitat tal-IEL. F'dan ir-rigward,
ir-rappurtar dwar id-derivattivi għandu, f'kull ġuriżdizzjoni,
juża l-identifikaturi kollha rikonoxxuti mill-Kumitat. Fl-aħħar
nett, il-Kummissjoni se tiżgura bilanċ xieraq bejn atturi
pubbliċi u privati fil-proġett, partikolarment fil-kuntest
tal-ħolqien ta' unità operattiva ċentrali li se sservi bħala l-fus
tas-sistema. Il-Kummissjoni se tikkunsidra l-possibbiltà li
tħejji proposta leġiżlattiva, li tagħmilha possibbli li
tittrasponi l-obbligu li jintuża l-IEL fil-qafas legali Ewropew. ·
Il-ħtieġa li tiżdied it-trasparenza
tat-tranżazzjonijiet tal-finanzjament tat-titoli Il-Bord Ewropew tar-Riskju Sistemiku (ESRB) u
l-analiżi tal-FSB tefgħu dawl fuq in-nuqqas ta' dejta affidabbli u
fil-fond dwar il-ftehimiet ta' riakkwist u t-tranżazzjonijiet tas-self
tat-titoli. Din id-dejta hija essenzjali biex jiġu osservati r-riskji
assoċjati mal-interkonnettività, l-ingranaġġ eċċessiv
u l-komportament proċikliku. Hija se tippermetti l-identifikazzjoni
tal-fatturi tar-riskju bħall-użu eċċessiv ta' finanzjament
fuq medda qasira ta' żmien biex jiġu ffinanzjati assi fit-tul,
dipendenza għolja fuq ċerti tipi ta' kollateral u nuqqasijiet
fil-valutazzjoni tagħhom. Dawn il-lakuni huma ta' tħassib,
partikolarment minħabba l-opaċità tal-ktajjen tal-kollateral li
żżid ir-riskju ta' kontaġju. Filwaqt li tikkontribwixxi b'mod attiv għad-diskussjonijiet
internazzjonali dwar din il-kwistjoni, il-Kummissjoni qed issegwi mill-qrib
l-inizjattiva kurrenti tal-BĊE sabiex jiġi stabbilit repożitorju
ċentrali biex tinġabar dejta dettaljata dwar tranżazzjonijiet
ta' riakkwist fl-UE f'ħin reali. Din il-ħidma se (i) tidentifika
d-dejta meħtieġa għall-monitoraġġ ta' dawn
it-tranżazzjonijiet u (ii) tanalizza d-dejta diġà disponibbli, b'mod
partikolari fl-infrastruttura. Il-BĊE riċentement tenna l-ħtieġa
għal qafas ta' rrappurtar fil-livell tal-UE[28], filwaqt li l-ESRB kkonkluda
li t-twaqqif ta' repożitorju ċentrali fil-livell Ewropew ikun
l-aħjar mod biex tinġabar id-dejta dwar it-tranżazzjonijiet
tal-finanzjament tat-titoli[29].
Il-Kummissjoni se tagħti attenzjoni speċifika għal dan
ix-xogħol fil-qafas tar-rakkomandazzjonijiet tal-FSB. Fid-dawl ta' dawn
l-iżviluppi, hija se tevalwa jekk it-trasparenza fil-livell tal-UE kenitx
aħjar, filwaqt li tirriżerva d-dritt li tipproponi kwalunkwe
miżuri xierqa sabiex tiġi rrimedjata s-sitwazzjoni. 3.2. Qafas
imsaħħaħ għal ċerti fondi ta' investiment ·
Miżuri leġiżlattivi
speċifiċi biex jiġi pprovdut qafas aħjar għall-fondi
tas-suq tal-flus Il-kriżi finanzjarja wriet li l-fondi
tas-suq tal-flus, li kienu jitqiesu bħala strumenti tal-investiment
relattivament stabbli, jistgħu jippreżentaw riskju sistemiku. Dawn
il-fondi huma għodda utli għall-investituri għax joffru
karatteristiċi simili għal dawk ta' depożiti bankarji:
aċċess immedjat għal-likwidità u stabbiltà tal-valur.
Madankollu, fondi tas-suq tal-flus huma xorta waħda fondi ta' investiment,
suġġetti għar-riskju tas-suq. Matul perjodi ta' taqlib qawwi
fis-suq, huwa diffiċli għal dawn il-fondi li jżommu l-likwidità
u l-istabbiltà, b'mod partikolari fid-dawl ta' assalti (runs)
mill-investituri. Għaldaqstant, jistgħu jippreżentaw riskju
serju ta' kontaġju. Wara l-konsultazzjoni organizzata fl-2012 dwar
ir-rimudellar tas-settur tal-immaniġġjar tal-assi[30] u bil-għan li tirrispondi
għar-riżoluzzjoni tal-Parlament Ewropew[31], il-Kummissjoni ppubblikat
flimkien mal-Komunikazzjoni preżenti proposta għal Regolament li japplika
għall-fondi kollha Ewropej tas-swieq tal-flus bla eċċezzjoni <http://ec.europa.eu/internal_market/investment/money-market-funds/index_en.htm>.
Dawn il-proposti jqisu x-xogħol li sar kemm fil-livell internazzjonali
(fl-IOSCO u l-FSB) u kif ukoll fil-livell Ewropew (rakkomandazzjonijiet
tal-ESRB[32]
u linji gwida tal-ESMA). Huma se jsaħħu, b'mod partikolari,
il-kwalità u l-likwidità tal-portafolli tal-assi miżmuma minn dawn
il-fondi u se jistabbilixxu, għal xi wħud minn dawn il-fondi,
protezzjoni kapitali li tkopri n-nuqqasijiet fil-valutazzjoni assoċjati
maċ-ċaqliq fil-valur tal-assi tagħhom. ·
Tisħiħ tal-qafas tal-UCITS Fil-kuntest tar-rieżami ġenerali
tad-Direttiva tal-UCITS (saret konsultazzjoni pubblika fl-2012), il-Kummissjoni
se tittratta problemi oħra assoċjati mal-immaniġġjar
tal-assi. Se ssir evalwazzjoni globali tal-qafas li fih ċerti fondi[33] jistgħu joperaw,
inkluż il-mod li bih jintużaw ċerti tekniki u strateġiji
tal-investiment. Bħala aspett ewlieni, ir-reviżjoni
se teżamina kif il-fondi tal-investiment jużaw
it-tranżazzjonijiet tal-finanzjament tat-titoli. Il-fondi ser ikollhom
jiżguraw li l-użu ta' dan it-tip ta' tranżazzjoni ma jkunx ta'
ħsara għal-likwidità tagħhom. Dawn it-tranżazzjonijiet ġeneralment
imorru id f'id ma' skambju tal-kollateral li jkopri l-fondi kontra r-riskju
tal-kontroparti. Il-kriterji tal-eliġibbiltà u d-diversifikazzjoni
tal-assi mqiegħda bħala kollateral se jiġu rieżaminati
sabiex jiġi żgurat li t-telf potenzjali jkun kopert b'mod adegwat u
immedjatament fil-każ ta' inadempjenza ta' kontroparti. Se tingħata
attenzjoni partikolari lill-fondi konnessi b'dan it-tip ta' tranżazzjoni
mas-sistema bankarja. 3.3. Jitnaqqsu
r-riskji assoċjati ma' tranżazzjonijiet ta' finanzjament tat-titoli Lil hinn mill-industrija tal-immaniġġjar
tal-fondi, it-tranżazzjonijiet tal-iffinanzjar tat-titoli - l-aktar
il-ftehimiet ta' riakkwist jew it-tranżazzjonijiet ta' self ta' titoli -
kellhom rwol ċentrali fil-livell eċċessiv ta' dejn fis-settur
finanzjarju. Minbarra dan, minn meta bdiet il-kriżi finanzjarja,
l-intermedjarji finanzjarji spiss ġew imġiegħla jużaw
is-sigurtà (kollateral) sabiex jiksbu finanzjament fis-swieq. Dan il-kollateral
ikopri lil dawk li jsellfu kontra r-riskju tal-kontroparti iżda jista' wkoll
jiġi użat mill-ġdid minn min jislef Fl-UE, dan il-kollateral normalment jieħu
l-forma ta' titoli, li jistgħu jiġu mislufa mill-ġdid lil
intermedjarji finanzjarji oħra sabiex jiggarantixxu jew iservu ta' sigurtà
għal tranżazzjonijiet ġodda ta' kreditu. Jekk dan il-kollateral
jitqiegħed fi flus, jista' jiġi investit mill-ġdid. L-użu
mill-ġdid jew l-ipotekizzazzjoni mill-ġdid ta' titoli
jiġġenera ktajjen dinamiċi tal-kollateral li fihom l-istess
titolu jiġi misluf bosta drabi, spiss bl-involviment ta' atturi
mis-sistema bankarja parallela. Dan il-mekkaniżmu jista' jikkontribwixxi
għal żieda fl-ingranaġġ u jsaħħaħ in-natura
proċiklika tas-sistema finanzjarja, li mbagħad issir vulnerabbli
għal assalti bankarji u tnaqqis f'daqqa fl-ingranaġġ. Barra minn
hekk, in-nuqqas ta' trasparenza ta' dawn is-swieq jagħmilha diffiċli
biex jiġu identifikati d-drittijiet tal-proprjetà (min huwa s-sid ta'
xiex?), u biex tiġi ssorveljata l-konċentrazzjoni tar-riskju u biex
jiġu identifikati l-kontropartijiet (min hu espost għal min?).
Il-każijiet riċenti li fihom intermedjarji finanzjarji importanti
applikaw għall-falliment (pereżempju Lehman Brothers) huma simbolu
ta' dawn il-problemi. Xi kultant dawn huma aċċentwati mir-rabtiet
bejn l-istituzzjonijiet finanzjarji u l-istrateġiji tat-trasformazzjoni
tal-kollateral implimentati minn ċerti atturi finanzjarji. Għalhekk
l-inadempjenza ta' istituzzjoni finanzjarja kbira tista' wkoll tiddestabbilizza
s-swieq tat-titoli. Ħidma fil-fond twettqet sabiex jiġu
mifhuma aħjar dawn l-iżviluppi, u jittieħed tagħlim minnhom.
Sabiex issolvi dawn il-problemi, il-Kummissjoni qed tikkonsidra proposta
leġiżlattiva rigward il-liġi dwar it-titoli. 3.4. It-tisħiħ
tal-qafas bankarju prudenzjali sabiex jiġu llimitati l-kontaġju u
r-riskji ta' arbitraġġ Ir-riskji ppreżentati mis-sistema
bankarja parallela għall-banek irregolati jistgħu jiġu
indirizzati b'żewġ modi ewlenin: ·
L-issikkar tar-regoli prudenzjali applikati
għall-banek fl-operazzjonijiet tagħhom mal-entitajiet finanzjarji
mhux regolati sabiex jitnaqqsu r-riskji tal-kontaġju. Ir-Regolament tar-Rekwiżiti tal-Kaptial
(CRR)[34]
u d-Direttiva (CRD IV)[35],
li se japplikaw mill-1 ta' Jannar 2014, se jissikkaw ir-regoli tas-solvenza
applikati għall-banek, b'mod partikolari fir-rigward tar-rekwiżiti
tal-kapital għall-ishma f'entitajiet finanzjarji, inklużi entitatjiet
mhux regolati. Minbarra dan, din ir-riforma prudenzjali se
tagħmilha obbligatorja għall-banek li jkopru b'fondi proprji
addizzjonali r-riskju tal-kontropartijiet iġġenerat minn ċerti
tranżazzjonijiet tad-derivattivi barra l-borża ma' kontropartijiet
mis-sistema bankarja parallela. Din ir-riforma tipprovdi
għall-impożizzjoni ta' rekwiżit kapitali addizzjonali sabiex
ikopri t-telf potenzjali li jirriżulta minn bidliet fil-valur tas-suq ta'
dawn id-derivattivi jekk is-solvenza tal-kontroparti għal dawn
id-derivattivi tiddeterjora biss jekk il-kontroparti ma tkunx eskluża minn
din ir-regola (aġġustamenti tal-valur tal-kreditu jew CVA). Numru ta'
entitajiet tas-sistema bankarja parallela huma kontropartijiet importanti
f'dawn it-tranżazzjonijiet derivattivi. L-istituzzjonijiet bankarji
għalhekk għandhom ikunu inkoraġġiti li jikkonkludu anqas
tranżazzjonijiet ma' entitajiet mhux regolati. Barra minn hekk, din
il-leġiżlazzjoni tipprovdi għal regoli ġodda tal-likwidità[36] li għandhom jirriżultaw
f'żieda fil-maturità tal-obbligazzjonijiet finanzjarji tal-banek u
għandha tnaqqas ir-rikors għal finanzjament fuq medda qasira ta'
żmien, ħafna drabi mogħti minn entitajiet bħal fondi
tas-suq tal-flus. Madankollu, peress li dawn il-miżuri se
jaffettwaw il-kontropartijiet finanzjarji kollha tal-banek bl-istess mod, kemm
jekk dawn il-kontropartijiet huma rregolati kif ukoll jekk mhumiex, ġew
introdotti żewġ miżuri ġodda speċifiċi biex
jitnaqqsu r-riskji li s-sistema bankarja parallela toħloq għall-banek: –
Sa mill-2014, il-banek se jkunu meħtieġa
jirrappurtaw lis-superviżuri tagħhom l-iskoperturi prinċipali
tagħhom għal entitajiet mhux regolati kif ukoll skoperturi li
jirriżultaw minn ftehimiet ta' riakkwist u tranżazzjonijiet ta' self
ta' titoli; –
Sa tmiem l-2014 l-Awtorità Bankarja Ewropea
(ABE) hija mitluba tħejji linji gwida biex tillimita l-iskopertura
tal-banek għal kontropartijiet finanzjarji mhux regolati, filwaqt li
l-Kummissjoni Ewropea hija meħtieġa li tiddetermina, sa tmiem l-2015,
jekk huwiex xieraq li jiġu stabbiliti dawn il-limiti
fil-leġiżlazzjoni tal-UE wara li tqis ix-xogħol imwettaq kemm
fil-livell Ewropew kif ukoll fil-livell internazzjonali. ·
Kunsiderazzjoni ta' estensjoni possibbli tal-ambitu
tal-applikazzjoni tar-regoli prudenzjali sabiex jitnaqqas ir-riskju
tal-arbitraġġ Billi jiġi estiż l-ambitu
tagħha, ikun possibbli li jingħata rispons għat-tħassib
partikolarment espress fir-rapport ta' inizjattiva tal-Parlament li
jissuġġerixxi l-applikazzjoni ta' regoli prudenzjali għal entitajiet
li jwettqu attivitajiet simili għal dawk tal-banek mingħajr ma
għandha liċenzja bankarja. Mhuwiex possibbli li tiġi diskussa
s-sistema bankarja parallela mingħajr ma jiġi kkunsidrat l-ambitu ta'
applikazzjoni tar-regoli bankarji prudenzjali tal-UE. Skont
il-leġiżlazzjoni tal-UE,[37]
kull "intrapriża li n-negozju tagħha jkun li tirċievi
depożiti jew fondi ripagabbli oħra mill-pubbliku u li
tagħti kreditu mill-kont tagħha" hija meħtieġa li
tissodisfa r-rekwiżiti prudenzjali bankarji. Madankollu, il-kunċett ta'
"fondi ripagabbli mill-pubbliku", u anke l-kunċetti ta' kreditu
u depożiti jistgħu jiġu interpretati b'modi differenti, li
jfisser li l-istituzzjonijiet finanzjarji li jwettqu eżattament l-istess
attivitajiet jistgħu jiġu kwalifikati bħala istituzzjonijiet ta'
kreditu f'xi Stati Membri iżda mhux f'oħrajn. B'riżultat ta'
dan, dawn l-entitajiet jistgħu ma jkunux suġġetti
għall-istess regoli fl-Unjoni Ewropea. Evalwazzjoni preċiża tal-mod li bih
id-definizzjoni tal-istituzzjonijiet tal-kreditu hija applikata u l-mod li bih
l-istituzzjonijiet tal-kreditu huma identifikati fit-28 Stat Membru hija
għalhekk neċessarja. Jekk ir-riżultati ta' din il-valutazzjoni
juru problemi speċifiċi, il-Kummissjoni tista' tiċċara,
permezz ta' att iddelegat, id-definizzjoni ta' istituzzjoni ta' kreditu
għall-finijiet tar-regolamentazzjoni bankarja prudenzjali, fuq
il-bażi tal-Artikolu 456 tas-CRR. Id-dħul fis-seħħ tas-CRR - li
huwa regolament, għall-kuntrarju tas-sitwazzjoni preċedenti fejn
id-definizzjoni ta' istituzzjoni ta' kreditu kienet tinsab f'Direttiva -
ifisser li biss entitajiet finanzjarji li jwettqu kemm l-attivitajiet
tat-teħid tad-depożiti u tal-kreditu se jkunu kkwalifikati bħala
"istituzzjonijiet tal-kreditu" sa mill-2014. Sa issa, l-Istati Membri
tħallew jiddefinixxu istituzzjoni ta' kreditu b'mod aktar wiesa' meta
jittrasponu d-Direttiva 2006/48/KE. Pereżempju, f'xi Stati Membri,
fornituri ta' kreditu li ma jiħdux depożiti, bħal kumpaniji
finanzjarji, jistgħu jkunu kkwalifikati bħala istituzzjonijiet ta'
kreditu u għalhekk ikunu meħtieġa jissodisfaw ir-regoli bankarji
prudenzjali tal-UE. Xi Stati Membri jistgħu jieħdu
d-deċiżjoni li jkomplu japplikaw ir-rekwiżiti bankarji
prudenzjali jew ir-rekwiżiti prudenzjali aġġustati għal
dawk il-fornituri ta' kreditu. Oħrajn jistgħu jiddeċiedu li ma
japplikawx regoli speċifiċi. Dan jista' jirriżulta fi
trattamenti prudenzjali differenti madwar l-Istati Membri fir-rigward ta'
entitajiet li ma jissodisfawx ir-rekwiżiti tad-definizzjoni ta' istituzzjoni
ta' kreditu fis-CRR. L-inklużjoni f'din l-evalwazzjoni tal-entitajiet
finanzjarji kollha li jwettqu attivitajiet simili għal dawk imwettqa
mill-banek mingħajr ma jiġu kklassifikati bħala istituzzjonijiet
ta' kreditu se jgħin biex tiġi evalwata d-differenza fit-trattamenti
prudenzjali nazzjonali[38].
L-EBA se tkun mitluba tevalwa d-daqs ta' dawk
l-entitajiet finanzjarji li jaqgħu barra mill-kamp ta' applikazzjoni
tar-regolamentazzjoni prudenzjali bankarja Ewropea. Minħabba li dan
il-kompitu se jeħtieġ valutazzjoni orizzontali tas-settur
finanzjarju, l-ABE se tkun tista' wkoll tibbenefika mill-ħidma mwettqa
minn awtoritajiet superviżorji Ewropej oħrajn. Inizjattiva bħal din għandha wkoll
tagħmilha possibbli li jissaħħaħ il-qafas ta'
superviżjoni makroprudenzjali Ewropea li jagħmilha obbligatorja
għall-banek biex iżommu bafer kapitali kontroċikliku fuq talba
tal-awtoritajiet ta' superviżjoni meta jidhrilhom li l-volum tas-self ikun
eċċessiv. Strument ta' dan it-tip jista' jkun kompletament effettiv
biss jekk jikkunsidra l-entitajiet finanzjarji kollha li jagħtu kreditu u
mhux biss lill-istituzzjonijiet ta' kreditu. Il-Kummissjoni se tikkunsidra wkoll
rakkomandazzjonijiet li ġejjin tal-FSB dwar l-entitajiet oħra
tas-sistema bankarja parallela li attwalment mhumiex soġġetti
għal qafas ta' superviżjoni xieraq u ser tipproponi, jekk ikun
meħtieġ, miżuri leġiżlattivi biex tirrimedja għal
dan. 3.5. Superviżjoni
akbar għas-settur bankarju parallel Is-sistema bankarja parallela min-natura
tagħha għandha diversi aspetti u hija dinamika Hija tadatta
ruħha għall-bidliet kemm fis-swieq kif ukoll fir-regolamenti.
Il-Kummissjoni għalhekk titlob lill-awtoritajiet nazzjonali u Ewropej
sabiex iżommu viġilanza kostanti u jkunu mgħammra bl-għodod
tas-superviżjoni disponibbli għal din is-sistema. In-natura diffuża tas-sistema bankarja
parallela jagħmel it-twettiq ta' din is-superviżjoni aktar
diffiċli. Fir-rigward tal-kompetenzi li bħalissa huma attribwiti
għall-awtoritajiet superviżorji, ir-responsabbiltà għas-superviżjoni
għadha trid tiġi definita b'mod ċar jew hija nieqsa
mill-profondità. Fid-dawl ta' dan, huwa essenzjali li kemm l-awtoritajiet
nazzjonali kif ukoll dawk Ewropej jieħdu miżuri biex jiżguraw
l-istabbiliment ta' sistema ta' monitoraġġ xierqa u komprensiva. Fil-livell nazzjonali, kull Stat Membru
għandu jiżgura li r-riskji inerenti fis-sistema bankarja parallela
jiġu identifikati u mmonitorjati. Dan il-kompitu huwa spiss imwettaq
mill-korpi responsabbli mis-superviżjoni makroprudenzjali tas-settur
finanzjarju, jekk dawn ikunu jeżistu, b'kollaborazzjoni mal-banek
ċentrali u l-awtoritajiet superviżorji settorjali. Il-Kummissjoni se
tagħti attenzjoni mill-qrib għall-kwalità ta' dan
il-monitoraġġ u jekk hemmx kooperazzjoni mill-qrib bejn
l-awtoritajiet nazzjonali. Billi s-sistema bankarja parallela hija globali,
għandu jkun possibbli li titwettaq analiżi tar-riskju fuq bażi
transfruntiera. Fil-livell Ewropew, għaddejja
ħidma dwar l-evalwazzjoni, l-identifikazzjoni u l-monitoraġġ
tal-entitajiet u r-riskji ppreżentati mis-sistema bankarja parallela. Sar
xogħol preliminari fi ħdan l-ESRB u l-awtoritajiet superviżorji
Ewropej (EBA, EIOPA, ESMA). Dan ix-xogħol kollu għandu jiġi
intensifikat u kkoordinat, filwaqt li jiġi żgurat li kull sors ta'
riskju sistemiku jiġi nnutat mis-superviżuri. Huwa għandu jnaqqas
l-opportunitajiet ta' arbitraġġ bejn is-setturi finanzjarji u
possibilitajiet transfruntieri ta' ċirkumvenzjoni tar-regoli prudenzjali. Dan l-aspett, kif ukoll il-ħtieġa
possibbli li jiġi ċċarat ir-rwol istituzzjonali ta' kull
awtorità, se jiġi b'mod partikolari indirizzat fi ħdan il-qafas
tar-rieżami tas-Sistema Ewropea tas-Superviżuri Finanzjarji (SESF),
li għandu jitwettaq mill-Kummissjoni fl-2013. Din l-evalwazzjoni
għandha tikkunsidra, b'mod partikolari, l-eżistenza ta'
proċeduri effettivi biex tinġabar u tiġi skambjata
l-informazzjoni dwar is-sistema bankarja parallela. Id-diskussjoni se
tieħu wkoll f'kunsiderazzjoni l-iżviluppi assoċjati
mal-implimentazzjoni tal-mekkaniżmu superviżorju uniku. 3.6. Konklużjoni Is-settur bankarju parallel ma għandux
jitqies biss f'termini tar-riskji li jippreżenta; huwa wkoll essenzjali li
jiġi rikonoxxut ir-rwol importanti li dan għandu fi ħdan
is-settur finanzjarju. Huwa jikkostitwixxi kanal alternattiv ta' finanzjament
li huwa essenzjali għall-ekonomija reali, b'mod partikolari fi żmien
meta atturi tradizzjonali fis-sistema bankarja qegħdin inaqqsu
l-għajnuna finanzjarja. L-azzjonijiet deskritti f'din
il-Komunikazzjoni mhumiex eżawrjenti u l-Kummissjoni se tkompli tivvaluta
jekk miżuri supplimentari humiex meħtieġa biex tiżgura li
jiġi stabbilit qafas adattat għas-sistema bankarja parallela. Dan
l-approċċ dinamiku u li jħares 'il quddiem huwa
meħtieġ sabiex jingħata rispons għall-bidliet f'din
is-sistema, li qiegħda l-ħin kollu tadatta ruħha
għall-kuntest regolatorju. _________________________________ Miżuri ewlenin fil-qasam tas-sistema
bankarja parallela[39] || 2009-2012 || 2013 || 2014 u lil hinn Approċċ indirett permezz tar-regolamentazzjoni bankarja || · CRD 2 implimentat fl-2010 · CRD 3 implimentat fl-2011 · Emenda għall-IFRS 7 fl-2011 (inklużi ċerti riskji ta' titolizzazzjoni) || · Konsultazzjoni tal-UE dwar ir-riforma bankarja strutturali (segwitu tar-rapport Liikanen) || · Proposta COM dwar ir-riforma strutturali || · Implimentazzjoni tas-CRD 4 sal-01/01/2014 · Implimentazzjoni ta' emendi għall-IFRS 10, 11, 12 (rekwiżiti ta' konsolidament / divulgazzjoni) Inizjattivi speċifiċi fis-settur bankarju / is-Sistema Bankarja Parallela || || || · Tibda l-evalwazzjoni tal-EBA dwar il-kamp ta' applikazzjoni tar-regolamentazzjoni bankarja prudenzjali (rapport finali fl-2014) || · Ir-rapport tal-EBA dwar il-limiti fuq skoperturi għal kontropartijiet mhux regolati. Approċċ indirett/ Settur tal-assigurazzjoni || || · Rapporti tal-EIOPA għat-trilogu Omnibus II || · Jiġu konklużi t-trilogi Omnibus II || · Atti Delegati għal Solvenza II (inklużi rekwiżiti kapitali u rekwiżiti tal-immaniġġjar tar-riskju) Settur tal-immaniġġjar tal-assi || · Ħidma tal-IOSCO/FSB/ESRB dwar rakkomandazzjonijiet tal-politika għall-Fondi tas-Suq tal-Flus || · Implimentazzjoni tal-AIFMD (skadenza għat-traspożizzjoni tat-22/07) || · Proposta għal regolament tal-Fondi tas-Suq tal-Flus (04/09) || · Rieżami tal-UCITS inklużi t-tekniki tal-investiment u l-istrateġiji tal-fondi Qafas tat-trasferiment tar-riskju || · EMIR fis-seħħ sa mill-2012 || · Standards tekniċi adottati (Marzu); || · Standards tekniċi fuq kuntratti suġġett għal obbligazzjoni mandatorja ta' kklerjar jiġu adottati (Q2) u jiddaħħlu fis-seħħ (Q3) Tnaqqis tar-riskji assoċjati ma' tranżazzjonijiet ta' finanzjament tat-titoli || || · Xogħol tal-FSB dwar rakkomandazzjonijiet tal-politika relatati mat-tranżazzjonijiet ta' riakkwist u tas-self tat-titoli || · Proposta tal-Liġi tat-Titoli li tinkludi elementi dwar id-drittijiet tal-proprjetà u t-trasparenza. Tisħiħ tat-Trasparenza tas-Sistema Bankarja Parallela || || · Twaqqif tal-Kumitat tas-Sorveljanza Regolatorja tal-LEI · Implimentazzjoni tar-regolament tal-bejgħ bin-nieqes (żieda fit-trasparenza għas-CDS u projbizzjoni tas-CDS sovrani skoperti) · Rieżami tal-MIFID / żieda fl-ambitu tat-trasparenza || · Dħul fis-seħħ tar-rekwiżiti tar-rappurtar għat-tranżazzjonijiet tad-derivattivi għal riakkwist tan-negozju (EMIR) (Q1) · Qafas ta' monitoraġġ irid jiġi żviluppat mill-awtoritajiet (pereżempju l-grupp ta' ħidma tal-ESRB), · Proposti għal-liġi tat-titoli /Azzjonijiet speċifiċi għal tranżazzjonijiet tal-finanzjament tat-titoli (pereżempju inizjattiva tal-BĊE dwar riakkwist tan-negozju) · Fażi ta' implimentazzjoni tal-identifikatur legali (LEI) Qafas ta' Superviżjoni tal-UE || || · Rieżami tal-EFSF mill-Kummissjoni || · Ara jekk humiex meħtieġa azzjonijiet ulterjuri għal superviżjoni msaħħa tas-sistema bankarja parallela fl-UE Aġenziji tal-klassifikazzjoni || · CRA 1 fis-seħħ fl-2009 · CRA 2 fis-seħħ fl-2011 || · CRA 3 fis-seħħ sa mill-20 ta' Ġunju 2013 (tindirizza partikolarment kunflitti ta' interess, dipendenza żejda fuq il-klassifikazzjonijiet) || Għodod ta' riżoluzzjoni għall-entitajiet li mhumiex banek || · Konsultazzjoni pubblika COM dwar ir-riżoluzzjoni tal-entitajiet li mhumiex banek || · Evalwazzjoni interna / ħidma fuq livell internazzjonali (FSB dwar ir-riżoluzzjoni u CPSS-IOSCO dwar l-irkupru tal-FMIs) || · Inizjattiva COM (proposta leġiżlattiva dwar l-irkupru u r-riżoluzzjoni tas-CCPs u Komunikazzjoni dwar l-orjentament ta' politika fir-rigward tal-istituzzjonijiet l-oħra mhux finanzjarji) [1] Ara http://ec.europa.eu/internal_market/bank/docs/shadow/green-paper_en.pdf [2] Ara l-Komunikat tal-G20 wara s-Summit ta' Cannes,
Novembru 2011. [3] Ara l-Komunikat tal-G20 wara s-Summit ta' Londra, 2 ta'
April 2009. [4] L-azzjonijiet kollha proposti mill-Kummissjoni f'dan
id-dokument huma konsistenti u kompatibbli mal-qafas finanzjarju pluriennali
attwali (2007-2013) kif ukoll mal-proposta għall-perjodu li jmiss
(2014-2020). [5] Id-Direttiva 2011/61/UE tal-Parlament Ewropew u
tal-Kunsill dwar Maniġers ta’ Fondi ta’ Investiment Alternattivi (AIFMD) (ĠU L 174 1.7.2011 p.1). [6] Pereżempju, id-dispożizzjonijiet relatati ma’
skoperturi ta’ titolizzazzjoni fir-Rekwiżiti Kapitali riveduti kif
inklużi fir-Regolament (UE) 575/2013 u d-Direttiva 2013/36/UE. [7] Ara r-rapport tal-FSB "Shadow Banking System,
Scoping the Issues" tat-12 ta' April 2011. Ħames gruppi ta'
ħidma ġew stabbiliti biex jaħdmu fuq i) l-interazzjonijiet bejn
is-sistema bankarja parallela u l-banek, ii) it-tnaqqis tar-riskji
assoċjati ma' fondi tas-suq tal-flus, iii) ir-riskji ppreżentati minn
entitajiet "oħrajn" tas-sistema bankarja parallela, iv),
il-qafas tal-inċentivi u t-trasparenza tat-tranżazzjonijiet ta'
titolizzazzjoni u v) ir-riskji li jirriżultaw minn tranżazzjonijiet
ta' finanzjament ta' titoli. [8] Dawn jistgħu jinkludu entitajiet ad hoc
bħall-istrumenti jew conduits ta' titolizzazzjoni, fondi tas-suq tal-flus,
fondi ta' investiment li jipprovdu kreditu jew għandhom
ingranaġġ, bħal ċerti fondi ħeġġ jew fondi
ta' ekwità privata u entitajiet finanzjarji li jipprovdu kreditu jew garanziji
ta' kreditu, li mhumiex regolati bħall-banek jew ċerti impriżi
tal-assigurazzjoni jew tar-riassigurazzjoni li joħorġu jew
jiggarantixxu prodotti ta' kreditu. [9] See http://www.financialstabilityboard.org/publications/r_121128.pdf [10] Iċ-ċifri huma murija f'USD fl-istudju tal-FSB.
Dan jagħti total ta' USD 67 000 biljun, li USD 23 000 biljun
minnhom huma fl-Istati Uniti, USD 22 000 biljun huma fiż-żona
tal-euro u USD 9 000 biljun huma fir-Renju Unit. [11] Sabiex ikun possibbli t-tqabbil internazzjonali, qed
tintuża d-dejta tal-FSB. Saru studji wkoll mill-Kummissjoni, il-Bank
Ċentrali Ewropew, l-ESMA u l-ESRB. Dawn l-istudji jadottaw
metodoloġiji, definizzjonijiet u sorsi ta' dejta differenti li
jistgħu jwasslu għal differenzi sostanzjali fl-istimi. [12] Ara
http://ec.europa.eu/internal_market/consultations/docs/2012/shadow/replies-summary_en.pdf. [13] Ara http://www.europarl.europa.eu/oeil/popups/ficheprocedure.do?lang=en&reference=2012/2115(INI) [14] Id-Direttiva 2009/111/KE tal-Parlament Ewropew u
tal-Kunsill tas-16 ta' Settembru 2009 li temenda d-Direttivi 2006/48/KE u
2006/49/KE u 2007/64/KE dwar banek affiljati ma’ istituzzjonijiet
ċentrali, ċerti elementi ta’ fondi proprji, espożizzjonijiet
kbar, arranġamenti superviżorji, u l-ġestjoni tal-kriżijiet
(ĠU L 302 17.11.2009 p.97) [15] Id-Direttiva 2010/76/KE tal-Parlament Ewropew u
tal-Kunsill tas-24 ta' Novembru 2010 li temenda d-Direttivi
2006/48/KE u 2006/49/KE dwar ir-rekwiżiti kapitali għall-kotba
tal-kummerċ u għar-rititolizzazzjonijiet, u r-reviżjoni
superviżorja tal-politika dwar ir-rimunerazzjoni (ĠU L 302 14,12.2010
p.3) [16] Il-Kummissjoni qiegħda wkoll issegwi x-xogħol li
sar mill-Kumitat ta' Bażilea dwar dan is-suġġett u l-emendi
proposti tiegħu għall-arranġamenti attwali. [17] Ara http://ec.europa.eu/internal_market/insurance/solvency/
[18] Is-servizzi tal-Kummissjoni għandhom iqisu b'mod
partikolari l-prinċipji tal-Forum Konġunt li se jiġu
ffinalizzati sa tmiem l-2013. http://www.bis.org/press/p130211.htm. [19] Id-Direttiva 2011/61/UE tal-Parlament
Ewropew u tal-Kunsill dwar Maniġers ta’ Fondi ta’ Investiment Alternattivi
(AIFMD) (ĠU L 174 1.7.2011 p.1). [20] Sa tmiem it-tielet kwart tal-2012, l-assi totali
mmaniġġjati minn dawn il-fondi alternattivi kienet tammonta għal
madwar 2 500 biljun (sors: EFAMA). [21] Ir-Regolament (UE) Nru 648/2012 tal-Parlament
Ewropew u tal-Kunsill tal-4 ta' Lulju 2012 dwar derivati OTC, kontropartijiet
ċentrali u repożitorji tad-data dwar it-tranżazzjonijiet (ĠU L 201 27.7.2012 p. 1) [22] Ir-Regolament (UE) Nru 236/2012 tal-Parlament Ewropew u
tal-Kunsill tal-14 ta' Marzu 2012 dwar bejgħ
bin-nieqes u ċerti aspetti tas-swaps ta’ inadempjenza tal-kreditu (ĠU
L 86 24.3.2012 p. 1) [23] Ara
http://www.iosco.org/library/pubdocs/pdf/IOSCOPD394.pdf. [24] Ara, pereżempju, l-inizjattivi meħuda
mill-Eurosistema u mill-Bank of England. [25] Iż-żewġ eżempji ta' dan huma
t-Tikketta tal-PCS (Prime Collateralised Securities - Titoli Kolateralizzati
Primi) għas-suq tat-titoli sostnuti minn assi u t-Tikketta tal-Kunsill
Ewropew tal-Bonds Koperti (ECBC - European Covered Bond Council) għas-suq
tal-bonds koperti. [26] Ara http://ec.europa.eu/internal_market/rating-agencies/index_en.htm
b'referenza għar-Regolament (EU) l-aktar riċenti Nru
462/2013 tal-Parlament Ewropew u tal-Kunsill tal-21 ta' Mejju 2013 li jemenda
r-Regolament (KE) Nru 1060/2009 dwar aġenziji li jiggradaw il-kreditu Test
b'relevanza għaż-ŻEE (ĠU L 146, 31.5.2013, p. 1–33) u d-Direttiva 2003/14/KE tal-Parlament
Ewropew u tal-Kunsill tal-21 ta' Mejju 2013 li temenda d-Direttiva 2013/41/KE
dwar l-attivitajiet u s-superviżjoni ta’ istituzzjonijiet
għall-provvista ta’ rtirar okkupazzjonali, id-Direttiva 2009/65/KE dwar
il-koordinazzjoni ta’ liġijiet, regolamenti u dispożizzjonijiet
amministrattivi fir-rigward tal-impriżi ta’ investiment kollettiv f’titoli
trasferibbli (UCITS) u d-Direttiva 2011/61/UE dwar Maniġers ta’ Fondi ta’
Investiment Alternattivi fir-rigward tad-dipendenza żejda fuq
il-gradazzjonijiet tal-kreditu (ĠU L 145, 31.5.2013, p. 1–3) [27] Ara http://ec.europa.eu/internal_market/securities/isd/mifid_en.htm
[28] Ara http://www.ecb.europa.eu/pub/pdf/mobu/mb201302en.pdf#page=90 [29] http://www.esrb.europa.eu/pub/pdf/occasional/20130318_occasional_paper.pdf?e85401cf104ef718cfe83797b55c87f6 [30] http://ec.europa.eu/internal_market/consultations/2012/ucits_en.htm. [31] Ara http://www.europarl.europa.eu/oeil/popups/ficheprocedure.do?lang=en&reference=2012/2115(INI) [32] http://www.esrb.europa.eu/pub/pdf/recommendations/2012/ESRB_2011_1.en.pdf?5c66771e20fc39810648296a2c6102d9 [33] L-approċċ se jkun usa' mill-kategorija tal-fondi
nnegozjati fuq borża (ETF), [34] Ir-Regolament (UE) Nru 575/2013 tal-Parlament Ewropew u
tal-Kunsill tas-26 ta' Ġunju 2013 dwar ir-rekwiżiti prudenzjali
għall-istituzzjonijiet ta' kreditu u d-ditti tal-investiment u li jemenda
r-Regolament (UE) Nru 648/2012 (ĠU L 176 27.6.2013 p.1) [35] Id-Direttiva 2013/36/UE tal-Parlament Ewropew u
tal-Kunsill tas-26 ta' Ġunju 2013 dwar l-aċċess
għall-attività tal-istituzzjonijiet ta' kreditu u s-superviżjoni
prudenzjali tal-istituzzjonijiet ta’ kreditu u tad-ditti tal-investiment, li
temenda d-Direttiva 2002/87/KE u li tħassar id-Direttivi 2006/48/KE u
2006/49/KE (ĠU L 176 27.6.2013 p.338) [36] Dawn ir-regoli l-ġodda se jiġu ffinalizzati meta
l-istudji tal-impatt ikunu tlestew. [37] L-Artikolu 4(1) tad-Direttiva 2006/48/KE tal-Parlament
Ewropew u tal-Kunsill tal-14 ta' Ġunju 2006 rigward il-bidu u
l-eżerċizzju tan-negozju tal-istituzzjonijiet ta’ kreditu (tfassil
mill-ġdid) (ĠU L 177 30.6.2006 p.1) u l-punt (1) tal-Artikolu 4(1)
tar-Regolament (UE) Nru 575/2013 tal-Parlament Ewropew u tal-Kunsill tas-26 ta'
Ġunju 2013 dwar ir-rekwiżiti prudenzjali għall-istituzzjonijiet
ta' kreditu u d-ditti tal-investiment u li jemenda r-Regolament (UE) 648/2012
(ĠU L 176 27.6.2013 p.1). [38] Pereżempju, dan huwa l-każ għall-kreditu
tal-konsumatur, l-attivitajiet ta' fatturament u anke ta' kiri li jitwettqu
mingħajr liċenzja bankarja f'ċerti Stati Membri. [39] Id-dati kollha huma indikattivi.