DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT Li jakkumpanja d-dokument Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Sħubija Rinfurzata taż-Żona Ewropea tar-Riċerka għall-Eċċellenza u għat-Tkabbir (Test b’rilevanza għaż-ŻEE) /* SWD/2012/0211 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAL-VALUTAZZJONI
TAL-IMPATT Li jakkumpanja d-dokument Komunikazzjoni mill-Kummissjoni
lill-Parlament Ewropew, lill-Kunsill, lill-Kumitat Ekonomiku u Soċjali
Ewropew u lill-Kumitat tar-Reġjuni Sħubija Rinfurzata
taż-Żona Ewropea tar-Riċerka għall-Eċċellenza u
għat-Tkabbir
(Test b’rilevanza għaż-ŻEE) 1. Introduzzjoni Iż-Żona Ewropea tar-Riċerka
(ŻER) hija żona unfikata fil-qasam tar-riċerka miftuħa
għad-dinja bbażata fuq is-Suq Intern, li fiha r-riċerkaturi,
l-għarfien xjentifiku u t-teknoloġija jiċċirkolaw
liberament u li permezz tagħha l-Unjoni u l-Istati Membri tagħha
għandhom isaħħu s-sisien xjentifiċi u teknoloġiċi
tagħhom kif ukoll il-kompetittività u l-kapaċità tagħhom biex
kollettivament jindirizzaw sfidi kbar. Imnedija
f'Marzu 2000, iż-ŻER saret waħda mill-għanijiet
ewlenin tal-Unjoni mid-dħul fis-seħħ tat-Trattat ta' Lisbona[1]. Qafas taż-ŻER u
miżuri ta’ appoġġ kienu mħabbra fl-Inizjattiva
Ewlenija Unjoni tal-Innovazzjoni[2]
tal-2010 tal-Istrateġija Ewropa 2020[3].
F’żewġ (2) okkażjonijiet (fi Frar 2011 u f'Marzu 2012)
il-Kunsill Ewropew talab biex iż-ŻER titlesta sal-2014. F’kuntest ta’ kriżi ekonomika, hemm
ħtieġa urġenti ta’ riċerka u soluzzjonijiet ibbażati
fuq ir-riċerka u l-promozzjoni ta' eċċellenza xjentifika
fir-reġjuni u fil-pajjiżi b’appoġġ għat-tkabbir
ekonomiku. It-tlestija taż-ŻER se tgħin biex jingħelbu
l-effetti negattivi fuq l-effettività tar-riċerka tal-Ewropa fir-rigward
tal-frammentazzjoni fid-disinn u fl-implimentazzjoni ta' politiki u
attivitajiet ta’ riċerka. 2. Definizzjoni tal-problema 2.1. L-ostakli prinċipali li
jfixklu l-prestazzjoni tar-riċerka fiż-ŻER L-UE għadha attur ewlieni fix-xenarju
internazzjonali tar-riċerka u l-iżvilupp (R&Ż); iżda
qed taffaċċja sensiela ta’ sfidi kruċjali bħal
pereżempju l-kriżi finanzjarja, it-tkabbir ekonomiku baxx, u
t-tixjiħ tal-popolazzjoni, li jirrikjedu rispons urġenti. L-inizjattiva ewlenija tal-UE Unjoni
tal-Innovazzjoni, li tippromwovi t-tkabbir u l-impjiegi - tistabbilixxi
aġenda komprensiva biex ikun żgurat li l-ideat innovattivi
jistgħu jiġu ttrasformati f’prodotti u servizzi, bir-riċerka
bħala komponent ewlieni. Fil-fatt, l-Ewropa tinvesti ftit wisq
fir-riċerka, meta wieħed iqabbel mal-kompetituri ewlenin (1,9 %
tal-PDG fl-Ewropa fl-2008 kontra 2,5 % tal-PDG fl-Istati Uniti).
Il-produzzjoni tal-għarfien hija kkonċentrata f’għadd
relattivament żgħir ta’ Stati Membri. Ir-riċerka Ewropea ma
tindirizzax biżżejjed l-oqsma tal-ogħla żvilupp (eż.
it-teknoloġiji tal-informazzjoni u tal-komunikazzjoni,
in-nanoteknoloġija, il-bijoteknoloġija, l-bijoloġija molekulari,
il-ġenetika) li jistgħu jiġġeneraw kisbiet
teknoloġiċi. Dan ma jrawwimx l-innovazzjoni, li hija essenzjali biex
jittejbu l-kompetittività u l-attrazzjoni tal-ekonomija Ewropea. Ir-riċerka fl-Ewropa hija strutturata
b’mod varjabbli u frammentat ħafna. Iż-Żona Ewropea
tar-Riċerka (ŻER) tfittex li tegħleb il-frammentazzjoni u li
toħloq l-aħjar kundizzjonijiet sabiex titwettaq ir-riċerka
fl-Ewropa. Mill-2000, l-Unjoni Ewropea u l-Istati Membri flimkien għamlu
progress biex iż-ŻER issir realtà, iżda għad fadal bosta
ostakli. Il-kompetizzjoni insuffiċjenti
tas-sistemi nazzjonali tar-riċerka: Il-kompetizzjoni
limitata fost l-istituzzjonijiet u l-universitajiet tar-riċerka twassal
għal speċjalizzazzjoni insuffiċjenti. Dan ma joħloqx
il-kondizzjonijiet tajbin għat-titjib fil-kwalità xjentifika. Is-sehem
tal-fondi pubbliċi allokati permezz ta’ sejħiet miftuħa
għal proposti ta’ riċerka jvarja bejn 20 % u 80 %, b’medja
ta’40 %. L-evalwazzjoni tar-riċerkaturi u tal-proposti ta’
riċerka mhix ibbażata fuq standards komparabbli fil-pajjiżi. L-ostakli għall-kooperazzjoni u
l-kompetizzjoni pan-Ewropej jibqgħu: L-ostakli
jiżviluppaw minħabba l-livell baxx ta’ kompatibbiltà u ta’
interoperabbiltà tal-programmi nazzjonali ta’ riċerka. Ma hemmx
biżżejjed flessibbiltà biex il-programmi nazzjonali jkunu
jistgħu jikkooperaw bejn il-fruntieri u li tipprovdi aċċess
għall-infrastrutturi tar-riċerka nazzjonali kbar ta’ interess Ewropew
kif ukoll għall-infrastrutturi tar-riċerka pan-Ewropej. Dan ifisser
li l-Ewropa mhix qed tieħu l-opportunitajiet biex ittejjeb il-kwalità u
l-impatt tar-riċerka tagħha. Distorsjonijiet persistenti fis-swieq
nazzjonali tax-xogħol għar-riċerkaturi: L-ostakli prinċipalment huma kkawżati minn approċċi
differenti ta’ reklutaġġ ibbażat fuq il-mertu, mill-awtonomija
istituzzjonali, min-nuqqas ta’ użu tal-aħjar prassi fit-tfassil
tal-istrateġiji tar-riżorsi umani għar-riċerkaturi u
fil-promozzjoni tal-mobbiltà tar-riċerkaturi, kif ukoll minn
kondizzjonijiet tax-xogħol mhux attraenti għar-riċerkaturi
żgħażagħ u għal dawk barranin. Kondizzjonijiet
differenti japplikaw ukoll għal-portabbiltà ta', u l-aċċess
għal, għotjiet. Dan iwassal għal mobbiltà mnaqqsa u għal
inqas opportunitajiet tal-karriera għar-riċerkaturi. Progress limitat fir-rigward tal-ugwaljanza
bejn is-sessi u tad-dimensjoni tas-sessi fil-kontenut tar-riċerka: Mhux l-Istati Membri kollha jimplimentaw politiki nazzjonali li
jibbenefikaw mit-talent tan-nisa xjenzjati u mill-inklużjoni
tad-dimensjoni tas-sessi fil-kontenut tar-riċerka; bl-istess mod mhux
l-organizzazzjonijiet kollha tal-partijiet interessati jimplimentaw pjanijiet
ta' azzjoni tad-dimensjoni tas-sessi biex tinkiseb l-ugwaljanza bejn is-sessi.
Dan idgħajjef il-kwalità u r-rilevanza tar-riċerka Ewropea billi ma
jagħmilx użu sħiħ ta’ potenzjal varjat tar-riżorsi
umani xjentifiċi, li jwassal bħala riżultat għal effetti
soċjali u ekonomiċi negattivi. Ċirkolazzjoni ristretta ta’ u
aċċess irregolari għall-għarfien xjentifiku: L-Istati Membri mhumiex kollha avvanzati b’mod ugwali
fl-appoġġ tagħhom għal politiki ta’ aċċess
miftuħ li jistgħu jgħinu sabiex jitnaqqsu l-asimmetriji ta’
informazzjoni. Għadd ta’ ostakli jxekklu lir-riċerkaturi milli
jkollhom aċċess kontinwu għal servizzi elettroniċi
tar-riċerka, inklużi l-politiki nazzjonali differenti dwar
l-‘użu’ tal-infrastruttura elettronika tar-riċerka ffinanzjata minn
fondi pubbliċi. It-trasferiment tal-għarfien bejn l-istituzzjonijiet
tar-riċerka pubbliċi u s-settur privat għadu insuffiċjenti
meta mqabbel mal-Istati Uniti. Dan jaffettwa l-kwalità xjentifika kif
ukoll l-eżiti ekonomiċi li jirriżultaw mir-riċerka u
l-iżvilupp kemm fis-settur pubbliku kif ukoll dak privat. 2.2. Id-dritt tal-UE li
taġixxi, is-sussidjarjetà u l-valur miżjud tal-UE It-Trattat jiddikjara li l-politika
tar-riċerka hija kompetenza kondiviża bejn l-Istati Membri u
l-Unjoni. L-Artikolu 179 tat-Trattat dwar il-Funzjonament tal-Unjoni
Ewropea (TFUE) jistipula d-dritt tal-Unjoni li toħloq il-kondizzjonijiet
meħtieġa għall-istabbiliment taż-Żona Ewropea
tar-Riċerka. L-Artikolu 182(5) tat-TFUE jistipula l-użu
tal-proċedura leġiżlattiva għall-istabbiliment
tal-miżuri meħtieġa għall-implimentazzjoni
taż-Żona Ewropea tar-Riċerka (ŻER). It-tlestija
taż-ŻER ma tippreġudikax is-sovranità tal-Istati Membri.
Fiż-ŻER, is-sistemi nazzjonali tar-riċerka ma jitwarrbux
iżda jaħdmu flimkien b’mod miftuħ. L-għażliet
tal-politika elenkati jirrispettaw il-prinċipju tas-sussidjarjetà safejn
l-Unjoni hija fl-aħjar pożizzjoni biex tidentifika l-oqsma ta’
azzjonijiet għall-Istati Membri, minħabba x-xkiel persistenti u
l-progress limitat osservati 12-il sena wara t-tnedija taż-ŻER.
Il-valur miżjud Ewropew joħroġ ċar permezz ta’ bosta raġunijiet.
L-ewwel punt, l-allokazzjoni ottima tal-attivitajiet – fejn tkun
meħtieġa – se tintlaħaq permezz ta’ approċċ koordinat,
billi jtejjeb l-effikaċja tas-sistemi tar-riċerka u jnaqqas
id-duplikazzjoni żejda tal-isforzi. It-tieni, mill-implimentazzjoni taż-ŻER
mistennija li jinkisbu kondizzjonijiet ugwali u massa kritika, u b'hekk dawn
jippermettu l-ħolqien tal-kundizzjonijiet għall-aktar timijiet
tar-riċerka produttivi biex jaħdmu flimkien u biex ikunu kompetittivi
internazzjonalment. It-tielet, minħabba l-persistenza tal-ostakli
nazzjonali msemmija hawn fuq, l-impetu Ewropew jimmassimizza l-possibbiltà li
ż-ŻER titlesta f’qasir żmien. Ir-raba’, il-livell tal-Unjoni
Ewropea huwa l-aħjar mezz għall-valutazzjoni oġġettiva dwar
jekk inkisibx progress, u jekk dan huwiex proporzjonat; u jekk hemmx il-ħtieġa
għal aktar azzjoni sabiex tittejjeb is-sitwazzjoni. 3. Għanijiet tal-Politika L-għan ewlieni ta’ politika
fiż-Żona Ewropea tar-Riċerka hija li jiżdiedu
l-prestazzjoni, l-eċċellenza u l-impatt fis-sistema tar-riċerka
u l-iżvilupp tal-Ewropa; Dan se jgħin lill-UE terġa taqbad
it-triq lejn it-tkabbir ekonomiku billi trawwem l-eċċellenza u
r-riċerka fil-qasam xjentifiku, tappoġġja l-innovazzjoni u
żżid l-attrazzjoni tal-UE bħala post tar-riċerka. L-għan tal-Komunikazzjoni huwa
l-identifikazzjoni u l-promozzjoni ta’ azzjonijiet li jiżguraw li sal-2014
l-kondizzjonijet xierqa jkunu fis-seħħ sabiex tittejjeb
l-effikaċja ta' sistemi tar-riċerka Ewropej. Dawn il-kondizzjonijiet se jippermettu: 1.
żieda fl-effikaċja tas-sistemi nazzjonali; 2.
livell ottimu ta’ kooperazzjoni u kompetizzjoni transnazzjonali; 3. suq tax-xogħol aktar miftuħ
għar-riċerkaturi; 4. ugwaljanza bejn
is-sessi u l-integrazzjoni tas-sessi fir-riċerka;
u 5. ċirkolazzjoni u trasferiment ottimi tal-għarfien
xjentifiku, inkluż permezz ta’ ŻER diġitali. 4. Għażliet ta’ Politika L-għażla ta’ politika nru 1:
Żamma tal-istatus quo (Business As Usual): Din
l-għażla tkun tinvolvi l-issoktar tal-politiki attwali, bla ebda
sforzi addizzjonali nazzjonali u Ewropej biex l-ostakli jitneħħew.
L-iżvilupp ewlieni jkun l-adozzjoni u l-implimentazzjoni fl-2014
tal-Orizzont 2020, possibbilment b'baġit akbar biex
jappoġġja attivitajiet ta’ riċerka u ta’ innovazzjoni bejn il-fruntieri. L-għażla ta’ politika nru 2:
Sħubija rinfurzata għaż-ŻER: L-Istati
Membri jkunu mistiedna jwettqu riformi strutturali volontarji.
Organizzazzjonijiet tal-partijiet interessati fir-riċerka jimpenjaw
ruħhom ukoll biex jieħdu miżuri li jimplimentaw iż-ŻER.
Il-Kummissjoni tkun tipproponi tipi differenti ta’ miżuri (bħal
Rakkomandazzjonijiet) sabiex titlesta ż-ŻER u takkumpanja
lill-imsieħba fl-ilħuq tal-għanijiet. Il-Kummissjoni tivvaluta
l-progress kull sena, u tidentifika l-oqsma fejn ikunu meħtieġa aktar
tibdiliet. L-għażla ta’ politika nru 3:
Miżuri legali settorjali għaż-ŻER: Din l-għażla ta’ politika tkun jinkludi għadd ta’
miżuri legali vinkolanti proposti mill-Kummissjoni f’bosta oqsma
(jiġifieri setturi speċifiċi skont is-suġġett) kif
meħtieġ. Barra minn hekk, l-azzjoni volontarja mill-Istati Membri
tkun tikkomplementa l-miżuri legali, u tindirizza dawk is-setturi fejn
l-Istati Membri u l-partijiet interessati jinsabu fl-aħjar pożizzjoni
biex jindirizzaw l-ostakli prinċipali. L-għażla ta’ politika nru 4:
Direttiva Qafas taż-ŻER: Din
l-għażla ta’ politika tkun tikkonsisti minn approċċ legali
ġenerali fil-forma ta’ pakkett komprensiv (Direttiva Qafas) li jkun fih
miżuri legalment vinkolanti, fejn l-Istati Membri jagħżlu
l-mezzi xierqa sabiex jiksbu r-riżultati meħtieġa mid-Direttiva. 5. Analiżi tal-impatti u t-tqabbil
tal-għażliet ta’ politika L-għażliet ta’ politika jipproponu
mekkaniżmi differenti sabiex jitneħħew l-ostakli u jkunu
promossi sistemi aktar effettivi tar-riċerka. Dawn l-għażliet
mistennija li jiksbu impatti simili (eż. impatti ekonomiċi,
soċjali u ambjentali, eċċellenza u prestazzjoni
fir-riċerka) ladarba ż-ŻER titlesta. Għalhekk,
id-differenzi prinċipali li hemm bejn l-għażliet f’termini
tal-impatti huma relatati mal-iskedar tat-twassil tar-riżultati
mistennija, mal-ispejjeż tal-implimentazzjoni relatati u mal-livell ta'
approvazzjoni mill-Istati Membri u mill-partijiet interessati. Kaxxa 1: L-impatti kumplessivi
tat-tneħħija tal-ostakli biex iż-ŻER titlesta L-impatt
ekonomiku: Is-setturi pubbliċi u privati
fl-Istati Membri kollha se jibbenefikaw miż-żieda fl-effettività li
tirriżulta minn: aktar finanzjament allokat lil riċerkaturi
bl-aħjar prestazzjoni; aktar kooperazzjoni fost l-Istati Membri; soluzzjonijiet
aħjar għall-isfidi tas-soċjetà; kwalità u rilevanza
tar-riċerka mtejba permezz ta’ kunsiderazzjoni aħjar tad-dimensjoni
tas-sessi matul il-proċess ta’ riċerka; użu aħjar
tar-riċerkaturi mħarrġa disponibbli, partikolarment in-nisa; u
aċċess imtejjeb għall-għarfien mis-setturi pubbliċi u
privati kullimkien, b'mod partikolari f'reġjuni anqas avvanzati. Jekk
it-tlestija taż-ŻER tkun tfisser riallokazzjoni ta’ fondi nazzjonali
lil riċerka koordinata fil-livell tranżnazzjonali, dan jista’ jkun
ta’ benefiċċju għall-ekonomija tal-UE (0,25 % ta’ tkabbir
addizzjonali tal-PDG) u għas-suq tax-xogħol (323 000 impjieg
addizzjonali) fl-2030. Madankollu, l-ispejjeż se jinġarru
mill-amministrazzjonijiet tal-Istati Membri u min-negozji, skont it-tip ta'
ostakli li għandhom jitneħħew. Iż-ŻER
se twassal għal enfasi ikbar fuq is-sostenibbiltà finanzjarja tal-oqsma
xjentifikament b’saħħithom, kif ukoll għal domanda koordinata
għall-provvista ta’ servizzi interoperabbli u effettivi tar-riċerka
diġitali, li għandha ssaħħaħ is-settur tal-ICT u
l-innovazzjoni fl-ICT fl-UE. L-aċċess miftuħ għandu
jirriżulta f’benefiċċji sinifikanti għal ħafna
parteċipanti u f’iffrankar potenzjali għal ħafna
istituzzjonijiet. L-impatti
soċjali: impatti pożittivi, kemm diretti kif
ukoll indiretti, ikunu mistennija bis-saħħa ta’ persunal aktar
professjonali li jwettqu riċerka b’mod aktar effettiv u minħabba
kooperazzjoni mtejba fir-riċerka u l-iżvilupp. Miżuri favur
ŻER diġitali għandhom ikunu ta’ benefiċċju
għar-riċerkaturi minn Stati Membri u reġjuni iżgħar u
anqas avvanzati. Iż-ŻER jkollha wkoll impatt pożittiv fuq
id-drittijiet fundamentali, b’mod partikolari fir-rigward tar-rispett
għall-ugwaljanza bejn is-sessi, għal-libertà tal-espressjoni, u
għal-libertà tal-arti u tax-xjenzi. L-impatti
ambjentali: il-kwistjonijiet ambjentali jkunu
indirizzati b’mod konġunt u r-riċerka tkun ikkoordinata aħjar.
Dan għandu jevita d-duplikazzjoni żejda u b’hekk jiżdiedu
l-effiċjenzi. 5.1. L-evalwazzjoni
tal-għażliet L-għażla ta’ politika nru 1: L-ostakli eżistenti jissoktaw, u b’hekk ixekklu l-kisba ta'
effiċjenza akbar fis-sistemi nazzjonali. Għandu jkun hemm
benefiċċji bir-riżultat tal-implimentazzjoni ta’
Orizzont 2020. Din l-għażla ma tkunx qed twieġeb
għas-sejħa tal-Kunsill Ewropew u għall-aspirazzjonijiet
tal-partijiet interessati, li ż-ŻER titlesta. L-għażla ta’ politika nru 2: Progress sostanzjali iżda possibbilment irregolari jkun mistenni
sal-2014. L-Istati Membri jneħħu l-ostakli f’oqsma fejn l-azzjoni
hija meħtieġa l-aktar, b’piż amministrattiv baxx. Dawn
għandhom jimmobilizzaw lill-partijiet interessati —
l-organiżżazzjonijiet li jiffinanzjaw ir-riċerka u li jwettqu
r-riċerka — u jikkontribwixxu għat-tlestija taż-ŻER. F'dan
l-istadju jkun hemm kunsens, partikolarment fost l-Istati Membri, biex jiġu
implimentati miżuri volontarji għat-tlestija taż-ŻER. Din
l-għażla għandha tissodisfa l-aspettativi tal-Istati Membri. L-għażla ta’
politika nru 3: Din l-għażla
għandha tinvolvi progress bil-mod u irregolari lejn it-tlestija
taż-ŻER sal-2014, iżda progress sostanzjali fit-tul f’oqsma fejn
(u meta) jiġu adottati l-miżuri leġiżlattivi. Dan
għandu jirriżulta f’postponiment fl-implimentazzjoni mill-anqas
sal-2017, u jqiegħed piż kbir fuq l-amministrazzjonijiet nazzjonali u
fuq il-Kummissjoni. Il-biċċa l-kbira tal-Istati Membri ma wrewx
appoġġ qawwi għal leġiżlazzjoni f'dan il-qasam, li
jagħmilha diffiċli ħafna biex din l-għażla
tittieħed permezz tal-Kunsill. L-għażla ta’
politika nru 4: Din l-għażla
għandha twassal għall-aħjar riżultati iżda biss fuq
perjodu ta’ żmien twil jekk il-leġiżlazzjoni tkun adottata. Din
l-għażla tkun teħtieġ iż-żmien sabiex issir
valutazzjoni bir-reqqa tas-sitwazzjoni eżistenti bil-għan li
jiġu żviluppati prinċipji u mekkaniżmi li għandhom
jiddaħħlu fil-qafas ġenerali, li se jkun ippreżentat
fl-2013/14. In-negozjar tas-sett sħiħ ta’ miżuri jkun ta’
piż u dewwiemi u l-implimentazzjoni operattiva tal-miżuri tittardja
l-aktar kmieni għal wara l-2017. Din tkun qed timponi piżijiet tqal
ħafna fuq l-amministrazzjonijiet pubbliċi u fuq il-Kummissjoni.
Bħall-għażla preċedenti, tkun diffiċli ħafna biex
din l-għażla tittieħed permezz tal-Kunsill. 5.2. L-għażla ta’
politika ppreferuta L-għażla ta’ politika 2
“Sħubija rinfurzata għaż-ŻER” hija l-unika għażla
li tippermetti għal progress sostanzjali lejn it-tlestija
taż-ŻER sal-2014, u tkun tinvolvi l-orħos spiża. Barra minn
hekk, din l-għażla tinkludi l-iżvilupp ta’ sistema ta’
valutazzjoni li se tgħin fl-identifikazzjoni ta’ azzjoni futura.
Għalhekk, l-għażla ta’ politika ppreferuta hija ‘Sħubija
rinfurzata għaż-ŻER’. 6. Monitoraġġ u evalwazzjoni Il-mekkaniżmu ta’ monitoraġġ
taż-ŻER se jiġi stabbilit sabiex ikun ivvalutat il-progress
mill-Istati Membri u mill-organizzazzjonijiet tal-partijiet interessati
fir-rigward ta’ għadd ta' indikaturi marbuta mal-azzjonijiet inklużi
fl-għażla ta' politika magħżula. Fuq il-bażi
tar-rapporti tal-Istati Membri dwar miżuri li jwasslu
għaż-ŻER, f'Settembru ta’ kull sena l-Kummissjoni se
tippreżenta Rapport ta’ Progress dwar iż-ŻER. Ir-rapport se jivvaluta l-passi meħuda u
jista’ jinkludi rakkomandazzjonijiet possibbli. Huwa maħsub biex iservi
bħala bażi għall-orjentazzjoni politika li għandu jiġi
propost mill-Kummissjoni lill-Kunsill tal-Kompetittività; kif ukoll
għad-diskussjonijiet fi ħdan il-Forum taż-ŻER tal-partijiet
interessati. Dan jista’ jikkontribwixxi wkoll għall-Istħarriġ
dwar it-Tkabbir Annwali li jiggwida r-riformi nazzjonali mill-Istati Membri
fil-kuntest tas-Simestru Ewropew, jew biex jidentifika azzjoni legali. [1] L-Artikolu 179(1) tat-TFUE jistqarr li: ‘L-Unjoni
għandha jkollha l-objettiv li ssaħħaħ is-sisien
xjentifiċi u teknoloġiċi tagħha billi tistabbilixxi
żona ta’ riċerka Ewropea li fiha r-riċerkaturi, l-għarfien
xjentifiku u t-teknoloġiji jiċċirkolaw liberament (…)’. [2] COM(2010) 546 finali. [3] COM(2010) 2020 finali.