DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT li jakkumpanja d-dokument DIRETTIVA TAL-KUNSILL li tistabbilixxi standards bażiċi tas-sikurezza kontra l-perikli li jirriżultaw minn esponiment għal radjazzjoni jonizzanti /* SWD/2012/0138 final - NLE 2011/0254 */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAL-VALUTAZZJONI
TAL-IMPATT
li jakkumpanja d-dokument DIRETTIVA TAL-KUNSILL li tistabbilixxi standards
bażiċi tas-sikurezza kontra l-perikli li jirriżultaw minn
esponiment għal radjazzjoni jonizzanti 1. Definizzjoni tal-problema 1.1. Introduzzjoni L-esponiment għar-radjazzjoni jonizzanti
jirriżulta f’dannu għas-saħħa. F’sitwazzjonijiet normali,
id-dożi huma baxxi ħafna u għalhekk ma jkun hemm l-ebda effett
klinikament osservabbli fuq it-tessuti, iżda xorta hemm effett possibbli
li joħroġ tard, b’mod partikolari l-kanċer. Huwa preżunt li
kwalunkwe esponiment, żgħir kemm ikun żgħir, jista’ jkun
il-kawża ta’ kanċer aktar tard fil-ħajja. Dan jitlob
approċċ speċifiku fil-protezzjoni kontra r-radjazzjoni, li ilu
stabbilit għal bosta deċenni mill-Kummissjoni Internazzjonali dwar
il-Protezzjoni Radjoloġika (International Commission on Radiological
Protection - ICRP). Il-ħtieġa li kemm is-saħħa
kif ukoll l-ambjent jiġu protetti ġiet rikonoxxuta fit-Trattat
tal-Euratom (1957) u hemm dispożizzjonijiet speċifiċi stabbiliti
fil-Kapitolu III, Protezzjoni tas-Saħħa, li jindirizzaw dawn
il-kwistjonijiet. L-Artikolu 31 tat-Trattat jitlob li jiġu stabbiliti
standards bażiċi tas-sikurezza uniformi. L-Artikolu 31
tat-Trattat tal-Euratom jistabbilixxi wkoll il-proċedura
għall-implimentazzjoni ta’ dawn l-Istandards, b’mod partikolari li
l-Kummissjoni għandha tfittex l-opinjoni ta’ Grupp ta’ Esperti (“Esperti
tal-Artikolu 31”). B’mod ġenerali, il-leġiżlazzjoni l-ġdida
hija abbozzata b’mod konġunt mis-servizzi tal-Kummissjoni u l-Esperti. Il-leġiżlazzjoni tal-Komunità dejjem
segwiet ir-rakkomandazzjonijiet tal-ICRP. Dan l-aħħar, din
l-organizzazzjoni xjentifika ferm rispettata ħarġet gwida ġdida
dwar is-sistema ta’ protezzjoni (Pubblikazzjoni 103, 2007) li tirrefletti
l-aħħar sejbiet xjentifiċi fuq ir-riskji tar-radjazzjoni u li
tiddefinixxi s-sistema ta’ protezzjoni radjoloġika. 1.2. Definizzjoni tal-problema Is-sistema attwali ta’ protezzjoni
tal-ħaddiema u tal-pubbliku mill-effetti tar-radjazzjoni jonizzanti
mhijiex aġġornata mal-aħħar sejbiet xjentifiċi u
mal-iżviluppi fis-soċjetà u dawk teknoloġiċi. Fid-dettall: –
Il-protezzjoni tas-saħħa
tal-ħaddiema u tal-pubbliku mhijiex aġġornata
mal-aħħar progress xjentifiku –
Il-protezzjoni tal-ħaddiema fl-industriji NORM
u fi gruppi speċifiċi ta’ professjonisti bħal Ħaddiema
Esterni u radjologi ta’ intervent mhijiex biżżejjed –
Il-protezzjoni tas-saħħa tal-pazjenti u
tal-pubbliku mhijiex aġġornata mal-aħħar avvanzi
teknoloġiċi –
Il-protezzjoni tas-saħħa tal-pubbliku
minn sorsi ta’ radjazzjoni naturali mhijex biżżejjed –
Ir-riskju ta’ radjazzjoni jonizzanti
għall-ispeċijiet mhux umani, jew għall-ambjent b’mod
ġenerali, mhuwiex indirizzat b’mod espliċitu u dan imur kontra
r-rakkomandazzjonijiet internazzjonali –
Il-qafas legali attwali għall-protezzjoni
kontra r-radjazzjoni huwa kumpless wisq. Fid-dawl ta’ dawn
l-iżviluppi, il-Kummissjoni wettqet analiżi komprensiva
tal-leġiżlazzjoni tal-Komunità dwar il-protezzjoni kontra r-radjazzjoni
u talbet lill-“Esperti tal-Artikolu 31” sabiex jipprovdu gwida rigward din
il-kwistjoni. Fi Frar 2010, l-Esperti ħarġu opinjoni dwar
ir-reviżjoni possibbli tal-leġiżlazzjoni tal-Komunità,
abbażi ta’ abbozz ta’ Direttiva. 2. Sussidjarjetà Skont l-Artikolu 2(b) tat-Trattat
tal-Euratom “…il-Komunità għandha, kif stabbilit f’dan it-Trattat ….
tistabbilixxi, u tassigura l-applikazzjoni ta’ normi uniformi ta’ sigurtà biex
tħares is-saħħa tal-ħaddiem u l-pubbliku in ġenerali”.
Rigward dan, fil-preambolu tat-Trattat, l-Istati Membri jiddikkjaraw li huma
“riżoluti li joħolqu l-kundizzjonijiet meħtieġa
għall-iżvilupp ta’ industrija nukleari b’saħħitha” kif
ukoll “anzjużi li jistabbilixxu kundizzjonijiet ta’ sigurtà li jeliminaw
il-periklu għall-ħajja u s-saħħa tal-poplu”. Il-Komunità
ngħatat il-mandat sabiex “tistabbilixxi, u tassigura l-applikazzjoni ta’
normi uniformi ta’ sigurtà biex tħares is-saħħa tal-ħaddiem
u l-pubbliku inġenerali." Għaldaqstant, il-kompetenza tal-Komunità
Ewropea tal-Enerġija Atomika (European Atomic Energy Community - EAEC)
biex tirregola fil-qasam tal-protezzjoni tas-saħħa kontra
r-radjazzjoni jonizzanti hija espliċitament rikonoxxuta mit-Trattat
tal-Euratom. Fil-prinċipju, in-natura esklussiva
tas-setgħat leġiżlattivi tal-Komunità tal-Euratom skont
l-Artikoli 30 u 31 tat-Trattat tal-Euratom ma teħtieġx
l-applikazzjoni tal-prinċipju ta’ sussidjarjetà. Min-naħa
l-oħra, dawn l-Artikoli jesiġu li, għall-proposti
leġiżlattivi tagħha, il-Kummissjoni tfittex l-opinjoni ta’ Grupp
ta’ Esperti maħtur mill-Kumitat Xjentifiku u Tekniku tal-Euratom u li
jaħdmu bħala esperti indipendenti għall-benefiċċju
tal-Komunità. 3. Għanijiet ewlenin
tal-politika L-għan ġenerali tal-inizjattiva huwa
li jiġi żgurat livell għoli ta’ protezzjoni tal-ħaddiema,
tal-membri tal-pubbliku u tal-pazjenti kontra d-dannu għas-saħħa
kkawżat minn esponiment għar-radjazzjoni jonizzanti, kif ukoll sabiex
jiġi protett l-ambjent. Dan l-għan ġenerali jinqasam f’erba’
għanijiet speċifiċi: 1.
li jiġu introdotti l-emendi meħtieġa
relatati mas-suġġett sabiex tiġi riflessa l-aħħar
dejta xjentifika u esperjenza operattiva, 2.
li jiġu ċċarati r-rekwiżiti u
li tiġi żgurata l-koerenza fi ħdan il-korp
tal-leġiżlazzjoni tal-Komunità, 3.
li tiġi żgurata l-koerenza mal-istandards
u r-rakkomandazzjonijiet internazzjonali, 4.
li tkun koperta l-firxa kollha tas-sitwazzjonijiet
ta’ esponiment u tal-kategoriji ta’ esponiment. 4. Alternattivi ta' politika Wara analiżi bir-reqqa tas-soluzzjonijiet
differenti għall-oqsma problematiċi identifikati, u wara
kunsiderazzjoni tas-soluzzjonijiet differenti f’termini tal-firxa
tas-simplifikazzjoni, l-aġġornar u l-kamp ta' applikazzjoni
tal-leġiżlazzjoni, intgħażlu l-alternattivi li ġejjin
għal valutazzjoni ulterjuri: Alternattiva 1: Jinżamm l-istatus quo
tal-leġiżlazzjoni eżistenti, Alternattiva 2: Reviżjoni tad-Direttiva
dwar l-Istandards Bażiċi tas-Sigurtà u tad-Direttiva Medika, Alternattiva 3: Reviżjoni u konsolidament
tad-Direttiva dwar l-Istandards Bażiċi tas-Sigurtà u tad-Direttiva
Medika, u l-integrazzjoni tad-Direttiva dwar il-Ħaddiema Esterni,
id-Direttiva dwar l-Informazzjoni lill-Pubbliku u d-Direttiva dwar is-Sorsi
Radjuattivi Siġillati ta’ Attività Għolja, Alternattiva 4: Reviżjoni tad-Direttiva
dwar l-Istandards Bażiċi tas-Sigurtà u twessigħ tal-kamp ta'
applikazzjoni biex jiġi kopert l-esponiment pubbliku għar-radjazzjoni
naturali, Alternattiva 5: Reviżjoni tad-Direttiva
dwar l-Istandards Bażiċi tas-Sigurtà u twessigħ tal-kamp ta'
applikazzjoni biex tkun koperta l-protezzjoni tal-ispeċijiet mhux umani, Alternattiva 6: Reviżjoni u konsolidament
tad-Direttiva dwar l-Istandards Bażiċi tas-Sigurtà u d-Direttiva
Medika, l-integrazzjoni tad-Direttiva dwar il-Ħaddiema Esterni,
id-Direttiva dwar l-Informazzjoni lill-Pubbliku u d-Direttiva dwar is-Sorsi
Radjuattivi Siġillati ta’ Attività Għolja u twessigħ tal-kamp
ta' applikazzjoni biex jiġi kopert l-esponiment pubbliku
għar-radjazzjoni naturali u l-protezzjoni tal-ispeċijiet mhux umani. 5. Valutazzjoni tal-impatti 5.1. Alternattiva 1: Jinżamm
l-istatus quo tal-leġiżlazzjoni eżistenti Ovvjament, din l-alternattiva ma tissodisfax
bis-sħiħ l-għanijiet speċifiċi ta’ din l-inizjattiva.
Id-Direttiva dwar l-Istandards Bażiċi tas-Sigurtà adottata fl-1996
kienet garanzija għall-protezzjoni adegwata tal-ħaddiema u l-membri
tal-pubbliku, bl-istess mod bħal kif id-Direttiva Medika fl-1997 kienet
storikament fundamentali għall-protezzjoni tal-pazjenti. Madankollu, minn
dak iż-żmien ‘l hawn, ix-xjenza u s-soċjetà evolvew,
l-esperjenza operattiva uriet ħtieġa ta' aġġornament ta’
ċerti rekwiżiti, l-iżviluppi teknoloġiċi jheddu
l-adegwatezza tal-leġiżlazzjoni eżistenti u hemm aspettattivi
ġodda min-naħa tas-soċjetà fir-rigward tal-ġestjoni
koerenti tas-sorsi ta’ radjazzjoni naturali jew dawk magħmulin
mill-bniedem kif ukoll fir-rigward tal-protezzjoni tal-ambjent. Fi ħdan din
l-alternattiva, saret analiżi dwar kemm dawn l-Istandards Bażiċi
tas-Sikurezza internazzjonali (International Basic Safety Standards - IBSS)
jistgħu jkunu effettivi. Madankollu, l-IBSS għandhom għan
differenti: mhumiex vinkolanti u għandhom livell aktar baxx ta’ ambizzjoni
minħabba l-applikazzjoni tagħhom mill-pajjiżi li qed
jiżviluppaw. Fid-dawl tal-obbligi tal-Komunità fit-Trattat, il-liġi
nazzjonali korrispondenti l-ġdida għandha tkun imejsa fuq
il-leġiżlazzjoni tal-Komunità. 5.2. Alternattiva 2: Emenda
tad-Direttivi l-aktar affettwati Din l-alternattiva tqis kif
iż-żewġ partijiet ewlenin tal-leġiżlazzjoni
jistgħu jiġu emendati separatament fid-dawl tal-esperjenza operattiva
u tal-iżviluppi l-ġodda. L-emendi jistgħu jindirizzaw ħafna
mill-problemi identifikati: A) Fid-Direttiva dwar l-Istandards
Bażiċi tas-Sigurtà: – l-introduzzjoni tal-metodoloġija l-ġdida tal-ICRP
għall-valutazzjoni tad-dożi, u tnaqqis tal-limitu tad-doża
għall-organu għal-lenti tal-għajn; – approċċ koerenti għall-ġestjoni tal-industriji NORM
(jiġifieri, materjal radjuattiv li huwa preżenti b’mod naturali); – approċċ gradwali ta’ kontroll regolatorju, proporzjonali
mal-effikaċja ta’ tali sorveljanza, inklużi livelli ta’ approvazzjoni
uniformi (eż. għall-materjali li jirriżultaw
miż-żarmar ta’ stallazzjonijiet nukleari li ma għadhomx
jintużaw); B) Fid-Direttiva Medika: –
rekwiżiti msaħħa
għall-protezzjoni tal-pazjenti kif ukoll dwar il-valutazzjoni tar-riskju,
ir-rappurtar u r-reazzjoni għal esponimenti aċċidentali b’mod
speċjali fir-radjoterapija; –
approċċ ġdid għall-“esponimenti
medikolegali” li jippermettu l-użu li dejjem qed jiżdied
tal-istrumenti għall-iskrinjar għas-sigurtà, illum meqjusin
bħala esponimenti pubbliċi skont id-Direttiva dwar l-Istandards
Bażiċi tas-Sigurtà. L-emendi ta’ hawn fuq ikollhom impatt importanti
fi ħdan l-oqsma li ġejjin: ·
Impatt ekonomiku:
Filwaqt li f’dan l-istadju mhuwiex possibbli li ssir valutazzjoni ekonomika
kwantifikata, l-industriji NORM sejrin jibbenefikaw mill-armonizzazzjoni tar-rekwiżiti
bejn l-Istati Membri. Barra minn hekk, l-introduzzjoni ta’ livelli ta’
approvazzjoni uniformi jista’ jkollha impatt konsiderevoli fuq it-tnaqqis
tal-ispejjeż ta’ żarmar ta’ stallazzjonijiet nukleari; ·
Impatt soċjali u fuq is-saħħa: L-impatt soċjali huwa relatat mal-għoti ta’ protezzjoni
adegwata lill-ħaddiema fl-industriji NORM. L-impatt fuq is-saħħa
se jkun l-aktar wieħed evidenti fir-rigward tal-esponimenti mediċi,
b’mod partikolari biex ikun evitat li skanns-CT spissi ta’ pazjenti
żgħażagħ iwasslu għal inċidenza akbar ta’
kanċer fil-ġejjieni. Gruppi professjonali speċifiċi
(pereżempju kardjologi) sejrin jibbenefikaw mit-tnaqqis tal-limitu
tad-doża għal-lenti tal-għajn u jevitaw is-seħħ ta’
kataretti. ·
Piż regolatorju:
Filwaqt li l-prinċipju ta’ Ottimizzazzjoni tal-protezzjoni, li
jeħtieġ li d-dożi jkunu “fl-Iżjed Livell Baxx
Raġonevolment Possibbli” (As Low As Reasonably Achievable - ALARA), billi
jitqiesu l-fatturi soċjali u ekonomiċi, huwa fundamentali sabiex
jiġi żgurat bilanċ xieraq bejn l-ispejjeż u
l-benefiċċji tal-protezzjoni ta’ radjazzjoni operattiva,
il-kunċett il-ġdid ta’ “approċċ gradat” jestendi dan
il-prinċipju għat-titjib tal-effikaċja tas-superviżjoni
regolatorja u jnaqqas il-piż amministrattiv għall-industriji. 5.3. Alternattiva 3: Reviżjoni
u konsolidament tad-Direttiva dwar l-Istandards Bażiċi tas-Sigurtà u
tad-Direttiva Medika, u l-integrazzjoni tad-Direttiva dwar il-Ħaddiema
Esterni, id-Direttiva dwar l-Informazzjoni lill-Pubbliku u d-Direttiva dwar
is-Sorsi Radjoattivi Siġillati ta’ Attività Għolja. Din l-alternattiva toffri reviżjoni
tad-Direttiva BSS, billi testendi r-rekwiżiti għall-esponiment
mediku, l-informazzjoni pubblika, l-esponiment tal-ħaddiema esterni u
s-sorsi radjuattivi ssiġillati ta’ attività għolja. Fi ħdan din
il-politika, jiġu amalgamati flimkien id-Direttiva BSS 96/29 u l-atti
leġiżlattivi relatati. Din l-alternattiva hija msejsa fuq miżuri
mhux leġiżlattivi biex jiġu solvuti problemi relatati mal-protezzjoni
minn sorsi ta’ radjazzjoni naturali u r-riskju tar-radjazzjoni jonizzanti
għal speċijiet mhux umani. Minbarra l-bidliet ikkunsidrati
fl-alternattiva 2, din l-alternattiva tinkludi l-emendi li ġejjin: ·
l-armonizzazzjoni tad-definizzjoni ta’ Sorsi
Radjoattivi Siġillati ta’ Attività Għolja (High Activity Sealed
Sources - HASS) mal-istandards internazzjonali; ·
rekwiżiti speċifiċi
għall-protezzjoni tal-ħaddiema esterni b’definizzjoni ċara
tar-responsabbiltajiet ta' min iħaddem u tal-impriżi li jwettqu
l-prattiki li fihom ikunu esposti; ·
rekwiżiti li l-pubbliku jkun infurmat qabel u
waqt emerġenza, fi ħdan il-kamp ta' applikazzjoni ġenerali
rivedut għall-ġestjoni ta’ sitwazzjonijiet ta’ esponiment
f’emerġenza. L-amalgamazzjoni tal-ħames Direttivi hi
kisba importanti f’termini tal-koerenza tal-leġiżlazzjoni
tal-Komunità. Ir-ristrutturar meħtieġ biex jakkomoda dan il-kamp ta'
applikazzjoni usa’ tad-Direttiva BSS itejjeb aktar iċ-ċarezza
tat-test u jiżgura implimentazzjoni operattiva aħjar
tar-rekwiżiti. Filwaqt li l-alternattiva 3 iżżomm
il-benefiċċji ekonomiċi, soċjali u tas-saħħa
tal-alternattiva 2, u żżid l-impatt f’uħud minn dawn l-aspetti,
pereżempju, permezz ta’ protezzjoni aqwa jew titjib fil-mobilità
tal-ħaddiema esterni, il-benefiċċju ewlieni tal-alternattiva 3
jinsab fis-simplifikazzjoni tal-leġiżlazzjoni tal-Komunità u
t-tnaqqis korrispondenti tal-piż regolatorju, kemm f’termini ta’
traspożizzjoni fil-liġi nazzjonali kif ukoll f’termini operattivi.
Il-gwida dwar l-implimentazzjoni tal-pjanijiet ta’ azzjoni nazzjonali għat-tnaqqis
tar-riskji minn esponiment għal radon fuq ġewwa sejra terġa’
tiġbed l-attenzjoni tal-Istati Membri fuq din il-problema u fuq
l-azzjonijiet possibbli sabiex din tissolva. Madankollu, din l-azzjoni jkollha
valur miżjud biss jekk l-Istati Membri jsegwu l-parir propost, li probabbilment
ma jkunx il-każ fin-nuqqas ta’ rekwiżiti vinkolanti. 5.4. Alternattiva 4: Reviżjoni
tad-Direttiva dwar l-Istandards Bażiċi tas-Sigurtà u t-twessigħ
tal-ambitu biex jiġi kopert l-esponiment pubbliku għar-radjazzjoni
naturali Ir-rakkomandazzjonijiet il-ġodda tal-ICRP
jippermettu ġestjoni aktar koerenti tal-esponiment għas-sorsi ta’
radjazzjoni naturali, u jiddefinixxu livelli ta’ referenza għal
konċentrazzjonijiet tar-radon fuq ġewwa u għall-esponiment
estern minn materjali tal-bini. Kif speċifikat
mill-WHO, l-impatt fuq is-saħħa tar-rekwiżiti vinkolanti
għar-radon f’abitazzjonijiet għandu jkun ferm importanti. L-Istati
Membri sejrin ikunu meħtieġa jistabbilixxu Pjan ta’ Azzjoni
komprensiv u trasparenti, aġġustat għall-ħtiġijiet
nazzjonali u għall-fatturi ġeoloġiċi ta’ reġjuni
differenti. L-implimentazzjoni u l-infurzar tal-Pjan ta’ Azzjoni nazzjonali
huma r-responsabbiltà tal-Istati Membri. Ir-rekwiżiti
armonizzati dwar il-materjali tal-bini sejrin jippermettu li ssir
standardizzazzjoni ulterjuri skont il-leġiżlazzjoni tal-KE dwar
il-Prodotti tal-Kostruzzjoni (Direttiva tal-Kunsill 89/106/KEE).
Madankollu, dan se jkun ukoll piż għall-industrija. Filwaqt li
l-konsumaturi u l-professjonijiet tal-bini sejrin jibbenefikaw mill-monitoraġġ
u l-ittikkettar tal-materjali, il-piż amministrattiv fuq l-industrija
sejjer jinżamm f’livell minimu permezz tal-għażla korretta ta’ livelli
ta’ referenza u permezz tal-lista tat-tipi ta’ materjali meqjusin
bħala ta’ tħassib. 5.5. Alternattiva 5: Reviżjoni
tad-Direttiva dwar l-Istandards Bażiċi tas-Sigurtà u t-twessigħ
tal-kamp ta' applikazzjoni biex tkun koperta l-protezzjoni tal-ispeċijiet
mhux umani L-ICRP issa
toffri metodoloġija għall-valutazzjoni tal-esponiment
għall-bijota. L-inkorporazzjoni tar-rekwiżiti rilevanti fil-BSS
tal-Euratom (kif ukoll fil-BSS internazzjonali l-ġodda) tippermetti
lill-Istati Membri li jinkorporaw dan fil-politiki ambjentali nazzjonali, b’mod
koerenti mal-approċċi attwali għall-protezzjoni
tas-saħħa kontra r-radjazzjoni jonizzanti. Essenzjalment, l-impatt
ambjentali ta’ dan il-kamp ta' applikazzjoni mwessa’
tal-leġiżlazzjoni tal-Komunità għandu jkun f’termini ta’ fehim
aħjar tan-nuqqas ta’ kwalunkwe impatt f’sitwazzjonijiet normali, u
l-prevenzjoni ta’ dannu ambjentali f’każ ta’ inċident nukleari. F’dan l-istadju,
ir-rekwiżiti għall-protezzjoni tal-ambjent mhumiex daqshekk
impenjattivi. Minbarra l-metodoloġija għall-valutazzjoni
tal-esponimenti għall-bijota (Pubblikazzjoni 108), l-ICRP sejra tipprovdi
gwida dwar l-applikazzjoni ta’ sistema ta’ protezzjoni kontra r-radjazzjoni
fl-2011-2012. Għaldaqstant, ikun għad baqa’ żmien qabel
l-adozzjoni tad-Direttiva mill-Kunsill sabiex jiġu inklużi l-kriterji
armonizzati fuq din il-bażi. Għaldaqstant, l-Esperti tal-Artikolu 31
jirrakkomandaw li r-rekwiżiti jiġu inklużi diġà minn issa
fil-proposta tal-Kummissjoni, minflok ma tiddaħħal parti oħra
tal-leġiżlazzjoni ftit snin wara, li tmur kontra l-politika ta’
simplifikazzjoni tal-Kummissjoni. 5.6. Alternattiva 6:
Ir-reviżjoni u l-konsolidament tad-Direttiva dwar l-Istandards
Bażiċi tas-Sigurtà, id-Direttiva Medika u l-integrazzjoni
tad-Direttiva dwar il-Ħaddiema Esterni, id-Direttiva dwar l-Informazzjoni
lill-Pubbliku u d-Direttiva dwar is-Sorsi Radjoattivi Siġillati ta’
Attività Għolja, u twessigħ tal-kamp ta' applikazzjoni biex jiġi
kopert l-esponiment pubbliku għar-radjazzjoni naturali u l-protezzjoni
tal-ispeċijiet mhux umani Din
l-alternattiva tinkludi l-elementi kollha tal-Alternattiva 3. Ir-reviżjoni
tal-istandards bażiċi tas-sikurezza tinkludi l-kwistjonijiet kollha
li ġew identifikati, u twessa’ l-kamp ta' applikazzjoni sabiex jinkludi
l-medda sħiħa ta’ sitwazzjonijiet ta’ esponiment, inkluż
l-esponiment pubbliku fuq ġewwa għar-radon u għall-materjali
tal-bini, u l-kategoriji kollha ta’ esponimenti umani u dawk mhux umani. 6. Tqabbil tal-alternattivi L-alternattivi differenti tqabblu abbażi
tal-effikaċja, l-effiċjenza u l-koerenza tagħhom
mal-leġiżlazzjoni l-oħra. L-Alternattiva 1 tissodisfa
parzjalment l-għan ġenerali tal-azzjoni. Hija inkluża bħala
xenarju bażi għat-tqabbil tal-alternattivi l-oħra.
L-Alternattiva 2 twieġeb bis-sħiħ għall-ewwel għan u
sa ċertu punt ittejjeb il-koerenza tal-leġiżlazzjoni dwar
il-protezzjoni kontra r-radjazzjoni tal-Euratom u hija koerenti wkoll
mal-istandards internazzjonali, u għaldaqstant, tissodisfa tlieta
mill-għanijiet speċifiċi. L-Alternattiva 3 tissodisfa
l-għan tal-koerenza u ċ-ċarezza bis-sħiħ. Tissodisfa
wkoll l-għan tal-politika ta’ simplifikazzjoni tal-Kummissjoni. L-Alternattivi 4 u 5 jissodisfaw bis-sħiħ
l-għanijiet ta’ koerenza mar-rakkomandazzjonijiet internazzjonali.
L-alternattivi iwessgħu l-ambitu tal-leġiżlazzjoni attwali u dan
jista’ jġib miegħu ċertu piż amministrattiv u ekonomiku.
L-Alternattiva 6 tgħaqqad l-Alternattivi 4 u 5, u għaldaqstant tkopri,
f’daqqa, il-medda sħiħa ta’ kwistjonijiet rigward il-protezzjoni
kontra r-radjazzjoni. L-Alternattiva 6 tikkonsolida wkoll
il-leġiżlazzjoni kollha bl-istess mod bħall-Alternattiva 3.
Bħala konklużjoni, bl-Alternattiva 6 jiġu sodisfatti
l-għanijiet kollha b’mod effikaċi permezz ta’ sett ta’ miżuri
effiċjenti. Hija wkoll l-alternattiva li toffri l-aqwa koerenza possibbli
mal-leġislazzjoni l-oħra. It-tabella sommarja tat-tqabbil hija
mogħtija fl-Anness 1. 7. Monitoraġġ u
evalwazzjoni ·
Skont l-Artikolu 33 tat-Trattat tal-Euratom,
l-Istati Membri sejrin jippreżentaw abbozz ta’ leġiżlazzjoni u
dispożizzjonijiet amministrattivi lill-Kummissjoni sabiex tkun tista’
tiżgura l-armonizzazzjoni tal-approċċi. It-traspożizzjoni
korretta tad-Direttiva fil-liġi nazzjonali sejra tkun indikatur
fundamentali għas-suċċess tagħha f’termini ta’ ċarezza
u semplifikazzjoni. Anness 1 Sommarju tat-tqabbil tal-alternattivi 2 sa 6 Impatt || Alternattiva 2 || Alternattiva 3 || Alternattiva 4 || Alternattiva 5 || Alternattiva 6 Ekonomiku || (+) || (+) || (+) || (+) || (+) Funzjonament tas-suq intern || (+) || (+) || (+) || (+) || (+) Piż amministrattiv fuq in-negozji || (+) || (+) || (+)(-) || (+) (-) || (+)(-) Awtoritajiet regolatorji || (-) || (+) || (-) || (-) || (+)(--) Ambjentali || (+) || (+) || (+) || (++) || (++) Protezzjoni tal-ambjent || (+) || (+) || (+) || (++) || (++) Soċjali u fuq is-Saħħa || (+) || (++) || (++) || (+) || (++) Saħħa u sikurezza fuq il-post tax-xogħol || (+) || (++) || (+) || (+) || (++) Mobilità tal-ħaddiema u l-esperti || (+) || (+) || (+) || (+) || (+) Protezzjoni tal-pazjenti || (+) || (+) || || || (+) Protezzjoni tal-pubbliku || (+) || (+) || (++) || (+) || (++) Koerenza u ċarezza tal-leġiżlazzjoni || (+) || (++) || (+) || (+) || (++) Koerenza internazzjonali || (+) || (+) || (+) || (+) || (++) Impatt globali || + || ++ || ++ || + || +++