Proposta għal regolament tal-Kunsill li jemenda r-regolament tal-Kunsill (KE) Nru 1210/2003 dwar ċerti restrizzjonijiet speċifiċi fuq relazzjonijiet ekonomiċi u finanzjarji mal-Iraq /* KUMM/2009/0024 finali */
[pic] | KUMMISSJONI TAL-KOMUNITAJIET EWROPEJ | Brussel 21.1.2009 KUMM(2009) 24 finali Proposta għal REGOLAMENT TAL-KUNSILL li jemenda r-Regolament tal-Kunsill (KE) Nru 1210/2003 dwar ċerti restrizzjonijiet speċifiċi fuq relazzjonijiet ekonomiċi u finanzjarji mal-Iraq (preżentata mill-Kummissjoni) MEMORANDUM TA' SPJEGAZZJONI 1. Ir-Regolament tal-Kunsill (KE) Nru 1210/2003 jimponi ċerti miżuri restrittivi fir-rigward tal-Iraq skont il-Pożizzjoni Komuni 2003/495/CFSP u r-Riżoluzzjoni tal-Kunsill tas-Sigurtà tan-NU 1483(2003). Fost affarijiet oħrajn ,fl-Artikoli 2 u 10 rispettivament tiegħu, ir-Regolament (KE) Nru 1210/2003 għamel arranġamenti speċifiċi dwar pagament għal esportazzjonijiet Iraqini ta' żejt mhux raffinat, prodotti ta' żejt mhux raffinat u gass naturali u dwar l-immunità minn proċedimenti legali għal xi assi Iraqini rispettivament. 2. Permezz tar-Riżoluzzjoni 1790 tat-18 ta' Diċembru 2007, il-Kunsill tas-Sigurtà tan-NU ddeċieda, inter alia , li dawn l-arranġamenti speċifiċi għandhom japplikaw sal-31 ta' Diċembru 2008. Skont il-Pożizzjoni Komuni 2008/186/CFSP, ir-Regolament (KE) Nru 1210/2003 jiġi emendat f'dan is-sens permezz tar-Regolament (KE) Nru 195/2008. 3. Permezz tar-Riżoluzzjoni 1859 tat-22 ta' Diċembru 2008, il-Kunsill tas-Sigurtà tan-NU ddeċieda, kif intalab mill-Iraq, li jestendi dawn l-arranġamenti speċifiċi sal-31 ta' Diċembru 2009. Huwa għalhekk xieraq li r-Regolament (KE) Nru 1210/2003 jiġi emendat f'dan is-sens. Proposta għal REGOLAMENT TAL-KUNSILL li jemenda r-Regolament tal-Kunsill (KE) Nru 1210/2003 dwar ċerti restrizzjonijiet speċifiċi fuq relazzjonijiet ekonomiċi u finanzjarji mal-Iraq IL-KUNSILL T AL-UNJONI EWROPEA, Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikoli 60 u 301 tiegħu, Wara li kkunsidra l-Pożizzjoni Komuni 2009/…/CFSP li temenda l-Pożizzjoni Komuni 2003/495/CFSP dwar l-Iraq[1], Wara li kkunsidra l-proposta mill-Kummissjoni, Billi: 4. Skont ir-Riżoluzzjoni 1483(2003) tal-Kunsill tas-Sigurtà, l-Artikolu 2 tar-Regolament (KE) Nru 1210/2003 dwar ċerti ristrizzjonijiet speċifiċi fuq relazzjonijiet ekonomiċi u finanzjarji mal-Iraq u li jirrevoka r-Regolament (KE) Nru 2465/96[2] għamel arranġamenti speċifiċi dwar ħlasijiet għal żejt mhux raffinat, prodotti ta' żejt mhux raffinat u gass naturali esportati mill-Iraq, filwaqt li l-Artikolu 10 ta' dak ir-Regolament għamel arranġamenti speċifiċi dwar l-immunità mill-proċedimenti legali ta' xi assi Iraqini. Dawn l-arranġamenti speċifiċi applikaw sal-31 ta' Diċembru 2008. 5. Ir-Riżoluzzjoni 1859 (2008) tal-Kunsill tas-Sigurtà tan-NU u l-Pożizzjoni Komuni 2009/…/CFSP jipprovdu li l-arranġamenti speċifiċi għandhom it-tnejn jiġu applikati sal-31 ta' Diċembru 2009. Huwa għalhekk xieraq li r-Regolament (KE) Nru 1210/2003 jiġi emendat f'dan is-sens. 6. Biex jiġi garantit li l-miżuri previsti f'dan ir-Regolament ikunu effettivi, dan ir-Regolament għandu jidħol fis-seħħ immedjatament, ADOTTAT DAN IR-REGOLAMENT: Artikolu 1 Fl-Artikolu 18 tar-Regolament (KE) Nru 1210/2003, il-paragrafu 3 għandu jiġi sostitwit b'dan li ġej: “3. L-Artikoli 2 u 10 għandhom japplikaw sal-31 ta' Diċembru 2009.” Artikolu 2 Dan ir-Regolament għandu jidħol fis-seħħ fil-jum tal-pubblikazzjoni tiegħu fil- Ġurnal Uffiċjali tal-Unjoni Ewropea . Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmula fi Brussell, Għall-Kunsill Il-President [1] ĠU L … , … 2009, p. .. . [2] ĠU L 169, 8.7.2003, p. 6.