[pic] | KUMMISSJONI TAL-KOMUNITAJIET EWROPEJ |

Brussel 16.3.2005

KUMM(2005) 100 finali

KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW U L-KUMITAT EKONOMIKU U SOĊJALI EWROPEW

Ir-regoli ta’ oriġini fl-arranġamenti preferenzjali ta’ kummerċ Orjentazzjonijiet għall-futur

Werrej

Sinteżi ta’ Eżekuzzjoni 3

Daħla ................... 6

Għanijiet ta’ din il-komunikazzjoni 6

Green paper dwar il-ġejjieni tar-regoli ta’ oriġini f’arranġamenti preferenzjali ta’ kummerċ. 7

Riżultati tal-proċess ta’ konsultazzjoni 7

Prinċipji Bażiċi għal strateġija ġdida dwar l-oriġini preferenzjali 8

1. Regoli aktar sempliċi u li jiffaċiltaw aktar l-iżvilupp: kif tiġi ddeterminata l-oriġini preferenzjali u l-akkumulazzjoni ta’ oriġini 8

1.1. Regoli bażiċi għal kif tiġi ddeterminata l-oriġini preferenzjali 8

1.1.1. Prodotti tas-sajd kompletament derivati 8

1.1.2. Prodotti maħduma jew ipproċessati b’mod suffiċjenti 9

1.2. Akkumulazzjoni ta’ oriġini bħala komponent ta’ integrazzjoni reġjonali 10

1.2.1. Firxa ta’ akkumulazzjoni u kondizzjonijiet ta’ applikazzjoni u estensjoni 10

1.2.2. Konvenzjonijiet reġjonali dwar l-oriġini 11

1.2.3. Simplifikazzjoni u laxkar tal-kondizzjonijiet ta’ akkumulazzjoni 11

2. Proċeduri effiċjenti: responsabbiltajiet ta’ l-operaturi ekonomiċi u l-awtoritajiet pubbliċi fit-twaqqif u l-kontroll ta’ l-oriġini preferenzjali 12

2.1. Dikjarazzjoni ta’ l-oriġini mill-importatur li jikklejmja l-preferenza 12

2.2. Stqarrija ta’ l-esportatur dwar l-oriġini 13

2.3. Kontroll ta’ l-oriġini tal-prodotti u ta’ l-operaturi ekonomiċi mill-awtoritajiet tad-dwana – Kooperazzjoni amministrattiva 13

3. Ambjent żgurat: L-infurzar tar-regoli mill-awtoritajiet kompetenti 14

3.1. Il-ħolqien tal-kondizzjonijiet ta’ konformità 14

3.1.1. Evalwazzjoni minn qabel tal-kapaċità tal-pajjiż/grupp ta’ pajjiżi benefiċjarju/ i li jamministra/w l-arranġament u r-regoli u l-proċeduri marbuta 14

3.1.2. Informazzjoni, taħriġ u assistenza teknika dwar regoli preferenzjali ta’ oriġini 14

3.2. Is-sorveljanza tal-konformità fis-sħubija 15

3.2.1. Is-sorveljanza tal-konformità mill-awtoritajiet pubbliċi ta’ l-obbligi fl-arranġamenti 15

3.2.2. L-iżgurar tal-konformità ta’ l-operaturi ekonomiċi mar-regoli - Il-ġlieda kontra l-frodi u l-assistenza reċiproka dwar il-frodi 15

3.3. L-użu ta’ mekkaniżmi ta’ protezzjoni 15

Sinteżi TA’ EżEKUZZJONI

- Mit-tweġibiet għall-proċess ta’ konsultazzjoni mnedija mill- Green paper tal-Kummissjoni dwar il-futur tar-regoli ta’ oriġini fl-arranġamenti preferenzjali ta’ kummerċ, hemm tamiet qawwija speċifiċi f’dak li għandu x’jaqsam ma’ dawn l-arranġamenti u r-regoli fir-rigward sew ta’ l-għanijiet tagħhom kif ukoll tal-preżentazzjoni formali.

- Dawn it-tamiet – ta’ spiss kontradittorji – għandhom jikkorrispondu ma' l-impenji u l-orjentazzjonijiet internazzjonali diġà ppreżentati mill-Kummissjoni, b’mod partikolari l-Komunikazzjonijiet reċenti dwar il-futur tat-tessuti u l-iskema l-ġdida għas-Sistema Ġeneralizzata ta’ Preferenzi (SĠP).

- Fil-Kuntest ta’ l-Aġenda ta’ Żvilupp ta’ Doha, li wieħed jiżgura integrazzjoni akbar tal-pajjiżi li qegħdin jiżviluppaw fl-ekonomija dinjija, b’mod partikolari permezz ta’ aċċess aħjar għas-swieq tal-pajjiżi żviluppati, tibqa’ l-ogħla prijorità fir-relazzjonijiet kummerċjali tal-Komunità u se tħeġġeġ ir-reviżjoni tar-regoli preferenzjali tagħha ta' oriġini. Dan jimplika li l-bidliet meħtieġa fis-sustanza tar-regoli u l-kondizzjonijiet għandhom isiru flimkien ma’ adattament tal-proċeduri għall-immaneġġjar u l-kontroll tagħhom, sabiex ikun żgurat li l-preferenzi attwalment jibbenefikaw dawk li jeħtiġuhom.

- Fuq dan l-isfond, għandhom jittieħdu miżuri fi tliet oqsma:

Reviżjoni tal-kondizzjonijiet biex prodott jitqies li oriġina f’xi pajjiż

Biex tissemplifika r-regoli u, fejn xieraq, biex dawn jiffaċiltaw aktar l-iżvilupp, il-Kummissjoni hija favur li jkun hemm:

- semplifikazzjoni tal-kunċetti u l-metodi użati fid-determinazzjoni ta’ l-oriġini, inkluż liema kliem jintuża fid-dispożizzjonijiet li jikkorrispondu; semplifikazzjoni bħal din għandha ġġib aktar ċarezza, tgħin biex wieħed jifhem aħjar ir-regoli u ssostni l-applikazzjoni u l-infurzar tagħhom; l-impatt ta’ semplifikazzjoni bħal din għandu jkun evalwat b’mod sħiħ biex ikun żgurat li l-għanijiet ġenerali jintlaħqu u, jekk le, il-kummissjoni tadotta strateġija differenti;

- aġġustament tal-kondizzjonijiet imposti fuq il-proċessi ta’ produzzjoni biex jingħata l-istat ta’ oriġini, sa fejn jirrigwarda l-politika ta’ żvilupp u l-pajjiżi li qed jiżviluppaw, bil-ħsieb li tiggarantixxi aċċess aktar faċli fis-suq tal-Komunità permezz ta’ tariffi preferenzjali li jikkorrispondu mal-produzzjoni reali u l-kapaċità ta’ esportazzjoni tal-pajjiżi benefiċjarji, b’mod partikolari għall-pajjiżi l-anqas żviluppati u l-iżgħar pajjiżi;

- aktar laxkar tal-kondizzjonijiet biex tkun applikata l-akkumulazzjoni ta’ oriġini fi ħdan formazzjonijiet ta’ gruppi reġjonali koerenti, soġġetti għal mekkaniżmi xierqa stabbiliti għall-kooperazzjoni amministrattiva bejn is-soċji fl-akkumulazzjoni.

Bidla fil-proċeduri tad-dwana meħtieġa għall-implimentazzjoni xierqa u l-kontroll ta' l-użu tal-preferenzi mill-operaturi ekonomiċi:

Sabiex ikun hemm bilanċ aħjar tar-responsabbiltajiet ta’ l-operaturi ekonomiċi u l-awtoritajiet pubbliċi u biex jitħarsu l-interessi leġittimi involuti, il-Kummissjoni tixtieq sistema bbażata fuq dawn il-komponenti:

- li l-istat ta’ oriġini jkun determinat mill-esportaturi nnifshom sakemm ikun reġistrat minn qabel mill-awtoritajiet tal-pajjiż esportatur fuq bażi ta' standards komuni stabbiliti minn qabel;

- titjib fl-iskambju ta’ informazzjoni bejn l-esportaturi u l-awtoritajiet tal-pajjiżi esportaturi dwar l-użu ta’ l-arranġament preferenzjali u t-tisħiħ tal-kontrolli minn naħa ta’ dawn l-awtoritajiet fuq l-importaturi, li nistgħu nafdaw;

- li jkunu ċċarati d-drittijiet bażiċi u l-obbligi ta’ l-importaturi li jkunu qegħdin jitolbu trattament preferenzjali fuq il-bażi ta’ dikjarazzjonijiet ta’ oriġini maħruġa mill-fornituri barranija tagħhom;

- li jkun hemm klawżoli speċjali dwar konformità mar-rekwiżiti ta’ oriġini fit-tranżazzjonijiet kummerċjali bejn esportaturi u importaturi, inkluża l-possibilità li jkun hemm trażmissjoni ta’ provi ta’ oriġini b’mezzi elettroniċi;

- it-tisħiħ ta’ l-iskambju ta’ informazzjoni u kooperazzjoni amministrattiva bejn l-awtoritajiet tal-pajjiżi esportaturi u importaturi waqt il-verifika ta’ l-oriġini, bbażat fuq obbligi u proċeduri ċari.

L-Iżvilupp ta’ għodda li tiżgura li l-pajjiżi benefiċjarji jikkonformaw ruħhom ma’ l-obbligi tagħhom:

Biex tiżgura l-konformità mill-awtoritajiet pubbliċi ma’ l-obbligu tagħhom li japplikaw sewwa l-arranġamenti u r-regoli ta’ oriġini u biex ikun hemm kooperazzjoni sħiħa fil-prevenzjoni u l-ġlieda kontra l-abbużi, qed jiġu proposti dawn l-azzjonijiet:

- assistenza teknika għall-pajjiżi benefiċjarji (prinċipalment il-pajjiżi l-anqas żviluppati u l-iżgħar), li jeħtieġu għajnuna f’dak li għandu x’jaqsam ma’ l-applikazzjoni xierqa ta’ l-arranġamenti preferenzjali biex jieħdu l-aqwa mill-benefiċċji tagħhom;

- kontroll immirat ta' kif jiffunzjonaw l-arranġamenti preferenzjali fuq bażi ta' pjan ta' azzjoni;

- l-użu xieraq ta’ miżuri ta’ prekawzjoni u mekkaniżmi ta’ ħarsien f'każ ta’ nuqqas ta’ kontroll jew li wieħed jipprovdi kooperazzjoni.

- Ir-reviżjoni tar-regoli ta’ oriġini skond dawn ir-regoli se jikkostitwixxu komponenti importanti għal skema ġdida ta’ l-SĠP.

- Din l-istrateġija ġdida fir-rigward tar-regoli ta’ oriġini u kooperazzjoni amministrattiva għandha tiġi proposta wkoll minn hawn u ftit ieħor, bħala kwistjoni ta’ prijorità, għall-Ftehim ta’ Sħubija Ekonomika (FSE) li qed jiġi negozjat ma’ sitt gruppi reġjonali tal-pajjiżi Afrika-Karibew-Paċifiku (AKP), b’konformità sħiħa mal-benefiċċju kurrenti tal-Ftehim ta’ Cotonou. Tista’ mbagħad tiġi estiża bil-mod il-mod għall-Ftehim ta’ Kummerċ Ħieles eżistenti. Dan ikun ta' appoġġ għal livell xieraq ta' armonizzazzjoni tar-regoli fil-qafas ta’ ċertu grupp ta’ arranġamenti preferenzjali b’koerenza reġjonali, inkluża l-formazzjoni ta’ gruppi f’qafas wieħed (konvenzjoni reġjonali, ngħidu aħna) ta’ regoli komuni għal xi reġjun.

- Hi u tipproponi arranġamenti ġodda lis-soċji kummerċjali, il-Kummissjoni ser tfittex li tiżgura li kwistjonijiet li jkunu diġa miftiehma f’negozjati li jkunu għaddejjin ma jerġgħux jinqalgħu, u li tersaq lejn negozjati ġodda fi spirtu kostruttiv u miftuħ.

Daħla

Għanijiet ta’ din il-komunikazzjoni

- Ir-regoli ta’ oriġini huma komponent essenzjali tal-politika kummerċjali tal-Komunità, speċjalment fejn preferenzi tariffarji jridu jingħataw lil prodotti li joriġinaw biss f’ċerti pajjiżi jew gruppi ta’ pajjiżi. Għalhekk, għandhom ikunu konsistenti ma’ l-għan ġenerali ta’ dawn il-preferenzi li jsaħħaħ l-integrazzjoni ekonomika bejn is-soċji u b’mod partikolari li jiffaċilita d-dħul sħiħ tal-pajjiżi li qed jiżviluppaw, fl-ekonomija dinjija u li jagħtu appoġġ lill-iżvilupp ekonomiku u soċjali tagħhom.

- Dawn ir-regoli għandhom jirriflettu n-natura u l-importanza tar-rabta li għandu jkun hemm bejn il-prodotti u l-pajjiż ikkonċernat, b'mod partikolari l-livell ta' pproċessar fuq inputs esterni f’xi pajjiż partikolari, meħtieġa biex il-prodotti hekk miksuba jitqiesu bħala li oriġinaw f’dan il-pajjiż. Għandhom jiġu stabbiliti proċeduri tad-dwana biex juru u jikkontrollaw li dawn ir-rekwiżiti fil-fatt kienu sodisfatti. Il-qagħda preżenti, li tgħaqqad flimkien, f’għadd ta’ każijiet, regoli kumplessi ma’ dgħjufija fl-infurzar tagħhom, mhix sodisfaċenti.

- Din il-komunikazzjoni għandha l-għan li tipprovdi orjentazzjonijiet ġenerali dwar il-prinċipji bażiċi li l-Kummissjoni biħsiebha ssegwi biex ikun hemm titjib tar-regoli ta’ oriġini fil-bosta arranġamenti ta’ Ftehim ta’ Kummerċ Ħieles u ta’ preferenza awtonoma.

- Dan it-titjib se jikkonsisti f’semplifikazzjoni u laxkar xieraq tal-kunċett ta’ oriġini filwaqt li jkun hemm issikkar tal-proċeduri relatati u żvilupp ta’ l-għodda meħtieġa biex tiżgura l-konformità. Għal kull wieħed minn dawn it-tliet aspetti, il-Kummissjoni biħsiebha ġġib ’il quddiem it-trasparenza u taġġusta r-regoli skond l-għanijiet ta’ l-arranġamenti.

- Il-ħtieġa għal dan it-tibdil kienet enfasizzata, b’mod partikolari, fil-kuntest tat-tħejjija tas-Sistema ġdida Ġeneralizzata ta’ Preferenzi (SĠP) għall-perjodu 2006-2015[1], il-ftuħ tan-negozjati dwar il-Ftehim ta’ Sħubija Ekonomika (FSE) ġdid u reġjonali mal-pajjiżi ta’ l-Afrika-Karibew-Paċifiku (AKP), u kif se jirrifletti fuq il-ġejjieni tas-settur tat-tessuti[2].

- Skond din il-Komunikazzjoni “Il-pajjiżi li qed jiżviluppaw, il-kummerċ internazzjonali u l-iżvilupp sostenibbli: il-funzjoni tas-sistema ġeneralizzata ta’ preferenzi tal-Komunità (SĠP) għall-perjodu ta’ għaxar snin 2006 sa 2015”, il-Kummissjoni biħsiebha timmira l-SĠP “ lejn dawk il-pajjiżi li l-aktar jeħtieġuha u għandha tħeġġeġ il-kooperazzjoni reġjonali bejn il-pajjiżi li qed jiżviluppaw b’bosta mezzi. L-SĠP għandha tkun ta’ għajnuna għal dawn il-pajjiżi biex jiksbu livell ta’ kompetitività li jista’ jwassalhom biex ikunu awtonomi ekonomikament u soċji sħaħ fil-kummerċ internazzjonali.”

- Għalhekk biex tagħti mbuttatura lil dan l-objettiv, l-SĠP se tipprovdi l-ewwel opportunità biex jiġu applikati dawn il-linji ta’ gwida ġenerali biex ikun hemm titjib tar-regoli ta’ oriġini, soġġetti għal aġġustament aktar preċiż fid-dettalji ta’ l-implimentazzjoni tagħhom. Dan se jsir permezz ta’ emendi tad-dispożizzjonijiet stabbiliti fid-dispożizzjonijiet ta' implimentazzjoni tal-kodiċi doganali tal-Komunità[3].

Green paper dwar il-ġejjieni tar-regoli ta’ oriġini f’arranġamenti preferenzjali ta’ kummerċ

- Fil-kuntest tal-liberalizzazzjoni tal-kummerċ internazzjonali, il-Kummissjoni adottat Green Paper [4] li pprovdiet:

- valutazzjoni ġenerali tal-problemi attwali ta’ oriġini fl-arranġamenti preferenzjali;

- iffukar fuq l-aspetti li jeħtieġu strateġija konsistenti biex ikun hemm kontroll fuqhom;

- ħarsa ġenerali ta’ l-għażliet disponibbli, b’mod partikolari fir-rigward tas-sistemi ta' ċertifikazzjoni, dikjarazzjoni u kontroll ta’ l-istat ta’ oriġini tal-prodotti u modi ta’ iffukar mill-ġdid fuq is-sistema attwali ta' kooperazzjoni amministrattiva.

Riżultati tal-proċess ta’ konsultazzjoni

- Il-proċess ta’ konsultazzjoni dwar il- Green Paper beda minn Jannar ta’ l-2004 u baqa’ sejjer sal-15 ta’ Marzu 2004 u involva negozjanti internazzjonali u awtoritajiet kompetenti ta’ l-Istati Membri, pajjiżi ta' adeżjoni u dawk kandidati u pajjiżi li qed jipparteċipaw f'bosta arranġamenti preferenzjali ma' l-Unjoni Ewropea.

- Il-Kummissjoni pproduċiet f'Settembru ta’ l-2004 rapport fil-qosor tar-riżultati tal-proċess ta’ konsultazzjoni, li l-objettiv prinċipali tiegħu kien li jagħti stampa ċara u fil-qosor tal-fehmiet u l-kummenti magħmula mill-kontributuri.

- Meta wieħed iżomm quddiem għajnejh il-ħtieġa li jkun hemm bilanċ bejn il-bosta interessi li hemm fin-nofs, il-kontributi li ntbagħtu kienu sors ta’ materjal ta’ valur għall-Kummissjoni fit-tħejjija ta’ din il-komunikazzjoni.

Prinċipji Bażiċi għal strateġija ġdida dwar l-oriġini preferenzjali

Kif kien enfasizzat fil- Green Paper , kull titjib fir-regoli preferenzjali ta’ oriġini jimplika tagħqid u taħlit flimkien ta’ dispożizzjonijiet xierqa, ilħuq ta’ l-objettivi ta’ l-arranġamenti u l-ħtiġijiet ta’ min għandu l-interessi tiegħu fin-nofs, proċeduri effiċjenti, l-allokazzjoni bl-aħjar mod ta’ responsabbiltajiet ta’ treġġija u kontroll ta’ oriġini u konformità stretta ma' obbligi u kondizzjonijiet legali permezz ta’ għodda ta’ infurzar[5]. L-istrateġija ġenerali ta’ reviżjoni tista’ fi ftit kliem issir kif ġej: ‘regoli xierqa, proċeduri effiċjenti, ambjent żgurat’.

1. regoli aktar sempliċi u li jiffaċiltaw aktar l-iżvilupp: kif tiġi ddeterminata l-oriġini preferenzjali u l-akkumulazzjoni ta’ oriġini

- Soġġetti għall-objettivi prinċipali ta’ ċerti arranġamenti (titjib fl-aċċess reċiproku għas-suq, żvilupp tal-pajjiżi foqra, sigurtà, kooperazzjoni reġjonali u integrazzjoni), id-differenzi fid-definizzjoni tat-trattament preferenzjali kif ukoll fil-kondizzjonijiet biex prodott igawdi minn din il-preferenza se jinżammu peress li dan huwa konformi mas-sostituzzjoni finali ta' dawn l-arranġamenti bi strateġija multilaterali.

- Il-Kummissjoni hi favur is-simplifikazzjoni formali tal-kunċetti kif ukoll tal-metodi użati biex tkun iddeterminata l-oriġini, inkluż il-mod kif jitqiegħed mill-ġdid il-kliem tad-dispożizzjonijiet legali rilevanti u l-laxkar fis-sustanza, b'mod partikolari fejn jidħlu l-pajjiżi li qed jiżviluppaw. Is-simplifikazzjoni għandha tagħmel l-affarijiet aktar ċari, tgħin biex ir-regoli jinftiehmu aħjar u jkunu applikati u infurzati u tagħti imbuttatura ’l quddiem lill-impatt ta’ żvilupp fi ħdan u bejn il-blokki reġjonali tal-kummerċ. Il-laxkar għandu jippermetti aċċess aħjar għas-suq.

- Skond il-kuntest u l-objettivi ta’ l-arranġament preferenzjali, dan l-addattament tar-regoli ta’ oriġini jista’ jinkiseb, permezz ta’ :

- reviżjoni tar-regoli bażiċi imposti fuq il-prodotti, biex jitqiesu bħala li joriġinaw minn x’imkien minħabba li huma ‘kompletament miksuba’ f’pajjiż jew ‘ipproċessati b’mod suffiċjenti’ hemmhekk minn inputs esterni, u

- reviżjoni tal-kondizzjonijiet għall-akkumulazzjoni ta’ oriġini fost il-pajjiżi li jaqgħu taħt entitajiet reġjonali ekonomikament integrati.

1.1. Regoli bażiċi għal kif tiġi ddeterminata l-oriġini preferenzjali

1.1.1. Prodotti tas-sajd kompletament derivati

- Sa fejn għandhom x’jaqsmu ‘il-prodotti kompletament imħassla’, l-aspett prinċipali li jeħtieġ titjib huwa li tkun iddeterminata l-oriġini tal-prodotti tas-sajd permezz ‘tan-nazzjonalità’ tal-vapur: xi uħud mill-kriterji preżenti jistgħu jeħtieġu reviżjoni fid-dawl ta’ żviluppi ġodda fis-settur tal-prodotti tas-sajd. Il-Kummissjoni hi tal-fehma li l-oriġini tal-ħut għandha tkun ibbażata fuq il-bandiera, ir-reġistrazzjoni u l-kondizzjonijiet simplifikati iżda xierqa li jirrigwardaw il-proprjetà, bit-tneħħija tal-kondizzjonijiet ta’ l-ekwipaġġ.

- Barra minn hekk, fil-kuntest ta’ sistema ta’ akkumulazzjoni ta’ oriġini, dawn il-kondizzjonijiet jistgħu jiġu sodisfatti f’kull wieħed mill-pajjiżi li jappartienu għal din is-sistema.

1.1.2. Prodotti maħduma jew ipproċessati b’mod suffiċjenti

- Ir- regoli bażiċi ta’ oriġini fl-arranġamenti preferenzjali rilevanti għandhom jirriflettu kemm il-kapaċità ta’ produzzjoni tal-pajjiż kif ukoll l-operazzjonijiet ta’ pproċessar b’valur-miżjud reali fil-pajjiż.

- Għal dan il-għan, il-Kummissjoni hi favur l-użu ta’ metodu ta’ evalwazzjoni ta’ pproċessar suffiċjenti bbażat fuq ‘test ta’ valur miżjud’ bħala l-punt tat-tluq . Skond dan il-metodu, prodott li jirriżulta mix-xogħol jew l-ipproċessar ta’ materjali impurtati li ma joriġinawx mill-post jitqies bħala li joriġina mill-post jekk il-valur miżjud fil-pajjiż (jew f’reġjun f’każ ta’ akkumulazzjoni,) jwassal ta' l-inqas sa ċertu limitu ( 'Kontenut ta’ Valur Lokali jew Reġjonali' minimu), li jidher bħala perċentwali tal-prezz nett ta’ produzzjoni tal-prodott finali.

- L-importanza ta’ l- input meħtieġ, li jidher permezz tal-perċentwali mitluba ta’ valur miżjud, għandha tiġi ffissata fuq bażi ta’ analiżi ekonomika valida u skond l-objettivi ta’ l-arranġament u, meta ma tmurx kontra dawn l-objettivi, skond il-livell meħtieġ ta’ liberalizzazzjoni tal-kummerċ.

- L-impatt li jista' jkollha l-istrateġija tal-valur miżjud aktar mill-prinċipji ta' gwida ta' simplifikazzjoni u li jiffaċilitaw l-iżvilupp għandu jiġi evalwat bir-reqqa. Dan jista’ jinkiseb permezz ta’ simulazzjoni dwar il-valutazzjoni u l-perċentwali mwettqa fuq kampjuni rappreżentattivi bbażati fuq sitwazzjonijiet reali ta’ pajjiżi li qed jiżviluppaw, b’mod speċjali dawk li huma l-ifqar, biex b’hekk jista’ jkun hemm paragun mas-sitwazzjoni preżenti. Huwa importantissimu li l-livelli attwali ta’ aċċess għall-pajjiżi li qed jiżviluppaw għas-suq tal-KE m’għandhomx jitnaqqsu minħabba din l-istrateġija ġdida.

- Il-perċentwali meħtieġa ta’ valur miżjud għandha tkun iffissata b’mod partikolari biex ma taqbiżx il-kapaċitajiet ta’ produzzjoni tal-pajjiżi li qed jiżviluppaw filwaqt li tiskoraġġixxi t-trasbord ta’ prodotti li jkunu ġejjin minn pajjiżi mhux eliġibbli u pproċessar virtwali biss jew minimali. Barra minn hekk, m’għandiex tkun ta’ xkiel fit-titjib ta’ l-effiċjenza u l-kompetitività billi tnaqqas il-prezzijiet ta’ produzzjoni.

- Perċentwali differenti jistgħu jiġu ffissati f’setturi differenti għal dan il-għan u skond l-SĠP jistgħu jiġu stabbiliti wkoll limiti speċifiċi, għall-Pajjiżi l-Anqas Żviluppati li jibbenefikaw minn Kollox Barra l-Armamenti.

- Barra minn hekk, f’għadd ta’ setturi li jinkludu prodotti ta’ l-agrikoltura, sajd jew tessuti , li wieħed jersaq lejn metodu ġdid għad-determinazzjoni ta’ oriġini se tkun bidla prinċipali li l-impatt tagħha jeħtieġ li jiġi evalwat sewwa minn qabel. Jekk din l-evalwazzjoni turi li l-istrateġija tal-valur miżjud mhix se trendi r-riżultati mistennija f’dak li huwa żvilupp u simplifikazzjoni għal ċerti setturi, il-Kummissjoni se tadotta strateġija oħra biex tikseb b’mod aħjar dawn l-objettivi. Barra minn hekk, il-kriterju tal-valur miżjud jista’, fejn jinstab xieraq biex ma jippermettix applikazzjoni ħażina jew tidwir ta’ preferenzi, jiġi msaħħaħ b'kondizzjonijiet addizzjonali jew kriterji li jgħinu l-iżvilupp reali.

- Filwaqt li jorbot flimkien iċ-ċarezza, il-funzjonalità u l-flessibilità biex jiġu stabbiliti l-perċentwali, dan il-metodu jippermetti li l-livell ta’ pproċessar fuq bosta prodotti jiġi evalwat permezz ta’ kejl wieħed u b’hekk ma jkunx hemm trattament mhux ġust; dan ukoll jirrendi żejda ‘l-lista negattiva’ ta’ operazzjonijiet insuffiċjenti u l-użu tat-tolleranzi fil-valur.

1.2. Akkumulazzjoni ta’ oriġini bħala komponent ta’ integrazzjoni reġjonali

1.2.1. Firxa ta’ akkumulazzjoni u kondizzjonijiet ta’ applikazzjoni u estensjoni

- L-akkumulazzjoni għandha tidħol fis-seħħ biss fi ħdan gruppi jew zoni reġjonali koerenti fejn:

- il-kummerċ preferenzjali u l-akkumulazzjoni huma parti minn proċess ġenerali ta’ integrazzjoni ekonomika reali;

- l-akkumulazzjoni hija bbażata fuq ftehim ta’ kummerċ ħieles jew tirriżulta minn arranġamenti awtonomi;

- it-trattament preferenzjali jingħata lill-prodotti skond l-applikazzjoni ta’ regoli identiċi ta’ oriġini;

- qafas legali amministrattiv ikun ġie żviluppat fil-pajjiżi involuti u bejniethom biex jamministraw u jikkontrollaw, permezz ta’ kooperazzjoni amministrattiva xierqa, l-oriġini tal-prodotti li jibbenefikaw mill-akkumulazzjoni.

L-istess kondizzjonijiet għandhom japplikaw f’kull estensjoni ta’ akkumulazzjoni jew f’kull akkumulazzjoni bejn reġjuni differenti.

- F’dak li għandu x’jaqsam mat-titjib ta’ l-aċċess għas-suq , għandu jkun hemm enfażi fuq l-istrateġija reġjonali (inkluża strateġija minn blokk għal blokk kif inhu l-każ skond il-Ftehim ta' Cotonou, li l-benefiċċji tiegħu għandhom jinżammu) permezz ta' akkumulazzjoni ta’ oriġini, mingħajr ma jitħallew barra l-adattamenti meħtieġa tar-regoli bażiċi ta' oriġini li huma ta' interess komuni f'dak li għandu x'jaqsam ma' riċerka ta' sorsi esterni u aċċess għas-swieq rispettivi tal-partijiet.

- F’dak li għandu x’jaqsam ma’ l-iżvilupp , l-akkumulazzjoni fi ħdan formazzjonijiet koerenti ta’ gruppi reġjonali toffri opportunitajiet addizzjonali għall-pajjiżi li qed jiżviluppaw, speċjalment dawk l-anqas żviluppati, biex jiżdiedu kemm jista’ jkun il-benefiċċji li jirriżultaw minn laxkar ibbilanċjat tar-regoli bażiċi.

- Bħalissa, hemm tliet gruppi reġjonali skond l-SĠP li huma l-ASEAN, l-SAARC u merġer reċenti bejn il-Komunità Andina u s-Suq Komuni ta’ l-Amerika Ċentrali fi grupp wieħed. Il-Kummissjoni hija lesta li teżamina kull talba biex jitwaqqfu gruppi ġodda, magħquda jew usa’ , sakemm ikun hemm komplementarjetà ekonomika, jitqiesu d-differenzi fl-arranġamenti preferenzjali applikabbli lill-bosta pajjiżi u r-riskju relatat ta’ tidwir mat-tariffi u jitpoġġew l-istrutturi meħtieġa u l-proċeduri għal kooperazzjoni amministrattiva fit-treġġija u l-kontroll ta’ l-oriġini.

1.2.2. Konvenzjonijiet reġjonali dwar l-oriġini

- Għandhom jiġu stabbiliti regoli ta’ oriġini komuni għal xi grupp ta’ soċji fil-kummerċ assoċjati f’zona ta’ akkumulazzjoni fi strument wieħed internazzjonali , li għalih ikunu jirreferu l-bosta arranġamenti ta’ ftehim preferenzjali.

- Fiz- zona PanEwroMediterranja , dan l-istrument wieħed internazzjonali għandu jkollu sura ta’ konvenzjoni reġjonali dwar l-oriġini bejn is-soċji fil-kummerċ. Mhux biss għandu jissemplifika t-treġġija ta’ l-oriġini iżda wkoll jikkontribwixxi fit-titjib ta’ l-integrazzjoni bejn il-partijiet f’bosta arranġamenti ta’ Ftehim ta’ Kummerċ Ħieles permezz ta’ sett wieħed ta’ regoli ta’ oriġini li jippermettu l-akkumulazzjoni.

- L-istess strateġija għandha tintgħażel biex xi akkumulazzjoni possibbli bejn pajjiżi jew reġjuni oħra soġġetti għal arranġamenti separati ta' Ftehim ta' Kummerċ Ħieles tingħata appoġġ.

1.2.3. Simplifikazzjoni u laxkar tal-kondizzjonijiet ta’ akkumulazzjoni

- F’isem iċ-ċarezza u l-infurzar, it-tqegħid fejn xulxin ta’ bosta forom ta’ akkumulazzjoni (bilaterali, djagonali, sħaħ), li jinvolvu l-istess pajjiżi f’kuntesti preferenzjali differenti, għandu jiġi evitat.

- Estensjoni progressiva ta’ akkumulazzjoni sħiħa lejn il-bosta oqsfa preferenzjali tista’ titqies, sakemm it-traċċjabilità ta’ l-istat tal-materjal tista’ tkun garantita. Sakemm huwa possibbli u filwaqt li jittieħed kont tal-livelli varji ta’ preferenzi applikati lill-membri rispettivi tal-grupp, l-akkumulazzjoni sħiħa għandha tinvolvi l-iffissar ta’ oriġini komuni għall-grupp . Dawn il-kondizzjonijiet meħtieġa jeskludu madankollu l-akkumulazzjoni sħiħa fil-kuntest ta' l-SĠP.

- Fir-rigward ta’ l- akkumulazzjoni reġjonali ta’ l-SĠP , qed jiġi propost li tinbidel il-kondizzjoni doppja attwali għall-allokazzjoni ta’ oriġini lil xi pajjiż membru ta’ xi grupp (operazzjoni li tkun aktar minn insuffiċjenti u l-ogħla valur-miżjud huma meħtieġa) b’kondizzjoni waħda, ibbażata fuq l-istess metodu (it-test tal-valur miżjud) bħal dak użat biex jiġi ddeterminat jekk l-ipproċessar fuq materjal li ma joriġinax f'dan il-pajjiż huwiex suffiċjenti jew le. Prodott se jitqies li oriġina mill-pajjiż tal-grupp fejn ikun sar l-ipproċessar finali fuq materjal li joriġina minn pajjiżi oħra ta’ l-istess grupp, jekk il-valur miżjud fih ikun ogħla minn perċentwali standard.

- Sabiex ikun hemm appoġġ għall-akkumulazzjoni u l-integrazzjoni reġjonali, il-perċentwali għandha b’mod ġenerali tiġi ffissata f’livell ħafna aktar baxx minn dak meħtieġ għall-istess prodott fejn jirriżulta minn ipproċessar ta’ materjal li ma joriġinax mill-pajjiż. Iżda, biex jitqiesu sitwazzjonijiet speċifiċi f’ċerti setturi, għall-istess raġunijiet kif imsemmija hawn fuq, il-limitu tal-valur ta’ l-akkumulazzjoni jista’, fejn xieraq, jkun definit u/jew supplimentat b’kondizzjonijiet jew kriterji addizzjonali, biex ma jkunx hemm applikazzjoni ħażina jew tidwir possibbli ta’ preferenzi.

2. Proċeduri effiċjenti: responsabbiltajiet ta’ l-operaturi ekonomiċi u l-awtoritajiet pubbliċi fit-twaqqif u l-kontroll ta’ l-oriġini preferenzjali

- Huma x’inhuma l-objettivi speċifiċi, l-arranġamenti preferenzjali ma jistgħux jingħataw forma oħra xierqa sempliċement permezz tar-reviżjoni tal-kondizzjonijiet legali li jridu jiġu sodisfatti biex jitgawda t-trattament preferenzjali. Reviżjoni ta’ dan it-tip għandha tkun akkumpanjata mit-twaqqif ta’ proċeduri xierqa, kontrolli u metodi ta’ kooperazzjoni amministrattiva bejn l-awtoritajiet kompetenti tal-Partijiet fl-arranġament, li jiżguraw konformità mal-kondizzjonijiet, jipprevenu l-abbużi u jipproteġu l-interessi leġittimi ekonomiċi u finanzjarji li jkun hemm fin-nofs.

- Dan jista’ jinkiseb permezz ta’ tqassim tar-responsabbiltajiet bejn l-operaturi ekonomiċi, responsabbli mid-determinazzjoni u d-dikjarazzjonijiet li jikkonċernaw l-oriġini tal-prodotti, u l-awtoritajiet doganali, li għandhom iwettqu l-verifiki u l-kontrolli meħtieġa, filwaqt li jserrħu fuq kapaċità amministrattiva xierqa u assistenza reċiproka. F’kuntest ta' dan it-tip, il-‘provi ta’ oriġini’ jiġu sostitwiti minn ‘dikjarazzjonijiet’ u ‘stqarrijiet’ dwar l-oriġini, li jistgħu jew jiġu aċċettati jew ikkuntestati.

2.1. Dikjarazzjoni ta’ l-oriġini mill-importatur li jikklejmja il-preferenza

- L-importatur jerfa' r-responsabbiltà fir-rigward tad-dettalji tad-dikjarazzjoni tiegħu lid-dwana u d-dejn possibbli ta' dwana li jidħol għalih minħabba dikjarazzjoni mhux korretta, mingħajr preġudizzju għan-nuqqas ta’ ġbir lura ta’ dazji ġustifikati minn ‘żbalji attivi’ ta’ l-awtoritajiet kompetenti. Bħal kull element ieħor li għandu jitqies waqt li ssir dikjarazzjoni ta’ merkanzija lid-dwana, stqarrija żbaljata dwar l-istat ta’ oriġini tal-prodotti li dwarhom issir talba għal preferenza tkun parti mir-riskju kummerċjali merfugħ mill-importatur.

- Id-drittijiet bażiċi u l-obbligi ta’ l-importaturi li jkunu qegħdin jitolbu trattament preferenzjali fuq il-bażi ta’ dikjarazzjonijiet ta’ oriġini maħruġa mill-fornituri barranija tagħhom għandhom ikunu ċċarati; dan jinkludi d-definizzjoni ta’:

- il-kondizzjonijiet li taħthom l-awtoritajiet doganali tal-pajjiż importatur jistgħu jikkontestaw l-oriġini ddikjarata u jitolbu evidenza addizzjonali;

- il-piż tal-prova f’każ fejn l-awtoritajiet doganali jikkontestaw l-oriġini ddikjarata;

- l-obbligu ta’ dawn l-awtoritajiet, f’każ bħal dan u fuq talba ta’ l-importatur, li jitolbu verifika oħra mill-awtoritajiet tal-pajjiż esportatur;

- is-sitwazzjonijiet fejn l-awtoritajiet doganali huma intitolati li jirrifjutaw it-trattament preferenzjali, mingħajr preġudizzju għall-proċeduri ta’ appell disponibbli għall-importatur.

- Dawn l-elementi proċedurali, fis-seħħ fil-waqt li ssir klejm għal preferenza, għandhom jiġu addattati f’każ ta’ kontrolli oħra ta' dikjarazzjoni doganali li għaliha jkunu diġà ngħataw preferenzi.

- Sabiex l-importatur isib għajnuna hu u jagħmel id-dikjarazzjoni tiegħu ta’ oriġini, klawżoli speċjali dwar il-konformità mal-kondizzjonijiet meħtieġa ta’ oriġini għandhom jidħlu fit-tranżazzjonijiet kummerċjali bejn l-esportaturi u l-importaturi, inkluża d-definizzjoni tar-responsabbiltajiet f’każ li jkun hemm nuqqasijiet u l-possibilità li jibagħtu stqarrijiet ta’ oriġini b’mezzi elettroniċi.

2.2. Stqarrija ta’ l-esportatur dwar l-oriġini

- Għandu jkun hemm reġistrazzjoni minn qabel mill-awtoritajiet tal-pajjiż esportatur, biex jiġu identifikati dawk l-esportaturi intitolati li joperaw skond xi arranġament preferenzjali. Ir-reġistrazzjoni ta’ l-esportaturi għandha teħtieġ l-aċċess għad-dokumenti finanzjarji rilevanti u l-kontijiet. Mingħajr ma tillaxka l-kontrolli, għandha timpedixxi x wkoll li jkun hemm diskriminazzjoni kontra l-operaturi ż-żgħar.

- L-istatus ta’ oriġini għandu jiġi stabbilit u stqarrija dwar l-oriġini għandha tinħareġ mill-esportaturi rreġistrati nnifshom.

- L-esportatur għandu jkun f’pożizzjoni li jista’ jagħti prova lill-importatur li huwa rreġistrat fil-pajjiż fejn issir l-esportazzjoni.

- L-istqarrijiet għandhom jagħmluha ċara 'l għala l-prodotti esportati jistgħu jitqiesu bħala li oriġinaw fil-pajjiż benefiċjarju, bl-użu ta' formoli standard jew - fejn ikunu f'format elettroniku - dokumenti elettroniċi jew messaġġi standardizzati. Dawn il-formalitajiet għandhom jitlestew b’aktar faċilità minħabba s-simplifikazzjoni tar-regoli.

- L-iskambju ta’ informazzjoni dwar l-esportazzjonijiet preferenzjali bejn l-esportaturi u l-awtoritajiet tal-pajjiżi esportaturi għandu jsir b’mod aħjar biex ikun hemm sorveljanza xierqa ta’ l-attività ta’ l-esportatur u titwitta t-triq għal aktar kontrolli.

- L-awtoritajiet doganali tal-pajjiż esportatur ikollhom l-obbligu li jżommu lista aġġornata ta’ l-esportaturi rreġistrati tagħhom u li jissanzjonaw, bl-ingassar temporanju jew definittiv mil-lista, dawk l-esportaturi li ma jkunux konformi mar-regoli. Din il-lista għandha tkun disponibbli għall-awtoritajiet doganali tal-pajjiż importatur, bl-użu tal-mezzi elettroniċi ggarantiti biex tinżamm il-kunfidenzjalità u jiġi evitat l-abbuż.

2.3. Kontroll ta’ l-oriġini tal-prodotti u ta’ l-operaturi ekonomiċi mill-awtoritajiet tad-dwana – Kooperazzjoni amministrattiva

- Il-kontroll fuq l-importazzjonijiet preferenzjali mill-awtoritajiet tal-pajjiż importatur għandu jsir b’mod aħjar u ffukat permezz ta’ analiżi tar-riskju sabiex ma jkunx hemm xkiel fl-iskambju leġittimu kummerċjali.

- Fuq il-bażi ta’ l-istatus ta’ l-esportatur irreġistrat u l-komunikazzjoni xierqa ta’ informazzjoni dwar l-esportazzjonijiet preferenzjali, il-kontrolli fuq l-esportaturi mill-awtoritajiet tal-pajjiż esportatur għandhom jissaħħu u jkunu ffukati permezz ta’ analiżi tar-riskju.

- L-iskambju ta’ informazzjoni u l-kooperazzjoni amministrattiva bejn l-awtoritajiet tal-pajjiżi esportaturi u importaturi, inkarigati mill-kontroll ta’ l-oriġini preferenzjali, għandu jkun ibbażat fuq obbligi u proċeduri ċari u msaħħaħ minn perspettiva legali u operazzjonali.

3. ambjent żgurat: L-infurzar tar-regoli mill-awtoritajiet kompetenti

- Bi tpattija ta’ l-applikazzjoni korretta tar-regoli u l-obbligazzjonijiet, l-operaturi ekonomiċi għandhom jibbenefikaw minn ambjent żgurat fit-twettiq ta’ l-operazzjonijiet kummerċjali tagħhom skond l-arranġamenti preferenzjali.

- Biex tiżgura l-konformità mill-awtoritajiet pubbliċi ma’ l-obbligu tagħhom li japplikaw sewwa l-arranġamenti u r-regoli ta’ oriġini u biex ikun hemm kooperazzjoni sħiħa fil-prevenzjoni u l-ġlieda kontra l-abbużi, qed jiġu proposti dawn l-azzjonijiet:

3.1. Il-ħolqien tal-kondizzjonijiet ta’ konformità

3.1.1. Evalwazzjoni minn qabel tal-kapaċità tal-pajjiż/grupp ta’ pajjiżi benefiċjarju/ i li jamministra/w l-arranġament u r-regoli u l-proċeduri marbuta

- Evalwazzjoni minn qabel bħal din tikkonċerna pajjiżi li magħhom għandu jitwaqqaf arranġament ġdid jew estensjoni jew reviżjoni ta’ xi arranġament ieħor. Bħala pre-kondizzjoni għat-twaqqif ta’ l-arranġament mal-pajjiż ikkonċernat għandu jkun hemm riżultati sodisfaċenti. Fir-rigward ta’ arranġamenti ġodda preferenzjali, l-evalwazzjoni għandha tkun parti integrali mill-proċess ta’ negozjar.

- L-evalwazzjoni għandha turi li l-pajjiż ikkonċernat għandu l-organizzazzjoni, il-qafas legali u l-kapaċità operazzjonali biex jamministra u jikkontrolla t-tħaddim ta’ l-arranġament u jipprovdi b’mod xieraq assistenza u kooperazzjoni amministrattiva.

- F’każ ta’ arranġamenti minn ‘blokk għal blokk’, l-evalwazzjoni se tiffoka fuq kull reġjun ikkonċernat u se tirrapporta dwar il-kapaċità tal-grupp u ta’ kull wieħed mill-membri tagħha li jżommu l-obbligi li jirriżultaw mill-arranġament.

3.1.2. Informazzjoni, taħriġ u assistenza teknika dwar regoli preferenzjali ta’ oriġini

- L-informazzjoni aġġornata u t-taħriġ dwar ir-regoli preferenzjali ta’ oriġini, il-kondizzjonijiet li għandhom jiġu sodisfatti, l-opportunitajiet li jingħataw u l-ispejjeż li jridu jitħallsu huma r-responsabbiltà tal-pajjiżi nfushom. Madankollu, jista' jingħata appoġġ lill-pajjiżi benefiċjarji mil-livell reġjonali (meta l-pajjiż jappartieni għal grupp reġjonali), mil-livell internazzjonali (WTO u WCO) u mil-livell Komunitarju.

- Il-Kummissjoni diġà qiegħdet fuq Websajt ta’ l-Ewropa xi paġni dedikati għar-regoli ta’ oriġini, fejn informazzjoni bażika, handbooks (dwar l-SĠP u r-regoli ta’ oriġini Pan Ewropej) u links ma’ testi legali huma disponibbli. Min-naħa l-oħra d- database ‘Expanded Exports Helpdesk’ tipprovdi, skond l-isem tal-prodott, ir-regoli ta’ oriġini meħtieġa li għandhom ikunu sodisfatti fil-kuntest ta’ numru ta’ arranġamenti preferenzjali.

- Sa fejn għandu x’jaqsam l-appoġġ tekniku mill-Komunità, dan għandu jiffoka l-aktar fuq dawk il-pajjiżi li jeħtieġu aktar assistenza fil-qasam ta’ oriġini (PLŻ u l-iżgħar pajjiżi u pajjiżi fi tranżizzjoni jew rikostruzzjoni politika).

- Għal dan il-għan, l-assistenza teknika tista’ tingħata permezz tal-komponenti kummerċjali u doganali ta’ programmi eżistenti bħall-MEDA, TACIS jew CARDS, mill-istrument il-ġdid għall-Politika Ewropea tal-Viċinat jew permezz ta' strumenti li jridu jiġu żviluppati fil-kuntest ta' l-Arranġamenti reġjonali ġodda Ekonomiċi tal-Viċinat ma' l-AKP. Koordinazzjoni aħjar ma’ l-assistenza bilaterali pprovduta minn xi Stati Membri għandha madankollu tiġi żgurata.

3.2. Is-sorveljanza tal-konformità fis-sħubija

3.2.1. Is-sorveljanza tal-konformità mill-awtoritajiet pubbliċi ta’ l-obbligi fl-arranġamenti

- Tħaddim xieraq ta’ l-arranġamenti ta’ interess reċiproku sabiex jiżgura kummerċ ġust bejn il-Komunità u l-imsieħba tagħha fin-negozju. Sorveljanza xierqa ta’ dan it-tħaddim għandha għalhekk tkun żgurata fis- sħubija .

- Sabiex tinżamm ħarsa ġenerali tal-mod li bih qegħdin jaħdmu l-arranġamenti, sistema ta’ rappurtaġġ perjodiku mill-pajjiżi benefiċjarji fuq it-treġġija tagħhom u l-kontroll li għandhom fir-rigward ta’ l-oriġini preferenzjali għandha tiġi prevista fl-arranġament ikkonċernat. Rappurtaġġ simili għandu jinħoloq mill-Istati Membri lill-Kummissjoni sabiex il-Komunità jista’ jkollha ħarsa ġenerali tal-qagħda u sabiex tkun qiegħda f’pożizzjoni li tirrapporta lill-imsieħba tagħha.

- Pjan ta’ Azzjoni tal-Kummissjoni għall-monitoraġġ ta’ arranġamenti preferenzjali għandu jitlesta, b’koordinazzjoni ma’ l-Istati Membri. Għandu jkun ibbażat fuq il-ġbir ta’ tagħrif fir-rigward ta’ l-użu ta’ arranġamenti preferenzjali u t-tħaddim tal-proċeduri. Dan it-tagħrif għandu jkun dirett lejn punt ċentrali sabiex jiġi analizzat u pproċessat ħalli jiġu identifikati – jekk jista’ jkun permezz ta’ programm annwali – dawk il-prodotti u/jew dawk il-pajjiżi li jidhru li jeħtieġu monitoraġġ aktar fil-fond. Dan il-monitoraġġ għandu jseħħ billi jintużaw il-kuntatti mal-pajjiż ikkonċernat, bi kwestjonarji u, fejn hu meħtieġ bi żjarat fil-pajjiż.

- Bażijiet legali, modalitajiet tekniċi u l-iffinanzjar ta’ spejjeż involuti f’dan l-eżerċizzju ta’ monitoraġġ għandhom ikunu identifikati mill-bidu.

3.2.2. L-iżgurar tal-konformità ta’ l-operaturi ekonomiċi mar-regoli - Il-ġlieda kontra l-frodi u l-assistenza reċiproka dwar il-frodi

- Azzjoni kontra l-frodi hija priċipalment ir-responsabilità ta’ l-awtoritajiet kompetenti fil-pajjiżi ta’ esportazzjoni u importazzjoni.

- Madankollu, jinħtieġu azzjonijiet konġunti f’qasam bħal dak tat-trattament preferenzjali u l-oriġini, fejn dawn l-awtoritajiet se jkollhom rwol komplementari. Għal dan il-għan, se tintuża bis-sħiħ l- assistenza reċiproka fi kwistjonijiet ta’ frodi u l-kontribut attiv fl-istħarriġ tal-Komunità, minn pajjiżi terzi li qegħdin jibbenefikaw mill-preferenzi, huwa mistenni.

3.3. L-użu ta’ mekkaniżmi ta’ protezzjoni

- Miżuri ta’ prekawzjoni u mekkaniżi ta’ protezzjoni għandhom jintużaw kif xieraq fil-każ ta’ kontroll insuffiċjenti jew fin-nuqqas li tkun ipprovduta kooperazzjoni, inkluża għajnuna fl-istħarriġ kontra l-frodi.

- Dawn il-miżuri jinkludu notifiki lill-importaturi, sospensjoni ta’ preferenzi meta previsti u possibilment responsabilità finanzjarja tal-pajjiż li naqas milli jwettaq dan għandhom jiġu introdotti.

- Arranġamenti preferenzjali jikkonferixxu obbligi fuq l-awtoritajiet uffiċjali fir-rigward ta’ implimentazzjoni u kontroll tat-twettiq tal-kondizzjonijiet għal għoti ta' trattament preferenzjali. Kwalunkwe nuqqas ta’ osservanza ta’ l-obbligi minn dawn l-awtoritajiet se jinvolvi probabbilment li huma jkunu finanzjarjament responsabbli, kull darba li n-nuqqas ta’ osservanza ta’ obbligi minn waħda mill-partijiet tħalli impatt fuq l-interessi finanzjarji tal-parti l-oħra (telf ta’ dħul minn dazji doganali li ma jistgħux jiġu rkuprati mill-importatur) u tkun stabbilita rabta każwali bejn it-tort (jew in-nuqqas) u l-ħsara finanzjarja li tirriżulta. Ovvjament, qabel ma jintroduċu xi klawsola finanzjarja esterna ta’ responsabilità, il-Kummissjoni u l-Istati Membri għandhom jilħqu ftehim fir-rigward tar-responsabilità finanzjarja interna ta’ l-Istati Membri għall-iżbalji attivi tagħhom.

[1] Komunikazzjoni mill-Kummissjoni lill-Kunsill, il-Parlament Ewropew u l-Kumitat Ekonomiku u Soċjali Ewropew - COM(2004) 461, 7.7.2004.

[2] Komunikazzjoni mill-Kummissjoni lill-Kunsill, il-Parlament Ewropew, il-Kumitat Ekonomiku u Soċjali Ewropew u l-Kumitat tar-Reġjuni dwar il-ġejjieni tas-settur tat-tessuti u l-ilbies fl-Unjoni Ewropea wara t-tkabbir – COM(2003) 649, 29.10.2003.

[3] Regolament tal-Kummissjoni (KEE) Nru 2454/93 tat-2 ta’ Lulju 1993 (ĠU L 253, 11.10.1993), emendat l-aħħar bl-Att ta’ Adeżjoni (ĠU L 236, 23.9.2003).

[4] Green Paper dwar il-ġejjieni tar-regoli ta’ oriġini f’arranġamenti kummerċjali preferenzjali – COM(2003) 787, 18.12.2003.

[5] COM(2004) 461 dwar SĠP, punt 6.6: “ Ir-regoli ta’ oriġini jistabbilixxu l-kriterji prinċipali ta' aċċess għall-preferenzi iżda dawn ġew stipulati fi żmien meta l-ekonomija internazzjonali kienet differenti ħafna milli hi llum u meta l-prodotti kienu jsiru b'mod differenti ħafna. Fid-dawl ta’ kif qed titqies dan l-aħħar din il-kwistjoni (ara l-Green Paper li dwarha hemm riferenza fil-punt 6.3), il-ħtieġa ta’ bidla għandha għarfien fil-wisa’: fil-forma (semplifikazzjoni), fis-sustanza (emenda tar-regoli tal-kriterji ta’ oriġini u ta’ akkumulazzjoni) u fil-proċeduri (formalitajiet u kontrolli). ”